ФӘСИЛ 26

Тәсадүфи ҹинси әлагә барәдә нә демәк олар?

«Ҝәнҹләр јолдан чыхардыглары инсанла нәләрә јол верәҹәкләрини вә нечә нәфәрлә әлагәдә ола биләҹәкләрини ҝөрмәк үчүн тәсадүфи ҹинси әлагәдә олурлар» Пенни

«Оғланлар бу мөвзуда чох сәрбәстдирләр. Онлар бир гызла ҝөрүшүб, башгалары илә јатдыглары барәдә фәхрлә данышырлар» Едвард

БУ ҜҮН ҝәнҹләр арасында емосионал бағлылыг олмадан тәсадүфи ҹинси әлагәјә ҝирмәк ҝениш јајылыб. Һәтта бәзи ҝәнҹләрин романтик мүнасибәтләрин «әзијјәтини» чәкмәдән ҹинси әлагәдә ола биләҹәкләри танышлары вар.

Әҝәр бу кими шејләр сәнә ширникдириҹи ҝәлирсә, тәәҹҹүбләнмә! (Јеремја 17:9). Јухарыда сөзләри ҝәтирилән Едвард дејир: «Бир чох гызлар мәнә ҹинси әлагәдә олмағы тәклиф едирдиләр. Аллаһын хидмәтчиси кими, бу, мәним үчүн ән чәтин сынаг иди. “Јох” демәк чох чәтиндир!» Әҝәр сәни буна ҹәлб етмәјә чалышсалар, Мүгәддәс Китабын һансы принсипини јадда сахламалысан?

Тәсадүфи ҹинси әлагәнин нәјә ҝөрә јолверилмәз олдуғуну өјрән

Ҹинси әхлагсызлыг о дәрәҹәдә ҹидди ҝүнаһдыр ки, онунла мәшғул оланлар «Аллаһын падшаһлығына ҝирмәјәҹәкләр» (1 Коринфлиләрә 6:9, 10). Тәбии ки, бу, тәкҹә тәсадүфи ҹинси әлагәјә јох, бир-бирләрини севән ики нәфәрин ҹинси әлагәдә олмасына да аиддир. Һәр ики вәзијјәтдә дә ширникдириҹи тәсирләрә гаршы дура билмәк үчүн әхлагсызлыға Јеһова Аллаһын ҝөзү илә бахмалысан.

«Мән јүз фаиз әминәм ки, Јеһованын јолу ән јахшы һәјат јолудур» (Карен, Канада).

«Унутма ки, сән киминсә гызы вә ја оғлу, бир чохларынын исә досту вә ја һәмиманлысысан. Әҝәр бу сынаға тәслим олсан, онлары чох мәјус едәҹәксән!» (Питер, Бөјүк Британија).

Нә гәдәр ҹәлбедиҹи ҝөрүнмәсинә бахмајараг, ҹинси әхлагсызлыға даир Аллаһын нөгтеји-нәзәрини мәнимсәмәклә шәрә нифрәт етмәји баҹараҹагсан (Мәзмур 97:10).

Ајәләри оху: Јарадылыш 39:7—9. Јусифин неҹә гәти мөвге тутдуғуна вә она ширникдириҹи тәсирләрә гаршы дурмагда нәјин көмәк етдијинә диггәт јетир.

Иманынла фәхр ет

Инандығы шејләрлә фәхр етмәк вә онларын мүдафиәсиндә дурмаг ҝәнҹләрә хасдыр. Сән өз давранышынла Аллаһын нормаларыны дәстәкләдијини ҝөстәрмәк кими бир шәрәфә лајиг ҝөрүлмүсән. Евләнмәдән ҹинси әлагәдә олмаға даир нөгтеји-нәзәриндән һеч вахт утанма.

«Лап башдан әхлаг нормаларына риајәт етдијини ачыгҹа де» (Ален, Алманија).

«Мәктәбдәки оғланлар мәним ким олдуғуму вә мәни јолдан чыхармаг ҹәһдләринин боша чыхаҹағыны јахшы билирдиләр» (Вики, Бирләшмиш Штатлар).

Өз иманыны мүдафиә етмәјин, Аллаһын хидмәтчиси кими, сәнин јеткинлијә доғру ирәлиләдијини ҝөстәрир (1 Коринфлиләрә 14:20).

Ајәни оху: Сүлејманын мәсәлләри 27:11. Јадда сахла ки, сән өз дүзҝүн давранышынла Аллаһын үрәјини севиндирә биләрсән!

Гәтијјәтли ол!

«Јох» демәк чох ваҹибдир. Амма бәзән сәнин «наз еләдијини» дүшүнәрәк рәдд ҹавабыны сәһв јоза биләрләр.

«Һәр шеј — ҝејимин, данышығын, киминлә үнсијјәт етмәјин, киминлә отуруб-дурмағын “јох” дедијини ҝөстәрмәлидир» (Ҹој, Ниҝерија).

«Бунун һеч вахт мүмкүн олмајаҹағыны гәти шәкилдә билдирмәлисән. Сәнинлә ҹинси әлагәдә олмаг истәјән оғланлардан һеч вахт һәдијјә ҝөтүрмә. Онлар буну сәнә гаршы истифадә едә биләрләр» (Лара, Бөјүк Британија).

Әҝәр гәтијјәтли олдуғуну ҝөстәрсән, Јеһова да сәнә көмәк едәҹәк. Шәхси тәҹрүбәсиндән ирәли ҝәләрәк мәзмурчу Давуд Јеһова Аллаһа белә демишди: «Сәдагәтлиләрлә сәдагәтлисән» (Мәзмур 18:25).

Ајәни оху: 2 Салнамәләр 16:9. Јеһованын дүзҝүн оланы етмәк истәјәнләрә неҹә дәстәк олдуғуна диггәт јетир.

Нәтиҹәсини дүшүн

Мүгәддәс Китабда дејилир: «Узагҝөрән габагҹадан шәри ҝөрүб ондан гачар» (Сүлејманын мәсәлләри 22:3). Сән буну неҹә едә биләрсән? Һәрәкәтинин нәтиҹәсини дүшүнмәклә!

«Бу кими шејләр һагда данышан инсанлардан баҹардығын гәдәр узаг дур» (Наоми, Јапонија).

«Шәхси мәлуматларыны: үнваныны вә ја телефон нөмрәни башгаларына вермә» (Диана, Бөјүк Британија).

Данышыг тәрзини, давранышыны, кимләрлә вахт кечирдијини, адәтән, һаралара ҝетдијини дүшүн. Сонра өзүндән соруш: «Бәлкә, өзүм дә билмәдән давранышларымла башгаларынын мәнә ҹинси әлагәдә олмағы тәклиф етмәләринә ишарәләр верирәм?»

Ајәләри оху: Јарадылыш 34:1, 2. Динанын јанлыш јердә олмасынын фаҹиә илә нәтиҹәләнмәсинә диггәт јетир.

Унутма ки, тәсадүфи ҹинси әлагә Јеһова Аллаһын ҝөзүндә чох ҹидди мәсәләдир; бу, сәнин үчүн дә белә олмалыдыр. Дүзҝүн оланы етмәкдә гәти гәрарлы олмагла Аллаһ гаршысында тәмиз виҹданыны вә өзүнәһөрмәт һиссини горујаҹагсан. Карли адлы бир гыз белә дејир: «Нәјә ҝөрә киминсә ани һәзз алмасы үчүн сәндән истифадә етмәсинә јол верәсән? Бу гәдәр зәһмәт чәкиб газандығын тәмиз ады ҝөз бәбәјин кими гору!»

АЧАР АЈӘ

“Вар ҝүҹүнүзлә чалышын ки, Аллаһ сизи ахырда ләкәсиз, гүсурсуз вә әмин-аманлыг ичиндә јашајан тапсын” 2 Петер 3:14

МӘСЛӘҺӘТ

Өз дахили аләминин үзәриндә ишлә (1 Петер 3:3, 4). Аллаһа мәгбул кејфијјәтләр сәни һеч бир әхлаг нормаларына риајәт етмәјән инсанлардан горујаҹаг.

БИЛИРСӘН... ?

Аллаһын нијјәти одур ки, ҹинси әлагә инсанда әхлагсызлығын доғурдуғу нараһатчылыг, өзүнә әминсизлик вә пешманчылыг һисси јох, мәмнунлуг ҝәтирсин — бу исә јалныз никаһ дахилиндә мүмкүндүр.

ҺӘРӘКӘТ ПЛАНЫ!

Јусифин әхлаги ҹәһәтдән тәмиз галмаг нүмунәсини изләјә билмәк үчүн мән... ․․․․․

Динанын етдији сәһви тәкрарламамаг үчүн мән... ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Никаһдан габаг ҹинси әлагә ширникдириҹи ҝөрүнсә дә, нәјә ҝөрә јолверилмәздир?

● Әҝәр кимсә сәнә ҹинси әлагәдә олмағы тәклиф етсә, нә едәҹәксән?

[185–ҹи сәһифәдәки јазы]

«Мөһкәм ол! Бир оғлан мәнә әхлагсыз тәклиф едәндә сәрт шәкилдә: “Чәк әлини чијнимдән!” — дејиб ондан узаглашдым» Елен

[187–ҹи сәһифәдәки шәкил]

Өзүнү дәјәр-дәјмәзә сатма