Аллаһын ирадәсини јеринә јетирән тәшкилат

ДҮНЈАДА сајсыз-һесабсыз дини, сијаси, тиҹари вә иҹтимаи тәшкилатлар мөвҹуддур. Онларын һәрәсинин өзүнәмәхсус ҹәһәти, мәгсәди, нөгтеји-нәзәри вә фәлсәфәси вар. Амма бир тәшкилат вар ки, башгаларындан тамамилә фәргләнир. Аллаһын Кәламы ачыг-ајдын ҝөстәрир ки, бу, Јеһованын Шаһидләри тәшкилатыдыр.

² Нә јахшы ки, сиз дә Јеһованын тәшкилаты илә сых тәмасдасыныз. Сиз Аллаһын ирадәсини дәрк едиб Ону разы салмаға чалышырсыныз (Зәб. 143:10; Ром. 12:2). Араларында мәһәббәтин һөкм сүрдүјү үмумдүнја гардашлыгла фәал шәкилдә хидмәт едирсиниз (2 Кор. 6:4; 1 Бут. 2:17; 5:9). Аллаһын Кәламында вәд едилдији кими, бу, сизә бол бәрәкәт вә хошбәхтлик ҝәтирир (Мәс. 10:22; Марк 10:30). Бу ҝүн Јеһова Аллаһын ирадәсини сәдагәтлә јеринә јетирмәклә сиз әбәди вә ҝөзәл ҝәләҹәјинизин тәмәлини гојурсунуз (1 Тим. 6:18, 19; 1 Јәһ. 2:17).

³ Улу Јараданымыз гејри-ади вә дүнја мигјасында фәалијјәт ҝөстәрән бир тәшкилат јарадыб; бу тәшкилатын башында дуран Онун Өзүдүр. Бизим Она етибарымыз сонсуздур. О, бизим Һакимимиз, Ганунверәнимиз вә Падшаһымыздыр (Әшј. 33:22). Јеһова низам-интизам Аллаһыдыр. Одур ки, «Онунла бирликдә чалышараг» мүгәддәс хидмәти иҹра етмәјимиз үчүн мүәјјән тәдбирләр ҝөрүб (2 Кор. 6:1, 2).

⁴ Армаҝеддон ҝүнбәҝүн јахынлашыр вә биз Падшаһ Мәсиһ Исанын рәһбәрлији алтында ирәли ҝедирик (Әшј. 55:4; Вәһј 6:2; 11:15). Исанын өзү демишди ки, шаҝирдләри о, јер үзүндә оланда ҝөрдүјү ишләрдән дә бөјүк ишләр ҝөрәҹәкләр (Јәһ. 14:12). Бәли, вахтлары чох олдуғундан вә сајлары ҝет-ҝедә артдығындан Исанын шаҝирдләри хош хәбәри даһа бөјүк әразидә јајаҹагдылар. Онлар Падшаһлыг һаггында мүждәни јерин уҹгарларынадәк тәблиғ едәҹәкдиләр (Мәт. 24:14; 28:19, 20; Һәв. 1:8).

⁵ Бу сөзләр артыг өз тәсдигини тапыб. Амма Иса ајдын шәкилдә демишди ки, тәблиғ иши Јеһова Аллаһын тәјин етдији вахтда дајандырылаҹаг. Аллаһын пејғәмбәрлик Кәламындакы бүтүн әламәтләр ҝөстәрир ки, о мөһтәшәм вә мүдһиш ҝүн астанададыр (Јуил 2:31; Сәф. 1:14—18; 2:2, 3; 1 Бут. 4:7).

⁶ Јеһова Аллаһын бу зәманәдә ирадәсинин нәдән ибарәт олдуғуну дәрк едириксә, Онун тәләбләрини вар ҝүҹүмүзлә јеринә јетирәҹәјик. Бу о демәкдир ки, биз Аллаһын тәшкилатынын фәалијјәти илә јахындан таныш олмалы вә онунла там әмәкдашлыг етмәлијик. Аллаһын тәшкилаты Мүгәддәс Китаб принсипләри, гајда-ганунлары, ҝөстәришләри вә тәлимләри әсасында фәалијјәт ҝөстәрир (Зәб. 19:7—9).

⁷ Јеһованын халгы Мүгәддәс Китаба әсасланан бу рәһбәрлијә әмәл едәндә онларын арасында сүлһ вә әмин-аманлыг һөкм сүрүр (Зәб. 133:1; Әшј. 60:17; Ром. 14:19). Бәс бүтүн дүнјадакы баҹы-гардашлар арасындакы мүнасибәти ҝүҹләндирән нәдир? Мәһәббәт. Бәли, биз һәр шеји мәһәббәтдән ирәли ҝәләрәк едирик вә мәһәббәт бизим әсас кејфијјәтимиздир (Јәһ. 13:34, 35; Кол. 3:14). Аллаһын көмәји илә арамызда һөкм сүрән сүлһ вә әмин-аманлыг сајәсиндә биз Онун тәшкилатынын сәмави һиссәси илә бир аддымлајырыг.

ЈЕҺОВАНЫН ТӘШКИЛАТЫНЫН СӘМАВИ ҺИССӘСИ

⁸ Әшија, Һизгијал вә Дәнјал пејғәмбәр вәһјдә Јеһованын тәшкилатынын сәмави һиссәсини ҝөрмүшдү (Әшј., фәс. 6; Һизг., фәс. 1; Дән. 7:9, 10). Һәвари Јәһја да алдығы вәһјдә сәмави гурулушу ҝөрмүш вә «Вәһј» китабында ону, гисмән дә олса, тәсвир етмишди. О, Јеһованын мөһтәшәм тахтда, мәләкләрин әһатәсиндә отурдуғуну ҝөрмүшдү. Мәләкләр бәјан едирди: «Вар Олан, Вар Олмуш вә Зүһур Едәҹәк, Гадир Аллаһ Јеһова мүгәддәсдир, мүгәддәсдир, мүгәддәсдир!» (Вәһј 4:8). Јәһја һәмчинин «тахтын... гаршысында дурмуш бир гузу», Аллаһын Гузусу Иса Мәсиһи ҝөрмүшдү (Вәһј 5:6, 13, 14; Јәһ. 1:29).

⁹ Бу вәһјдә Јеһованын тахтда отурмасы она ишарәдир ки, тәшкилатына О, Өзү рәһбәрлик едир. Јеһова вә Онун уҹалығы барәдә 1 Салнамәләр 29:11, 12 ајәләриндә белә дејилир: «Еј Јеһова, әзәмәт, гүдрәт, ҹаһ-ҹалал, шан-шөһрәт, һәшәмәт Сәниндир, јердә вә ҝөјдә нә варса, һәр шеј Сәниндир. Сәлтәнәт дә Сәниндир, еј Јеһова. Сән һәр кәсдән уҹасан. Вар-дөвләти, шан-шөһрәти Сән верирсән. Һәр шејин үзәриндә һөкмрансан. Ҝүҹ, гүдрәт Сәндәдир, Сән инсаны уҹалдырсан, она ҝүҹ верирсән».

¹⁰ Аллаһла бир чалышан Иса Мәсиһ Онун дәрҝаһында јүксәк мөвге саһибидир, она бөјүк сәлаһијјәт верилиб. Аллаһ «һәр шеји Мәсиһин ајаглары алтына гојараг она табе етди вә ону јығынҹагла бағлы һәр шејин башы тәјин етди» (Ефес. 1:22). Һәвари Булус Иса һаггында дејир: «Аллаһ ону даһа јүксәк мөвгејә уҹалтды вә она бүтүн адлардан үстүн бир ад бәхш етди ки, ҝөјдә, јердә вә јерин алтында оланларын һамысы Исанын ады гаршысында диз чөксүн, һәр дил Иса Мәсиһин Аға олдуғуну ачыг-ашкар етираф етсин вә Атамыз Аллаһ шәрәфләнсин» (Филип. 2:9—11). Одур ки, биз Иса Мәсиһин һөкмранлығынын адил олдуғуна там әмин ола биләрик.

¹¹ Дәнјал пејғәмбәр вәһјдә Әзәлдән Вар Олан Аллаһын сәмави тахтда отурдуғуну ҝөрдү; «минләрлә минләр Она хидмәт едир, он минләрлә он минләр һүзурунда дурурду» (Дән. 7:10). Мүгәддәс Китабда дејилир ки, бу мәләкләр ордусу «мүгәддәс хидмәти иҹра едән, хиласы мирас алаҹаг адамлара хидмәт етмәк үчүн ҝөндәрилән руһани варлыглар»дыр (Ибр. 1:14). Бүтүн бу руһани варлыглара «тахт-таҹ, игтидар, һөкумәтләр, һакимијјәт» верилиб (Кол. 1:16).

¹² Јеһованын тәшкилатынын сәмави һиссәсини тәсәввүр етмәјә чалышсаг, вәһјдә Јеһова Аллаһы ҝөрән Әшија пејғәмбәрин һансы һиссләри кечирдијини баша дүшә биләрик. Вәһјдә Јеһова «мөһтәшәм, уҹа бир тахтда отурмушду» вә «Онун һүзурунда серафлар дурмушду». Пејғәмбәр һиссләрини бу ҹүр ифадә етмишди: «Вај һалыма! Мәһв олдум, чүнки ағзы мурдар адамам, ағзы мурдар халгын ичиндә јашајырам. Ахы Падшаһы, ордулар Аллаһы Јеһованы ҝөзүмлә ҝөрдүм!» Әшија Јеһованын тәшкилатынын мигјасыны дәрк едәндә ону ваһимә басды вә өзүнүн нә гәдәр аҹиз олдуғуну баша дүшдү. Ҝөрдүкләри она о гәдәр дәрин тәсир бағышлады ки, ҝөјдән Јеһованын һөкмләрини бәјан етмәк чағырышы сәсләнәндә о деди: «Мән ҝедәрәм! Мәни ҝөндәр!» (Әшј. 6:1—5, 8).

¹³ Јеһованын халгы да тәшкилатын фәалијјәтинин мигјасыны дәрк едәрәк ејни әһвал-руһијјәни ҝөстәрир. Тәшкилат дурмадан габаға ҝедир, биз дә онунла ајаглашмаға чалышырыг. Бунунла биз Јеһованын тәшкилатына етибар етдијимизи ҝөстәририк.

ЈЕҺОВАНЫН ТӘШКИЛАТЫ ДАИМ ИРӘЛИ ҜЕДИР

¹⁴ «Һизгијал» китабынын 1-ҹи фәслиндә Јеһова мөһтәшәм сәмави арабанын үзәриндә тәсвир олунур. Бу ҝөзәл вә гејри-ади араба Јеһованын тәшкилатынын ҝөзәҝөрүнмәз һиссәсини тәмсил едир. Јеһова Аллаһ бу арабаны мүкәммәл сурәтдә идарә едир вә ондан Өз нијјәтинә ујғун олараг истифадә едир (Зәб. 103:20).

¹⁵ Арабанын һәр чархынын ичиндә бир чарх вар, јәни ејнидиаметрли чархлар бир-биринә чарпаз шәкилдә кечирилиб. Буна ҝөрә дә чархлар «дөрд сәмтин һәр биринә ҝедә билирдиләр» (Һизг. 1:17). Чархлар бир ҝөз гырпымында сәмти дәјишә билир. Лакин бу о демәк дејил ки, араба өзбашына һәрәкәт едир. Јеһова јол вермир ки, Онун тәшкилаты һара ҝәлди, неҹә ҝәлди истигамәт ҝөтүрсүн. Һизгијал 1:20 ајәсиндә јазылыб: «Руһ һара ҝетмәк истәјирдисә,.. онлар да ора ҝедирдиләр». Беләликлә, руһу васитәсилә тәшкилатына истигамәт верән Јеһованын Өзүдүр. Бәс биз тәшкилатла бир аддымлајырыг?

¹⁶ Јеһованын тәшкилаты илә бир аддымламаг ибадәт ҝөрүшләринә ҝетмәклә, хидмәтә чыхмагла битмир. Бир аддымламаг дедикдә, әсас етибарилә, бир мәсиһи кими тәрәгги вә инкишаф етмәк нәзәрдә тутулур. Биз «даһа ваҹиб шејләри ајырд етмәји» баҹармалы вә руһани гиданы вахтлы-вахтында гәбул етмәлијик (Филип. 1:10; 4:8, 9; Јәһ. 17:3). Бир шеји дә јадда сахламалыјыг ки, јахшы тәшкилат јахшы рәһбәрлијин вә әмәкдашлығын сајәсиндә мөвҹуд олур. Буна ҝөрә дә Јеһованын ишини баша чатдырмаг үчүн Онун бизә етибар етдији руһани вә мадди шејләрдән там шәкилдә јарарланмалыјыг. Нә гәдәр ки Јеһованын сәмави арабасы илә ајаглашырыг, тәблиғ етдијимиз хәбәрә ујғун јашајаҹағыг.

¹⁷ Јеһованын тәшкилатынын көмәји сајәсиндә һамымыз Онун ишиндә тәрәгги едирик. Унутмајаг ки, сәмави арабаны Јеһованын Өзү идарә едир. Буна ҝөрә дә сәмави араба илә ајаглашмағымыз Јеһоваја еһтирам бәсләдијимизи вә Гајамыза ҝүвәндијимизи ҝөстәрир (Зәб. 18:31). Мүгәддәс Китабда белә бир вәд вар: «Јеһова халгына ҝүҹ-гүввәт верәр, Јеһова халгына әмин-аманлыг бәхш едәр» (Зәб. 29:11). Јеһованын тәшкилатында олмагла биз Ондан ҝүҹ алыр вә мүтәшәккил шәкилдә фәалијјәт ҝөстәрән халгына бәхш етдији сүлһү дадырыг. Әминик ки, Јеһованын ирадәсини инди вә әбәдијјән јеринә јетирмәклә биз Аллаһдан бол-бол хејир-дуа алаҹағыг.