Һәгиги мәсиһчиләр нәјә ҝөрә хача ситајиш етмирләр?

МИЛЈОНЛАРЛА инсанлар хача ситајиш едир вә она һөрмәтлә јанашырлар. «Азәрбајҹан дилинин изаһлы лүғәти»ндә хач «христианлығын рәмзи сајылан... ситајиш објекти» адланыр. Лакин һәгиги мәсиһчиләр хача ситајиш етмирләр. Нәјә ҝөрә?

Ән ваҹиб сәбәбләрдән бири одур ки, Иса Мәсиһ хач үзәриндә өлмәмишдир. Адәтән «хач» кими тәрҹүмә олунан јунан сөзү стаурос, әслиндә ити уҹлу ағаҹ вә ја дирәк мә’насыны верир. Бир әсәрдә дејилир: «[Стаурос] сөзү һеч вахт һансыса буҹаг алтында кәсишән ики шалбан мә’насыны дашымыр... [...] [Јени Әһдин] јунанҹа мәтниндә бунун ики шалбандан ибарәт олдуғуна һеч бир ишарә јохдур» («The Companion Bible»).

Бә’зи Мүгәддәс Китаб ајәләриндә Исанын е’дамында истифадә олунан аләти билдирмәк үчүн башга сөз истифадә едилир. Бу, јунанҹа ксилон сөзүдүр (Галатијалылара 3:13). Бу сөз «шалбан, чубуг вә ја ағаҹ» мә’насыны верир.

Е’дам аләти кими нәјә ҝөрә адәтән ади дирәкдән истифадә олундуғу «Хач вә чармыха чәкилмә» китабында изаһ едилир: «Халг гаршысында е’дам етмәк үчүн сечилән јерләрин һамысында ағаҹ олмурду. Буна ҝөрә дә, јерә ади дирәк басдырылырды. Ҹинајәткары әлләри јухары галдырылмыш шәкилдә дирәјә бағлајыр вә ја мыхлајырдылар, чох вахт ајагларыны да бу ҹүр едирдиләр» (Һерман Фулда, «Das Kreuz und die Kreuzigung»).

Исанын хач үзәриндә мыхланмадығынын ән ҝүҹлү сүбуту Аллаһын Кәламында јерләшир. Һәвари Павел демишдир: «Ағаҹдан асылан һәр кәс лә’нәтләнир» (Галатијалылара 3:13). Павел бурада, Ганунун тәкрары 21:22, 23 ајәләрини ситат ҝәтирир. Бу ајәләрдә хачдан јох, тахта дирәкдән сөһбәт ҝедир. Дирәкдә е’дам олунан инсан «лә’нәтли» һесаб олундуғу үчүн, мәсиһчиләр евләрини Мәсиһин чармыха чәкилмиш шәкил вә һејкәлләри илә бәзәмәмәлидирләр.

Мә’лум олдуғу кими, Мәсиһин өлүмүндән сонра илк 300 ил әрзиндә онун давамчылары хача ситајиш етмәмишләр. Анҹаг IV әсрдә бүтпәрәст император Константин христианлығы гәбул етди вә хачы христиан дининин рәмзи е’лан етди. Константинин буну һансы нијјәтлә етмәсиндән асылы олмајараг, хачын Иса Мәсиһлә һеч бир әлагәси јохдур. Әслиндә хач бүтпәрәстлијин рәмзидир. «Јени католик енсиклопедијасы»нда дејилир: «Хача һәм христианлыгдан өнҹәки, һәм дә гејри-христиан мәдәнијјәтләриндә дә раст ҝәлинир». Бир чох диҝәр нүфузлу мәнбәләр ҝөстәрир ки, хач тәбиәт гүввәләринә ситајишлә вә бүтпәрәстлијин әхлагсыз ајинләри илә бирбаша әлагәлидир («New Catholic Encyclopedia»).

Бәс нәјә ҝөрә христианлар бу гәдим рәмзи бүтпәрәстликдән мәнимсәмишләр? Ҝөрүнүр, бүтпәрәстләри өз динләринә ҹәлб етмәк мәгсәди илә. Неҹә олурса-олсун, Мүгәддәс Китаб бүтпәрәстлијин һәр бир рәмзинә ситајиши мүһакимә едир (2 Коринфлиләрә 6:14-18). Бундан әлавә, о, бүтпәрәстлијин бүтүн нөвләрини гадаған едир (Чыхыш 20:4, 5; 1 Коринфлиләрә 10:14). Буна ҝөрә дә, һәгиги мәсиһчиләр хача ситајиш етмирләрa.