Јолуну азмыш ушаға неҹә көмәк етмәли?
“Севинмәк вә шадланмаг лазымдыр... [о,] гејб олмушду — тапылды” (ЛУКА 15:32).
1, 2. а) Бә’зи јенијетмәләр һәгигәтә неҹә јанашырлар? б) Белә вәзијјәтдә валидејнләр вә ушаглар һансы һиссләри кечирә биләрләр?
“МӘН артыг јығынҹаға ҝетмәјәҹәјәм!” Аллаһ горхусуна малик олан вә ушагларыны мәсиһчи јолунда бөјүтмәјә чалышан валидејнләр үчүн өвладларындан белә сөзләр ешитмәк неҹә дә кәдәрлидир! Јенијетмәләрдән бә’зиси өзүнүн бу ҹүр нијјәтини ашкар е’лан етмәсә дә, онлары садәҹә “ахын... ајырыр” (Ибраниләрә 2:1). Белә јенијетмәләрдән бир чоху, Исанын мәсәлиндәки гејб олмуш оғула бәнзәјир. Һәмин оғул ата евини тәрк едиб, бүтүн варыны узаг өлкәдә кефә хәрҹләди (Лука 15:11—16).
2 Јегованын Шаһидләринин әксәријјәти бу ҹүр проблемлә тоггушмур, лакин бу проблемә мә’руз галанлара һеч бир сөз там тәсәлли верә билмир. Итаәтсиз ушағын өз башына ҝәтирдији фәлакәти дә унутмаг олмаз. Бәлкә дә, виҹдан әзабы она раһатлыг вермир. Исанын данышдығы мәсәлдә, гејб олмуш оғул ахырда “өзүнә ҝәлди” вә бу, атасынын севинҹинә сәбәб олду. Валидејнләр вә јығынҹағын үзвләри, јолуну азмыш ушаға “өзүнә ҝәлмәкдә” неҹә көмәк едә биләрләр? (Лука 15:17).
Бә’зи ушагларын һәгигәти тәрк етмәк гәрарынын сәбәби
3. Јенијетмәләр һансы сәбәбләр үзүндән мәсиһчи јығынҹағыны тәрк едә биләрләр?
3 Јүз минләрлә јенијетмәләр мәсиһчи јығынҹағында севинҹлә хидмәт едирләр. Бәс онда нәјә ҝөрә бә’зи јенијетмәләр јығынҹағы тәрк едирләр? Бәлкә дә елә дүшүнүрләр ки, бу дүнјанын тәклиф етдији шејләрдән нәји исә әлдән бурахырлар (2 Тимотејә 4:10). Јахуд да, онлар елә һесаб едирләр ки, Јегованын бизи мүһафизә едән тәшкилатында тә’јин олунмуш ганун чәрчивәләри һәддиндән артыг мәһдуддур. Натәмиз виҹдан, әкс ҹинсә ҝүҹлү мејл, һәмјашыдларынын нүфузуну газанмаг һәсрәти — бүтүн бунлар, јенијетмәни Јегованын халгы арасындан чыхмаға тәһрик едә биләр. Јенијетмәјә елә ҝәлә биләр ки, валидејнләри вә ја башга мәсиһчиләр ријакарлыға јол верирләр вә буна ҝөрә дә Аллаһа етдији хидмәтинә сон гоја биләр.
4. Јенијетмәләрин јолуну азмасына чох вахт әсас сәбәб нә олур?
4 Ушағын дүшүнҹә вә давранышындакы үсјанкарлыг, адәтән онун руһән зәифлијини вә үрәјинин һансы вәзијјәтдә олдуғуну ҝөстәрир (Сүлејманын мәсәлләри 15:13; Матта 12:34). Јенијетмә јолуну һансы сәбәбдән азмыш олса да, чох вахт проблемин көкү, онун “һәгигәти дәрк” етмәмәсиндәдир (2 Тимотејә 3:7). Чох ваҹибдир ки, јенијетмәләр Јеговаја садәҹә олараг дүшүнмәдән ибадәт етмәк әвәзинә, Онунла сых гаршылыглы мүнасибәти инкишаф етдирсинләр. Бу ишдә онлара нә көмәк едә биләр?
Аллаһа јахынлашын
5. Јегова илә јахын гаршылыглы мүнасибәти инкишаф етдирмәк үчүн јенијетмәјә нә лазымдыр?
5 Шаҝирд Јагуб јазырды: “Аллаһа јахынлашын, О да сизә јахынлашар” (Јагуб 4:8). Јенијетмә Аллаһа јахынлаша билсин дејә, Аллаһын Кәламыны севмәји өјрәнмәкдә она көмәк етмәк лазымдыр (Мәзмур 34:8). Әввәлҹә она “сүд”, јә’ни Мүгәддәс Китабын әсас тә’лимләрини билмәк лазымдыр. Амма тәдриҹән Аллаһын Кәламы она севинҹ ҝәтирмәјә башлајаҹаг, о, “гүввәтли јемәји” — дәрин руһани һәгигәтләри севәҹәк вә руһани јеткинлијә ҹан атаҹагдыр (Ибраниләрә 5:11—14; Мәзмур 1:2). Өзүнүн е’тираф етдији кими, дүнјанын ишләринә алудә олан бир јенијетмә, тәдриҹән руһани дәјәрләри гијмәтләндирмәјә башламышды. Бу ҹүр дәјишиклијә наил олмагда она нә көмәк етмишдир? Она, Мүгәддәс Китабы бүтүнлүклә охумағы мәсләһәт ҝөрдүләр, о да, графикә риајәт едәрәк бу китабы мүнтәзәм олараг охуду. Бәли, Јегова илә јахын гаршылыглы мүнасибәти инкишаф етдирмәк үчүн, Аллаһын Кәламыны мүнтәзәм олараг охумаг зәруридир.
6, 7. Валидејнләр, ушагларына Аллаһын Кәламына мәһәббәти неҹә ашылаја биләрләр?
6 Ушагларында Аллаһын Кәламына мәһәббәт ашыламаг валидејнләрә неҹә дә ваҹибдир! Бир аиләдә мүнтәзәм олараг аиләви өјрәнмә кечирилирди, амма бу, аиләнин јенијетмә гызына ҹинајәткарларла үнсијјәтдә олмасына мане олмурду. Һәмин гыз, аиләви өјрәнмәни хатырлајараг дејир: “Атам суал верәндә, ҝөзләрими галдырмадан белә, ҹавабы садәҹә олараг охујурдум”. Һикмәтли валидејнләр аиләви өјрәнмәдә мүәјјән материалы садәҹә кечмәклә кифајәтләнмир, өјрәтмәк баҹарығындан да истифадә едирләр (2 Тимотејә 4:2). Өјрәнмәдә иштирак етмәк јенијетмәјә мараглы олсун дејә, о, өјрәнилән материалын шәхсән она неҹә аид олдуғуну анламалыдыр. Нәјә ҝөрә мүзакирә олунан суал барәдә јенијетмәнин фикрини сорушуб, ону динләмәјәсиниз? Ушаглары, өјрәнилән материалы һәјатда неҹә тәтбиг едәҹәкләри һагда фикирләшмәјә тәшвиг единa.
7 Мүгәддәс Китаб мүзакирәсини ҹанлы кечирмәјә чалышын. Мүнасиб оланда ушаглардан хаһиш един ки, Мүгәддәс Китаб һадисәләрини вә әһвалатларыны ролларда ифа етсинләр. Мүзакирә едилән һадисәләрин баш вердији јери, оранын тәбиәтини тәсәввүр етмәкдә ушаглара көмәк един. Көмәкчи кими ҹоғрафи хәритә вә ҹәдвәлләрдән истифадә един. Бир балаҹа фантазија әлавә етсәниз, аиләви өјрәнмә даһа ҹанлы вә рәнҝарәнҝ олаҹагдыр. Һәмчинин валидејнләр әмин олмалыдырлар ки, онларын өзләринин дә Јегова илә јахшы гаршылыглы мүнасибәтләри вар. Онлар Аллаһа нә гәдәр јахын оларларса, ушагларынын Она јахынлашмаларына да бир о гәдәр јахшы көмәк едә биләрләр (Тәснијә 6:5—7).
8. Јеговаја јахынлашмаға дуа неҹә көмәк едир?
8 Аллаһа јахынлашмаға дуа да көмәк едир. Јенијетмә бир гыз ики сечим гаршысында галмышдыр. О, ја мәсиһчи јолуну, ја да әгидәсинә шәрик олмајан достлары илә үнсијјәти сечмәли иди (Јагуб 4:4). О, неҹә давранды? Гыз е’тираф едир: “Һәјатымда илк дәфә иди ки, Јеговаја үрәкдән дуа едиб, өз һиссләрими Она сөјләдим”. О, хејли вахтдан сонра јығынҹагда өзүнә бир рәфигә тапды вә онунла үрәкдән сөһбәт едә билирди. Гыз буну дуасына ҹаваб кими гәбул етди. Јегованын она истигамәт вердијини һисс етдикдә, гыз Онунла шәхси гаршылыглы мүнасибәти инкишаф етдирмәјә башлады. Валидејнләр өз дуаларыны мәзмунлу етмәклә дә ушагларына көмәк ҝөстәрмиш олурлар. Аилә илә бирликдә дуа едәркән, валидејнләр үрәкләрини Јеговаја там ачмалыдырлар; бу заман ушаглар дәрк едәҹәкләр ки, валидејнләри илә Јегова арасында достлуг телләри вар.
Сәбирли, ејни заманда мәтанәтли олун
9, 10. Итаәтсиз Исраил халгы илә мүнасибәтиндә, Јегова сәбирли олмаға даир һансы нүмунәни верди?
9 Јенијетмә һәгигәт јолундан узаглашмаға башлајанда, еһтимал ки, тәнһалыға чәкилмәјә чалышыр вә валидејнләринин онунла руһани мөвзуларда сөһбәт етмәк ҹәһдләринә мүгавимәт ҝөстәрир. Бу ҹүр гејри–ади вәзијјәтләрдә валидејнләр һансы тәдбирләри ҝөрә биләрләр? Ҝәлин Јегованын гәдим Исраил халгы илә неҹә даврандығыны нәзәрдән кечирәк. О, “сәрт бојунлу” исраиллиләри тәхминән 900 ил сәбирлә тәрбијә етди вә јалныз сонра онлара сечдикләри јол илә ҝетмәјә изин верди (Чыхыш 34:9; 2 Тарихләр 36:17—21; Ромалылара 10:21). Исраиллиләр “Аллаһы тәкрар–тәкрар сынасалар” да, Јегова онлара гаршы мәрһәмәтли иди. О, “чох кәрәләр һиддәтини онлардан чевирди вә бүтүн гәзәбини ојандырмады” (Мәзмур 78:38—42). Аллаһ халгы илә јахшы давранырды. Севән валидејнләр Јегованы тәглид едир вә ушаг онларын көмәк етмәк ҹәһдләринә дәрһал һај вермәсә дә, сәбирли олурлар.
10 Сәбирли олмаг, садәҹә олараг узун мүддәт дөзмәк мә’насыны дашымыр; бу, позулмуш гаршылыглы мүнасибәтләрин бәрпа олунаҹағына үмид бәсләмәк демәкдир. Сәбирли олмаға даир Јегова нүмунә верди. Исраиллиләрин јанына өз елчиләрини “еркән [“дөнә–дөнә”, ЈД] ҝөндәрәрәк”, Онун өзү тәшәббүс ҝөстәрирди. Бахмајараг ки, халг “Аллаһын елчиләри илә әјләнди вә сөзләрини хор ҝөрдү”, Јегова јенә дә “халгына... аҹыјырды” (2 Тарихләр 36:15, 16). О, исраиллиләри дә’вәт едирди: “Һәр кәс пис јолундан... дөнүн” (Јеремја 25:4, 5). Буна бахмајараг, Јегова өз әдаләтли принсипләриндә ҝүзәштә ҝетмирди. Исраил халгы Аллаһа доғру “дөнмәли” вә Онун јолуна гајытмалы иди.
11. Валидејнләр, һәгигәт јолундан тәдриҹән узаглашан ушаглары илә мүнасибәтдә мәтанәтли олмагла јанашы, сәбирли неҹә ола биләрләр?
11 Валидејнләр, сәбирли олмагда вә һәгигәт јолундан тәдриҹән узаглашан өвладынын өз фикриндән дөнәҹәјинә үмид бәсләмәкдә Јеговадан нүмунә ҝөтүрә биләрләр. Валидејнләр, үмидләрини итирмәдән, үнсијјәт гапысыны ачыг сахлајаҹаг вә ја ушагла үнсијјәти өз гајдасына салмаг үчүн тәшәббүс ҝөстәрәҹәкләр. Әдаләт принсипләринә гәти сурәтдә риајәт едәрәк, онлар “дөнә–дөнә” ушагларыны һәгигәт јолуна гајытмаға тәшвиг едәҹәкләр.
Һәдди–бүлуға чатмамыш ушаг үнсијјәтдән мәһрум едиләндә
12. Валидејнләр, онларла бирликдә јашајан вә үнсијјәтдән мәһрум едилән һәдди–бүлуға чатмамыш өвладларына ҝөрә һансы мәс’улијјәти дашыјырлар?
12 Валидејнләри илә јашајан һәдди–бүлуға чатмамыш ушаг әҝәр ҹидди ҝүнаһ ишләдиб, төвбә етмирсә вә ону үнсијјәтдән мәһрум едирләрсә, онда неҹә давранмалы? Ушаг онларла јашадығы үчүн, һәмишә олдуғу кими, валидејнләр өвладыны тәрбијәләндирмәк вә она Аллаһын Кәламына әсасән өјүд вермәк мәс’улијјәтини дашыјырлар. Буну неҹә етмәк олар? (Сүлејманын мәсәлләри 6:20—22; 29:17).
13. Валидејнләр, ҝүнаһ ишләдән ушағын гәлбинә неҹә јол тапа биләрләр?
13 Имканлардан бири — демәк олар ки, ән јахшысы — белә ушагла Мүгәддәс Китабы өјрәнәрәк она тәрбијә вә өјүд вермәкдир. Валидејнләр ушағын инадкарлығына диггәт јетирмәли дејилләр, онлар ушағын үрәјиндә оланлары анламаға чалышмалыдырлар. Ушағын руһани хәстәлији һаггында нә демәк олар? (Сүлејманын мәсәлләри 20:5). Онун гәлбинә јол тапмаг олармы? Бунун үчүн һансы ајәләри охумаг олар? Һәвари Павел бизи әмин едир: “Аллаһын кәламы ҹанлы вә тә’сирли, һәр ҹүр икиағызлы гылынҹдан итидир; о, ҹанла руһу, ојнагларла илији бир–бириндән ајыраҹаг гәдәр дәлиб кечир вә үрәјин дүшүнҹә вә нијјәтләрини ајырд едир” (Ибраниләрә 4:12). Валидејнләр ушаға, бир даһа ҝүнаһ етмәмәји сөјләмәкдән даһа артыг иш ҝөрмәк игтидарына маликдирләр. Онлар гүввә сәрф едәрәк, сағалма просесинин башланғыҹына вә инкишафына көмәк едә биләрләр.
14. Һәгигәтдән узаглашан јенијетмә Јегова илә мүнасибәтини бәрпа етмәк үчүн һансы илк аддымы атмалыдыр вә бу ишдә валидејнләри она неҹә көмәк едә биләрләр?
14 Сәһвә јол верән ушаг, Јегова илә мүнасибәтини бәрпа етмәлидир. Бунун үчүн атылаҹаг илк аддым, “төвбә етмәк вә Аллаһа гајытмагдыр” (Һәвариләрин ишләри 3:19; Ишаја 55:6, 7). Ушағына төвбә етмәкдә көмәк ҝөстәрмәк үчүн, валидејн “һагсызлыглара таб ҝәтирмәлидир”, ушаг зидд ҝедәндә исә, ону “һәлимликлә ислаһ етмәлидир” (2 Тимотејә 2:24—26). Онлар ушағы, Мүгәддәс Китабын ҝөстәрдији анлајышда “мәзәммәт” етмәлидирләр. “Мәзәммәт” кими тәрҹүмә олунан гәдим јунан сөзүнү, һәмчинин “инандырыҹы дәлилләр вермәк” кими дә тәрҹүмә етмәк олар (Вәһј 3:19; Јәһја 16:8, ЈД). Демәли, ушағы мәзәммәт етмәк, онун ҝүнаһ јолунда дурдуғуну инандырыҹы сурәтдә сүбут етмәк демәкдир. Әлбәттә, бу асан дејил. Мүмкүн олан һалларда, валидејнләр Мүгәддәс Китаба ујғун олан бүтүн вәсаитләрдән истифадә едәрәк, итаәтсиз өвладын гәлбинә јол тапа биләрләр. Онлар, “писликдән нифрәт етмәјин вә јахшылығы севмәјин” неҹә ваҹиб олдуғуну анламагда ушаға көмәк етмәјә чалышмалыдырлар (Амос 5:15). Бәлкә дә, ушаг “ајылыб, иблисин торундан хилас олаҹаг”.
15. Јегова илә мүнасибәти бәрпа етмәкдә дуа һансы ролу ојнајыр?
15 Дуа етмәдән Јегова илә мүнасибәти бәрпа етмәк мүмкүн дејил. Әлбәттә ки, әввәлләр мәсиһчи јығынҹағы илә үнсијјәтдә олан вә һазырда ҝүнаһ ишләдиб, төвбә етмәјән кәс үчүн һеч ким “дуа етмәли” дејил (1 Јәһја 5:16, 17; Јеремја 7:16—20; Ибраниләрә 10:26, 27). Лакин валидејнләр, јаранмыш шәраитдә дүзҝүн давранмаг үчүн, Јеговадан мүдриклик диләјә биләрләр (Јагуб 1:5). Үнсијјәтдән мәһрум олунмуш јенијетмә төвбә етдијини ҝөстәрир, лакин “Аллаһ гаршысында ҹәсарәти” јохдурса вә Аллаһ тәрәфиндән ушағын сәһвинин бағышланмасына сәбәб варса, валидејнләр Аллаһын ирадәсинин јеринә јетмәси үчүн дуа едә биләрләр (1 Јәһја 3:21). Бәлкә дә, бу ҹүр дуалары ешидәркән, јенијетмә, Јегованын мәрһәмәтли Аллаһ олдуғуну баша дүшәҹәкдирb (Чыхыш 34:6, 7; Јагуб 5:16).
16. Үнсијјәтдән мәһрум олунмуш јенијетмәнин аилә үзвләринә неҹә көмәк едә биләрик?
16 Әҝәр вәфтиз олунмуш јенијетмә үнсијјәтдән мәһрум едиләрсә, јығынҹағын үзвләри онунла үнсијјәтдә олмајаҹаглар (1 Коринфлиләрә 5:11; 2 Јәһја 10, 11). Еһтимал ки, бу, јенијетмәнин “өзүнә ҝәлмәсинә” вә Аллаһын халгынын мүһафизә едән јығынҹағына гајытмасына көмәк олаҹагдыр (Лука 15:17). Онун Аллаһын тәшкилатына гајыдыб гајытмамасындан асылы олмајараг, јығынҹағын үзвләри һәмин јенијетмәнин аиләсинә дәстәк ола биләрләр. Һәр биримиз, белә јенијетмәнин аилә үзвләринин “дәрдләринә шәрик” олмаг вә онлара шәфгәт ҝөстәрмәк үчүн имканлар ахтара биләрик (1 Петер 3:8, 9).
Башгалары неҹә көмәк едә биләрләр?
17. Јығынҹағын үзвләри, руһән зәифләмиш јенијетмәјә көмәк етмәк истәјирләрсә, нәји јадда сахламалыдырлар?
17 Бәс мәсиһчи јығынҹағында үнсијјәтдән мәһрум едилмәјән, амма иманда зәифләјән јенијетмә илә неҹә давранмалы? Һәвари Павел јазырды: “Әҝәр бир үзв әзаб чәкирсә, диҝәрләри дә онунла бәрабәр әзаб чәкир” (1 Коринфлиләрә 12:26). Јығынҹағын үзвләри бу ҹүр јенијетмә илә фәал сурәтдә марагланмалыдырлар. Сөзсүз ки, еһтијатлы олмаг ваҹибдир, чүнки руһән зәиф олан јенијетмә башга јенијетмәләрә ҝүҹлү тә’сир ҝөстәрә биләр (Галатијалылара 5:7—9). Бир јығынҹагда, руһән зәифләмиш јенијетмәләрә көмәк етмәк истәјән јеткин јашлылар, ән јахшы нијјәтдән ирәли ҝәләрәк бир јерә топлашмағы вә популјар мусиги ифа етмәји онлара тәклиф етдиләр. Јенијетмәләр бу тәклифә севинҹлә разы олдулар вә һәмин әјләнҹә ҝеҹәләри онларын чох хошуна ҝәлирди. Лакин онлар бир–бирләринә о гәдәр тә’сир ҝөстәрдиләр ки, ахырда һамысы јығынҹағы тәрк етди (1 Коринфлиләрә 15:33; Јәһуда 22, 23). Руһән зәифләмиш јенијетмәнин шәфа алмасы үчүн, она, руһани ҹәһәтдән рәһбәрлик олмајан әјләнҹә ҝеҹәләри дејил, руһани дәјәрләри севмәкдә көмәк олаҹаг үнсијјәт лазымдырc.
18. Биз, Исанын мәсәлиндәки гејб олмуш оғулун атасынын әһвал–руһијјәсини неҹә тәглид едә биләрик?
18 Јығынҹағы тәрк едән, сонра исә Падшаһлыг Залына вә ја конгресә ҝәлән јенијетмәнин кечирдији һиссләр һаггында дүшүнүн. Мәҝәр биз ону, Исанын мәсәлиндәки гејб олмуш оғулун атасы кими, севинҹлә гаршыламалы дејиликми? (Лука 15:18—20, 25—32). Мәсиһчи јығынҹағыны тәрк едән, сонрадан вилајәт конгресинә ҝәлән бир јенијетмә дејир: “Мәним кими адамы унутдугларыны дүшүнүрдүм, амма баҹы вә гардашлар мәнә јахынлашыб, саламлашырдылар. Бу, мәнә дәрин тә’сир бағышлады”. Һәмин ҝәнҹ Мүгәддәс Китабы јенидән өјрәнмәјә башлады вә даһа сонра вәфтиз олунду.
Тәслим олмајын
19, 20. Јолуну азмыш ушаға гаршы нәјә ҝөрә мүсбәт нөгтеји–нәзәри горујуб сахламаг ваҹибдир?
19 Јолуну азмыш ушаға “өзүнә ҝәлмәјә” көмәк етмәк үчүн, сәбир лазымдыр; бу, һәм валидејнләрә, һәм дә башгаларына чәтин ҝәлә биләр. Амма тәслим олмајын. “Рәбб бә’зиләринин зәнн етдији кими Өз вә’дини јеринә јетирмәкдә ҝеҹикмир. Әксинә, О бизә сәбир едир вә истәјир ки, һамы төвбәјә ҝәлсин вә кимсә һәлак олмасын” (2 Петер 3:9). Мүгәддәс Китаб бизи әмин едир ки, Јегова бүтүн инсанларын төвбә етмәсини вә јашамасыны истәјир. О, инсанлара тәрәф илк аддымы атараг, онлара өзү илә барышмаг имканыны тәгдим етмишдир (2 Коринфлиләрә 5:18, 19). Онун сәбри сајәсиндә милјонларла инсанлар “өзләринә ҝәлә” билдиләр (Ишаја 2:2, 3).
20 Беләликлә, мәҝәр валидејнләр, јолуну азмыш ушагларынын “өзүнә ҝәлмәсинә” көмәк етмәк үчүн, Мүгәддәс Китаба әсасланан бүтүн үсуллардан истифадә етмәли дејилләрми? Ушағынызын Јеговаја тәрәф гајытмасына көмәк едәркән, сәбирли олмагда Јеговадан нүмунә ҝөтүрүн. Мүгәддәс Китаб принсипләринә мәтанәтлә риајәт един вә көмәк үчүн Јеговаја дуа едәрәк, Она хас олан мәһәббәт, әдаләт вә мүдриклик хүсусијјәтләрини әкс етдирмәјә чалышын. Инадкар үсјанчыларын бир чоху, Јегованын мәһәббәтлә дедији “дөнүн” дә’вәтини артыг гәбул едибләр. Олсун ки, сизин дә јолуну азмыш оғул вә ја гызыныз Аллаһын халгынын мүһафизә верән јығынҹағына гајыдаҹагдыр (Лука 15:6, 7).
[Һашијәләр]
a Ушаглары өјрәтмәк барәдә даһа әтрафлы мә’лумат, “Ҝөзәтчи Гүлләси”нин 1999–ҹу ил, 1 ијул нөмрәсиндә, 13—17–ҹи сәһифәләрдә бәһс олунур (русҹа).
b Јығынҹаг ҝөрүшләриндә, үнсијјәтдән мәһрум олунан һәдди–бүлуға чатмамыш ушаг үчүн дуа едилмәјәҹәкдир, чүнки үнсијјәтдән мәһрум едилмиш адамын вәзијјәти, олсун ки, һамыја мә’лум дејилдир. (“Ҝөзәтчи Гүлләси”нин 1979–ҹу ил, 15 октјабр нөмрәсинин 31–ҹи сәһифәсинә бахын, инҝ.)
c Конкрет тәклифләри, “Ојанын!” журналынын 1972–ҹи ил, 22 ијун, 13—16–ҹы (инҝ.) вә 1996–ҹы ил, 22 сентјабр, 21—23–ҹү сәһифәләриндә тапмаг олар (русҹа).
Јадыныздадырмы?
• Јенијетмәнин јығынҹағы тәрк етмәсинә чох вахт әсас сәбәб нә олур?
• Јегова илә шәхси гаршылыглы мүнасибәти инкишаф етдирмәкдә јенијетмәләрә неҹә көмәк етмәк олар?
• Јолуну азмыш ушаға көмәк едәркән, нәјә ҝөрә валидејнләр сәбирли, ејни заманда мәтанәтли олмалыдырлар?
• Јолуну азмыш јенијетмәнин ҝери гајытмасына јығынҹағын үзвләри неҹә көмәк едә биләрләр?
[25-ҹи сәһифәдәки шәкил]
Валидејнләрин сәмими дуалары, онларын Јегова илә јахын мүнасибәтдә олдугларыны анламагда ушаглара көмәк едәҹәкдир.
[25-ҹи сәһифәдәки шәкил]
Јегова илә јахын мүнасибәти инкишаф етдирмәк үчүн, Аллаһын Кәламыны охумаг ваҹибдир.
[26-ҹы сәһифәдәки шәкил]
Јолуну азмыш ушаг “өзүнә ҝәләндә”, ону севинҹлә гәбул един.
[28-ҹи сәһифәдәки шәкил]
Ушағын Јеговаја гајытмасы үчүн конкрет тәдбирләр ҝөрүн.