Сизә “һәгигәт руһу” верилибми?
“Атадан хаһиш едәҹәјәм... сизә башга бир Тәсәлливериҹи версин. Бу, һәгигәт Руһудур” (ЈӘҺЈА 14:16, 17).
1. Шаҝирдләри илә ахырынҹы саатлар әрзиндә үст отагда оларкән, Иса Мәсиһ онлара һансы ваҹиб мә’луматы верди?
“ЈА РӘББ, һара ҝедирсән?” Бу суал, Јерусәлимдә үст отагда оларкән һәвариләри илә кечирдији сонунҹу саатлар әрзиндә онларын Иса Мәсиһә вердикләри суаллардан бири иди (Јәһја 13:36). Һәмин ҝөрүш заманы Иса һәвариләринә билдирди ки, онлардан ајрылмалы вә Атасынын јанына гајытмалыдыр (Јәһја 14:28; 16:28). О, бир инсан кими артыг онларла јашамајаҹаг, онлара ҝөстәриш вә суалларына шәхсән ҹаваб вермәјәҹәкдир. Лакин онлары әмин етди: “Мән... Атадан хаһиш едәҹәјәм ки, О, даим сизинлә бәрабәр олмаг үзрә сизә башга бир Тәсәлливериҹи версин” (Јәһја 14:16).
2. Иса, ҝедишиндән сонра шаҝирдләринә нә ҝөндәрәҹәјини вә’д етди?
2 Иса, һәмин тәсәлливериҹинин нә олдуғуну вә онун шаҝирдләрә неҹә көмәк едәҹәјини изаһ едиб, деди: “Башланғыҹдан сизә бу шејләри сөјләмәдим, чүнки сизинлә бәрабәр идим. Инди исә Мәни Ҝөндәрәнин јанына ҝедирәм... Мәним ҝетмәјим сизин үчүн хејирлидир; чүнки Мән ҝетмәсәм, Тәсәлливеричи сизин јаныныза ҝәлмәз; амма ҝедәрәмсә, Ону сизә ҝөндәрәрәм. О, јә’ни һәгигәт Руһу ҝәлдикдә, сизә һәр һәгигәтә јол ҝөстәрәҹәк” (Јәһја 16:4, 5, 7, 13).
3. а) “Һәгигәт Руһу” илк мәсиһчиләрә нә заман ҝөндәрилмишди? б) Руһун шаҝирдләр үчүн “Тәсәлливериҹи” ролуну ојнадығына даир нүмунә ҝәтирин.
3 Бу вә’д, ерамызын 33-ҹү илинин Пентикост ҝүнү јеринә јетди вә һәвари Петер буна шәһадәт етди: “Бу Исаны Аллаһ дирилтди. Биз һамымыз бунун шаһидләријик. Беләликлә, О, Аллаһын сағ әли илә јүксәлдиләрәк, Ата тәрәфиндән вә’д едилмиш Мүгәддәс Руһу алды вә сизин инди ҝөрдүјүнүз вә ешитдијиниз кими, бу Руһу үзәримизә төкдү” (Һәвариләрин ишләри 2:32, 33). Сонрадан ҝөрәҹәјимиз кими, Пентикост ҝүнүндә төкүлән мүгәддәс руһ илк мәсиһчиләр үчүн чох шејдә фајдалы олду. Амма Иса вә’д етди ки, “һәгигәт Руһу” онлара “һәр шеји өјрәдәҹәк” вә Рәббин сөјләдији “һәр шеји... хатырладаҹагдыр” (Јәһја 14:26). “Һәгигәт Руһу” онлара, Исанын етдикләрини вә тә’лимләрини, һәмчинин сөзләрини дәгиг јадда сахламаға, сонра исә тәфсилаты илә јазмаға көмәк етди. Бу хүсусән дә, өз Мүждәсини биринҹи әсрин сонунда јазан јашы өтмүш һәвари Јәһјаја көмәк етди. Јәһјанын јаздығы Мүждәдә, өз өлүмүнүн Хатирә Ҝеҹәсини гејд едәркән Иса Мәсиһин вердији дәјәрли мәсләһәтләр вар (Јәһја 13-17-ҹи фәсилләр).
4. “Һәгигәт Руһу” мәсһ едилмиш илк мәсиһчиләрә неҹә көмәк едирди?
4 Иса Мәсиһ һәмчинин илк шаҝирдләринә вә’д етди ки, бу руһ онлара “һәр шеји өјрәдәҹәк” вә “һәр һәгигәтә јол ҝөстәрәҹәк”. Һәмин руһ онлара, Мүгәддәс Јазылары дәрк етмәјә, фикирдә, анлајышда вә мәгсәдләрдә вәһдәти горујуб сахламаға көмәк етди (1 Коринфлиләрә 2:10; Ефеслиләрә 4:3). Бунунла да мүгәддәс руһ илк мәсиһчиләри тәшвиг етди ки, онлар, ајры-ајрылыгда мәсһ едилмишләрә руһани гиданы “вахтлы-вахтында” тәгдим едәрәк, “садиг вә ағыллы гул” ролунда фәалијјәт ҝөстәрсинләр (Матта 24:45).
Руһ шәһадәт едир
5. а) Ерамызын 33-ҹү илинин 14 нисан ахшамында Иса Мәсиһ шаҝирдләри гаршысында һансы јени имканы ачды? б) Исанын вердији вә’дин јеринә јетмәсиндә мүгәддәс руһ һансы ролу ојнајыр?
5 Иса Мәсиһ б. е. 33-ҹү илинин 14 нисан ахшамы шаҝирдләринә билдирди ки, онлары сонрадан өз јанына гәбул едәҹәк вә онлар ҝөјдә онунла вә Атасы илә јашајаҹаглар. Иса деди: “Атамын евиндә чох отаглар вардыр; елә олмасајды, сизә дејәрдим. Чүнки сизә јер һазырламаға ҝедирәм. Әҝәр ҝедиб јер һазырласам, тәкрар ҝәлиб сизи Өз јаныма ҝәтирәҹәјәм ки, Мән һарадајамса, сиз дә орада оласыныз” (Јәһја 13:36; 14:2, 3). Онлар Исанын Падшаһлығында онунла бирликдә идарә едәҹәкләр (Лука 22:28-30). Ҝөјләрдә јашамаг үмидинә малик олмаг үчүн, онлар Аллаһын руһани оғуллары кими “Руһдан доғулмалы”, орада Мәсиһлә падшаһлар вә каһинләр кими хидмәт етмәк үчүн исә мәсһ едилмәли идиләр (Јәһја 3:5-8; 2 Коринфлиләрә 1:21, 22; Титуса 3:5-7; 1 Петер 1:3, 4; Вәһј 20:6).
6. а) “Сәмави дә’вәт” нә заман башланды вә нечә нәфәр дә’вәт олунмалы иди? б) Дә’вәт едиләнләр нәјә вәфтиз олундулар?
6 Бу “сәмави дә’вәт” ерамызын 33-ҹү илинин Пентикост ҝүнүндә башлады вә еһтимал ки, әсас е’тибарилә 1930-ҹу илләрин орталарында баша чатды (Ибраниләрә 3:1). Мүгәддәс руһла мөһүрләнмиш руһани Исраилин сајы, “јер үзүндән сатын алынмыш” 144 000 нәфәрдир (Вәһј 7:4; 14:1-4). Онлар Мәсиһин руһани бәдәнинә, онун јығынҹағына, еләҹә дә өлүмүнә вәфтиз олунублар (Ромалылара 6:3; 1 Коринфлиләрә 12:12, 13, 27; Ефеслиләрә 1:22, 23). Онлар, суда вәфтиз олундугдан вә мүгәддәс руһла мәсһ едилдикдән сонра, өләнә гәдәр нөгсансызлыгларыны горујараг, фәдакарлыг јолуна гәдәм гојдулар (Ромалылара 6:4, 5).
7. Иса Мәсиһин өлүмүнүн Хатирә Ҝеҹәсиндә символлардан нәјә ҝөрә јалныз мәсһ едилмишләр гәбул едә биләрләр?
7 Мәсһ едилмиш бу мәсиһчиләр, јә’ни руһани Исраилин үзвләри, Јеһова илә “Аллаһын Исраили” арасында кәсилән јени әһдә дахилдирләр (Галатијалылара 6:16; Јеремја 31:31-34). Јени әһд Мәсиһин төкүлән ганы илә тәсдигләнмишди. Бу барәдә, Иса өлүмүнүн Хатирә Ҝеҹәсини тә’сис едәркән хатырлатмышды. Лука јазыр: “Сонра чөрәк ҝөтүрдү, шүкүр едиб ону парчалады вә онлара верәрәк деди: “Бу, сизин үчүн фәда едилән бәдәнимдир; буну Мәни анмаг үчүн един”. Еләҹә дә, ахшам јемәјиндән сонра, бир касаны ҝөтүрүб деди: Бу каса Мәним сизин үчүн төкүлән ганымла ҝерчәкләнән Әһди-Ҹәдиддир” (Лука 22:19, 20). Иса Мәсиһин өлүмүнүн Хатирә Ҝеҹәсиндә верилән чөрәк вә шәраб символларындан гәбул етмәк ихтијарына јалныз 144 000-дән јер үзүндә галанлар маликдирләр.
8. Мәсһ едилмишләр сәмави дә’вәтә малик олдугларыны һарадан билирләр?
8 Мәсһ едилмиш мәсиһчиләр сәмави дә’вәтә малик олдугларыны һарадан билирләр? Мүгәддәс руһ бу һагда онлара дәгиг шәһадәт едир. Һәвари Павел мәсһ едилмиш гардашларына јазырды: “Аллаһын Руһу илә идарә олунанларын һамысы Аллаһын оғулларыдыр. [...] Елә һәмин Руһ биздәки руһа шәһадәт едир ки, биз Аллаһын өвладларыјыг. Вә әҝәр өвладыјыгса, демәли, ејни заманда варисләрик, Аллаһын варисләријик; вә әҝәр Мәсиһлә бәрабәр иззәт газанмаг үчүн Онунла изтираб чәкириксә, Мәсиһин һәмварисләријик” (Ромалылара 8:14-17). Руһун бу шәһадәти чох ҝүҹлүдүр. Буна ҝөрә дә, әҝәр ким исә сәмави дә’вәтә малик олдуғуна аз да олса шүбһә едирсә, мүдрикликлә нәтиҹә чыхараҹагдыр ки, онун белә бир дә’вәти јохдур вә Рәббин Хатирә Ҝеҹәсиндә символлардан гәбул етмәкдән чәкинәҹәкдир.
Мүгәддәс руһ вә башга гојунлар
9. Јазылан Мүждәләрдә вә “Вәһј” китабында һансы ики груп инсанлар хатырланыр?
9 Руһани Исраили тәшкил едән дә’вәтли мәсиһчиләрин сајы мәһдуд олдуғундан, Иса Мәсиһ онлары “кичик сүрү” адландырды; онлара, јени әһдин “ағылына” ҝирмәјә иҹазә верилмишдир. “Кичик сүрүдән” фәргли олараг, јығылаҹаг “башга гојунларын” сајы ҝөстәрилмир (Лука 12:32; Јәһја 10:16). Сонун вахтында јығылмаға давам едән “башга гојунлар”, јер үзүндә ҹәннәтдә әбәди јашамаг үмидилә “бөјүк мәшәггәтдән” сағ чыхаҹаг “бөјүк... издиһамы” тәшкил едирләр. Мараглыдыр ки, биринҹи әсрин сонунда Јәһјаја верилән вәһјдә, бөјүк издиһам вә руһани Исраилин 144 000 үзвү ики мүхтәлиф групу тәсвир едилир (Вәһј 7:4, 9, 14). Башга гојунлара да мүгәддәс руһ верилирми? Әҝәр верилирсә, бу руһ онларын һәјатына неҹә тә’сир ҝөстәрир?
10. Башга гојунларын “Ата, Оғул вә Мүгәддәс Руһ наминә” вәфтиз олунмалары һансы мә’наны дашыјыр?
10 Мүгәддәс руһ башга гојунларын һәјатында ваҹиб рол ојнајыр. Онлар, “Ата, Оғул вә Мүгәддәс Руһ наминә” вәфтиз олунмагла өзләрини Јеһоваја һәср едирләр (Матта 28:19). Бу инсанлар Јеһованын Али һөкмранлығыны гәбул едир, Мәсиһә өз Падшаһлары вә Хиласкарлары кими табе олур, һәмчинин Аллаһын мүгәддәс руһунун - фәал гүввәсинин рәһбәрлијинә табе олурлар. Онлар ҝүнү-ҝүндән “руһун сәмәрәсини”, јә’ни “мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмаг” кими хүсусијјәтләри инкишаф етдирмәјә чалышырлар (Галатијалылара 5:22, 23).
11, 12. а) Мәсһ едилмиш мәсиһчиләр һансы хүсуси тәрздә тәгдис олунублар? б) Башга гојунлар неҹә тәгдис, јә’ни мүгәддәс олурлар?
11 Башга гојунлар да јол вермәлидирләр ки, Аллаһын Кәламы вә мүгәддәс руһу онлары сафлашдырсын, јә’ни тәгдис етсин. Мәсһ едилмишләр артыг хүсуси тәрздә тәгдис олунублар, чүнки онлар, Мәсиһин ҝәлини олараг, салеһ вә мүгәддәс е’лан едилибләр (Јәһја 17:17; 1 Коринфлиләрә 6:11; Ефеслиләрә 5:23-27). Даниел пејғәмбәр онлары “Уҹа Оланын мүгәддәсләри” - “инсан оғлу” Иса Мәсиһин рәһбәрлији алтындакы Падшаһлығы мирас аланлар адландырыр (Даниел 7:13, 14, 18, 27). Һәлә гәдимдә, Муса илә Һарунун васитәсилә Јеһова Исраил халгына бәјан етмишди: “Аллаһыныз Рәбб мәнәм; вә өзүнүзү тәгдис един вә мүгәддәс олун; чүнки мән мүгәддәсәм” (Левилиләр 11:44).
12 “Тәгдис етмәк” сөзүнүн әсас мә’насы, “кими вә ја нәји исә мүгәддәс етмәк, Јеһова Аллаһа хидмәт етмәк үчүн ајырмаг; мүгәддәс, саф вә ја пак вәзијјәтә ҝәтирмәк” демәкдир. 1938-ҹи илдә “Ҝөзәтчи Гүлләси” журналында јазылырды ки, “Јонадаб”, јә’ни башга гојунлар “анламалыдыр ки, бөјүк издиһама дахил олмаг вә јер үзүндә јашамаг истәјән һәр бир кәсдән өзүнү Аллаһа һәср етмәк вә тәгдис олунмаг тәләб олунур”. Бөјүк издиһамы тәсвир едән “Вәһј” китабына әсасән, һәмин инсанлар “либасларыны јујуб, онлары Гузунун ганы илә ағартдылар” вә “Онун [Јеһова Аллаһын] мә’бәдиндә ҝеҹә-ҝүндүз Она хидмәт едирләр” (Вәһј 7:9, 14, 15). Аллаһын мүгәддәслик тәләбләринә мүвафиг олмаг үчүн, башга гојунлар мүгәддәс руһун көмәји илә әлләриндән ҝәләни едирләр (2 Коринфлиләрә 7:1).
Мәсиһин гардашларына хејирхаһлыг етмәк
13, 14. а) Исанын сөјләдији гојунлар вә кечиләр мәсәлинә әсасән, гојунларын хиласы нәдән асылыдыр? б) Сонун вахтында башга гојунлар Мәсиһин гардашларына неҹә јахшылыг едирләр?
13 “Дөврүн сону” һаггындакы пејғәмбәрлијә аид олан гојунлар вә кечиләр мәсәлиндә Иса Мәсиһ гејд етди ки, башга гојунлар илә кичик сүрү арасында гырылмаз телләр мөвҹуддур. Бу мәсәлдә Мәсиһ ајдын сурәтдә ҝөстәрди ки, башга гојунларын хиласы, Исанын “гардашларым” адландырдығы мәсһ едилмишләрә олан мүнасибәтләриндән асылыдыр. О деди: “Падшаһ, сағындакылара дејәҹәкдир: “Еј сизләр, Атамын мүбарәкләри, ҝәлин, дүнја јарандыгдан бәри сизин үчүн һазырланмыш олан Падшаһлығы мирас алын...” Доғрусун сизә дејирәм: Мадам ки, буну ән кичик гардашларымдан биринә етдиниз, Мәнә етмиш олдунуз” (Матта 24:3; 25:31-34 И-93, 40).
14 “Буну... етдиниз” ифадәси, Мәсиһин руһдан доғулмуш гардашларына мәһәббәтлә ҝөстәрилән көмәјә ишарә едир. Шејтанын рәһбәрлији алтында олан дүнја исә, Мәсиһин гардашларына бир јад кими јанашыр, һәтта онлардан бә’зиләрини һәбсханалара салыр. Мәсиһин гардашлары гидаја, палтара вә сәһһәтләри үчүн гајғы ҝөстәрилмәсинә еһтијаҹ дујурлар (Матта 25:35, 36). Сонун вахтында, мәсһ едилмиш гардашлардан бир чохунун 1914-ҹү илдән бәри бу ҹүр еһтијаҹлары олмушдур. Јеһованын Шаһидләринин мүасир тарихи ҝөстәрир ки, мәсһ едилмишләрин һәмкарлары олан башга гојунлар, Аллаһын мүгәддәс руһу илә һәрәкәтә ҝәтириләрәк, онлара һәмишә дәстәк олмушлар.
15, 16. а) Башга гојунлар јер үзүндәки мәсһ едилмиш гардашларына фәалијјәтин һансы нөвүндә хүсуси көмәклик ҝөстәрирләр? б) Мәсһ едилмишләр башга гојунлара өз миннәтдарлыгларыны неҹә билдирирләр?
15 Сонун вахтында башга гојунлар, Аллаһын вердији “Падшаһлыг һаггында олан” хош хәбәри “милләтләрин һамысына шәһадәт олараг бүтүн дүнјада” тәблиғ етмәк тапшырығынын јеринә јетирилмәсиндә Мәсиһин гардашларына хүсуси фәаллыгла көмәк едирләр (Матта 24:14, И-93; Јәһја 14:12). Мәсһ едилмиш мәсиһчиләрин сајы ҝет-ҝедә азалыр, башга гојунларын сајы исә чохалыр - артыг бир нечә милјона чатыб. Онлардан минләрлә мәсиһчиләр, Падшаһлыг һаггындакы хош хәбәри “дүнјанын ән узаг јерләринә гәдәр” јајараг, таммүддәтли тәблиғчиләр - пионер вә миссионерләр кими хидмәт едирләр (Һәвариләрин ишләри 1:8). Башгалары исә тәблиғ ишиндә баҹардыглары гәдәр иштирак едир вә бу ваҹиб ишә мадди ҹәһәтдән көмәклик ҝөстәрирләр.
16 Исанын мәсһ едилмиш гардашлары өз јолдашларынын - башга гојунларын бу ҹүр е’тибарлы көмәјини неҹә дә јүксәк гијмәтләндирирләр! Мәсһ едилмишләрин һисс-дујғулары, 1986-ҹы илдә садиг вә ағыллы гул тәрәфиндән нәшр едилмиш “Сүлһ Рәиси”нин рәһбәрлији алтында үмумдүнја тәһлүкәсизлији” китабында (инҝ.) ајдынҹа әкс олунур. Һәмин китабда дејилир: “Исанын, индики системин сона чатаҹағы һагда дедији пејғәмбәрлик, Икинҹи дүнја мүһарибәси дөврүндән әсас е’тибары илә “башга гојунлардан” ибарәт олан “бөјүк издиһамын” иҹра етдији иш сајәсиндә јеринә јетир... Буна ҝөрә дә биз, [Исанын] Матта 24:14 ајәсиндә олан пејғәмбәрлијинин һәјата кечирилмәсиндә ојнадығы сон дәрәҹә гијмәтли рола ҝөрә бејнәлхалг чохдилли “бөјүк издиһама” чох сағ ол дејирик!”(“Wорлдwиде Сеҹуритј Ундер тһе “Принҹе оф Пеаҹе”).
“Бизсиз камала чатмасынлар”
17. Аллаһын гәдимдә јашамыш вә јер үзүндә дирилдиләҹәк садиг хидмәтчиләри һансы мә’нада мәсһ едилмишләрин иштиракы олмадан “камала чатмајаҹаглар”?
17 Мәсһ едилмишләрдән бири олан һәвари Павел, Мәсиһдән габаг јер үзүндә јашајан садиг киши вә гадынлар һаггында јазырды: “Онларын һамысы иман сајәсиндә мүсбәт шәһадәт алдыглары һалда, вә’д едиләнә наил олмадылар; чүнки Аллаһ бизим [мәсһ едилмишләр] үчүн даһа јахшы шеј һазырламышдыр ки, онлар бизсиз камала чатмасынлар” (Ибраниләрә 11:35, 39, 40). Миниллик Падшаһлыг заманы Мәсиһ вә онун 144 000 мәсһ едилмиш гардашлары, фидијә гурбанлығынын хејир-дуаларыны јер үзүнә төкәрәк, ҝөјдә падшаһлар вә каһинләр кими фәалијјәт ҝөстәрәҹәкләр. Нәтиҹәдә, башга гојунлар бәдән вә зеһни ҹәһәтдән “камала чатаҹаглар” (Вәһј 22:1, 2).
18. а) Мүгәддәс Китаба әсасланан фактлар, башга гојунларын нәји анламаларына көмәк едир? б) Башга гојунлар, “Аллаһын оғулларынын зүһуруну” ҝөзләјәрәк нәјә үмид едирләр?
18 Башга гојунлар, Јунанҹа Мүгәддәс Јазыларда Мәсиһә вә онун мәсһ едилмиш гардашларына, һәмчинин Јеһованын нијјәтинин јеринә јетмәсиндә ојнадыглары әсас рола нәјә ҝөрә бу гәдәр чох диггәт јетирилдијини ајдын дәрк етмәлидирләр. Башга гојунлар буну анладыгда, мәсһ едилмишләрә, јә’ни “садиг вә ағыллы гула” һәр ҹүр көмәк ҝөстәрмәји шәрәф санырлар, һәмчинин Һар-Меҝидонда вә Мәсиһин Миниллик Падшаһлығында “Аллаһын оғулларынын зүһуруну” ҝөзләјирләр. Башга гојунлар үмид едирләр ки, “чүрүклүјә олан көләликдән азад олунуб Аллаһын өвладларынын иззәтли азадлығына” говушаҹаглар (Ромалылара 8:19-21).
Рәббин өлүмүнүн Хатирә Ҝеҹәсиндә руһун вәһдәти
19. “Һәгигәт Руһу” мәсһ едилмишләрә вә онларын һәмкарлары олан башга гојунлара неҹә тә’сир ҝөстәрди вә онлар мартын 28-дә хүсуси вәһдәти неҹә тәзаһүр етдирәҹәкләр?
19 Ерамызын 33-ҹү илинин 14 нисан ҝеҹәсиндә Иса Мәсиһ јекун дуасында деди: “Хаһиш едирәм ки, һамысы бир олсун; неҹә ки, еј Ата, Сән Мәндәсән вә Мән дә Сәндәјәм, онлар да Биздә олсунлар ки, Мәни Сән ҝөндәрдијинә дүнја иман етсин” (Јәһја 17:20, 21). Мәһәббәтдән ирәли ҝәләрәк, Аллаһ Оғлуну ҝөндәрди ки, о өз һәјатыны мәсһ едилмишләрин вә итаәткар бәшәријјәтин хиласы үчүн версин (1 Јәһја 2:2). “Һәгигәт Руһу” Мәсиһин гардашларыны вә онларын һәмкарлары олан башга гојунлары бирләшдирди. Мартын 28-дә ҝүнәшин батмасындан сонра мәсһ едилмишләр вә башга гојунлар, Мәсиһин өлүмүнүн Хатирә Ҝеҹәсини гејд етмәк вә Јеһованын өз севимли Оғлу Иса Мәсиһи гурбан вермәклә онлара етдији һәр шеји бир даһа хатырламаг үчүн бир јерә топлашаҹаглар. Гој бу ҝөрүшдә иштирак етмәк онларын вәһдәтини вә Аллаһын ирадәсини иҹра етмәк гәтијјәтләрини мөһкәмләндирсин, һәмчинин Јеһованын севдији кәсләр арасында олмагдан севинҹ дујдугларыны ҝөстәрсин.
Тәкрар үчүн суаллар
• “Һәгигәт Руһу” илк мәсиһчиләрә нә заман ҝөндәрилди вә бу руһ һансы мә’нада онларын тәсәлливериҹиси олду?
• Сәмави дә’вәтә малик олдугларыны мәсһ едилмишләр һарадан билирләр?
• Аллаһын руһу башга гојунлара һансы тәрздә тә’сир ҝөстәрир?
• Башга гојунлар Мәсиһин гардашларына неҹә хејирхаһлыг едирләр вә нәјә ҝөрә онлар мәсһ едилмишләрин иштиракы олмадан “камала чатмајаҹаглар?
[11-ҹи сәһифәдәки шәкил]
“Һәгигәт Руһу” Мәсиһин шаҝирдләринин үзәринә б. е. 33-ҹү илиндә төкүлдү.
[13-ҹү сәһифәдәки шәкилләр]
Башга гојунлар, Аллаһын тәблиғ етмәк тапшырығыны јеринә јетирмәкдә Мәсиһин гардашларына көмәк етмәклә онлара хејирхаһлыг ҝөстәрирләр.