ҺИССӘ 3
Инҹиклик. Шикајәтләнмәјә әсасымыз оланда
«Јығынҹағымызда бир баҹы һагсыз јерә мәни ондан пул оғурламагда иттиһам етди. Башгалары да буну биләндә онун тәрәфини тутдулар. Үстүндән бир гәдәр кечәндән сонра һәмин баҹы мәнә јахынлашыб билдирди ки, бу ишдә мәним әлим олмадығы она мәлум олуб. Дүздүр, о үзр истәди. Амма мәнә елә ҝәлирди ки, мәнә чәкдирдикләринә ҝөрә ону һеч вахт бағышлаја билмәјәҹәјәм» (Линда).
БӘЛИ, баҹынын һәрәкәти Линданы сарсытмышды. Бәлкә дә Линданын кечирдији һиссләр сәнә дә танышдыр. Тәәссүфләр олсун ки, бәзиләринә јығынҹагдакыларын һәрәкәти елә пис тәсир едир ки, онлар һәтта руһани ишләрдән дә сојујурлар. Ола билсин, сәнинлә дә бу баш вериб.
Һеч ким бизи «Аллаһын мәһәббәтиндән ајыра билмәз»
Мүгәддәс Китабда јазылыб ки, мәсиһиләр бир-бирини севмәлидир (Јәһја 13:34, 35). Буна ҝөрә дә һәмиманлымыз гәлбимизи гыранда ону бағышламаг бизә чох чәтин ола биләр. Һәмиманлымыздан өзүмүзә гаршы һагсызлыг ҝөрәндә ҝүҹлү мәјуслуг вә гәлб ағрысы кечирә биләрик (Зәбур 55:12).
Мүгәддәс Китабда да дејилир ки, һәгигәтән дә, бәзи һалларда мәсиһи өзүнү елә апара биләр ки, диҝәринин ондан шикајәтләнмәјә әсасы олар (Колослулара 3:13). Амма белә вәзијјәтлә өзүмүз үзләшәндә бунунла барышмаг чәтин ҝәлә биләр. Бу вахт Мүгәддәс Китабдан олан үч принсипин бизә көмәји дәјә биләр.
Сәмави Атамыз һәр шејдән аҝаһдыр. Јеһова баш верән һәр шеји, еләҹә дә бизә едилән һагсызлығы вә нәләр чәкдијимизи ҝөрүр (Ибраниләрә 4:13). Биз әзаб чәкәндә О, бизим һалымыза јаныр (Әшија 63:9). Јеһова јол вермир ки, «дәрд-бәла, ағры-аҹы», јахуд башга бир шеј, һәтта Онун һансыса хидмәтчиси бизи Онун мәһәббәтиндән ајырсын (Ромалылара 8:35, 38, 39). Мәҝәр биз дә Онун кими давранмалы дејилик? Бәли, биз јол вермәмәлијик ки, нәсә, јахуд кимсә Јеһова илә арамыза ҝирсин.
Бағышламаг сәһв һәрәкәтлә разылашмаг демәк дејил. Бизә гаршы һагсызлыг едәнләри бағышламағымыз о демәк дејил ки, биз онларын һәрәкәтләрини кичилдирик, онлара бәраәт газандырырыг, үзүрлү һесаб едирик, јахуд онларын һәрәкәтләри илә разылашырыг. Унутма, Јеһова һеч вахт ҝүнаһа бәраәт газандырмыр, амма әсас варса, ҝүнаһы бағышлајыр (Зәбур 103:12, 13; Һәбгуг 1:13). Јеһова истәјир ки, биз дә башгаларыны бағышлајаг, јәни Онун кими давранаг. Белә ки, О, «әбәдијјән аҹыглы» галмыр (Зәбур 103:9; Мәтта 6:14).
Кини үрәјимиздән силмәк өз хејримизәдир. Һансы мәнада? Тәсәввүр ет, јердән ҹәми бир-ики килограмлыг даш ҝөтүрүрсән, голларыны ирәли узадыб ону әлиндә сахлајырсан. Ола билсин, дашы бир аз сахламаг чәтин олмајаҹаг. Амма чох сахламаг истәсән, онда неҹә? Ону әлиндә нә гәдәр сахлаја биләрсән: бир нечә дәгигә? Бир саат? Јохса даһа чох? Сөзсүз ки, голларын јорулаҹаг. Әслиндә, дашын чәкиси дәјишмир. Амма ону нә гәдәр чох сахласан, о, сәнә бир о гәдәр ағыр ҝәләҹәк. Кин сахламаг да беләдир. Һәтта хырда шејә ҝөрә нә гәдәр чох кин сахласаг, бир о гәдәр дә өзүмүзү инҹидәҹәјик. Буна ҝөрә дә Јеһова истәјир ки, биз кини гәлбимиздән силәк. Бәли, бу, бизим өз хејримизәдир (Мәсәлләр 11:17).
Кини үрәјимиздән силмәк өз хејримизәдир
«Мәнә елә ҝәлирди ки, Јеһова Өзү мәнимлә данышыр»
Линдаја һәмиманлысына бәсләдији кини үрәјиндән силмәјә нә көмәк етди? Ән әсасы, о, Мүгәддәс Јазылары арашдырараг нәјә ҝөрә бағышламалы олдуғу барәдә дүшүндү (Зәбур 130:3, 4). Бир фикир Линдаја хүсусилә тәсир етди. О анлады ки, биз башгаларыны бағышлајанда Јеһова да бизи бағышлајыр (Ефеслиләрә 4:32—5:2). Өјрәндикләринин она неҹә тәсир етмәси барәдә о дејир: «Мәнә елә ҝәлирди ки, Јеһова Өзү мәнимлә данышыр».
Бир гәдәр сонра Линда кини үрәјиндән гопарыб ата билди. О, һәмин баҹыны үрәкдән бағышлады. Инди онлар јахын рәфигәдирләр. Линда Јеһоваја хидмәтини давам етдирир. Әмин ол ки, Јеһова сәнә дә көмәк етмәк истәјир.