Јегованын хејир–дуасы бизи зәнҝинләшдирир
“Рәббин бәрәкәти сәрвәт ҝәтирәр инсана, артыг гүссә вермәз она” (СҮЛЕЈМАНЫН МӘСӘЛЛӘРИ 10:22, МКШ).
1, 2. Хошбәхтлик нәјә ҝөрә зәнҝинликдән асылы дејил?
БУ ҜҮН милјонларла инсанлар, һәјатыны вар– дөвләт јығмаға һәср едирләр. Бәс мадди не’мәтләр хошбәхтлик ҝәтирирми? Бир журналда дејилир: “Инсанларын өз талеләриндән бу гәдәр наразы олдуглары бир зәманәни хатырламырам” (“The Australian Women’s Weekly”). Һәмин мәнбәдә әлавә едилир: “Бу инанылмаз шејдир. Бизә дејирләр ки, Австралијада ҝөзәл игтисади шәраитләр вар вә инсанларын јашајышы һеч вахт белә јахшы олмамышдыр. [...] Инсанлар арасында исә бәдбинлик һөкм сүрүр. Киши вә гадынлар өз һәјатларында чатышмазлыг һисс едирләр, анҹаг нәјин чатышмадығыны конкрет анлаја билмирләр”. Доғрудан да, Мүгәддәс Китаб һаглы олараг гејд едир ки, инсанын хошбәхтлији вә һәјаты, онун әлдә етдији шејләрдән асылы дејил! (Ваиз 5:10; Лука 12:15).
2 Мүгәддәс Китаб ҝөстәрир ки, Аллаһын хејир–дуалары инсанлара бөјүк хошбәхтлик ҝәтирир. Бу һагда Сүлејманын мәсәлләри 10:22 ајәсиндә дејилир: “Рәббин бәрәкәти сәрвәт ҝәтирәр инсана, артыг гүссә вермәз она” (МКШ). Чох вахт гүссә, зәнҝинлијә аҹҝөзлүклә ҹан атмаг нәтиҹәсиндә јараныр. Һәвари Павел әбәс јерә хәбәрдарлыг етмирди: “Варланмаг истәјәнләр исә јолдан чыхыр вә тора дүшүрләр вә инсанлары фәлакәтә вә һәлака апаран бир чох мә’насыз вә зијанвериҹи еһтираслара гапылырлар. Чүнки һәр ҹүр пислијин көкү пулпәрәстликдир. Буна гапылан бә’зиләри иман јолундан узаглашыб, өзләринә бир чох әзаблар чәкдирдиләр” (1 Тимотејә 6:9, 10).
3. Аллаһын хидмәтчиләри нәјә ҝөрә сынаглара мә’руз галырлар?
3 “Рәббин сөзүнү динләјән” кәсләр исә, гүссә ҝәтирмәјән хејир–дуалара нәсиб олурлар (Тәснијә 28:2). Лакин ким исә соруша биләр: “Әҝәр Јегованын хејир–дуасы гүссә ҝәтирмирсә, онда бәс нәјә ҝөрә Онун хидмәтчиләриндән бир чоху изтираб чәкир?” Мүгәддәс Китабын ҝөстәрдији кими, Аллаһ сынаглара јалныз јол верир, һәмин сынагларын әсл сәбәбкары исә, Шејтан, онун пис әшјалар системи вә бизим гејри–камиллијимиздир (Тәквин 6:5; Тәснијә 32:4, 5; Јәһја 15:19; Јагуб 1:14, 15). Јегова, “һәр бир јахшы бәхшиш вә һәр камил һәдијјә” мәнбәјидир (Јагуб 1:17). Буна ҝөрә дә Онун хејир–дуалары һеч заман гүссә ҝәтирмир. Ҝәлин Аллаһын камил һәдијјәләриндән бә’зиләрини нәзәрдән кечирәк.
Аллаһын Кәламы гијмәтәҝәлмәз һәдијјәдир
4. “Сонун вахтында” Аллаһын халгы һансы надир һәдијјә вә хејир–дуаја маликдир?
4 Даниелин “сонун вахты” һагда сөјләдији пејғәмбәрликдә “билик артаҹагдыр” дејилир. Лакин бу зәманәт нөвбәти сөзләрлә бағлыдыр: “Писләрдән һеч бири [буну] анламајаҹаг, фәгәт анлајышы оланлар анлајаҹаглар” (Даниел 12:4, 10). Тәсәввүр един! Аллаһын Кәламы — хүсусән дә пејғәмбәрликләр — Аллаһын елә мүдриклији илә јазылыб ки, пис адамлар онун әсл мә’насыны анлаја билмирләр, амма Јегованын халгы анлајыр. Аллаһын Оғлу дуасында деди: “Еј ҝөјүн вә јерин Рәбби олан Ата, шүкүр едирәм Сәнә ки, бу шејләри мүдрикләрдән вә ағыллылардан ҝизләдиб көрпәләрә ачдын” (Лука 10:21). Гијмәтәҝәлмәз һәдијјәјә — Аллаһын јазылмыш Кәламы Мүгәддәс Китаба малик олмаг вә Јегованын руһани анлајыш бәхш етдији инсанлар арасында олмаг, доғрудан да бөјүк хејир– дуадыр! (1 Коринфлиләрә 1:21, 27, 28; 2:14, 15).
5. Мүдриклик нәдир вә биз ону неҹә әлдә едә биләрик?
5 “Јухарыдан назил олан һикмәти” алмасајдыг, руһани анлајыш бизим үчүн әлчатмаз оларды (Јагуб 3:17). Мүдриклик — проблемләри һәлл етмәк, тәһлүкәләрдән гачынмаг вә ја онларын гаршысыны алмаг, мәгсәдләрә наил олмаг вә ағыллы мәсләһәтләр вермәк үчүн әлдә едилән билик вә анлајышы истифадә етмәк габилијјәтидир. Биз, Аллаһын мүдриклијини неҹә әлдә едирик? Сүлејманын мәсәлләри 2:6 ајәсиндә дејилир: “Рәбб һикмәт верир; ағзындан билик вә анлајыш чыхар”. Әҝәр мүдриклик һаггында дурмадан дуа едириксә, Јегова, Сүлејман падшаһа “һикмәтли вә анлајышлы үрәк” вердији кими, бизә дә мүдриклик верәҹәкдир (1 Краллар 3:11, 12; Јагуб 1:5—8). Мүдриклик әлдә етмәк үчүн, Јегованын Кәламыны мүнтәзәм тәдгиг едәрәк вә өјрәндикләримизи һәјата кечирәрәк, Она гулаг да асмалыјыг.
6. Нә үчүн Аллаһын ганун вә принсипләри әсасында јашамаг ағыллы давранышдыр?
6 Аллаһын мүдриклијинә даир ән ҝөзәл нүмунәләр, Мүгәддәс Китабда јазылмыш ганун вә принсипләрдә өз әксини тапыр. Онлар бүтүн саһәләрдә — физики, зеһни, емосионал вә руһани саһәдә фајдалыдыр. Мәзмурчу јериндә демишдир: “Рәббин шәриәти камилдир; ҹаны тәзәләр; Рәббин шәһадәти садигдир; тәҹрүбәсиз адама һикмәт верәр. Рәббин нәсиһәти доғрудур; үрәји севиндирир; Рәббин әмри пакдыр; ҝөзләри ајдынладыр. Рәбб горхусу тәмиздир; әбәдијјән дурар; Рәббин һөкмләри һагдыр; һамысы доғрудур. Гызылдан, чох саф гызылдан да зијадә арзуланыр” (Мәзмур 19:7—10; 119:72).
7. Аллаһын салеһлик нормаларына хор бахмағын нәтиҹәси нә олур?
7 Аллаһын салеһлик нормаларына хор бахан адамлар исә, ҹан атдыглары хошбәхтлик вә азадлыға наил ола билмирләр. Онлар әввәл–ахыр әмин олурлар ки, Аллаһа ришхәнд етмәк олмаз вә һәр кәс өз әкдијини бичир (Галатијалылара 6:7). Мүгәддәс Китаб принсипләрини инкар едән милјонларла адамлар, арзу олунмајан һамиләлик, дәһшәтли хәстәликләр, еләҹә дә сағламлыг үчүн мәһведиҹи олан мејлләр кими аҹы бәһрәләр бичирләр. Белә адамлар төвбә едиб, һәјат тәрзләрини дәјишмәзләрсә, онлары јалныз өлүм ҝөзләјир, бәлкә дә бу өлүм Аллаһын әли илә олаҹагдыр (Матта 7:13, 14).
8. Аллаһын Кәламыны севәнләр нә үчүн хошбәхтдирләр?
8 Аллаһын Кәламыны севән вә она әсасән јашајан кәсләри һәм инди, һәм дә ҝәләҹәкдә бол– бол хејир–дуалар ҝөзләјир. Бу ҹүр инсанлар һаглы олараг, Аллаһын гануну алтында өзләрини азад һисс едирләр. Онлар әсл мә’нада хошбәхтдирләр. Онлар, ҝүнаһдан вә онун мәһведиҹи нәтиҹәләриндән азад олаҹаглары вахты сәбирсизликлә ҝөзләјирләр (Ромалылара 8:20, 21; Јагуб 1:25). Онларын үмиди мөһкәмдир, чүнки бу үмидин тәмәлини Аллаһын бәшәр өвладларына бәхш етдији һәдијјә — ваһид Оғлу Иса Мәсиһин фидијә гурбанлығы тәшкил едир (Матта 20:28; Јәһја 3:16; Ромалылара 6:23). Бу ә’ла һәдијјә Јегованын инсанлара дәрин мәһәббәтини сүбут едир вә Она гулаг асмаға давам едән кәсләрин сонсуз хејир–дуалара малик олаҹағына әминлик верир (Ромалылара 8:32).
Мүгәддәс руһ ән’амы үчүн миннәтдарыг
9, 10. Јегованын тәгдим етдији мүгәддәс руһ ән’амы һансы фајданы ҝәтирир? Нүмунә ҝәтирин.
9 Аллаһын мәһәббәтлә вердији даһа бир ән’ам, Онун мүгәддәс руһудур вә буна ҝөрә биз миннәтдар олмалыјыг. Ерамызын 33–ҹү илинин Пентикост ҝүнүндә һәвари Павел Јерусәлимдә топлашан издиһама чағырышла мүраҹиәт етди: “Ҝүнаһларынызын бағышланмасы үчүн төвбә един вә һәр бириниз Иса Мәсиһин ады илә вәфтиз олсун. Вә Мүгәддәс Руһун ән’амыны алаҹагсыныз” (Һәвариләрин ишләри 2:38). Бу ҝүн Јегова мүгәддәс руһуну, бу руһа малик олмаг үчүн дуа едиб, Аллаһын ирадәсини јеринә јетирмәк истәјәрәк өзүнү Она һәср едән кәсләрә верир (Лука 11:9—13). Каинатдакы бу гүдрәтли гүввә — Аллаһын мүгәддәс руһу, јә’ни Онун фәал гүввәси — гәдим дөврләрдә јашајан иманлы киши вә гадынлара, о ҹүмләдән илк мәсиһчиләрә валеһедиҹи габилијјәтләр бәхш едирди (Зәкарја 4:6; Һәвариләрин ишләри 4:31). Јегованын халгы олараг бөјүк манеәләр вә чәтинликләрлә гаршылашсаг белә, һәмин габилијјәтләри мүгәддәс руһ бизә дә верә биләр (Јоел 2:28, 29).
10 Мисал үчүн, полиомиелит хәстәлијинә тутулан вә 37 ил “дәмир ағ ҹијәрләр апаратында” јашајан Лорел адлы гадынын нүмунәсини нәзәрдән кечирәкa. Һәддиндән артыг ағыр вәзијјәтдә олмасына бахмајараг, Лорел өләнә гәдәр Аллаһа сәдагәтлә хидмәт етди. Јашадығы илләр әрзиндә Јегова она бол–бол хејир–дуалар верди. Мәсәлән, Лорел сутканын 24 саатыны апаратда кечирдијинә бахмајараг, онун көмәклији сајәсиндә 17 адам Мүгәддәс Китаб һәгигәтинин дәгиг билијини әлдә етди! Лорелин нүмунәси һәвари Павелин “зәиф олдуғум заман гүввәтлијәм” сөзләрини хатырладыр (2 Коринфлиләрә 12:10). Бәли, хош хәбәрин тәблиғиндә әлдә етдијимиз һәр бир наилијјәт, бизим габилијјәт вә гүввәмизин јох, Аллаһын өз мүгәддәс руһу васитәсилә вердији көмәјин нәтиҹәсидир. Аллаһ өз мүгәддәс руһуну, Онун сәсини динләјән кәсләрә бәхш едир (Ишаја 40:29—31).
11. Аллаһын руһу “јени мәнлији ҝејинән” кәсләрдә һансы кејфијјәтләри һасил едир?
11 Аллаһа итаәткар оларыгса, мүгәддәс руһ биздә мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг кими кејфијјәтләр һасил едәҹәкдир (Галатијалылара 5:22, 23). “Руһун сәмәрәси”, еһтимал ки, мәсиһчиләрин кечмишдә дојмаг билмәјән вәһши һејванлар кими давранмаларына сәбәб олан хүсусијјәтләри өзүндән кәнар едәрәк ҝејиндикләри “јени мәнлијин” ајрылмаз һиссәсидир (Ефеслиләрә 4:20—24; Ишаја 11:6—9). Руһун сәмәрәси арасында — “камил бирлијин бағы олан” мәһәббәт чох ваҹибдир (Колослулара 3:14).
Мәсиһчи мәһәббәти, јүксәк гијмәтләндириләси ән’амдыр
12. Табита вә биринҹи әсрин диҝәр мәсиһчиләри мәһәббәти неҹә тәзаһүр етдирирдиләр?
12 Мәсиһчи мәһәббәти дә Јегованын вердији ҝөзәл ән’амдыр — биз ону јүксәк гијмәтләндиририк. Бу мәһәббәт принсипләрә әсасланыр, амма о дәрәҹәдә нәҹиб вә гүввәтлидир ки, иманлылары бир–биринә гоһумлуг телләриндән дә мөһкәм бағлајыр (Јәһја 15:12, 13; 1 Петер 1:22). Мисал үчүн, ерамызын биринҹи әсриндә јашамыш Табита адлы мәсиһчинин нүмунәсинә бахаг. Бу гадынын, хүсусән дә јығынҹагдакы дул гадынлара “етдији хејирли ишләр вә вердији сәдәгәләр лап чох иди” (Һәвариләрин ишләри 9:36). Бәлкә дә һәмин дулларын гоһумлары варды, анҹаг онлара көмәк етмәк вә дәстәк олмаг үчүн Табита әлиндән ҝәләни етмәјә чалышырды (1 Јәһја 3:18). Табита неҹә дә ҝөзәл нүмунә верди! Прискила вә Акила, гардашлыг мәһәббәти илә һәрәкәтә ҝәтириләрәк, Павелин уғрунда “өзләрини тәһлүкәјә салдылар”. Мәһәббәт, Епафраны, Луканы, Онисифору вә башга мәсиһчиләри, Ромада һәбсханада олан һәваријә көмәк етмәјә тәшвиг етди (Ромалылара 16:3, 4; 2 Тимотејә 1:16; 4:11; Филимона 23, 24). Бу ҹүр әһвал–руһијјә ҝөстәрән буҝүнкү мәсиһчиләр арасында да мәһәббәт вар. Бу мәһәббәт, Аллаһын ҝөзәл ән’амыдыр вә Исанын һәгиги шаҝирдләрини буна әсасән танымаг олар (Јәһја 13:34, 35).
13. Мәсиһчи гардашлығымызы гијмәтләндирдијимизи неҹә ҝөстәрә биләрик?
13 Сиз, мәсиһчи јығынҹағында ҝөстәрилән мәһәббәти гијмәтләндирирсинизми? Үмумдүнја руһани гардашлыға малик олдуғумуза ҝөрә миннәтдарсынызмы? Ахы бу да севинҹ ҝәтирир вә Јегованын бизи зәнҝинләшдирән ән’амыдыр. Бәс онлары гијмәтләндирдијимизи неҹә ҝөстәрә биләрик? Аллаһа мүгәддәс хидмәти иҹра етмәклә, мәсиһчи ҝөрүшләриндә иштирак етмәклә, һәмчинин мәһәббәти вә Аллаһын руһунун диҝәр сәмәрәләрини тәзаһүр етдирмәклә (Филипилиләрә 1:9; Ибраниләрә 10:24, 25).
“Инсанлар тимсалында һәдијјәләр”
14. Әҝәр бир мәсиһчи, ағсаггал вә ја хидмәти көмәкчи кими хидмәт етмәк истәјирсә, она һансы кејфијјәтләр хас олмалыдыр?
14 Әҝәр мәсиһчи һәмиманлыларына ағсаггал вә ја хидмәти көмәкчи кими хидмәт етмәк истәјирсә, бу ҝөзәл мәгсәддир (1 Тимотејә 3:1, 8). Белә бир тә’јинат алмаг үчүн, һәмин гардаш руһән јеткин олмалы, Мүгәддәс Јазылары јахшы билмәли вә тәблиғ хидмәтиндә сә’јлә иштирак етмәлидир (Һәвариләрин ишләри 18:24; 1 Тимотејә 4:15; 2 Тимотејә 4:5). О, тәвазөкар, һәлим вә сәбирли олмалыдыр, чүнки өзүнә ҝүвәнән, мәғрур вә шөһрәтпәрәст инсанлара Аллаһ хејир–дуа вермир (Сүлејманын мәсәлләри 11:2; Ибраниләрә 6:15; 3 Јәһја 9, 10). Гардаш евлидирсә, аилә башчысы кими, өз аилә үзвләринин һамысына мәһәббәтлә гајғы ҝөстәрмәли вә онлара јахшы рәһбәрлик етмәлидир (1 Тимотејә 3:4, 5, 12). Руһани зәнҝинлији гијмәтләндирдији үчүн, белә гардаш мүтләг Јегованын хејир–дуасыны әлдә едәҹәкдир (Матта 6:19—21).
15, 16. “Инсанлар тимсалында һәдијјәләр” кимләрдир? Нүмунәләр чәкин.
15 Јығынҹағын ағсаггаллары јахшы тәблиғчи, нәзарәтчи вә мүәллим олмаға чалышырларса, онда бу кими “инсанлар тимсалында һәдијјәләри” јүксәк гијмәтләндирмәјә һәр бир әсасымыз вар (Ефеслиләрә 4:8, 11, ЈД). Садиг ағсаггалларын мәһәббәтли хидмәтиндән фајдаланан кәсләр, олсун ки, онлара өз тәшәккүрләрини һәмишә билдирмирләр. Лакин бу ағсаггалларын бүтүн ишләрини Јегова ҝөрүр. Онун халгына хидмәт едәрәк, исминә бәсләдикләри мәһәббәти Јегова унутмајаҹаг (1 Тимотејә 5:17; Ибраниләрә 6:10).
16 Мәсәлән, бир гајғыкеш ағсаггал, бејниндән операсија олунаҹаг мәсиһчи гыза баш чәкди. Һәмин гызын аиләсинин бир рәфигәси јазырды: “Ҝәлән ағсаггал чох хејирхаһ, диггәтли вә гајғыкеш иди. О, бизимлә бирликдә Јеговаја дуа етмәјә иҹазә истәди. Ағсаггал дуа етдикдә, гызын атасы [Јегованын Шаһиди дејилди] һөнкүр–һөнкүр ағлады, онунла бәрабәр отагда оланларын һамысы ағлады. О, неҹә дә мәһәббәтлә дуа етди! Ону белә бир мәгамда јанымыза ҝөндәрмәклә, Јегова доғрудан да мәһәббәт ҝөстәрмиш олду!” Ағсаггалларын хәстәханада баш чәкдикләри башга бир Шаһид гадын дејирди: “Интенсив терапија палатасында онлар мәним чарпајыма јахынлашанда анладым ки, неҹә олса да һәр шејә таб ҝәтирәҹәјәм. Өзүмдә гүввәт вә гәлбимдә раһатлыг һисс етдим”. Бу ҹүр мәһәббәт вә гајғыны сатын алмаг мүмкүндүрмү? Әсла! Бу, Аллаһын вердији ән’амдыр вә ону јалныз мәсиһчи јығынҹағында алмаг олар (Ишаја 32:1, 2).
Тәблиғ хидмәти ән’амы
17, 18. а) Јегова өз хидмәтчиләринин һамысына һансы хидмәт ән’амыны верди? б) Хидмәтимизи јеринә јетирә билмәјимиз үчүн, Аллаһ һансы көмәји тәгдим едир?
17 Инсан, Күлл–Ихтијар Јегова Аллаһа хидмәт етмәкдән үстүн шәрәфә лајиг ҝөрүлә билмәз (Ишаја 43:10; 2 Коринфлиләрә 4:7; 1 Петер 2:9). Бунунла белә, тәблиғ хидмәтиндә иштирак етмәк имканы һамы үчүн — ҝәнҹләрә вә јашлылара, киши вә гадынлара — сәмими гәлбдән Аллаһа хидмәт етмәк истәјәнләрин һамысына мүмкүндүр. Сиз бу дәјәрли ән’амдан истифадә едирсинизми? Бә’зиләри тәблиғ етмирләр, чүнки өзләрини бу ишә јарарлы санмырлар. Анҹаг унутмајаг ки, Јегова өз хидмәтчиләринә мүгәддәс руһ верир, бу руһ исә бизим бүтүн чатышмазлығымызы өдәјир (Јеремја 1:6—8; 20:11).
18 Јегова, Падшаһлыг һаггындакы хәбәрин тәблиғини мәғрур вә өзүнә ҝүвәнән инсанлара дејил, тәвазөкар хидмәтчиләринә е’тибар едир (1 Коринфлиләрә 1:20, 26—29). Тәвазөкар, һәлим инсанлар өз мәһдудијјәтләрини е’тираф едир вә тәблиғ хидмәтиндә Аллаһын көмәјинә ҝүвәнирләр. Онлар, “садиг... нөкәрбашы” васитәсилә тәгдим едилән руһани көмәји дә гијмәтләндирирләр (Лука 12:42—44; Сүлејманын мәсәлләри 22:4).
Хошбәхт аилә һәјаты ҝөзәл һәдијјәдир
19. Ушагларын тәрбијәсиндә наилијјәт газанмаға көмәк едән нәдир?
19 Никаһ вә хошбәхт аилә һәјаты, Аллаһдан олан һәдијјәдир (Рут 1:9; Ефеслиләрә 3:14, 15). Ушаглар да “Рәббдән мирасдыр” вә онлар, Аллаһа мәгбул хүсусијјәтләри өјрәдән валидејнләринә бөјүк севинҹ бәхш едирләр (Мәзмур 127:3). Өвладыныз варса, Јегованы динләјин вә онлары Онун Кәламына мүвафиг олараг тәрбијә един. Бу ҹүр даврананлар Јегованын көмәји вә хејир–дуаларындан кәнар галмајаҹаглар (Сүлејманын мәсәлләри 3:5, 6; 22:6; Ефеслиләрә 6:1—4).
20. Өвладлары һәгиги ибадәти тәрк едән валидејнләрә нә көмәк ола биләр?
20 Бә’зән, Аллаһ горхусу олан валидејнләрин виҹданлы ҹәһдләринә бахмајараг, ушаглар бөјүјәркән һәгиги ибадәти тәрк етмәји гәрара алырлар (Тәквин 26:34, 35). Бу гәрар валидејнләрә емосионал ҹәһәтдән дәрин јара вура биләр (Сүлејманын мәсәлләри 17:21, 25). Амма валидејнләр үмидсизлијә гапылмаг әвәзинә, јахшы олар ки, Исанын гејб олмуш оғул һаггында сөјләдији мәсәли хатырласынлар. Бу оғул евдән ҝедиб әхлагсыз һәјат сүрсә дә, сонрадан атасынын јанына гајытды, ата исә ону севинҹ вә мәһәббәтлә гәбул етди (Лука 15:11—32). Һәр нә баш версә дә, садиг мәсиһчи валидејнләр әмин ола биләрләр ки, Јегова онлары анлајыр, мәһәббәтлә гајғыларына галыр вә даима көмәк едир (Мәзмур 145:14).
21. Кимә гулаг асмалыјыг вә нәјә ҝөрә?
21 Ҝәлин һәр биримиз, һәјатымызда әслиндә нәјин ваҹиб олдуғуну өзүмүз үчүн мүәјјән едәк. Өзүмүзә вә ја аиләмизә зијан вурараг, вар ҝүҹүмүзлә зәнҝинләшмәјәми чалышырыг? Јохса, “нурлар Атасындан” ҝәлән “һәр бир јахшы бәхшиш вә һәр камил һәдијјәни” ахтарырыг? (Јагуб 1:17). “Јаланын атасы” олан Шејтан истәјир ки, бүтүн гүввәмизи вар–дөвләт топламаға сәрф едәк вә нәтиҹәдә һәм хошбәхтликдән, һәм дә һәјатдан мәһрум олаг (Јәһја 8:44; Лука 12:15). Јегова исә, әксинә, әсл мә’нада гајғымыза галыр вә бизим фираван олмағымызы истәјир (Ишаја 48:17, 18). Беләликлә ҝәлин, мәһәббәтли сәмави Атамыз Јеговаја гулаг асаг вә тәсәллимизи һәмишә Ондан алаг (Мәзмур 37:4). Белә давранарыгса, Јегованын гијмәтсиз ән’амлары вә бол хејир–дуалары, гүссә ҝәтирмәдән, бизи зәнҝин едәҹәкдир.
[Һашијә]
a “Ојанын!” журналынын 1993–ҹү ил, 22 јанвар нөмрәсиндә 18—21 сәһифәләрә бахын (инҝ.).
Јадыныздадырмы?
• Ән бөјүк хошбәхтлији неҹә тапмаг олар?
• Јегова өз халгына һансы ән’амлары верир?
• Тәблиғ хидмәти нәјә ҝөрә һәдијјәдир?
• Валидејнләр, ушагларыны тәрбијә едәркән, Аллаһын хејир–дуасына малик олмаг үчүн нә едә биләрләр?
[14-ҹү сәһифәдәки шәкил]
Аллаһын һәдијјәсинә — Онун јазылы Кәламына ҝөрә миннәтдарсынызмы?
[15-ҹи сәһифәдәки шәкил]
Һәддиндән артыг чәтин вәзијјәтинә бахмајараг, Лорел Низбет Аллаһа сәдагәтлә хидмәт етди.
[16-ҹы сәһифәдәки шәкилләр]
Мүасир мәсиһчиләр дә, Табита кими, өз хејирхаһ ишләрилә танынырлар.
[17-ҹи сәһифәдәки шәкил]
Мәсиһчи ағсаггаллары һәмиманлыларына мәһәббәтлә гајғы ҝөстәрирләр.