Әхлаг тәмизлијинә аид Аллаһа мәгбул мүнасибәт
“Фајдалы оланы сәнә өјрәдән вә сәни ҝетмәли олдуғун јол илә апаран Аллаһын РӘББ мәнәм” (ИШАЈА 48:17).
1, 2. а) Ҹинси әхлагла әлагәдар һамы тәрәфиндән гәбул олунмуш нөгтеји-нәзәр неҹәдир? б) Мәсиһчиләрин ҹинси әхлага мүнасибәти неҹәдир?
Б У ҜҮН дүнјанын бир чох өлкәләриндә әхлаг мәсәләләри һәр бир кәсин шәхси ишинә чеврилмишдир. Ҹинси әлагәјә нәҹиб һиссләрин тәбии ифадәси кими бахылыр, һәм дә белә әлагәдә, никаһда олмајан адамла вә истәнилән вахт олмаг олар. Әҝәр етдији һәрәкәтләрдән башгаларына хәтәр дәјмәзсә, неҹә давранаҹағына һәр кәсин өзүнүн гәрар вермәси дүзҝүн һесаб олунур. Һамы тәрәфиндән гәбул олунмуш рә’јә ҝөрә, әхлаг мәсәләләриндә, хүсусән дә сөһбәт ҹинси әлагәдән дүшәндә һеч кими мүһакимә етмәк олмаз.
2 Јегова һаггында билији оланлар исә тамамилә башга ҹүр дүшүнүрләр. Јегованы севдикләри вә Ону разы салмаг истәдикләри үчүн, Мүгәддәс Китабын принсипләринә риајәт етмәјә шаддырлар. Бу инсанлар баша дүшүрләр ки, Јегова онлары севир вә онларын рифаһына хидмәт едән, онлара хошбәхтлик ҝәтирән рәһбәрлији тәгдим едир (Ишаја 48:17). Аллаһ һәјат Мәнбәјидир. Буна ҝөрә дә мәсиһчиләр, бәдәнләринин гејдинә галмаг үчүн, ајдындыр ки, рәһбәрлији Аллаһдан истәмәлидирләр, хүсусән дә она ҝөрә ки, јени һәјатын төрәнмәси илә сых әлагәли олан ҹинси әхлаг онлар үчүн хүсуси мә’на кәсб едир.
Мәһәббәтли Јарадандан бәхшиш
3. Христиан аләминдә бир чох инсанлар ҹинси әлагә һаггында һансы тә’лимә өјрәдилмишләр вә бу тә’лим Мүгәддәс Китаба ујғун ҝәлирми?
3 Буҝүнкү дини олмајан дүнјаја зидд олараг, Христиан аләминин бә’зи нүмајәндәләри өјрәдирләр ки, ҹинси әлагәләр ејиб вә ҝүнаһдыр, Әдән бағында ишләдилән “илк ҝүнаһ”ын да Һәвванын Адәми јолдан чыхартмасындан ибарәт олдуғуну сөјләјирләр. Бу ҹүр нөгтеји-нәзәр Аллаһдан илһам алмыш Мүгәддәс Јазылара зиддир. Мүгәддәс Китаб илк инсан ҹүтү һаггында “адам вә арвады” кими сөз ачыр (Тәквин 2:25). Аллаһ онлара “сәмәрәли олун вә чохалын вә јер үзүнү долдурун” демәклә, ушаг саһиби олмаларыны истәди (Тәквин 1:28). Аллаһын Адәм вә Һәвваја әввәлҹә дүнјаја ушаг ҝәтирмәләрини бујуруб, сонра исә бу тапшырығы јеринә јетирдикләри үчүн онлары ҹәзаландырмасы мәнтигә ујғун олмазды (Мәзмур 19:8).
4. Аллаһын нијјәтинә ҝөрә, ҹинси әлагә һансы мәгсәдлә мүәјјән едилиб?
4 Улу валидејнләримизә верилмиш, даһа сонра исә Нуһа вә онун оғулларына тәкрар едилмиш бу тапшырыгдан ҝөрүнүр ки, ҹинси әлагәнин әсас ролу дүнјаја ушаг ҝәтирмәкдир (Тәквин 9:1). Лакин Аллаһын Кәламы ҝөстәрир ки, Аллаһын никаһда олан хидмәтчиләринин ҹинси әлагәдә олмаларынын мәгсәди јалныз бу олмалы дејил. Бу мүнасибәтләр әрлә арвадын мә’нәви вә физики еһтијаҹларыны лазыми тәрздә тә’мин едә биләр, һәмчинин онлара һәзз верәр. Бунунла да, әр вә арвад бир-бирләринә ән зәриф һиссләрини әкс етдирә биләрләр (Тәквин 26:8, 9; Сүлејманын мәсәлләри 5:18, 19; 1 Коринфлиләрә 7:3—5).
Аллаһ тәрәфиндән гојулан мәһдудијјәтләр
5. Аллаһ ҹинси әлагәјә аид һансы гадағалары гојду?
5 Ҹинси мејл, Аллаһ тәрәфиндән верилән бәхшишдир, амма бу, гаршысыалынмаз олмамалыдыр. Бу принсип аилә һәјатына да аиддир (1 Петер 3:1, 7; Ефеслиләрә 5:28—30). Никаһдан кәнар ҹинси әлагәләр гадаған олунмушдур. Мүгәддәс Китабда бу барәдә кәскин вә ачыг данышылыр. Аллаһын Исраил халгына вердији ганунда дејилир: “Зина етмәјәҹәксән” (Чыхыш 20:14). Даһа сонралар Иса “зинаны” вә “әхлагсызлығы”, үрәкдә баш галдыран вә инсаны мурдарлајан “бәд дүшүнҹәләрә” аид етди (Марк 7:21, 22). Аллаһдан илһам алараг һәвари Павел Коринф мәсиһчиләринә өјүд верирди: “Ҹинси әхлагсызлыгдан чәкинин” (1 Коринфлиләрә 6:18). Ибраниләрә мәктубунда исә Павел јазырды: “Гој һәр кәс никаһа һөрмәт етсин вә кәбин јатағы ләкәсиз олсун; чүнки Аллаһ, әхлагсызлары вә зинакарлары мәһкум едәҹәкдир” (Ибраниләрә 13:4).
6. Мүгәддәс Китаба әсасән, “зина” ифадәси һансы мә’наны верә биләр?
6 “Зина” ифадәси нә демәкдир? Бу сөз Јунанҹа порне́ја сөзүндән ҝөтүрүлүб, бә’зән никаһда олмајан инсанлар арасындакы ҹинси әлагәләри ифадә етмәк үчүн истифадә едилир (1 Коринфлиләрә 6:9). Башга јерләрдә, мәсәлән, Матта 5:32-ҹи вә 19:9-ҹу ајәләриндә бу ифадә даһа ҝениш мә’на дашыјыр; бу сөз һәмчинин әхлагсызлыға, јахын гоһумлар арасында вә һејванла олан ҹинси әлагәјә дә аид едилә биләр. Никаһда олмајан инсанлар арасында анус вә ја ағыз васитәсилә ҹинси әлагәләр вә башгасынын ҹинсијјәт органларыны һиссә ҝәтирмәк дә порне́ја адлана биләр. Бүтүн бу давранышлар Аллаһын Кәламында бирбаша вә ја долајысы илә мүһакимә олунур (Левилиләр 20:10, 13, 15, 16; Ромалылара 1:24, 26, 27, 32)a.
Аллаһын әхлаг ганунларындан фајдаланмаг
7. Әхлаг тәмизлији һансы фајданы ҝәтирир?
7 Јегованын ҹинси әхлага аид рәһбәрлијинә табе олмаг, гејри-камил инсанлар үчүн чәтин ола биләр. XII әсрин танынмыш јәһуди философу Ибн Мәјмун јазырды: “Бүтүн Төвратда [Мусанын ганунда] гадаған олунмуш никаһсыз јашама вә ганунсуз ҹинси әлагәләр кими јеринә јетирилмәси чәтин олан ганун јохдур”. Лакин биз Аллаһын рәһбәрлијинә итаәт ҝөстәририксә, бөјүк фајда әлдә едә биләрик (Ишаја 48:18). Мисал үчүн, бу мәсәләдә итаәткарлыг ҝөстәрмәк, бизи ҹинси јолла өтүрүлән мүалиҹәолунмаз вә өлүмҹүл хәстәликләрдән горуја биләрb. Кәбинсиз һамиләликдән мүдафиә олунарыг. Бундан әлавә, әҝәр Аллаһа мәгбул олан мүдриклијә риајәт едириксә, виҹданымыз тәмиз олар. Белә давранараг, мәнлијимизи горујар вә бизи әһатә едән инсанларын, о ҹүмләдән гоһумларымызын, һәјат јолдашымызын, ушагларымызын вә мәсиһчи баҹы-гардашларымызын һөрмәтини газанарыг. Һәмчинин биз Аллаһа мәгбул олан мүдриклијә риајәт едәрәк ҹинси әлагәјә мүнасибәтдә сағлам, мүсбәт нөгтеји-нәзәри горујуб сахлаја биләрик, бу исә никаһда хошбәхтлијимизә көмәк едәр. Бир мәсиһчи гадын јазырды: “Аллаһын Кәламындакы һәгигәт ән јахшы мүдафиәдир. Әрә ҝедәҹәјим вахты ҝөзләјирәм. Вә о заман мәсиһчи әримә исмәтли галдығымы фәхрлә дејә биләҹәјәм”.
8. Тәмиз давранышымыз һәгиги ибадәтә неҹә көмәк едә биләр?
8 Бундан әлавә, јүксәк әхлаглы давранышымызла һәгиги ибадәт һаггында олан јанлыш тәсәввүрләри арадан галдыра биләр вә инсанлары, ибадәт етдијимиз Аллаһа јахынлашдыра биләрик. Һәвари Петер јазырды: “Иман ҝәтирмәјәнләр арасында мүсбәт һәјат сүрүн ки, писликедәнләрмишсиниз кими сизә ифтира атсалар да, хејирли ишләринизи ҝөрүб, Аллаһын онлара јахынлашдығы ҝүндә, Она иззәт версинләр” (1 Петер 2:12). Јеговаја хидмәт етмәјән инсанлар, һәтта бизим тәмиз ибадәтимизи гәбул едиб бәјәнмәсәләр дә, әмин ола биләрик ки, сәмави Атамыз Онун рәһбәрлијинә табе олмаг сә’јимизи ҝөрүр вә бәјәнир, һәтта буна севинир дә (Сүлејманын мәсәлләри 27:11; Ибраниләрә 4:13).
9. Сәбәбини там анламасаг да, нәјә ҝөрә Аллаһын рәһбәрлијинә е’тибар етмәлијик? Нүмунә әсасында изаһ един.
9 Аллаһын тапшырдығы бу вә ја диҝәр ишин ваҹиблијини там анламасаг да, Она иман етмәк, Онун бизим үчүн фајдалы оланы билдијинә әмин олмаг демәкдир. Мусанын ганунундан бир нүмунәјә бахаг. Һәрби дүшәрҝәләрә аид ҝөстәришләрдән бири, нәҹиси дүшәрҝәдән кәнарда басдырмағы тәләб едирди (Тәснијә 23:13, 14). Еһтимал ки, исраиллиләр бунун нәјә ҝөрә лазым олдуғуну тамамилә анламыр, бә’зиләри исә бунун лазымсыз олдуғуну дүшүнүрдүләр. Лакин сонрадан тәбабәтә мә’лум олду ки, бу ганун, су гајнагларынын тәмиз галмасына вә һәшәратлар васитәсилә дашынан бир чох хәстәликләрдән мүдафиә олунмаға көмәк едирди. Буна бәнзәр тәрздә, Аллаһын ҹинси әлагәни кәбин јатағы илә мәһдудлашдырмасынын руһани, иҹтимаи, мә’нәви, физики вә психоложи сәбәбләри вар. Әхлаг тәмизлијини горујан инсанларын Мүгәддәс Китаб нүмунәсинә нәзәр салаг.
Јусиф јүксәк әхлаглы давранышына ҝөрә хејир-дуаланыр
10. Јусифи ким јолдан чыхармаға чалышырды вә о, буна неҹә ҹаваб верди?
10 Јәгин ки, Мүгәддәс Китабдан Јагубун оғлу Јусифин нүмунәси сизә танышдыр. О, 17 јашында икән Мисир фир’онунун мүһафизә рәиси олан Потифарын гулларындан бири олду. Јегова Јусифи хејир-дуаландырды вә вахт кечдикдән сонра ону Потифарын бүтүн еви үзәринә тә’јин етдиләр. Јусиф 20 јашына чатдыгда “әндамы ҝөзәл вә ҝөрүнүшдә ҝөзәл” бир ҝәнҹ олду. Потифарын арвады она диггәт јетирди вә ону јолдан чыхармаға чалышды. Јусиф исә ајдын изаһ етди ки, онунла разылашса нәинки ағасына хәјанәт етмиш олар, һәм дә “Аллаһа гаршы ҝүнаһ” ишләдәр. Јусиф нәјә ҝөрә белә дүшүнүрдү? (Тәквин 39:1—9).
11, 12. О дөвр үчүн Аллаһын, зинаны вә әхлагсызлығы гадаған едән јазылы ганунунун олмадығыны нәзәрә алараг, Јусифин давранышыны неҹә изаһ етмәк олар?
11 Еһтимал ки, Јусифин белә гәрар гәбул етмәсинә сәбәб инсанлар гаршысында горху дејилди. Онун аиләси узагда јашајырды, атасы исә ону өлмүш санырды. Әҝәр Јусиф зина етсәјди, онун аиләси бу һагда һеч заман билмәзди. Бундан әлавә, бу ҹүр ҝүнаһы, евдә надир һалларда олан Потифардан вә онун гулларындан да ҝизләтмәк оларды (Тәквин 39:11). Лакин Јусиф билирди ки, бу ҹүр ҝүнаһы Аллаһдан ҝизләтмәк мүмкүн дејил.
12 Еһтимал ки, Јусиф, Јегова һаггында билији олдуғу үчүн белә нәтиҹәјә ҝәлмишди. О, шүбһәсиз ки, Аллаһын Әдән бағында дедији “Бунун үчүн инсан анасыны вә атасыны бурахаҹаг вә арвадына бағланаҹагдыр вә бир бәдән олаҹагдырлар” әмрини билирди (Тәквин 2:24). Бундан әлавә, Јусифин улу нәнәси Сараны јолдан чыхармаға чалышан Филистим падшаһына Јегованын дедикләри, она мә’лум иди. Јегова падшаһа демишди: “Алдығын гадына ҝөрә, будур, сән бир өлүсән; чүнки о бир адамын арвадыдыр... Мән дә сәни мәнә гаршы ҝүнаһ ишләмәкдән горудум, бунун үчүн сәни она тохунмаға бурахмадым” (Тәквин 20:3, 6). Беләликлә, о дөврдә Јегованыны јазылы ганунунун олмамасына бахмајараг, Онун никаһ һаггындакы фикри ајдын иди. Әхлаг һаггындакы тәсәввүрләри вә Јегованы разы салмаг арзусу, Јусифи әхлагсыз давранышдан чәкиндирди.
13. Еһтимала ҝөрә, Јусиф нә үчүн Потифарын арвадындан кәнар ҝәзә билмирди?
13 Анҹаг Потифарын арвады сөзүнүн үстүндә дурараг, онунла јатсын дејә “һәр ҝүн” Јусифи дилә тутурду. Нәјә ҝөрә Јусиф садәҹә олараг ондан кәнар ҝәзмирди? О, бир гул кими мүхтәлиф тапшырыглары јеринә јетирмәли иди вә јаранан вәзијјәтә һеч ҹүр тә’сир едә билмәзди. Археоложи газынтылара әсасән, Мисир евләри елә планда тикилирди ки, анбара евин әсас һиссәсиндән кечмәк лазым ҝәлирди. Буна ҝөрә дә Јусиф һеч ҹүр Потифарын арвадындан кәнар ҝәзә билмирди (Тәквин 39:10).
14. а) Потифарын арвадындан гачдыгдан сонра Јусифин башына нә ҝәлди? б) Садиглијинә ҝөрә Јегова Јусифи неҹә хејир-дуаландырды?
14 Бир дәфә евдә тәк галдыглары заман, Потифарын арвады Јусифи тутуб, “Мәнимлә бәрабәр јат” дејә бағырды. Јусиф гачды. Рәдд едилдијиндән инҹијәрәк, Потифарын арвады Јусифи, ону зорламаг ҹәһдиндә ҝүнаһландырды. Бу нәјә сәбәб олду? Дүзҝүнлүјүнә ҝөрә Јегова Јусифи о дәгигәми мүкафатландырды? Хејр. Ону гандаллајыб, зиндана атдылар (Тәквин 39:12—20; Мәзмур 105:18). Јегова бу әдаләтсизлији ҝөрдү вә нәтиҹәдә Јусифин зиндандан чыхарылыб сараја ҝәтирилмәсинә јол ачды. О, Мисирдә сөзү кечән икинҹи адам олду вә арвад-ушагла хејир-дуаланды (Тәквин 41:14, 15, 39—45, 50—52). Јусифин нөгсансызлығы барәдәки һекајә 3 500 ил бундан әввәл гејдә алыныб ки, нәтиҹәдә Аллаһын хидмәтчиләри онун үзәриндә дүшүнсүнләр. Аллаһын әдаләтли ганунларына сәдагәт ҝөстәрилдији үчүн неҹә дә ҝөзәл хејир-дуадыр! Буна бәнзәр тәрздә, әҝәр бу ҝүн биз дә әхлаги ҹәһәтдән нөгсансызлығын фајдасыны дәрһал һисс етмәсәк дә, Јегованын бизи ҝөрдүјүнә вә вахты ҝәләндә хејир-дуаландыраҹағына шүбһә етмәмәлијик (2 Тарихләр 16:9).
Ејубун “ҝөзләри илә кәсдији әһд”
15. Ејубун “ҝөзләри илә кәсдији әһд” нә демәк иди?
15 Нөгсансызлығыны горујанлардан бири дә Ејуб иди. Иблис тәрәфиндән сынандығы заман, Ејуб һәјатыны нәзәрдән кечирди вә билдирди ки, башга шејләрлә јанашы, әҝәр Јегованын ҹинси әхлага аид принсипләрини позубса, ҹидди ҹәза чәкмәјә һазырдыр. Ејуб деди: “Ҝөзләримлә бир әһд кәсдим вә мән гыза неҹә ҝөз атарам?” (Ејуб 31:1). Ејуб бунунла демәк истәјирди ки, Аллаһын гаршысында нөгсансызлығыны горумаг әзмилә һәтта, гадына шәһвәтлә бахмагдан белә ваз кечир. Шүбһәсиз, Ејуб һәр ҝүн гадынларла гаршылашыр вә јәгин ки, еһтијаҹлары олдугда онлара көмәк едирди. Лакин романтик мәгсәдләр ҝүдәрәк гадынлар һаггында дүшүнмәји, Ејуб јол верилмәз бир иш санырды. Сынагларла гаршылашмаздан әввәл, о, бөјүк вар-дөвләтә саһиб иди вә “бүтүн шәрг оғулларындан... бөјүк иди” (Ејуб 1:3). Лакин о, вар-дөвләтиндән, гадынлары ҹәлб етмәк үчүн истифадә етмирди. Һәр шејдән ҝөрүндүјү кими, Ејуб өзүнү ҝәнҹ гадынларла, гадаған олунмуш ҹинси әлагәдә олмаг үмиди илә тәскинлик вермирди.
16. а) Нәјә ҝөрә Ејуб, никаһда олан мәсиһчиләр үчүн ҝөзәл нүмунәдир? б) Малакинин ҝүнләриндә јашајан кишиләрин давранышы Ејубун давранышындан кәскин сурәтдә нә илә фәргләнирди вә бизим зәманәмиз һаггында нә демәк олар?
16 Беләликлә, Ејуб һәм јахшы, һәм дә пис ҝүнләриндә әхлаги нөгсансызлығыны горујурду. Јегова буну ҝөрүб, Ејубу бол-бол хејир-дуаландырды (Ејуб 1:10; 42:12). Ејуб никаһда олан мәсиһчи киши вә гадынлара неҹә дә ҝөзәл нүмунә верди! Јегованын Ејубу белә чох севмәси тәәҹҹүблү дејил! Мүасир инсанларын давранышлары исә Малаки пејғәмбәрин ҝүнләриндә баш верәнләри хатырладыр. Бу пејғәмбәр, әксәр һалларда даһа ҹаван гадынларла евләнмәк үчүн арвадларыны тәрк едән бир чох кишиләри сәрт тәрздә тәнгид едирди. Јегованын гурбанҝаһы, тәрк едилмиш гадынларын ҝөз јашлары илә исладылмышды вә О, һәјат јолдашларына бу тәрздә “хәјанәт” едәнләри мүһакимә едирди (Малаки 2:13—16).
Исмәтли ҝәнҹ гадын
17. Шуламлы гыз һансы мә’нада “гапалы бир бағча”ја бәнзәјирди?
17 Нөгсансызлығыны горујан үчүнҹү шәхс Шуламлы гыз иди. Бу ҝәнҹ вә ҝөзәл гызы, бир чобандан савајы, Исраилин варлы падшаһы Сүлејман да севирди. Сүлејман тәрәфиндән ҝөзәл Нәшидәләр Нәшидәсиндә јазылмыш бүтүн һекајә боју, Шуламлы гызын исмәтини горумасы вә бунунла да ону әһатә едәнләрин һөрмәтини газанмасы һаггында данышылыр. Онун тәрәфиндән рәдд едилән Сүлејман, Аллаһдан илһам алараг бу гыз һаггында һекајә јазыр. Гызын севдији чобан да, исмәтли давранышына ҝөрә она һөрмәт едирди. Бир дәфә о, шаиранә тәрздә гызы “гапалы бир бағча” илә мүгајисә етмишди (Нәшидәләр Нәшидәси 4:12). Гәдим Исраилин ҝөзәл бағларында чешид-чешид тәрәвәзләр, әтирли чичәкләр вә нәһәнҝ ағаҹлар бол иди. Адәтән, белә бағлар һасарла вә ја диварла әһатә олунурду вә бу бағлара јалныз килидли гапыдан кечмәк оларды (Ишаја 5:5). Чобан үчүн Шуламлы гызын әхлаг тәмизлији вә ҹәлбедиҹилији, надир ҝөзәллијә малик олан белә бир баға бәнзәјирди. Гыз һәгиги мә’нада исмәтли иди. Онун зәрифлији вә нәвазиши, јалныз онун ҝәләҹәк һәјат јолдашына нәсиб оларды.
18. Јусиф, Ејуб вә Шуламлы гыз һаггындакы һекајәләр бизә нәји хатырладыр?
18 Әхлаги нөгсансызлығы горумаг барәсиндә, Шуламлы гыз буҝүнкү мәсиһчи гадынлара ҝөзәл нүмунә верди. Јегова јүксәк әхлагыны ҝөрүб, ону гијмәтләндирди, Јусиф вә Ејуб кими ону да хејир-дуаландырды. Онларын нөгсансыз давранышлары, бизә рәһбәрлик кими хидмәт етмәк үчүн Аллаһын Кәламына јазылыб. Бизим нөгсансызлығы горумаг сә’јләримиз Мүгәддәс Китаба јазылмаса да, Онун ирадәсини јеринә јетирмәјә ҹәһд ҝөстәрәнләр үчүн Јегованын “јаддаш китабы” вардыр. Јаддан чыхармајаг ки, Јегова бизи “динләјир” вә Она олан сәдагәтимиздән, әхлаги ҹәһәтдән тәмиз галмағымыз үчүн сә’ј ҝөстәрәндә севинир (Малаки 3:16).
19. а) Әхлаг тәмизлијинә неҹә мүнасибәт бәсләмәлијик? б) Нөвбәти мәгаләдә нә мүзакирә олунаҹаг?
19 Имансыз инсанлар бизә ҝүлсәләр дә, севән Јараданымыза итаәт етмәјимизә чох шадыг. Биз даһа јүксәк нормалара - Аллаһын вердији әхлаг нормаларына саһибик. Бунунла фәхр етмәли вә буну гијмәтләндирмәлијик. Әхлаги ҹәһәтдән тәмиз галараг, Аллаһын хејир-дуаларына севинәр вә ҝәләҹәкдә сонсуз хејир-дуалара хошбәхт үмид бәсләјә биләрик. Бәс әхлаги тәмизлији горумаг үчүн тәҹрүбәдә нәләр едә биләрик? Бу ваҹиб суал нөвбәти мәгаләдә мүзакирә едиләҹәк.
Изаһ едә биләрсинизми?
• Ҹинси әлагәләрә аид Мүгәддәс Китаб нә өјрәдир?
• Мүгәддәс Китаба әсасән “зина” ифадәси һансы мә’наны верә биләр?
• Әхлаги тәмизлији горумағын һансы фајдасы вар?
• Јусиф, Ејуб вә Шуламлы гыз буҝүнкү мәсиһчиләрә нә үчүн ҝөзәл нүмунәдирләр?
[Һашијәләр]
a “Ҝөзәтчи Гүлләси”нин 1984-ҹү ил, 1 декабр нөмрәсинә бахын, сәһ. 20—23, (русҹа).
b Әфсуслар олсун ки, мәсиһчи киши вә ја гадынын, Аллаһын рәһбәрлијинә итаәт етмәјән имансыз һәјат јолдашынын уҹбатындан, ҹинси јолла кечән хәстәликләрә тутулдуғу һаллар да олур.
[21-ҹи сәһифәдәки шәкил]
Јусиф әхлагсызлыгдан гачды.
[22-ҹи сәһифәдәки шәкил]
Шуламлы гыз “гапалы бир бағча” кими иди.
[23-ҹү сәһифәдәки шәкил]
Ејуб “ҝөзләри илә әһд кәсди”.