Мүгәддәс Китабы анламаг үчүн ҝөстәрилән көмәк
МҮГӘДДӘС КИТАБ надир китабдыр. Бу китабы јазанлар онун Аллаһдан илһам алдығыны сүбут едирләр. Бунун дүзҝүн олдуғуну китабын мәзмуну да тамамилә тәсдиг едир (2 Тимотејә 3:16). Бундан савајы, Мүгәддәс Китабда инсанын јаранмасы, һәјатын мә’насы вә бәшәријјәтин ҝәләҹәји һаггында да мә’лумат верилир. Шүбһәсиз ки, Мүгәддәс Китаб диггәтимизә лајиг олан китабдыр!
Олсун ки, Мүгәддәс Китабы охумаға ҹәһд ҝөстәрмиш, анҹаг ону анламағын чәтин олдуғуну мүәјјән етмисиниз. Бәлкә дә, өз суалларынызын ҹавабыны Мүгәддәс Китабын һансы һиссәсиндә ахтармаг лазым ҝәлдијини билмирсиниз. Әҝәр беләдирсә, бу ҹүр вәзијјәт тәк сизинлә баш вермәмишдир. Белә вәзијјәтлә биринҹи әсрдә јашамыш бир адам да гаршылашмышды. О, араба илә Јерусәлимдән доғма дијары Һәбәшистана ҝедирди. Һәбәшистанлы бу мә’мур, Мүгәддәс Китабдан Ишајанын пејғәмбәрлијини уҹадан охујурду; бу пејғәмбәрлик һәмин вахтдан 700 ил габаг јазылмышдыр.
Бирдән мә’мур арабасынын јанында кимин исә гачдығыны ҝөрдү. Бу адам Иса Мәсиһин шаҝирди Филип иди. О, Һәбәшистан мә’мурундан сорушду: “Охудуғуну һеч анлајырсанмы?” Мә’мур: “Мәнә јол ҝөстәрән олмаса неҹә анлаја биләрәм?” дејә ҹаваб вериб, Филипи арабасына дә’вәт етди. Филип, мә’мурун охудуғу һиссәни она баша салды вә “Иса һаггындакы Мүждәни она” бәјан етди (Һәвариләрин ишләри 8:30—35).
Кечмишдә Аллаһын Кәламыны анламагда Филип һәбәшистанлы мә’мура көмәк етдији кими, бу ҝүн Јегованын Шаһидләри дә Мүгәддәс Китабы анламагда инсанлара көмәк едирләр. Онлар севинҹлә сизә дә көмәк едәрләр. Мүгәддәс Китабы, онун әсас тә’лимләриндән башлајараг систематик өјрәнмәк даһа јахшыдыр (Ибраниләрә 6:1, И—93). Руһән бөјүјәрәк, Павелин дедији кими, “гүввәтли јемәк” гәбул едә биләҹәксиниз, јә’ни даһа дәрин мә’на дашыјан һәгигәтләри анлајаҹагсыныз (Ибраниләрә 5:14). Мәгсәдиниз Мүгәддәс Китабы өјрәнмәк олса да, она әсасланан нәшрләрин, јә’ни Мүгәддәс Китабы өјрәнмәк үчүн олан вәсаитләрин көмәји дә ҝәрәкдир, чүнки бу нәшрләрдә мүәјјән мөвзулары ачыглајан ајәләри тапмағын үсулу вә онларын мә’насы ҝөстәрилир.
Мүгәддәс Китабын өјрәнилмәси адәтән сизә әлверишли олан јердә вә вахтда кечирилир. Һәтта бә’зиләри Мүгәддәс Китабы телефон васитәсилә өјрәнирләр. Мәшғәлә, мәктәбдә олан кими кечирилмир: сизин шәхси вәзијјәтиниз, тәһсил вә габилијјәтиниз нәзәрә алынараг, сәрбәст ев шәраитиндә кечирилир. Өјрәнмә пулсуздур (Матта 10:8). Мүгәддәс Китабы өјрәнәнләр имтаһан вермирләр вә онлар ҹаваб вермәкдән горхмалы дејилләр. Бу ҹүр мәшғәлә заманы суалларыныза ҹаваб тапмағын вә Аллаһа јахынлашмағын үсулларыны өјрәнмәк олар. Бәс Мүгәддәс Китабы даһа нәјә ҝөрә өјрәнмәк лазымдыр? Ҝәлин мүзакирә едәк ҝөрәк, Мүгәддәс Китабы өјрәнмәк нәјә ҝөрә сизин һәјатыныза даһа чох севинҹ ҝәтирә биләр.