Әхлаги ҹәһәтдән тәмиз гала биләрсиниз
“Аллаһы севмәк, Аллаһын әмрләринә риајәт етмәк демәкдир” (1 ЈӘҺЈА 5:3).
1. Бу ҝүн инсанларын давранышларында һансы зиддијјәт мүшаһидә олунур?
ҺӘЛӘ чох илләр габаг, Малаки пејғәмбәр Аллаһдан илһам алараг, Аллаһа хидмәт едән инсанларла етмәјәнләрин давранышлары арасында нәзәрә чарпаҹаг шәкилдә фәргин олаҹағы бир заманын ҝәләҹәјини габагҹадан сөјләмишди. Пејғәмбәр јазырды: “О заман дөнәҹәксиниз вә салеһлә ҝүнаһкар арасында вә Аллаһа гуллуг едәнлә она гуллуг етмәјән арасында ајырд едәҹәксиниз” (Малаки 3:18). Бу пејғәмбәрлик бу ҝүн јеринә јетир. Әхлаг тәмизлији дә дахил олмагла, Аллаһын әмрләрини јеринә јетирмәк һәјатда мүдрик вә доғру һәрәкәтдир. Лакин буну етмәк һәр заман асан олмур. Иса әбәс јерә демирди ки, хилас олмаг үчүн мәсиһчиләр бүтүн гүввәләрини сәрф етмәлидирләр (Лука 13:23, 24).
2. Кәнардан олан һансы тә’сирләрә ҝөрә исмәтли галмаг чәтиндир?
2 Әхлаги ҹәһәтдән исмәтли галмаг нәјә ҝөрә чәтиндир? Һәр шејдән әввәл, кәнардан олан мүхтәлиф тә’сирләрә ҝөрә. Әјләнҹә сәнајеси мәнфи нәтиҹәләри нәзәрә алмадан, гејри-гануни ҹинси әлагәләри мәфтунедиҹи, зөвгверән вә јеткинлијә шәһадәт едән бир шеј кими тәгдим едир (Ефеслиләрә 4:17—19). Чох вахт, никаһда олмајан инсанлар арасындакы ҹинси әлагәләр нүмајиш етдирилир. Әксәр һалларда филмләрдә вә телешоуларда ҝөстәрилән ҹинси әлагәләрдә, бир-бири илә сых әлагәси олмајан вә бир-бири гаршысында ҹавабдеһлик һисс етмәјән инсанлар иштирак едирләр. Бир гајда олараг, меһрибанлыг вә гаршылыглы һөрмәт чатышмыр. Бир чохлары белә сәһнәләри ушаглыгдан мүшаһидә едирләр. Бундан әлавә, буҝүнкү әхлаг азадлығы руһунда давранмаға әтрафдакылар вадар едирләр, белә давранмајанлара исә бә’зән ҝүлүр вә онлары тәһгир едирләр (1 Петер 4:4).
3. Дүнјада бир чох инсанлар һансы сәбәбләрдән әхлагсызлыгла мәшғул олурлар?
3 Әхлаги ҹәһәтдән тәмиз галмаға инсанын тәбиәти дә мане олур. Јегова инсанлары ҹинси мејллә јаратмышдыр вә бу мејл ҝүҹлү ола биләр. Арзулар чох вахт дүшүндүкләримизлә бағлы олур, әхлагсызлыг исә Јегованын фикирләри илә ујғун ҝәлмәјән дүшүнҹә илә әлагәлидир (Јагуб 1:14, 15). “Британија тибб журналы”нда дәрҹ олунан, бу јахынларда кечирилмиш бир сорғуја әсасән илк дәфә ҹинси әлагәдә оланларын чоху бу аддымы марагдан ирәли ҝәләрәк атмышлар. Башгалары, һәмјашыдларындан чохунун ҹинси әлагә ҹәһәтдән фәал олдугларыны зәнн едәрәк, өзләри дә бакирлик вәзијјәтиндән чыхмаг истәмишләр. Диҝәрләри исә, һиссләрә гапылдыгларыны вә ја “һәмин ан бир балаҹа сәрхош” олдугларыны сөјләјирләр. Әҝәр Аллаһа мәгбул олмаг истәјириксә биз башга ҹүр дүшүнмәлијик. Әхлаги тәмизлији горумаг үчүн бизә һансы дүшүнҹә көмәк едәр?
Мөһкәм әминлик лазымдыр
4. Әхлаги ҹәһәтдән нөгсансыз галмаг үчүн биз нә етмәлијик?
4 Әхлаги ҹәһәтдән тәмиз һәјат тәрзи сүрмәк үчүн, сә’ј ҝөстәрмәјин ҝәрәк олдуғуну дәрк етмәлијик. Бу, һәвари Павелин Ромадакы мәсиһчиләрә, “Аллаһын јахшы, мәгбул вә камил ирадәсинин нә олдуғуну дәрк” един дејә јаздығы чағырышы илә ујғун ҝәлир (Ромалылара 12:2). Әхлаги нөгсансызлығын дәјәрини дәрк етмәк, Аллаһын Кәламында әхлагсызлығын мүһакимә олундуғуну јалныз билмәји дејил, бу әхлагсызлығын мүһакимә олунмасынын сәбәбләрини вә ондан гачынмағын ҝәтирдији фајдалары анламағы да өзүнә дахил едир. Сәбәбләрдән бә’зиләри әввәлки мәгаләдә мүзакирә едилиб.
5. Мәсиһчиләрин әхлаги ҹәһәтдән тәмиз галмаларына әсас сәбәб нәдир?
5 Лакин мәсиһчиләр ҹинси әхлагсызлыгдан она ҝөрә чәкинирләр ки, бу онларын Аллаһла олан мүнасибәтләринә тә’сир едир. Өјрәндијимиз кими, бизим үчүн нәјин даһа јахшы олдуғуну О, билир. Аллаһа олан мәһәббәтимиз пислијә нифрәт етмәкдә бизә көмәк едәҹәкдир (Мәзмур 97:10). “Һәр бир јахшы бәхшиш вә һәр камил һәдијјә” Аллаһдан ҝәлир (Јагуб 1:17). О, бизи севир. Биз Аллаһа итаәт едәрәк, Ону севдијимизи вә бизим үчүн етдикләрини гијмәтләндирдијимизи ҝөстәририк (1 Јәһја 5:3). Әдаләтли әмрләрини позараг, Јегованы кәдәрләндирмәк вә инҹитмәк истәмирик (Мәзмур 78:41). Она едилән мүгәддәс вә доғру ибадәтә ләкә ҝәтирәҹәк тәрздә һәрәкәт етмәкдән чәкинирик (2 Петер 2:2; Титуса 2:5). Әхлаги ҹәһәтдән тәмиз галараг, Һәгг-тәаланы севиндиририк (Сүлејманын мәсәлләри 27:11).
6. Әхлаг нормаларымыз һаггында әтрафдакылара билдирмәјимиз нәјә ҝөрә фајдалыдыр?
6 Әхлаги ҹәһәтдән нөгсансыз галмаға гәрар вердикдән сонра, бу барәдә башгаларына да билдирмәлијик: бу, мүдафиәмиз үчүн нөвбәти аддымдыр. Гој инсанлар билсинләр ки, сиз Јегованын хидмәтчиләрисиниз вә Онун јүксәк нормаларына риајәт етмәјә там әзмлисиниз. Сөһбәт сизин һәјатыныздан, бәдәниниздән вә сечиминиздән ҝедир. Бундан нә асылыдыр? Сәмави Атанызла олан гијмәтли мүнасибәтләриниз. Буна ҝөрә ајдын ҝөстәрин ки, нөгсансызлығынызы горумаг нијјәтиндәсиниз. Аллаһын принсипләринә риајәт едәрәк, Ону тәмсил етмәјимиздән фәхр дуја биләрик (Мәзмур 64:10). Әхлаг мәсәләләринә олан мүнасибәтинизи башгалары илә мүзакирә етмәјә һеч заман утанмајын. Бу барәдә ачыг данышмаг сизи мөһкәмләдәр, горујар вә башгаларыны сизин нүмунәнизә риајәт етмәјә тәшвиг едәр (1 Тимотејә 4:12).
7. Әхлаги ҹәһәтдән нөгсансыз галмаг гәрарымызы неҹә горујуб сахлаја биләрик?
7 Јүксәк әхлаг нормаларына риајәт етмәјә гәрар вердикдән вә бу һагда мөвгејимизи башгаларына билдирдикдән сонра, мүвафиг тәрздә давранмағымыз үчүн тәдбирләр ҝөрмәлијик. Бунун үчүн, мәсәлән, достлар сечәркән еһтијатлы олмаг ваҹибдир. Мүгәддәс Китабда дејилир: “Мүдрикләрлә јеријән адам мүдрик олар”. Сизин әхлаг дәјәрләринизи гијмәтләндирән шәхсләрлә достлуг един: белә достлуглар сизә ҝүҹ верәҹәкдир. Бу ајәдә һәмчинин дејилир: “Фәгәт ағылсызларын досту зәрәр ҝөрәр” (Сүлејманын мәсәлләри 13:20). Гәрарынызы зәифләдә биләҹәк инсанлардан баҹардыгҹа кәнар ҝәзин (1 Коринфлиләрә 15:33).
8. а) Нәјә ҝөрә ағлымызы фајдалы фикирләрлә гидаландырмалыјыг? б) Нәдән гачынмалыјыг?
8 Бундан әлавә, ағлымызы доғру, ҹидди, әдаләтли, пак, севҝијә лајиг олан, һаггында јахшы сөјләнилән, фәзиләт вә тә’рифә лајиг шејләрлә гидаландырмалыјыг (Филипилиләрә 4:8). Буну, бахдығымыз вә охудуғумуз шејләрә, һәмчинин динләдијимиз мусигијә еһтијатла јанашараг едирик. Әхлагсыз әдәбијјатын позуҹу тә’сир ҝөстәрмәдијини сөјләмәк, әхлаги әдәбијјатын бизә мүсбәт тә’сири олмадығыны иддиа етмәјә бәрабәрдир. Јаддан чыхармајын ки, гејри-камил инсанлар әхлагсызлыға асанлыгла јуварлана биләрләр. Шәһвани һиссләр ојадан китаблар, журналлар, филмләр вә мусиги дүзҝүн олмајан арзулара сөвг едир, бу да өз нөвбәсиндә ҝүнаһа ҝәтириб чыхара биләр. Әхлаги тәмизлији горумаг үчүн, ағлымызы Аллаһа мәгбул һикмәтлә долдурмалыјыг (Јагуб 3:17).
Әхлагсызлыға апаран аддымлар
9-11. Сүлејманын изаһ етдији кими, һансы аддымлар ҝәнҹ адамы тәдриҹән әхлагсызлыға јөнәлтди?
9 Әхлагсызлыға апаран аддымлары чох вахт дәгиг ајырд етмәк олар. Атылан һәр јени аддым, ҝеријә јолу чәтинләшдирир. Ҝөрүн Сүлејманын мәсәлләри 7:6—23 ајәләрдә бу неҹә тәсвир олунур. Сүлејман “анлајышы [“үрәји”, ЈД] әскик” вә ја пис мәгсәди олан “бир ҝәнҹи” мүшаһидә едир. Ҝәнҹ “алагаранлыгда, ҝүнүн ахшамында... о гадынын [фаһишәнин] күчәсинә јахын дөнҝәдән кечирди вә онун евинә апаран јолла јеријирди”. Бу онун биринҹи сәһви иди. Алагаранлыгда “үрәји” ону һәр-һансы бир күчәјә дејил, онун билдији кими, мәһз фаһишә илә гаршылашаҹағы күчәјә апарырды.
10 Сонра охујуруг: “Будур ону бир гадын гаршылады, фаһишә палтарында, һијләҝәр үрәкли”. Ҝәнҹ ону ҝөрдү. Ҝәнҹ дөнүб евинә ҝедә биләрди, лакин буну инди етмәк даһа чәтиндир, хүсусән дә әхлаги ҹәһәтдән зәиф олдуғуна ҝөрә. Гадын ону тутуб өпүр. Ҝәнҹ, өпүшә разы олуб, гадынын јолдан чыхаран сөзләринә гулаг асыр: “Әмин-аманлыг гурбанлары борҹлу идим вә нәзирләрими бу ҝүн өдәдим”. Әмин-аманлыг гурбанларына әт, ун, јағ вә шәраб дахил иди (Левилиләр 19:5, 6; 22:21; Сајлар 15:8—10). Јәгин ки, гадын руһани ҹәһәтдән зәиф олмадығына вә ејни заманда евиндә чохлу ләзиз јемәк вә ичкинин олдуғуна ишарә едирди. Гадын ону дилә тутур: “Ҝәл, сабаһа гәдәр ешгдән мәст олаг; севҝидән зөвг алаг”.
11 Нәтиҹәни тәсәввүр етмәк һеч дә чәтин дејил. “Додагларынын јалтагланмасы илә ону ҹәлб етди”. Ҝәнҹ “боғазланмаға ҝедән өкүз кими” вә “ҹәләјә атылан гуш кими” гадынын евинә ҝедир. Ахырда Сүлејман дүшүнмәјә вадар едән сөзләр дејир: “[Гуш ҹәләнин] өз ҹаны үчүн олдуғуну билмир”. “Аллаһ, әхлагсызлары вә зинакарлары мәһкум” етдији үчүн, онун ҹаны, јә’ни һәјаты ҹәләјә дүшмүшдү (Ибраниләрә 13:4). Һәм кишиләр, һәм дә гадынлар үчүн нә гәдәр тә’сиредиҹи дәрсдир! Аллаһын хошуна ҝәлмәјән јола апаран илк аддымлардан гачмалыјыг.
12. а) “Үрәји әксик” ифадәси алтында нә нәзәрдә тутулур? б) Әхлаги ҹәһәтдән мөһкәмлији неҹә инкишаф етдирә биләрик?
12 Диггәт јетирин ки, һаггында бәһс едилән ҝәнҹин “үрәји әксик” иди. Бу ифадә ҝөстәрир ки, онун дүшүнҹәләри, арзулары, үрәјинин нијјәтләри, дујғулары вә һәјатдакы мәгсәдләри Аллаһын бәјәндикләри илә ујғун ҝәлмирди. Онун әхлагҹа зәифлији фаҹиәли нәтиҹәләрә ҝәтириб чыхартды. Бу “ахыр ҝүнләрдә” әхлаги ҹәһәтдән мөһкәмлији инкишаф етдирмәк үчүн сә’ј ҝөстәрмәк лазымдыр (2 Тимотејә 3:1). Аллаһ бу ишдә бизә көмәк тәгдим едир. О, доғру јолда јеримәјимиз вә бизимлә ејни мәгсәдә ҹан атан инсанларла үнсијјәтдә олмағымыза гүввә верән мәсиһчи јығынҹагларынын кечирилмәсинин гајғысына галыб (Ибраниләрә 10:24, 25). Јығынҹагда бизим гајғымыза галан вә бизә һаг јолларыны өјрәдән ағсаггаллар вар (Ефеслиләрә 4:11, 12). Бизә рәһбәрлик тәгдим едән Аллаһын Кәламы, Мүгәддәс Китабымыз вар (2 Тимотејә 3:16). Бундан әлавә, Аллаһын руһунун көмәјини әлдә етмәк үчүн һәр заман дуа едә биләрик (Матта 26:41).
Давудун ҝүнаһларындан ибрәт ҝөтүрмәк
13, 14. Давуд падшаһ неҹә ағыр ҝүнаһ ишләтди?
13 Бәдбәхтчиликдән, һәтта Аллаһын танынмыш хидмәтчиләри дә ҹинси әхлагсызлыға ҹәлб олунмушлар. Белә шәхсләрдән бири, Јеговаја онилләр боју сәдагәтлә хидмәт едән Давуд падшаһ иди. Шүбһәсиз ки, о, Јегованы чох севирди. Лакин о, бир дәфә ҝүнаһ јолуна гәдәм гојду. Сүлејманын тәсвир етдији ҝәнҹ кими, Давуд, ҝүнаһа сәбәб олан вә сонра онун ҝүнаһыны ағырлашдыран аддымлары атды.
14 О заман Давуд орта јашлы, тәхминән 50 јашы олан бир адам иди. Сарајынын дамындан ҝөзәл Бат-шебаны чимәркән ҝөрдү. Ким олдуғуну арашдырыб өјрәнди. Давуд мүәјјәнләшдирди ки, гадынын әри Урија, Аммониләрин шәһәри олан Раббанын мүһасирәсиндә иштирак едир. Давуд гадыны сарајына ҝәтиртди вә онунла ҹинси әлагәдә олду. Сонра вәзијјәт ҝәрҝинләшди: Бат-шеба Давуддан һамилә галдығыны өјрәнди. Давуд, ҝеҹәни арвады илә кечирәҹәјинә үмид едиб Уријаны дөјүшдән ҝери чағыртдырды. Беләликлә тәәссүрат јаратмаг оларды ки, Бат-шебанын ушағынын атасы Уријадыр. Амма Урија евә ҝетмәди. Чарәсиз галан Давуд ҝүнаһларыны ҝизләтмәк үчүн, гошун башчысына јаздығы мәктубу әлинә верәрәк Уријаны ҝеријә Раббаја ҝөндәрди; мәктубда тапшырмышды ки, Урија өлдүрүлсүн дејә ону өндә гојсунлар. Беләликлә Урија һәјатыны итирди, Давуд исә Бат-шебанын һамиләлији һамыја мә’лум олмаздан әввәл онунла евләнди (2 Самуел 11:1—27).
15. а) Давуд ҝүнаһында неҹә ифша олунду? б) Давуд Натанын баҹарыглы мәзәммәтинә неҹә јанашды?
15 Дүшүнмәк оларды ки, Давуд ҝүнаһыны ҝизләдә билди. Бир нечә ај кечди. Бир оғлан ушағы дүнјаја ҝәлди. Әҝәр 32-ҹи мәзмурда Давуд бу һадисә барәдә данышырса, онда мә’лумдур ки, виҹданы ону нараһат едирди (Мәзмур 32:3—5). Анҹаг ҝүнаһы Аллаһдан ҝизләтмәк олмазды. Мүгәддәс Китаб дејир: “Давудун етдији шеј РӘББИН өнүндә пис иди” (2 Самуел 11:27). Јегова, Давуда ишләтдији ҝүнаһы ҝөстәрсин дејә пејғәмбәр Натаны ҝөндәрди вә о, буну усталыгла етди. Давуд һәмән ан ҝүнаһыны е’тираф етди вә ҝүнаһынын бағышланмасы үчүн Јеговаја јалварды. Сәмими пешманчылығы Аллаһла барышмасына көмәк етди (2 Самуел 12:1—13). Давуд мәзәммәт олундуғу үчүн инҹимәди. Әксинә, Мәзмур 141:5-ҹи ајәсиндә јазылан бу дүшүнҹәни әкс етдирди: “Салеһ мәни вурсун, мәрһәмәтдир; вә мәни ифша етсин, баш јағыдыр; башым ону рәдд етмәсин”.
16. Сүлејман ҝүнаһ ишләтмәјә аид һансы хәбәрдарлыг вә өјүдү сөјләди?
16 Давудла Бат-шебанын икинҹи оғлу Сүлејман, еһтимал ки, атасынын һәјатында баш вермиш бу кәдәрли һадисә үзәриндә дүшүнмүшдү. О, сонралар јазырды: “Гәбаһәтләрини ҝизләдән мүвәффәгијјәтли олмаз; фәгәт онлары е’тираф едиб тәрк едән, мәрһәмәт тапар” (Сүлејманын мәсәлләри 28:13). Әҝәр ҹидди ҝүнаһа јол вермишиксә, Аллаһын илһамы алтында јазылмыш һәм хәбәрдарлыг, һәм дә мәсләһәт олан бу өјүдә риајәт етмәлијик. Ҝүнаһымызы Јеговаја е’тираф етмәли вә көмәк үчүн јығынҹағын ағсаггалларына мүраҹиәт етмәлијик. Ағсаггалларын ваҹиб мәс’улијјәтләриндән бири, ҝүнаһ ишләдәнләрә көмәк етмәкдир (Јагуб 5:14, 15).
Ҝүнаһын нәтиҹәләринә гатлашмаг
17. Јегова, ҝүнаһлары бағышласа да, бизи нәдән горумур?
17 Јегова Давуду бағышлады. Нәјә ҝөрә? Она ҝөрә ки, Давуд нөгсансызлығыны горујан, инсанларла мәрһәмәтлә давранан адам иди вә ҝүнаһына ҝөрә һәгигәтән пешманчылыг чәкирди. Буна бахмајараг, Давуд сәһв һәрәкәтинин фаҹиәли нәтиҹәсиндән гача билмәди (2 Самуел 12:9—14). Ејни шеј бу ҝүн дә баш верир. Јегова төвбә едәнләрә пислик етмәсә дә, онлары сәһв һәрәкәтләринин тәбии нәтиҹәләриндән дә горумур (Галатијалылара 6:7). Ҹинси әхлагсызлыг, һәр шејдән әлавә бошанмаја, арзуолунмаз һамиләлијә, ҹинси јолла өтүрүлән хәстәликләрә, е’тибарын вә һөрмәтин итирилмәсинә сәбәб ола биләр.
18. а) Павел Коринф јығынҹағына, ҹинси әхлаг нормаларыны ҹидди тәрздә позан инсанла неҹә давранмағы тапшырды? б) Јегова ҝүнаһкарлара гаршы мәһәббәт вә мәрһәмәти неҹә әкс етдирир?
18 Әҝәр ҹидди ҝүнаһ ишләтмишиксә, ҝүнаһларымызын нәтиҹәләринә дөзәрәк, асанлыгла үмидсизлијә гапыла биләрик. Лакин һеч бир шеј бизи төвбә етмәкдән вә Аллаһла барышмагдан сахламамалыдыр. Биринҹи әсрдә Павел коринфлиләрә јазырды ки, гоһумлар арасында ҹинси әлагәдә олан инсанлары јығынҹагдан кәнар етсинләр (1 Коринфлиләрә 5:1, 13). Павел јығынҹаға тапшырыр ки, һәмән инсан пешман олдугдан сонра, “ону бағышлајыб, тәсәлли” версинләр (2 Коринфлиләрә 2:5—8). Илһамланмыш бу өјүддән, Јегованын төвбә едән ҝүнаһкара гаршы неҹә мәһәббәт вә мәрһәмәтлә јанашдығыны ҝөрүрүк. Ҝүнаһкарын төвбә етмәсинә ҝөјдә мәләкләр дә севинир (Лука 15:10).
19. Ишләнмиш ҝүнаһа ҝөрә чәкилән пешманчылыг һансы фајданы верә биләр?
19 Бүдрәдијимиз үчүн кәдәрләнсәк дә, етдијимиз һәрәкәтә ҝөрә пешманчылыг чәкмәк “горун”маға, јенидән “фәсада үз чевирмә”мәјә көмәк едәр (Ејуб 36:21). Бәли, ҝүнаһымызын аҹы нәтиҹәләри, тәкрар сәһв ишләтмәкдән бизи сахламалыдыр. Бундан әлавә, гејд етмәк мараглы оларды ки, Давуд гүсурлу давранышындан әлдә етдији аҹы ибрәт дәрсини башгаларына өјүд вермәк үчүн истифадә етди. О деди: “Ганунуну позанлара сәнин јолларыны өјрәдәрәм; вә ҝүнаһкарлар сәнә дөнәрләр” (Мәзмур 51:13).
Јеговаја хидмәт өзү илә хошбәхтлик ҝәтирир
20. Аллаһын әдаләтли тәләбләринә риајәт етмәк һансы фајданы ҝәтирир?
20 Иса, “Аллаһын сөзүнү динләјиб она әмәл едәнләр бәхтијардыр”, деди (Лука 11:28). Аллаһын әдаләтли тәләбләринә итаәт етмәк, инди вә сонсуз ҝәләҹәкдә хошбәхтлик ҝәтирәҹәкдир. Әҝәр әхлаги тәмизлији индијә гәдәр горумушугса, Јегованын бизә көмәк етмәк үчүн тәгдим етдикләриндән истифадә едәрәк, ҝәлин бу вәзијјәтимизи сахламаға давам едәк. Әҝәр әхлагсызлыг етмишиксә, Јегованын сәмими гәлбдән төвбә едәнләри бағышламаға һазыр олдуғуну биләрәк тәсәлли тапаг вә ишләтдијимиз ҝүнаһы бир даһа тәкрарламамаға гәрарлы олаг (Ишаја 55:7).
21. Һәвари Петерин һансы нәсиһәти әхлаги ҹәһәтдән тәмиз галмағымыза көмәк едәр?
21 Тезликлә бу әдаләтсиз дүнја, өзүнүн әхлагсыз нөгтеји-нәзәрләри вә мәшғулијјәтләри илә бәрабәр арадан галдырылаҹаг. Биз исә, әхлаги нөгсансызлығымызы горујараг инди вә әбәдијјән фајда әлдә едәҹәјик. Һәвари Петер јазырды: “Буна ҝөрә, еј севимлиләр, бу ишләри ҝөзләјәрәк, чалышын ки, Онун һүзурунда нөгсансыз, ләкәсиз вә сүлһ ичиндә тапыласыныз... бунлары габагҹадан биләрәк еһтијат един ки, позғун адамларын хатасы илә јолдан аздырылмајасыныз вә сабит вәзијјәтиниздән ајрылмајасыныз” (2 Петер 3:14, 17).
Изаһ едә биләрсинизми?
• Нәјә ҝөрә әхлаги ҹәһәтдән тәмиз галмаг чәтин ола биләр?
• Јүксәк әхлаг нормаларына риајәт етмәк әзмини һансы үсулларла мөһкәмләтмәк олар?
• Сүлејманын, һаггында данышдығы ҝәнҹин сәһвләриндән һансы ибрәт дәрсләрини әлдә едә биләрик?
• Давудун нүмунәси төвбә етмәјә даир бизә нә өјрәдир?
[25-ҹи сәһифәдәки шәкил]
Әхлаги мәсәләләрә олан мүнасибәтимизи башгаларына изаһ етсәк, бу бизә мүдафиә кими хидмәт едәр.
[28 вә 29-ҹу сәһифәләрдәки шәкилләр]
Давуд сәмими гәлбдән төвбә етдији үчүн Јегова ону бағышлады.