ФӘСИЛ 31

Ајрылыға неҹә таб ҝәтирә биләрәм?

«Биз беш ил иди ки, достлуг едирдик, сонра ҝөрүшмәјә башладыг. Ҹәми алты ај ҝөрүшдүкдән сонра о, бирдән-бирә мүнасибәтимизә сон гојду. Һеч бир сөз демәдән үнсијјәти кәсди. Санки, мәни үрәјимдән вурду. Дурмадан өзүмдән сорушурдум: “Мән нәји дүз еләмәдим, ахы?”» Сәма

АЈРЫЛЫГ инсанын севинҹини бир анда кәдәр ҝөз јашларына чевирә биләр. Ҝәл Ҹәмил илә Нурајын нүмунәсинә бахаг. Онлар ики ил иди ки, ҝөрүшүрдүләр вә бу мүддәт әрзиндә араларында ҝүҹлү бағлылыг јаранмышды. Ҹәмил ҝүн әрзиндә Нураја севҝи месажлары јазыр вә вахташыры һәдијјәләр верирди. Нурај дејир: «Ҹәмил һәмишә мәни динләјир вә баша дүшмәјә чалышырды. Өзүмү дәјәрли һисс едирдим».

Гыса бир мүддәтдән сонра онлар аилә гураҹагларындан вә тојдан сонра һарада јашајаҹагларындан данышырдылар. Ҹәмил һәтта үзүк алмаг үчүн Нурајын бармағынын өлчүсүнү дә ҝөтүрмүшдү. Сонра бирдән-бирә мүнасибәтләринә сон гојду. Нурај пәришан һалда иди, санки, бүтүн һиссләри өлмүшдү: ҝүндәлик ишләрини садәҹә бир робот кими јеринә јетирирди. О дејир: «Артыг ҝүҹүм галмамышды, мәнәви ҹәһәтдән түкәнмишдим»a.

Нијә бу гәдәр әзаб верир?

Әҝәр белә бир шеј сәнин дә башына ҝәлибсә, јәгин: «Ҝөрәсән, нә вахтса нормал һәјата гајыда биләҹәјәмми?» — суалы сәни дә нараһат едир. Белә һиссләр кечирмәјин тәбии һалдыр. «Севҝи өлүм гәдәр гүввәтлидир», — дејә Сүлејман падшаһ јазмышдыр (Нәғмәләр нәғмәси 8:6). Ола билсин, ајрылыг сәнин һәјатда алдығын ән ағыр зәрбәдир. Бәзиләри ајрылығы һәтта өлүмә бәнзәдирләр. Һамыда олдуғу кими, сәнин дә һиссләрин бир нечә мәрһәләдән кечә биләр:

Инкар. «Јох, бу, сон дејил. Бир-ики ҝүндән сонра фикрини дәјишәҹәк».

Гәзәб. «Буну мәнә неҹә едә биләр? Она нифрәт едирәм!»

Мәјуслуг. «Һеч кимә лазым дејиләм. Артыг мәни һеч ким севмәјәҹәк».

Гәбул етмәк. «Һәр шеј јахшы олаҹаг. Бу ајрылыг мәнә дәрин јара вурса да, јаваш-јаваш өзүмә ҝәлирәм».

Әмин ола биләрсән ки, сонунҹу мәрһәләјә мүтләг чатаҹагсан. Бунун нә вахт баш верәҹәји мүхтәлиф амилләрдән — мүнасибәтинизин нә гәдәр давам етмәсиндән вә бир-биринизә нә гәдәр бағлы олмағыныздан асылыдыр. Бәс бу мүддәт әрзиндә сән нә едә биләрсән?

Һәјат давам едир

Белә бир мәсәл вар: «Заман һәр дәрдин дәрманыдыр». Севдијин адамдан тәзәҹә ајрыланда бу сөзләр сәнә чох мәнасыз ҝәлә биләр. Әлбәттә, һәр шеји заманын өһдәсинә бурахмаг олмаз. Тутаг ки, сән јараланмысан. Вахт кечдикҹә јаран сағалаҹаг, амма инди сәни инҹидир. Әввәлҹә, ганы дајандырмаг вә ағрыны кәсмәк лазымдыр. Сонра диггәтли ол ки, јараја инфексија дүшмәсин. Ајрылыг әзабы барәдә дә ејни шеји демәк олар. Инди өзүнү чох пис һисс едирсән. Анҹаг сән ағрыны јүнҝүлләшдирә вә үрәјинин «гәзәбә» јолухмасынын гаршысыны ала биләрсән. Вахт өз ишини ҝөрәҹәк, бәс сән өз тәрәфиндән нә едә биләрсән? Нөвбәти аддымлары атмаға чалыш:

● Ҝөз јашларыны боғма. Ағламагда пис бир шеј јохдур. Мүгәддәс Китабда дејилир ки, «ағламағын», һәтта «јас тутмағын» вахты вар (Ваиз 3:1, 4). Ағламаг зәифлијин әламәти дејил. Ҹәсур дөјүшчү олан Давуд белә сарсынты кечирдији анларда демишди: «Һәр ҝеҹә ағламагдан дөшәјим исланыр, ҝөз јашларымдан јатағым јаш олур» (Мәзмур 6:6).

● Сағламлығынын гејдинә гал. Идманла мәшғул олмаг вә дүзҝүн гидаланмаг ҝүҹүнү бәрпа етмәјә көмәк едәҹәк. Мүгәддәс Китабда дејилир: «Физики мәшгин фајдасы» вар (1 Тимотејә 4:8).

Сағламлыгла бағлы нәјә диггәт јетирә биләрсән?

․․․․․

● Фикрини јајындырмаға чалыш. Сәнин үчүн мараглы олан ишләрлә мәшғул ол. Ән ваҹиби, өзүнү инсанлардан тәҹрид етмә (Сүлејманын мәсәлләри 18:1). Сәнә дәјәр верән инсанларла үнсијјәт диггәтини мүсбәт шејләрә ҹәмләмәјә көмәк едәҹәк.

Гаршына һансы мәгсәдләри гоја биләрсән?

․․․․․

● Һиссләрин барәдә Аллаһа дуа ет. Буну етмәк елә дә асан олмаја биләр. Ајрылдыгдан сонра бәзиләринә елә ҝәлә биләр ки, Аллаһ онлара хәјанәт едиб. Онлар фикирләширләр: «Кимисә тапмаг үчүн о гәдәр дуа етмишдим. Инди башыма ҝәләнләрә бах!» (Мәзмур 10:1). Мәҝәр Аллаһын арадүзәлдән олдуғуну дүшүнмәк дүзҝүн олардымы? Әлбәттә ки, јох! Әҝәр оғлан мүнасибәтә сон гојмаг истәјирсә, бунда Аллаһын нә ҝүнаһы вар? Үстәлик, јадда сахла ки, Јеһова сәнин гејдинә галыр (1 Петер 5:7). Буна ҝөрә дә дуада бүтүн һиссләрини Онунла бөлүш. Аллаһын Кәламында дејилир: «Һәр диләјинизи дуа, јалварыш вә шүкранла Аллаһа билдирин. Аллаһын вердији гәлб раһатлығы бүтүн инсан фикирләрини үстәләјир; о, үрәјинизи вә зеһнинизи Мәсиһ Иса васитәсилә горујаҹаг» (Филипилиләрә 4:6, 7).

Ајрылығын вердији әзабын өһдәсиндән ҝәлмәјә чалышаркән конкрет нә барәдә дуа едә биләрсән?

․․․․․

Ирәлијә бах

Јараларын сағалдыгдан сонра баш верәнләри диггәтлә нәзәрдән кечирмәјин фајдалы оларды. Өзүнү буна һазыр һисс етдикдә 224-ҹү сәһифәдәки «Бу ајрылыгдан нә өјрәнә биләрәм?» адлы чәрчивәдә ҝәтирилән суаллара ҹаваб јаз. Бунун сәнә көмәји дәјә биләр.

Ола билсин, бүтүн үмидләрин пуч олуб. Јадда сахла ки, туфан гопанда инсанын ҝөзүнә ҝөрүнән јалныз гара булудлар вә лејсан јағыш олур. Амма јағыш мүтләг кәсәҹәк вә ҝөјүн үзү ачылаҹаг. Бу фәслин әввәлиндә сөзләри ҝәтирилән ҝәнҹләрин һәјатында бир мүддәтдән сонра һәр шеј өз гајдасына дүшдү. Әмин ол ки, сәндә дә һәр шеј јахшы олаҹаг!

[Һашијә]

АЧАР АЈӘ

“[Јеһова] сыныг гәлбләрә шәфа верәр, јараларыны сарыјар” Мәзмур 147:3

МӘСЛӘҺӘТ

Фәслин әввәлиндә ады чәкилән Нурај өзү үчүн Мүгәддәс Китаб ајәләринин сијаһысыны тутмушду вә өзүнү чарәсиз һисс едән анларда бу ајәләри охујурду. Онун кими сән дә бу фәсилдәки ајәләрдән јарарлана биләрсән.

БИЛИРСӘН... ?

Јенијетмәлик дөврүндә башлајан мүнасибәтләр надир һалларда евлиликлә нәтиҹәләнир, евләнәнләрин исә бошанмаг еһтималы јүксәкдир.

ҺӘРӘКӘТ ПЛАНЫ!

Ајрылдыгдан сонра нормал һәјата гајытмаг үчүн мән... ․․․․․

Бундан сонра гураҹағым мүнасибәтин уғурлу олмасы үчүн үзәриндә ишләмәли олдуғум саһә: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Башына ҝәләнләрдән өзүн барәдә нә өјрәндин?

● Әкс ҹинс һаггында нә өјрәндин?

[227–ҹи сәһифәдәки јазы]

“Вахт кечдикҹә һәр шеј сәнә ајдын олур. Јаваш-јаваш сакитләшмәјә башладыгдан сонра исә вәзијјәтә објектив јанашаҹаг вә стрессин кечиб ҝетдијини һисс едәҹәксән. Үстәлик, өзүнү даһа јахшы таныјаҹаг вә сәнә неҹә инсан лазым олдуғуну анлајаҹагсан, бир дә һәмин вәзијјәтлә үзләшмәмәјә чалышаҹагсан” Тәранә

[224–ҹү сәһифәдәки чәрчивә]

Чәрчивә

Бу ајрылыгдан нә өјрәнә биләрәм?

Бәлкә, ајрылманыза сән сәбәб олмусан? Әҝәр беләдирсә, ајрылманыз үчүн әсаслы сәбәб һесаб едиб-етмәмәјиндән асылы олмајараг, һәмин сәбәби ашағыда јаз. ․․․․․

Сәнҹә, башга һансы сәбәбләр ола биләрди? ․․․․․

Мүмкүн олсајды, нәји дәјишдирәрдин? ․․․․․

Бу тәҹрүбә сәнә руһани вә емосионал ҹәһәтдән һансыса дәјишикликләр етмәли олдуғуну ҝөстәрдими? ․․․․․

Бундан сонра киминләсә мүнасибәт гураркән давранышында һансы дәјишикликләри едәҹәксән? ․․․․․

[223–ҹү сәһифәдәки шәкил]

Ајрылыг бир јара кимидир: инди инҹидир, амма бир вахтдан сонра сағалаҹаг