Јахшы ишләр үчүн тәмизләнмиш халг
“Өзүмүзү һәр бир бәдән вә руһ мурдарлығындан тәмизләјәк вә Аллаһ горхусу илә камил гүдсијјәти әлдә едәк” (2 КОРИНФЛИЛӘРӘ 7:1).
1. Јеһова, Она ибадәт едәнләрдән нә тәләб едир?
ГӘДИМ Исраилин падшаһы Давуд, Јеһоваја мәгбул ибадәтә даир дүшүнмәјә вадар едән белә бир суал верир: “Рәббин дағына ким чыхаҹаг? Вә мүгәддәс мәканында ким дураҹаг?” Сонра өз суалына ҹаваб верир: “О адам ки, әлләри тәмиздир вә үрәји пакдыр; көнлүнү јалана вермәмишдир, һијлә илә дә анд етмәмишдир” (Мәзмур 24:3, 4). Мүгәддәслији тәҹәссүм етдирән Јеһоваја мәгбул олмаг үчүн, биз тәмиз вә мүгәддәс олмалыјыг. Бундан әввәл, Јеһова бир јерә топлашмыш Исраил халгына хатырлатды: “Өзүнүзү тәгдис един вә мүгәддәс олун; чүнки мән мүгәддәсәм” (Левилиләр 11:44, 45; 19:2).
2. Павел вә Јагуб һәгиги ибадәтдә тәмизлијин ваҹиблијини неҹә гејд етмишләр?
2 Бир нечә әср сонра Һәвари Павел, әхлагсыз Коринф шәһәриндә јашајан һәмиманлыларына јазмышды: “Еј севимли гардашларым, бу ҹүр вә’дләрә малик олараг, өзүмүзү һәр бир бәдән вә руһ мурдарлығындан тәмизләјәк вә Аллаһ горхусу илә камил гүдсијјәти әлдә едәк” (2 Коринфлиләрә 7:1). Бу бир даһа хатырладыр ки, Аллаһла гаршылыглы мүнасибәтдә олуб, Онун вә’д етдији хејир-дуалары әлдә етмәк үчүн, тәмиз олмаг, өзүнү физики вә руһани мурдарлыг вә позғунлугдан горумаг лазымдыр. Бундан әлавә, Аллаһа мәгбул ибадәт һаггында шаҝирд Јагуб јазырды: “Ата Аллаһын јанында тәмиз вә ләкәсиз диндарлыг будур: Јетимләри вә дуллары онларын мәшәггәтли анларында зијарәт етмәк вә өзүнү дүнјадан ләкәсиз сахламаг” (Јагуб 1:27).
3. Ибадәтимизин Аллаһа мәгбул олмасы үчүн биз нәјә ҹидди јанашмалыјыг?
3 Тәмиз, мүгәддәс вә ләкәсиз олмаг һәгиги ибадәтдә белә әһәмијјәтли рол ојнадығы үчүн, Аллаһын лүтфүнү газанмаг истәјән кәсләр бу тәләбләрә ҹидди јанашмалыдырлар. Мүасир ҹәмијјәтдә тәмизлик һаггында тәсәввүрләр тамамилә бир-биринә зиддир вә буна ҝөрә дә Јеһованын ҝөзүндә нәјин тәмиз вә мәгбул олдуғуну анламалы вә она мүвафиг јашамалыјыг. Биз, Аллаһын өз хидмәтчиләриндән нә тәләб етдијини вә тәмизләнмәкдә, һәмчинин бу вәзијјәтдә галмагда вә Она мәгбул олмагда онлара неҹә көмәк етдијини өјрәнмәлијик (Мәзмур 119:9; Даниел 12:10).
Һәгиги ибадәт наминә тәмизлик
4. Мүгәддәс Китабда тәмизлијин һансы мә’на дашыдығыны изаһ един.
4 Инсанларын чоху үчүн тәмизлик садәҹә чиркләндириҹи бир шејдән азад олмаг демәкдир. Лакин Мүгәддәс Китабда тәмизликлә бағлы бир нечә ибрани вә јунан сөзләри истифадә олунур ки, онлар әксәр һалларда физики тәмизлији дејил, әхлаги вә руһани тәмизлији нәзәрдә тутур. Мүгәддәс Китаба даир бир енсиклопедијада дејилир ки, “тәмиз” вә “натәмиз” сөзләри надир һалларда ҝиҝијена мәсәләләринә аид олур. Бу анлајыш, илк нөвбәдә дини характер дашыјыр. Бу нөв “тәмизлик”, демәк олар ки, һәјатын бүтүн саһәсинә тохунур”.
5. Мусанын гануну исраиллиләрин һәјатында тәмизлик мәсәләләрини нә дәрәҹәдә тәнзимләјирди?
5 Һәгигәтән дә, Мусанын ганунуна, демәк олар ки, исраиллиләрин һәјатынын һәр бир саһәсинә аид олан вә нәјин мәгбул вә тәмиз олуб-олмадығыны ачыг шәкилдә ҝөстәрән ганун вә гајдалар дахил иди. Мәсәлән, “Левит” китабынын 11-ҹи вә 15-ҹи фәсилләриндә тәмизлик вә натәмизлик һаггында ҝениш тә’лимат охујуруг. Мүәјјән һејванлар натәмиз һесаб олунурду вә исраиллиләр онлары јемәли дејилдиләр. Гадын доғушдан сонра мүәјјән вахт әрзиндә натәмиз һесаб олунурду. Бә’зи дәри хәстәликләри, хүсусилә дә ҹүзам хәстәлији, һәмчинин гадын вә киши ҹинсијјәт органларынын ифразы инсаны натәмиз едирди. Бундан башга Ганунда, бир кимсәнин натәмиз олдуғу заман неҹә давранаҹағы барәдә габагҹадан дејилирди. Мәсәлән, Сајлар 5:2 ајәсиндә охујуруг: “Исраил оғулларына әмр ет, һәр ҹүзамлыны вә һәр ахынтысы оланы вә өлүдән мурдар олан һәр адамы чыхартсынлар”.
6. Тәмизлијә даир ганунлар нә үчүн верилмишди?
6 Шүбһәсиз ки, Јеһованын вердији бу вә диҝәр ганунларда, сонрадан тибб вә физиолоҝија саһәсиндә ашкар едилән тәсәввүрләр изһар олунурду. Инсанлар һәмин ганунлара риајәт етдикдә бөјүк фајда әлдә едирдиләр. Анҹаг бу ганунлар, садәҹә олараг сағламлыға көмәк едән ҝөстәриш вә ја тибб үзрә рәһбәрлик кими верилмәмишди. Онлар һәгиги ибадәтин бир һиссәси иди. Бу ганунларын гидаја, доғума, никаһдакы мүнасибәтә вә с. кими ҝүндәлик һәјатын мүхтәлиф саһәләринә аид олмасы, Јеһованын, исраиллиләрин Аллаһы кими, јалныз Она һәср етдикләри һәјатларынын һәр бир саһәсиндә нәјин доғру олуб-олмадығыны мүәјјән етмәк сәлаһијјәтинә малик олдуғуну вурғулајырды (Тәснијә 7:6; Мәзмур 135:4).
7. Гануна риајәт етмәклә Исраил халгы һансы хејир-дуаны ала биләрди?
7 Ганун әһди исраиллиләри, онлары әһатә едән халглара мәхсус ијрәнҹ әмәлләрдән дә горујурду. Исраиллиләр Гануна, о ҹүмләдән Јеһованын ҝөзүндә тәмизлијә аид олан тәләбләрә сәдагәтлә риајәт етмәклә, өз Аллаһларына хидмәт етмәјә мәгбул олар вә Онун хејир-дуасына лајиг олардылар. Бунунла әлагәдар Јеһова халга деди: “Әҝәр ҝерчәкдән сөзүмү динләјәҹәк вә әһдими тутаҹагсынызса, мәнә бүтүн халглардан хүсуси халг олаҹагсыныз; чүнки бүтүн дүнја мәнимдир; вә сиз мәнә каһинләр падшаһлығы вә мүгәддәс милләт олаҹагсыныз” (Чыхыш 19:5, 6; Тәснијә 26:19).
8. Буҝүнкү мәсиһчиләр Ганунда тәмизлик һаггында дејиләнләрә нәјә ҝөрә диггәт јетирмәлидирләр?
8 Әҝәр Јеһова исраиллиләр үчүн тәмиз, мүгәддәс вә Она мәгбул олмағын нә демәк олдуғуну тәфсилаты илә Ганунда изаһ едирсә, буҝүнкү мәсиһчиләр бу тәләбләрә риајәт едиб-етмәдикләри үзәриндә дүшүнмәли дејилләрми? Мусанын гануну бу ҝүн мәсиһчиләр үчүн гүввәдә олмаса да, онлар унутмалы дејилләр ки, Павелин изаһ етдији кими Ганунда дејиләнләрин һамысы “ҝәләҹәк шејләрин көлҝәсидир, әсли исә Мәсиһә мәхсусдур” (Колослулара 2:17; Ибраниләрә 10:1). “Мән дәјишмәрәм” дејән Јеһова, кечмишдә һәгиги ибадәтдә тәмиз вә ләкәсиз олмағы бу дәрәҹәдә ваҹиб һесаб етдијинә ҝөрә, бу ҝүн биз дә Онун лүтфүнә вә хејир-дуасына саһиб олмаг истәјириксә, физики, әхлаги вә руһани ҹәһәтдән тәмизлијә олдугҹа ҹидди јанашмалыјыг (Малаки 3:6; Ромалылара 15:4; 1 Коринфлиләрә 10:11, 31).
Физики тәмизлик бизи “тәгдим едир”
9, 10. а) Мәсиһчи үчүн физики ҹәһәтдән тәмиз олмаг нәјә ҝөрә ваҹибдир? б) Јеһованын Шаһидләринин конгресләри барәдә инсанлар чох вахт нә дејирләр?
9 Демәк олармы ки, физики тәмизлик бу ҝүн дә һәгиги ибадәтин ваҹиб һиссәсидир? Физики тәмизлик инсаны Аллаһын һәгиги хидмәтчиси етмәсә дә, сөзсүз ки, һәгиги хидмәтчи шәраитин әл вердији гәдәр физики ҹәһәтдән тәмиз олмалыдыр. Хүсусилә дә, чохларынын өз бәдәнләринин, палтарларынын, евләринин вә һәјәтләринин тәмизлијинин гејдинә галмадыглары бир вахтда, буну едән инсанлар адәтән башгаларынын диггәтини ҹәлб едирләр. Бу исә, Павелин Коринф шәһәриндәки мәсиһчиләрә јаздығы кими, јахшы нәтиҹәләр верә биләр: “Һеч бир шәкилдә кимсәнин бүдрәмәсинә сәбәб олмадыг ки, хидмәтимиз е’тибардан дүшмәсин. Лакин һәр шејдә өзүмүзү Аллаһын хидмәткарлары кими тәгдим едирик” (2 Коринфлиләрә 6:3, 4).
10 Јеһованын Шаһидләри, хүсусән дә онларын бөјүк конгресләри кечирилән заман нәзәрә чарпан тәмизлик вә сәлигә-сәһмана, давранышларында әкс олунан һөрмәтә вә јахшы вәрдишләринә ҝөрә рәсми шәхсләр тәрәфиндән дәфәләрлә тә’рифләр алмышлар. Мисал үчүн, Италјанын Савона әјаләтиндә кечирилән вилајәт конгреси барәдә “Стампа” гәзетиндә белә дејилирди: “Биналары ҝәзәркән илк ҝөзә чарпан шеј, бу биналары истифадә едән инсанларын тәмизлији вә сәлигәсидир” (“La Stampa”). Шаһидләрин, Бразилијанын Сан-Паулу шәһәриндәки стадионда кечирдикләри конгресдән сонра, стадионун мүдири тәмизлик ишинә ҹавабдеһ олан ишчијә белә бир тапшырыг верди: “Бундан сонра стадиону Јеһованын Шаһидләри кими тәмизләјәҹәксиниз”. Һәмин стадионун диҝәр мүдири гејд етди: “Јеһованын Шаһидләри стадиону иҹарәјә ҝөтүрмәк истәдикдә бизи һеч нә јох, јалныз конгресин кечириләҹәји тарих марагландырыр”.
11, 12. а) Шәхси тәмизликлә бағлы Мүгәддәс Китабын һансы принсипини јадда сахламалыјыг? б) Вәрдишләримиз вә һәјат тәрзимизлә әлагәдар һансы суаллары вермәк олар?
11 Әҝәр ибадәт етдијимиз јерин тәмиз вә сәлигәли олмасы, ибадәт етдијимиз Аллаһа иззәт ҝәтирмәјә тәшвиг едирсә, демәли, бу кејфијјәтләри шәхси һәјатымызда да ҝөстәрмәк ејни дәрәҹәдә ваҹибдир. Анҹаг ким исә дүшүнә биләр ки, өз евиндә раһатланыб, үрәји истәдији кими һәрәкәт етмәјә һаггы вар. Ҝејимә вә хариҹи ҝөрүнүшә ҝәлдикдә исә, тәбии ки, бизә раһат олан вә хошумуза ҝәлән шејләри сечмәкдә азадыг. Лакин бу азадлыг чох нисбидир. Унутмајаг ки, бә’зи јемәкләри јејиб-јемәмәк һаггында Павел һәмиманлыларына хәбәрдарлыг етмишдир: “Еһтијат един ки, сизин бу азадлығыныз, виҹданы зәиф оланларын бүдрәмәсинә сәбәб олмасын”. Даһа сонра о, белә бир гијмәтли принсип верир: “Һәр шеј ҹаиздир, лакин һәр шеј фајдалы дејил; һәр шеј ҹаиздир, лакин һәр шеј руһән инкишаф етдирмәз” (1 Коринфлиләрә 8:9; 10:23). Павелин бу мәсләһәти тәмизликлә неҹә бағлыдыр?
12 Мәнтигә ујғундур ки, инсанлар, Аллаһын хидмәтчиләринин тәмиз вә интизамлы һәјат сүрмәләрини ҝөзләјирләр. Буна ҝөрә дә, диггәт јетирмәлијик ки, евимизин вә һәјәтимизин ҝөрүнүшү Аллаһын Кәламынын хидмәтчиләри кими дашыдығымыз ада ләкә ҝәтирмәсин. Евимиз өзүмүз вә е’тигадларымыз барәдә неҹә шаһидлик едир? Башгаларыны сәмими гәлбдән дә’вәт етдијимиз, тәмизлик вә интизамын һөкм сүрәҹәји јени әдаләтли дүнјада јашамаг истәјимиз олдуғуну ҝөстәрирми? (2 Петер 3:13). Истәр асудә вахтымызда, истәрсә дә хидмәтдә хариҹи ҝөрүнүшүмүз тәблиғ етдијимиз хәбәрин дәјәрини ја јүксәлдә, ја да азалда биләр. Мәсәлән, Мексикада дәрҹ едилән бир гәзетдә дејилирди: “Јеһованын Шаһидләри арасында сәлигәли сач формасы, тәмизлији вә әдәбли ҝејими илә сечилән чохлу ҝәнҹләр вар”. Арамызда бу ҹүр ҝәнҹләрин олмасына неҹә дә шадыг!
13. Ҝүндәлик һәјатымызда һәмишә вә һәр шејдә тәмизлијә вә сәлигәјә риајәт етмәк үчүн нә едә биләрик?
13 Бәдәнимиз, хариҹи ҝөрүнүшүмүз, әшјаларымыз вә евимиз һәмишә сәлигәли вә тәмиз олмалыдыр демәк, бу иши һәјата кечирмәкдән асандыр. Бунун үчүн бир сыра мүрәккәб вә баһалы тәҹһизат вә мүхтәлиф аләтләр лазым дејил, садәҹә олараг јахшы план вә ардыҹыллыг тәләб олунур. Чиммәк, евимизи јығышдырмаг, палтарымызы вә автомобилимизи јумаг үчүн вахт ајырмаг лазымдыр. Хидмәтдә вә јығынҹаг ҝөрүшләриндә иштирак етмәјимиз, шәхси өјрәнмә илә мәшғул олмағымыз, ҝүндәлик вәзифәләримизи јеринә јетирмәјимиз бизи Аллаһын вә инсанларын ҝөзүндә тәмиз вә мәгбул олмагдан һеч дә азад етмир. Бизә таныш олан “һәр шејин [өз] заманы” принсипи һәјатымызын бу саһәсинә дә аиддир (Ваиз 3:1).
Ләкәсиз үрәк
14. Нәјә ҝөрә демәк олар ки, әхлаги вә руһани тәмизлик физики тәмизликдән даһа ваҹибдир?
14 Физики тәмизлијә диггәт јетирмәк ваҹибдир, әхлаги вә руһани тәмизлијин гејдинә галмаг исә даһа ваҹибдир. Биз, Јеһованын Исраил халгыны физики натәмизлијинә ҝөрә дејил, әхлаги вә руһани ҹәһәтдән позулдуғуна ҝөрә рәдд етдијини хатырладыгда белә бир гәрара ҝәлирик. Ишаја пејғәмбәрин васитәсилә Јеһова исраиллиләрә деди ки, ҝүнаһкар вә ганунсуз милләт олдугларына ҝөрә, онларын ҝәтирдикләри гурбанлар, јени аја вә шәнбәјә риајәт етмәләри, һәтта етдикләри дуалар белә Онун үчүн бир јүкә чеврилиб. Аллаһын лүтфүнү јенидән газанмаг үчүн онлар нә етмәли идиләр? Јеһова деди: “Јујунун, тәмизләнин; ҝөзүмүн өнүндән ишләринизин пислијини атын; пислик етмәкдән ваз кечин” (Ишаја 1:4, 11-16).
15, 16. Исанын сөзләринә ҝөрә, инсаны мурдар едән нәдир вә онун сөзләриндән биз неҹә фајдалана биләрик?
15 Әхлаги вә руһани тәмизлијин ваҹиблијини даһа ҝениш анламаг үчүн, Исанын фәрисејләрә вә дин алимләринә дедијинә диггәт јетирәк. Онлар Исанын шаҝирдләринин јемәкдән габаг әлләрини јумадыгларына ҝөрә натәмиз олдугларыны иддиа едирдиләр. Иса онларын сәһвини дүзәлдиб деди: “Ағыза дахил олан шеј инсаны мурдар етмәз; амма ағыздан чыхан шеј инсаны мурдар едәр”. Сонра Иса изаһ етди: “Ағыздан чыхан исә үрәкдән чыхар вә инсаны мурдар едәр. Чүнки үрәкдән пис дүшүнҹәләр, гатиллик, зинакарлыг, ҹинси әхлагсызлыг, оғурлуг, јаланчы шаһидлик вә күфр чыхар. Инсаны мурдар едән шејләр бунлардыр; јујулмамыш әлләрлә јемәк исә инсаны мурдар етмәз” (Матта 15:11, 18-20).
16 Исанын бу сөзләриндән биз нә өјрәнирик? О, ајдын шәкилдә ҝөстәрди ки, пис, әхлагсыз вә натәмиз давранышлара үрәкдә ојанан пис, әхлагсыз вә натәмиз һәвәсләр сәбәб олур. Шаҝирд Јагубун дедији кими, “һәр кәс өз еһтирасы илә апарылараг вә алданараг имтаһан олунур” (Јагуб 1:14, 15). Буна ҝөрә дә, әҝәр Исанын дедији ағыр ҝүнаһлара батмаг истәмириксә, бу ҹүр шејләрә олан һәр бир мејли үрәјимиздән сөкүб атмалы вә онлара јер вермәмәлијик. Демәли, охудуғумуз, бахдығымыз вә динләдијимиз шејләрдә олдугҹа еһтијатлы олмалыјыг. Бу ҝүн сөз азадлығындан истифадә едәрәк вә тәәссүрат јаратмаға чалышараг, әјләнҹә вә реклам сәнајеләри инсанларын үзәринә, ҝүнаһлы тәбиәтләринин һәвәсинә ҝөз јуман тәсвири образлар вә сәсләр мәҹмусу јағдырыр. Биз гәтијјән јол вермәли дејилик ки, бунлардан нә исә үрәјимиздә көк салсын. Тәмиз вә ләкәсиз үрәји горумаг үчүн һәмишә ајыг олмаг, Аллаһын үрәјини севиндирмәк вә Она мәгбул олмаг ән ваҹиб мәсәләдир (Сүлејманын мәсәлләри 4:23).
Јахшы ишләр үчүн тәмизләнмиш халг
17. Јеһова халгыны нә үчүн тәмизләмишдир?
17 Јеһованын көмәји илә, Онун ҝөзүндә тәмиз гала билмәјимиз, сөзсүз ки, бизим үчүн хејир-дуа вә мүдафиәдир (2 Коринфлиләрә 6:14-18). Лакин биз ону да анлајырыг ки, Јеһова халгыны хүсуси мәгсәд үчүн тәмизләјибдир. Павел Титуса деди ки, Иса Мәсиһ “Өзүнү бизим үчүн фәда етди ки, бизи һәр ҹүр һагсызлыгдан хилас етсин вә тәмизләјиб, Өзүнә хүсуси вә јахшы ишләрә сә’јли бир халг төрәтсин” (Титуса 2:14). Тәмизләнмиш бир халг кими, биз һансы ишләрдә сә’ј ҝөстәрмәлијик?
18. Јахшы ишләрдә сә’јли олдуғумузу неҹә ҝөстәрә биләрик?
18 Биз илк нөвбәдә, Аллаһын Падшаһлығы һаггындакы хош хәбәри бүтүн халглара јајмаг үчүн сә’ј ҝөстәрмәлијик (Матта 24:14). Буну етмәклә, бүтүн инсанлара, һәр ҹүр мурдарлыгдан тәмизләнмиш јер үзүндә әбәди јашамаг үмиди һаггында данышмыш олуруг (2 Петер 3:13). Јахшы ишләримизә, ҝүндәлик һәјатымызда Аллаһын руһунун сәмәрәсини тәзаһүр етмәјимиз дә дахилдир, бу исә сәмави Атамыза иззәт ҝәтирир (Галатијалылара 5:22, 23; 1 Петер 2:12). Һәгигәтдә олмајан вә тәбии фәлакәтләрдән, мүхтәлиф фаҹиәләрдән әзијјәт чәкән инсанлары да јаддан чыхармырыг. Павелин мәсләһәтини унутмуруг: “Демәли, нә гәдәр фүрсәтимиз варса, һамыја, хүсусән иманлылар аиләсинә јахшылыг едәк” (Галатијалылара 6:10). Тәмиз үрәкдән вә саф нијјәтләрдән ирәли ҝәлән бүтүн бу хидмәтләр Аллаһы мәмнун едир (1 Тимотејә 1:5).
19. Физики, әхлаги вә руһани ҹәһәтдән јүксәк тәмизлик нормаларына риајәт етмәји давам етдирсәк, һансы хејир-дуалара саһиб оларыг?
19 Биз, Гадир Аллаһын хидмәтчиләри кими Павелин сөзләринә диггәт јетиририк: “Еј гардашлар, Аллаһын мәрһәмәти наминә сизә јалварырам ки, бәдәнләринизи дири, мүгәддәс, Аллаһа мәгбул гурбан кими тәгдим един; мә’нәви ибадәтиниз будур” (Ромалылара 12:1). Јеһованын бизи тәмизләдијини гијмәтләндирмәјә вә бундан сонра да физики, әхлаги вә руһани тәмизлијин јүксәк нормаларына риајәт етмәјә сә’ј ҝөстәрмәјә давам едәк. Бу ҹүр давранараг биз өзүнә һөрмәт вә мәмнунлуг дујмагдан башга, һәм дә “әввәлки шејләр”ин, јә’ни индики натәмиз дүнјанын кечиб ҝедәҹәјини вә Аллаһын һәр шеји јениләшдирдији заманы ҝөрмәк имканымыз да јаранаҹаг (Вәһј 21:4, 5).
Хатырлајырсынызмы?
• Исраил халгына тәмизликлә бағлы нәјә ҝөрә бир сыра ганунлар верилмишдир?
• Физики тәмизлик тәблиғ етдијимиз хош хәбәрин дәјәрини неҹә артырыр?
• Нәјә ҝөрә әхлаги вә руһани тәмизлик физики тәмизликдән даһа ваҹибдир?
• Биз “јахшы ишләрә сә’јли” халг олдуғумузу неҹә ҝөстәрә биләрик?
[29-ҹу сәһифәдәки шәкилләр]
Физики тәмизлик, тәблиғ етдијимиз хәбәрин дәјәрини артырыр.
[22-ҹи сәһифәдәки шәкил]
Иса, натәмиз фикирләрин натәмиз һәрәкәтләрә ҝәтириб чыхардығы һагда хәбәрдарлыг едирди.
[31-ҹи сәһифәдәки шәкилләр]
Јеһованын Шаһидләри тәмизләнмиш халг олараг јахшы ишләрдә сә’ј ҝөстәрирләр.