Јегованын хејир–дуасы сәнин үзәриндә јеринә јетәҹәкми?
“Әҝәр Аллаһын Рәббин сөзүнү динләсән, бүтүн бу бәрәкәтләр сәнин үзәринә ҝәләҹәк вә сәнә чатаҹаглар” (ТӘСНИЈӘ 28:2).
1. Исраиллиләрин лә’нәт вә ја хејир–дуа алмалары нәдән асылы иди?
СӘҺРАДАКЫ 40 иллик сәјаһәтләринин сонунда исраиллиләр Моав дүзәнлијиндә дүшәрҝә салдылар. Онлар, Вә’д едилән дијарын лап јахынлығында идиләр. “Тәснијә” китабыны Муса елә һәмин вахт јазмышды; бу китабда бир сыра хејир–дуалар вә лә’нәтләр садаланырды. Исраил халгы итаәткарлыгла “Рәббин сөзүнү динләсәјди”, хејир–дуалар онун үзәриндә јеринә јетәрди. Јегова исраиллиләри Өзүнүн “хүсуси халгы” кими севир вә гүдрәтини онларын рифаһы үчүн истифадә етмәк истәјирди. Лакин әҝәр Јегованы динләмәздиләрсә, онлары һөкмән лә’нәт јахаламалы иди (Тәснијә 8:10—14; 26:18; 28:2, 15).
2. Тәснијә 28:2 ајәсиндә “гулаг асмаг” вә “чатмаг” кими тәрҹүмә едилән гәдим ибрани фе’лләри һансы мә’наны дашыјыр?
2 Тәснијә 28:2 ајәсиндә “гулаг асмаг” кими тәрҹүмә едилән гәдим ибрани фе’ли, фасиләсиз һәрәкәти билдирир. Јегованын халгы Она һәрдәнбир јох, даима гулаг асмалыдыр. Аллаһын хејир–дуалары јалныз о заман бу халгын үзәриндә јеринә јетәҹәкдир. “Јеринә јетмәк” вә “чатмаг” кими тәрҹүмә едилән гәдим ибрани фе’ли овчулугла бағлы олуб, даһа чох “чатмаг” вә ја “јахаламаг” мә’насыны дашыјыр.
3. Нун оғлу Јешуну нәдә тәглид едә биләрик вә буну етмәк нә үчүн ваҹибдир?
3 Исраил халгынын башчысы олан Нун оғлу Јешу, Јеговаја гулаг асмағы гәрара алды вә буна ҝөрә дә хејир–дуалара саһиб олду. Јешу деди: “Кимә гуллуг едәҹәјинизи бу ҝүн сечин; фәгәт мән вә евимин халгы, биз Рәббә гуллуг едәҹәјик”. Халг ҹаваб верди: “Башга илаһиләрә гуллуг етмәк үчүн Рәбби бурахмаг биздән узаг олсун” (Јешу 24:15, 16). Ҝөстәрдији ҝөзәл әһвал–руһијјә сајәсиндә Нун оғлу Јешу, онун нәсли арасында Вә’д едилән дијара кечмәк шәрәфинә лајиг ҝөрүлән азсајлы адамларын сырасында олду. Бу ҝүн биз, даһа ҝөзәл Вә’д едилән дијарын — ҹәннәт дүнјасынын астанасындајыг. Һәмин ҹәннәтдә, Аллаһын ҝөзүндә лүтф тапан инсанлар, Нун оғлу Јешунун ҝүнләриндә Исраил халгынын үмид етдијиндән гат–гат артыг хејир–дуалар алаҹаглар. Бу хејир–дуалар сәнин үзәриндә јеринә јетәҹәкми? Әҝәр Јеговаја даима гулаг ассан, јеринә јетәҹәкдир. Буну етмәкдә гәтијјәтли олмағымыз үчүн, ҝәлин гәдим Исраил халгынын тарихини, еләҹә дә бу халг арасында ајры–ајры адамларын ибрәтвериҹи нүмунәсини нәзәрдән кечирәк (Ромалылара 15:4).
Хејир–дуа, јохса лә’нәт?
4. Сүлејманын дуасына ҹаваб олараг, Аллаһ она нә бәхш етди вә бу ҹүр хејир–дуалара биз неҹә јанашмалыјыг?
4 Демәк олар ки, Сүлејман падшаһын рәһбәрлик етдији илләр әрзиндә Јегова исраиллиләрә бол–бол хејир–дуа верирди. Онлар тәһлүкәсиз шәраитдә јашајыр вә мадди ҹәһәтдән инкишаф едирдиләр (1 Краллар 4:25). Сүлејман Аллаһдан вар–дөвләт хаһиш етмәсә дә, онун зәнҝинлији барәдә нәтиҹәдә рәвајәтләр гошулду. Сүлејман ҝәнҹ вә тәҹрүбәсиз оларкән, Аллаһдан анлајышлы үрәк диләди. Јегова, она мүдриклик вә анлајыш бәхш етмәклә, һәмин хаһишә ҹаваб верди. Бунун сајәсиндә Сүлејман, јахшыны писдән ајырмағы баҹарараг, халгы лазыми гајдада мүһакимә едә билирди. Аллаһ Сүлејмана һәм вар–дөвләт, һәм дә шан–шөһрәт версә дә, руһани зәнҝинлијин нә дәрәҹәдә дәјәрли олдуғуну Сүлејман ҝәнҹлик илләриндән дәрк едирди (1 Краллар 3:9—13). Мадди вәзијјәтимиздән асылы олмајараг, Јегованын лүтфүнә вә руһани зәнҝинлијә малик олдуғумуза ҝөрә миннәтдар ола биләрик!
5. Исраил вә Јәһуди халгы Јеговаја гулаг асмадығына ҝөрә нә баш верди?
5 Исраиллиләр Јегованын хејир–дуасына ҝөрә миннәтдарлыг ҝөстәрмәдиләр. Аллаһа гулаг асмадыглары үчүн, хәбәрдар олундуглары лә’нәт онлары јахалады. Исраил вә Јәһуда падшаһлыглары дүшмәнләр тәрәфиндән зәбт едилди, халг исә әсир алынды (Тәснијә 28:36; 2 Краллар 17:22, 23; 2 Тарихләр 36:17—20). Бүтүн бу әзаблара дүчар олараг, Исраил халгы Јеговаја даима гулаг асан кәсләрин хејир–дуалара наил олдугларыны баша дүшдүмү? Сағ галыб, ерамыздан әввәл 537–ҹи илдә вәтәнә гајыдан јәһудиләрин, “анлајышлы үрәјә” малик олуб олмадыгларыны вә Аллаһа даима гулаг асмағын ваҹиблијини дәрк едиб етмәдикләрини әмәлдә ҝөстәрмәк имканлары варды (Мәзмур 90:12).
6. а) Јегова нәјә ҝөрә Һаггај вә Зәкарја пејғәмбәри халгын јанына ҝөндәрди? б) Аллаһын Һаггај васитәсилә дедији сөзләрдә һансы принсип әкс олунур?
6 Вәтәнә гајыдан јәһудиләр Јерусәлимдә гурбанҝаһ дүзәлтдиләр вә мә’бәди бәрпа етмәјә башладылар. Лакин дүшмәнләри тәрәфдән ҝөстәрилән мүгавимәтә ҝөрә онларын сә’јләри зәифләмәјә башлады, тикинти иши исә дајанды (Езра 3:1—3, 10; 4:1—4, 23, 24). Бундан әлавә, раһат һәјат шәраити јәһудиләр үчүн мә’бәдин тикинтисиндән ваҹиб олмаға башлады. Аллаһ, халгда һәгиги ибадәтә сә’ји аловландырмаг үчүн, Һаггај вә Зәкарја пејғәмбәри онларын јанына ҝөндәрди. Јегова, Һаггајын васитәсилә деди: “Бу ев [ибадәт еви] хараб икән сизин үчүн бәзәкли евләриниздә отурмаг вахтыдырмы?... Јолларынызы јахшы дүшүнүн. Чох әкдиниз, фәгәт евә аз ҝәтирдиниз; јејирсиниз вә дојмурсунуз... музд алан да дәлик кисә үчүн музд алыр” (Һаггај 1:4—6). Мадди рифаһа наил олмаг наминә руһани мәнафеләри гурбан вермәк, Јегованын хејир–дуасыны ҝәтирмир (Лука 12:15—21).
7. Јегова нәјә ҝөрә јәһудиләри: “Јолларынызы јахшы дүшүнүн” — дејә дә’вәт едирди?
7 Бүтүн вахтларыны ҝүндәлик ишләринә сәрф едән јәһудиләр унудурдулар ки, Аллаһын јағмурлу вә бәһрәли мөвсүмләр хүсусунда вердији хејир–дуалара, јалныз Она итаәткар галдыглары заман үмид бәсләјә биләрдиләр. Итаәткарлығы исә, һәтта дүшмәнләр тәрәфиндән мүгавимәтлә тоггушаркән дә ҝөстәрмәли идиләр (Һаггај 1:9—11). Бу сәбәбдән, “јолларынызы јахшы дүшүнүн” чағырышы неҹә дә јериндә иди! (Һаггај 1:7). Әслиндә Јегова онлара дејирди: “Фикирләшин! Анлајын ки, тарлада чәкдијиниз бош зәһмәтинизлә Мәним ибадәт евимдәки харабалыг арасында бағлылыг вар”. Пејғәмбәрләрин Јеговадан илһам алмыш сөзләри нәһајәтдә јәһудиләрин гәлбинә јол тапды: халг ишә башлады вә б. е. ә. 515–ҹи илдә мә’бәд бәрпа олунду.
8. Малакинин ҝүнләриндә Јегова јәһудиләрә һансы чағырышла мүраҹиәт етди вә нәјә ҝөрә?
8 Сонралар, Малаки пејғәмбәрин ҝүнләриндә јәһудиләр јенә руһән зәифләмәјә башладылар, һәтта Аллаһа мәгбул олмајан гурбанлар да ҝәтирирдиләр (Малаки 1:6—8). Белә олдугда, Јегова онлары дә’вәт етди ки, мәһсулларынын онда бирини анбара ҝәтирсинләр вә Ону сынасынлар: ҝөјләрин пәнҹәрәләрини онлара ачмајаҹагмы вә лүзумундан артыг хејир–дуалар јағдырмајаҹагмы? (Малаки 3:10). Јәһудиләрин зәһмәт чәкиб алын тәри илә мүәјјән шејләрә наил олмаға чалышмалары, доғрудан да ағылсызлыг иди, ахы Аллаһа гулаг асардыларса, һәмин не’мәтләри онлара Аллаһын өзү бол–бол верәрди! (2 Тарихләр 31:10).
9. Мүгәддәс Китабда хатырланан һансы үч шәхсин һәјаты һаггында өјрәнәҹәјик?
9 Мүгәддәс Китабда Исраил халгынын тарихиндән әлавә Јеговаја гулаг асыб асмадыгларындан, Ондан хејир–дуа вә ја лә’нәт алдыгларындан асылы олмајараг, бу халг ичәрисиндә јашајан ајры–ајры шәхсләрин һәјатындан да бәһс олунур. Ҝәлин ҝөрәк һәмин шәхсләрин — Боаз, Набал вә Һаннанын нүмунәләриндән нә өјрәнә биләрик. Бунун үчүн јахшы оларды ки, Рут китабыны, һәмчинин 1 Самуел 1:1—2:21 вә 1 Самуел 25:2—42 ајәләрини охујасыныз.
Боаз Јеговаја гулаг асырды
10. Боаз вә Набал арасында һансы охшарлыг варды?
10 Боаз илә Набал мүхтәлиф дөврләрдә јашамыш олсалар да, онларын арасында мүәјјән охшарлыг варды. Мисал үчүн, онларын һәр икиси Јәһуда торпағында јашајырды. Һәр икиси зәнҝин мүлкәдар олуб, еһтијаҹ ичиндә оланлара мәрһәмәт ҝөстәрмәк имканына малик идиләр. Лакин онлар арасындакы охшарлыг јалныз бундан ибарәт иди.
11. Јеговаја гулаг асдығыны Боаз әмәлдә неҹә ҝөстәрди?
11 Боаз, Исраил һакимләринин дөврүндә јашамышды. О, инсанлара һөрмәтлә јанашырды, бичинчиләри исә она еһтирам бәсләјирдиләр (Рут 2:4). Гануна табе олараг, Боаз чалышырды ки, касыб вә мәзлум инсанлар үчүн тарласында сүнбүлләр сахласынлар (Левилиләр 19:9, 10). Боаз, Рут илә Наоми һаггында биләндә вә јашлы гајнанасынын мадди тәләбатлары үчүн Рутун ҹаныјананлыгла гајғы чәкдијини ҝөрәндә нә етди? О, Рута хүсуси диггәт јетирди вә өз адамларына тапшырды ки, тарладан сүнбүл јығмағы Рута гадаған етмәсинләр. Боазын сөзләри вә мәһәббәтдән ирәли ҝәлән әмәлләри, онун Јеговаја гулаг асмағы баҹаран руһән јеткин адам олдуғуна шәһадәт едирди. Буна ҝөрә дә, Аллаһ она лүтф ҝөстәрди вә хејир–дуа верди (Левилиләр 19:18; Рут 2:5—16).
12, 13. а) Боаз, мүәјјән әмлакы ҝери алмаг барәдә Јегованын ганунуна еһтирамыны неҹә ҝөстәрди? б) Аллаһын һансы хејир–дуалары Боазын үзәриндә јеринә јетди?
12 Боазын Јеговаја гулаг асдығына ән парлаг шәһадәт, гоһумун мүлкүнү ҝери алмаг һаггында Аллаһын вердији ганунуна риајәт етмәјә чалышараг, алиҹәнаблыгла давранмасы олду. Боаз, гоһумунун — Наоминин мәрһум әри Елимелекин мирасынын јенә Елимелекин евиндә галмасы үчүн әлиндән ҝәләни етди. Левират никаһын шәртинә әсасән, дул гадын мәрһум әринин јахын гоһумуна әрә ҝетмәли иди ки, онларын доғулаҹаг оғуллары варис ола билсин (Тәснијә 25:5—10; Левилиләр 25:47—49). Рут, артыг гоҹа јашында олдуғуна ҝөрә ушаг доға билмәјән Наоминин әвәзинә әрә ҝетмәјә разы олду. Елимелекин јахын гоһуму Наомијә көмәк етмәјә бојун гачырдыгдан сонра, Боаз Рутла евләнди. Онларын оғуллары Овед, Наоминин нәсли вә Елимелекин гануни вариси сајылырды (Рут 2:19, 20; 4:1, 6, 9, 13—16).
13 Аллаһын ганунуна тәмәннасыз риајәт етмәси Боаза бол–бол хејир–дуа ҝәтирди. О вә Рут, оғуллары Оведин нәсил шәҹәрәси васитәсилә Иса Мәсиһин улу валидејнләри олмаг шәрәфинә лајиг ҝөрүлдүләр (Рут 2:12; 4:13, 21, 22; Матта 1:1, 5, 6). Боазын хејирхаһ әмәлләри ҝөстәрир ки, хејир–дуалар, башгаларына мәһәббәт тәзаһүр етдирән вә Аллаһын тәләбләринә мүвафиг сурәтдә давранан кәсләрин үзәриндә јеринә јетир.
Набал Јеговаја гулаг асмады
14. Набал неҹә адам иди?
14 Боаздан фәргли олараг, Набал Јеговаја гулаг асмады. О, Аллаһын “гоншуну өзүн кими севәҹәксән” ганунуну позду (Левилиләр 19:18). Набал руһани әһвал–руһијјәјә малик дејилди; о, “кобуд вә ишләриндә пис” адам иди, һәтта гуллугчулары да ону “јарамаз адам” санырдылар. Буна мүнасиб олараг, онун дашыдығы Набал адынын мә’насы “ахмаг” вә ја “ағылсыз” демәкдир (1 Самуел 25:3, 17, 25). Набал, еһтијаҹ ичиндә олан Давуда — Јегованын мәсһ едилмишинә көмәк ҝөстәрмәк имканындан истифадә етдими? (1 Самуел 16:13).
15. Набал Давудла неҹә давранды вә Абигаил, әриндән фәргли олараг, нә етди?
15 Давуд вә онун адамлары Набалын сүрүсү јахынлығында дүшәрҝә саланда, онун сүрүсүнү гулдурлардан мүдафиә едирдиләр, әвәзиндә исә Набалдан һагг истәмирдиләр. Онлар һаггында Набалын чобанларындан бири деди: “Ҝеҹә ҝүндүз бизим үчүн сипәр олдулар”. Лакин Давудун ҝөндәрдији адамлар јемәк истәдикдә, Набал “онлара кобуд ҹаваб верди” вә ҝәлән адамлары әлибош гајтарды (1 Самуел 25:2—16). Набалын арвады Абигаил дәрһал Давуд үчүн азугә һазырлады. Гәзәбдән ҹошан Давуд, Набалы вә онун адамларыны мәһв етмәјә һазыр иди. Өз давранышы илә Абигаил бир чохларынын һәјатыны хилас етди вә Давуду ган төкмәкдән сахлады. Амма Набал өз хәсислијиндә вә кобудлуғунда һәддини ашды. Тәхминән 10 ҝүн сонра “Рәбб Набалы вурду вә о өлдү” (1 Самуел 25:18—38).
16. Боаздан нүмунә ҝөтүрмәјә вә Набал кими олмамаға биз неҹә наил ола биләрик?
16 Доғрудан да, Боаз илә Набал арасында бөјүк фәрг варды! Ҝәлин вар гүввәмизлә чалышаг ки, Набал кими кобуд вә егоист олмајаг. Әксинә, Боазын хејирхаһлығы вә тәмәннасыз давранышындан нүмунә ҝөтүрәк (Ибраниләрә 13:16). Биз Павелин мәсләһәтинә әмәл едәриксә, буна наил ола биләрик; о јазырды: “Демәли, нә гәдәр фүрсәтимиз варса, һамыја, хүсусән иманлылар аиләсинә јахшылыг едәк” (Галатијалылара 6:10). Бу ҝүн, Исанын “башга гојунлары”, јә’ни јер үзүндә јашамаг үмиди олан мәсиһчиләр, Јегованын мәсһ едилмишләринә — ҝөјләрдә әбәди һәјат алаҹаг 144 000–дән һәлә јер үзүндә оланлара хејирхаһлыг етмәк имканына маликдирләр (Јәһја 10:16; 1 Коринфлиләрә 15:50—53; Вәһј 14:1, 4). Иса бу ҹүр ишләри, онун өзүнә едилән хејирхаһлыг кими гәбул едир, бу хејирхаһлыглар исә, Јегованын бол–бол хејир–дуасына сәбәб олур (Матта 25:34—40; 1 Јәһја 3:18).
Һаннанын сынаглары вә алдығы хејир–дуалар
17. Һанна үчүн сынаг олан нә иди вә о, һансы әһвал–руһијјәни тәзаһүр етдирирди?
17 Јегованын хејир–дуалары, Һанна адлы мө’мин гадынын үзәриндә дә јеринә јетди. Бу гадын, левит олан әри Елкана илә, дағлыг әразидә јерләшән Ефраимдә јашајырды. Ганунун јол вердији үчүн, Елкана Пенинна адлы башга бир гадынла да евләнмишди. Пениннанын өвлады варды, амма Һанна сонсуз иди; бу исә, исраилли гадын үчүн рүсвајчылыг сајылырды (1 Самуел 1:1—3; 1 Тарихләр 6:16, 33, 34). Һаннаја тәсәлли вермәк әвәзинә, Пенинна ону елә кәдәрләндирирди ки, Һанна ағлајыр вә јемәк јемирди. Ән дәһшәтлиси исә о иди ки, бу кәдәрли вәзијјәт, онларын аиләси һәр ил бирликдә Шилоја Јегованын мә’бәдинә ҝетдији заман “илдән илә” тәкрарланырды (1 Самуел 1:4—8). Пенинна неҹә дә амансыз давранырды вә бу, Һанна үчүн доғрудан да сынаг иди! Буна бахмајараг, Һанна бу ишдә һеч заман Јегованы тәгсиркар тутмурду вә әри Шилоја ҝедәндә о да әринә гошулурду. Шүбһәсиз ки, Һанна әввәл–ахыр бол–бол хејир–дуа алмалы иди.
18. Һанна һансы нүмунәни верди?
18 Һанна, Јегованын мүасир хидмәтчиләринә, хүсусән дә олсун ки, башгаларынын тиканлы сөзләриндән зәрәр чәкән кәсләрә ҝөзәл нүмунә верди. Инҹиклик оланда тәнһалыға чәкилмәк проблеми һәлл етмир (Сүлејманын мәсәлләри 18:1). Һанна јол вермәди ки, мә’руз галдығы чәтинликләр, Аллаһын Кәламы өјрәдилән вә ибадәт үчүн Аллаһын халгынын топлашдығы јердә олмаг истәјини сөндүрсүн. Бунун сајәсиндә, о, руһән ҝүҹлү гала билди. Һаннанын руһән јеткин олмасы, етдији ҝөзәл дуада әкс олунур; һәмин дуа 1 Самуел 2:1—10 ајәләриндә јазылыбa.
19. Руһани шејләрә ҝөрә миннәтдарлығымызы неҹә ифадә едә биләрик?
19 Јегованын мүасир хидмәтчиләри олан бизләр, Аллаһа сәјјар мә’бәддә ибадәт етмирик. Буна бахмајараг, Һанна кими, руһани шејләрә ҝөрә миннәтдарлығымызы ифадә едә биләрик. Мәсәлән биз, мәсиһчи јығынҹағынын ҝөрүшләриндә вә конгресләрдә мүнтәзәм иштирак етмәклә руһани зәнҝинлик үчүн дәрин тәшәккүрүмүзү билдирмиш оларыг. Ҝәлин, “горхмадан гүдсијјәт вә салеһликлә бүтүн өмрүмүз боју Онун һүзурунда ибадәт” етмәјә бизи лајиг ҝөрән Јеговаја етдијимиз һәгиги ибадәтдә бир–биримизә дајаг олмаг үчүн бу ҹүр имканларын һамысындан истифадә едәк (Лука 1:74, 75; Ибраниләрә 10:24, 25).
20, 21. Аллаһа садиг галдығы үчүн Һанна неҹә мүкафатланды?
20 Јегова Һаннанын садиглијини ҝөрдү вә бу гадына бол–бол мүкафат верди. Шилоја һәр ил етдикләри зијарәтин бириндә, ҝөзүјашлы Һанна сәмими гәлбдән Аллаһа дуа едиб, сөз верди: “Еј ордуларын Рәбби, әҝәр ҝерчәкдән өз ҹаријәнин дүшкүнлүјүнә бахарсан вә мәни хатырларсан вә ҹаријәни унутмазсан вә ҹаријәнә бир оғлан ушағы верәрсән, һәјатынын бүтүн ҝүнләриндә ону Рәббә верәҹәјәм” (1 Самуел 1:9—11). Аллаһ Һаннанын јалварышыны ешидиб, она бир оғул илә хејир–дуа верди; Һанна оғлуну Самуел адландырды. Ушаг ана сүдүндән кәсиләндә, сәјјар мә’бәддә хидмәт етсин дејә, Һанна ону Шилоја апарды (1 Самуел 1:20, 24—28).
21 Һанна, Самуел һаггында вердији әһдини јеринә јетирмәклә, Аллаһа мәһәббәт тәзаһүр етдирмиш олду. Дүшүнүн: севимли оғулларынын Јегованын сәјјар мә’бәдиндә хидмәт етмәси Һанна вә Елкана үчүн неҹә дә бөјүк хејир–дуа иди! Бу кими севинҹ вә хејир–дуаны, өвладлары таммүддәтли вә хүсуси пионер, Бејт–Елдә көнүллү хидмәтчиләр кими вә ја хидмәтин башга нөвләриндә Јеговаја иззәт вердикләри үчүн бир чох мәсиһчи валидејнләр дә дујурлар.
Јеговаја һәмишә гулаг асын!
22, 23. а) Јеговаја гулаг асырыгса, нәјә әмин ола биләрик? б) Нөвбәти мәгаләдә нәдән бәһс едиләҹәкдир?
22 Әҝәр Јеговаја һәмишә гулаг асырыгса, нәјә әмин ола биләрик? Аллаһы үрәкдән севиб, Она һәср олунмағымыза мүвафиг јашајырыгса, руһән зәнҝин олаҹағыг. Һәтта бу ҹүр һәјат тәрзи ҹидди проблемләрлә бағлы олса да, Јегованын тәсәввүрүмүзә ҝәтирә билмәдијимиз хејир–дуалары мүтләг бизим үзәримиздә јеринә јетәҹәкдир (Мәзмур 37:4; Ибраниләрә 6:10).
23 Ҝәләҹәкдә Аллаһын халгы үзәринә чохсајлы хејир–дуалар јағаҹагдыр. “Бөјүк... издиһам”, Јеговаја гулаг асдығына ҝөрә “бөјүк мәшәггәтдән” сағ чыхаҹаг вә Аллаһын јени дүнјасындакы һәјатдан һәзз алаҹаг (Вәһј 7:9—14; 2 Петер 3:13). Јегова орада өз хидмәтчиләринин дүзҝүн арзуларыны тә’мин едәҹәкдир (Мәзмур 145:16). Нөвбәти мәгаләнин ҝөстәрәҹәји кими, Јеговаја гулаг асан кәсләр, јухарыдан олан “һәр бир јахшы бәхшиш вә һәр камил һәдијјәни” артыг индидән алырлар (Јагуб 1:17).
[Һашијә]
a Һаннанын сөзләрилә, Мәсиһин анасы олаҹағыны билдикдән тез сонра Мәрјәмин дедији сөзләрдә бир охшарлыг вар (Лука 1:46—55).
Јадыныздадырмы?
• Исраил халгынын тарихини нәзәрдән кечирдикдә, Аллаһын хејир–дуалары һагда нәји өјрәнирик?
• Боаз вә Набал бир–бириндән нәдә фәргләнирдиләр?
• Биз Һаннадан нәдә нүмунә ҝөтүрә биләрик?
• Јеговаја нә үчүн гулаг асмалыјыг?
[8-ҹи сәһифәдәки шәкил]
Сүлејман падшаһ Аллаһдан анлајышлы үрәк диләди, Јегова да она мүдриклик бәхш етди.
[10-ҹу сәһифәдәки шәкил]
Боаз инсанлара һөрмәт вә хејирхаһлыгла јанашырды.
[13-ҹү сәһифәдәки шәкил]
Јеговаја е’тибар етдијинә ҝөрә, Һанна бол–бол хејир–дуа алды.