Јеһовадан горхун вә Онун әмрләрини тутун
“Аллаһдан горх вә онун әмрләрини тут; чүнки инсанын бүтүн вәзифәси будур” (ВАИЗ 12:13).
1, 2. а) Горху бизи физики ҹәһәтдән неҹә горуја биләр? б) Нә үчүн һикмәтли валидејнләр өвладларына фајдалы горхуну ашыламаға чалышырлар?
“ҸӘСАРӘТ һәјаты тәһлүкә алтына алыр, горху исә ону мүдафиә едир” - дејә Леонардо да Винчи гејд етмишдир. Дүшүнҹәсиз ҹәсарәт уҹбатындан инсан гаршыдакы тәһлүкәни ҝөрмүр, амма горху она еһтијатлы олмағы хатырладыр. Мисал үчүн, әҝәр биз учурумун кәнарына јахынлашыб, онун неҹә һүндүр олдуғуну ҝөрсәк, чохумуз гејри-ихтијари олараг ҝери чәкиләрдик. Сағлам горху да беләдир: әввәлки мәгаләдән өјрәндијимиз кими, бу горху Аллаһла јахшы мүнасибәтә сәбәб олмагла бәрабәр, өзүмүзү зәрәрдән горумаға да көмәк едир.
2 Лакин мүасир дүнјада мөвҹуд олан тәһлүкәләрдән горхмағы өјрәнмәк лазымдыр. Ушаглар електрик ҹәрәјанынын вә ја јол һәрәкәтинин нә дәрәҹәдә тәһлүкәли олдуғундан бихәбәрдирләр, буна ҝөрә дә онларла бәдбәхт һадисәләр асанлыгла баш верә биләрa. Һикмәтли валидејнләр, әтрафдакы тәһлүкәләр барәдә ушагларыны дөнә-дөнә хәбәрдарлыг едәрәк, онлара фајдалы горхуну ашыламаға чалышырлар. Валидејнләр билирләр ки, бу ҹүр горху ушагларын һәјатыны хилас едә биләр.
3. Руһани тәһлүкәләр барәдә Јеһова бизи неҹә вә нә үчүн хәбәрдар едир?
3 Јеһова да бизим рифаһымыз үчүн нараһат олур. О, севән бир Ата кими, Кәламы вә тәшкилаты васитәсилә бизи хејримиз үчүн өјрәдир (Ишаја 48:17). Аллаһын бу тә’лиминә, руһани тәләләр һаггында “дөнә-дөнә” едилән хәбәрдарлыглар дахилдир. Бу хәбәрдарлыгларын мәгсәди - бу ҹүр тәһлүкәләр гаршысында фајдалы горхуну инкишаф етдирмәкдә көмәк ҝөстәрмәкдир (2 Тарихләр 36:15, ЈД; 2 Петер 3:1). Инсанлар Аллаһ горхусуна малик олуб, Онун әмрләрини тутмаға мејлли үрәјә саһиб олсајдылар, тарих әрзиндә баш верән бир чох руһани фаҹиә вә әзаблардан гачынмаг оларды (Тәснијә 5:29). Бу “ахыр ҝүнләрдә” үрәјимиздә Аллаһ горхусу инкишаф етдирмәјә вә өзүмүзү руһани тәһлүкәләрдән горумаға неҹә наил ола биләрик? (2 Тимотејә 3:1).
Пислијә нифрәт ет
4. а) Мәсиһчиләр һансы горхуну инкишаф етдирмәлидирләр? б) Јеһова ҝүнаһлы давраныш тәрзинә неҹә јанашыр? (Һашијәјә бахын.)
4 Мүгәддәс Китабда изаһ едилир ки, “Рәбб горхусу пислијә нифрәт етмәкдир” (Сүлејманын мәсәлләри 8:13, МКШ). Мүгәддәс Китаба даир бир лүғәтдә белә нифрәт “әдавәт, кин, икраһ ојадан вә һеч бир охшарлығы олмамаг арзусу доғуран инсана вә ја әшјаја гаршы емосионал реаксија” кими тәсвир едилир. Буна ҝөрә дә Аллаһ горхусу, Јеһованын пислик һесаб етдији һәр шејә дәрин нифрәт вә ја икраһы өзүнә дахил едирb (Мәзмур 97:10). Горхунун тә’сири алтында учурумун кәнарындан гејри-ихтијари чәкилдијимиз кими, Аллаһ горхусу да бизи пислијә нифрәт етмәјә тәшвиг едир. Мүгәддәс Китабда дејилир: “Рәбб горхусуна ҝөрә инсан дөнәр писликдән” (Сүлејманын мәсәлләри 16:6, МКШ).
5. а) Биз Аллаһ горхусуну вә һәр ҹүр пислијә нифрәти неҹә ҝүҹләндирә биләрик? б) Исраил халгынын тарихи бу саһәдә бизә нәји өјрәдир?
5 Ҝүнаһын гачылмаз зәрәрли нәтиҹәләри үзәриндә дүшүнмәклә, Аллаһ гаршысында сағлам горхуну вә һәр ҹүр пислијә гаршы нифрәти ҝүҹләндирә биләрик. Мүгәддәс Китаб бизи әмин едир ки, руһ үчүн әкириксә руһдан, ҹисмани тәбиәт үчүн әкириксә о тәбиәтдән дә бичәҹәјик (Галатијалылара 6:7, 8). Бу сәбәбдән Јеһова, Онун ганунларына табе олмамағын вә һәгиги ибадәти рәдд етмәјин гачылмаз нәтиҹәләрини ајдын шәкилдә тәсвир етди. Әҝәр Аллаһын көмәји олмасајды, кичик, мүдафиәсиз Исраил халгынын агибәти гәддар вә ҝүҹлү гоншу халгларын әлиндә галарды (Тәснијә 28:15, 45-48). Исраилин ҝөстәрдији итаәтсизлик уҹбатындан баш верән һадисәләрин фаҹиәли нәтиҹәләри Мүгәддәс Китабда тәфсилаты илә “мәсләһәт олараг” јазылыбдыр. Бу јазыланлар исә бизә ибрәт дәрси олмалы вә Аллаһ горхусуну инкишаф етдирмәјимизә көмәк етмәлидир (1 Коринфлиләрә 10:11).
6. Аллаһ горхусуна өјрәнмәк үчүн, Мүгәддәс Китабын һансы нүмунәләри үзәриндә дүшүнмәк олар? (Һашијәјә бахын.)
6 Мүгәддәс Китабда јалныз бүтүн Исраил халгынын тарихи дејил, һәм дә гысганҹлыг, әхлагсызлыг, тамаһкарлыг вә мәғрурлуғун гурбаны олан ајры-ајры шәхсләрин һәјатында баш вермиш реал һадисәләр дә гәләмә алыныбc. Бу инсанларын бә’зиләри Аллаһа узун илләр хидмәт етмиш, лакин һәјатларынын һансыса һәлледиҹи анында Аллаһ горхусу онларда кифајәт гәдәр мөһкәм олмадығындан бунун аҹы нәтиҹәсини ҝөрмүшләр. Мүгәддәс Китабын белә нүмунәләри үзәриндә дүшүнәркән, онларын сәһвләрини тәкрар етмәмәк гәрарында мөһкәмләнирик. Әҝәр Аллаһын мәсләһәтинә артыг фаҹиәни даддыгдан сонра әһәмијјәт версәјдик, бу неҹә дә кәдәрли оларды! Һамы тәрәфиндән гәбул едилмиш фикрә зидд олараг, тәҹрүбә, хүсусән дә өз истәкләринин гурбаны олмаг “тәҹрүбәси” һеч дә јахшы мүәллим дејил (Мәзмур 19:7).
7. Јеһова өз “мәскәнинә” кимләри дә’вәт едир?
7 Аллаһ горхусуну инкишаф етдирмәјин диҝәр инандырыҹы сәбәби, Аллаһла олан мүнасибәтимизи горумаг истәјидир. Биз Јеһова илә достлуғумузу јүксәк гијмәтләндирдијимиз үчүн, Ону кәдәрләндирмәкдән горхуруг. Јеһова кимләри өзүнә дост саныр? Өз “мәскәнинә” кимләри дә’вәт едәрди? Јалныз “камал илә јеријән вә салеһ иш ҝөрән” кәсләри (Мәзмур 15:1, 2). Аллаһла олан дәјәрли мүнасибәтимизи гијмәтләндиририксә, Онун гаршысында нөгсансыз јеримәјә виҹданла чалышаҹағыг.
8. Малакинин ҝүнләриндә бә’зи исраиллиләр Аллаһла достлуг мүнасибәтини гијмәтләндирмәдијини неҹә ҝөстәрирдиләр?
8 Тәәссүфләр олсун ки, Малакинин ҝүнләриндә бә’зи исраиллиләр Аллаһла достлуг мүнасибәтләрини гијмәтләндирмирдиләр. Јеһовадан горхуб, Она һөрмәт етмәк әвәзинә, исраиллиләр Аллаһын гурбанҝаһына хәстә вә топал һејванлары гурбан ҝәтирирдиләр. Онларда Аллаһ горхусунун кифајәт гәдәр олмамасы, никаһа гаршы мүнасибәтләриндә дә әкс олунурду. Даһа ҝәнҹ гадынларла евләнмәк хатиринә, онлар ҹаванлыгда евләндикләри гадынлары ҹүз’и шејләрин үстүндә бошајырдылар. Малаки, Јеһованын “бошанмаја” нифрәт етдијини вә хаинлик руһунун онлары Аллаһдан узаглашдырдығыны сөјләмишдир. Гурбанҝаһ, атылмыш гадынларын аҹы ҝөз јашлары илә мәҹази мә’нада долан заман, Аллаһ онларын гурбанларыны илтифатла гәбул едә биләрдими? Јеһованын ганунларына гаршы белә гангаралдыҹы мүнасибәт Ону: “Һаны мәндән горху?” дејә, сорушмаға вадар етмишдир (Малаки 1:6-8; 2:13-16).
9, 10. Јеһова илә олан достлуг мүнасибәтимизә гијмәт вердијимизи неҹә ҝөстәрә биләрик?
9 Јеһова, әр вә аталарын, һәтта гадын вә аналарын худбин вә әхлагсыз һәрәкәтләри уҹбатындан, ҝүнаһсыз һәјат јолдашларын вә ушагларын неҹә изтираб чәкдикләрини бу ҝүн дә ҝөрүр. Бәли, бу Јеһованы чох кәдәрләндирир. Аллаһын досту һәр шејә Аллаһын нөгтеји-нәзәри илә бахаҹаг вә өз никаһыны мөһкәмләндирмәјә сә’јлә чалышаҹагдыр. О, никаһ бағларынын әһәмијјәтини гијмәтдән салан дүнјәви дүшүнҹәни рәдд едәҹәк вә “ҹинси әхлагсызлыгдан” гачынаҹагдыр (1 Коринфлиләрә 6:18).
10 Әҝәр биз, һәјатымызын башга саһәләриндә олдуғу кими, никаһда да Јеһованын ҝөзүндә пис олан һәр шејә нифрәт едир, Онунла олан достлуг мүнасибәтимизи јүксәк гијмәтләндиририксә, Јеһова бизә гаршы хејирхаһ олаҹаг вә Онун лүтфүнә лајиг ҝөрүләҹәјик. Һәвари Павел әминликлә демишдир: “Доғрудан да дәрк едирәм ки, Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур” (Һәвариләрин ишләри 10:34, 35). Аллаһ горхусунун инсанлары мүхтәлиф чәтин шәраитләрдә дүзҝүн давранмаға неҹә тәшвиг етдијинә даир Мүгәддәс Китабдан чохлу нүмунәләр ҝәтирмәк олар.
Аллаһ горхусуна малик олан үч шәхс
11. Ибраһим Аллаһ горхусуна малик олдуғу һансы һадисәдән сонра дејилмишдир?
11 Мүгәддәс Китабда, Јеһованын өзүнә дост адландырдығы шәхсдән - тајфа башчысы олан Ибраһимдән бәһс едилир (Ишаја 41:8). Ибраһим Аллаһын бујуруғуна ҝөрә оғлу Исһагы гурбан ҝәтирмәли олдугда, онун малик олдуғу Аллаһ горхусу сынаға мә’руз галды. Аллаһ Ибраһимә вә’д етмишди ки, онун оғлунун васитәсилә бөјүк милләт әмәлә ҝәләҹәк (Тәквин 12:2, 3; 17:19). “Аллаһын досту” бу ҹүр әзаблы сынаға таб ҝәтирәҹәкми? (Јагуб 2:23). Ибраһим оғлу Исһагын үзәринә бычағы апаран мәгамда Јеһованын мәләји деди: “Ушаға әл галдырма вә она бир шеј етмә. Инди билдим ки, сән Аллаһдан горхурсан; өз јеҝанә оғлуну Мәндән әсирҝәмәдин” (Јарадылыш 22:10-12, МКШ).
12. Аллаһ горхусуна малик олмаға Ибраһими нә тәшвиг етди вә һәмин әһвал-руһијјәни биз неҹә ҝөстәрә биләрик?
12 Бахмајараг ки, Ибраһим Аллаһ горхусуна малик олдуғуну әввәлләр дә сүбут етмишди, лакин бу дәфә о, Аллаһ горхусуну һәгигәтән дә гејри-ади шәкилдә тәзаһүр етдирди. Исһагы гурбан ҝәтирмәјә һазыр олмасы, садәҹә еһтирамлы итаәткарлыгдан даһа артыг иди. Ибраһими белә давранмаға, онун сәмави Атасынын вердији вә’ди јеринә јетирәҹәјинә, әҝәр лазым ҝәләрсә, Исһагы дирилдәҹәјинә олан сарсылмаз иманы тәшвиг етмишдир. Һәвари Павелин јаздығы кими, Ибраһим “тамамилә әмин иди ки, Аллаһ Өз вә’д етдијини јеринә јетирмәјә дә гадирдир” (Ромалылара 4:16-21). Аллаһын ирадәси биздән бөјүк гурбанлар тәләб етсә дә, ону јеринә јетирмәјә һазырыгмы? Јеһованын, “Ону ахтаранлара мүкафат” вердијинә вә бу ҹүр итаәткарлығын узун мүддәт фајда ҝәтирәҹәјинә там әминикми? (Ибраниләрә 11:6). Әсл Аллаһ горхусу мәһз будур (Мәзмур 115:11).
13. Нә үчүн Јусифин “мән Аллаһдан горхурам” демәјә там һаггы варды?
13 Аллаһ горхусуну әмәлдә ҝөстәрмәјә даир башга бир нүмунәни - Јусифин нүмунәсини нәзәрдән кечирәк. Потифәрин евиндә гул ишләјән Јусиф, зина етмәк тәклифи илә һәр ҝүн гаршылашырды. Ҝөрүндүјү кими, Јусиф, ағасынын ону ҝүнаһ ишләтмәјә тә’кидлә дилә тутан арвады илә ҝөрүшдән гачына билмирди. Бир ҝүн елә олду ки, гадын “онун палтарындан тутду”, о исә “палтарыны онун әлиндә гојуб гачды”. Јусифи писликдән дәрһал гачынмаға тәшвиг едән нә олду? Шүбһәсиз ки, илк нөвбәдә Аллаһ горхусу вә “бу бөјүк пислији едиб, Аллаһын өнүндә ҝүнаһа батмамаг” истәји олмушдур (Јарадылыш 39:7-12, МКШ). Јусифин “мән Аллаһдан горхурам” демәјә там һаггы варды (Јарадылыш 42:18, МКШ).
14. Јусифин мәрһәмәтиндә әсл Аллаһ горхусу неҹә әкс олунур?
14 Чох илләр кечдикдән сонра Јусиф, бир заман ону рәһмсизҹәсинә гул кими сатан гардашлары илә үз-үзә ҝәлди. О, интигам алмаг үчүн, онларын гидаја олан еһтијаҹларындан асанлыгла истифадә едә биләрди. Лакин инсанларла гәддар давраныш Аллаһ горхусуну әкс етдирмир (Левилиләр 25:43). Буна ҝөрә дә, гардашларынын үрәјинин дәјишдијинә әмин олдугдан сонра, Јусиф онлары мәрһәмәтлә бағышлады. Әҝәр биздә Аллаһ горхусу варса, Јусиф кими биз дә пислијә јахшылыгла галиб ҝәлиб, сынаглары дәф едәҹәјик (Тәквин 45:1-11; Мәзмур 130:3, 4; Ромалылара 12:17-21).
15. Нә үчүн Ејубун давранышы Јеһованын үрәјини севиндирирди?
15 Аллаһ горхусуна малик олмаға даир башга бир ҝөзәл нүмунә - Ејубун нүмунәсидир. Јеһова Иблисә деди: “Гулум Ејуба јахшыҹа бахдынмы? Чүнки дүнјада онун кимиси јох; камил вә доғру адам; Аллаһдан горхар вә писликдән чәкинәр” (Ејуб 1:8). Ејубун нөгсансыз давранышы, узун илләр онун сәмави Атасынын үрәјини севиндирирди. Ејуб Аллаһдан горхурду, чүнки бунун доғру вә һәр шејдән јахшы олдуғуну билирди. Ејуб деди: “Бах, Рәбб горхусу, һикмәт будур; вә писликдән чәкилмәк анлајышдыр” (Ејуб 28:28). Ејуб евли иди, буна ҝөрә дә ҝәнҹ гадынлара јерсиз диггәт јетирмир вә үрәјиндә әхлагсызлыг барәдә дүшүнмүрдү. Ејуб зәнҝин олса да, вар-дөвләтинә ҝүвәнмир вә бүтпәрәстлијин һәр бир нөвүндән гачынырды (Ејуб 31:1, 9-11, 24-28).
16. а) Ејуб һансы саһәләрдә инајәтлә давранды? б) Бағышламаға һазыр олдуғуну Ејуб неҹә ҝөстәрди?
16 Лакин Аллаһдан горхмаг јалныз писликдән гачынмағы дејил, һәмчинин јахшылыг етмәји дә өзүнә дахил едир. Мәсәлән, Ејуб кор, топал вә касыб инсанлара мәрһәмәтлә гајғы ҝөстәрирди (Левилиләр 19:14; Ејуб 29:15, 16). О анлајырды ки, “үрәји әримәкдә олана достундан инајәт ҝәрәк, Гадирин горхусуну бурахса белә” (Ејуб 6:14). Инајәт ҝөстәрмәјән инсан бағышламаг истәмир вә ја кин бәсләјир. Аллаһын ҝөстәришинә ҝөрә Ејуб, она бир чох изтираблар ҝәтирән үч досту үчүн дуа етди (Ејуб 42:7-10). Хәтримизә дәјән һәмиманлымызы бағышламагла, һәмин руһу биз дә әкс етдирә биләрикми? Бизи инҹидән кәс барәдә үрәкдән едилән дуа, һирсимизин сојумасына көмәк едә биләр. Ејубун Аллаһ горхусуна малик олмасы сајәсиндә алдығы хејир-дуалар, биздә Јеһованын Ондан горханлар үчүн сахладығы јахшылығын зәнҝинлији һагда тәсәввүр јарадыр (Мәзмур 31:19; Јагуб 5:11).
Аллаһ горхусу вә инсан горхусу
17. Инсан горхусу бизә нә едә биләр вә нә үчүн белә горху узағыҝөрмәзликдир?
17 Аллаһ горхусу бизи дүзҝүн давранмаға тәшвиг едир, инсан горхусу исә иманымызы сарсыда биләр. Бу сәбәбдән, Иса һәвариләрини хош хәбәри сә’јлә тәблиғ етмәјә тәшвиг едәрәк демишдир: “Бәдәни өлдүрүб ҹаны өлдүрә билмәјәнләрдән дә горхмајын; анҹаг даһа артыг ҹәһәннәмдә һәм бәдәни, һәм ҹаны һәлак етмәјә гадир Оландан горхун” (Матта 10:28). Исанын изаһ етдији кими, инсанлардан горхмаг узағыҝөрмәзликдир, чүнки инсанлар бизи ҝәләҹәк һәјата олан үмиддән мәһрум етмәјә гадир дејилләр. Бундан әлавә, биз, Аллаһдан она ҝөрә горхуруг ки, Онун һејрәтләндириҹи гүввәсини дәрк едирик; бүтүн халгларын гүввәси Аллаһын ҝүҹү илә мүгајисәдә һечдир (Ишаја 40:15). Ибраһим кими, биз дә там әминик ки, Јеһова өз садиг хидмәтчиләрини дирилтмәјә гадирдир (Вәһј 2:10). Она ҝөрә дә әминликлә дејирик: “Әҝәр Аллаһ бизимләдирсә, ким бизә гаршы ола биләр?” (Ромалылара 8:31).
18. Јеһова, Ондан горханлары неҹә мүкафатландырыр?
18 Бизә гаршы чыхан кәс истәр јахын гоһум, истәр дә мәктәбдәки дәҹәл ушаг олсун, биз, “Рәбб горхусунда гүввәтли е’тимад” олдуғуну ҝөрәҹәјик (Сүлејманын мәсәлләри 14:26). Аллаһын бизи ешидәҹәјини биләрәк, биз, гүввәт әлдә етмәк үчүн Она дуа едә биләрик (Мәзмур 145:19). Јеһова, Ондан горханлары һеч заман унутмур. Јеһова, Малаки пејғәмбәрин васитәсилә бизи әмин едир: “О заман Рәбдән горханлар бир-бирләри илә сөјләшдиләр; вә Рәбб јахшы динләди вә ешитди вә Рәбдән горхуб исмини дүшүнәнләр үчүн онун өнүндә бир анылма китабы јазылды” (Малаки 3:16).
19. Һансы горху һиссләри кечмишдә галаҹаг вә һансы горху әбәдијјән олаҹаг?
19 Јер үзүндә јашајан инсанларын һәр биринин Јеһоваја ибадәт едәҹәји вә инсан горхусунун јох олаҹағы заман јахындыр (Ишаја 11:9). Аҹлыг, хәстәлик, ҹинајәт вә мүһарибә горхусу кечмишдә галаҹаг. Амма Аллаһ горхусу әбәдијјән олаҹаг, чүнки Аллаһын ҝөјдә вә јердә олан садиг хидмәтчиләри Она һөрмәт етмәјә, итаәткар олмаға вә еһтирам бәсләмәјә давам едәҹәкләр (Вәһј 15:4). Һәләлик исә, гој бизләрдән һәр биримиз Сүлејманын илһам алмыш мәсләһәтини үрәкдән гәбул етсин: “Үрәјин ҝүнаһкарлара гибтә етмәсин; анҹаг бүтүн ҝүнү Рәбб горхусунда ол; чүнки ҝерчәкдән бир сон вардыр; вә үмидин боша чыхмајаҹагдыр” (Сүлејманын мәсәлләри 23:17, 18).
[Һашијәләр]
a Әҝәр бөјүкләр, һәјаты вә сағламлығы даима тәһлүкә алтына алан ишлә мәшғулдурларса, онлар тәһлүкә гаршысында горхуну итирирләр. Нә үчүн бир чох дүлҝәрләрин бармағы јохдур суалына, тәҹрүбәли бир уста белә ҹаваб вермишдир: “Онлар електрик мишарлары гаршысында горхуну итирирләр”.
b Јеһова өзү бу ҹүр нифрәт бәсләјир. Мәсәлән, Ефеслиләрә 4:29 ајәсиндә налајиг сөзләр үмумиләшдириләрәк “чүрүк сөзләр” адланыр. Бурада “чүрүк” кими тәрҹүмә олунмуш јунан сөзү әсасән хараб олмуш мејвә, балыг вә ја әтә аид едилир. Бунунла бизим налајиг вә әдәбсиз сөһбәтләрә бәсләмәли олдуғумуз мүнасибәт ајдын тәсвир олунур. Бундан әлавә, “Јени Дүнја Тәрҹүмәси”ндә бүтләр чох вахт “пејинли” адланырлар (Тәснијә 29:17; Һезекиел 6:9). Пејинә, јә’ни нәҹисә гаршы олан тәбии ијрәнҹлик һисси, бүтпәрәстлијин истәнилән нөвүнә Аллаһын нә дәрәҹәдә нифрәт етдијини анламаға көмәк едир.
c Нүмунә үчүн, Мүгәддәс Китабда Габил (Тәквин 4:3-12); Давуд (2 Самуел 11:2-12:14); Ҝеһази (2 Краллар 5:20-27) вә Азарја (2 Тарихләр 26:16-21) һаггында верилән мә’луматлары нәзәрдән кечирмәк олар.
Хатырлајырсынызмы?
• Пислијә нифрәт етмәји неҹә өјрәнирик?
• Малакинин ҝүнләриндә бә’зи исраиллиләр Јеһова илә достлуг мүнасибәтини гијмәтләндирмәдикләрини неҹә ҝөстәрирдиләр?
• Ибраһим, Јусиф вә Ејубун нүмунәсиндән Аллаһ горхусу һаггында нә өјрәнирик?
• Һансы горху әбәдијјән олаҹаг вә нә үчүн?
[13-ҹү сәһифәдәки шәкил]
Һикмәтли валидејнләр ушагларына фајдалы горхуну ашылајырлар.
[14-ҹү сәһифәдәки шәкил]
Горху бизи тәһлүкәдән гачынмаға, Аллаһ горхусу исә пислијә нифрәт етмәјә тәшвиг едир.
[17-ҹи сәһифәдәки шәкил]
Үч јаланчы достунун тәзјигинә бахмајараг, Ејуб Аллаһ горхусуну итирмәди.
[Иҹазә илә]
Мүгәддәс Китабын “Вулҝата Латина” тәрҹүмәсиндән, 1795.