Ишығы сечәнләр үчүн гуртулуш
“Нурум вә гуртулушум РӘБДИР, кимдән горхаҹағам?” (МӘЗМУР 27:1).
1. Һәјатын мөвҹуд олмасы үчүн Јегова нәјин гајғысына галмышдыр?
ЈЕГОВА, Јер үзүндә һәјатын мөвҹуд олмасына сәбәб олан Ҝүнәш ишығынын мәнбәјидир (Тәквин 1:2, 14). Бундан әлавә, Јегова, Шејтана мәхсус олан дүнјанын өлдүрүҹү зүлмәтини дағыдан руһани ишығын да Јараданыдыр (Ишаја 60:2; 2 Коринфлиләрә 4:6; Ефеслиләрә 5:8—11; 6:12). Ишығы сечәнләр мәзмурчунун сөзләринә гошула биләрләр: “Нурум вә гуртулушум РӘБДИР, кимдән горхаҹағам?” (Мәзмур 27:1а). Гаранлыға үстүнлүк верәнләри исә, Исанын ҝүнләриндә олдуғу кими, анҹаг ҹәза ҝөзләјир (Јәһја 1:9—11; 3:19—21, 36).
2. Гәдим вахтларда Јегованын ишығыны инкар едән вә Онун сөзүнә гулаг асан инсанларла нә баш верди?
2 Јегова илә әһд бағлајан халгын чох һиссәси Ишајанын ҝүнләриндә ишығы инкар етди. Бу һәрәкәт шимали Исраил падшаһлығынын мәһвинә сәбәб олду вә Ишаја бу һадисәнин шаһиди иди. Ерамыздан әввәл 607-ҹи илдә исә Јерусәлим вә онун мә’бәди дағыдылды. Јәһуданын әһалисини әсир ҝөтүрдүләр. Јегованын сөзүнә гулаг асанларын исә, о ҝүнләрдә јајылмыш дөнүклүјә мүгавимәт ҝөстәрмәк үчүн ҝүҹләри варды. Ерамыздан әввәл 607-ҹи илин һадисәләри һаггында данышараг, Јегова вә’д етди ки, Она гулаг асанлар хилас олаҹаглар (Јеремја 21:8, 9). Ишығы севән бизләр, кечмишин о һадисәләриндән бу ҝүн чох шеј өјрәнә биләрик (Ефеслиләрә 5:5).
Ишыгда ҝәзәнләрин хошбәхтлији
3. Бу ҝүн биз нәјә әминик, һәмчинин һансы “салеһ милләти” севирик вә бу “милләт” һансы “гүввәтли шәһәрә” маликдир?
3 “О ҝүн Јәһуда дијарында бу нәғмә тәрәннүм едиләҹәк: Гүввәтли шәһәримиз вар; [Аллаһ] хиласы диварлар вә галалар кими гојур. Гапылары ачын, сәдагәти горујан салеһ милләт ичәри ҝирсин” (Ишаја 26:1, 2). Бу сөзләрдә, Јеговаја ҝүвәнән инсанларын шадјаналығы әкс олунур. Ишајанын ҝүнләриндә садиг инсанлар, јалан танрылара ҝүвәнән һәмвәтәнләри кими давранмырдылар, онлар јеҝанә тәһлүкәсизлик Мәнбәји Јегованы һесаб едирдиләр. Буна бу ҝүн биз дә әминик. Бундан әлавә биз, Јеговаја мәхсус олан “салеһ милләти” - “Аллаһын Исраили”ни севирик (Галатијалылара 6:16; Матта 21:43). Јеговаја садиг олдуғу үчүн бу милләти Јегова да севир. Јегованын хејир-дуасы сајәсиндә Аллаһын Исраили “гүввәтли шәһәрә” - ону дәстәкләјән вә горујан шәһәрә бәнзәр тәшкилата маликдир.
4. Биз һансы дүшүнҹә тәрзини инкишаф етдирмәлијик?
4 Бу “шәһәрдә” оланлар, ашағыдакы сөзләри јахшы баша дүшүрләр: “Ағлы чох оланы сән [Јегова] там әмин-аманлыг ичиндә сахларсан; чүнки о сәнә ҝүвәнир”. Јегова, Она ҝүвәнмәјә вә Онун әдаләтли принсипләринә риајәт етмәјә гәтијјәтли олан кәсләри мүдафиә едир. Буна ҝөрә Јәһуданын садиг сакинләри Ишајанын, “РӘББӘ әбәдијјән ҝүвәнин; чүнки РӘБ Јеговада әбәди гаја вар” чағырышына диггәт јетирдиләр (Ишаја 26:3, 4; Мәзмур 9:10; 37:3; Сүлејманын мәсәлләри 3:5). Бу ҹүр дүшүнҹә тәрзи олан инсанлар “РӘБ Јеговаја”, јеҝанә е’тибарлы Гајаја бахар кими бахырлар. Онлар Аллаһла “там сүлһдә” јашајырлар (Филипилиләрә 1:2; 4:6, 7).
Аллаһын дүшмәнләри үчүн алчалдылма
5, 6. а) Гәдим Бабил неҹә алчалдылмышды? б) “Бөјүк Бабил” неҹә алчалдылмышдыр?
5 Әҝәр Аллаһа ҝүвәнәнләрин башына бир бәдбәхт һадисә ҝәлирсә, онда неҹә? Онлар горхмамалыдырлар. Јегова мүәјјән вахт әрзиндә буна бәнзәр һаллара јол верир, анҹаг ахырда раһатлыг верир вә баш верән һадисәдә мүгәссир оланлары ҹәзаландырыр (2 Салониклиләрә 1:4—7; 2 Тимотејә 1:8—10). Ҝәлин, бир “уҹа шәһәрин” башына ҝәләнләрә бахаг. Ишаја дејир: “[Јегова] јүксәкдә јашајанлары, уҹа шәһәри јыхды; ону алчалтды, јерә гәдәр алчалтды; торпаға гәдәр ендирди. Ајаг алтында, дүшкүнләрин ајаглары алтында вә јохсулларын аддымлары алтында тапданаҹаг” (Ишаја 26:5, 6). Јәгин ки, бурада Бабилдән бәһс едилир. Бу шәһәр, сөзсүз ки, Аллаһын халгына чох мүсибәтләр чәкдириб. Бәс Бабилин башына нә ҝәлди? Б. е. әввәл 539-ҹу илдә ону мидијалылар вә фарслар ишғал етдиләр. Неҹә дә алчалдыҹы вәзијјәтдир!
6 Бизим ҝүнләрдә Ишајанын пејғәмбәрлик сөзләри, 1919-ҹу илдән “Бөјүк Бабилин” башына ҝәлән һадисәләрә ејнилә мүвафигдир. Һәмән илдә “уҹа шәһәр” алчалдыҹы тәрздә сүгута мә’руз галды: о, Јегованын халгыны руһани әсарәтдән азад етмәјә мәҹбур олду (Вәһј 14:8). Сонрадан баш верән һадисә исә, бу шәһәр үчүн даһа да алчалдыҹы олду. Мәсиһчиләрин бу кичик групу, онлары кечмишдә әсарәтә алан инсанлары ајагламаға башлады. Онлар 1922-ҹи илдә Христиан аләминин јахынлашан сону һаггында е’лан етмәјә башладылар. Онлар Вәһј 8:7—12 ајәләриндә дөрд мәләјин ҹар чәкдикләри хәбәри е’лан етмәјә вә Вәһј 9:1—11:15 ајәләриндә бәһс олунан үч “мүсибәти” тәблиғ едирдиләр.
“Салеһин јолу доғрулугдур”
7. Јегованын ишығына доғру јеријәнләр һансы рәһбәрлији алырлар, онлар кимә ҝүвәнир вә нәји гијмәтләндирирләр?
7 Јегова Онун ишығына доғру јеријәнләри хилас едир. Ишајанын нөвбәти сөзләриндән ҝөрүндүјү кими, Јегова белә адамларын јолларыны истигамәтләндирир: “Салеһин јолу доғрулугдур; сән ки, доғрусан, салеһин јолуну доғрулдурсан. Ҝерчәк, ја РӘБ, һөкмләринин јолунда сәни ҝөзләдик; ҹанымызын истәји сәнин исминә вә сәнин анылма адынадыр” (Ишаја 26:7, 8). Јегова әдаләтли Аллаһдыр вә Она ибадәт едәнләр Онун әдаләтли нормалары әсасында јашамалыдырлар. Әҝәр онлар буну едирләрсә, Јегова онларын јолуну истигамәтләндирир, аддымларыны дүзәлдир. Онун рәһбәрлијинә диггәт јетирмәклә бу тәвазөкар инсанлар ҝөстәрирләр ки, Јеговаја ҝүвәнир вә Онун ады һаггындакы “анылманы” сәмимијјәтлә гијмәтләндирирләр (Чыхыш 3:15).
8. Ишаја тәглид етмәјә лајиг олан һансы әһвал-руһијјәни ҝөстәрди?
8 Ишаја Јегованын адыны гијмәтләндирирди. Бу онун нөвбәти сөзләриндән ајдын ҝөрүнүр: “Ҝеҹә сәни ҹанымла диләдим; бәли, сабаһ сәни ичимдә руһумла ахтарырам; чүнки сәнин һөкмләрин јер үзүндә олдугҹа, дүнјада јашајанлар доғрулуг өјрәнирләр” (Ишаја 26:9). Ишаја бүтүн ҹаны - бүтүн вүҹуду илә Јеговаја доғру ҹан атырды. Ҝеҹәнин сүкутунда пејғәмбәрин Јеговаја неҹә дуа етдијини, ҝизли фикирләрини Она неҹә ачдығыны вә рәһбәрлији һаггында үрәкдән хаһиш етдијини тәсәввүр едә биләрик. Неҹә дә ҝөзәл нүмунәдир! Бундан әлавә, Јегованын мәһкәмә ишләри Ишајаны доғрулуға өјрәдирди. Бу бизә һәр заман сајыг олмағын вә Јегованын ирадәсинин нәдән ибарәт олдуғуну дәрк етмәјин ваҹиблијини хатырладыр.
Бә’зиләри зүлмәти сечирләр
9, 10. Сәдагәтсиз халгына мүнасибәтдә Јегова неҹә хејирхаһлыг ҝөстәрирди вә халг буна неҹә һај верирди?
9 Јегова Јәһуда халгына бөјүк мәһәббәт вә хејирхаһлыгла јанашырды, амма әфсуслар олсун ки, халг арасында һамы Онун бу ҹүр мүнасибәтинә гаршылыглы ҹаваб вермирди. Чох вахт јәһудиләрин әксәријјәти Јегованын ишығындан имтина едәрәк, гијам вә дөнүклүк јолуну сечирдиләр. Ишаја деди: “Писә лүтф едилсин, јенә доғрулуг өјрәнмәз; доғрулуг дијарында һагсызлыг едәр вә РӘББИН гүдрәтини ҝөрмәз” (Ишаја 26:10).
10 Ишајанын ҝүнләриндә Јегованын әли Јәһуданы дүшмәнләрдән мүдафиә едәндә, халгын әксәријјәти буну е’тираф етмәк истәмирди. Јегова халгы сүлһлә хејир-дуаландыранда, халг миннәтдарлыг билдирмирди. Буна ҝөрә дә, Јегова бу халгы “башга ағалара” верди вә нәтиҹәдә б. е. әввәл 607-ҹи илдә, бабиллиләрә јәһудиләри әсир апармаға изин верди (Ишаја 26:11—13). Буна бахмајараг, төвбә едән халгын галығы нәһајәтдә вәтәнә гајытды.
11, 12. а) Јәһуданы истисмар едәнләри һансы ҝәләҹәк ҝөзләјирди? б) Јегованын мәсһ едилмиш хидмәтчиләрини әввәлләр истисмар едәнләри 1919-ҹу илдән бәри һансы ҝәләҹәк ҝөзләјир?
11 Бәс Јәһуда халгыны истисмар едәнләрлә нә олаҹаг? Ишаја пејғәмбәрлик сөзләри илә ҹаваб верир: “Онлар өлүләрдир, дирилмәзләр; көлҝәләрдир, галхмазлар; бундан өтрү онлары јохладын вә һәлак етдин, онларын анылмасыны да бүтүн бүтүн јох етдин” (Ишаја 26:14). Бәли, б. е. әввәл 539-ҹу илдә сүгута уғрадыгдан сонра, артыг Бабилин ҝәләҹәји олмајаҹагды. Вахт өтдүкҹә шәһәр үмумијјәтлә јер үзүндән силинәҹәкди. О “өлү” олаҹагды, онун бөјүк падшаһлығы исә артыг јада дүшмәјәҹәкди. Бу дүнјанын ҝүҹлүләринә ҝүвәнәнләр үчүн неҹә дә ҝөзәл хәбәрдарлыгдыр!
12 Бу пејғәмбәрлик гисмән бизим ҝүнләрдә, 1918-ҹи илдә Аллаһ мәсһ едилмиш хидмәтчиләринин руһани әсарәтә дүшмәсинә изин верәндә, 1919-ҹу илдә исә онлары азад едәндә јеринә јетмишди. Һәмин дөврдән башлајараг, онлары истисмар едәнләри, әсас е’тибары илә Христиан аләмини гаршыда јалныз зүлмәт ҝөзләјир. Јегованын халгы исә бол-бол хејир-дуалар алмышды.
“Милләти чохалтдын”
13, 14. Јегованын мәсһ едилмиш хидмәтчиләри 1919-ҹу илдән бәри һансы бол хејир-дуалары алырлар?
13 Аллаһын мәсһ едилмиш хидмәтчиләри пешманчылыг руһу әкс етдирдиләр, 1919-ҹу илдә Јегова онлары хејир-дуаландырды вә Өз халгынын сајыны артырды. Әввәлҹә диггәт Аллаһын Исраилинин ахырынҹы нүмајәндәләринин топланмасына јөнәлдилди, сонра исә “башга гојунлар” сырасындан олан “бөјүк издиһамын” јығымы башланды (Вәһј 7:9; Јәһја 10:16). Бу хејир-дуалар һаггында Ишаја пејғәмбәрлик етмишди: “Милләти чохалтдын, ја РӘБ, милләти чохалтдын; иззәт тапдын; дијарын бүтүн сәрһәдләрини ҝенишләтдин. Ја РӘБ, сыхынтыда сәни ахтардылар; үзәрләринә мәзәммәтин ҝәлинҹә онларын јалварышыны төкдүләр” (Ишаја 26:15, 16).
14 Бу ҝүн Аллаһын Исраилинин “сәрһәдләри” бүтүн јер үзүнә јајылмышдыр, бу халга гошулан бөјүк издиһам исә тәхминән алты милјона чатыр. Онларын һамысы хош хәбәрин тәблиғ олунмасы ишиндә сә’јлә иштирак едирләр (Матта 24:14). Бүтүн бунлар неҹә дә бөјүк хејир-дуадыр! Вә бу Онун адыны неҹә дә иззәтләндирир! Һал-һазырда бу ад 235 өлкәдә бәјан едилир. Јегованын вә’ди неҹә дә ҝөзәл тәрздә јеринә јетир!
15. 1919-ҹу илдә һансы символик дирилдилмә баш верди?
15 Бабил әсарәтиндән гуртулмаг үчүн, Јәһуда халгы Јегованын көмәјинә еһтијаҹ дујурду. Јәһудиләр буну өзләри едә билмәздиләр (Ишаја 26:17, 18). Буна бәнзәр тәрздә 1919-ҹу илдә дә Аллаһын Исраилинин азад олунмасы Јегованын көмәклијинә шәһадәт иди. Онсуз бу азадлыг мүмкүн олмазды. Вәзијјәт о дәрәҹәдә дәјишилмишди ки, Ишаја бу дәјишиклији дирилдилмә илә мүгајисә едирди: “Сәнин өлүләрин дириләҹәкләр; мәнимкиләрин ҹәсәдләри галхаҹаглар. Еј сизләр, торпаг ичиндә јатанлар, ојанын вә тәрәннүм един; чүнки шеһләрин отларын шеһи кимидир вә јер өлүләрини чөлә атаҹаг” (Ишаја 26:19; Вәһј 11:7—11). Бәли, “өлүләр”, тәшбеһләрлә десәк, өз фәалијјәтләринә јенидән башламаг үчүн дирилмәли идиләр!
Тәһлүкәли вахтларда мүдафиә
16, 17. а) Ерамыздан әввәл 539-ҹу илдә бабиллиләрин һүҹуму заманы хилас олмаг үчүн јәһудиләр нә етмәли идиләр? б) Еһтимал олундуғу кими, “отаглар” бу ҝүн нәји тәмсил едир вә онларын бизә фајдасы нәдир?
16 Јегованын хидмәтчиләри даима Онун мүдафиәсинә еһтијаҹ дујурлар. Чох јахынларда О, ахырынҹы дәфә өз әлини Шејтанын дүнјасы үзәринә чәкәҹәкдир вә о заман Онун ибадәтчиләри һеч заман олмадығы кими Онун көмәјинә еһтијаҹ дујаҹаглар (1 Јәһја 5:19). Һәмин горхулу вахт һаггында данышараг, Јегова хәбәрдар едир: “Ҝәл, еј халгым, өзүнүн дахили отагларына ҝир вә ардынҹа гапыларыны бағла; гәзәб кечинҹәјә гәдәр бир аз ҝизлән. Чүнки, будур, писликләриндән өтрү дүнјада јашајанлары ҹәзаландырмаг үчүн РӘБ јериндән чыхыр; вә дүнја ганыны ачыға гојаҹаг вә өлдүрүләнләрини артыг өртмәјәҹәк” (Ишаја 26:20, 21; Тсефанја 1:14). Бу хәбәрдарлығын сајәсиндә јәһудиләр, б. е. әввәл 539-ҹу илдә бабиллиләрин һүҹуму заманы неҹә хилас олмағы өјрәндиләр. Гулаг асанлар өз евләриндә галмалы идиләр ки, шәһәрә дахил олан гошунларла күчәдә гаршылашмасынлар.
17 Бу пејғәмбәрликдә һаггында данышылан “отаглар”, чох ҝүман ки, Јегованын халгынын бу ҝүн бүтүн дүнјада мөвҹуд олан он минләрлә јығынҹағыны тәмсил едир. Бу јығынҹаглар мүдафиәни артыг индидән тәгдим едир. Бу јығынҹагларда мәсиһчиләр өзләрини гардашлар арасында, ағсаггалларын севән гајғысы алтында тәһлүкәсиз һисс едирләр (Ишаја 32:1, 2; Ибраниләрә 10:24, 25). Бу әшјалар системинин сонунун јахын олдуғуну нәзәрә алсаг, бу сөзләр хүсусилә әдаләтлидир. Чүнки о заман хилас итаәткарлыгдан асылы олаҹаг (Тсефанја 2:3).
18. Јегова тезликлә “дәниздә олан ҹанавары” неҹә өлдүрәҹәк?
18 Ишаја, һәмин вахт һаггында пејғәмбәрлик едир: “О ҝүн РӘБ Левјатаны, тез гачан о иланы вә Левјатаны, доланбаҹ ҝедән о иланы, чәтин вә ири вә мөһкәм гылынҹы илә јохлајаҹаг; вә дәниздә олан ҹанавары өлдүрәҹәк” (Ишаја 27:1). Бизим ҝүнләрдә “Левјатан” кими тәмсил едир? Еһтимал ки, “гәдим иланы” - Шејтаны, һәмчинин Аллаһын Исраилинә гаршы мүбаризә апармаг үчүн истифадә етдији онун пис әшјалар системини (Вәһј 12:9, 10, 17; 13:14, 16, 17). “Левјатан”, 1919-ҹу илдә Аллаһын халгы үзәриндә олан һакимијјәтини итирди. Онун әбәдијјән јох олаҹағы заман да ҝәләҹәк (Вәһј 19:19—21; 20:1—3, 10). Јегова “дәниздә олан ҹанавары өлдүрәҹәк”. Вә о вахта гәдәр “левјатан” Јегованын халгына гаршы һәр нә етсә дә, һәр шеј уғурсуз олаҹагдыр (Ишаја 54:17). Бу неҹә дә тәсәлли верир!
“Шәраб бағы”
19. Галыг бу ҝүн һансы вәзијјәтдәдир?
19 Мәҝәр Јеговадан ҝәлән бүтүн бу ишыг севинмәк үчүн бизә сәбәб вермирми? Әлбәттә, верир! Ишаја ашағыдакы сөзләри дејәрәк, Јегованын халгынын севинҹини поетик диллә тәсвир едир: “О ҝүн дејиләҹәк: Шәраб бағы! Она тәрәннүм един. Мән, РӘБ, онун горујуҹусујам; ону һәр дәгигә сулајаҹағам; кимсә ону јохламасын дејә ҝеҹә-ҝүндүз ону горујаҹағам” (Ишаја 27:2, 3). Јегова өзүнүн “үзүм бағы” - Аллаһын Исраили вә онун чалышган јолдашлары үчүн гајғы ҝөстәрир (Јәһја 15:1—8). Бунун нәтиҹәсиндә әлдә едилән бәһрәләр Јегованын адына иззәт ҝәтирир вә јер үзүндә Онун хидмәтчиләринә севинҹ бәхш едир.
20. Јегова мәсиһчи јығынҹағыны неҹә горујур?
20 Јегованын 1918-ҹи илдә руһани әсарәтә дүшән мәсһ едилмиш хидмәтчиләр үзәринә төкдүјү гәзәбинин сојумасына ҝөрә биз үрәкдән севинә биләрик. Јегова өзү дејир: “Мәндә гәзәб јох; каш ки, колларла тиканлар ҹәнҝдә мәнә гаршы олсајдылар! Онлара гаршы јеријәрдим, онларын һамысыны бирдән јандырардым. Јахуд ки, гүввәтимә јапышсын да барыш етсин мәнимлә, бәли, мәнимлә барышсын” (Ишаја 27:4, 5). Үзүм тәнәкләринин бәһрәли олдуғуна вә онларын мејвәләриндән чохлу “шәраб” алындығына әмин олмаг үчүн, Јегова тәнәкләрә зәрәр ҝәтирән тикана бәнзәр һәр бир шеји дағыдыр вә мәһв едир. Буна ҝөрә дә, гој мәсиһчи јығынҹағынын мүвәффәгијјәтинә һеч кәс тәһлүкә јаратмасын! Јегованын мәрһәмәтини вә мүдафиәсини әлдә етмәк үчүн, гој һамы Онун “гүввәтинә јапышсын”. Беләликлә биз Аллаһла “сүлһ” арада биләрик. Бу сүлһ о гәдәр ваҹибдир ки, Ишаја онун һаггында ики дәфә сөјләјир (Мәзмур 85:1, 2, 8; Ромалылара 5:1).
21. Јер үзү “бәһрәләрлә” неҹә долдурулур?
21 Хејир-дуалар төкүлмәкдә давам едир: “Ҝәләҹәк ҝүнләрдә Јагуб көк салаҹаг; Исраил гөнчә вериб чичәкләнәҹәк; вә јер үзүнү мејвә илә долдураҹаглар” (Ишаја 27:6). Бу пејғәмбәрлик, Јегованын гүдрәтинин ҝөзәл сүбутларыны тәгдим едәрәк, 1919-ҹу илдән е’тибарән јеринә јетир. Мәсһ едилмиш мәсиһчиләр јер үзүнү дадлы руһани гиданын “бәһрәләри” илә долдурурлар. Јолуну азмыш дүнјада јашајараг, бу инсанлар Аллаһын јүксәк әхлаг нормаларыны бөјүк севинҹлә горујурлар. Јегова онлары, ибадәтчиләринин сајыны артырмагла хејир-дуаландырыр. Бунун сајәсиндә онларын милјонларла јолдашлары - башга гојунлар - “ҝеҹә-ҝүндүз Она [Аллаһа] хидмәт едирләр” (Вәһј 7:15). Ҝәлин һеч заман унутмајаг ки, бизим бу “бәһрәләрлә” гидаланмаг вә онлары башгалары илә бөлүшмәк имканымыз вар!
22. Ишығы гәбул едәнләр һансы хејир-дуалары алырлар?
22 Бу ағыр ҝүнләрдә, јер үзүнү гаранлыг вә халглары зүлмәт өртдүјү бир вахтда Јегованын өз халгына руһани ишыг вердији үчүн, мәҝәр Она миннәтдар дејиликми? (Ишаја 60:2; Ромалылара 2:19; 13:12). Бу ишығы гәбул едәнләрин һамысына ишыг артыг индидән гәлб раһатлығы вә севинҹ ҝәтирир, ҝәләҹәкдә исә, һәтта әбәди һәјат ҝәтирәҹәкдир. Буна ҝөрә, бизим - ишығы севәнләрин - Јегованы үрәкдән иззәтләндирмәк вә мәзмурчу илә бирликдә: “Нурум вә гуртулушум РӘБДИР, кимдән горхаҹағам? РӘББИ ҝөзлә, гүввәтли ол вә үрәјин ҹәсарәтли олсун; бәли, РӘББИ ҝөзлә”, демәјә әсасымыз вардыр (Мәзмур 27:1, 14).
Хатырлајырсынызмы?
• Јегованын халгыны истисмар едәнләри һансы ҝәләҹәк ҝөзләјир?
• Ишаја һансы артым һаггында пејғәмбәрлик едир?
• Биз һансы “отагларда” галмалыјыг вә нәјә ҝөрә?
• Нәјә ҝөрә Јегованын халгынын вәзијјәти Она иззәт ҝәтирир?
[31-ҹи сәһифәдәки чәрчивә]
ЈЕНИ ӘДӘБИЈЈАТ
Өјрәнилмә үчүн олан бу ики мәгаләдә дејиләнләрин чох һиссәси, 2000/2001-ҹи илин вилајәт конгресиндә мә’рузәдә тәгдим олунмушдур. Һәмин мә’рузәнин ахырында - “Ишајанын пејғәмбәрлији - бүтүн бәшәријјәт үчүн ишыгдыр” адлы јени әдәбијјатын Ы-ҹи ҹилдинин бурахылышы һаггында е’лан олунмушдур. Бу китабын 416-ы сәһифәсиндә Ишаја китабынын илк 40 фәсли ајәбәајә мүзакирә олунур.
[28-ҹи сәһифәдәки шәкил]
Јегованын “гүввәтли шәһәринә”, тәшкилатына јалныз салеһ инсанлар дахил ола биләрләр.
[29-ҹу сәһифәдәки шәкил]
Ишаја Јеговаја доғру “ҝеҹә” вахты ҹан атырды.
[32-ҹи сәһифәдәки шәкил]
Јегова өзүнүн “үзүм бағыны” мүдафиә едир вә онун бәһрәли олмасы үчүн гајғы ҝөстәрир.