Инсан зәифликләри үзәриндә гәләбә газанырыг
“Ҹисмани тәбиәтә ујан дүшүнҹә — өлүмдүр” (РОМАЛЫЛАРА 8:6).
1. Бә’зиләри инсан бәдәнинә неҹә јанашырлар вә һансы суал мүзакирә едилмәјә лајигдир?
“СНӘ шүкүр едәрәм; чүнки чох ҝөзәл вә валеһедиҹи сурәтдә јарадылмышам” (Мәзмур 139:14). Мәзмурчу Давуд, Јегованын јаратдыгларындан бирини — инсан бәдәнини сејр едәрәк Она белә һәмд едирди. Лакин бә’зи дин мүәллимләри, инсан бәдәнини ҝүнаһ үчүн сығынаҹаг вә аләт адландырараг, там лајигли бу тә’рифә гошулмурлар. Ону “ҹаһиллик палтары, нөгсанларын көкү, позғунлуг телләри, гаранлыг зиндан, јашајан өлү, ҹанлы ҹәсәд, јеријән мәзар” адландырырлар. Доғрудур ки, һәвари Павел, “ҹисмани тәбиәтимдә јахшы шеј јашамыр” сөзләрини демишдир (Ромалылара 7:18). Лакин бу, бизим ҝүнаһлы бәдәнин аҹиз әсирләри олдуғумузуму билдирир?
2. а) “Ҹисмани тәбиәтә ујан дүшүнҹә” нәдир? б) Аллаһа мәгбул олмағы арзу едән инсанларда “ҹисмани тәбиәтлә” “руһ” арасында һансы мүнагишә баш верир?
2 Мүгәддәс Јазыларда инсан бәдәни бә’зән “ҹисмани тәбиәт” адландырылыр. Мүгәддәс Китабда “ҹисмани тәбиәт” ифадәси илә һәмчинин үсјанкар Адәмин нәслиндән олан инсанын ҝүнаһлы вәзијјәтинә ишарә едилир (Ефеслиләрә 2:3; Мәзмур 51:5; Ромалылара 5:12). Адәмдән алдығымыз мирас “ҹисмани тәбиәтимизин зәифлијинә” сәбәб олду (Ромалылара 6:19). Буна ҝөрә Павел хәбәрдарлыг едирди: “Ҹисмани тәбиәтә ујан дүшүнҹә — өлүмдүр” (Ромалылара 8:6). “Ҹисмани тәбиәтә ујан дүшүнҹә” ифадәси алтында, бизим, ҝүнаһлы ҹисмани тәбиәтин арзуларына табе олдуғумуз вә онунла һәрәкәтә ҝәтирилдијимиз нәзәрдә тутулур (1 Јәһја 2:16). Буна ҝөрә дә әҝәр биз Аллаһа мәгбул олмаға чалышырыгса, биздә дурмадан “ҹисмани тәбиәтин әмәлләри”нә һәвәс ојадан ҝүнаһлы тәбиәтимизлә руһанилијимиз арасында даима мүнагишә баш верир (Галатијалылара 5:17—23; 1 Петер 2:11). Павел бу дахили мүбаризәни тәсвир едәрәк, уҹадан деди: “Нә заваллы адамам! Өлүмә апаран бу бәдәндән мәни ким хилас едәҹәк?” (Ромалылара 7:24). Павел ширникдирмәләрин аҹиз гурбаны идими? Мүгәддәс Китаб бу суала гәти сурәтдә “хејр” ҹавабы верир.
Ширникдирмә вә ҝүнаһын реаллығы
3. Чох инсанлар ҝүнаһа вә ширникдириҹи тә’сирләрә неҹә јанашырлар, лакин Мүгәддәс Китаб бизи бу ҹүр мүнасибәтдән неҹә чәкиндирир?
3 Бу ҝүн бир чох инсанларын “ҝүнаһ” һаггында һеч бир тәсәввүрләри јохдур. “Ҝүнаһ” сөзү, көһнәлмиш вә инсанлара хас олан сәһвләри ҝөстәрән сөз кими ришхәнд мә’насында истифадә едилир. Онлар анламырлар ки, “биз һамымыз Мәсиһин һөкм күрсүсү өнүндә ҝөрүнмәлијик ки, һәр биримиз, бәдәндә јашајаркән ҝөрдүјү јахшы јахуд пис ишләрин әвәзини алсын” (2 Коринфлиләрә 5:10). Ким исә истеһза илә дејә биләр: “Мән, сынаглардан башга һәр шејә дөзә биләрәм”. Чохлары јемәкдә, ҹинси әлагәдә, әјләнҹәләрдә өз арзуларына јол верән вә нәјин баһасына олурса-олсун истәдикләринә наил олан ҹәмијјәтдә јашајырлар. Бу инсанлар һәр шеји дәрһал вә ҝеҹикдирмәдән әлдә етмәк истәјирләр! (Лука 15:12). Онлар “һәгиги һәјатын” ҝәләҹәкдә ҝәтирәҹәји севинҹ барәдә дүшүнмәдән, јалныз һәмән ан алынан зөвгү ҝөрүрләр (1 Тимотејә 6:19). Мүгәддәс Китаб исә, һәр шеји ҝөтүр-гој етмәји вә узагҝөрән олмағы, руһани вә ја башга ҹәһәтдән зәрәр ҝәтирә биләҹәк һәр шејдән узаг олмағы өјрәдир. Аллаһ тәрәфиндән илһамланмыш бир мәсәлдә дејилир: “Фәрасәтли адам шәри ҝөрүб ҝизләнир; тәҹрүбәсиз адамлар исә, ирәли кечиб зәрәр ҝөрүрләр” (Сүлејманын мәсәлләри 27:12).
4. Павел, 1 Коринфлиләрә 10:12, 13 ајәләриндә нә һагда хәбәрдарлыг едир?
4 Коринфдә — әхлаг позғунлуғу илә мәшһур олан шәһәрдә јашајан мәсиһчиләрә јаздығы мәктубунда, Павел ширникдирмә вә ҝүнаһын ҝүҹү һаггында реал хәбәрдарлыг верир. О дејир: “Ким дүшүнүрсә ки, ајаг үстә дуруб, еһтијатлы олсун ки, јыхылмасын. Сиз һәр инсанын башына ҝәләндән башга бир имтаһана мә’руз галмадыныз. Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз” (1 Коринфлиләрә 10:12, 13). Биз һамымыз— ҝәнҹләр вә јашлылар, кишиләр вә гадынлар — мәктәбдә, ишдә вә башга јерләрдә тез-тез ширникдириҹи тә’сирләрлә гаршылашырыг. Буна ҝөрә дә, ҝәлин Павелин сөзләрини диггәтлә арашдыраг вә онларын нә мә’на дашыдығыны ајдынлашдыраг.
Өзүнүзә ҝүвәнмәкдән горунун
5. Өзүнә ҝүвәнмәк нә үчүн тәһлүкәлидир?
5 Павел дејир: “Ким дүшүнүрсә ки, ајаг үстә дуруб, еһтијатлы олсун ки, јыхылмасын”. Мә’нәви ҝүҹүмүзә һәддиндән артыг ҝүвәнмәк тәһлүкәлидир. Бу, ҝүнаһын тәбиәтинә вә ҝүҹүнә даир анлајышын чатышмазлығыны ҝөстәрир. Әҝәр Муса, Давуд, Сүлејман вә һәвари Павел кими инсанлар ҝүнаһа јол верирдиләрсә, онда ҝүнаһын бизим үчүн тәһлүкә јаратмајаҹағыны дүшүнмәк олармы? (Сајлар 20:2—13; 2 Самуел 11:1—27; 1 Краллар 11:1—6; Матта 26:69—75). Сүлејманын мәсәлләри 14:16 ајәсиндә дејилир: “Һикмәтли адам горхар вә шәрдән ајрылар; фәгәт ағылсыз адам гүррәләнәр вә өзүнә ҝүвәнәр”. Иса исә демишди: “Руһ гејрәтли, бәдән исә зәифдир” (Матта 26:41). Әхлагсыз арзулар бүтүн гејри-камил инсанлара хас олдуғу үчүн, биз Павелин хәбәрдарлыгларына ҹидди јанашмалы вә ширникдириҹи тә’сирләрә гапылмамалыјыг, әкс тәгдирдә “јыхыла” биләрик (Јеремја 17:9).
6. Ширникдириҹи тә’сирләрә нә вахт вә неҹә һазырлашмалыјыг?
6 Гәфләтән баш верә биләҹәк фәлакәтә һазырлашмаг— мүдрик давранышдыр. Аса падшаһ баша дүшүрдү ки, сүлһ вахтындан мүдафиә тикилиләринин тәмәлини гојмаг үчүн истифадә етмәк лазымдыр (2 Тарихләр 14:2, 6, 7). О, билирди ки, дүшмән һүҹум едән заман мүдафиәјә һазырлашмаг ҝеҹдир. Ширникдириҹи тә’сирләр јарананда гәбул едәҹәјимиз гәрарлары да сакит мүһитдә, ајыг тәрздә дүшүнмәк мүмкүн олан заман гәбул етмәк даһа јахшыдыр (Мәзмур 63:6). Даниел вә Аллаһдан горхан достлары Јегованын ганунларына садиг галмағы, онлара падшаһ сүфрәсинин ләзиз јемәкләри тәклиф олунмамышдан габаг гәрара алмышдылар. Бу онлара, әгидәләринә әсасән давранмаға вә натәмиз гиданы гәбул етмәмәјә имкан верди (Даниел 1:8). Ҝәлин биз дә, әхлаг тәмизлијини горумаг гәтијјәтимизи мөһкәмләндирәрәк, сынаглара әввәлҹәдән һазырлашаг. О заман ҝүнаһа јол вермәрик.
7. Башгаларынын ширникдириҹи тә’сирләрә давам ҝәтирдикләрини билмәк нә үчүн тәсәлливериҹидир?
7 Һәвари Павелин сөзләри неҹә дә тәсәлли верир: “Сиз һәр инсанын башына ҝәләндән башга бир имтаһана мә’руз галмадыныз” (1 Коринфлиләрә 10:13). Һәвари Петер јазырды: “Мөһкәм иманла она [Иблисә] гаршы дурун вә билин ки, дүнјадакы гардашларыныз да ејни әзаблары чәкирләр” (1 Петер 5:9). Бәли, әҝәр һәмиманлыларымыз бу ҹүр имтаһанларла гаршылашаркән, ширникдириҹи тә’сирләрә Аллаһын көмәклији сајәсиндә давам ҝәтирдиләрсә, буна бизим дә ҝүҹүмүз чатар. Биз мәсиһчиләр позғун бир дүнјада јашадығымыз үчүн, һәр биримиз әввәл-ахыр ширникдириҹи тә’сирләрә мә’руз галаҹағыг. Инсан зәифликләри вә ҝүнаһ ишләтмәјә олан һәвәсләр үзәриндә гәләбә газанаҹағымыза әмин олмагда бизә нә көмәк едә биләр?
Ширникдириҹи тә’сирләрә давам ҝәтирмәк мүмкүндүр
8. Ширникдириҹи тә’сирләрдән гачынмағын әсас үсулу нәдән ибарәтдир?
8 “Ҝүнаһа гул олмамағын” әсас үсулларындан бири— имкан дахилиндә ширникдириҹи тә’сирләрдән гачынмагдыр (Ромалылара 6:6). Биз, Сүлејманын мәсәлләри 4:14, 15 ајәләриндә тәшвиг олунуруг: “Писләрин јолуна ҝирмә вә шәрир адамларын јолунда јеримә. Сән ондан чәкин, јанындан кечмә; онун јанындан јан кеч”.Чох вахт биз әввәлҹәдән билирик ки, бу вә ја диҝәр шәраит ҝүнаһа ҝәтириб чыхара биләр. Буна ҝөрә дә ајдындыр ки, мәсиһчијә, дүзҝүн олмајан арзулар јарадан вә натәмиз еһтираслар алышдыран инсанлардан, әшјалардан вә јерләрдән кәнар дурараг, буна бәнзәр вәзијјәтләрдән “јан кечмәк” лазымдыр.
9. Мүгәддәс Јазылар тәһлүкәли вәзијјәтләрдән гачмағын ваҹиблијини неҹә гејд едир?
9 Ширникдириҹи тә’сирләрин үзәриндә гәләбә газанмағын әсас үсулларындан бири дә — бу тә’сирләри јарадан вәзијјәтләрдән гачмагдыр. Павел хәбәрдарлыг едирди: “Ҹинси әхлагсызлыгдан чәкинин” (1 Коринфлиләрә 6:18). О, һәмчинин јазырды: “Бүтпәрәстликдән гачын” (1 Коринфлиләрә 10:14). Бундан әлавә, һәвари Тимотејә варланмаға олан һәдсиз-һесабсыз арзулардан, һәмчинин “ҝәнҹлик еһтирасларындан” “гачмағы” тә’кидлә мәсләһәт едирди (2 Тимотејә 2:22; 1 Тимотејә 6:9—11).
10. Ширникдириҹи тә’сирләрдән гачмағын нә дәрәҹәдә ваҹиб олдуғуну, бир-биринә әкс олан һансы ики нүмунә ҝөстәрир?
10 Исраил падшаһы Давудун башына ҝәләнләри нәзәрдән кечирәк. О, евинин дамындан чимән ҝөзәл бир гадыны ҝөрдү вә онун үрәјиндә дүзҝүн олмајан арзулар јаранды. О, евин дамындан ҝетмәли вә ширникдириҹи тә’сирдән гачмалы иди. О исә бу гадынын ким олдуғуну мүәјјәнләшдирди (бу гадын Бат-шеба иди)... Вә ахырда бу һадисә фәлакәтлә нәтиҹәләнди (2 Самуел 11:1—12:23). Бәс ағасынын әхлагсыз арвады Јусифи онунла јатмаға тәһрик едән заман, о неҹә давранды? Мүгәддәс Китабда дејилир: “Һәр ҝүн Јусифә сөјләдији һалда, онун јанында јатмаг, јахуд онунла бәрабәр олмаг риҹасыны динләмәзди”. Јусиф о заман Мусанын һәлә верилмәмиш ганунунун әмрләрини билмәдән, она белә ҹаваб верди: “Неҹә бу бөјүк пислији едим вә Аллаһа гаршы суч ишләдим?” Бир ҝүн гадын Јусифи тутуб деди: “Мәнимлә бәрабәр јат”. Јусиф онунла галыб нә исә изаһ етмәјә чалышдымы? Јох. О “гачды вә чөлә чыхды”. Јусиф ширникдириҹи тә’сирин онун үзәриндә гәләбә газанмасына имкан вермәди. О гачды! (Тәквин 39:7—16).
11. Ширникдириҹи тә’сирләрлә тез-тез гаршылашанда нә етмәк олар?
11 Гачмаг бә’зән горхаглыг әламәти һесаб олунур, лакин ән еһтијатлы давраныш — тәһлүкәли вәзијјәтләрдән мәһз узаглашмагдыр. Тутаг ки, биз иш јериндә тез-тез ширникдириҹи тә’сирләрлә гаршылашырыг. Һәтта иш јеримизи дәјишмәк имканымыз олмаса да, јәгин ки, ширникдириҹи тә’сирләрә сәбәб олан вәзијјәт јаранан заман, һара исә ҝетмәк имканымыз вар. Биз, налајиг олдуғуну билдијимиз һәр шејдән гачмалы вә һәгигәтә әсасән давранмаға гәтијјәтли олмалыјыг (Амос 5:15). Ширникдириҹи тә’сирләрдән гачмаг, Интернетин порнографик сајтларына дахил олмамаг вә шүбһә доғуран әјләнҹә јерләриндән узаг олмаг мә’насыны дашыја биләр. Һәмчинин налајиг журналы атмаг вә ја Аллаһы севән вә бизә көмәк едә билән јени достлар тапмаг мә’насыны да верә биләр (Сүлејманын мәсәлләри 13:20). Бизи ҝүнаһа тәһрик едән нә олурса-олсун, ондан гәтијјәтлә үз дөндәрмәк бизим тәрәфимиздән мүдриклик оларды (Ромалылара 12:9).
Дуа неҹә көмәк едә биләр
12. “Бизи имтаһана чәкмә” дедијимиз заман, биз Аллаһдан нә һагда хаһиш етмиш олуруг?
12 Павелин нөвбәти зәманәти чох руһландырыр: “Аллаһ садигдир; О, ҝүҹүнүздән артыг имтаһан олунманыза разылыг вермәз, лакин имтаһан илә јанашы, гуртулушу да тә’мин едәҹәкдир ки, таб ҝәтирә биләсиниз” (1 Коринфлиләрә 10:13). Мәсәлән, Јегованын бизә јардым етмәси, ширникдириҹи тә’сирләрлә мүбаризә апармаг үчүн етдијимиз дуалара ҹаваб вермәсиндә әкс олунур. Иса Мәсиһ белә дуа етмәји өјрәдирди: “Бизи имтаһана чәкмә, лакин бизи шәрдән хилас ет” (Матта 6:13). Јегова бу ҹүр сәмими дуаны ешидәҹәк вә ширникдириҹи тә’сирләрлә гаршылашдығымыз заман бизи тәрк етмәјәҹәкдир. О, бизи Шејтандан вә онун һијләләриндән азад едәҹәкдир (Ефеслиләрә 6:11). Ширникдириҹи тә’сирләри ҝөрүб, онлара гаршы дура билмәмиз үчүн Аллаһдан көмәк истәмәлијик. Әҝәр Аллаһдан, ширникдириҹи тә’сирләрә гапылмағымыза јол вермәмәсини хаһиш етсәк, О, Шејтанын, јә’ни “шәрин” һијләләринин гурбаны олмамағымыза көмәк едәҹәкдир.
13. Кечиб ҝетмәјән ширникдириҹи тә’сирләрлә гаршылашдығымыз заман нә етмәк лазымдыр?
13 Ширникдириҹи тә’сирләр кечиб ҝетмәјән заман, үрәкдән дуа етмәк хүсусилә ваҹибдир. Бә’зән ширникдириҹи тә’сирләр нә дәрәҹәдә зәиф олдуғумузу хатырладан дүшүнҹә вә нөгтеји-нәзәрләрлә ҝүҹлү дахили мүбаризәјә сәбәб ола биләр (Мәзмур 51:5). Мәсәлән, вахтилә өһдәсиндән ҝәлдијимиз әхлагсыз вәрдиш һаггында хатирәләр бизә әзаб верә биләр. Әҝәр һәмин вәрдишә гајытмаг һәвәси дујуругса, онда неҹә? Белә һиссләри садәҹә олараг боғмаға чалышмаг әвәзинә, бу һагда Јеговаја данышын вә әҝәр лазым ҝәләрсә дәфәләрлә тәкрар един (Мәзмур 55:22). О, Кәламы вә мүгәддәс руһу васитәсилә зеһнимизи натәмиз фикирләрдән тәмизләмәјә көмәк едәҹәкдир (Мәзмур 19:8, 9).
14. Нәјә ҝөрә ширникдириҹи тә’сирләрин өһдәсиндән ҝәлмәк үчүн дуа етмәк лазымдыр?
14 Ҝетсамани бағында һәвариләрини јуху басдығыны ҝөрәндә, Иса онлары тәшвиг етди: “Ојаг дуруб дуа един ки, имтаһана уғрамајасыныз. Доғрудан да руһ гејрәтли, бәдән исә зәифдир” (Матта 26:41). Ширникдириҹи тә’сирләрин өһдәсиндән ҝәлмәк үчүн, онларын гәбул етдикләри формалары билмәк вә һәмчинин ҝүҹлә ҝөрүлән тәһлүкәләрини һисс етмәк ваҹибдир. Бундан әлавә, ширникдириҹи тә’сирләр јаранан кими дәрһал дуа етмәк олдугҹа ваҹибдир: бу, онларын гаршысында таб ҝәтирә билмәмиз үчүн бизә ҝүҹ верәҹәкдир. Ширникдириҹи тә’сирләр ән зәиф јеримиздән вурдуғу үчүн, биз онлара гаршы тәкбашына мүгавимәт ҝөстәрә билмәрик. Дуа етмәк бизим үчүн олдугҹа ваҹибдир, чүнки Аллаһын вердији гүввә сајәсиндә Шејтандан даһа јахшы мүдафиә олуна биләрик (Филипилиләрә 4:6, 7). Ола билсин, биз һәмчинин “јығынҹағын ағсаггалларынын” көмәјинә вә дуаларына еһтијаҹ дујаҹағыг (Јагуб 5:13—18).
Ширникдириҹи тә’сирләрә фәал тәрздә мүгавимәт ҝөстәрин
15. Ширникдириҹи тә’сирләрә мүгавимәт ҝөстәрмәк өзүнә нә дахил едир?
15 Әҝәр ширникдириҹи тә’сирләрдән гачынмаг мүмкүн дејилсә, онда биз, онлар кечиб ҝедәнә вә ја вәзијјәт дәјишәнә гәдәр фәал тәрздә онлара гаршы мүгавимәт ҝөстәрмәлијик. Иса, Шејтанын сынагларына, о узаглашана гәдәр мүгавимәт ҝөстәрди (Матта 4:1—11). Исанын шаҝирди Јагуб јазырды: “Аллаһа табе олун, иблисә исә гаршы дурун вә о, сиздән гачаҹагдыр” (Јагуб 4:7). Мүгавимәт, Аллаһын Кәламы илә зеһнимизи мөһкәмләндирмәјимиздән вә Аллаһын нормаларына риајәт етмәк үчүн гәти гарар гәбул етмәјимиздән башлајыр. Бизә хас олан һәр һансы зәифликлә әлагәдар әсас ајәләри јадда сахламаг вә онларын үзәриндә дүшүнмәк бизим тәрәфимиздән дүзҝүн һәрәкәт оларды. Нараһатчылығымызы бөлүшә биләҹәјимиз вә ширникдириҹи тә’сирләр јаранан заман мүраҹиәт едә биләҹәјимиз бир јеткин мәсиһчијә, бәлкә дә ағсаггала јанашмаг мүдриклик оларды (Сүлејманын мәсәлләри 22:17).
16. Әхлаги ҹәһәтдән тәмизлијимизи неҹә горумаг олар?
16 Мүгәддәс Јазылар бизи јени мәнлик ҝејинмәјә тәшвиг едир (Ефеслиләрә 4:24). Јә’ни Јегованын бизи формалашдырмасына вә дәјишдирмәсинә јол вермәлијик. Павел, әмәкдашы Тимотејә јазырды: “Салеһлик, Аллаһ јолуна бағлылыг, иман, мәһәббәт, тәһәммүл, һәлимлик јолуну излә. Иман уғрунда ҝедән мүбаризәдә јахшы чарпыш, әбәди һәјаты бәрк тут” (1 Тимотејә 6:11, 12). Аллаһын шәхсијјәти һаггында дәрин биликләр әлдә етмәк мәгсәдилә Онун Кәламыны сә’јлә өјрәнәрәк вә сонра Онун тәләбләринә ујғун тәрздә давранараг “салеһлик... јолуну изләјә” биләрик. Һәмчинин башга ишләрлә јанашы хош хәбәри тәблиғ етмәји вә ҝөрүшләрә ҝетмәји өзүнә дахил едән мәсиһчи фәалијјәти илә зәнҝин графикин олмасы да чох ваҹибдир. Әҝәр биз Аллаһа јахынлашыр вә Онун тәгдим етдији руһани көмәкдән там фајда әлдә едириксә, онда бизә руһән бөјүмәк вә әхлаги ҹәһәтдән тәмиз галмаг асан олаҹагдыр (Јагуб 4:8).
17. Ширникдириҹи тә’сирләрлә гаршылашдығымыз заман, Аллаһын бизи тәрк етмәјәҹәјини һарадан билирик?
17 Павел әмин едир ки, Аллаһын вердији баҹарыглар сајәсиндә өһдәсиндән ҝәлә билмәјәҹәјимиз имтаһан јохдур. Јегова, “имтаһан илә јанашы, гуртулушу да тә’мин едәҹәкдир ки, таб ҝәтирә биләк” (1 Коринфлиләрә 10:13). Бәли, биз Аллаһа даима ҝүвәнириксә, О, нөгсансызлығымызы горумаг үчүн ширникдириҹи тә’сирләрин, руһани ҝүҹүмүздән чох олмасына јол вермәјәҹәкдир. Аллаһ истәјир ки, биз, Онун ҝөзүндә дүзҝүн олмајан шејләрә ширникдирән һәвәслә апардығымыз фәал мүбаризәдә галиб ҝәләк. Бундан әлавә, биз Онун бу вә’динә үмид едә биләрик: “Сәни һеч бурахмајаҹағам вә әсла тәрк етмәјәҹәјәм” (Ибраниләрә 13:5).
18. Инсан зәифликләри үзәриндә гәләбә газанаҹағымыза нә үчүн шүбһә етмәмәк олар?
18 Павелин, инсан зәифлији илә апардығы мүбаризәнин нә илә нәтиҹәләнәҹәјинә шүбһәси јох иди. О, өзүнү ҹисмани арзуларын заваллы вә аҹиз гулу һесаб етмирди. Әксинә о дејирди: “Мән елә гачырам ки, мәгсәдсиз олмајым. Елә вурушурам ки, зәрбәм боша чыхмасын. Фәгәт бәдәнимә ҹәфа вериб, ону көлә едирәм ки, башгаларына тәблиғ етдикдән сонра, өзүм јарышда иштирак етмәкдән мәрһум олмајым” (1 Коринфлиләрә 9:26, 27, И—93). Гејри-камил бәдәнлә биз дә мүвәффәгијјәтлә мүбаризә апара биләрик. Биз сәмави Атамыздан, Мүгәддәс Јазыларын, она әсасланан нәшрләрин, мәсиһчи ҝөрүшләринин вә јеткин һәмиманлыларымызын васитәсилә дүзҝүн давранмағымыза көмәк едән хатырлатмалар алырыг. Аллаһын көмәклији илә инсан зәифликләринин үзәриндә гәләбә газана биләрик!
Хатырлајырсынызмы?
• “Ҹисмани тәбиәтә ујан дүшүнҹә” нәдир?
• Ширникдириҹи тә’сирләрә неҹә һазырлашмаг олар?
• Ширникдириҹи тә’сирләрин өһдәсиндән ҝәлмәк үчүн һансы тәдбири ҝөрмәк олар?
• Ширникдириҹи тә’сирләрлә мүбаризәдә дуа һансы ролу ојнајыр?
• Инсан зәифликләри үзәриндә галиб ҝәлмәјин мүмкүн олдуғуну һарадан билирик?
[8-ҹи сәһифәдәки шәкилләр]
Мүгәддәс Китаб, ҹисмани арзуларын аҹиз гурбаны олдуғумузу өјрәтмир.
[10-ҹу сәһифәдәки шәкил]
Ҝүнаһдан гачынмағын әсас үсулларындан бири — ширникдириҹи тә’сирләрдән гачмагдыр.