Јеһова сәнин гајғына галыр
“Бүтүн гајғынызы Онун [Аллаһын] үзәринә гојун, чүнки сизин гајғыныза галан Одур” (1 ПЕТЕР 5:7).
1. Јеһова вә Шејтан һансы ваҹиб саһәдә бир-бирләринә тамамилә зиддирләр?
ЈЕҺОВА вә Шејтан бир-бирләринә тамамилә зиддирләр. Јеһоваја јахынлашан инсанда Шејтана гаршы нифрәтдән савајы һеч бир һисс ојана билмәз. Бу тәзад “Британија енсиклопедијасы”нда гејд олунмушдур (“The Encyclopædia Britannica”, 1970). Бу мө’тәбәр арајыш китабчасында “Ејуб” китабына әсасән Шејтанын нә илә мәшғул олдуғу һаггында белә дејилир: “Шејтанын иши дүнјаны ‘долашыб’, һаггында пис дејә биләҹәји давранышлары вә ја инсанлары ахтармагдыр. Демәли, онун мәгсәди, јахшы олан һәр шеји мөһкәмләндирмәк үчүн јер үзүнү долашан “Рәббин ҝөзләри”нә зиддир” (II Тар. XVI, 9). Шејтан инсанларын тәмәннасыз етдикләри јахшылыға мәнфур шүбһә илә бахыр вә Аллаһын иҹазәси илә Шејтана јол верилир ки, инсанларын јахшылыға олан сә’јини Аллаһын нәзарәти алтында вә гојдуғу мәһдудијјәт дахилиндә сынасын. Бәли, Аллаһла Шејтан бир-бирләриндән неҹә дә кәскин шәкилдә фәргләнирләр! (Ејуб 1:6-12; 2:1-7).
2, 3. а) Ејубун башына ҝәләнләр “Иблис” сөзүнүн мә’насыны неҹә ајдынлашдырыр? б) Мүгәддәс Китаб неҹә ҝөстәрир ки, Шејтан һәлә дә Јеһованын јер үзүндә јашајан хидмәтчиләрини иттиһам едир?
2 Јунанҹа “Иблис” сөзү “јалан иттиһамчы”, “бөһтанчы” мә’наларыны верир. “Ејуб” китабы бизә ачыглајыр ки, Шејтан Аллаһын садиг хидмәтчиси Ејубу Аллаһа шәхси мәнфәәти үчүн хидмәт етмәкдә иттиһам етди. Иблис суал верди: “Ејуб Аллаһдан бошунамы горхур?” (Ејуб 1:9). “Ејуб” китабында ҝөстәрилир ки, башына ҝәлән бүтүн бәлалара бахмајараг, Ејуб Јеһова илә даһа да јахынлашды (Ејуб 10:9, 12; 12:9, 10; 19:25; 27:5; 28:28). Ејуб јашадығы ағыр сынаглардан сонра Аллаһа деди: “Сәнин һаггында гулағымла ешитмишдим; инди исә сәни ҝөзүм ҝөрдү” (Ејуб 42:5).
3 Ејубун вахтындан бәри Шејтан Аллаһын садиг хидмәтчиләрини иттиһам етмәјә сон гојубму? Хејр. “Вәһј” китабындан ҝөрүндүјү кими, Шејтан бу сон ҝүнләр әрзиндә Мәсиһин мәсһ едилмиш гардашларыны вә сөзсүз ки, онларын садиг һәмкарларыны иттиһам етмәјә давам едир (2 Тимотејә 3:12; Вәһј 12:10, 17). Буна ҝөрә дә, Исанын һәгиги давамчылары олан бизләрин һәр биринә, Јеһоваја сидги-үрәкдән хидмәт едәрәк вә бунунла да Шејтанын иттиһамларынын јалан олдуғуну сүбута јетирәрәк, гајғыкеш Аллаһымыза табе олмаг олдугҹа ваҹибдир. Белә давранмагла биз Јеһованын үрәјини севиндирәҹәјик (Сүлејманын мәсәлләри 27:11).
Јеһова бизә көмәк етмәк үчүн үсуллар ахтарыр
4, 5. а) Шејтандан фәргли олараг, Јеһова јер үзүндә нә ахтарыр? б) Јеһованын илтифатына саһиб олмаг үчүн биз нә етмәлијик?
4 Иблис кимисә иттиһам етмәјә вә ашырмаға ҹан атараг јер үзүнү долашыр (Ејуб 1:7, 9; 1 Петер 5:8). Јеһова исә Онун гүввәсинә еһтијаҹ дујан кәсләрә көмәк етмәк үчүн үсуллар ахтарыр. Пејғәмбәр Һанани Аса падшаһа демишдир: “Рәббин ҝөзләри, үрәкләри онунла бүтүн оланлар уғрунда гүввәтли олдуғуну ҝөстәрмәк үчүн бүтүн јер үзүндә фырланыр” (2 Тарихләр 16:9). Шејтанын мәкрли нәзарәти илә Јеһованын мәһәббәтли гајғысы арасында неҹә дә бөјүк фәрг вар!
5 Јеһова һәр бир чатышмазлығымызы вә ҝүнаһымызы ҝөрмәк үчүн бизи изләмир. Мәзмурчу јазырды: “Әҝәр нөгсанлары һесаба алсан, еј Јеһова, ја Рәбб, ким дура биләр?” (Мәзмур 130:3). Ајдындыр ки, һеч ким дура билмәз (Ваиз 7:20). Әҝәр Јеһоваја бүтүн үрәјимизлә јахынлашсаг, Онун ҝөзләри бизә тәрәф јөнәләҹәкдир. Лакин Онун мәгсәди бизи мүһакимә етмәк дејил, ҝөстәрдијимиз сә’ји ҝөрүб, көмәк етмәк вә бизи бағышламасы үчүн етдијимиз дуалара ҹаваб вермәкдир. Һәвари Петер јазырды: “Рәббин ҝөзләри салеһләрә, гулаглары онларын дуаларына тәрәф јөнәлмишдир. Рәббин үзү исә, пис иш ҝөрәнләрә гаршыдыр” (1 Петер 3:12).
6. Давудун башына ҝәлән һадисә неҹә бизә һәм тәсәлли ҝәтирир, һәм дә хәбәрдарлыг кими хидмәт едир?
6 Давуд гејри-камил инсан иди вә ағыр ҝүнаһ ишләтмишди (2 Самуел 12:7-9). Лакин о, үрәјини Јеһоваја ачмыш вә гызғын дуа васитәсилә Она јахынлашмышды (Мәзмур 51:1-12). Јеһова онун дуасыны ешидиб ҝүнаһыны бағышласа да, Давуд ишләтдији ҝүнаһын аҹы нәтиҹәләриндән гачына билмәмишди (2 Самуел 12:10-14). Давудун башына ҝәлән һадисә бизә һәм тәсәлли ҝәтирир, һәм дә бизим үчүн хәбәрдарлыг кими хидмәт едир. Әҝәр һәгигәтән дә төвбә едириксә, Јеһованын бизим ҝүнаһларымызы бағышламаға һазыр олдуғуну билмәк тәсәлли верир. Лакин бу, ҝүнаһларын адәтән өзү илә ҝәтирдији ҹидди нәтиҹәләрин дә үзәриндә дүшүнмәјә тәшвиг едир (Галатијалылара 6:7-9). Әҝәр биз Јеһоваја јахынлашмаг истәјириксә, Она хош ҝәлмәјән һәр бир шејдән баҹардыгҹа узаг дурмалыјыг (Мәзмур 97:10).
Јеһова хидмәтчиләрини Өзүнә ҹәлб едир
7. Јеһова неҹә инсанлары ахтарыр вә онлары Өзүнә неҹә ҹәлб едир?
7 Давуд мәзмурларындан бириндә јазмышдыр: “Рәбб јүксәк олса да, тәвазөкарлара бахар; фәгәт мәғруру узагдан таныјар” (Мәзмур 138:6). Белә бир фикир башга мәзмурда да дејилир: “Ҝөјләрдә вә јердә оланлара бахмаға тәнәззүл едән, јүксәкләрдә отуран, Аллаһымыз Рәбб кими ким вардыр? Дүшкүнү торпагдан галдырар” (Мәзмур 113:5-7). Бәли, Каинатын һәр шејә гадир Јарадыҹысы јерә бахмаға тәнәззүл едир вә Онун ҝөзләри ‘тәвазөкарлары’, ‘дүшкүнләри’ вә “бүтүн мәкруһ ишләрдән өтрү инләјиб фәған едән” инсанлары ҝөрүр (Һезекиел 9:4). Аллаһ бу ҹүр инсанлары Оғлунун васитәсилә Өзүнә ҹәлб едир. Иса јер үзүндә олан заман демишди: “Әҝәр Мәни ҝөндәрән Атам ҹәлб етмирсә, һеч ким Мәним јаныма ҝәлә билмәз... Әҝәр Ата она имкан вермәсә, һеч кимсә Мәним јаныма ҝәлә билмәз” (Јәһја 6:44, 65).
8, 9. а) Нәјә ҝөрә һәр биримиз Исанын јанына ҝәлмәјә еһтијаҹ дујуруг? б) Аллаһын фидијәни тәгдим етмәсиндә диггәтәлајиг олан нәдир?
8 Бүтүн инсанлар дүнјаја ҝүнаһ ичиндә ҝөз ачыб, Аллаһдан узаг олдугларына ҝөрә, Исанын јанына ҝәлмәли вә онун фидијә гурбанлығына иман етмәлидирләр (Јәһја 3:36). Инсанлар Аллаһла барышмаға мөһтаҹдырлар (2 Коринфлиләрә 5:20). Аллаһ ҝүнаһкарларын Онунла барышмаларыны тә’мин едәҹәк тәдбирләр ҝөрмәси үчүн, инсанларын Она јалвармаларыны ҝөзләмәди. Һәвари Павел јазырды: “Аллаһ бизә олан Өз мәһәббәтини бунунла сүбут едир ки, биз һәлә ҝүнаһкар икән Мәсиһ бизим уғрумузда өлдү. Чүнки әҝәр биз Аллаһын дүшмәнләри икән Онун Оғлунун өлүмү васитәси илә Аллаһла барышдыгса, барышмыш олараг Онун һәјаты илә хилас олаҹағымыз даһа чох гәтидир” (Ромалылара 5:8, 10).
9 Һәвари Јәһја Аллаһын инсанлары өзү илә барышдырдығына даир олан ваҹиб һәгигәти тәсдиг етди: “Аллаһын мәһәббәти биздә белә зүһур етмишдир: Аллаһ Өз јеҝанә Оғлуну дүнјаја ҝөндәрди ки, биз Онун васитәсилә һәјат алаг. Мәһәббәт бундан ибарәтдир ки, биз Аллаһы севмәдик, О бизи севди вә Өз Оғлуну бизим ҝүнаһларымызын әфвини тә’мин едән гурбан кими ҝөндәрди” (1 Јәһја 4:9, 10). Илк аддымы инсан јох, Аллаһ атмышдыр. Јалныз ‘ҝүнаһкарлара’ дејил, һәтта ‘дүшмәнләрә’ дә бу ҹүр мәһәббәт ҝөстәрән Аллаһа јахынлашмаг истәмәздинми? (Јәһја 3:16).
Јеһованы ахтармағын зәрурилији
10, 11. а) Јеһованы ахтармаг үчүн биз нә етмәлијик? б) Шејтанын пис системинә неҹә мүнасибәт бәсләмәлијик?
10 Билдијимиз кими, Јеһова бизи Она јахынлашмаға мәҹбур етмир. Биз Ону ахтармалыјыг ки, ‘бәлкә әл илә ахтарыб тапдыг. Чүнки О, һеч биримиздән узаг дејил’ (Һәвариләрин ишләри 17:27). Е’тираф етмәлијик ки, Јеһованын биздән Она табе олмағы тәләб етмәјә һаггы вар. Шаҝирд Јагуб јазырды: “Аллаһа табе олун, иблисә исә гаршы дурун вә о, сиздән гачаҹагдыр. Аллаһа јахынлашын, О да сизә јахынлашар. Еј ҝүнаһкарлар, әлләринизи тәмизләјин! Еј мүтәрәддидләр, үрәкләринизи сафлашдырын!” (Јагуб 4:7, 8). Биз ҝәрәк тәрәддүд етмәдән вә гәтијјәтлә Јеһованын тәрәфини тутаг, Иблисә исә гаршы дураг.
11 Бу, Шејтанын пис системиндән узаг олмаг демәкдир. Јагуб һәмчинин јазырды: “Мәҝәр билмирсиниз ки, дүнја илә достлуг Аллаһа гаршы дүшмәнчиликдир? Демәли, ким дүнјаја дост олмаг истәјирсә, өзүнү Аллаһын дүшмәни едир” (Јагуб 4:4). Әксинә, әҝәр Јеһованын достлары олмаг истәјириксә, Шејтан дүнјасынын бизә нифрәт едәҹәјинә һазыр олмалыјыг (Јәһја 15:19; 1 Јәһја 3:13).
12. а) Давуд һансы тәсәлливериҹи сөзләри јазмышдыр? б) Азарја пејғәмбәрин васитәсилә Јеһова нә барәдә хәбәрдарлыг етди?
12 Шејтанын дүнјасы бизә мүәјјән бир тәзјиг ҝөстәрән заман, Јеһовадан көмәк диләјәрәк дуада Она јахынлашмағымыз хүсусилә ваҹибдир. Јеһованын хиласкар әлини дәфәләрлә һисс етмиш Давуд тәсәлли үчүн бизә јазмышдыр: “Рәбб ону чағыранларын һамысына јахындыр, онлар ки, ону һәгигәтлә чағырырлар. Ондан горханларын диләјини јеринә јетирәр; вә фәрјадларыны ешидәр вә онлары гуртарар. Рәбб Ону севәнләрин һамысыны горујар; вә бүтүн писләри һәлак едәр” (Мәзмур 145:18-20). Бу мәзмурдан ҝөрүнүр ки, шәхсән биз сынагларла гаршылашан заман Јеһова бизи хилас едә биләр вә О, ‘бөјүк мәшәггәтдә’ халгыны үмумиликдә хилас едәҹәкдир (Вәһј 7:14). Әҝәр биз Јеһоваја јахын олсаг, О да бизә јахын олаҹагдыр. “Аллаһын руһу” алтында тәшвиг олунан Азарја, һәјатын һәр саһәсиндә тәтбиг едилә билән белә бир фикир ифадә етмишди: “Сиз Рәбб илә бәрабәр олдугҹа о сизинлә бәрабәрдир; вә сиз ону ахтарсаныз, өзүнү сизә тапдырар; фәгәт сиз ону тәрк етсәниз, сизи тәрк едәр” (2 Тарихләр 15:1, 2).
Јеһова бизим үчүн реал олмалыдыр
13. Јеһованын бизим үчүн реал олдуғуну неҹә ҝөстәрә биләрик?
13 Һәвари Павел Муса һаггында јазырды ки, о, “ҝөрүнмәјәни ҝөрүрмүш кими, мөһкәм дајанды” (Ибраниләрә 11:27). Әлбәттә ки, Муса һеч заман Јеһованы ҝөрмәмишди (Чыхыш 33:20). Лакин Јеһова онун үчүн о гәдәр реал иди ки, санки Ону ҝөрүрдү. Бунун кими, Ејуб да сынаглардан сонра Јеһованы иман ҝөзләри илә даһа ајдын ҝөрмәјә башлады. Ону садиг хидмәтчиләринин сынагларла гаршылашмаларына јол верән, ејни заманда исә һеч вахт онлары тәрк етмәјән бир Аллаһ кими даһа ҝөзәл анлады (Ејуб 42:5). Һанок вә Нуһ һаггында дејилир ки, онлар ‘Аллаһ илә јеријирдиләр’. Јә’ни онлар Аллаһы разы салмаға ҹан атыр вә Она итаәт едирдиләр (Тәквин 5:22-24; 6:9, 22; Ибраниләрә 11:5, 7). Әҝәр Јеһова Һанока, Нуһа, Ејуба вә Мусаја реал олдуғу гәдәр бизим үчүн дә реалдырса, онда бүтүн јолларымызда ‘Ону нәзәрә алаҹаг’, О исә бизим ‘јолларымызы доғрулдаҹагдыр’ (Сүлејманын мәсәлләри 3:5, 6, ЈД).
14. Јеһоваја “јапышмаг” нә демәкдир?
14 Исраиллиләр Вә’д едилән дијара дахил олмамышдан бир аз габаг Муса онлара мәсләһәт верди: “Аллаһыныз Рәббин ардынҹа јеријәҹәксиниз вә ондан горхаҹагсыныз вә онун әмрләрини тутаҹагсыныз вә онун сөзүнү динләјәҹәксиниз вә она гуллуг едәҹәксиниз вә она јапышаҹагсыныз” (Тәснијә 13:4). Онлар Јеһованын ардынҹа ҝетмәли, Ондан горхмалы, Она итаәт етмәли вә Она јапышмалы идиләр. Бир Мүгәддәс Китаб алими бурада “јапышмаг” кими тәрҹүмә олунан сөзүн “олдугҹа јахын, ән сых мүнасибәтләри ифадә етдијини” сөјләјир. Мәзмурчу демишдир: “Рәббин сирри [“Јеһова илә сых мүнасибәт”, ЈД] ондан горханларындыр” (Мәзмур 25:14). Әҝәр Јеһова бизим үчүн реалдырса вә Ону чох севдијимиздән һәр шејдә Ону мәмнун етмәк үчүн әлимиздән ҝәләни едириксә, о заман Јеһова илә дәјәрли, сых достлуға саһиб олаҹағыг (Мәзмур 19:9-14).
Јеһованын гајғысыны ҝөрүрсәнми?
15, 16. а) “Мәзмур” китабынын 34-ҹү фәсли Јеһованын бизим гајғымыза галдығыны неҹә ҝөстәрир? б) Јеһованын бизә неҹә мәрһәмәт ҝөстәрдијини хатырламаг чәтиндирсә, нә етмәк лазымдыр?
15 Шејтанын һијләләриндән бири одур ки, Аллаһымыз Јеһованын һәр заман өз садиг хидмәтчиләринин гајғысына галдығыны бизә унутдурсун. Исраилин падшаһы Давуд һәтта ән тәһлүкәли анда белә Јеһованын гајғысына шүбһә етмирди. О, Ҝат падшаһы Акишин өнүндә өзүнү дәли јеринә гојмаға мәҹбур олан заман, иманыны нөвбәти сөзләрлә ифадә етдији ҝөзәл бир мәзмур гошду: “Мәнимлә бәрабәр Рәббә тә’зим един вә исмини бирликдә јүксәлдәк. Рәбби арадым вә мәнә ҹаваб верди вә бүтүн горхуларымдан мәни азад етди. Рәббин мәләји ондан горханларын чеврәсиндә орду гурар вә онлары гуртарар. Дадын вә ҝөрүн; Рәбб нә јахшыдыр, нә бәхтијардыр она сығынан адам! Рәбб үрәји гырыг оланлара јахындыр вә руһу әзилмиш оланлары гуртарар. Салеһин дәрдләри чохдур; фәгәт Рәбб һамысындан ону азад едәр” (Мәзмур 34:3, 4, 7, 8, 18, 19; 1 Самуел 21:10-15).
16 Јеһованын хилас етмәјә гадир олдуғуна әминсәнми? Онун мәләкләр васитәсилә тәгдим етдији мүдафиәдән аҝаһсанмы? Јеһованын нә гәдәр јахшы олдуғуну шәхсән ‘дадыб ҝөрмүсәнми’? Јеһованын јахшы олдуғуну ахырынҹы дәфә нә вахт хүсусилә ајдын шәкилдә һисс етмисән? Јадына салмаға чалыш. Ола билсин, тәблиғ етдијин вә артыг давам едә билмәјәҹәјини дүшүндүјүн заман, сонунҹу гапынын зәнҝини басырсан вә будур, ев саһиби илә ҝөзәл сөһбәт башланыр. О ан сәнә лазыми гүввә вә хејир-дуа вердији үчүн Јеһоваја миннәтдарлығыны билдирдинми? (2 Коринфлиләрә 4:7). Јохса, Јеһованын сәнә мәрһәмәт ҝөстәрдији һансыса конкрет һадисәни хатырламаг чәтиндир? Бәлкә бир һәфтә, бир ај, бир ил, јахуд даһа әввәли хатырламаг лазым ҝәлир? Әҝәр беләдирсә, Јеһоваја јахынлашмаг вә сәни неҹә истигамәтләндирдијини ҝөрмәк үчүн нәјә ҝөрә дүшүнүлмүш аддымлар атмајасан? Һәвари Петер мәсиһчиләри чағырырды: “Аллаһын ҝүҹлү әлинин һимајәси алтында тәвазөкар олун... Бүтүн гајғынызы Онун үзәринә гојун, чүнки сизин гајғыныза галан Одур” (1 Петер 5:6, 7). Аллаһын сәнә нә гәдәр чох гајғы ҝөстәрдијинә тәәҹҹүбләнәҹәксән! (Мәзмур 73:28).
Јеһованы даима ахтар
17. Јеһованы даима ахтармаг үчүн нә етмәк лазымдыр?
17 Јеһова илә мүнасибәти горумаг даими просесдир. Иса дуада Атасына демишди: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3). Јеһованы вә Онун Оғлуну танымаг үчүн бизим тәрәфимиздән арамсыз сә’ј ҝөстәрмәк тәләб олунур. Дуанын вә мүгәддәс руһун көмәји олмадан “Аллаһын дәрин дүшүнҹәләрини” гавраја билмәрик (1 Коринфлиләрә 2:10; Лука 11:13). Биз, һәмчинин әглимизи “вахтлы-вахтында” верилән руһани гида илә гидаландырмаг үчүн “садиг вә ағыллы гул”ун рәһбәрлијинә мөһтаҹыг (Матта 24:45). Бу каналын васитәсилә Јеһова бизи Онун Кәламыны ҝүндәлик охумаға, мәсиһчи ҝөрүшләриндә мүнтәзәм иштирак етмәјә вә “Падшаһлыг һаггында олан... Мүждә”ни сә’јлә тәблиғ етмәјә чағырыр (Матта 24:14, И-93). Бу ҹүр давранараг, гајғыкеш Аллаһымыз Јеһованы даима ахтардығымызы ҝөстәрәҹәјик.
18, 19. а) Биз һансы саһәдә гәтијјәтли олмалыјыг? б) Әҝәр биз Иблисә гаршы дурсаг вә даима Јеһованы ахтарсаг, һансы хејир-дуалара наил олаҹағыг?
18 Шејтан, Јеһованын халгыны һәр тәрәфдән тә’гибә мә’руз гојмаг, мүгавимәт вә тәзјиг ҝөстәрмәк үчүн әлиндән ҝәләни едир. Иблис бизи сүлһдән вә Аллаһымызын илтифатындан мәһрум етмәјә чалышыр. О истәмир ки, биз сәмими гәлбли инсанлары ахтараг вә онлара һөкмранлыг һүгугу мәсәләсиндә Јеһованын тәрәфини тутмаға көмәк едәк. Лакин Аллаһын бизи шәрдән горујаҹағына үмид едәрәк, Јеһоваја садиг галмагда гәтијјәтли олмалыјыг. Әҝәр һәјатымызда Аллаһын Кәламыны рәһбәр тутур вә хидмәтдә Онун ҝөрүнән тәшкилаты илә бирҝә фәалијјәт ҝөстәририксә, әмин ола биләрик ки, Аллаһ һәмишә көмәјимизә јетәҹәкдир (Ишаја 41:8-13).
19 Буна ҝөрә дә ҝәлин һәр биримиз, бизи ‘мөһкәмләндирән вә гүввәтләндирән’ мәһәббәтли Аллаһымыз Јеһованы даима ахтарараг, Иблисә вә онун һијләләринә гаршы дурмаға гәтијјәтли олаг! (1 Петер 5:8-11). Беләликлә биз, ‘әбәди һәјата ҝәтирәҹәк олан Рәббимиз Иса Мәсиһин мәрһәмәтини ҝөзләјәрәк, өзүмүзү Аллаһын мәһәббәтиндә сахлајаҹағыг’ (Јәһуда 21).
Сиз неҹә ҹаваб верәрдиниз?
• “Иблис” сөзүнүн мә’насы нәдир вә Иблис бу мә’наны неҹә доғрулдур?
• Јер үзүндә јашајанлара нәзарәт етмәкдә Јеһованын мәгсәди Иблисин мәгсәдиндән неҹә фәргләнир?
• Нәјә ҝөрә Јеһоваја јахынлашмаг үчүн фидијә гурбанлығына иман ҝәтирмәк лазымдыр?
• Јеһоваја “јапышмаг” нә демәкдир вә биз Ону даима неҹә ахтара биләрик?
[15-ҹи сәһифәдәки шәкил]
Сынаглара бахмајараг, Ејуб анлады ки, Јеһова онун гајғысына галыр.
[16 вә 17-ҹи сәһифәләрдәки шәкилләр]
Мүгәддәс Китабы ҝүндәлик охумаг, мәсиһчи ҝөрүшләриндә мүнтәзәм иштирак етмәк вә тәблиғ ишиндә сә’јлә чалышмаг Јеһованын бизим гајғымыза галдығыны хатырладыр.