Фәсил 20
Јеһованын ҝүнүнү јаддашынызда мөһкәм сахлајын
1. Көһнә дүнјанын ағры-аҹысындан азад олаҹағыны илк дәфә өјрәндикдә һансы һиссләри кечиртдин?
МҮГӘДДӘС КИТАБДАН өјрәндијин илк мөвзулардан бири Јеһованын бүтүн јер үзүнү Ҹәннәтә чевирмәк нијјәтидир. Јени дүнјада мүһарибә, ҹинајәткарлыг, јохсуллуг, хәстәлик, әзаб-әзијјәт вә өлүм олмајаҹаг. Һәтта өлүләр дә дириләҹәк. Неҹә дә һејрәтамиз бир үмиддир! Бүтүн бунлар чох тезликлә олаҹаг, чүнки фактлар Мәсиһин Падшаһ кими ҝөзлә ҝөрүнмәз иштиракынын 1914-ҹү илдә башладығыны вә о вахтдан бәшәријјәтин бу пис дүнјанын ахыр ҝүнләриндә јашадығыны ҝөстәрир. Ахыр ҝүнләрин сонунда Јеһова пис системи мәһв едиб вәд етдији јени дүнјаны гураҹаг!
2. «Јеһованын ҝүнү» нәдир?
2 Мүгәддәс Китаб јахынлашан мәһв вахтыны «Јеһованын ҝүнү» адландырыр (2 Петер 3:10, ЈД). Һәмин «ҝүн» Јеһованын бүтүн шејтан системинә гаршы ‘гәзәб ҝүнүдүр’ (Сефанја 2:3). «Јеһованын ҝүнү» «дүнјанын бүтүн һөкмдарларынын» мәһв едиләҹәји, ибраниҹә Һар-Меҝидон адланан Күлл-Ихтијар Аллаһын бөјүк ҝүнүндә баш верәҹәк мүһарибәдә сон һәддинә чатаҹаг (Вәһј 16:14, 16). Сәнин һәјат тәрзин «Јеһованын ҝүнүнүн» јахында олмасына әмин олдуғуну нүмајиш етдирирми? (Сефанја 1:14-18; Јеремја 25:33).
3. а) Јеһованын ҝүнү нә вахт ҝәләҹәк? б) «О ҝүнү, о сааты» билмәмәјимиз һансы ҹәһәтдән фајдалыдыр?
3 Мүгәддәс Китаб Иса Мәсиһин, шејтан системи үзәриндә Јеһованын һөкмүнүн Иҹрачысы кими фәалијјәтә башлајаҹағы дәгиг вахты билдирмир. Иса демишди: «О ҝүнү, о сааты нә ҝөјдәки мәләкләр, нә дә Оғул билир; Атадан башга һеч ким билмир» (Марк 13:32). Јеһованы үрәкдән севмәјәнләр дүнјәви шејләрин изинә дүшәрәк бу ҝүнү хәјалларында тәхирә салаҹаглар. Амма Јеһованы һәгигәтән севәнләр, бу пис системин сонунун нә вахт ҝәләҹәјиндән асылы олмајараг Она сәмими гәлбдән хидмәт едәҹәкләр (Мәзмур 37:4; 1 Јәһја 5:3).
4. Иса һансы хәбәрдарлығы етди?
4 Иса Јеһованы севәнләрә хәбәрдарлыг етди: «Диггәтли вә ојаг олун!... Чүнки о вахтын нә заман ҝәләҹәјини билмәзсиниз» (Марк 13:33-37). О, диггәтимизи јемәјә, ичмәјә вә «һәјатын гајғыларына» ҹәмләшдирәрәк һансы зәманәдә јашадығымызы унутмамаға чағырырды (Лука 21:34-36; Матта 24:37-42).
5. Јеһованын ҝүнүндә нәләрин олаҹағыны Петер неҹә изаһ едир?
5 Петер дә Јеһованын ҝүнүнү јадда мөһкәм сахламағы төвсијјә етмишди. «О ҝүнүн зүһуру илә ҝөјләр јанараг јох олаҹаг вә үнсүрләр јүксәк һәрарәтлә әријәҹәкләр». «Ҝөјләр» јәни бүтүн инсан һакимијјәтләри мәһв едиләҹәк. Һәмин вахт «јер» — үмумиликдә пис инсан ҹәмијјәти вә «үнсүрләр», јәни бу пис дүнјаја мәхсус Аллаһдан сәрбәст олмаг руһу, әхлагсызлыг, вар-дөвләт һәрислији кими бахышлар вә ишләр дә јох едиләҹәк. Бунлары ‘салеһлик өмүр сүрән’ «јени ҝөјләр [Аллаһын Сәмави Падшаһлығы] вә јени јер [јер үзүндәки јени ҹәмијјәт]» әвәз едәҹәк (2 Петер 3:10-13). Дүнјаны көкүндән дәјишәҹәк һадисәләр һеч ҝөзләмәдијимиз ҝүндә вә саатда гәфилдән башлајаҹаг (Матта 24:44).
Әламәтин иҹрасыны диггәтлә изләјин
6. а) Шаҝирдләринин суалына Исанын вердији ҹавабда дејиләнләр јәһуди системи үзәриндә һансы мигјасда јеринә јетди? б) Исанын ҹавабынын һансы һиссәләри диггәти 1914-ҹү илдән сонракы һадисәләрә вә бахышлара ҹәмләшдирир?
6 Һансы дөврдә јашадығымызы нәзәрә алараг биз ахыр ҝүнләрин, јәни бу системин сонуну билдирән мүрәккәб тәркибли әламәти тәфсилаты илә өјрәнмәлијик. Гејд едәк ки, шаҝирдләрин Матта 24:3 ајәсиндә јазылмыш суалына Исанын (4-22 ајәләр) вердији ҹавабдакы һадисәләрдән бәзиләри ерамызын 33-ҹү илиндән 70-ҹи илинә гәдәрки мүддәтдә јәһуди системи үзәриндә кичик мигјасда јеринә јетмишдир. Бу пејғәмбәрлијин әсас иҹрасы исә 1914-ҹү илдән башлајан Мәсиһин «иштиракы вә системин сону» (ЈД) дөврүнә дүшүр. Матта 24:23-28 ајәләриндә ерамызын 70-ҹи илиндән башлајараг, бүтүнлүклә Мәсиһин иштиракыны да дахил едән бир дөвр әрзиндәки һадисәләрдән сөһбәт ҝедир. Матта 24:29–25:46 ајәләриндә јазыланлар исә системин сонунда баш верир.
7. а) Нә үчүн һәр биримиз индики вәзијјәтдә әламәтин неҹә јеринә јетдијини изләмәлијик? б) Абзасын сонунда ҝәтирилмиш суаллара ҹаваб верәркән әламәтин 1914-ҹү илдән бу јана неҹә јеринә јетмәси үзәриндә дүшүн.
7 Һәр биримиз әламәти јеринә јетирән һадисәләри вә бахышлары диггәтлә изләмәлијик. Мүшаһидәләримизи Мүгәддәс Китаб пејғәмбәрликләри илә тутушдурмаг Јеһованын ҝүнүнү јадда мөһкәм сахламаға көмәк едәҹәк. Ејни заманда башгаларыны бу ҝүнүн јахын олмасындан хәбәрдар едәркән сөзләримиз инандырыҹы олаҹаг (Јешаја 61:1-3). Бу мәгсәдләри фикримиздә тутараг диггәти Лука 21:10, 11 ајәләриндәки әламәтин тәркиб һиссәләринә јөнәлдән суаллары мүзакирә едәк.
«Халг халга, дөвләт дөвләтә гаршы галхаҹаг» пејғәмбәрлији 1914-ҹү илдән башлајараг неҹә јеринә јетир? Мүһарибәләри ҝөтүрсәк о вахтдан бәри нә баш верир?
1918-ҹи илдә баш галдырмыш һансы «гырғын», јәни епидемија Биринҹи Дүнја мүһарибәсиндә һәлак оланлардан даһа чох инсан һәјатына сон гојду? (Бах: «Ојаг дурун!» брошүрасы, сәһифә 4, абзас 4). Тибб саһәсиндәки јүксәк ирәлиләјишә бахмајараг, һансы хәстәликләр милјонларын өлүмүнә сәбәб олур?
Ахырынҹы јүзилликдәки елми наилијјәтләр јер үзүндә әрзаг чатышмамазлығыны арадан галдырмышдырмы?
2 Тимотејә 3:1-5 вә 13 ајәләри дүнјанын һәмишә белә олмадығыны, сон јахынлашдыгҹа вәзијјәтин ҝет-ҝедә писләшдијини ҝөстәрдијинә сәни нә инандырыр?
Инсанлар арасында ҝедән ајрылма
8. а) Матта 13:24-30, 36-43 ајәләриндә тәсвир едилән даһа һансы һадисәләри Иса бу системин сону илә әлагәләндирмишди? б) Исанын чәкдији мәсәлин мәнасы нәдир?
8 Иса башга мүһүм һадисәләри дә системин сону илә әлагәләндирмишди. Онлардан бири «Сәлтәнәтин оғулларынын» «шејтанын оғулларындан» ајрылмасыдыр. Иса бу һагда јахшы тохум вә дәлиҹә буғда мәсәлиндә данышмышды. Мәсәлдә дејилир ки, бир дүшмән јахшы тохум әкилмиш зәмијә дәлиҹә буғда сәпир. «Јахшы тохум» садиг мәсһ олунмуш мәсиһчиләри тәмсил едир. «Дәлиҹә буғда» исә өзләрини Исанын давамчысы адландыран, әслиндә Иблисин идарә етдији дүнјадан мөһкәм јапышараг «шејтанын оғуллары» олдугларыны ҝөстәрән адамлардыр. Онлар «Сәлтәнәтин оғулларындан» ајрылыр вә мәһв нишаны алырлар (Матта 13:24-30, 36-43). Бу ајрылма һәгигәтән баш верибми?
9. а) Биринҹи Дүнја мүһарибәсиндән сонра, өзүну мәсиһчи адландыранлар арасында һансы бөјүк ајрылма баш верди? б) Мәсһ олунмуш мәсиһчиләрин Падшаһлығын әсл хидмәтчиләри олдуглары нәдән ајдын олду?
9 Биринҹи Дүнја мүһарибәсиндән сонра өзләрини Мәсиһин давамчылары адландыранларын һамысы ики синфә бөлүндү: 1) Милләтләр Ҹәмијјәтини (инди Бирләшмиш Милләтләр Тәшкилаты) гәтијјәтлә дәстәкләјән, ејни заманда милли марагларыны ҝүдән Христиан дүнјасынын руһаниләринә вә онларын давамчыларына, 2) бу дүнјанын милләтләрини дејил, бүтөвлүклә Аллаһын Падшаһлығыны дәстәкләјән, мүһарибәдән сонракы дөврүн һәгиги мәсиһчиләринә (Јәһја 17:16). Онлар ‘Сәмави Сәлтәнәт һаггындакы Мүждәни’ бүтүн јер үзүндә тәблиғ етмәклә Аллаһын Падшаһлығынын әсл хидмәтчиләри олдугларыны сүбут етдиләр (Матта 24:14). Бунун нәтиҹәси нә олду?
10. Падшаһлыг һаггында тәблиғин илк бәһрәси нә олду?
10 Әввәлҹә, Иса илә сәмави Падшаһлыгда олмаға үмид едән, Аллаһын руһу илә мәсһ олунмуш мәсиһчиләрин галығы топланды. Мүхтәлиф халглардан олан бу мәсиһчиләр бир тәшкилатда бирләшдиләр. Мәсһ олунмушларын мөһүрләнмәси тезликлә баша чатаҹаг (Вәһј 7:3, 4).
11. Инди һансы јығым давам едир вә бу иш һансы пејғәмбәрликлә әлагәдардыр?
11 Сонра Мәсиһин башчылығы алтында ‘һәр милләтдән, бүтүн гәбиләләрдән, халглардан вә дилләрдән олан бөјүк издиһамын’ топланмасы башланды. «Башга гојунлар» синфинә аид олан бу адамлар «бөјүк мәшәггәт»дә сағ галыб Аллаһын јени дүнјасына ҝирәҹәкләр (Вәһј 7:9, 14; Јәһја 10:16). Сон ҝәләнә кими ҝөрүләҹәк Аллаһын Падшаһлығынын тәблиғи иши бизим дөврдә дә давам едир. Һал-һазырда башга гојунларын милјонлардан ибарәт бөјүк издиһамы, Падшаһлыг һаггында хиласедиҹи хәбәри тәблиғ етмәкдә мәсһ олунмушларын галығына сәдагәтлә көмәк едир. Бу хәбәр бүтүн халглара чатдырылыр.
Гаршыда нә ҝөзләнилир?
12. Јеһованын ҝүнү ҝәләнәдәк тәблиғлә бағлы нә гәдәр иш ҝөрүлмәлидир?
12 Јухарыда садаланан фактлар сон ҝүнләрин ахырында јашадығымызы вә Јеһованын ҝүнүнүн јахында олдуғуну ҝөстәрир. Бәс бу дәһшәтли ҝүн башлајанадәк иҹрасы ҝөзләнилән диҝәр пејғәмбәрликләр вармы? Бәли, вар. Биринҹиси, инсанларын Падшаһлыға гаршы мүнасибәтинә ҝөрә ајрылмасы һәлә гуртармајыб. Илләрлә тәблиғ ишинә ҝүҹлү мүгавимәт ҝөстәрилән бәзи јерләрдә инди јени шаҝирдләрин сајы ҝет-ҝедә артыр. Һәтта хош хәбәр гәбул едилмәјән јерләрдә белә биз шаһидлик едәндә Јеһованын мәрһәмәти тәзаһүр олунур. Она ҝөрә бу иши әзмлә ҝөрмәјә давам един! Иса бизи әмин едир ки, бу иш баша чатдыгда сон ҝәләҹәк.
13. 1 Салониклиләрә 5:2, 3 ајәләринә әсасән, һансы диггәтәлајиг һадисә олмалыдыр вә бу бизим үчүн нә мәна кәсб едәҹәк?
13 Диҝәр мүһүм Мүгәддәс Китаб пејғәмбәрлијиндә билдирилир: «Инсанлар: “Сүлһ вә тәһлүкәсизлик”, — дејәндә гәфләтән һамилә гадыны доғуш ағрылары тутдуғу кими, онлар да һәлака уғрајаҹаг вә гәтијјән хилас олмајаҹаглар» (1 Салониклиләрә 5:2, 3). «Сүлһ вә тәһлүкәсизлик» билдиришинин неҹә елан едиләҹәјини заман ҝөстәрәҹәк. Лакин бу дүнја лидерләринин бәшәријјәт гаршысында дуран проблемләри һәгигәтән һәлл едәҹәкләрини гәтијјән билдирмир. Јеһованын ҝүнүнү јаддашларында мөһкәм тутанлар бу билдиришә алданмајаҹаглар. Онлар билирләр ки, бундан дәрһал сонра гәфләтән бу системин мәһви ҝәләҹәк.
14. Бөјүк мәшәггәт әрзиндә һансы һадисәләр вә һансы ардыҹыллыгла баш верәҹәк?
14 Бөјүк мәшәггәтин башланғыҹында һакимијјәт саһибләри үмумдүнја јалан дин империјасы Бөјүк Бабилә гаршы галхыб ону мәһв едәҹәкләр (Матта 24:21; Вәһј 17:15, 16). Бунун ардынҹа халглар Јеһованын һөкмранлығынын тәрәфини тутанлара гаршы чыхаҹаглар. Бу, Јеһованын гәзәбинә сәбәб олаҹаг вә О, сијаси һакимләри вә онларын тәрәфдарларыны тамамилә мәһв едәҹәк. Бу һадисә бөјүк мәшәггәтин сон һәдди олан Һар-Меҝидонда баш верәҹәк. Сонра Шејтан өз ҹин мәләкләри илә дибсиз дәринлијә салынаҹаг вә онлар артыг инсанлара тәсир ҝөстәрә билмәјәҹәкләр. Беләликлә Јеһованын ады јүксәләҹәк (Језекел 38:18, 22, 23; Вәһј 19:11–20:3).
15. Јеһованын ҝүнүнүн һәлә чох узагда олдуғуну дүшүнмәк нә үчүн ағылсызлыг оларды?
15 Аллаһын тәјин етдији дәгиг вахтда бу систем өз сонуна јетәҹәк. Сон ҝеҹикмәјәҹәк (Һабаггуг 2:3). Јадымыза салаг ки, ерамызын 70-ҹи илиндә Јерусәлимин дармадағын едилмәси гәфилдән, јәһудиләрин ҝөзләмәдији, тәһлүкәнин совушдуғуну дүшүндүкләри анда баш вермишди. Бәс гәдим Бабил һагда нә демәк олар? Бабил гала диварлары илә әһатә едилмиш гүдрәтли, дүнјаја һөкм едән бир шәһәр иди. Амма о бир ҝеҹәдә јыхылды. Индики пис систем дә мәһз бу ҹүр, бирдән-бирә мәһв едиләҹәк. Ҝәлин Јеһованын ҝүнүнү јаддашымызда мөһкәм тутаг ки, о ҝүн ҝәләндә биз һәгиги ибадәтдә јекдил олаг.
Тәкрар үчүн суаллар
• Јеһованын ҝүнүнү јаддашымызда мөһкәм сахламаг нәјә ҝөрә ваҹибдир? Буну неҹә едә биләрик?
• Инди инсанлар арасында ҝедән ајрылма бизә неҹә тәсир едир?
• Јеһованын ҝүнү башламаздан әввәл даһа нәләр баш вермәлидир? Бунунла бағлы биз нә етмәлијик?
[180, 181-ҹи сәһифәләрдәки шәкилләр]
Шејтан системинин јох едиләҹәји ахыр ҝүнләр баша чатмаг үзрәдир