Аллаһын принсипләрини әлдә рәһбәр тутун
“Фајдалы оланы сәнә өјрәдән [Јеһовадыр]” (ИШАЈА 48:17).
1. Јарадан инсанлара неҹә рәһбәрлик едир?
КАИНАТЫН сирләрини ачмаға ҹан атан алимләр, бизи әһатә едән дүнјанын нә дәрәҹәдә ҝүҹлү енержијә малик олдуғуна һәлә дә валеһ олурлар. Орта һәҹмли улдуз һесаб олунан Ҝүнәш, “100 милјард һидроҝен бомбасы” партлајан заман ајрылан енержини бир санијәдә һасил едир. Бу ҹүр валеһедиҹи ҝөј ҹисимләрини идарә етмәк үчүн, Јарадан бөјүк гүввәсиндән истифадә едир (Ејуб 38:32; Ишаја 40:26). Бәс ирадә азадлығы, мә’нәвијјат һиссләри, ағыл вә руһани шејләри анламаг баҹарығы верилән биз инсанлара рәһбәрлик етмәк үчүн Јарадан һансы үсулу сечиб? О, бизә, рәһбәрлик үчүн өз камил ганунларыны вә јүксәк принсипләрини, һәмчинин чох һәссас ола билән виҹданы мәһәббәтлә вериб (2 Самуел 22:31; Ромалылара 2:14, 15).
2, 3. Аллаһы һансы итаәткарлыг севиндирир?
2 Аллаһ, шүурлу мәхлугларын көнүллү сурәтдә итаәт етмәләринә севинир (Сүлејманын мәсәлләри 27:11). Јеһова бизи кортәбии сурәтдә Өзүнә табе етдирмәк үчүн роботлар кими програмлашдырмаг әвәзинә, там мә’лумат әлдә едәрәк дүзҝүн јолу сечә билмәмиз үчүн, бизә ирадә азадлығы вериб (Ибраниләрә 5:14).
3 Атасынын шәхсијјәтини мүкәммәл сурәтдә әкс етдирән Иса Мәсиһ шаҝирдләринә деди: “Әҝәр сизә әмр етдијим шејләрә әмәл етсәниз, Мәним достларымсыныз. Артыг сизә гул демирәм” (Јәһја 15:14, 15). Гәдим заманларда, гулун өз ағасынын әмрләринә табе олмагдан башга чарәси јох иди. Инсанлар арасындакы достлуг мүнасибәтләри исә, бир-бирләринин үрәјинә тохунаҹаг кејфијјәтләр тәзаһүр етдирән заман јараныр. Беләликлә, биз Јеһованын да досту ола биләрик (Јагуб 2:23). Бу достлуг гаршылыглы мәһәббәтлә мөһкәмләнир. Иса, Аллаһа итаәткарлыгла мәһәббәт арасында бағлылыг олдуғуну ҝөстәрди: “Ким Мәни севәрсә, сөзүмә риајәт едәр; вә Атам ону севәр” (Јәһја 14:23). Јеһова бизи севдији вә е’тибарлы рәһбәрлик вермәк истәдији үчүн, өз принсипләринә әсасән јашамаға дә’вәт едир.
Аллаһын принсипләри
4. Сиз принсипи неҹә изаһ едәрдиниз?
4 Принсип нәдир? “Азәрбајҹан дилинин изаһлы лүғәтиндә” “принсип” сөзү белә изаһ олунур: “Мүәјјән нәзәријјәнин, тә’лимин, әгидәнин, елмин вә с.-нин әсас мүддәасы, чыхыш нөгтәси. Мүәјјән ишдә рәһбәр идеја, әсас истигамәт, ҝөзләнилмәли шәрт”. Мүгәддәс Китабы дәгиг тәдгиг етмәјимиз сајәсиндә өјрәнирик ки, сәмави Атамыз мүхтәлиф вәзијјәтләрә вә һәјатын ајры-ајры саһәләринә аид олан принсипләр тәгдим едиб. Ајдындыр ки, Јеһова бизим әбәди фираванлығымызын гејдинә галыр. Бу, мүдрик падшаһ Сүлејманын дедији сөзләрә ујғун ҝәлир: “Динлә оғлум вә сөзләрими ал; вә өмрүнүн илләри чох олаҹагдыр. Һикмәт јолунда сәнә тә’лим вердим; доғрулуг јолларында сәни јеритдим” (Сүлејманын мәсәлләри 4:10, 11). Јеһованын вердији әсас принсипләр Онунла вә јахынларымызла олан гаршылыглы мүнасибәтләримизә, һәмчинин ибадәтимизә вә ҝүндәлик һәјатымыза аиддир (Мәзмур 1:1). Ҝәлин әсас принсипләрдән бә’зиләрини нәзәрдән кечирәк.
5. Әсас принсипләрдән бә’зиләрини нүмунә ҝәтирин.
5 Јеһова илә гаршылыглы мүнасибәтимиз барәдә Иса демишдир: “Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев” (Матта 22:37). Бундан әлавә, инсанларла мүнасибәтимизә аид олан, мәсәлән, “гызыл ганун” кими принсипимиз дә вар: “Буна ҝөрә, инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един” (Матта 7:12; Галатијалылара 6:10; Титуса 3:2). Ибадәтимизә даир Мүгәддәс Китабда мәсләһәт верилир: “Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг... јығынҹагларымызы тәрк етмәјәк“ (Ибраниләрә 10:24, 25). Ҝүндәлик һәјатымыз барәдә исә Павел јазырды: “Јејирсинизсә, ичирсинизсә, нә едирсинизсә һәр шеји Аллаһын иззәти үчүн един” (1 Коринфлиләрә 10:31). Амма Аллаһын Кәламына сајсыз-һесабсыз башга принсипләр дә дахилдир.
6. Принсипләр ганунлардан нә илә фәргләнир?
6 Принсипләр — һәјати ваҹиб, ән мүһүм һәгигәтләри тәшкил едир, мүдрик мәсиһчиләр исә һәмин принсипләри севмәји өјрәнирләр. Јеһовадан илһам алан Сүлејман јазмышдыр: “Оғлум, сөзләримә диггәт ет; дедикләримә гулағыны әј. Онлар ҝөзләринин өнүндән ајрылмасынлар; онлары үрәјинин ичиндә сахла. Чүнки онлары тапанлар үчүн һәјат вә бүтүн бәдәнләри үчүн шәфадырлар” (Сүлејманын мәсәлләри 4:20-22). Принсипләр ганунлардан нә илә фәргләнир? Принсипләр ганунларын әсасыны тәшкил едир. Адәтән конкрет вә јалныз мүәјјән вахтда, јахуд конкрет вәзијјәтдә тәтбиг едилән гајда вә ганунлардан фәргли олараг, принсипләр өтүб-кечмәјәндир (Мәзмур 119:111). Аллаһын принсипләри көһнәлиб јох олмур. Пејғәмбәр Ишајанын Аллаһдан илһам алмыш сөзләри буну тәсдиг едир: “От гурујар, чичәк солар; фәгәт Аллаһымызын сөзү әбәдијјән дурар” (Ишаја 40:8).
Дүшүнҹә вә әмәлләриниздә принсипләри әлдә рәһбәр тутун
7. Аллаһын Кәламы бизи, дүшүнҹә вә әмәлләримиздә принсипләри әлдә рәһбәр тутмаға неҹә тәшвиг едир?
7 “Аллаһымызын Кәламы” бизи дәфәләрлә тәшвиг едир ки, дүшүнҹә вә әмәлләримиздә Онун принсипләрини әлдә рәһбәр тутаг. Исадан Ганунун мәғзини сорушанда, о, ики әмри гејд етди: биринҹиси Јеһованы, икинҹиси исә јахынларымызы севмәјә тәшвиг едирди (Матта 22:37-40). Иса, биринҹи әмри Мусаја верилән ганунун гыса иҹмалындан, Тәснијә 6:4, 5 ајәләрини ситат ҝәтирди: “Аллаһымыз Рәбб бир олан Рәбдир; вә Аллаһын Рәбби бүтүн үрәјинлә вә бүтүн ҹанынла вә бүтүн гүввәтинлә севәҹәксән”. Ола билсин, Иса, һәмчинин Левилиләр 19:18 ајәсиндә олан әмрә дә истинад етмишдир. Сүлејман падшаһ “Ваиз” китабынын сон сөзләриндә ајдын вә јығҹам шәкилдә Аллаһын чохсајлы ганунларына јекун вурараг, деди: “Ишин сону будур; һәр шеј ешидилди: Аллаһдан горх вә онун әмрләрини тут; чүнки инсанын бүтүн вәзифәси будур. Чүнки јахшы олсун пис олсун, һәр ҝизли шејлә бәрабәр һәр иши Аллаһ һөкмә ҝәтирәҹәкдир” (Ваиз 12:13, 14; Мика 6:8).
8. Мүгәддәс Китабын әсас принсипләрини дәриндән анламаг нәјә ҝөрә мүдафиәдир?
8 Әҝәр әсас принсипләри јахшы гаврамышыгса, даһа конкрет ҝөстәришләри анламаг вә тәтбиг етмәк бизә асан олаҹаг. Амма бу ҹүр принсипләри өзүмүз үчүн ајырд етмәмишиксә, чәтинликләри мүдрик јолла һәлл етмәји вә сынагларда иманымызы мөһкәм сахламағы, чәтин ки, баҹараг (Ефеслиләрә 4:14). Аллаһын ганунлары дүшүнҹә вә үрәјимиздә көк саларса, дүзҝүн гәрар гәбул етмәк бизим үчүн асан олаҹаг. Принсипләри дәрракә илә тәтбиг етмәклә мүвәффәгијјәтләрә наил олаҹағыг (Јешу 1:8; Сүлејманын мәсәлләри 4:1-9).
9. Мүгәддәс Китаб принсипләрини анламаг вә тәтбиг етмәк нәјә ҝөрә һәмишә асан олмур?
9 Мүгәддәс Китаб принсипләрини анламаг вә тәтбиг етмәк, ганунлар күллијјатына әмәл етмәкдән чәтиндир. Гејри-камил олан бизләр, принсипләр үзәриндә дүшүнмәк гүввә тәләб етдији үчүн, бу иши хошламаја биләрик. Гәрар гәбул етмәли олдугда вә ја чәтин вәзијјәтлә гаршылашдыгда, јәгин ки, биз, һәр һансы бир конкрет гајданын олмасыны үстүн тутардыг. Бә’зән вәзијјәтимиздә тәтбиг олуна билән мәсләһәти алмаг үчүн, јеткин мәсиһчијә, олсун ки, јығынҹағын ағсаггалына мүраҹиәт едирик. Мүгәддәс Китабда вә она әсасланан нәшрләрдә бизә мүнасиб конкрет мәсләһәт олмаја да биләр, һәтта бу ҹүр мәсләһәт олса белә, чәтин ки, һәмишә вә һәр јердә тәтбиг олунсун. Јәгин ки, бир нәфәрин Иса Мәсиһә олан хаһишини хатырлајырсыныз: “Мүәллим! Гардашыма де ки, мирасы мәнимлә бөлсүн”. Гардашлар арасындакы мүбаһисәни тезҹә һәлл етмәјин јолуну ҝөстәрмәк әвәзинә, Иса даһа чох үмуми принсип дашыјан мәсләһәт верди: “Диггәтли олун, һәр нөв тамаһкарлыгдан өзүнүзү сахлајын”. Исанын бу мәсләһәти, о заман олдуғу кими, инди дә фајдалыдыр (Лука 12:13-15).
10. Принсипләрә итаәткарлыг мәгсәдләримизи неҹә ашкар едир?
10 Еһтимал ки, сиз, анҹаг ҹәзадан горхдуглары үчүн ганунлара көнүлсүз табе олан кәсләри ҝөрмүсүнүз. Принсипләрә һөрмәт, бизи бу ҹүр әһвал-руһијјәдән горујур. Принсипләрин мәғзи, онлары әлдә рәһбәр тутанлары сидги-үрәкдән табе олмаға тәшвиг едир. Һәгигәтән дә, әксәр һалларда принсипин позулмасы дәрһал ҹәзаја ҝәтириб чыхармајаҹаг. Бунун сајәсиндә, Јеһоваја итаәткар олмағымызын вә мәгсәдләримизин сәбәби ашкар олур. Потифәрин арвадынын әхлагсыз тәклифини рәдд едән Јусифин нүмунәсини нәзәрдән кечирәк. Бахмајараг ки, о заман зина һаггында Аллаһын јазылы гануну јох иди вә јад гадынла ҹинси әлагәјә ҝөрә һеч бир ҹәза верилмирди, Јусиф әр-арвадлыг сәдагәтлилији барәдә олан принсипдән хәбәрдар иди (Тәквин 2:24; 12:18-20). Онун ҹавабындан ҝөрүндүјү кими, бу принсип она ҝүҹлү тә’сир бағышламышды: “Бәс мән неҹә бу бөјүк пислији едиб, Аллаһын өнүндә ҝүнаһа бата биләрәм?” (Јарадылыш 39:9, МКШ).
11. Мәсиһчиләр һәјатын һансы саһәләриндә Јеһованын принсипләрини әлдә рәһбәр тутурлар?
11 Бу ҝүн мәсиһчиләр достлар, әјләнҹә, мусиги вә әдәбијјат сечими кими шәхси мәсәләләрдә Јеһованын принсипләрини әлдә рәһбәр тутурлар (1 Коринфлиләрә 15:33; Филипилиләрә 4:8). Әҝәр биз билијимизи вә анлајышымызы, һәмчинин Јеһоваја вә Онун нормаларына гаршы мәһәббәт инкишаф етдиририксә, виҹданымыз, јә’ни мә’нәви ҹәһәтдән мәс’улијјәт һиссимиз һәр бир шәраитдә, һәтта тамамилә шәхси характер дашыјан мәсәләләрдә белә Аллаһын принсипләрини тәтбиг етмәјә көмәк едәҹәкдир. Мүгәддәс Китабын принсипләрини әлдә рәһбәр тутуругса, Аллаһын ганунларында “әл јери” ахтармајаҹаг вә ја һәр һансы бир гануну позмадан нә гәдәр узаг ҝетмәји баҹардыгларыны јохлајан кәсләри тәглид етмәјәҹәјик. Бу ҹүр дүшүнҹә тәрзинин ағылсыз вә зәрәрли олдуғуну баша дүшүрүк (Јагуб 1:22-25).
12. Аллаһын принсипләринә риајәт етмәјимизин әсас сәбәби нәдир?
12 Јеткин мәсиһчиләр дәрк едирләр ки, Јеһованын бу вә ја диҝәр мәсәләјә даир нөгтеји-нәзәрини билмәк истәји, Онун принсипләринә риајәт етмәјин әсасы олаҹагдыр. Мәзмурчу тәшвиг едир: “Рәбби севәнләр, шәрдән нифрәт един” (Мәзмур 97:10). Сүлејманын мәсәлләри 6:16-19 ајәләриндә Аллаһын пис һесаб етдији шејләр садаланыр: “Рәббин нифрәт етдији алты шеј вардыр вә ҹанына мәкруһ олан једди шеј вардыр: Јүксәк ҝөзләр, јаланчы дил вә сучсуз ганы төкән әлләр; пис дүшүнҹәләр гуран үрәк, пислијә гошулмаг үчүн тәләсән ајаглар, јаланла нәфәс алан јаланчы шаһид вә гардашлар арасына нифаг салан”. Јеһованын бу шејләрә даир нөгтеји-нәзәри һаггында дүшүнмәк истәји һәјатымызы истигамәтләндирирсә, Аллаһын принсипләринә риајәт етмәк вәрдишинә малик олаҹағыг (Јеремја 22:16).
Дүзҝүн мәгсәдләр зәруридир
13. Иса Дағүстү тәблиғиндә һансы дүшүнҹә тәрзинә тәшвиг етди?
13 Принсипләри билмәк вә тәтбиг етмәк, бизи һәмчинин сүн’и мө’минлик тәләсиндән горујаҹаг. Принсипләрә риајәт етмәклә, шәртсиз олараг гајдалара табе олмаг бир-бириндән фәргләнир. Бу фәрги Иса Дағүстү тәблиғиндә гејд етди (Матта 5:17-48). Онун динләјиҹиләри, Мусанын ганунуна әсасән јашамалы олан јәһудиләрдән ибарәт иди. Амма әслиндә онларын Ганун һаггында дүзҝүн тәсәввүрләри јох иди. Онлар Ганунунун руһуну дејил, һәрфини әсас тутурдулар. Һәмчинин, өз ән’әнәләринә даһа чох әһәмијјәт верәрәк, онлары Аллаһын тә’лимләриндән үстүн тутурдулар (Матта 12:9-12; 15:1-9). Нәтиҹә е’тибары илә, инсанлар үмумијјәтлә принсипләр әсасында дүшүнмәјә өјрәдилмәмишләр.
14. Иса давамчыларынын принсипләр әсасында дүшүнмәләринә неҹә көмәк етди?
14 Иса Дағүстү тәблиғинә, һәјатын беш саһәсинә тохунан мә’нәвијјат принсипләрини дахил етди. О, гәзәб, никаһ вә бошанмаг, вә’д етмәк, гисас алмаг, мәһәббәт вә нифрәт һаггында сөһбәт ачды. Һәр бир һадисәдә Иса принсипләрә риајәт етмәјин фајдасыны изаһ етди. О, бунунла давамчылары үчүн даһа јүксәк әхлаг нормалары тә’сис етди. Мәсәлән, зина һаггында данышаркән Иса тәкҹә јанлыш һәрәкәтдән дејил, һәмчинин бизи јанлыш дүшүнҹә вә арзулардан горујан принсип дә верди: “Бир гадына шәһвәтлә бахан һәр адам, артыг үрәјиндә онунла зина етмиш олур” (Матта 5:28).
15. Сахталыгдан неҹә гачынмаг олар?
15 Бу мисалдан ҝөрүнүр ки, биз Јеһованын принсипләринин мәгсәд вә мәғзини һеч заман нәзәрдән гачырмалы дејилик. Биз, һеч заман Аллаһын лүтфүнү ҝөздән пәрдә асмагла газанмаға чалышмалы дејилик. Аллаһын мәрһәмәт вә мәһәббәтинә диггәт јетирәрәк, Иса бу ҹүр дүшүнҹә тәрзинин јанлыш олдуғуну ҝөстәрди (Матта 12:7; Лука 6:1-11). Мүгәддәс Китабын принсипләринә риајәт едәрәк, Мүгәддәс Китабын тә’лимләринин чәрчивәсиндән кәнара чыхан узун сијаһыја әсасән јашамаға (вә ја башгаларынын белә јашамаларыны тәләб етмәјә) чалышмајаҹағыг. Бизи, сахта мө’минликдән даһа чох Аллаһа мәһәббәт вә итаәткарлыгла бағлы принсипләр марагландыраҹаг (Лука 11:42).
Принсипләрин тәтбиг едилмәсинин ҝәтирдији фајдалар
16. Мүгәддәс Китабын бә’зи ганунларына әсасланан принсипләри нүмунә ҝәтирин.
16 Јеһоваја табе олмаға чалышан бизләрә, Онун ганунларынын бә’зи әсас принсипләрә әсасландығыны анламаг ваҹибдир. Мәсәлән, бизә мә’лумдур ки, мәсиһчиләр бүтпәрәстликдән, әхлаг позғунлуғундан вә гандан дүзҝүн истифадә етмәмәкдән гачынмалыдырлар (Һәвариләрин ишләри 15:28, 29). Бәс бу мәсәләләрдә мәсиһчи мөвгејинин әсасыны тәшкил едән нәдир? Јеһова там сәдагәти тәләб едән гысганҹ Аллаһдыр; биз, һәјат јолдашымыза садиг галмалыјыг; Јеһова — Һәјатверәндир (Тәквин 2:24; Чыхыш 20:5; Мәзмур 36:9). Бу ҹүр принсипләри анламағын сајәсиндә, онлара әсасланан ганунлара әмәл етмәк асандыр.
17. Мүгәддәс Китаб принсипләрини анладыгда вә тәтбиг етдикдә һансы фајдалары һисс едирик?
17 Мүгәддәс Китабын принсипләрини анладыгда вә тәтбиг етдикдә, онларын бизә фајда ҝәтирдијини ҝөрүрүк. Аллаһын халгынын алдығы хејир-дуалар чох вахт там нәзәрә чарпан фајдаларла мүшајиәт олунур. Мәсәлән, сигарет чәкмәјән, әхлагҹа тәмиз һәјат сүрән вә ганын мүгәддәслијинә һөрмәт едән шәхс мүхтәлиф хәстәликләрдән горунур. Аллаһын һәгигәтинә мүвафиг јашајараг, еһтимал ки, игтисади вә иҹтимаи вәзијјәтимизи, һәмчинин аилә һәјатымызы јахшылашдыра биләрик. Бу ҹүр нәзәрә чарпан фајдалар Јеһованын вердији нормаларын гијмәтли вә әлверишли олдуғуну ҝөстәрир. Лакин бу фајдалар өзлүјүндә Аллаһын принсипләринә риајәт етмәјимизин башлыҹа сәбәби дејил. Мәсиһчиләр Јеһованы севдикләри үчүн Она табе олурлар, чүнки Јеһова онларын еһтирамына лајигдир вә буну етмәк дүзҝүндүр (Вәһј 4:11).
18. Мәсиһчи јолунда мүвәффәгијјәтләрә наил олмаг истәјириксә, нәји әлдә рәһбәр тутмалыјыг?
18 Мүгәддәс Китаб принсипләри сајәсиндә һәјатымыз јахшылашыр вә артыг бунун өзү инсанлары Аллаһын јолуна ҹәлб едә биләр. Башлыҹасы исә одур ки, бизим һәјат тәрзимиз Јеһоваја шәрәф ҝәтирәҹәк. Јеһованын бизим үчүн ән јахшы шејләри арзу едән гајғыкеш Аллаһ олдуғуну билирик. Мүгәддәс Китаб принсипләринә ујғун гәрар гәбул етдикдә вә Јеһованын бизә неҹә хејир-дуа вердијини ҝөрдүкдә, өзүмүзү Она даһа јахын һисс едирик. Бунунла да, сәмави Атамызла олан достлуг мүнасибәтимизи мөһкәмләдирик.
Јадыныздадырмы?
• Принсип нәдир?
• Принсипләр ганунлардан нә илә фәргләнир?
• Дүшүнҹә вә әмәлләримиздә принсипләри әлдә рәһбәр тутмаг нә үчүн фајдалыдыр?
[14-ҹү сәһифәдәки чәрчивә]
Гана Республикасындан олан мәсиһчи Уилсона, бир-нечә ҝүндән сонра ишдән азад едиләҹәјини билдирдиләр. Ахырынҹы иш ҝүнү она, фирма мүдиринин автомобилини јумағы тапшырдылар. Уилсон автомобилдән пул тапдыгда рәиси она деди ки, һәмин ҝүнү ишдән азад олунаҹағы үчүн, бу пулу она Аллаһ јетириб. Лакин дүзҝүнлүк принсипини тәтбиг едәрәк, Уилсон пулу фирманын мүдиринә гајтарды. Бу давраныш мүдирә ҝүҹлү тә’сир бағышлады вә о, Уилсона нәинки даими иш тәклиф етди, һәмчинин онун вәзифәсини дә јүксәлтди (Ефеслиләрә 4:28).
[15-ҹи сәһифәдәки чәрчивә]
Албанијада Руһијјә адлы 60 јашлы бир гадын јашајыр. О, аиләдә баш верән чәкишмәләр уҹбатындан 17 илдән артыг иди ки, гардашы илә данышмырды. Руһијјә Јеһованын Шаһидләри илә бирликдә Мүгәддәс Китабы өјрәнмәјә башлады вә мәсиһчиләрин кин бәсләмәдән башгалары илә сүлһ ичиндә јашамалы олдугларыны өјрәнди. Бу гадын бүтүн ҝеҹәни дуа етди вә бәрк үрәк дөјүнтүсү илә гардашынын евинә јолланды. Гапыны гардашынын гызы ачды. Руһијјәни ҝөрдүкдә, тәәҹҹүблә сорушду: “Нә олуб? Ким вәфат едиб? Нә үчүн ҝәлмисән?” Руһијјә гардашыны ҝөрмәк истәјини билдирди. О, сакитҹә изаһ етди ки, Мүгәддәс Китаб принсипләри вә Јеһова һаггында әлдә етдији биликләр ону гардашы илә барышмаға тәшвиг едиб. Ҝөз јашлары вә гуҹаглашмадан сонра, доғмалар барышығы гејд етдиләр (Ромалылара 12:17, 18).
[17-ҹи сәһифәдәки шәкил]
[17-ҹи сәһифәдәки шәкил]
[17-ҹи сәһифәдәки шәкил]
[17-ҹи сәһифәдәки шәкил]
“Иса издиһамы ҝөрүб даға чыхды; вә Өзү отурдугда, шаҝирдләри Онун јанына ҝәлдиләр. Вә О, сөз ачыб онлара белә өјүд верди” (МАТТА 5:1, 2).