Тәнһалыға галиб ҝәлә биләрсән

ЕҺТИМАЛ КИ, һәр кәс бир дәфә дә олса, тәнһалығын аҹысыны дујмушдур. Чох сәбәбләрдән өзүнү тәнһа һисс етмәк олар. Лакин адәтән тәнһалығы, субај, дул вә бошанмыш гадынлар даһа кәскин сурәтдә дујурлар.

Мисал үчүн, Френсис адлы ҝәнҹ мәсиһчи гадын дејир: “Мәним 23 јашым тамам олана гәдәр, бүтүн рәфигәләрим әрә ҝетдиләр, мән исә, санки тәк галдым”a. Илләр өтдүкҹә, аилә гурмаг шансы азаланда, тәнһалыг һисси арта биләр. Артыг 40-дан јухары јашы олан Сандра е’тираф едир: “Һеч заман һәјатым боју субај галмаг фикрим олмајыб вә әввәлки кими үмид едирәм ки, имкан јаранан кими әрә ҝедәҹәјәм”. Јашы 50-ни өтмүш Анжела дејир: “Һеч заман гаршыма субај галмаг мәгсәдини гојмамышдым, садәҹә олараг белә алынды. Хүсуси пионер кими тә’јин олундуғум әразидә субај гардашлар чох аз иди”.

Јеһованын “јалныз... Рәббә бағлы” олан шәхслә аилә гурмаг тапшырығына сәдагәтлә риајәт едиб субај галдыгларына ҝөрә, бир чох мәсиһчи гадынлар һөрмәтә лајигдирләр (1 Коринфлиләрә 7:39). Бә’зиләри илләр өтдүкҹә аилә вә ушаглар барәдә даһа чох дүшүндүкләри һалда, диҝәрләри субајлыгларындан даһа чох фајдаланмағы өјрәнмишләр. Сандра дејир: “Јанымда һәјат јолдашым олмадығындан, даима өзүмдә гәлб бошлуғу һисс едирәм”.

Јашлы валидејнләрә гуллуг етмәк кими башга шәраитләр дә тәнһалыг һиссини ҝүҹләндирә биләр. Сандра изаһ едир: “Аиләдә алты ушаг олсаг да, баҹы-гардашларымын һамысы елә дүшүнүрләр ки, аиләм олмадығындан јашлы валидејнләримизин гајғысына мән галмалыјам. Артыг 20 илдир ки, бу вәзифә мәним үзәримдәдир. Әрим олсајды, мәнә көмәк едәрди вә һәр шеј хејли башга ҹүр оларды”.

Френсисин сөзләриндән ҝөрүнүр ки, тәнһалыг һиссини ҝүҹләндирән башга сәбәб дә вар. О дејир: “Бә’зән мәндән бирбаша сорушурлар: “Нәјә ҝөрә индијәдәк әрә ҝетмәмисән?” Бу ҹүр сөзләрдән сонра мәнә елә ҝәлир ки, тәнһа галмағымда ҝүнаһкар өзүмәм. Киминсә тојунда олурамса, мүтләг сорушурлар: “Бәс сән нә вахт әрә ҝедәҹәксән?” О заман мәндә белә фикирләр јараныр: “Әҝәр руһән јеткин гардашлар мәнимлә марагланмырларса, демәк мәндә һансыса мәсиһчи кејфијјәтләри чатышмыр, јахуд да садәҹә олараг ҹазибәдар дејиләм”.

Тәнһалыг һисси илә неҹә мүбаризә апармалы? Башгалары бу ишдә көмәк едә биләрләрми?

Јеһоваја бел бағла

Мәзмурчу јазырды: “Јүкүнү Рәббә бурах вә о сәнә дәстәк олар; салеһи әсла сарсылмаға бурахмаз” (Мәзмур 55:22). Бу ајәдә “јүк” кими истифадә олунан јәһуди сөзү һәрфи мә’нада “агибәт” демәкдир, јә’ни бизим пајымыза дүшән бүтүн гајғылар вә һәјәҹанлар нәзәрдә тутулур. Јеһова, чәкдијимиз гајғыларын јүкүнү һамыдан јахшы билир вә бу јүкү дашымагда бизә көмәк едир. Анжела мәһз Јеһова Аллаһа бел бағладығы үчүн үрәјиндәки тәнһалыг һиссини гова билир. Онун сөјләдикләринә диггәт јетирин: “Таммүддәтли хидмәтә башлајанда, хидмәт јолдашымла мән јығынҹагдан чох узагда јашајырдыг. Биз, Јеһоваја бүтүнлүклә бел бағламағы өјрәндик, бу исә мәнә индијәдәк көмәк едир. Мә’јуслуг мәнә ҝүҹ ҝәләндә, һиссләрими Јеһова илә бөлүшүрәм, О да мәнә дәстәк олур. Мәзмурун 23-ҹү фәслиндәки сөзләр мәнә чох тәсәлли верир вә мән ону тез-тез охујурам”.

Һәвари Павел аз чәтинликләрлә гаршылашмамышды. Рәббә ән азы үч дәфә јалвармышды ки, бәдәниндәки нештәри ондан узаглашдырсын. Аллаһ, Павели изтираблардан мө’ҹүзә васитәсилә гуртармаса да, она өз мәрһәмәти илә көмәк едәҹәјини вә’д етмишди (2 Коринфлиләрә 12:7-9). Павел һәмчинин һәјатда мәмнунлуға наил олмағын үсулуну да өјрәнди. О, сонрадан јазырды: “Һәр шејдә вә һәр шәраитдә тох олуб аҹ галмаг, фираван јашајыб еһтијаҹ дујмаг сиррини өјрәнмишәм. Мәни Мөһкәмләндирән васитәсилә һәр шеји етмәјә гадирәм” (Филипилиләрә 4:12, 13, И-93).

Мә’јуслуг вә ја тәнһалыг һисси сизи үстәләјәндә, Јеһованын көмәјини неҹә әлдә едә биләрсиниз? Павел јазырды: “Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр” (Филипилиләрә 4:6, 7). Павелин мәсләһәти Сандраја чох көмәк етди. О дејир: “Аиләм олмадығы үчүн чох вахт тәк олурам. Бу исә, Јеһоваја дуа етмәк үчүн ҝөзәл имкандыр. Јеһованын даима јанымда олдуғуну һисс едир, севинҹ вә һәјәҹанымы Онунла бөлүшүрәм”. Френсис исә дејир: “Даима мәнфи фикирләрлә мүбаризә апармалы олурам. Белә олдугда үрәјими Јеһоваја ачыр, бунунла да раһатлыг дујурам. Әминәм ки, Јеһова мәним руһани вә мә’нәви вәзијјәтимә е’тинасыз јанашмыр” (1 Тимотејә 5:5).

“Бир-биринизин јүкләрини дашыјын”

Мәсиһчиләр арасында, “јүкләрини” тәнһа дашымаг дүзҝүн сајылмыр. Һәвари Павел тәшвиг едир: “Бир-биринизин јүкләрини дашыјын вә Мәсиһин Ганунуну бу јолла иҹра един” (Галатијалылара 6:2). Һәмиманлыларымыз бизи “хош сөзлә” руһландыра биләр, бунун сајәсиндә исә тәнһалыг бизә аз әзијјәт верәр (Сүлејманын мәсәлләри 12:25, МКШ).

Мүгәддәс Јазыларда, Исраилин һакими олан Јефтаһын гызы һаггында јазыланлары да хатырлајаг. Аммон оғулларына галиб ҝәлмәздән әввәл, Јефтаһ, евинин гапысындан биринҹи нә чыхарса Јеһоваја верәҹәјини сөз вермишди. Јефтаһын гаршысына биринҹи гызы чыхды (Һакимләр 11:30, 31, 34-36). Бу онун үчүн өмрү боју субај галмаг вә аилә гурмаг кими тәбии һиссләрдән имтина етмәк мә’насыны дашыса да, атасынын вердији сөзү јеринә јетирмәјә вә өмрүнүн сонунадәк Шилодакы мә’бәддә хидмәт етмәјә һазырлыгла разы олду. Онун фәдакарлығы нәзәрдән јајынмады. “Илдән илә Исраил гызлары Ҝилеадлы Јефтаһын гызы үчүн дөрд ҝүн јас тутмаға [“гызыны дөрд ҝүн мәдһ етмәјә”, ЈД] ҝедәрдиләр” (Һакимләр 11:40). Бәли, тә’риф сөзләри ҝүҹ верә биләр. Буна ҝөрә дә, ҝәлин лајиг олан шәхсләри тә’рифләмәји унутмајаг.

Биз Иса Мәсиһин нүмунәсиндән дә чох шеј өјрәнә биләрик. Јәһудиләр арасында кишинин гадынла үнсијјәтдә олмасы гәбаһәт сајылырды, буна бахмајараг Иса Мәрјәм вә Марта илә достлуг әлагәси сахлајырды. Еһтимал ки, онлар ја дул, ја да субај идиләр. Иса истәјирди ки, онунла үнсијјәтдә олмалары сајәсиндә бу гадынларын һәр икиси руһән варланмаг имканына малик олсунлар (Лука 10:38-42). Исанын нүмунәси бизим үчүн дә ибрәтвериҹидир. Биз, субај баҹылары достлуг ҝөрүшләринә дә’вәт едә вә онларла тәблиғ хидмәтиндә әмәкдашлыг едә биләрик (Ромалылара 12:13). Онлар белә диггәти гијмәтләндирирләрми? Бир баҹы демишдир: “Гардашларын мәни севдикләрини вә гијмәтләндирдикләрини билирәм, лакин ҝөстәрдикләри шәхси мараға ҝөрә онлара хүсусилә миннәтдарам”.

Сандра дејир: “Биз субај баҹыларын јанында јахын адамымыз јохдур, буна ҝөрә дә, севилдијимизә вә өзүмүзү мәсиһчи аиләсинин үзвләри һесаб етмәјә башгаларындан даһа чох еһтијаҹ дујуруг”. Сөзсүз ки, Јеһова субајларын гајғысына галыр, лакин өз тәрәфимиздән биз дә онлары мәһәббәт вә диггәтимизлә әһатә етмәлијик (1 Петер 5:6, 7). Сә’јләримизә хејир-дуа вериләҹәкдир, чүнки “касыба сәхавәт ҝөстәрән санки Рәббә борҹ верәр, чүнки онун әвәзи Рәбдән ҝәләр” (Сүлејманын мәсәлләри 19:17, МКШ).

“Һәр кәс өз мәс’улијјәтинин јүкүнү дашыјаҹагдыр”

Башгаларынын көмәји вә бизә дәстәк олмалары тә’сиредиҹи вә гијмәтли олса да, “һәр кәс өз мәс’улијјәтинин јүкүнү дашыјаҹагдыр” (Галатијалылара 6:5). Тәнһалыг јүкүнү дашыјаркән, бә’зи тәһлүкәләр барәсиндә унутмамалыјыг. Мәсәлән, өзүмүзә гапыларыгса, тәнһалыг бизи асанлыгла сындыра биләр. Лакин мәһәббәт тәзаһүр етдирмәклә тәнһалыға галиб ҝәлә биләрик (1 Коринфлиләрә 13:7, 8). Һансы шәраитләрдә олсаг да, хошбәхтлик әлдә етмәјин ән доғру јолу - башгаларына хидмәт етмәкдир (Һәвариләрин ишләри 20:35). Таммүддәтли хидмәт едән бир баҹы дејир: “Тәнһалығым һаггында дүшүнмәјә вахтым јохдур. Зәрури вә лазыми ишлә мәшғул олдуғум үчүн тәнһалығымы садәҹә олараг һисс етмирәм”.

Һәмчинин диггәт јетирмәк лазымдыр ки, тәнһалыгдан гачынмаг ҹәһди, бизи дүшүнҹәсиз тәрздә достлар сечмәјә тәшвиг етмәсин. Мәсәлән, аилә гурмаг үчүн гызғын еһтирас уҹбатындан, мүтләг јаранаҹаг проблемләрә ҝөз јумараг вә Мүгәддәс Китабын хәбәрдарлығына е’тинасыз јанашараг, һәјатымызы иманымыза шәрик олмајан адамла бағламаг кәдәрли олмаздымы? (2 Коринфлиләрә 6:14). Әриндән бошанмыш бир мәсиһчи гадын дејир: “Мүвәффәгијјәтсизликлә әрә ҝетмәкдәнсә, субај галмаг даһа јахшыдыр”.

Һал-һазырда бу вә ја диҝәр проблеми һәлл етмәк мүмкүн дејилсә, онун өһдәсиндән ҝәлмәји өјрәнмәк лазымдыр. Аллаһын көмәји илә тәнһалыг һиссинә таб ҝәтирмәк олар. Јеһоваја хидмәтимизи давам етдирәрәк, Онун бизим бүтүн еһтијаҹларымызы тә’мин едәҹәјинә шүбһә етмәјә биләрик (Мәзмур 145:16).

[Һашијә]

[32-ҹи сәһифәдәки шәкилләр]

Башгаларына мәһәббәт тәзаһүр етдирмәклә, тәнһалыға галиб ҝәлмәк олар.