Аллаһын нуру гаранлығы говур!
“Мәним гаранлығымы Рәбб ајдынладаҹагдыр” (2 САМУЕЛ 22:29).
1. Ишыг вә һәјат бир-бири илә неҹә әлагәлидир?
“АЛЛАҺ деди: “Гој ишыг олсун”. Ишыг олду” (Јарадылыш 1:3, МКШ). Дүнјанын јаранмасыны мүһүм сөзләрлә тәсвир едән “Јарадылыш” китабы шәһадәт едир ки, Јеһова ишыг мәнбәјидир вә ишыгсыз јер үзүндә һәјат мөвҹуд олмазды. Јеһова, һәмчинин инсана һәјат јолу ҝөстәрмәкдә зәрури олан руһани ишығын мәнбәјидир (Мәзмур 43:3). Давуд падшаһ, руһани ишыгла һәјатын ајрылмазлығыны гејд етмишдир: “Һәјатын гајнағы сәндәдир; Сәнин нурунла нур ҝөрүрүк” (Мәзмур 36:9).
2. Павелин сөзләринә ҝөрә, ишыг нә илә сых бағлыдыр?
2 Давудун падшаһлыг етдији вахтдан тәхминән 1 000 ил сонра, һәвари Павел јарадылышын тәсвиринә истинад едәрәк, Коринфдән олан мәсиһчиләрә јаздығы мәктубунда дејирди: “Гаранлыгдан ишыг парлајаҹагдыр”,- [демишдир] Аллаһ”. Павел, руһани ишығын Јеһовадан ҝәлән биликләрлә сых бағлы олдуғуну гејд едәрәк, фикрини давам етдирир: “Аллаһ үрәкләримизи ишыгландырды ки, Иса Мәсиһин симасында, Аллаһ иззәтини дәрк етмәк нуруна малик олаг” (2 Коринфлиләрә 4:6). Бу ишыг бизә неҹә ҝәлиб чатыр?
Мүгәддәс Китаб бизә ишыг ҝәтирир
3. Јеһова Мүгәддәс Китабын васитәсилә бизә һансы ишығы верир?
3 Јеһова бизә руһани ишығы әсас е’тибары илә өз Кәламынын - Мүгәддәс Китабын васитәсилә верир. Буна ҝөрә дә, биз Мүгәддәс Китабы тәдгиг едиб Аллаһдан билик аланда, бу Кәламда олан ишығын бизи ишыгландырмасына јол веририк. Јеһованын Мүгәддәс Китаб васитәсилә бизә вердији руһани ишығын сајәсиндә, Аллаһын нијјәтләрини вә Онун ирадәсини неҹә јеринә јетирмәји өјрәнирик. Бу бизим һәјатымыза мә’на верир вә руһани тәләбатларымызы өдәмәјә көмәк едир (Ваиз 12:1; Матта 5:3). Иса, Мусанын ганунуну ситат ҝәтирәрәк, сөјләди ки, биз руһани тәләбатларымызын гајғысына галмалыјыг. О деди: “Јазылмышдыр ки, “Инсан јалныз чөрәклә јашамаз, лакин Аллаһын ағзындан чыхан һәр бир сөзлә јашар” (Матта 4:4; Тәснијә 8:3).
4. Иса һансы мә’нада “дүнјанын Нурудур”?
4 Иса руһани ишыгла бирбаша әлагәлидир. О өзүнү “дүнјанын Нуру” адландырыб деди: “Мәним ардымҹа ҝәлән гаранлыгда јеримәјәҹәк вә онда һәјат нуру олаҹаг” (Јәһја 8:12). Бу сөзләр, Аллаһын һәгигәтләринин инсанлара ачылмасында Исанын апарыҹы рол ојнадығыны баша дүшмәјә көмәк едир. Әҝәр гаранлыгдан узаглашыб, Аллаһын нурунда јеримәк истәјириксә, Исанын дедикләринә - Мүгәддәс Китабда јазылан тә’лимләринә вә нүмунәсинә дәгиг риајәт етмәклә гулаг асмалыјыг.
5. Исанын өлүмүндән сонра онун давамчылары һансы тапшырығы јеринә јетирмәли идиләр?
5 Өлүмүндән бир нечә ҝүн габаг шаҝирдләри илә данышаркән, Иса јенидән өзү һаггында ишыг кими данышды: “Бир аз заман да нур сизин араныздадыр. Нурунуз вар икән јеријин ки, сизи зүлмәт тутмасын; она ҝөрә ки, зүлмәтдә јеријән һараја ҝетдијини билмәз. Нурунуз вар икән нура иман един ки, нур өвладлары оласыныз” (Јәһја 12:35, 36). Нур өвладлары оланлар, Мүгәддәс Китабдакы нүмунәви “сәһиһ сөзләри” өјрәнирдиләр (2 Тимотејә 1:13, 14). Сонра бу сәһиһ сөзләрлә башга сәмими инсанлары ҹәлб етмәјә чалышырдылар ки, онлары гаранлыгдан Аллаһын нуруна чыхарсынлар.
6. Ишыг вә гаранлыг һаггында 1 Јәһја 1:5 ајәсиндән һансы әсас һәгигәти өјрәнирик?
6 Һәвари Јәһја јазырды: “Аллаһ нурдур вә Онда һеч бир гаранлыг јохдур” (1 Јәһја 1:5). Нурла гаранлыг арасында олан зиддијәтә диггәт јетирин. Руһани нур Јеһовадан ҝәлир, руһани гаранлығын исә Она һеч бир аидијјәти јохдур. Бәс онда гаранлығын мәнбәји кимдир?
Руһани гаранлығын мәнбәји
7. Бүтүн дүнјада јајылан руһани гаранлығын мәнбәји кимдир вә о, инсанлара һансы тә’сири ҝөстәрир?
7 Һәвари Павел, “бу әсрин танрысы” ифадәсини јазаркән, Шејтан Иблиси нәзәрдә тутурду. Павелин сөзләринә ҝөрә, Шејтан “имансызларын зеһинләрини кор етмишдир ки, ҝөрүнмәз Аллаһын сурәти олан Мәсиһин иззәти һаггындакы Мүждәнин нуру онлары ајдынлатмасын” (2 Коринфлиләрә 4:4). Аллаһа инандыгларыны иддиа едән инсанларын чоху Иблисин мөвҹудлуғуна инанмыр. Нәјә ҝөрә? Онлар, дүшүнҹәләринә тә’сир ҝөстәрмәјә гадир олан ҝизли пис гүввәнин мөвҹуд олдуғуну е’тираф етмәк истәмирләр. Буна бахмајараг, Павелин гејд етдији кими, Иблис мөвҹуддур вә инсанлара елә тә’сир ҝөстәрир ки, онлар һәгигәт ишығыны ҝөрмүрләр. Шејтанын “бүтүн дүнјаны алдадан” олмасы һаггында сөјләнән пејғәмбәрлик сөзләри, онун инсанларын дүшүнҹәләринә тә’сир ҝөстәрмәк габилијјәтини тәсдиг едир (Вәһј 12:9). Шејтан бүтүн дүнјаја тә’сир ҝөстәрир, буна ҝөрә дә Јеһоваја хидмәт етмәјән инсанларын үзәриндә Ишајанын бу пејғәмбәрлији јеринә јетир: “Будур, дүнјаны гаранлыг вә үммәтләри зүлмәт өртәҹәк” (Ишаја 60:2).
8. Руһани гаранлыгда оланларын өз истигамәтләрини итирдикләрини нәдән ҝөрмәк олар?
8 Гаранлыгда нә исә ҝөрмәк чәтиндир. Бу заман асанлыгла азмаг вә јолдан сапмаг олар. Ејни тәрздә руһани гаранлыгда да, инсанын дәркетмә габилијјәти күтләшир вә руһани ҹәһәтдән истигамәти итирә билир. Һәгигәти јаландан, хејри шәрдән фәргләндирмәк габилијјәти итирилир. Бу ҹүр гаранлыгда олан инсанлар барәдә Ишаја пејғәмбәр дејирди: “Писә јахшы вә јахшыја пис дејәнләрин; гаранлығы ишыг јеринә вә ишығы гаранлыг јеринә гојанларын; аҹыны ширин јеринә вә ширини аҹы јеринә гојанларын вај башына!” (Ишаја 5:20). Руһани гаранлыгда јашајанлар гаранлыг танрысынын - Шејтан Иблисин тә’сири алтында олдугларына ҝөрә ишыг вә һәјат мәнбәјиндән мәһрум олублар (Ефеслиләрә 4:17-19).
Гаранлыгдан ишыға чыхмаг асан дејил
9. Изаһ един: һәгиги вә руһани гаранлыг ганунсузлары нәјә ҝөрә ҹәлб едир?
9 Аллаһын садиг хидмәтчиси Ејуб, ганунсуз инсанларын һәгиги гаранлыға ҹәлб олундугларына диггәт јетирмишди: “Зина едәнин ҝөзү дә ала гаранлығы ҝөзләр: Мәни ҝөз ҝөрмәз, дејәр; вә үзүнә өртүк гојар” (Ејуб 24:15). Бундан әлавә ганунсузлар, үзәрләриндә бүтүнлүклә һакимлик едән руһани гаранлыгда јашајырлар. Һәвари Павел дејирди ки, руһани гаранлығын тәләсинә дүшәнләр чох вахт ҹинси әхлагсызлыға, оғурлуға, сәрхошлуға вә зоракылыға ҹәлб олунурлар, онлара хәсислик вә аҹыдиллик дә хасдыр. Лакин Аллаһын Кәламынын нуруна јахынлашан һәр кәс дәјишилә биләр. Павел коринфлиләрә јаздығы мәктубунда бу ҹүр дәјишикликләрин мүмкүн олдуғуну ачыг билдирди. Вә Коринфдән олан бир чох мәсиһчиләрин әввәлләр гаранлығын ишләринә ҹәлб олундугларына бахмајараг, Павел онлар һаггында јазырды: “Лакин сиз тәмизләндиниз, тәгдис олундунуз вә Рәббимиз Иса Мәсиһин ады илә, Аллаһымызын Руһу илә бәраәт газандыныз” (1 Коринфлиләрә 6:9-11).
10, 11. а) Иса, ҝөзүнү ачдығы адама неҹә һәссаслыг ҝөстәрди? б) Нәјә ҝөрә бир чохлары ишыға доғру ҝетмәк истәмирләр?
10 Инсан зүлмәтдән ишыға чыханда, бир гајда олараг онун ҝөзләри ишыға алышмалыдыр. Бејтсајдада Иса кор бир адамын ҝөзләрини ачды, лакин буну еһтијатла вә тәдриҹән етди. “Корун әлиндән тутуб, кәнддән кәнара чыхартды. Ҝөзләринә түпүрүб, әлләрини үзәринә гојдуғу заман, ондан: “Бир шеј ҝөрүрсәнми?” - дејә сорушду. О, јухары бахыб, деди: “Адамлары, јеријән ағаҹлар кими ҝөрүрәм”. Сонра Иса әлләрини јенә онун ҝөзләри үзәринә гојду; кор диггәтлә бахды, сағалды вә һәр шеји ајдын ҝөрдү” (Марк 8:23-25). Еһтимал ки, Иса һәмин адамын ҝөзләрини она ҝөрә тәдриҹән ачды ки, о, парлаг ҝүнәш ишығына алыша билсин. Нәһајәт һәмин адамын ҝөзләри ачыланда, онун севинҹини тәсәввүр един!
11 Лакин руһани гаранлыгдан һәгигәт ишығына доғру аддым-аддым јеримәсинә көмәк едилән адамлар даһа бөјүк севинҹ һисси дујурлар. Биз онларын севинҹини ҝөрәндә, ишығын башгаларыны нәјә ҝөрә ҹәлб етмәдијинә тәәҹҹүб едирик. Иса бунун сәбәбини изаһ етмишдир: “Һөкм она ҝөрәдир ки, дүнјаја нур ҝәлди вә инсанлар гаранлығы нурдан чох севдиләр, чүнки әмәлләри пис иди. Һәр пислик едән, нура нифрәт едәр вә әмәлләри ашкара чыхмасын дејә нура доғру ҝетмәз. Чүнки әмәлләри писдир” (Јәһја 3:19, 20). Бәли, бир чохларына әхлагсыз һәјат тәрзи, башгаларына әзаб вермәк, јалан данышмаг, фырылдагчылыг вә оғурлуг етмәк хош ҝәлир. Буна ҝөрә дә, Шејтанын руһән гаранлыг дүнјасында истәдикләри кими јашамаг онлара чох раһатдыр.
Ишыг сајәсиндә инкишаф едирик
12. Јеһованын нуру бизә һансы фајданы ҝәтирмишдир?
12 Һәгигәт ишығына чыхдығымыз ҝүндән, өзүмүздә һансы дәјишикликләри ҝөрүрүк? Бә’зән ҝеријә бојланыб, әлдә етдијимиз руһани наилијјәтләр барәдә фикирләшмәк олар. Һансы пис вәрдишләрдән азад олмушуг? Һәјатымызда нәји јолуна гоја билмишик? Ҝәләҹәјә даир планларымыз неҹә дәјишилиб? Јеһованын вә мүгәддәс руһунун көмәји илә шәхсијјәтимизи вә дүшүнҹәмизи дәјишмәјә давам едә биләрик; бу исә, руһани ишығы гәбул едиб-етмәдијимизә шәһадәт едәҹәкдир (Ефеслиләрә 4:23, 24). Павел демишдир: “Чүнки бир заманлар гаранлыг идиниз, инди исә Рәббдә ишыгсыныз: ишыг өвладлары кими давранын, зира ишығын бәһрәси һәр ҹүр јахшылыг, салеһлик вә һәгигәтдир” (Ефеслиләрә 5:8, 9, И-93). Јеһованын ишығынын бизә рәһбәрлик етмәсинә јол верәрәк, үмид вә һәјатын мә’насыны әлдә едир, һәмчинин башгаларыны бәхтијар едирик. Биздә баш верән дәјишикликләр Јеһованын үрәјини неҹә дә севиндирир! (Сүлејманын мәсәлләри 27:11).
13. Нуруна ҝөрә Јеһоваја миннәтдарлығымызы неҹә ҝөстәрә биләрик вә бунун үчүн нә тәләб олунур?
13 Јеһованын нуруну әкс етдирәрәк даһа бәхтијар олмушуг вә буна ҝөрә миннәтдарлығымызы, Мүгәддәс Китабдан әлдә етдијимиз биликләри аиләмизин үзвләри, достларымыз вә гоншуларымызла бөлүшмәклә билдиририк (Матта 5:12-16; 24:14). Тәблиғимиз вә нүмунәви мәсиһчи давранышымыз, бизә гулаг асмаг истәмәјәнләри ифша едир. Павел изаһ едир: “Рәббә нәјин мәгбул олдуғуну өјрәнмәјә чалышын. Гаранлығын сәмәрәсиз ишләриндә иштирак етмәјин; әксинә, онлары ифша един” (Ефеслиләрә 5:10, 11). Башгаларынын гаранлыгдан узаглашыб, ишыға чыхмаларына көмәк етмәк үчүн, биздән ҹәсарәт тәләб олунур. Ән башлыҹасы исә, инсанлара шәфгәт вә гајғы тәзаһүр етдирмәлијик, һәмчинин әбәди хејир-дуалар ҝәтирән һәгигәт ишығыны онларла бөлүшмәјә сәмими истәјимиз олмалыдыр (Матта 28:19, 20).
Јалан аловлардан горунун
14. Нура даир һансы хәбәрдарлыға диггәт јетирмәлијик?
14 Ҝеҹә вахты ачыг дәниздә узун сүрән ҝәми сәфәриндән сонра, дәнизчиләр арзу едилән ишығы ҝөрмәк үчүн неҹә дә һәсрәт чәкирләр! Кечмиш дөврләрдә фыртына заманы, Инҝилтәрәнин саһилләриндә гајаларын үзәриндә ҝәмиләри тәһлүкәсиз јерә истигамәтләндирән оҹаглар галајырдылар. Дәнизчиләр, хилас ҝәтирән лимана јол ҝөстәрән бу ишыға ҝөрә чох миннәтдар идиләр. Лакин бә’зи аловлар алдадыҹы олурду. Онлар ҝәмиләри лимана дејил, саһилјаны гајаларын үзәринә истигамәтләндирирдиләр. Ҝәмиләр гәзаја уғрајыр, онларын јүкү исә гарәтчиләрин гәнимәти олурду. Алдадыҹы олан бу дүнјада еһтијатлы олмалыјыг ки, јалан аловлар бизи, руһани гәзаја уғратмасын. Мүгәддәс Китабда дејилир: “Иблис дә нур мәләји ҹилдинә ҝирәр”. Буна ҝөрә дә онун хидмәтчиләри, һәмчинин дөнүкләр “һијләҝәрликлә фәалијјәт” ҝөстәрир вә “салеһлик хидмәтчиләри ҹилдинә” ҝирирләр. Биз онларын јаланчы дәлилләрини динләјәриксә, Мүгәддәс Китабын Јеһованын һәгигәт Кәламы олдуғуна әминлијимиз бүдрәјәр вә иманымыз сөнә биләр (2 Коринфлиләрә 11:13-15; 1 Тимотејә 1:19).
15. Һәјата апаран јолдан сапмамагда бизә нә көмәк едәр?
15 Мәзмурчу јазырды: “Сөзүн аддымларым үчүн чыраг вә јолум үчүн ишыгдыр” (Мәзмур 119:105). Бизим мәһәббәтли Аллаһымыз Јеһова “истәјир ки, бүтүн инсанлар хилас олуб, һәгигәти дәрк етсинләр”, буна ҝөрә дә “һәјата апаран” дар гапыны ајдын ишыгландырыр (1 Тимотејә 2:4; Матта 7:14). Мүгәддәс Китабын өјүд-нәсиһәтләрини һәјатымызда тәтбиг едәрәк, дар јолдан гаранлыг јола кечмәјәҹәјик. Павел јазырды: “Һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр” (2 Тимотејә 3:16). Руһән инкишаф едәрәк, Аллаһын Кәламыны өјрәнир вә онун ишығында өзүмүзү тәкзиб едирик, әҝәр зәруридирсә јығынҹагдакы севән ағсаггаллар бизи тәкзиб едирләр. Ејни заманда, һәјата апаран јолдан сапмајаг дејә, биз ислаһ олунуб, һәлимликлә “салеһлик тәрбијәси” гәбул едә биләрик.
Нурда миннәтдарлыгла јеријин
16. Јеһованын ҝөзәл нуруна ҝөрә миннәтдарлығымызы неҹә ҝөстәрә биләрик?
16 Чох ҝөзәл нуруна ҝөрә Јеһоваја миннәтдарлығымызы неҹә билдирә биләрик? Јәһјанын Мүждәсинин 9-ҹу фәслиндә дејилир ки, Иса анаданҝәлмә кор адама шәфа верәндә, о, сәмими миннәтдарлығыны билдирмәјә тәшвиг олунду. Неҹә? О, Исаја Аллаһын Оғлу кими иман ҝәтирди вә онун пејғәмбәр олдуғуну ачыг е’тираф етди. Бундан әлавә, Исанын етдији мө’ҹүзәни дәјәрсиз етмәк истәјәнләрә гаршы ҹәсарәтлә чыхыш етди (Јәһја 9:17, 30-34). Һәвари Петер, мәсиһчи јығынҹағынын мәсһ едилмиш үзвләрини “Аллаһа мәхсус халг” адландырды. Нәјә ҝөрә? Чүнки Исанын сағалтдығы кор адамда олдуғу кими, онларда да миннәтдарлыг руһу вар. Мәсһ едилмиш мәсиһчиләр, һәр бир јахшы шејин Мәнбәјинин - онлары “гаранлыгдан Өз валеһедиҹи нуруна Чағыран” Јеһованын ҝөзәл хүсусијјәтләрини тәблиғ етмәклә, Она өз миннәтдарлыгларыны билдирирләр (1 Петер 2:9; Колослулара 1:13). Јердә јашамаг үмиди олан инсанлар да буна бәнзәр миннәтдарлыг руһуну тәзаһүр етдирир вә Јеһованын ҝөзәл хүсусијјәтләрини халг гаршысында тәблиғ етмәклә, мәсһ едилмиш гардашларына дәстәк олурлар. Аллаһ, гејри-камил инсанлара неҹә дә ҝөзәл имкан верир!
17, 18. а) Һәр бир адам нә етмәлидир? б) Һәр биримиз Тимотеји нәдә тәглид етмәлијик?
17 Һәгигәт нуруну үрәкдән гијмәтләндирмәк ваҹибдир. Ахы бизләрдән һеч биримиз һәгигәт билији илә доғулмамышдыр. Бә’зиләри һәгигәти артыг јеткин чағларында өјрәнир вә нурун гаранлыг үзәриндәки үстүнлүјүнү дәрһал һисс едирләр. Кимләрә исә Аллаһ јолунда олан аиләдә тәрбијә алмаг нәсиб олмушдур. Бөјүдүкҹә белә инсанлар һәгигәти ади һал кими гәбул едирләр. Валидејнләри һәлә о доғулмамышдан габаг Јеһоваја хидмәт едән бир Шаһид гыз, ушаглыгдан билдији һәгигәтин ваҹиблијини, һәмчинин әһәмијјәтини дәрк етмәк үчүн узун мүддәт вә чох гүввә тәләб олундуғуну е’тираф етди (2 Тимотејә 3:15). Бизим һамымыз - ҹаванлар вә јашлылар - Јеһованын бизә ачдығы һәгигәтә ҝөрә дәрин миннәтдарлыг һисси инкишаф етдирмәлијик.
18 Ҝәнҹ Тимотеј “Мүгәддәс Јазылары... ушаглыгдан е’тибарән” билирди, лакин мәһз Аллаһа хидмәтинин сајәсиндә јеткин мәсиһчи ола билди (2 Тимотејә 3:15). Бу хидмәт ону һәвари Павеллә әмәкдашлыға һазырлады. Павел она өјүд верирди: “Чалыш ки, өзүнү Аллаһа сынагдан чыхмыш, утанмаға әсасы олмајан вә һәгигәт сөзүнү доғрулугла өјрәдән бир ишчи кими тәгдим едәсән”. Ҝәлин, Тимотеји тәглид едәрәк елә давранаг ки, утанмаға әсасымыз олмасын вә Јеһова да бизә ҝөрә утанмасын! (2 Тимотејә 2:15).
19. а) Давуд падшаһ кими, нәји етмәјә там әсасымыз вар? б) Нөвбәти мәгаләдә нәји мүзакирә едәҹәјик?
19 Бизә һәгигәт нуруну ачан Јеһоваја иззәт вермәјә һәр бир әсасымыз вар. Давуд падшаһ кими, биз дә дејирик: “Чырағым сәнсән, ја Рәбб; вә мәним гаранлығымы Рәбб ајдынладаҹагдыр” (2 Самуел 22:29). Лакин Аллаһын бизи чыхартдығы гаранлыға јенидән дүшмәмәк үчүн, мәғрурлуг һиссини инкишаф етдирмәмәлијик. Буна ҝөрә дә нөвбәти мәгалә, Аллаһын һәгигәтинин бизим үчүн нә гәдәр ваҹиб олдуғуну гијмәтләндирмәкдә көмәк едәҹәкдир.
Тәкрар үчүн суаллар
• Јеһова бизи руһани ҹәһәтдән неҹә маарифләндирир?
• Дүнја руһани гаранлыгда олдуғу үчүн, биз һансы чәтинликләрлә гаршылашырыг?
• Һансы тәһлүкәләрдән гачынмалыјыг?
• Һәгигәт нуруна ҝөрә өз миннәтдарлығымызы һансы тәрздә ҝөстәрә биләрик?
[23-ҹү сәһифәдәки шәкил]
Јеһова физики вә руһани ишығын мәнбәјидир.
[25-ҹи сәһифәдәки шәкил]
Шејтанын јалан аловлары руһани гәзаја уғрадыр.