Һәјат јолдашы сечмәкдә Аллаһын рәһбәрлији
“Сәнә тә’лим едәҹәјәм вә ҝедәҹәјин јолу сәнә өјрәдәҹәјәм; ҹәнә өјүд верәҹәјәм; ҝөзүм сәнин үзәриндә олаҹагдыр” (МӘЗМУР 32:8).
1. Хошбәхт никаһ үчүн нә лазымдыр?
ҺАВА акробаты јелләнән трапесијадан һоппаныр, ики гатланыр вә һавада усталыгла мајаллаг вурур. О, мајаллаг вурдугдан сонра әлләрини ирәли узадыр, башга трапесијада салланан ҝимнаст исә ону тутур. Фигурлу сүрүшмә идманында ики идманчы буз үстүндә мәһарәтлә сүрүшүрләр. Оғлан бир ан ичиндә өз ојун јолдашыны галдырыр вә ону јухары туллајыр. Гыз фырланыр, инҹәликлә ашағы енир вә оғланла бирликдә буз үзәриндә дөврә вурмаға давам едир. Елә тәәссүрат јараныр ки, һәм акробатлар, һәм дә фигуристләр бу һәрәкәтләри санки гүввә сәрф етмәдән иҹра едирләр. Анҹаг һазырлыг, е’тибарлы ојундаш, хүсусилә дә дүзҝүн рәһбәрлик вә тә’лим олмадан, онларын һәрәкәтләрини тәкрар етмәјә ким ҹүр’әт едә биләр? Бунун кими, елә зәнн етмәк олар ки, хошбәхт никаһ да тәсадүф нәтиҹәсиндә јараныр. Лакин белә никаһ үчүн дә јахшы јолдаш, бирҝә сәрф едилән гүввә вә хүсусән дә мүдрик нәсиһәт лазымдыр. Һәгигәтән дә дүзҝүн рәһбәрлик чох ваҹибдир.
2. а) Никаһын тәмәлини ким гојуб вә һансы мәгсәдлә? б) Бә’зән никаһлар неҹә бағланырды?
2 Ҝәнҹлик чағында һәјат јолдашы һаггында фикирләшмәк тамамилә тәбиидир. Никаһ, Јегова Аллаһ онун тәмәлини гојандан бәри ади вә нормал һал олараг галыр. Амма илк инсан олан Адәм арвадыны өзү сечмәди. Гадыны она мәһәббәтлә тәгдим едән Јегова олду (Тәквин 2:18—24). Илк инсан ҹүтүнә тапшырылмышды ки, дүнјаја өвлад ҝәтириб јер үзүнү инсанларла долдурсунлар. Бу илк әһдин бағланмасындан сонра, никаһ һаггында адәтән бәјлә ҝәлинин валидејнләри данышыг апарырдылар. Бә’зи һалларда исә буну, оғланла гызын разылығы алынандан сонра едирдиләр (Тәквин 21:21; 24:2—4, 58; 38:6; Јешу 15:16, 17). Бә’зи өлкәләрдә вә мәдәнијјәтләрдә данышыг әсасында никаһ бағламаг индијә гәдәр давам етсә дә, бу ҝүн чохлары һәјат јолдашыны өзләри сечирләр.
3. Һәјат јолдашыны неҹә сечмәк лазымдыр?
3 Һәјат јолдашыны неҹә сечмәли? Бә’зи адамлара хариҹи ҝөрүнүш — ҝөз үчүн хош вә арзу олунан шејләр тә’сир ҝөстәрир. Диҝәрләри, онлара гајғы ҝөстәрәҹәк, тәләбат вә истәкләрини тә’мин едәҹәк инсаны тапмаға үмид едәрәк, мадди мәнафе ҝүдүрләр. Лакин тәкҹә буна бәнзәр дүшүнҹәләрә әсасланараг хошбәхтлик вә севинҹ ҝәтирән мүнасибәтләрә наил олмаг мүмкүндүрмү? Сүлејманын мәсәлләри 31:30 дејилир: “Ләтафәт алдадыҹыдыр вә ҝөзәллик бош шејдир; фәгәт Рәбдән горхан гадын тә’рифләнир”. Бу ајәдә ваҹиб фикир вар: Һәјат јолдашы сечәндә Јегованы нәзәрә алын.
Аллаһын мәһәббәтлә долу рәһбәрлији
4. Һәјат јолдашы сечмәкдә Аллаһ һансы көмәји тәгдим едир?
4 Мәһәббәтли сәмави Јегова Атамыз, Кәламы Мүгәддәс Китабы бизә һәр бир ишдә рәһбәрлик кими вериб. О дејир: “Фајдалы оланы сәнә өјрәдән, јеријәҹәјин јолда сәни ҝүдән, Аллаһын Рәбб мәнәм” (Ишаја 48:17). Мүгәддәс Китабын һәјат јолдашы сечмәјә аид заманын сынағындан чыхмыш рәһбәрлик вермәси дә тәәҹҹүблү дејил. Јегова никаһын мөһкәм вә хошбәхт олмасыны истәјир. Буна ҝөрә дә бизә, өз рәһбәрлијинин дәрк олунмасына вә тәтбиг едилмәсинә даир көмәк тәгдим едиб. Мәҝәр севән Јараданымыздан буну ҝөзләмәли дејиликми? (Мәзмур 19:8).
5. Никаһда мөһкәм хошбәхтлик үчүн ән ваҹиб шеј нәдир?
5 Јегованын нијјәтинә ҝөрә никаһ ајрылмаз иттифаг олмалыдыр (Марк 10:6—12; 1 Коринфлиләрә 7:10, 11). Буна ҝөрә Аллаһ “бошанмадан... нифрәт едир” вә јалныз зина олан һалда бошанмаја јол верир (Малаки 2:13—16; Матта 19:9). Буну нәзәрә алараг јадда сахламаг лазымдыр ки, һәјат јолдашы сечмәк, һәјатынызда атдығыныз ән ваҹиб аддымлардан биридир вә буна дүшүнҹәсиз јанашмаг олмаз. Һәјатда хошбәхт вә ја бәдбәхт олмағымыза бу ҹүр ҝүҹлү тә’сир едән чох аз гәрар вар. Дүзҝүн едилән сечим һәјаты зәнҝинләшдирир вә ону шән едир, сәһв сечим исә сонсуз кәдәр ҝәтирир (Сүлејманын мәсәлләри 21:19; 26:21). Хошбәхтлијин давамлы олмасы үчүн, һәјат јолдашыны мүдрикликлә сечмәк вә она мүнасибәтдә сәдагәти горујуб сахламаға һазыр олмаг ваҹибдир. Чүнки Аллаһын нијјәтинә әсасән әрлә арвадын хошбәхтлији разылыг вә әмәкдашлыг үзәриндә гурулмалыдыр (Матта 19:6).
6. Ҝәнҹ оғлан вә гызлар һәјат јолдашы сечмәкдә нәјә ҝөрә хүсусилә еһтијатлы олмалыдырлар вә даһа мүдрик гәрарлар гәбул етмәкдә бизә нә көмәк едәр?
6 Хүсусилә дә ҝәнҹ оғлан вә гызлара еһтијатлы олмаг лазымдыр ки, һәјат јолдашы сечәндә физики ҹазибәдарлыг вә ҝүҹлү арзулар онлары биһуш етмәсин. Она ҝөрә ки, јалныз бу тәмәл үзәриндә гурулан мүнасибәтләр чох асанлыгла әдавәтә, һәтта нифрәтә чеврилир (2 Самуел 13:15). Диҝәр тәрәфдән, аилә гурмаг истәдијимиз шәхси, еләҹә дә өзүмүзү даһа јахшы танымагла, сөнмәз мәһәббәтин инкишафына көмәк етмиш олуруг. Бундан әлавә, дәрк етмәк лазымдыр ки, үрәјимиз бизә ваҹиб олмајан шејләрә мејл едә биләр (Јеремја 17:9). Елә мәһз буна ҝөрә дә, Аллаһын Мүгәддәс Китабда олан рәһбәрлији ваҹибдир. Бу рәһбәрлик, даһа мүдрик гәрар гәбул етмәјимизә көмәк едәр. Мәзмурчу, Јегованын сөзләрини белә чатдырды: “Сәнә тә’лим едәҹәјәм вә ҝедәҹәјин јолу сәнә өјрәдәҹәјәм; сәнә өјүд верәҹәјәм; ҝөзүм сәнин үзәриндә олаҹагдыр” (Мәзмур 32:8; Ибраниләрә 4:12). Мәһәббәт вә үнсијјәтә олан анаданҝәлмә тәләбатымызы тә’мин етмәклә јанашы, никаһ өзү илә һәмчинин проблемләр дә ҝәтирир. Бунларын һәлли үчүн исә јеткинлик вә фәрасәт тәләб олунур.
7. Нәјә ҝөрә бә’зиләри һәјат јолдашы сечмәјә аид Мүгәддәс Китаба әсасланан мәсләһәти гәбул етмирләр вә бу нәјә ҝәтириб чыхарыр?
7 Һәјат јолдашы сечмәјә аид никаһын Банисинин дедикләринә диггәт јетирмәк мүдрик давранышдыр. Валидејнләримиз вә ја мәсиһчи ағсаггаллары бизә Мүгәддәс Китаба әсасланан мәсләһәт верәндә хошумуза ҝәлмәјә биләр. Онларын бизи ахыра гәдәр анламадыгларыны дүшүнә биләрик, белә олдугда исә, ҝүҹлү дујғулар бизи үрәјин мејлинә ујмаг тәһлүкәсинә јөнәлдәр. Анҹаг вахт кечдикдән сонра, инсан һәгигәтлә үзләшәндә, бир гајда олараг, онун рифаһы үчүн верилән мүдрик мәсләһәтә гулаг асмадығына ҝөрә пешман олмаға башлајыр (Сүлејманын мәсәлләри 23:19; 28:26). Еһтимал ки, онун аилә һәјаты мәһәббәтдән мәһрумдур, ушаглары бөјүтмәк чәтиндир, һәјат јолдашы исә онун иманына шәрик олмур. Хошбәхт едәҹәк бир шејин кәдәр ҝәтирмәси неҹә дә аҹынаҹаглыдыр!
Аллаһа садиглик ваҹибдир
8. Јеговаја садиглик никаһын мөһкәмлијинә вә хошбәхтлијинә неҹә көмәк едир?
8 Доғрудур ки, гаршылыглы ҹазибәдарлыг никаһы мөһкәмләндирир. Амма киши илә гадын әһдинин мөһкәмлији вә хошбәхтлији үчүн үмуми дәјәрләр ваҹибдир. Һәр ики тәрәфин Јегова Аллаһа садиглији, һеч бир амилин верә билмәдији бирлији әмәлә ҝәтирир вә горујур (Ваиз 4:12). Әр вә арвадын һәјатлары Јеговаја едилән һәгиги ибадәт әтрафында дөвр едәндә, бу онлары руһән, гәлбән вә мә’нәви ҹәһәтдән бирләшдирир. Онлар Аллаһын Кәламыны бирликдә өјрәнирләр; бирликдә дуа едирләр, бу исә онлары гәлбән бирләшдирир; бирликдә мәсиһчи јығынҹагларына вә тәблиғ хидмәтинә ҝедирләр. Бүтүн бунларын сајәсиндә, онлары бир-бирләринә јахынлашдыран руһани телләр формалашыр. Ән башлыҹасы исә одур ки, онлар Јегованын хејир-дуасына наил олурлар.
9. Исһаг үчүн арвад ахтармагла әлагәдар Ибраһим неҹә давранды вә бунун нәтиҹәси нә олду?
9 Аллаһа садиглик, гәбилә башчысы олан сәдагәтли Ибраһими, оғлу Исһага арвад ахтармаг вахты чатанда Аллаһа мәгбул тәрздә давранмаға тәшвиг етди. Ибраһим евиндә е’тибар етдији сәдагәтли вә бөјүк гулуна деди: “Ҝөјләрин Аллаһы вә јерин Аллаһы Рәббин һаггы үчүн сәнә анд вердирирәм ки, ичиндә јашамагда олдуғум Кән’анлыларын гызларындан оғлума гадын алмајаҹагсан; фәгәт мәним мәмләкәтимә вә әграбама ҝедәҹәксән вә оғлум Исһаг үчүн бир гадын алаҹагсан... [Јегова] сәнин өнүндә мәләјини ҝөндәрәҹәк вә орадан оғлум үчүн бир гадын алаҹагсан”. Ребека, Исһагын нәҹибликлә севдији лајигли гадын олду (Тәквин 24:3, 4, 7, 14—21, 67).
10. Әр вә арвадын үзәринә Мүгәддәс Китаб һансы мәс’улијјәтләри гојур?
10 Аллаһа садиглик, субај олан мәсиһчи оғлан вә гызлара, никаһа аид Мүгәддәс Китаб тәләбләринә мүвафиг олмаг хүсусијјәтләри инкишаф етдирмәкдә көмәк едәҹәк. Әр вә арвадын дашыдыглары мәс’улијјәтләрдән бә’зиләрини һәвари Павел гејд едир: “Гадынлар! Рәббә табе олур кими, әрләринизә табе олун... Әрләр, арвадларынызы севин, неҹә ки, Мәсиһ дә иманлылар ҹәмијјәтини севди... Беләҹә әрләр дә өз арвадларыны, өз бәдәнләри гәдәр севмәлидирләр. Өз арвадыны севән өзүнү севир [...] Сизә ҝәлинҹә, гој һәр кәс өз арвадыны өзү кими севсин, арвад исә әринә еһтирам етсин” (Ефеслиләрә 5:22—33). Ҝөрдүјүмүз кими, Павелин илһамланмыш сөзләри мәһәббәт вә һөрмәтин ваҹиблијини ҝөстәрир. Бу мәсләһәтә риајәт етмәк үчүн Јеговаја еһтирамлы горху бәсләмәк ҝәрәкдир. Һәм фираван, һәм дә чәтин анларында әр илә арвад бир-бирләринә үрәкдән сәдагәтли галмалыдырлар. Аилә гурмаг истәјән мәсиһчиләр бу ҹүр мәс’улијјәти үзәрләринә ҝөтүрмәк игтидарында олмалыдырлар.
Аилә гурмағы гәрара алмаг вахты
11. а) Аилә гурмағын вахты барәдә Мүгәддәс Китаб нә дејир? б) 1 Коринфлиләрә 7:36 олан мәсләһәтә риајәт етмәјин мүдриклик олдуғуну һансы нүмунә ҝөстәрир?
11 Аилә гурмаға һазыр олдуғумуз вахты билмәк олдугҹа ваҹибдир. Мүгәддәс Јазылар конкрет јаш тә’јин етмир, чүнки никаһ үчүн һәр бир кәсин өзүнә мүнасиб јаш дөврү вар. Анҹаг Мүгәддәс Јазылар ҝөстәрир ки, ҹинси әлагәјә олан ҝүҹлү мејлин сағлам дүшүнҹәјә үстүн ҝәлдији “ҝәнҹлијин баһар чағынын” өтүб кечмәсини ҝөзләмәк јахшыдыр (1 Коринфлиләрә 7:36, ЈД). Мишел адлы гыз дејир: “Ијирми јашы олмајан рәфигәләримин ҝөрүшә чыхдыгларыны вә әрә ҝетдикләрини ҝөрәндә, Мүгәддәс Китабын бу мәсләһәтинә риајәт етмәк һәрдәнбир чәтин олурду. Амма бу мәсләһәтин Јеговадан ҝәлдијини вә Онун јалныз јахшылығымызы истәдијини анлајырдым. Мән, аилә гурмаға тәләсмәдән, диггәтими Јегова илә олан мүнасибәтимә мәркәзләшдириб, ҝәнҹлик чағында әлдә едилмәси мүмкүн олмајан бә’зи һәјат тәҹрүбәләринә наил ола билдим. Бир нечә ил әрзиндә, аилә мәс’улијјәтләринин вә никаһда јаранан проблемләрин өһдәсиндән даһа јахшы ҝәлмәјә һазырлашдым”.
12. Нәјә ҝөрә ҝәнҹ јашларында аилә гурмаға тәләсмәк лазым дејил?
12 Тәләсик олараг еркән јашларында евләнән вә әрә ҝедәнләр чох вахт мүәјјән едирләр ки, јаша долдугҹа онларын тәләбат вә истәкләри дә дәјишир. Әввәлләр онларын арзуладыглары шејләр, вахт кечдикҹә өз әһәмијјәтини итирир. Бир мәсиһчи 16 јашында әрә ҝетмәк истәди. Онун нәнәси вә анасы да бу јашда әрә ҝетмишдиләр. Бу гызы марагландыран адам онунла евләнмәкдән имтина едәндә, о, онунла аилә гурмаға разы олан башга бир оғлан тапды. Анҹаг о, тәләсдији үчүн чох пешман олду.
13. Еркән јашларында аилә гуранларын чох вахт һансы ҹәһәтдән чатышмазлыглары олур?
13 Аилә гурмаг һаггында фикирләшәркән, бунунла бағлы олан һәр шеји там мә’нада дәрк етмәк ваҹибдир. Еркән јашларында гурулан аиләдә бир чох проблемләр јараныр, бунлары һәлл етмәји исә, чох еһтимал ки, ҝәнҹ әр-арвад баҹармыр. Онларда, аилә һәјаты вә ушагларын тәрбијәси илә әлагәдар олан чәтинликләрин өһдәсиндән ҝәлмәк үчүн, тәҹрүбә вә јеткинлик чатышмазлығы ола биләр. Аилә о заман гурулмалыдыр ки, инсан позулмаз әһдин бүтүн мәс’улијјәтләрини физики, зеһни вә руһани ҹәһәтдән өз үзәринә ҝөтүрмәјә һазыр олур.
14. Аиләдә јаранан ҝәрҝин вәзијјәтләрин өһдәсиндән ҝәлмәк үчүн нә лазымдыр?
14 Павел јазырды ки, евләнәнләрин “һәјатда әзијјәти олаҹаг” (1 Коринфлиләрә 7:28). Проблемләр, аилә гуранларын һәр биринин өз хасијјәти вә мүәјјән мәсәләјә фәргли нөгтеји-нәзәрләри олдуғу үчүн јараныр. Инсанын гејри-камиллији үзүндән, Мүгәддәс Китабын һәвалә етдији ролу һәјата кечирмәк әр вә арвада асан олмур (1 Коринфлиләрә 11:3; Колослулара 3:18, 19; Титуса 2:4, 5; 1 Петер 3:1, 2, 7). Аллаһын рәһбәрлијини ахтармаг, тәтбиг етмәк вә һәрдәнбир јаранан ҝәрҝинлији мәһәббәтлә арадан галдырмаг үчүн, әрлә арваддан јеткинлик вә руһани мөһкәмлик тәләб олунур.
15. Өвладларын никаһа һазырланмасында валидејнләрин ролу нәдән ибарәтдир? Нүмунәдә ҝөстәрин.
15 Валидејнләр, Аллаһын рәһбәрлијинә риајәт етмәјин нә дәрәҹәдә ваҹиб олдуғуну анламагда өвладларына көмәк етмәклә, онлары аилә һәјатына һазырлаја биләрләр. Мүгәддәс Јазылары вә мәсиһчи нәшријјатларыны мәһарәтлә истифадә едәрәк, валидејнләр өвладларына, өзләринин вә ја аилә гурмаг истәдикләри шәхсин никаһ мәс’улијјәтини үзәрләринә ҝөтүрмәјә һазыр олуб-олмадыгларыны мүәјјәнләшдирмәјә көмәк едәрләрa. Блоссом адлы он сәккиз јашлы гыз өз јығынҹағындакы бир ҝәнҹә ашиг олмушдур. Һәмин ҝәнҹ таммүддәтли пионер иди вә онлар евләнмәк истәјирдиләр. Амма валидејнләри гызын әрә ҝетмәк вахты олмадығыны нәзәрә алыб, гызларындан бир ил ҝөзләмәји хаһиш етдиләр. Сонралар Блоссом јазырды: “Бу мүдрик мәсләһәтә гулаг асдығым үчүн неҹә дә миннәтдарам. Бир ил әрзиндә даһа јеткин олдум вә һәмин ҝәнҹдә јахшы һәјат јолдашына хас олан лазыми хүсусијјәтләрин чатышмадығыны ҝөрмәјә башладым. Бир гәдәр вахтдан сонра о ҝәнҹ тәшкилаты тәрк етди, мән исә һәјатымы пуч едә биләҹәк фәлакәтдән јаха гуртардым. Һәмишә хејирхаһ мәсләһәтлә көмәк едән валидејнләрә малик олмаг неҹә дә јахшыдыр!”
“Рәббә бағлы олмалыдыр”
16. а) “Рәббә бағлы” оланларла аилә гурмаг тәләби һансы мә’нада мәсиһчи үчүн сынаға чеврилә биләр? б) Мәсиһчи оғлан вә гызлар, онларын иманларына шәрик олмајан адамла евләнмәк сынағы јарананда нә һагда дәриндән дүшүнмәлидирләр?
16 Јегова мәсиһчиләрә кифајәт гәдәр ајдын ҝөстәриш вермишдир: “Рәббә бағлы” оланларла аилә гурмаг лазымдыр (1 Коринфлиләрә 7:39). Бу, мәсиһчи валидејнләр вә онларын өвладлары үчүн сынаға чеврилә биләр. Һансы мә’нада? Фәрз едәк ки, ҝәнҹләрдән ким исә аилә гурмаг истәјир, јығынҹагда исә һәјат јолдашы олмаға мүнасиб шәхс јохдур. Һәр һалда о, белә дүшүнә биләр. Һарадаса кишиләр гадынлардан аздыр, јахуд да бир кимсә өз доғма јериндә садәҹә олараг мүнасиб һәјат јолдашы тапа билмир. Бирдән, јығынҹағын һәлә өзүнү Аллаһа һәср етмәмиш үзвү олан ҝәнҹ оғлан мәсиһчи ҝәнҹ гыза мараг ҝөстәрир (вә ја әксинә), бу заман исә Јегованын нормаларына зидд давранмаг сынағы јараныр. Белә һалларда Ибраһимин нүмунәси үзәриндә дәриндән дүшүнмәк фајдалыдыр. Чүнки мәһз Аллаһла јахшы мүнасибәтини горујуб сахламаг истәји ону тәшвиг етди ки, оғлу Исһагы Јеговаја садиг олан гызла евләндирсин. Исһаг да оғлу Јагубу евләндирәндә бу ҹүр давранды. Бу, онларын һәр бириндән ҝүҹ тәләб едирди, амма белә давраныш тәрзи Аллаһа мәгбул иди вә Онун хејир-дуасына сәбәб олду (Тәквин 28:1—4).
17. Нәјә ҝөрә бир иманда олмајан шәхслә аилә гурмаг, чох еһтимал ки, фәлакәтә ҝәтириб чыхараҹаг вә “Рәббә бағлы” оланла евләнмәјин әсас сәбәби нәдир?
17 Бә’зи һалларда иман етмәјән инсан сонралар мәсиһчи олмушду. Лакин бир иманда олмајан инсанларын никаһы чох вахт фәлакәтә ҝәтириб чыхарыр. Бәрабәр олмајан бојундуруға гошулан адамларын әгидәләри, нормалары вә мәгсәдләри фәргли олур (2 Коринфлиләрә 6:14). Бу, аилә һәјатындакы үнсијјәтә вә хошбәхтлијә чох зәрәрли тә’сир ҝөстәрә биләр. Мисал үчүн, бир мәсиһчи гадын, јығынҹағын мөһкәмләндириҹи ҝөрүшүндән сонра руһани мөвзуну, онун иманына шәрик олмајан әри илә мүзакирә едә билмәдији үчүн чох һејфсиләнирди. Ән башлыҹасы исә, “Рәббә бағлы” оланла аилә гурмаг, Јеговаја садиглији ҝөстәрир. Аллаһын Кәламына итаәткар оланда үрәјимиз бизи мүһакимә етмир, чүнки “Онун гаршысында мәгбул олан ишләри ҝөрүрүк” (1 Јәһја 3:21, 22).
18. Аилә гурмаг һаггында дүшүнәркән һансы ваҹиб мәсәләләрә диггәт јетирмәк лазымдыр вә нәјә ҝөрә?
18 Аилә гурмаг һаггында дүшүнәркән, илк нөвбәдә, һәјат јолдашы кими нәзәрдә тутулан шәхсин хејирхаһлығы вә руһанилијинә диггәт јетирмәк лазымдыр. Мәсиһчијә хас олан шәхсијјәт, еләҹә дә Аллаһа мәһәббәт вә Она үрәкдән садиг олмаг, физики ҹазибәдарлыгдан даһа чох ваҹибдир. Руһани ҹәһәтдән мөһкәм әр вә ја арвад олмаг мәс’улијјәтини дәрк едән вә буна әсасән давранан шәхсләр Аллаһын лүтфүнә наил олурлар. Ән әсасы исә, Јарадана бирҝә садиг олмалары вә һәр бир ишдә Онун рәһбәрлијинә риајәт етмәләри әр илә арвад арасындакы мүнасибәти мөһкәмләндирир. Бу, Јегованы иззәтләндирир, аилә исә лап башланғыҹдан, онун узун өмүрлү олмасына көмәк едәҹәк руһән мөһкәм тәмәл үзәриндә гурулур.
[Һашијә]
a “Ҝөзәтчи Гүлләси”нин 1999-ҹу илин 15 феврал нөмрәсинә, 4—8-ҹи сәһифәләрә бахын (русҹа).
Сиз неҹә ҹаваб верәрдиниз?
• Нәјә ҝөрә јахшы һәјат јолдашы сечмәкдә Аллаһын рәһбәрлији лазымдыр?
• Аллаһа садиглик никаһ телләрини неҹә мөһкәмләндирир?
• Валидејнләр өвладларыны аилә гурмаға неҹә һазырлаја биләрләр?
• “Рәббә бағлы” оланларла аилә гурмаг нәјә ҝөрә ваҹибдир?
[11-ҹи сәһифәдәки шәкилләр]
Һәјат јолдашы сечәндә Аллаһын мәсләһәтинә риајәт етмәклә, һәгиги хошбәхтлијә наил олмаг мүмкүндүр.
[12-ҹи сәһифәдәки шәкилләр]
“Рәббә бағлы оланларла” аилә гурараг чохлу хејир-дуа алаҹагсыныз.