Падшаһлыг ишинә дәстәк олаг

ЈЕҺОВАНЫН ШАҺИДЛӘРИ мүждәни «јерин уҹгарларынадәк» тәблиғ етмәклә Иса Мәсиһин ахырзаманла бағлы дедији пејғәмбәрлији јеринә јетирирләр (Һәв. 1:8; Мәт. 24:14). Онлар инсанлара руһани инҹиләри чатдырмаг үчүн көнүллү олараг вахтларыны вә ҝүҹләрини гурбан верирләр. Шаһидләр әминдирләр ки, Јеһова Өз әмәкдашларынын гејдинә галаҹаг, буна ҝөрә дә Онун Падшаһлығынын ишини һәр шејдән үстүн тутурлар (Мәт. 6:25—34; 1 Кор. 3:5—9). Нәтиҹәләр ајдын ҝөстәрир ки, Јеһова Аллаһ онлардан разыдыр вә бу ишә хејир-дуа верир.

ДҮНЈА МИГЈАСЫНДА

² Инсанлар бизим неҹә тәблиғ етдијимизи, Мүгәддәс Китабы, она әсасланан әдәбијјатлары пулсуз пајладығымызы биләндә онларда суал јараныр: «Бу неҹә ола биләр?» Дүздүр, Мүгәддәс Китаб вә она әсасланан әдәбијјатлар чап етмәк үчүн пул лазымдыр. Бу нәшрләри чап едән инсанларын, тәблиғ ишинә нәзарәт едәнләрин вә бу ишдә әмәји олан диҝәр инсанларын јашадығы Бејтел биналарыны тикмәк вә јахшы вәзијјәтдә сахламаг үчүн дә пул тәләб олунур. Һәмчинин рајон нәзарәтчиләринә, хүсуси тәјинатлы мүждәчиләрә, хүсуси өнҹүлләрә вә тамвахтлы хидмәтдә иштирак едән диҝәр мәсиһиләрә ишләрини давам етдирә билсинләр дејә мүәјјән мигдарда мадди көмәк ҝөстәрилир. Ҝөрүндүјү кими, истәр бир әразидә, истәр бүтүн дүнјада мүждәни тәблиғ етмәк үчүн күлли-мигдарда пул лазымдыр. Бәс бу пуллар һарадан ҝәлир?

³ Јеһованын Шаһидләринин маарифләндирмә ишинә дәјәр верән инсанлар үмумдүнја тәблиғ ишинә үрәкдән ианә едирләр. Бу иши әсас етибарилә Јеһованын Шаһидләри өзләри дәстәкләјир. Онлардан бәзиләри ианәләрини бирбаша Јеһованын Шаһидләринин филиалына ҝөндәрир. Јеһованын ибадәт евинин тикинтисини сәхавәтлә дәстәкләјән Аллаһын гәдимдә јашамыш хидмәтчиләри кими онлар да үрәкдән ианә едирләр (Чых. 35:20—29; 1 Салн. 29:9). Бәзиләри ианә кими өз әмлакыны вәсијјәт едир, амма ианәләр әсас етибарилә ајры-ајры шәхсләр, јығынҹаглар вә рајонлар тәрәфиндән кичик мигдарда едилир. Бүтүн бу ианәләр тәблиғ ишини давам етдирмәјә кифајәт едир.

⁴ Јеһованын Шаһидләри тәблиғ ишини пуллары илә вә малик олдуглары башга шејләрлә дәстәкләмәји өзләринә шәрәф билирләр. Иса илә шаҝирдләриндә пул јығмаг үчүн гуту вар иди; бу гутудакы пулдан онлар өз хәрҹләрини өдәмәк үчүн истифадә едирдиләр (Јәһ. 13:29). Мүгәддәс Китабда Исаја вә шаҝирдләринә гуллуг едән гадынлар һаггында сөз ачылыр (Марк 15:40, 41; Лука 8:3). Һәвари Булус мүждәнин тәблиғ ишинә дәстәк олан вә хидмәтиндә она көмәк етмәк истәјән инсанларын ҝөстәрдији мадди јардымы миннәтдарлыгла гәбул едирди (Филип. 4:14—16; 1 Салон. 2:9). Јеһованын Шаһидләри дә, биринҹи әсрдәки баҹы-гардашлары кими, хидмәтә ҹан јандырыр вә сәхавәт ҝөстәрир. Бунун сајәсиндә биз сәмими инсанлара һәјат сујуну һавајы верә билирик (Вәһј 22:17).

ЈЫҒЫНҸАҒЫН ТӘЛӘБАТЛАРЫНЫ ӨДӘМӘКЛӘ

⁵ Јығынҹағын тәләбатлары да ианәләрин һесабына өдәнилир. Ҝөрүшләрдә пул јығылмыр, һеч кимин бојнуна конкрет мәбләғ гојулмур. Ибадәт евләриндә ианә гутулары гојулур ки, «һәр кәс үрәјиндә гәт етдији кими версин» (2 Кор. 9:7).

⁶ Ианәләр, илк нөвбәдә, ибадәт евләрини јахшы вәзијјәтдә сахламаг вә гуллуг етмәк үчүн хәрҹләнир. Ағсаггаллар шурасы гәрара ҝәлә биләр ки, ианәнин бир һиссәсини үмумдүнја тәблиғ ишини дәстәкләмәк мәгсәдилә Јеһованын Шаһидләринин филиалына ҝөндәрсин. Бунун үчүн јығынҹаг гәтнамә гәбул етмәлидир. Беләҹә, бир чох јығынҹаглар үмумдүнја тәблиғ ишинә давамлы шәкилдә ианә едир. Һәр кәс јығынҹагда вахташыры јаранан тәләбатлары нәзәрә аларса, ианәләр барәдә тез-тез елан етмәјә еһтијаҹ галмаз.

ИАНӘЛӘРИН ҺЕСАБЛАНМАСЫ

⁷ Һәр ҝөрүшдән сонра ики гардаш гутуја јығылан пуллары чыхарыб сајыр вә гәбздә гејд едир (2 Пад. 12:9, 10; 2 Кор. 8:20). Ағсаггаллар шурасы јығылан пулун филиала ҝөндәриләнә вә јығынҹаг үчүн истифадә олунана гәдәр сахланылмасы үчүн мүәјјән тәдбирләр ҝөрүр. Малијјә һесабатына ҹавабдеһ олан гардаш јығынҹағын нәзәринә чатдырмаг үчүн ајлыг һесабат һазырлајыр, ағсаггаллар шурасынын координатору исә һәр үч ајдан бир һесабатларын јохланылмасыны тәшкил едир.

РАЈОНУН МӘСРӘФЛӘРИ

⁸ Рајон топлантыларынын, еләҹә дә рајонун диҝәр мәсрәфләри һәмин рајона аид олан Јеһованын Шаһидләринин ианәләри һесабына өдәнилир. Рајон топлантысы кечирилән бинада ианә гутулары гојулур ки, көнлүндән кечән рајонун тәләбатлары үчүн ианә едә билсин. Үстәлик, даими мәсрәфләри өдәмәк үчүн јығынҹаглар башга вахтлар да ианә едә биләрләр.

⁹ Әслиндә, рајонлар өз мәсрәфләрини өдәмәк ҝүҹүндә олмалыдыр, артыг галан вәсаити исә үмумдүнја ишинә ианә етмәлидирләр. Әҝәр рајонун һесабындакы пул топлантынын хәрҹләри үчүн аздырса, ја да нөвбәти топлантынын хәрҹләрини, мәсәлән, иҹарә һаггыны өдәмәк үчүн кифајәт етмирсә, рајон нәзарәтчиси тәдбир ҝөрәҹәк ки, јығынҹаглара ианә етмәк барәдә хатырладылсын. Һәр јығынҹағын ағсаггаллар шурасы мәсәләни мүзакирә едиб јығынҹагларынын рајонун тәләбаты үчүн нә гәдәр ианә едә биләҹәјини мүәјјән едәҹәк. Бу ианәни етмәк үчүн гәтнамә гәбул едилмәлидир.

¹⁰ Рајондакы ағсаггалларын һәлл етмәли олдуғу малијјә мәсәләси галхарса, рајон топлантысы ҝүнү рајондакы ағсаггалларын ҝөрүшү кечирилмәлидир. Мүәјјән олунмуш рајон хәрҹләри илә бағлы гәрарлар истисна олмагла, бүтүн гәрарлар ағсаггаллар тәрәфиндән гәтнамә шәклиндә гәбул олунмалыдыр. Гәтнамә конкрет мәбләғлә бағлы гәбул олунмалыдыр вә һәр дәфә рајонун бүдҹәсиндән пул ајырмаг мәсәләси галханда буну етмәк лазымдыр.

¹¹ Рајонун һесабынын вахташыры јохланылмасы үчүн тәдбирләр ҝөрүлүр.

КАСЫБЛАРА ӘЛ ТУТУРУГ

¹² Иса вә шаҝирдләри онларда олан гутудакы пулдан касыблара әл тутмаг мәгсәдилә дә истифадә едирдиләр (Марк 14:3—5; Јәһ. 13:29). Биз мәсиһиләр дә бу ҹүр мәсулијјәт дашыјырыг, чүнки Иса демишди: «Касыблар һәмишә јаныныздадыр» (Марк 14:7). Бәс Јеһованын Шаһидләри бу мәсулијјәтин өһдәсиндән неҹә ҝәлирләр?

¹³ Һәрдән јығынҹагдакы садиг мәсиһиләр јашлы, хәстә олдуглары үчүн, јахуд онлардан асылы олмајан башга сәбәбләрә ҝөрә мадди көмәјә еһтијаҹ дујурлар. Бундан хәбәр тутан аилә үзвләри, гоһумлар вә башга инсанлар онлара көмәк әли узадырлар. Онлар һәвари Јәһјанын нөвбәти сөзләринә ујғун давранмыш олурлар: «Фираван јашајан адам гардашынын корлуг чәкдијини ҝөрүб ондан шәфгәтини әсирҝәјирсә, белә адамда Аллаһ мәһәббәти неҹә јашаја биләр? Әзиз балалар, ҝәлин бир-биримизи сөздә, дилдә јох, әмәлдә, һәгигәтән севәк» (1 Јәһ. 3:17, 18; 2 Салон. 3:6—12). Еһтијаҹы олан һәмиманлыларымыза әл тутмаг да пак ибадәтин бир һиссәсидир (Јаг. 1:27; 2:14—17).

¹⁴ Тимутијә биринҹи мәктубунда һәвари Булус лајигли инсанлара көмәк етмәјин јолуну изаһ етмишди. Онун мәсләһәти 1 Тимутијә 5:3—21 ајәләриндә јазылыб. Һәр бир мәсиһи аилә үзвләринин гејдинә өзү галмалыдыр. Јашлы вә ја хәстә инсана ушаглары, нәвәләри, ја да диҝәр јахын гоһумлары бахмалыдыр. Бәзи һалларда бу ҹүр инсанлара дөвләт вә ја сосиал гурумлар мадди јардым ҝөстәрир. Гоһумлары вә ја башга кимсә бу јардымы алмагда онлара көмәк едә биләр. Елә вәзијјәт јарана биләр ки, узун илләр сәдагәтлә хидмәт етмиш гардаша вә ја баҹыја мүәјјән саһәдә бүтүн јығынҹағын көмәји лазым ҝәлсин. Әҝәр онларын аилә үзвләри вә гоһумлары јохдурса вә онлара дөвләт тәрәфиндән кифајәт гәдәр јардым ҝөстәрилмирсә, ағсаггаллар шурасы јығынҹагдан көмәк истәјә биләр. Һәр бир мәсиһи еһтијаҹы оланлара көмәк етмәји өзүнә шәрәф билир.

¹⁵ Баҹы-гардашларымызын чоху тәгиб, мүһарибә, дашгын, аҹлыг вә бу ахырзаманда баш верән диҝәр фәлакәтләр уҹбатындан еһтијаҹ ичинә дүшүр (Мәт. 24:7—9). Ола биләр, һәмин әразидәки јығынҹагларын бир-биринә көмәк етмәк үчүн имканлары олмасын. Белә олан тәгдирдә, Рәһбәрлик Шурасынын идарәси алтында дүнјанын башга јерләриндә јашајан баҹы-гардашларын јардымы лазыми үнвана чатдырылыр. Биринҹи әсрдә Кичик Асијада јашајан мәсиһиләр дә аҹлыг вахты Јәһудијјәдәки баҹы-гардашларына јардым әлләрини узатмышдылар (1 Кор. 16:1—4; 2 Кор. 9:1—5). Онлардан нүмунә ҝөтүрмәклә баҹы-гардашларымызы севдијимизи вә Иса Мәсиһин әсл давамчысы олдуғумузу сүбут едирик (Јәһ. 13:35).

НӘШРЛӘРИМИЗИН ПАЈЛАНМАСЫ

¹⁶ Мүгәддәс Китаб вә она әсасланан нәшрләр Падшаһлыг хәбәрини јајмаг ишиндә истифадә олунан ән ҝүҹлү аләтләрдир. Адәтән, ағсаггаллар шурасы јығынҹаг хидмәтчиләриндән бирини әдәбијјата ҹавабдеһ тәјин едир. Бу гардаш өз ишинә мәсулијјәтлә јанашыр. О, дәгиг гејдләр апарыр, јығынҹағын еһтијатында кифајәт гәдәр әдәбијјатын олмасы үчүн мүәјјән тәдбирләр ҝөрүр.

¹⁷ Бир мәсиһи кими биз чох ҝөзәл баша дүшүрүк ки, вахтымыз, әгли вә физики габилијјәтләримиз, баҹарыгларымыз, мал-мүлкүмүз, еләҹә дә һәјатымыз Улу Танрынын һәдијјәсидир вә онлары Аллаһын јолунда сәрф етмәлијик (Лука 17:10; 1 Кор. 4:7). Аллаһын бәхш етдији бүтүн бу шејләри дүзҝүн мәҹраја јөнәлтмәклә Јарадана мәһәббәтимизин нә гәдәр дәрин олдуғуну ҝөстәририк. Билирик ки, Јеһова сәмими-гәлбдән ҝәтирилән бүтүн һәдијјәләри үрәкдән гәбул едир. Буна ҝөрә дә малик олдуғумуз шејләрлә Она шәрәф ҝәтирмәк истәјирик (Мәс. 3:9; Марк 14:3—9; Лука 21:1—4; Кол. 3:23, 24). Иса демишди: «Тәмәннасыз алмысыныз, тәмәннасыз да верин» (Мәт. 10:8). Јеһованын јолунда ҹанымызы вә малымызы әсирҝәмәсәк, түкәнмәз севинҹ дујаҹағыг (Һәв. 20:35).