Јеһованын ҝүнүндә кимләр сағ галаҹаг?

“О ҝүн ҝәлир, тәндир кими јаныр” (МАЛАКИ 4:1).

1. Малаки индики натәмиз дүнјанын мәһвини неҹә тәсвир едир?

МАЛАКИ пејғәмбәр Јеһовадан илһам алараг јахын ҝәләҹәкдә баш верәҹәк фөвгәладә һадисәләри тәсвир етди. Бу һадисәләр јер үзүндә јашајан һәр бир кәсә тохунаҹаг. Малаки 4:1 ајәсиндә дејилир: “Будур о ҝүн ҝәлир, тәндир кими јаныр; вә бүтүн тәкәббүрлүләр вә пислик ишләјәнләрин һамысы, саман олаҹаглар; вә ҝәлмәкдә олан ҝүн онлары јандыраҹаг, ордуларын Рәбби дејир, елә ки, онларда көк вә будаг бурахмајаҹаг”. Индики натәмиз дүнја неҹә мәһв олаҹаг? О, ағаҹын көкүндән мәһв олмасы илә мүгајисә едилир. Бу ҹүр ағаҹ бир даһа бөјүмәјәҹәк.

2. Мүгәддәс Китабын бә’зи ајәләриндә Јеһованын ҝүнү неҹә тәсвир олунур?

² Сән соруша биләрсән: “Малаки пејғәмбәр һансы “ҝүн” һаггында габагҹадан хәбәр верир?” Бу, Ишаја 13:9 ајәсиндә бәһс олунан һәмин ҝүндүр: “Мәмләкәти чөл етмәк үчүн вә онун ичиндән сучлу оланларыны һәлак етмәк үчүн, будур, Рәббин [“Јеһованын”, ЈД] ҝүнү, аҹымајан ҝүн, гәзәблә вә гызғын һиддәтлә ҝәлир”. Тсефанја 1:15 ајәсиндә белә бир тәсвир верилир: “О ҝүн гәзәб ҝүнүдүр, сыхынты вә мәшәггәт ҝүнү, харабалыг вә виранәлик ҝүнү, гаранлыг вә гаралты ҝүнү, булудлар вә гаты гаранлыг ҝүнү”.

“Бөјүк фәлакәт”

3. “Јеһованын ҝүнү” нәдир?

³ Малакинин пејғәмбәрлијинин бөјүк мигјасда јеринә јетмәсиндә “Јеһованын ҝүнү”, “бөјүк фәлакәт” дөврүдүр. Иса демишдир: “О заман елә бөјүк мәшәггәт [“фәлакәт”, ЈД] олаҹагдыр ки, беләси дүнјанын башланғыҹындан индијәдәк олмамышдыр вә һеч олмајаҹагдыр” (Матта 24:21). Дүнјанын, хүсусилә дә 1914-ҹү илдән е’тибарән нә гәдәр фәлакәтләр ҝөрдүјүнү хатырлајын (Матта 24:7-12). Тәкҹә Икинҹи Дүнја мүһарибәсиндә 50 милјондан артыг инсан мәһв олмушдур! Лакин бу ҹүр фәлакәтләр, јахынлашмагда олан “бөјүк фәлакәтлә” мүгајисәдә һечдир. Бу һадисә, јә’ни “Јеһованын ҝүнү” индики натәмиз системин ахыр ҝүнләринин сонунда, Һар-Меҝидонда баша чатаҹаг (2 Тимотејә 3:1-5, 13; Вәһј 7:14; 16:14, 16).

4. Јеһованын ҝүнү неҹә сона јетәҹәк?

⁴ Јеһованын ҝүнүнүн сонунда Шејтан дүнјасы вә онун тәрәфдарлары мәһв едиләҹәкләр. Әввәлҹә бүтүн јалан динләрин мөвҹудлуғуна сон гојулаҹаг. Сонра Шејтанын сијаси вә игтисади системи Јеһованын һөкмүнә уғрајаҹаг (Вәһј 17:12-14; 19:17, 18). Һезекиел әввәлҹәдән демишдир: “Ҝүмүшләрини күчәләрә атаҹаглар вә гызыллары мурдар шеј сајылаҹаг, Рәббин [“Јеһованын”, ЈД] гәзәб ҝүнүндә ҝүмүшләри вә гызыллары онлары гуртармајаҹаг” (Һезекиел 7:19). Һәмин ҝүн һаггында Тсефанја 1:14 ајәсиндә дејилир: “Рәббин [“Јеһованын”, ЈД] бөјүк ҝүнү јахындыр, јахындыр вә чох тәләсир”. Јеһованын ҝүнү һаггында Мүгәддәс Китабда дејиләнләри нәзәрә алараг, биз Аллаһын әдаләтли тәләбләри әсасында јашамаға гәти гәрарлы олмалыјыг.

5. Јеһованын исминдән горханлар һансы һиссләри кечирирләр?

⁵ Јеһованын ҝүнүндә Шејтан дүнјасы илә баш верәҹәк һадисәләр габагҹадан хәбәр верилдикдән сонра, Малаки 4:2 ајәсиндә Јеһованын сөзләрини охујуруг: “Сизә, исмимдән горханлара, салеһлик ҝүнәши ганадларында шәфа олараг доғаҹаг: вә чыхаҹагсыныз вә төвләнин бузовлары кими сычрашаҹагсыныз”. “Салеһлик ҝүнәши” — Иса Мәсиһдир. О, руһани мә’нада дүнјанын нурудур (Јәһја 8:12). Иса өз “ганадларында шәфа” илә — әввәлҹә бизим бу ҝүн алдығымыз руһани, сонра исә јени дүнјада алаҹағымыз физики шәфа илә “доғаҹаг”. Јеһованын дедији кими, шәфа аланлар — төвләдән бурахылдыглары үчүн севинән вә шадланан “бузовлар” кими “сычрашаҹаг”лар.

6. Јеһованын хидмәтчиләри һансы гәләбәни бајрам едәҹәкләр?

⁶ Бәс Јеһованын тәләбләринә әһәмијјәт вермәјән инсанларла нә баш верәҹәк? Малаки 4:3 ајәсиндә охујуруг: “[Сиз, Аллаһын хидмәтчиләри], писләри ајаг алтына алаҹагсыныз; чүнки етмәкдә олдуғум о ҝүндә сизин ајагларынызын дабанлары алтында онлар күл олаҹаглар, ордуларын Рәбби дејир”. Аллаһын јер үзүндәки хидмәтчиләри Шејтан дүнјасынын мәһвиндә иштирак етмәјәҹәкләр. Онлар, Јеһованын ҝүнүндән сонра бөјүк гәләбәни гејд едәрәк, мәҹази мә’нада “писләри ајаг алтына алаҹаг”лар. Мәсәлән, белә бир бајрам Гырмызы дәниздә Фир’онун вә ордусунун мәһвиндән сонра гејд едилмишди (Чыхыш 15:1-21). Бөјүк фәлакәт ҝүнүндә Шејтанын вә онун дүнјасынын мәһви дә бајрам едиләҹәк. Јеһованын ҝүнүндән сағ чыхан садиг инсанлар нида едәҹәкләр: “Онун гуртулушу илә мәмнун олаҹағыг вә севинәҹәјик” (Ишаја 25:9). Јеһованын али һакимијјәтинә бәраәт газандырылан вә јер үзү әмин-аманлыг ичиндә јашамаг үчүн тәмизләнән заман неҹә дә бөјүк севинҹ дујаҹағыг!

Христиан дүнјасы гәдим Исраилин изи илә ҝедир

7, 8. Малакинин ҝүнләриндә јашајан Исраил халгынын руһани вәзијјәтини тәсвир един.

⁷ Јеһованын хејирхаһлығына јалныз Она хидмәт едәнләр малик олурлар. Бу, Малаки өз китабыны јаздығы дөврдә дә белә иди. Б. е. ә. 537-ҹи илдә исраиллиләрин галығы 70 иллик Бабил әсарәтиндән сонра вәтәнә гајытды. Лакин нөвбәти јүзилликләр әрзиндә Исраил дөнә-дөнә натәмизлијә вә дөнүклүјә гапылырды. Халгын әксәријјәти Јеһованын адына ләкә ҝәтирир, Онун әдаләтли ганунларына әһәмијјәт вермир, гурбанҝаһа кор, топал вә хәстә һејванлары гурбан ҝәтирмәклә мә’бәди мурдарлајыр, кишиләрин чоху ҝәнҹликдә евләндикләри арвадларыны бошајырдылар.

⁸ Бу сәбәбдән Јеһова онлара деди: “Һөкм үчүн сизә јахынлашаҹағам; вә овсунчулара гаршы вә зина едәнләрә гаршы вә јалан јерә анд едәнләрә гаршы вә үҹрәтиндә үҹрәтлијә вә дул гадынла јетимә гәддарлыг едәнләрә гаршы вә гәрибин һаггыны өдәмәјән вә мәндән горхмајанлара гаршы, мән тез шаһид олаҹағам... Чүнки мән, Рәбб, мән дәјишмәрәм” (Малаки 3:5, 6). Пис јолдан дөнмәк истәјәнләрә исә Јеһова деди: “Мәнә дөнүн, мән дә сизә дөнәрәм” (Малаки 3:7).

9. Малакинин пејғәмбәрлији илк дәфә неҹә јеринә јетди?

⁹ Бу пејғәмбәрликләр ерамызын Ы әсриндә дә јеринә јетди. Јеһоваја хидмәт едән јәһудиләрин галығы сонрадан гејри-јәһудиләрин дә дахил олдуғу руһла мәсһ едилмишләрдән ибарәт јени халгын бир һиссәси олду. Лакин гануни исраиллиләрин әксәријјәти Мәсиһи рәдд етди. Бу сәбәбдән Иса онлара деди: “Будур, евиниз бош галыр” (Матта 23:38; 1 Коринфлиләрә 16:22). Малаки 4:1 ајәсиндә әввәлҹәдән дејилдији кими, б. е. 70-ҹи илиндә ҹисмани Исраилин үзәринә “тәндир кими” јанан ҝүн ҝәлди. Јерусәлим мә’бәд илә бирликдә мәһв едилди вә еһтимал олундуғу кими, милјондан артыг инсан аҹлыгдан, һәмчинин һакимијјәт уғрунда апарылан мүбаризә вә рома ордуларынын һүҹуму нәтиҹәсиндә мәһв олду. Јеһоваја хидмәт едәнләр исә бу фәлакәтдән хилас олдулар (Марк 13:14-20).

10. Руһаниләр вә үмумијјәтлә инсанлар биринҹи јүзилликдә јашајан Исраилин изи илә неҹә ҝедирләр?

¹⁰ Бәшәријјәт, хүсусән дә Христиан дүнјасы биринҹи јүзилликдә јашајан Исраил халгынын изи илә ҝедир. Дин рәһбәрләри вә Христиан дүнјасына мәнсуб олан кәсләр, өзләринин јалан тә’лимләрини, Аллаһын Иса васитәсилә вердији һәгигәтләрдән үстүн тутурлар. Руһаниләр хүсусилә тәгсиркардырлар. Онлар Јеһованын адыны истифадә етмәкдән имтина едир вә ону, һәтта Мүгәддәс Китаб тәрҹүмәләриндән белә силирләр. Онлар, Мүгәддәс Китаба әсасланмајан тәкамүл нәзәријјәси, ҹәһәннәм одунда әбәди ишҝәнҹә, Үч үгнум вә өлмәз ҹан кими тә’лимләрлә Јеһованы шәрәфсиз едирләр. Малакинин ҝүнләриндә јашајан каһинләр кими, онлар да Јеһованы лајиг олдуғу шәрәфдән мәһрум едирләр.

11. Дүнјанын динләри әслиндә кимә хидмәт етдикләрини неҹә ҝөстәрдиләр?

¹¹ Бу дүнјанын динләри, хүсусилә дә Мәсиһин давамчысы олдугларыны иддиа едән кәсләр, әслиндә кимә хидмәт етдикләрини 1914-ҹү илдә сон ҝүнләр башланан заман ҝөстәрдиләр. Руһаниләр килсә үзвләрини, милләтләрарасы чәкишмәләр уҹбатындан башланан һәр ики дүнја мүһарибәсиндә иштирак етмәјә чағырырдылар. Һәмин мүһарибәләрдә исә инсанлар өз һәмиманлыларыны өлдүрүрдүләр. Јеһованын Кәламында Она итаәткар олуб-олмајанлары мүәјјән етмәјин үсулу ајдын ҝөстәрилир: “Кимин Аллаһын өвлады, кимин дә шејтанын өвлады олдуғу бундан бәлли олур: салеһ иш ҝөрмәјән, Аллаһдан дејилдир, өз гардашыны севмәјән дә һәмчинин. Чүнки башланғыҹдан бәри ешитдијиниз тәблиғ будур ки, биз бир-биримизи севәк, шәрирдән олан, өз гардашыны өлдүрән Габил кими олмајаг” (1 Јәһја 3:10-12).

Пејғәмбәрлик јеринә јетир

12, 13. Бизим ҝүнләрдә Аллаһын хидмәтчиләри үзәриндә һансы пејғәмбәрликләр јеринә јетди?

¹² Биринҹи Дүнја мүһарибәси 1918-ҹи илдә баша чатдыгда, Јеһованын хидмәтчиләри, Аллаһын Христиан дүнјасыны вә бүтүн јалан динләри иттиһам етдијини анладылар. О замандан бәри, дүзҝүн әһвал-руһијјәли инсанлар дә’вәт олунурлар: “Еј халгым, орадан чыхын ки, онун ҝүнаһларына шәрик олмајасыныз вә онун бәлаларынын биринә дүчар олмајасыныз. Чүнки онун ҝүнаһлары ҝөјә гәдәр чатды вә Аллаһ онун һагсызлыгларыны јада салды” (Вәһј 18:4, 5). Јеһоваја хидмәт етмәк истәјән кәсләр јалан диндән азад олмаға вә индики натәмиз системин сонуна гәдәр баша чатдырылмасы лазым олан Падшаһлыг һаггындакы хош хәбәри бүтүн дүнјада тәблиғ етмәјә башладылар (Матта 24:14).

¹³ Бунунла да Малаки 4:5 ајәсиндәки пејғәмбәрлик јеринә јетди. Һәмин ајәдә Јеһова дејир: “Будур, Рәббин бөјүк вә горхунҹ ҝүнү ҝәлмәдән өнҹә, мән сизә пејғәмбәр Илјаны [Илјасы] ҝөндәрәҹәјәм”. Бу пејғәмбәрлик илк дәфә, Илјасын тимсалында олан вәфтизчи Јәһјанын фәалијјәти илә јеринә јетди. Ганун әһдинә гаршы ҝүнаһларындан төвбә едән јәһудиләри вәфтиз етмәклә Јәһја Илјасын ишинә бәнзәр иши иҹра едирди. Даһа ваҹиб оланы одур ки, Јәһја Мәсиһин сәләфи иди. Лакин Јәһјанын фәалијјәти Малакинин пејғәмбәрлијинин јалныз аз мигјасда јеринә јетмәси иди. Иса, Јәһја барәдә икинҹи Илјас кими данышаркән, Илјасын ишинин һәлә ҝәләҹәкдә дә јеринә јетәҹәјини нәзәрдә тутурду (Матта 17:11, 12).

14. Индики системин сонуна гәдәр һансы ваҹиб иш јеринә јетирилмәлидир?

¹⁴ Малакинин пејғәмбәрлији, Илјасын бу ваҹиб ишинин “Рәббин бөјүк вә горхунҹ ҝүнү” ҝәлмәдән өнҹә јеринә јетәҹәјини ҝөстәрир. Һәмин ҝүн, Гадир Аллаһын ити сүр’әтлә јахынлашмагда олан Һар-Меҝидон адланан бөјүк мүһарибәсиндә баша чатаҹаг. Бу о демәкдир ки, индики натәмиз системин сона чатдығы вахтда вә Аллаһын сәмави Падшаһлығынын Миниллик һөкмранлығынын башланғыҹына гәдәр јер үзүндә пејғәмбәр Илјасын ишинә охшар фәалијјәт иҹра олунаҹаг. Јеһова, Малакинин пејғәмбәрлијинә там мүвафиг олараг, һәлә ки, индики натәмиз системи мәһв етмәјиб. Илјасын ишинин мүасир иҹрачысы, јер үзүндә јашамаг үмидинә малик олан милјонларла мәсиһчиләрин көмәји илә ҹидди шәкилдә вә бөјүк һәвәслә Аллаһын адына иззәт ҝәтирмәклә вә һәссас инсанлара Мүгәддәс Китаб һәгигәтләрини өјрәтмәклә, тәмиз ибадәтин бәрпасы илә мәшғулдур.

Јеһова хидмәтчиләринә хејир-дуа верир

15. Јеһова өз хидмәтчиләрини неҹә јадда сахлајыр?

¹⁵ Јеһова Она хидмәт едәнләрә хејир-дуа верир. Малаки 3:16 ајәсиндә дејилир: “Рәбдән горханлар бир-бирләри илә сөјләшдиләр; вә Рәбб јахшы динләди вә ешитди вә Рәбдән горхуб исмини дүшүнәнләр үчүн онун өнүндә бир анылма китабы јазылды”. Һабилин ҝүнләриндән бәри, Аллаһ әбәди һәјаты вермәк үчүн хатырлајаҹағы инсанлары нәзәрә алыр, санки китаба јазыр. Јеһова онлара бу сөзләрлә мүраҹиәт едир: “Онда биринин һамысыны анбар евинә ҝәтирин дә, евимдә јемәк олсун вә мәни инди бунунла сынајын... ҝөјләрин пәнҹәрәләрини сизә ачмајаҹағаммы вә јетәҹәк гәдәрдән артыг үзәринизә бәрәкәт төкмәјәҹәјәмми?” (Малаки 3:10).

16, 17. Јеһова өз хидмәтчиләринә вә онларын фәалијјәтинә неҹә хејир-дуа верир?

¹⁶ Јеһова хидмәтчиләринә һәгигәтән дә хејир-дуа верди. Неҹә? Мисал үчүн, Өз нијјәтләрини даһа дәрин анламагда онлара көмәк етди (Сүлејманын мәсәлләри 4:18; Даниел 12:10). О, онлара һәмчинин тәблиғ фәалијјәтинин һејранедиҹи сәмәрәләри илә хејир-дуа верди. Аллаһын хидмәтчиләринә, һәгиги Аллаһа хидмәт етмәк арзусунда олан чохсајлы һәлим инсанлар гошулду. Онларын һамысы “һәр милләтдән, бүтүн гәбиләләрдән, халглардан вә дилләрдән олан... бөјүк бир издиһама” дахилдирләр вә “онлар јүксәк сәслә: “Хилас, тахтда отуран Аллаһымыза вә Гузуја мәхсусдур!” — дејәрәк нида едирдиләр” (Вәһј 7:9, 10). Бу бөјүк издиһам һејранедиҹи тәрздә јараныб; һазырда Јеһоваја фәал хидмәт едәнләрин сајы 6 милјондан чохдур вә онлар бүтүн јер үзүндә 93 000-дән артыг јығынҹагларда тәшкил олунублар!

¹⁷ Бундан әлавә, Јеһованын хејир-дуасы, Онун Шаһидләринин Мүгәддәс Китаба әсасланан әдәбијјатынын дүнјада ән ҝениш јајылмасындан да ҝөрүнүр. Һазырда “Ҝөзәтчи Гүлләси” вә “Ојанын!” журналларынын ајлыг тиражы 90 милјон нүсхәни тәшкил едир, үстәлик “Ҝөзәтчи Гүлләси” 144 дилдә, “Ојанын!” журналы исә 87 дилдә дәрҹ олунур. Мүгәддәс Китаб өјрәнмәси үчүн 1968-ҹи илдә ишыг үзү ҝөрән “Әбәди һәјата апаран һәгигәт” адлы вәсаит, 107 милјон нүсхәни тәшкил едирди вә 117 дилдә дәрҹ олунмушду. 1982-ҹи илдә “Јер үзү ҹәннәтдә әбәди јашаја биләрсән” китабы 81 милјондан артыг нүсхәни тәшкил етмиш вә 131 дилдә дәрҹ едилмишдир. 1995-ҹи илдә дәрҹ олунан “Әбәди һәјата апаран билик” китабы исә 85 милјондан артыг сајда вә 154 дилдә чап едилмишдир. 1996-ҹы илдә 244 дилдә чап олунан “Аллаһ биздән нә тәләб едир?” брошүрасы артыг 150 милјон нүсхәдә пајланыбдыр.

18. Манеәләрә бахмајараг, биз нәјә ҝөрә руһани мә’нада чичәкләнирик?

¹⁸ Шејтан дүнјасынын ҝүҹлү вә сонсуз манеәләринә бахмајараг, биз руһани мә’нада чичәкләнирик. Бу, Ишаја 54:17 ајәсиндә гәләмә алынмыш сөзләрин һәгигәт олдуғуну тәсдиг едир: “Сәнә гаршы дүзәлдилән һеч бир силаһ ишә јарамајаҹаг; вә һөкмдә сәнә гаршы галхан һәр дили сучлу чыхараҹагсан. Рәбб гулларынын мирасы будур вә онларын салеһлији мәндәндир, Рәбб дејир”. Малаки 3:17 ајәсиндә јазылан сөзләрин Јеһованын хидмәтчиләри үзәриндә јеринә јетмәси онлар үчүн неҹә дә тәсәлливериҹидир: “Едәҹәјим ҝүндә, онлар мәним олаҹаглар, мәнә мәхсус мал олаҹаглар”.

Јеһоваја севинҹлә хидмәт едирик

19. Јеһоваја хидмәт едәнләрлә Она хидмәт етмәјәнләр арасындакы фәрг нәдәдир?

¹⁹ Јеһоваја хидмәт едәнләрлә Шејтан дүнјасына мәнсуб олан инсанлар арасындакы фәрг ҝүнү-ҝүндән ајдын ҝөрүнүр. Малаки 3:18 ајәсиндә әввәлҹәдән дејилмишдир: “О заман... салеһлә натәмиз арасында вә Аллаһа гуллуг едәнлә она гуллуг етмәјән арасында ајырд едәҹәксиниз”. Әһәмијјәтли фәргләрдән бири одур ки, Јеһоваја хидмәт едәнләр бөјүк севинҹ дујурлар. Мәсәлән, ҝөзәл үмид онлары севиндирир. Онлар тамамилә әминдирләр ки, Јеһова дедији сөзләри јеринә јетирәҹәк: “Будур, мән јени ҝөјләр илә јени јер јаратмагдајам; вә әввәлки шејләр анылмајаҹаг вә фикрә ҝәлмәјәҹәк. Анҹаг јаратмагда олдуғумла мәсрур олаҹагсыныз вә әбәдијјән севинҹлә ҹошаҹагсыныз” (Ишаја 65:17, 18; Мәзмур 37:10, 11, 29; Вәһј 21:4, 5).

20. Һансы сәбәбә ҝөрә биз јер үзүндә ән севинҹли инсанларыг?

²⁰ Биз, һәдсиз сәдагәтли инсанларын Јеһованын ҝүнүндә сағ галаҹагларына вә јени дүн­ја­ја дахил олаҹагларына аид Онун вердији вә’дә әминик (Тсефанја 2:3; Вәһј 7:13, 14). Бахмајараг ки, бә’зиләри јени дүнјанын ҝәлишинә гәдәр гоҹалыг, хәстәлик вә бәдбәхт һадисә уҹбатындан өлүм јухусуна ҝедә биләр, Јеһова онлары хатырлајыб, әбәди һәјат үчүн дирилдәҹәјинә сөз верир (Јәһја 5:28, 29; Титуса 1:2). Беләликлә, биз мүхтәлиф чәтинликләрлә гаршылашсаг да, Јеһованын ҝүнүнүн јахынлашдығыны билирик. Буна ҝөрә дә, јер үзүндә ән севинҹли инсанлар олмаг үчүн бизим там әсасымыз вар.

Сиз неҹә ҹаваб верәрдиниз?

• “Јеһованын ҝүнү” нәдир?

• Бу дүнјанын динләри гәдим Исраилин изи илә неҹә ҝедир?

• Јеһованын хидмәтчиләри үзәриндә һансы пејғәмбәрликләр јеринә јетир?

• Јеһова өз халгына неҹә хејир-дуа верди?

[32-ҹи сәһифәдәки шәкилләр]

Ҝөзәл үмидә малик олдугларына ҝөрә, Јеһованын хидмәтчиләри һәгигәтән дә севинҹ дујурлар.