Дар ҝүндә баҹы-гардашларымызын дадына јетирик

Һансыса јердә фәлакәт баш верәндә Јеһованын Шаһидләри орада јашајан баҹы-гардашлара көмәк етмәк үчүн дәрһал тәдбир ҝөрмәјә башлајырлар. Бу, арамызда әсл мәһәббәтин олдуғуна дәлаләт едир (Јәһја 13:34, 35; 1 Јәһја 3:17, 18). Ҝәлин бахаг биз баҹы-гардашларымыза неҹә көмәк едирик.

Мадди јардым. Биринҹи әсрдә Јәһудијјәдә бәрк аҹлыг оланда Антакјадакы мәсиһиләр орадакы гардашлара јардым ҝөндәрдиләр (Һәвариләрин ишләри 11:27—30). Бу ҝүн биз дә дүнјанын һансы јериндә олурса-олсун, диндашларымызын фәлакәтлә үзләшдијини ешидәндә дәрһал тәдбир ҝөрмәјә башлајырыг. Онлара јығынҹағымыз васитәсилә јардым ҝөндәририк (2 Коринфлиләрә 8:13—15).

Әмәли көмәк. Фәлакәт баш верән јерләрдә ағсаггаллар јығынҹағын һәр бир үзвүнү сораглашыб тапыр, онларын сағ-саламат олдуғундан архајын олур. Јардым комитәси баҹы-гардашларын әрзаг, ичмәли су, ҝејим, сығынаҹаг вә тибби јардымла тәмин олунмасы үчүн тәдбирләр ҝөрүр. Мүәјјән баҹарығы олан Шаһидләр өз һесабларына о јерләрә ҝедир, әлләриндән ҝәлән көмәји ҝөстәрир, евләрин вә ибадәт јерләринин бәрпасында иштирак едирләр. Тәшкилатымызда һөкм сүрән бирлик, чијин-чијинә чалышараг газандығымыз тәҹрүбә көмәк едир ки, тез бир заман ичиндә бүтүн ҝүҹүмүзү сәфәрбәр едиб баҹы-гардашларымызын дадына чатаг. Биз тәкҹә иман гардашларымыза дејил, мүмкүн олан јердә, дининдән асылы олмајараг, һамыја көмәк әлимизи узадырыг (Галатијалылара 6:10).

Руһани вә мәнәви дајаг. Фәлакәтлә үзләшәнләрин тәсәллијә бөјүк еһтијаҹы олур. Белә һалларда «һәр ҹүр тәсәлли Аллаһы» Јеһова бизә ҝүҹ-гүввәт верир (2 Коринфлиләрә 1:3, 4). Биз чох истәјирик ки, сабаһа үмиди олмајан инсанлар Аллаһын ҝөзәл вәдини, тезликлә Онун Падшаһлығынын әзаб-әзијјәтә сон гојаҹағыны билсинләр. Буна ҝөрә дә бу хәбәри онларла бөлүшүрүк (Вәһј 21:4).

• Фәлакәт баш верәндә нәјин сајәсиндә тез бир заманда ҝүҹүмүзү сәфәрбәр едә билирик?

• Сағ галанлара неҹә тәсәлли веририк?