“Сизә бир нүмунә ҝөстәрдим”
“Мүддәт нөгтеји-нәзәриндән сиз, мүәллим олмалы идиниз” (ИБРАНИЛӘРӘ 5:12, И–93).
1. Нәјә ҝөрә Ибраниләрә 5:12 ајәси мәсиһчидә бир гәдәр тәбии нараһатчылыг һисси јарада биләр?
СӘН мәгаләнин әсас ајәсиндәки илһамланмыш сөзләри охудугда һансы һиссләри кечирдин? Бир гәдәр нараһатчылыг һиссими? Елә исә, тәк дејилсән. Мәсиһин давамчылары олараг билирик ки, мүәллим олмалыјыг (Матта 28:19, 20). Билирик ки, јашадығымыз зәманәни нәзәрә алсаг, мүмкүн гәдәр кејфијјәтли өјрәтмәк олдугҹа ваҹибдир. Һәмчинин билирик ки, неҹә тә’лим вермәјимиздән өјрәтдијимиз инсанларын һәјаты асылы ола биләр! (1 Тимотејә 4:16). Бу сәбәбдән тәбии суаллар јараныр: јахшы мүәллимәмми? Мүәллимлик ишиндә мән неҹә тәкмилләшә биләрәм?
2, 3. а) Мүәллимлик баҹарығынын әсасыны нәјин тәшкил етдијини бир мүәллим неҹә изаһ етди? б) Өјрәтмәјә даир Иса һансы нүмунәни вермишдир?
2 Бу ҹүр нараһатчылыг бизи мә’јус етмәли дејил. Әҝәр мүәллимлијә тамамилә тәҹрүбә вә үсуллар мәҹмусу кими бахсаг, елә бир тәәссүрат јарана биләр ки, бу саһәдә тәкмилләшмәк олдугҹа чәтиндир, санки мүмкүн дејил. Лакин мүәллимлик мәһарәти тәҹрүбә вә үсуллара дејил, даһа ваҹиб шејә әсасланыр. Тәҹрүбәли бир мүәллимин бу мөвзуја даир китабда јаздығына диггәт јетирин: “Өјрәтмәк баҹарығы һансыса үсул вә ја методикаја, јахуд тә’лим планларына әсасланмыр. [...] Мүәллимлик ишиндә әсас мәсәлә мәһәббәтдир”. Мүәллиф, сөзсүз ки, дүнјәви мүәллимлији нәзәрдә тутур. Лакин онун гејд етдији фикир бир мәсиһчи кими бизим иҹра етдијимиз мүәллимлик фәалијјәтиндә даһа јарарлы ола биләр. Нәјә ҝөрә?
3 Тә’лим вермәкдә ән ҝөзәл нүмунә Иса Мәсиһин нүмунәсидир. О, давамчыларына демишдир: “Сизә бир нүмунә ҝөстәрдим” (Јәһја 13:15). Бурада һәлимлик нүмунәсиндән бәһс едилсә дә, сөзсүз ки, инсан кими јер үзүндә јашајаркән өзүнүн әсас ишини јеринә јетирмәкдә — Аллаһын Падшаһлығы һаггында хош хәбәри тәблиғ едәрәк инсанлары өјрәтмәкдә, Исаны тәглид етмәлијик (Лука 4:43). Әҝәр сәндән, Исанын хидмәтиндә һансы кејфијјәтин даһа чох тәзаһүр олундуғуну сорушсалар, јәгин ки, мәһәббәти дејәрдин (Колослулара 1:15; 1 Јәһја 4:8). Иса илк нөвбәдә сәмави Атасы Јеһованы севирди (Јәһја 14:31). Лакин бир мүәллим кими, Иса мәһәббәти даһа ики саһәдә ҝөстәрирди. О, өјрәтдији һәгигәтләри вә һәгигәти өјрәтдији инсанлары севирди. Ҝәлин онун нүмунәсинин бу ики саһәсинә хүсуси диггәт јетирәк.
Аллаһын һәгигәтләринә олан чохданкы мәһәббәт
4. Иса Јеһованын тә’лимләринә гаршы мәһәббәти неҹә инкишаф етдирмишди?
4 Мүәллимин өз фәннинә олан мүнасибәтини әксәр һалларда тә’лимин кејфијјәтиндән мүәјјән етмәк олар. Һәтта ән кичик е’тинасызлыг белә, чох еһтимал ки, нәзәрә чарпаҹаг вә шаҝирдләрә кечәҹәкдир. Лакин Иса, Јеһова вә Онун Падшаһлығы һаггында өјрәтдији дәјәрли һәгигәтләрә гаршы лагејд дејилди. Әксинә, о, өјрәтдији һәгигәтләри чох севирди. Иса бу мәһәббәти, өзү өјрәнән заман инкишаф етдирмишди. Инсан кими мөвҹуд олмаздан әввәл милјон илләр әрзиндә Аллаһын ваһид Оғлу бөјүк истәк вә сә’јлә өјрәнмишди. Ишаја 50:4, 5 ајәләриндә јазылан сөзләр јеринә дүшүр: “Јорғун адама сөзлә дәстәк ола билим дејә, Рәбб Јеһова мәнә шаҝирдләрин дилини верди; һәр сабаһ ојандырыр, шаҝирдләр кими ешитсин дејә гулағымы ојандырыр. Рәбб Јеһова гулағымы ачды вә мән гијамчы олмадым вә ҝери чәкилмәдим”.
5, 6. а) Иса, ајдын олдуғу кими, вәфтиз олундуғу заман һансы һиссләри јашады вә бу, она неҹә тә’сир бағышлады? б) Иса вә Шејтан Аллаһын Кәламыны нә дәрәҹәдә фәргли сурәтдә истифадә етмишләр?
5 Иса јер үзүндә бөјүјәндә дә Аллаһ мүдриклијини севирди (Лука 2:52). Сонрадан вәфтиз олунан заман Иса һеч кимин јашамадығы һиссләри јашады. Лука 3:21 ајәсиндә дејилир: “Ҝөј ачылды”. Ајдындыр ки, бу заман Иса инсан олмаздан әввәлки мөвҹудлуғуну хатырлаја билди. Бундан сонра Иса 40 ҝүн әрзиндә сәһрада оруҹ тутду. Олсун ки, Иса Јеһованын вердији дәрсләр үзәриндә дүшүнмәкдән мәмнунлуг дујурду. Лакин чох кечмәмиш, Аллаһын һәгигәтләринә олан мәһәббәти сынаға мә’руз галды.
6 Иса јорғун вә аҹ олан заман Шејтан ону сынаға чәкмәјә башлады. Аллаһын бу ики оғлу бир-бириндән кәскин сурәтдә неҹә дә фәргләнирләр! Һәр икиси Ибраниҹә Мүгәддәс Јазылардан ситат ҝәтирмиш, лакин тамамилә фәргли әһвал-руһијјә тәзаһүр етдирмишләр. Шејтан, Аллаһын Кәламындан өз тамаһкар мәгсәдләриндә һөрмәтсиз тәрздә истифадә едәрәк, ону тәһриф етмишдир. Доғрудан да, бу гијамчы Аллаһын һәгигәтләринә гаршы нифрәтдән савајы һеч нә дујмурду. Лакин Шејтана ҹавабында Исанын Мүгәддәс Јазылардан ситат ҝәтирмәсиндә, онун Аллаһын Кәламына олан мәһәббәт вә еһтирамы дәрһал нәзәрә чарпыр. Иса, Аллаһдан илһам алмыш бу сөзләрин јазылмасындан чох әввәл јашамышдыр, буна бахмајараг, һәмин јазылара еһтирамла јанашырды. Ахы һәмин сөзләр онун сәмави Атасындан ҝәлән дәјәрли һәгигәтләр иди! Иса Шејтана билдирди ки, Јеһовадан ҝәлән бу сөзләр гидадан да ваҹибдир (Матта 4:1-11). Бәли, Иса Јеһованын она өјрәтдији бүтүн һәгигәтләри севирди. Бәс бу мәһәббәти өзүнүн мүәллимлик фәалијјәтиндә неҹә тәзаһүр етдирирди?
Исанын өјрәтдији һәгигәтләрә олан мәһәббәти
7. Нәјә ҝөрә Иса шәхси тә’лимләрини јаратмырды?
7 Исанын өјрәтдији һәгигәтләрә олан мәһәббәти һәмишә ашкар иди. Һәр шејдән әввәл, Иса шәхси идејаларыны сәрбәстҹә инкишаф етдирә биләрди. Иса ҝениш билијә вә бөјүк мүдриклијә саһиб иди (Колослулара 2:3). Бунунла белә, о өз динләјиҹиләринә дәфәләрлә хатырладырды ки, өјрәтдији һәр шеј онун өзүнун дејил, сәмави Атасынындыр (Јәһја 7:16; 8:28; 12:49; 14:10). Исанын Аллаһын һәгигәтләринә гаршы мәһәббәти о гәдәр ҝүҹлү иди ки, онлары өз фикирләри илә әвәз етмәк онун ағлына белә ҝәлмирди.
8. Аллаһын Кәламына әсасланмаг мәгсәдиндә олдуғуну Иса хидмәтинин башланғыҹында неҹә ҝөстәрди?
8 Иса неҹә фәалијјәт ҝөстәрмәк мәгсәдиндә олдуғуну хидмәтинин лап башланғыҹында ајдын етди. Исанын илк дәфә Аллаһын халгына өзүнүн вә’д едилмиш Мәсиһ олдуғуну неҹә е’лан етдијинә диггәт јетирәк. Иса садәҹә издиһам гаршысында өзүнүн Мәсиһ олдуғуну е’лан едиб, сонра да сөзләринә сүбут олараг валеһедиҹи мө’ҹүзәләрми ҝөстәрди? Хејр. О, Аллаһын халгынын адәтән Мүгәддәс Јазылары охудуглары синагога дахил олду. Иса орада Ишаја 61:1, 2 ајәләрини уҹадан охујуб, бу пејғәмбәрлик һәгигәтләринин она аид олдуғуну изаһ етди (Лука 4:16-22). Исанын ҝөстәрдији чохсајлы мө’ҹүзәләр, Аллаһын ону дәстәкләдијинә әлавә сүбут кими хидмәт едирди. Вә јенә дә өзүнүн мүәллимлик фәалијјәтиндә һәр заман Аллаһын Кәламына әсасланырды.
9. Фәрисејләрлә сөһбәтиндә Иса Аллаһын Кәламына дәјишмәз мәһәббәтини неҹә ҝөстәрди?
9 Дини зиддијјәтчиләрин һүҹумлары илә гаршылашаркән, асанлыгла галиб ҝәлә билсә дә, Иса онларла интеллектуал мүбаһисәләрә ҝиришмирди. Бунун әвәзинә, Аллаһ Кәламынын көмәји илә Иса онларын дәлилләринин јалан олдуғуну сүбут едирди. Исанын давамчыларыны шәнбә ганунуну позмагда фәрисејләрин мүһакимә етдикләри һадисәни хатырлајаг. Тарладан кечәркән, онлар бир нечә сүнбүлү гопарыб јемишдиләр. Фарисејләрин иттиһамына ҹаваб олараг, Иса деди: “Давудун өзу илә бәрабәр оланларла аҹдығы заман нә етдијини охумадынызмы?” (Матта 12:1-5). Өз ҝөзләриндә салеһ олан бу инсанлар, еһтимал ки, 1 Самуел 21:1-6 ајәләрини охумушдулар. Әҝәр беләдирсә, онлар һәмин һадисәдән ваҹиб ибрәт дәрси ҝөтүрмәмишдиләр. Амма Иса бу парчаны садәҹә олараг охумамышды, һәм дә онун үзәриндә дүшүнүб, мәғзини мәнимсәмишди. О, бу парчанын васитәсилә Јеһованын өјрәтдији принсипләри севмишди. Вә Иса һәмин ајәләрин, һәмчинин Мусанын ганунундан ҝәтирилән нүмунәнин көмәји илә, Гануна хас олан таразлығы ҝөстәрди. Беләликлә, Аллаһын Кәламына олан дәјишмәз мәһәббәт Исаны тәшвиг едирди ки, ону дин рәһбәрләринин өз мәгсәдләри үчүн тәһриф етмәк тәшәббүсүндән вә ја инсан ән’әнәләринин батаглығында гәрг олмагдан горусун.
10. Иса өјрәдәҹәји һагда пејғәмбәрлији неҹә јеринә јетирди?
10 Исанын өјрәтдији һәгигәтләрә олан мәһәббәти һеч заман јол вермирди ки, о, инсанлары гејри-иради вә дарыхдырыҹы шәкилдә өјрәтсин. Аллаһдан илһам алмыш пејғәмбәрликләр ҝөстәрир ки, Мәсиһин додагларындан “ләтафәт” ахаҹаг вә о, “ҝөзәл сөзләр” сөјләјәҹәкдир (Мәзмур 45:2; Тәквин 49:21). Иса, үрәкдән севдији һәгигәтләри руһ јүксәклији илә тәгдим едәрәк, бу пејғәмбәрликләри јеринә јетирди; о, “ләтиф кәламлар”ы тәтбиг едәрәк онларын ҝөзәллијини үзә чыхара билирди (Лука 4:22). Шүбһәсиз ки, руһ јүксәклији онун үзүндә һисс олунур вә ҝөзләриндә өјрәтдији һәгигәтләрә гаршы ҹанлы мараг ҝөрүнүрдү. Ону динләмәјин бөјүк мәмнунлуг ҝәтирдијини тәсәввүр етмәк чәтин дејил. Алдығымыз биликләри башгалары илә бөлүшмәкдә Иса бизә неҹә дә ҝөзәл нүмунә верди!
11. Нә үчүн Иса өз мүәллимлик баҹарығына ҝөрә өјүнмүрдү?
11 Аллаһын һәгигәтләрини ҝөзәл билдији вә ән мүкәммәл натиг олдуғу үчүн Иса өјүнүрдүмү? Бу, чох вахт гејри-камил инсанлардан олан мүәллимләрлә баш верир. Лакин унутмајаг ки, Исанын мүдриклији Аллаһ горхусуну тәзаһүр етдирирди. Бу ҹүр мүдриклик ловғаланмаға јол вермәз, ахы “һикмәт тәвазөкар” инсанларладыр (Сүлејманын мәсәлләри 11:2, МКШ). Лакин Исаны гүрур вә ловғалыгдан сахлајан јалныз бу дејилди.
Иса өјрәтдији инсанлары севирди
12. Иса неҹә ҝөстәрди ки, давамчыларынын ондан горхмасыны истәмир?
12 Исанын инсанлара олан дәрин мәһәббәти һәмишә онун өјрәтмә тәрзиндә ҝөрүнүрдү. Гүрурлу инсанлардан фәргли олараг, о, бир мүәллим кими, һеч заман инсанлары горхутмурду (Ваиз 8:9). Исанын мө’ҹүзәләриндән бирини ҝөрән Петер һејран галмыш вә Исанын дизләринә гапанмышды. Лакин Иса истәмирди ки, давамчылары онун гаршысында гејри-ади горху һисси кечирсинләр. О, меһрибанлыгла деди: “Горхма”, сонра исә Петерә баша салды ки, о, шаҝирдләр һазырламаг кими севинҹли вә мараглы ишдә иштирак едәҹәкдир (Лука 5:8-10). Иса истәјирди ки, шаҝирдләри мүәллим гаршысындакы горхудан дејил, Аллаһ һаггындакы дәјәрли һәгигәтләрә олан мәһәббәтдән ирәли ҝәләрәк һәрәкәт етсинләр.
13, 14. Иса инсанлара неҹә шәфгәт ҝөстәрирди?
13 Исанын һәгигәти өјрәтдији инсанлара олан мәһәббәти онлара ҝөстәрдији шәфгәтиндә дә тәзаһүр олунурду. “Издиһамы ҝөрдүкдә Исанын онлара јазығы ҝәлди; чүнки чобансыз гојунлар кими тагәтсиз вә дағыныг идиләр” (Матта 9:36). Онларын мискин вәзијјәти Исаны шәфгәт ҝөстәрмәјә тәшвиг едирди вә о, һәмин инсанлара көмәк әлини узатмаг истәјирди.
14 Исанын башга бир һадисәдә неҹә шәфгәт ҝөстәрдијинә диггәт јетирәк. Ганахмадан әзијјәт чәкән бир гадын издиһамы јарыб Исанын палтарына тохунан заман мө’ҹүзәли сурәтдә сағалды. Иса өзүндән гүввә чыхдығыны һисс етмиш, амма кимин шәфа тапдығыны ҝөрмәмишди. Иса һәмин гадыны ҝөрмәк истәди. Нәјә ҝөрә? Она ҝөрә јох ки, Гануну, јахуд дин хадимләри вә фәрисејләр тәрәфиндән тәртиб едилән гајдалары поздуғу үчүн ону мәзәммәт етсин, бәлкә гадын өзү дә елә бундан горхурду. Хејр, о, гадына деди: “Гызым! Иманын сәни хилас етди. Сүлһ илә ҝет вә дәрдиндән сағал” (Марк 5:25-34). Бу сөзләрдә дујулан шәфгәтә диггәт јетирин. Иса садәҹә: “Сағал” демәди, “дәрдиндән сағал” деди. Марк бурада һәрфи мә’нада “гамчылајан” вә гамчыламаға ишарә едән, тез-тез ишҝәнҹә кими гәбул едилән сөзү истифадә едир. Беләликлә Иса ҝөстәрди ки, бу хәстәлијин гадына нә гәдәр физики вә мә’нәви әзијјәт вердијини анлајыр. Гадына онун јазығы ҝәлирди.
15, 16. Исанын хидмәтиндә һансы һадисәләр ҝөстәрир ки, о, инсанларда јахшы ҹәһәтләри ахтарырды?
15 Иса инсанларда олан јахшы ҹәһәтләрә диггәт јетирмәклә дә онлара мәһәббәт ҝөстәрирди. Сонрадан һәвари олан Натанели ҝөрдүкдә ҝөрүн нә баш верди: “Иса Натанели Өз јанына ҝәлән ҝөрдүкдә онун һаггында деди: “Будур, дахилиндә һијлә олмајан һәгиги бир исраилли!” Иса мө’ҹүзәли шәкилдә Натанелин үрәјинә нәзәр салмыш вә онун һаггында чох шеј билмишди. Әлбәттә ки, Натанел камилликдән узаг иди. Һамымызда олдуғу кими, онун да чатышмајан ҹәһәтләри варды. Бундан әлавә, о, Иса һаггында ешидән заман олдугҹа кәскин шәкилдә демишди: “Назаретдән јахшы шеј чыхармы?” (Јәһја 1:45-51). Бахмајараг ки, Натанел һаггында чох шеј демәк оларды, лакин Иса гәрара алды ки, диггәтини онун мүсбәт ҹәһәтинә, онун дүрүстлүјүнә ҹәмләшдирсин.
16 Бир дәфә бүтпәрәст, ола билсин, ромалы јүзбашы Исаја јахынлашыб өз хәстә гулуна шәфа вермәји хаһиш етдикдә, Иса бу һәрбичинин дә ҝүнаһсыз олмадығыны билдирди. Һәмин вахтлар јүзбашы, еһтимал ки, өмрү боју чохсајлы амансыз ишләр төрәдир, чохлу ганлар ахыдыр, үстәлик дә јаланчы танрылара ибадәт едирди. Анҹаг Иса диггәтини јахшы ҹәһәтә, һәмин инсанын ҝөзәл инамына ҹәмләшдирди (Матта 8:5-13). Сонрадан, Иса онунла бәрабәр ағаҹдан асылмыш ҹани илә сөһбәтиндә һәмин инсаны ҹинајәткар һәјатына ҝөрә мәзәммәт етмәди, анҹаг ҝәләҹәјә олан үмидлә руһландырды (Лука 23:43). Иса чох ҝөзәл билирди ки, башгаларына гаршы мәнфи вә тәнгиди мүнасибәт онлары јалныз сарсыдыр. Шүбһәсиз ки, Исанын башгаларында јахшы ҹәһәтләри ҝөрмәјә чалышмасы, онлары даһа јахшы давранмаға тәшвиг едирди.
Инсанлара хидмәт етмәјә һазыр олмаг
17, 18. Јер үзүнә ҝәлмәјә разылыг вермәклә, Иса башгаларына хидмәт етмәјә һазыр олдуғуну неҹә ҝөстәрди?
17 Исанын һәгигәти өјрәтдији инсанлара олан мәһәббәтинә даһа бир сүбут, онлара хидмәт етмәјә һазыр олмасыдыр. Аллаһын Оғлу, инсан кими мөвҹуд олана гәдәр дә һәмишә инсанлара бөјүк мәһәббәтлә јанашырды (Сүлејманын мәсәлләри 8:30, 31). Иса, Јеһованын “Кәлам”ы, јә’ни нүмајәндәси кими, чох ҝүман ки, инсанларла үнсијјәтдән мәмнунлуг дујурду (Јәһја 1:1). Бунунла белә, ҝөјдә јүксәк вәзифәсини гојуб “Өзүнү һеч едәрәк... гул сурәтинә” дүшүб, јер үзүнә ҝәлмәсинин сәбәбләриндән бири, инсанлары билаваситә шәхсән өјрәтмәк истәји олмушдур (Филипилиләрә 2:7; 2 Коринфлиләрә 8:9). Һәмчинин Иса јер үзүндә она хидмәт едәҹәкләрини ҝөзләмирди. Әксинә, о демишдир: “Инсан Оғлу Она хидмәт едилмәк үчүн дејил, хидмәт етмәјә вә бир чохлары үчүн ҹаныны фидијә олараг вермәјә ҝәлмишдир” (Матта 20:28). Иса бу сөзләрә там мүвафиг јашајырды.
18 Иса өјрәтдији инсанлара үрәкдән вахт вә гүввә сәрф едәрәк, онлара тәвазөкарлыгла хидмәт едирди. Иса фәалијјәтилә мүмкүн гәдәр даһа чох инсанлары әһатә етмәјә чалышараг, тәблиғ сәјаһәти заманы Вә’д едилән дијары долашаркән јүз километрләрлә јол гәт етмишди. Гүрурлу фәрисејләр вә дин алимләриндән фәргли олараг, о, тәвазөкар вә садә иди. Ән мүхтәлиф инсанлар — ә’јанлар, әсҝәрләр, гануншүнаслар, гадынлар, ушаглар, касыблар, хәстәләр вә һәтта ҹәмијјәтин туллантысы һесаб едилән кәсләр дә она һәвәслә вә горхмадан јахынлашырдылар. Иса камил олса да, инсан иди. О да јорулур, аҹлыг һисс едирди. Һәтта јоруланда, истираһәтә еһтијаҹ дујанда вә дуа етмәк үчүн тәкләнмәк истәјәндә белә, башгаларынын тәләбатларыны шәхси тәләбатларындан үстүн тутурду (Марк 1:35-39).
19. Иса шаҝирдләри илә мүнасибәтиндә тәвазөкарлыға, сәбир етмәјә вә хејирхаһлыға даир неҹә нүмунә ҝөстәрди?
19 Иса ејнилә өз шаҝирдләринә дә хидмәт етмәјә һазыр иди. О буну, шаҝирдләрини хејирхаһлыг вә сәбирлә өјрәдәрәк едирди. Әҝәр онлар узун мүддәт һансыса ваҹиб дәрсләри мәнимсәјә билмирдиләрсә, Иса үмидини үзмүр, өзүндән чыхмыр вә онлары мәзәммәт етмирди. О, бу вә ја диҝәр фикирләри мәнимсәмәкдә шаҝирдләринә көмәк етмәк үчүн, јени үсуллар тапмаға давам едирди. Мәсәлән, шаҝирдләрин араларында кимин бөјүк олдуғу мәсәләси үстүндә неҹә тез-тез мүбаһисә етдикләрини хатырлајаг. Амма е’дам едилдији ҝеҹәјә кими, Иса өз шаҝирдләрини бир-бирләри илә мүнасибәтдә тәвазөкар олмаға өјрәтмәк үчүн јени-јени үсуллар тапырды. Башга мәсәләләрдә олдуғу кими, Иса тәвазөкарлыға даир дә һаглы олараг белә дејә билди: “Сизә бир нүмунә ҝөстәрдим” (Јәһја 13:5-15; Матта 20:25; Марк 9:34-37).
20. Һансы тә’лим үсулу Исаны фәрисејләрдән фәргләндирирди вә бу үсул нәјә ҝөрә даһа еффектли иди?
20 Диггәт јетир ки, Иса неҹә давранмаг лазым олдуғуну шаҝирдләринә садәҹә демирди, онлара ‘нүмунә ҝөстәрирди’ — онлары өз нүмунәси илә өјрәдирди. О, шаҝирдләринә тә’лим верәркән өзүнү онлардан јүксәк тутмурду. Онларла елә давранмырды ки, санки вердији тә’лимә риајәт етмәк јалныз шаҝирдләрә аиддир. Фәрисејләр бу ҹүр давранырдылар. Иса онлар һаггында дејирди: “Сөјләрләр, амма әмәл етмәзләр” (Матта 23:3). Тә’лимләринин нә демәк олдуғуну, Иса һәмин тә’лимләрә ујғун тәвазөкарлыгла јашајараг, тәҹрүбәдә ҝөстәрирди. Мәсәлән, өз давамчыларыны вар-дөвләт јығмагдан чәкинәрәк садә һәјат сүрмәјә тәшвиг едән заман, онлара бунун нә демәк олдуғуну тәхмин етмәк лазым ҝәлмирди. Онлар Исанын сөзләринин әсл мә’насыны анлаја билирдиләр: “Түлкүләрин һини вә ҝөј гушларынын јувасы вардыр; инсан Оғлу исә башыны сөјкәмәјә јер тапмыр” (Матта 8:20). Иса шаҝирдләринә тәвазөкарлыгла нүмунә ҝөстәрәрәк, онлара хидмәт едирди.
21. Нөвбәти мәгаләдә һансы суал мүзакирә олунаҹагдыр?
21 Шүбһәсиз ки, Иса јер үзүндә јашамыш ән бөјүк Мүәллим иди! Онун вердији тә’лимә вә өјрәтдији инсанлара олан мәһәббәти, ону ҝөрән вә динләјән бүтүн һәлим инсанлара ашкар иди. Бу, Исанын нүмунәсини өјрәнән бизләр үчүн дә ашкардыр. Бәс Исанын камил нүмунәсинә биз неҹә риајәт едә биләрик? Бу суал нөвбәти мәгаләдә мүзакирә олунаҹагдыр.
Сиз неҹә ҹаваб верәрдиниз?
• Мүәллимлик баҹарығы нәјә әсасланыр вә бу, кимин нүмунәсиндән ҝөрүнүр?
• Иса өјрәтдији һәгигәтләрә гаршы неҹә мәһәббәт ҝөстәрирди?
• Иса һәгигәти өјрәтдији инсанлара гаршы неҹә мәһәббәт ҝөстәрирди?
• Һансы нүмунәләрдән ҝөрүнүр ки, Иса тә’лим вердији инсанлара тәвазөкарлыгла хидмәт етмәјә һазыр иди?
[8-ҹи сәһифәдәки шәкил]
Иса Аллаһын Кәламындакы принсипләри севдијини неҹә ҝөстәрди?