Охуҹуларын суаллары

Мәсиһчи гадын иманына шәрик олмајан вә дини бајрамлары гејд едән әринә табечилији, Аллаһа олан сәдагәтлә неҹә ујғунлашдыра биләр?

Белә һалда мәсиһчи гадындан мүдриклик вә нәзакәт тәләб олунур. Әҝәр о, јаранан вәзијјәтдә таразлашмыш үсул тапмаға чалышырса дүзҝүн давраныр. Буна охшар суалы мүзакирә едәркән, Иса мәсләһәт верди: “Гејсәринкини гејсәрә, Аллаһынкыны Аллаһа верин” (Матта 22:21). Дүздүр, бурада сөһбәт, Аллаһын сонрадан вердији тапшырыға әсасән мәсиһчиләрин һакимләрә табе олмаға даир вәзифәләриндән ҝедирди (Ромалылара 13:1). Бунунла белә, Исанын мәсләһәтиндән мәсиһчи гадынын Аллаһ гаршысында олан мәс’улијјәти илә, һәтта әри мәсиһчи олмаса да, Мүгәддәс Китаб тә’лиминә әсасән табе олмаг вәзифәсини ујғунлашдырмағын мүмкүн олдуғуну ҝөстәрән паралел ҝөрүрүк.

Мүгәддәс Китабын принсипләри илә јахындан таныш олан адамлардан һеч бири инкар етмәјәҹәк ки, Мүгәддәс Китабда, илк нөвбәдә Гадир Аллаһын гаршысында мәс’улијјәт дашымаг вә бүтүн вәзијјәтләрдә Она садиг галмаг зәрурилији вурғуланыр (Һәвариләрин ишләри 5:29). Анҹаг бир чох һалларда иманлы тәрәф иманына шәрик олмајан кәсин тәләб вә хаһишләрини, Аллаһын јүксәк нормаларыны позмадан јеринә јетирә биләр.

“Даниел” китабынын 3-ҹү фәслиндә, үч јәһудинин башына ҝәлән һадисәдән ибрәтвериҹи нүмунәјә раст ҝәлирик. Ағалары Навуходоносор башгалары кими онлара да, Дура дүзәнлијинә ҝәлмәји әмр етмишди. Орада бүтпәрәстликлә бағлы һадисәләрин олаҹағыны баша дүшән үч јәһуди, илк нөвбәдә ораја ҝетмәмәји үстүн тутардылар. Еһтимал ки, һәмин мәрасимдә иштирак етмәмәк үчүн сәбәбләр ахтарыб тапмаг Даниелә мүјәссәр олмушду, амма үч јәһудинин белә имканлары јох идиa. Буна ҝөрә дә онлар, Дура дүзәнлијинә ҝәлмәклә һөкмдарларына мүәјјән дәрәҹәдә табе олдугларыны ҝөстәрмиш олсалар да, Аллаһын нифрәт етдији һәрәкәтләрдә иштирак етмәдиләр вә етмәк фикриндә дә дејилдиләр (Даниел 3:1-18).

Бәнзәр шәкилдә бајрам ҝүнләри јахынлашан заман иманына шәрик олмајан әр, мәсиһчи һәјат јолдашындан онун гачынмаг истәдији иши ҝөрмәсини хаһиш, јахуд тәләб едә биләр. Мисал үчүн, о хаһиш едә биләр ки, башгалары илә гејд етмәк истәдији һәр һансы бир бајрам ҝүнү үчүн мүәјјән хөрәк һазырласын. Ја да о, (һәјат јолдашы да дахил олмагла) һәмин ҝүн бүтүн аиләнин онунла бирликдә гоһумларыҝилә наһара, шам јемәјинә, јахуд да садәҹә гонаглыға ҝетмәләрини тәләб едә биләр. Мәсиһчи гадын бајрамгабағы мағазаја ҝетмәјә һазырлашаркән о, тапшырыг верә биләр ки, онун үчүн хүсуси бајрам јемәји, һансыса әшјалар, һәдијјәләр бүкмәк үчүн кағыз вә тәбрик мәктублары алсын.

Мәсиһчи гадын бүтпәрәстликдә иштирак етмәсә дә, әри белә бир хаһишлә мүраҹиәт едәрсә неҹә давранмалыдыр? Ахы, әр аиләнин башчысыдыр вә Мүгәддәс Китабда: “Еј гадынлар, Рәббә аид оланлара лајиг олдуғу кими, әрләринизә табе олун” дејилир (Колослулара 3:18). Белә һалда гадын әринин башчылығына һөрмәт ҝөстәрмәклә јанашы, Аллаһа садиглијини дә горуја биләрми? Гадын, илк нөвбәдә Јеһоваја табе олмагла јанашы, аиләнин башчылыг принсипини позмадан нәзакәт вә мүдрикликлә давранаҹағына даир гәрар гәбул етмәлидир.

Ола билсин ки, әр һәјат јолдашындан севдији хөрәји, јахуд да адәтән бајрам ҝүнләриндә једији хөрәји биширмәсини хаһиш етсин. Сөзсүз ки, мәсиһчи гадын әринә мәһәббәт, башчылыг принсипинә исә һөрмәт тәзаһүр етдирмәк истәјәҹәк. Бәс әринин хаһиши ән’әнәви бајрамларла бағлыдырса, о белә хөрәкләри һазырлаја биләрми? Бә’зи мәсиһчи гадынлар, әрләринин хаһишләринә башга вахтларда олан ади бир истәк кими јанашараг ону виҹдан раһатлығы илә јеринә јетирирләр. Әлбәттә, һеч бир мәсиһчи гадын, әри үчүн бајрам мә’насы кәсб етсә белә, бу хаһишин бајрамла бағлы олдуғуна хүсуси әһәмијјәт вермәјәҹәк. Еләҹә дә әр, һәјат јолдашындан ајын, јахуд илин һансыса ҝүнләрини онунла бирликдә гоһумларыҝилә гонаг ҝетмәји тәләб едә биләр. Һәмин ҝүн һансыса шәнлик вә ја бајрамын кечирилдији бир вахта дүшәрсә, мәсиһчи гадын һәјат јолдашы илә бирликдә ҝедә биләрми? Јахуд да мағазаја ҝедәркән әринин истәдији шејләри, онун даһа сонра онларла нә едәҹәјини дүшүнмәдән алмаға һазырдырмы?

Әлбәттә ки, мәсиһчи гадын давранышынын башгаларына неҹә тә’сир ҝөстәрәҹәји барәдә дүшүнәҹәк (Филипилиләрә 2:4). Еһтимал ки, үч јәһуди Дура дүзәнлијинә ҝетдикләри барәдә башгаларынын билмәләрини истәмәдикләри кими, о да һансыса бајрамда иштирак етдијинә даир тәәссүрат јаранмасыны истәмәјәҹәк. Буна ҝөрә дә мәсиһчи гадын, әри илә нәзакәтлә данышмаға чалышаҹаг. Бәлкә дә әри онун һиссләрини нәзәрә алмаға разылашаҹаг вә севиб, һөрмәт бәсләдији һәјат јолдашынын хатиринә бајрам үчүн һәр шеји өзү һазырлајаҹаг. Истисна дејил ки, гадын јалан динин адәтләриндә иштирак етмәкдән имтина етмәк мәҹбуријјәтиндә галарса, әр өзүнү вә һәјат јолдашыны чыхылмаз вәзијјәтдә гојмаг истәмәјәҹәк. Әҝәр һәр шеј әввәлҹәдән сакитҹә мүзакирә едиләрсә, проблеми сүлһ јолу илә һәлл етмәк олар (Сүлејманын мәсәлләри 22:3).

Нәһајәт, садиг мәсиһчиләр бүтүн шәраитләр үзәриндә ҝөтүр-гој етмәли вә неҹә давранаҹагларына даир гәрар чыхармалыдырлар. Үч јәһудинин етдији кими, ән башлыҹасы Аллаһа табе олмагдыр (1 Коринфлиләрә 10:31). Буну јадда сахлајараг мәсиһчи олан һәр бир кәс - киши вә ја гадын - аилә үзвләринин, јахуд да табе олмалары лазым ҝәлән кәсләрин һансы хаһишләрини, виҹданына зидд ҝетмәдән јеринә јетирә биләҹәји илә әлагәдар өзү гәрар чыхара биләр.

[Һашијә]