Мәсиһин сүлһү үрәкләримиздә неҹә һаким ола биләр?
“Бир бәдәндә она дә’вәт олундуғунуз Мәсиһин сүлһү, үрәкләриниздә һаким олсун” (КОЛОСЛУЛАРА 3:15, И—93).
1, 2. “Мәсиһин сүлһү” мәсиһчинин үрәјиндә һансы тәрздә һаким олур?
“ҺАКИМ ОЛМАГ” сөзү, мәҹбур етмәк вә тә’сир алтында сахламаг мә’насына сөвг етдији үчүн, чохларынын хошуна ҝәлмир. Буна ҝөрә дә Павелин Колосдакы һәмиманлылара сөјләдији: “Мәсиһин сүлһү гој үрәкләриниздә һаким олсун” чағырышы, кимә исә дүшүнҹәсиз ҝөрүнә биләр (Колослулара 3:15). Мәҝәр биз азад инсанлар дејиликми? Нәјә ҝөрә нә исә (вә ја ким исә) үрәкләримиздә һаким олмалыдыр?
2 Павел демирди ки, колослулар ирадә азадлығындан имтина етсинләр. Колослулара 3:15-дә “һаким олсун” кими тәрҹүмә едилән јунан сөзү, һәмин дөврләрдә кечирилән атлетик јарышларда гәләбә гәрарыны чыхаран һаким сөзү илә әлагәлидир. Ојунун гајдалары, јарыш иштиракчыларына мүәјјән дәрәҹәдә азадлыг верирди, анҹаг сон мәрһәләдә ојунун гајдаларына кимин риајәт етдијини вә буна ҝөрә дә галиб ҝәлдијини мәһз һаким һәлл едирди. Һәјатымызда биз дә чох шеји сәрбәст олараг һәлл едә биләрик, амма бу заман Мәсиһин сүлһү үрәјимиздә даима һаким, јә’ни тәрҹүмәчи Едгар Гудспидин адландырдығы кими, “рәһбәр принсип” олмалыдыр.
3. “Мәсиһин сүлһү” нәдир?
3 “Мәсиһин сүлһү” нәдир? Бу, Исанын шаҝирдләри оларкән, Јегова Аллаһын вә Онун Оғлунун бизи севдикләрини, һәмчинин бәјәндикләрини билән заман малик олдуғумуз дахили сакитлик, таразлыг һиссидир. Иса шаҝирдләрини тәрк едәркән, онлара деди: “Сизә Өз сүлһүмү верирәм... Үрәјиниз нараһат олмасын вә горхмасын” (Јәһја 14:27). Будур, артыг тәхминән 2 000 илдир ки, Аллаһа садиг олан мәсһ едилмишләр бу сүлһә севинирләр. Онларын һәмкарлары олан “башга гојунлар”, бу ҝүн һәмин сүлһүн ҝәтирдији севинҹдә онлара шәрик олурлар (Јәһја 10:16). Бу сүлһ, үрәкләримиздә һаким олмалыдыр. Амансыз сынаглара дүшсәк белә, бу ҹүр сүлһ јол вермәјәҹәк ки, горху бизи сарсытсын вә ја һәддиндән артыг изтираб чәкәк. Ҝәлин, әдаләтсизликлә гаршылашан, нараһатчылыг һисси кечирән вә ја өзүмүзү лазымсыз һисс едән заман бу сөзләрин неҹә јеринә јетдијинә диггәт јетирәк.
Әдаләтсизликлә гаршылашанда
4. а) Иса әдаләтсизлијә неҹә мә’руз галды? б) Мәсиһчиләр, әдаләтсизлијин гурбаны олмаларына неҹә јанашырлар?
4 Сүлејман пејғәмбәр демишдир: “Бир адамын диҝәр адам үзәриндә һакимијјәти онун зәрәринәдир” (Ваиз 8:9). Иса бу сөзләрин доғру олдуғуну билирди. О, ҝөјдә оларкән, инсанларын бир-бири илә нә дәрәҹәдә әдаләтсиз даврандығыны ҝөрүрдү. Јерә ҝәләндә исә, өзүнә мүнасибәтдә бөјүк әдаләтсизлијә мә’руз галды: ону — ҝүнаһсыз инсаны — Аллаһа күфр етмәкдә иттиһам етдиләр вә ҹинајәткар кими е’дам етдиләр (Матта 26:63—66; Марк 15:27). Әдаләтсизлик әввәлки кими бу ҝүн дә ҝениш јајылмагдадыр, мәсиһчиләр исә бундан чох бөјүк әзијјәт чәкирләр, чүнки онлара “бүтүн халглар... нифрәт” едир (Матта 24:9). Лакин Мәсиһин сүлһү сајәсиндә, насист өлүм дүшәрҝәләриндә вә Совет ИӘИ-дә (ислаһ әмәк идарәләри) јашадыглары дәһшәтләрә, издиһамын һүҹумуна, јалан иттиһамлара вә бөһтана бахмајараг, онлар сарсылмаз галырлар. Онлар, һаггында: “Сөјүләркән, ҹавабында сөјмәди; әзаб чәкәркән, тәһдид етмәди, әксинә әдаләтлә мүһакимә Едәнә Өзүнү тәслим етди” сөзләри јазылмыш Исаны тәглид едирләр (1 Петер 2:23).
5. Јығынҹагда кимәсә гаршы ҝуја әдаләтсизлик едилдијини ешидәркән, нә һагда дүшүнмәк лазымдыр?
5 Әдаләтсизлик һәмишә ҝениш мигјасда јајылмыр. Бә’зән бизә елә ҝәлә биләр ки, мәсиһчи јығынҹағында кимәсә гаршы әдаләтсиз давраныблар. Белә һалда биз дә өзүмүзү Павел кими һисс едә биләрик. О, дејирди: “Ким бүдрәјир ки, мән онун үчүн јанмајым?” (2 Коринфлиләрә 11:29). Биз нә едә биләрик? Өзүмүздән сорушмалыјыг: доғруданмы әдаләтсизлијә јол верилиб? Әксәр һалларда, баш верән һадисә һагда там мә’луматымыз олмур. Биз, санки ишдән хәбәри олан адамы динләјиб, олсун ки, чох ҹошгун реаксија ҝөстәририк. Мүгәддәс Китабда әбәс јерә дејилмәјиб ки: “Ҹаһил һәр сөзә инанар” (Сүлејманын мәсәлләри 14:15, МКШ). Еһтијатлы олмаг лазымдыр.
6. Јығынҹагда ҝөзә чарпан әдаләтсизлијә неҹә мүнасибәт ҝөстәрә биләрик?
6 Туталым бизә елә ҝәлир ки, әдаләтсизлијин гурбаны биз өзүмүз олмушуг. Үрәјиндә Мәсиһин сүлһү олан шәхс белә һалда өзүнү неҹә апармалыдыр? Јәгин ки, бизә гаршы әдаләтсиз даврандығыны дүшүндүјүмүз адамла сөһбәт етмәк лазымдыр. Лакин бу сөһбәтдән сонра, баш верән һадисәни гаршымыза чыхан һәр адамла мүзакирә етмәјә дәјәрми? Јахшы олмазмы ки, һәр шеји дуада Јеговаја данышаг вә әдаләтин бәрпа олунмасы үчүн Онун гајғы ҝөстәрәҹәјинә архајын олаг? (Мәзмур 9:10; Сүлејманын мәсәлләри 3:5). Ола биләр ки, дуа етдикдән сонра, баш верән һадисәни өзлүјүмүздә садәҹә олараг дүшүнәк вә “сусаг” (Мәзмур 4:4). Әксәр һалларда, Павелин: “Бир-биринизә тәһәммүл един вә биринизин диҝәриндән шикајәти варса, бағышласын. Мәсиһ [“Јегова”, ЈД] сизи бағышладығы кими, сиз дә бир-биринизи бағышлајын”, мәсләһәти тәтбиг едиләндир (Колослулара 3:13).
7. Гардашларла үнсијјәтдә оларкән, һәмишә нәји јадда сахламалыјыг?
7 Неҹә давранаҹағымыздан асылы олмајараг, јадда сахламалыјыг ки, баш верән һадисәјә тә’сир ҝөстәрә билмәсәк дә, бу һадисәјә мүнасибәтимизи дәјишә биләрик. Әҝәр әдаләтсизлијә һәдсиз ҹошгунлугла реаксија ҝөстәририксә, бу бизә, әдаләтсизлијин ҝөстәрә биләҹәји тә’сирдән даһа ҹидди тә’сир бағышлаја биләр (Сүлејманын мәсәлләри 18:14). Биз һәтта бүдрәјәр вә әдаләт бәргәрар олунана гәдәр јығынҹағы тәрк етмәк гәрарына ҝәлә биләрик. Мәзмурчу јазырды ки, Јегованын ганунуну севәнләрә “манеә јохдур” (Мәзмур 119:165). Бу доғрудур ки, бә’зән һәр бир кәс әдаләтсизликлә гаршылашыр. Һеч заман јол вермәјин ки, бу, Јеговаја хидмәт етмәнизә мане олсун. Гој Мәсиһин сүлһү сизин үрәјиниздә һаким олсун.
Бизи нараһатчылыг јахалајанда
8. Мисал үчүн, нараһатчылыг нәдән јарана биләр вә нәјә сәбәб олур?
8 Бу “ахыр ҝүнләрдә” нараһатчылыг һәјатын ајрылмаз бир һиссәсинә чеврилмишдир (2 Тимотејә 3:1). Доғрудур, Иса демишди ки: “Нә јејәҹәксиниз дејә ҹанынызын, нә ҝејәҹәксиниз дејә бәдәнинизин гајғысына галмајын” (Лука 12:22). Лакин нараһатчылыг, һәмишә мадди рифаһ барәсиндә гајғы чәкмәклә бағлы олмур. Лут, Содом әһалисинин әхлагсызлығындан “әзијјәт чәкирди” (2 Петер 2:7). Павел “бүтүн иманлы ҹәмијјәтләри үчүн... гајғы” ҝөстәрирди (2 Коринфлиләрә 11:28). Иса, өлүмүндән бир гәдәр әввәл, ҝеҹә елә изтираб чәкирди ки, “Онун тәри јерә даман ган дамлаларына бәнзәјирди” (Лука 22:44). Ајдындыр ки, һәр нараһатчылыг иманын азлығына шәһадәт етмир. Лакин һәр нәјә ҝөрә нараһат олсаг да, әҝәр бу нараһатчылыг ҝүҹлү вә фасиләсиздирсә, онда бизи сүлһдән мәһрум едә биләр. Бә’зән нараһатчылыг инсанлара о дәрәҹәдә һаким олур ки, онлара елә ҝәлир Јеговаја хидмәтдә малик олдуглары вәзифәләрин, санки өһдәсиндән ҝәлмәк игтидарында дејилләр. Мүгәддәс Китабда дејилир: “Гәлби нараһат оланын гәдди әјиләр” (Сүлејманын мәсәлләри 12:25, МКШ). Әҝәр нараһатчылыг бизә әзијјәт верирсә, нә етмәк олар?
9. Нараһатчылыгдан јаха гуртармаг үчүн һансы практики аддымлары атмаг олар вә нараһатчылыг јарадан һансы сәбәбләри арадан галдырмаг мүмкүн дејил?
9 Бә’зән биз һансыса практики аддымлары ата биләрик. Әҝәр сағламлығымыз бизи нараһат едирсә, онда бунунла мәшғул олмаг дүзҝүн давраныш олар, белә мәсәләләри исә һәр бир мәсиһчи шәхсән һәлл едирa (Матта 9:12). Әҝәр јеринә јетирдијимиз вәзифәләр чохдурса, онда онларын бир һиссәсини башгаларына һәвалә едә биләрик (Чыхыш 18:13—23). Бәс һәвалә едилмәси мүмкүн олмајан, ағыр вәзифә јүкү дашыјан кәсләр нә етмәлидирләр? Мисал үчүн, валидејнләр вә ја һәгигәтә мүгавимәт ҝөстәрән һәјат јолдашы илә јашајан мәсиһчи нә етмәлидир? Ҝүҹ-бәла илә доланан, јахуд мүһарибә зоналарында јашајан аилә неҹә? Шүбһәсиз ки, бу әшјалар системиндә нараһатчылығымызын бүтүн сәбәбләрини арадан галдырмаг мүмкүн олмајаҹаг. Буна бахмајараг, үрәкләримиздә Мәсиһин сүлһүнү горуја биләрик. Неҹә?
10. Нараһатчылыгдан јаха гуртармаг үчүн мәсиһчи һансы ики үсула әл ата биләр?
10 Имканлардан бири — тәсәллини Аллаһын Кәламында ахтармагдыр. Давуд падшаһ јазырды: “Ичимдә гајғыларын чохлуғунда, сәнин тәсәллиләрин ҹанымы фәрәһләндирир” (Мәзмур 94:19). Јегованын “тәсәллиләрини” Мүгәддәс Китабда тапмаг олар. Аллаһын илһамландырдығы бу китаба мүнтәзәм сурәтдә мүраҹиәт едәрәк, үрәјимиздә Мәсиһин сүлһүнү сахлаја биләрик. Мүгәддәс Китабда дејилир: “Јүкүнү Рәббә бурах вә о сәнә дәстәк олар; салеһи әсла сарсылмаға бурахмаз” (Мәзмур 55:22). Павел исә јазырды: “Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр” (Филипилиләрә 4:6, 7). Сүлһү горујуб-сахламагда бизә һәмчинин сәмими вә даими дуалар да көмәк едәр.
11. а) Дуа етмәкдә Иса һансы ҝөзәл нүмунәни верди? б) Биз дуа етмәјә неҹә јанашмалыјыг?
11 Бу саһәдә Иса чох ҝөзәл нүмунә верди. О, бә’зи һалларда сәмави Атасына саатларла дуа едирди (Матта 14:23; Лука 6:12). Ән ағыр сынаға таб ҝәтирмәкдә Исаја дуа көмәк етди. Өлүмүндән әввәл, ҝеҹә Иса чох изтираб чәкирди. О, нә етди? “Даһа сә’јлә дуа етмәјә” башлады (Лука 22:44). Бәли, Аллаһын камил Оғлу, дуаја хүсуси диггәт ајырырды. Белә исә, онда онун гејри-камил давамчылары да, дуа етмәк вәрдишини инкишаф етдирмәјә даһа чох диггәт јетирмәлидирләр! Иса өз шаҝирдләрини “даим дуа етмәјә вә һеч руһдан дүшмәмәјә” өјрәдирди (Лука 18:1). Дуа — бизи биздән даһа јахшы таныјан Шәхсијјәтлә сәмими вә чох ҹидди сөһбәтдир (Мәзмур 103:14). Әҝәр үрәјимиздә Мәсиһин сүлһүнү горумаг истәјириксә, “дурмадан дуа едәҹәјик” (1 Салониклиләрә 5:17).
Мәһдудијјәтләримизи арадан галдырырыг
12. Нәјә ҝөрә бә’зиләри дүшүнә биләрләр ки, онларын хидмәти Јеговаја мәгбул дејил?
12 Јегова һәр бир хидмәтчисини дәјәрли саныр (Һаггај 2:7). Лакин бир чохлары буна чәтинликлә инанырлар. Бә’зиләри гоҹалдыглары, аиләдә даһа чох вәзифәләри јарандығы вә ја сағламлыглары писләшдији үчүн мә’јус олурлар. Диҝәрләри, кәдәрли кечмишинә ҝөрә өзләрини Аллаһа хидмәт етмәјә лајиг ҝөрмүрләр. Башгалары исә, вахтилә ишләтдикләри сәһвләр уҹбатындан әзијјәт чәкир вә Јегованын онлары нә заманса бағышлајаҹағына шүбһә едирләр (Мәзмур 51:3). Бу ҹүр һиссләрин өһдәсиндән неҹә ҝәлмәк олар?
13. Өзүнү Јеговаја мәгбул сајмајанлар, Мүгәддәс Китабда һансы тәсәллини тапа биләрләр?
13 Мәсиһин сүлһү, Јегованын мәһәббәтинә шүбһә етмәјимизә јол вермәјәҹәкдир. Иса һеч заман демирди ки, бизим дәјәримиз, ишләримизин башгаларынын ишләри илә мүгајисәси сајәсиндә мүәјјән едилир. Бунун үзәриндә дүшүнәрәк, үрәјимиздә Мәсиһин сүлһүнү бәрпа едә биләрик (Матта 25:14, 15; Марк 12:41—44). Әслиндә о, садиглик һаггында данышырды. Иса шаҝирдләринә деди: “Ахыра гәдәр сәбр едән хилас олаҹагдыр” (Матта 24:13). Исанын өзү инсанлар тәрәфиндән “хор ҝөрүлдү”, бунунла белә, Атасынын мәһәббәтинә зәррә гәдәр дә шүбһә етмәди (Ишаја 53:3; Јәһја 10:17). Һәмчинин өз шаҝирдләрини дә, Атасы тәрәфиндән севилдикләринә әмин етди (Јәһја 14:21). Иса, буну гејд етмәк үчүн деди: “Мәҝәр ики сәрчә гушу бир ассаријә сатылмырмы? Вә Атанызын һөкмү олмадыгда, онлардан һеч бири јерә дүшмәз. Сизин исә башыныздакы сачлар да белә сајылмышдыр. Одур ки, горхмајын; сиз бир чох сәрчәдән даһа дәјәрлисиниз” (Матта 10:29—31). Јегованын мәһәббәтинә неҹә дә сәмими зәманәтдир!
14. Јегованын һәр биримизи гијмәтләндирдијинә даир һансы зәманәтимиз вар?
14 Иса һәмчинин деди: “Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз” (Јәһја 6:44). Исанын ардынҹа ҝетмәмиз үчүн Јегова бизи ҹәлб едибсә, демәли О, бизим хилас олмағымызы истәјир. Иса шаҝирдләрини әмин етди: “Ҝөјләрдәки Атанызын елә бир мурады јохдур ки, бу кичикләрдән бири һәлак олсун” (Матта 18:14). Буна ҝөрә дә, әҝәр сиз Јеговаја үрәкдән хидмәт едирсинизсә, хејирхаһ ишләриниз үчүн севинин (Галатијалылара 6:4). Әҝәр вахты илә ишләтдијиниз сәһвләриниз сизә раһатлыг вермирсә, архајын олун ки, үрәкдән төвбә едәнләри Јегова “бол-бол бағышлар” (Ишаја 43:25; 55:7). Әҝәр сизи башга нә исә нараһат едирсә, хатырлајын ки, “Рәбб үрәји сыныг оланлара јахындыр вә руһу әзилмиш оланлары гуртарыр” (Мәзмур 34:18).
15. а) Шејтан бизи сүлһдән мәһрум етмәјә неҹә чалышыр? б) Јегова һаггында нәјә әмин ола биләрик?
15 Шејтанын ән бөјүк арзусу, сизи севинҹдән мәһрум етмәкдир. Һамымызын мирас алдығы вә мүбаризә апардығы ҝүнаһын тәгсиркары мәһз одур (Ромалылара 7:21—24). Гејри-камиллијимиз уҹбатындан хидмәтимизи Аллаһа мәгбул тәрздә иҹра едә билмәдијимизи дүшүнәриксә, әлбәттә ки, Шејтан севинәҹәкдир. Иблисә, мә’нәвијјатынызы позмаға һеч заман јол вермәјин! Онун нијјәтләрини јадда сахлајын вә гој бу һагда олан биликләр “јериниздә дурмаға” сизә ҹәсарәт версин (2 Коринфлиләрә 2:11; Ефеслиләрә 6:11—13). Унутмајын ки, “Аллаһ үрәјимиздән бөјүкдүр вә һәр шеји билир” (1 Јәһја 3:20, И—93). Јегова јалныз сәһвләримизи дејил, һәмчинин мејлләримизи вә ҹәһдләримизи дә ҝөрүр. Буна ҝөрә дә гој мәзмурчунун сөзләри сизә тәсәлли версин: “Рәбб халгыны өзүндән атмајаҹаг вә мирасыны бурахмајаҹагдыр” (Мәзмур 94:14).
Мәсиһин сүлһүндә бирләшибләр
16. Таб ҝәтирмәк үчүн апардығымыз мүбаризәдә һансы мә’нада тәк дејилик?
16 Павел јазырды ки, “бир бәдәнин үзвләри кими... дә’вәт олундуғумуз” үчүн Мәсиһин сүлһүнүн үрәкләримиздә һаким олмасына јол вермәлијик. Павелин мүраҹиәт етдији мәсһ едилмиш мәсиһчиләр Мәсиһин бәдәнинин үзвләри олмаға дә’вәт олунурдулар; һәмин дә’вәти буҝүнкү мәсһ едилмишләр дә алырлар. Онларын һәмкарлары олан “башга гојунлар”, “тәк Чобан”ын — Иса Мәсиһин рәһбәрлији алтында онларла “тәк сүрүдә” бирләшмишләр (Јәһја 10:16). Милјонларла инсанлардан ибарәт олан бејнәлхалг “сүрүнүн” бүтүн бу үзвләри, үрәкләриндә Мәсиһин сүлһүнүн һаким олмасына имкан верирләр. Тәк олмадығымызы билмәк, мүхтәлиф сынаглара таб ҝәтирмәјимизә көмәк едир. Петер јазырды: “Мөһкәм иманла она [Шејтана] гаршы дурун вә билин ки, дүнјадакы гардашларыныз да ејни әзаблары чәкирләр” (1 Петер 5:9).
17. Мәсиһин сүлһүнә үрәкләримиздә һаким олмаға имкан вермәјә бизи нә тәшвиг едир?
17 Ҝәлин, Аллаһын мүгәддәс руһунун бу гәдәр ваҹиб олан сәмәрәсини — сүлһү ахтармагда давам едәк (Галатијалылара 5:22, 23). Јегованын ләкәсиз, гүсурсуз вә сүлһдә јашајан сандығы кәсләр, нәһајәтдә, “салеһлијин өмүр сүрдүјү” ҹәннәтдә әбәди һәјат хејир-дуасыны алаҹаглар (2 Петер 3:13, 14). Мәсиһин сүлһүнә үрәкләримиздә һаким олмаға имкан вермәјә бүтүн әсасларымыз вар.
[Һашијә]
a Бә’зән нараһатчылыг, тибби мүајинәјә еһтијаҹы олан хәстәлик, мәсәлән, ағыр депрессија уҹбатындан јарана вә ја ҝүҹләнә биләр.
Хатырлајырсынызмы?
• Мәсиһин сүлһү нәдир?
• Әдаләтсизликлә гаршылашаркән, Мәсиһин сүлһү үрәкләримиздә неҹә һаким ола биләр?
• Мәсиһин сүлһү нараһатчылығын өһдәсиндән ҝәлмәкдә бизә неҹә көмәк едир?
• Өзүмүзү лазымсыз һесаб едәндә, Мәсиһин сүлһү бизә неҹә тәсәлли верир?
[29-ҹу сәһифәдәки шәкил]
Иттиһамчылары гаршысында дураркән, Иса өзүнү Јеговаја тәслим етди.
[31-ҹи сәһифәдәки шәкил]
Аллаһ сарсылмазлығы чох гијмәтләндирир.
[32-ҹи сәһифәдәки шәкил]
Јегованын вердији тәсәлли, севән атанын һәрарәтли ағушу кими, бизи сакитләшдирә биләр.