“Аллаһа јахынлашын”
“Аллаһа јахынлашын, О да сизә јахынлашар” (ЈАГУБ 4:8).
1, 2. а) Инсанлар тез-тез нәји иддиа едирләр? б) Јагуб һансы нәсиһәти вермишдир вә белә нәсиһәт нәјә ҝөрә лазым иди?
“АЛЛАҺ бизимләдир”. Бу сөзләр һәмишә милли рәмзләрин вә һәтта рәсми әсҝәр ҝејимләринин бәзәји олмушдур. “Аллаһа ҝүвәнирик” јазысы сајсыз-һесабсыз мүасир пулларын үзәриндә һәкк олунмушдур. Аллаһла сых мүнасибәтдә олдугларыны иддиа етмәк инсанлара хас олан хүсусијјәтдир. Лакин разылашмаг лазымдыр ки, бу ҹүр мүнасибәтләрә һәгигәтән дә саһиб олмаг үчүн, бу һагда тәкҹә данышмагдан вә шүарларда е’лан етмәкдән даһа артыг шеј тәләб олунур.
2 Мүгәддәс Китабда ҝөстәрилир ки, Аллаһла гаршылыглы мүнасибәтә саһиб олмаг мүмкүндүр. Лакин бунун үчүн гүввә тәләб олунур. Һәтта биринҹи әсрдә јашамыш бә’зи мәсһ едилмиш мәсиһчиләр белә Јеһова Аллаһла олан мүнасибәтләрини мөһкәмләтмәли идиләр. Мәсиһчи нәзарәтчиси Јагуб, кимләрисә ҹисмани еһтираслардан вә руһани тәмизлији итирмәк тәһлүкәсиндән чәкиндирмәји лазым билмишдир. Онун вердији нәсиһәтләрин арасында белә бир дүшүндүрүҹү нәсиһәт дә вар: “Аллаһа јахынлашын, О да сизә јахынлашар” (Јагуб 4:1-12). “Јахынлашын” дедикдә Јагуб нәји нәзәрдә тутурду?
3, 4. а) Јагубун мәктубуну биринҹи әсрдә охујан бә’зиләринә “Аллаһа јахынлашын” ифадәси нәји хатырлада биләрди? б) Нәјә ҝөрә әмин ола биләрик ки, Аллаһа јахынлашмаг мүмкүндүр?
3 Јагубун истифадә етдији ифадә онун мәктубуну охујан кәсләрин әксәријјәтинә таныш иди. Халга васитәчилик едәрәк Јеһоваја ‘јахынлашмаг’ барәдә Мусанын ганунунда каһинләрә конкрет ҝөстәришләр верилмишди (Чыхыш 19:22). Бунунла да Јагубун мәктубуну охујанлара хатырладылырды ки, Јеһоваја јахынлашмаг имканыны ади шеј санмаг олмаз. Јеһова Каинатда ән јүксәк еһтирам саһибидир.
4 Мүгәддәс Китаб үзрә бир алимин гејд етдији кими, “[Јагуб 4:8 ајәсиндәки] бу чағырыш никбинликлә долудур”. Јагуб билирди ки, Јеһова гејри-камил инсанлары Она јахынлашмаға һәмишә мәһәббәтлә дә’вәт едир (2 Тарихләр 15:2). Исанын фидијә гурбанлығы Јеһоваја јахынлашмаг үчүн инсанлара даһа ҝениш јол ачды (Ефеслиләрә 3:11, 12). Бу ҝүн милјонларын Аллаһа јахынлашмаг имканы вар! Бәс бу ҝөзәл имкандан биз неҹә истифадә едә биләрик? Ҝәлин, Јеһова Аллаһа неҹә јахынлашмағын үч үсулуну гысаҹа олараг нәзәрдән кечирәк.
Аллаһы ‘танымаға’ давам ет
5, 6. Ҝәнҹ Самуелин нүмунәси Аллаһы ‘танымағын’ өзүнә нәји дахил етдијини неҹә ҝөстәрир?
5 Иса Јәһја 17:3 ајәсинә әсасән демишдир: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар”. Бурада “Аллаһы... танысынлар” дедикдә Иса нәји нәзәрдә тутурду? Бир сыра алимләр гејд едирләр ки, гәдим јунан мәтниндә истифадә олунан бу сөз бир гәдәр ҝениш мә’на дашыјыр: бу, киминләсә олдугҹа јахын танышлыға ҝәтириб чыхара билән давамедиҹи просеси нәзәрдә тутур.
6 Исанын ҝүнләриндә Аллаһы јахындан танымағын мүмкүн олмасы фикри јени дејилди. Мәсәлән, Ибраниҹә Мүгәддәс Јазыларда охујуруг ки, Самуел кичик јашларында икән “һәлә Рәбби танымырды” (1 Самуел 3:7). Бу о демәкдирми ки, Самуел Аллаһы тамамилә аз таныјырды? Хејр. Валидејнләри вә каһинләр, сөзсүз ки, она чох шеј өјрәтмишдиләр. Лакин бир алимин фикринҹә, бу ајәдә истифадә олунан гәдим ибрани сөзү “ән јахын танышлыға даир истифадә едилә” биләр. Самуел сонрадан Јеһованын адындан данышдығы дөврдә олдуғу кими, Аллаһы һәлә о дәрәҹәдә јахындан танымырды. Лакин бөјүдүкҹә, Самуел Аллаһла јахын мүнасибәтләр әлдә едәрәк Ону даһа јахшы таныды (1 Самуел 3:19, 20).
7, 8. а) Мүгәддәс Китабын дәрин тә’лимләри бизи нәјә ҝөрә горхутмалы дејил? б) Аллаһын Кәламынын һансы дәрин һәгигәтләрини өјрәнмәк бизә фајдалы оларды?
7 Јеһова илә јахын мүнасибәтләр әлдә етмәк үчүн Ону танымаға давам едирсәнми? Бунун үчүн Аллаһын тәгдим етдији руһани гиданы ‘арзуламаг’ лазымдыр (1 Петер 2:2). Мүгәддәс Китабын әсас тә’лимләри илә кифајәтләнмә. Онун даһа дәрин тә’лимләрини өјрәнмәјә чалыш (Ибраниләрә 5:12-14). Бәлкә бу ҹүр тә’лимләр өзүнүн мүрәккәблији илә сәни горхудур? Әҝәр еләдирсә, Јеһованын “Даһи Тә’лиматчы” олдуғуну унутма (Ишаја 30:20, ЈД). О, бизим гејри-камиллијимизи нәзәрә алараг, дәрин һәгигәтләри неҹә чатдырмағы билир. Аллаһ, Онун өјрәтдикләрини анламағын үчүн сәмими гәлбдән ҝөстәрдијин сә’јләрә хејир-дуа да верә биләр (Мәзмур 25:4).
8 “Аллаһын дәринликләри” һаггындакы билијини нәјә ҝөрә јохламајасан? (1 Коринфлиләрә 2:10, И–93). Бунлар илаһијјатчыларын вә руһаниләрин мүбаһисә етдикләри гуру мөвзулар дејил. Бунлар ҹанлы тә’лимләрдир ки, мәһәббәтли Атамызын ағлында вә үрәјиндә оланлары гаврамағымыза јол ачыр. Мәсәлән, фидијә, “мәхфи... һикмәт” вә Јеһованын өз халгына хејир-дуа верәрәк нијјәтләрини јеринә јетирмәкдә истифадә етдији мүхтәлиф әһдләрин, о ҹүмләдән чохлу башга мөвзуларын шәхсән тәдгиги бөјүк мәмнунлуг вә хејли фајда ҝәтирәҹәкдир (1 Коринфлиләрә 2:7).
9, 10. а) Мәғрурлуг һисси нәјә ҝөрә тәһлүкәлидир вә ондан гачынмаға бизә нә көмәк едәр? б) Јеһова һаггында билијә ҝәлдикдә нәјә ҝөрә тәвазөкар олмаға сә’јлә чалышмалыјыг?
9 Дәрин руһани һәгигәтләри өјрәнәрәк, билијин ҝәтирә биләҹәји мәғрурлуг кими тәһлүкәдән гачынын (1 Коринфлиләрә 8:1). Мәғрурлуғун тәһлүкәси ондадыр ки, о инсанлары Аллаһдан узаглашдырыр (Сүлејманын мәсәлләри 16:5; Јагуб 4:6). Унутма ки, һеч бир инсанын өз билији илә өјүнмәјә сәбәби јохдур. Мисал үчүн, сон елми кәшфләрә һәср едилән китабын өн сөзүндә јазылмыш фикирләрә диггәт јетирәк: “Нә гәдәр чох өјрәнириксә, бир о гәдәр дә аз билдијимизи анлајырыг.... Билдикләримизин һамысы һәлә өјрәнәҹәкләримизлә мүгајисәдә һечдир”. Бу ҹүр тәвазөкарлыг хошдур. Билијин даһа ҝениш саһәсинә — Јеһова Аллаһ һаггындакы билијә ҝәлдикдә исә, тәвазөкар олмағымыза сәбәб даһа чохдур. Нәјә ҝөрә?
10 Мүгәддәс Китабда Јеһова һаггында дејиләнләрә диггәт јетирәк. “Дүшүнҹәләрин чох дәриндир” (Мәзмур 92:5). “[Јеһованын] анлајышына һесаб јохдур” (Мәзмур 147:5). “Онун анлајышынын дәринлијинә јетишмәк олмаз” (Ишаја 40:28). “Еј Аллаһын зәнҝинлик вә һикмәт вә елминин дәринлији!” (Ромалылара 11:33). Бәли, биз Јеһова һаггында һеч заман һәр шеји өјрәнә билмәрик (Ваиз 3:11). О, бизә чохлу ҝөзәл шејләр өјрәдиб, лакин һәлә дә гаршымызда өјрәниләҹәк чох шејләр дурур. Бу ҹүр имканын мөвҹудлуғу бизи валеһ олмаға вә тәвазөкарлыға тәшвиг етмирми? Буна ҝөрә дә, ҝәлин, әлдә етдијимиз биликләри башгалары үзәриндә өзүмүзү јүксәлтмәк үчүн дејил, һәмишә Јеһоваја јахынлашмаг вә бу ишдә јахынларымыза көмәк етмәк үчүн истифадә едәк (Матта 23:12; Лука 9:48).
Јеһоваја олан мәһәббәтини әмәлдә ҝөстәр
11, 12. а) Јеһова һаггында әлдә етдијимиз биликләр бизә неҹә тә’сир етмәлидир? б) Аллаһа мәһәббәтин һәгиги олдуғуну неҹә мүәјјән етмәк олар?
11 Һәвари Павелин билији мәһәббәтлә әлагәләндирмәси тәсадүфи дејил. О јазыр: “Дуа едирәм ки, мәһәббәтиниз билик вә һәр ҹүр идрак бахымындан ҝетдикҹә даһа чох артсын” (Филипилиләрә 1:9). Буна ҝөрә Јеһова вә Онун нијјәтләри һаггында өјрәндијимиз һәр бир дәјәрли һәгигәт мәғрурлуға сәбәб олмалы дејил, әксинә, сәмави Атамыза олан мәһәббәтимизи артырмагда бизә көмәк етмәлидир.
12 Бәли, чохлары Аллаһы севдикләрини иддиа етсәләр дә, әслиндә бу белә дејил. Ола билсин ки, онлар өз ҝүҹлү һиссләриндә сәмимидирләр. Бу ҹүр һиссләр дәгиг биликләрә мүвафигдирсә, јахшыдыр, һәтта тә’рифәлајигдир. Лакин инсанын бу билијә саһиб олмасы Аллаһы һәгигәтән дә севдијинә дәлаләт етмир. Нәјә ҝөрә? Бу ҹүр мәһәббәтин Аллаһын Кәламында неҹә мүәјјән едилдијинә диггәт јетирәк: “Аллаһы севмәк, Аллаһын әмрләринә риајәт етмәк демәкдир” (1 Јәһја 5:3). Демәли, Аллаһа мәһәббәти јалныз о заман һәгиги адландырмаг олар ки, бу мәһәббәт итаәткарлыгда тәзаһүр етдирилсин.
13. Аллаһ горхусу Јеһованы севдијимизи әмәлдә ҝөстәрмәјә неҹә көмәк едә биләр?
13 Јеһоваја итаәткар олмагда бизә Аллаһ горхусу көмәк едә биләр. Јеһоваја олан бу бөјүк еһтирам вә дәрин һөрмәт, Онун сонсуз мүгәддәслији, шөһрәти, гүввәси, әдаләти, мүдриклији вә мәһәббәти һаггында өјрәнәрәк Ону танымағымызын сајәсиндә јараныр. Бу ҹүр горху олмадан Аллаһа јахынлашмаг мүмкүн дејил. Мәзмур 25:14 ајәсиндә дејиләнләрә диггәт јетирәк: “Рәббин сирри [“Јеһова илә сых мүнасибәт”, ЈД] ондан горханларындыр; вә әһдини онлара билдирир”. Беләликлә, әҝәр биздә севимли сәмави Атамызы мәмнун етмәмәк кими сағлам горху варса, Она јахынлаша биләрик. Аллаһ горхусу Сүлејманын мәсәлләри 3:6 (ЈД) ајәсиндә јазылан мәсләһәтә диггәт јетирмәјә көмәк едәҹәкдир: “Бүтүн јолларында Ону нәзәрә ал вә О, сәнин јолларыны доғрулдаҹагдыр”. Бу нә демәкдир?
14, 15. а) Ҝүндәлик һәјатымызда һансы гәрарлары гәбул етмәли олуруг? б) Гәрарларымызда Аллаһ горхусу неҹә әкс олуна биләр?
14 Биз һәр ҝүн истәр хырда, истәрсә дә бөјүк мәсәләләрә даир гәрар гәбул етмәлијик. Мәсәлән, иш јолдашларынла, синиф јолдашларынла, гоншуларынла нә һагда данышаҹагсан? (Лука 6:45). Сәнә һәвалә едилән тапшырыға виҹданламы јанашаҹагсан, јохса мүмкүн гәдәр ҹаныны ондан тез гуртармаға чалышаҹагсан? (Колослулара 3:23). Јеһоваја аз, јахуд үмумијјәтлә мәһәббәт ҝөстәрмәјән кәсләрлә јахынлыг едәҹәксән, јохса руһани инсанларла мүнасибәтини мөһкәмләдәҹәксән? (Сүлејманын мәсәлләри 13:20). Аз да олса, Аллаһын Падшаһлығынын мараглары үчүн нә едә биләрсән? (Матта 6:33). Әҝәр ҝүндәлик гәрарларында Мүгәддәс Китабын јухарыда ҝәтирилән принсипләрини рәһбәр тутурсанса, онда сән һәгигәтән дә “бүтүн јолларында” Јеһованы нәзәрә алмыш олурсан.
15 Һәр һансы гәрары гәбул етдикдә бу ҹүр фикирләри рәһбәр тутмалыјыг: Јеһова мәндән нә ҝөзләјир? Ону даһа чох мәмнун етмәк үчүн неҹә давранмаг лазымдыр? (Сүлејманын мәсәлләри 27:11). Аллаһ горхусуну бу јолла ҝөстәрмәк, Јеһоваја мәһәббәт тәзаһүр етдирмәјин ән ҝөзәл үсулудур. Аллаһ горхусу бизи һәмчинин руһани, әхлаги вә физики ҹәһәтдән тәмизлији горумаға да тәшвиг едәҹәкдир. Хатырлајаг ки, “Аллаһа јахынлашын” дејә мәсиһчиләри тәшвиг етдији елә һәмин ајәдә Јагуб һәмчинин дејир: “Еј ҝүнаһкарлар, әлләринизи тәмизләјин! Еј мүтәрәддидләр, үрәкләринизи сафлашдырын!” (Јагуб 4:8).
16. Јеһованын јолунда нә исә вермәклә биз нәјә һеч заман мүвәффәг олмајаҹағыг, лакин нәјә һәмишә наил ола биләҹәјик?
16 Јеһоваја мәһәббәт ҝөстәрмәк, сөзсүз ки, өзүнә садәҹә пислик етмәмәкдән савајы даһа чох шеји дахил едир. Мәһәббәт бизи јахшылыг етмәјә дә тәшвиг едир. Мәсәлән, биз Јеһованын сонсуз сәхавәтинә неҹә јанашырыг? Јагуб јазырды: “Һәр бир јахшы бәхшиш вә һәр камил һәдијјә јухарыдан, нурлар Атасындан ҝәлир” (Јагуб 1:17). Ајдындыр ки, Јеһованын јолунда нә исә вермәклә, Ону зәнҝинләшдирмирик. Онсуз да дүнјада нә варса һамысы Она мәхсусдур (Мәзмур 50:12). Вахт вә гүввәмизи Јеһова үчүн һәср етдикдә, санки Онун башга јолла тә’мин едә билмәдији һансыса бир тәләбатыны тә’мин етмиш олмуруг. Һәтта әҝәр биз Аллаһын Падшаһлығы һаггындакы хош хәбәри тәблиғ етмәји дајандырсаг да, Онун әмринә ҝөрә дашлар белә дилә ҝәләр! Бәс онда нәјә ҝөрә Јеһова үчүн мадди имканымызы, вахтымызы вә гүввәмизи һәср етмәк лазымдыр? Илк нөвбәдә она ҝөрә ки, бу јолла биз Она олан мәһәббәтимизи бүтүн үрәјимизлә, ҹанымызла, дүшүнҹәмизлә вә гүввәтимизлә ҝөстәрмиш олуруг (Марк 12:29, 30).
17. Јеһоваја севинҹлә вермәјимизә нә көмәк едә биләр?
17 Јеһова үчүн нә исә етдикдә, биз буну севинҹлә етмәлијик, чүнки “Аллаһ севинҹлә верәни севир” (2 Коринфлиләрә 9:7, И–93). Тәснијә 16:17 ајәсиндәки принсип севинҹлә вермәкдә бизә көмәк едә биләр: “Аллаһын Рәббин сәнә вердији бәрәкәтә ҝөрә һәр кәс әлиндән ҝәлдији гәдәр верәҹәк”. Јеһованын бизә гаршы нә гәдәр сәхавәтли олдуғу һагда дүшүндүкдә, Онун јолунда һәр шеји севинҹлә етмәјә биздә һәвәс ојаныр. Бу Ону, севимли өвладын кичик һәдијјәси валидејнләри севиндирдији кими севиндирир. Мәһәббәтимизи бу јолла ҝөстәрмәк, Јеһоваја јахынлашмағымыза көмәк едәҹәкдир.
Дуа васитәсилә јахын мүнасибәтләр әлдә етмәјә чалыш
18. Нәјә ҝөрә дуаларымызы неҹә јахшылашдырмаг барәдә фикирләшмәјә дәјәр?
18 Шәхси дуаја ајырдығымыз дәгигәләр, сәмави Атамызла ҝизли шејләр барәдә е’тибарлы сөһбәт үчүн бизә дәјәрли имкан верир (Филипилиләрә 4:6). Аллаһа јахынлашмагда дуа олдугҹа ваҹиб мә’на дашыдығы үчүн, бир ан дајаныб неҹә дуа етдијимизи дүшүнмәјә дәјәр. Дуаларын бәлағәтли вә гәшәнҝ олмасы мүтләг дејил, әсас одур ки, сәмими вә үрәкдән олсун. Дуаларымызы неҹә јахшылашдыра биләрик?
19, 20. Дуа етмәздән габаг нәјә ҝөрә дүшүнмәк лазымдыр вә һансы мүвафиг суалларын үзәриндә дүшүнмәјә дәјәр?
19 Дуа етмәздән габаг бир аз дүшүнмәк олар. Әҝәр биз габагҹадан дүшүнсәк, етдијимиз дуалар конкрет вә мә’налы олаҹагдыр вә биз дәрһал ағлымыза ҝәлән таныш ифадәләри тәкрар етмәјәҹәјик (Сүлејманын мәсәлләри 15:28, 29). Ола билсин, Исанын нүмунәви дуасында нәјә тохундуғунун үзәриндә дүшүнмәк вә бунун бизим вәзијјәтимизлә неҹә бағлы олдуғуну нәзәрдән кечирмәк фајдалы олар (Матта 6:9-13). Мисал үчүн, өзүмүздән соруша биләрик: Јеһованын ирадәсинин јер үзүндә иҹра олунмасы үчүн һансы кичик бир иши ҝөрмәк истәрдик? Мүмкүн гәдәр Јеһоваја фајдалы олмаг истәјимизи Она билдирмәјә вә бизә һәвалә етдији һәр бир тапшырығы иҹра етмәк үчүн Ондан көмәк диләмәјә дәјмәзми? Мадди тәләбатларын гајғысы бизә ағырлыг едирми? Һансы ҝүнаһларын бағышланмасына еһтијаҹ дујуруг вә кими даһа чох бағышламалыјыг? Һансы сынагларла гаршылашырыг вә Јеһованын бизи онлардан мүдафиә етмәсинә нә дәрәҹәдә еһтијаҹ дујдуғумузу дәрк едирикми?
20 Бундан савајы, Јеһованын көмәјинә хүсусилә еһтијаҹ дујан танышларымыз һаггында да дүшүнмәк олар (2 Коринфлиләрә 1:11). Миннәтдарлыг етмәји дә унутмалы дејилик. Әҝәр бир ан дајаныб дүшүнсәк, сөзсүз ки, миннәтдар олмаг вә һәр ҝүн Ону иззәтләндирмәк үчүн Јеһованын бол-бол хејирхаһлығыны ҝөрәҹәјик (Тәснијә 8:10; Лука 10:21). Бунун фајдалы олмасынын сәбәбләриндән бири дә ондан ибарәтдир ки, бу, һәјата даһа мүсбәт вә даһа чох миннәтдарлыг һисси илә бахмагда бизә көмәк едәҹәкдир.
21. Һансы Мүгәддәс Китаб нүмунәләрини өјрәнмәјимиз Јеһоваја дуада мүраҹиәт етмәјимизә көмәк едә биләр?
21 Өјрәнмәнин сајәсиндә дә дуаларымызы јахшылашдыра биләрик. Аллаһын Кәламында чохлу садиг киши вә гадынларын ибрәтамиз дуалары јазылыб. Мәсәлән, әҝәр гаршымызда һәјәҹан доғуран вә шәхси рифаһымыз, јахуд бизә әзиз адамларын рифаһы үчүн ҹидди тәһлүкәләр јарадан бөјүк чәтинликләр дурурса, онда Јагубун гисасчы гардашы Есавла ҝөрүшмәздән әввәл етдији дуаны охумаг олар (Тәквин 32:9-12). Јахуд милјона јахын һәбәшистанлы ордулары Аллаһын халгына һәдә-горху ҝәлән заман Аса падшаһын етдији дуаны диггәтлә нәзәрдән кечирмәк олар (2 Тарихләр 14:11, 12). Јеһованын тәмиз адына ләкә ҝәтирә биләҹәк һансыса бир проблем бизә раһатлыг вермирсә, о заман Кармел дағында Баалын пәрәстишкарлары гаршысында Илјасын етдији дуаны, һәмчинин Јерусәлимин ағлар вәзијјәтинә ҝөрә Неһемјанын етдији дуаны охумаға дәјәр (1 Краллар 18:36, 37; Неһемја 1:4-11). Бу ҹүр дуалары охујуб, үзәриндә дүшүнән заман иманда мөһкәмләнир вә бизә әзијјәт верән бир шејә даир Јеһоваја даһа јахшы неҹә мүраҹиәт етмәји анлајырыг.
22. 2003-ҹү илин иллик ајәси неҹә сәсләнир вә бу ил әрзиндә вахташыры өзүмүздән нә соруша биләрик?
22 Бәли, Јагубун “Аллаһа јахынлашын” чағырышына риајәт етмәкдән бөјүк шәрәф вә ҝөзәл мәгсәд јохдур (Јагуб 4:8). Буну исә, Аллаһ һаггында биликдә бөјүјәрәк, Она олан мәһәббәтимизи даһа чох тәзаһүр етдирмәјә вә дуа васитәсилә Онунла јахын мүнасибәтләр инкишаф етдирмәјә чалышараг едә биләрик. Ҝәлин, 2003-ҹү илдә Јагуб 4:8 ајәсиндән олан иллик ајәни јадда сахлајараг, Јеһоваја һәгигәтән дә јахынлашыб-јахынлашмадығымызы јохламаг үчүн өзүмүзә нәзәр салаг. Бәс иллик ајәнин икинҹи һиссәси һаггында нә демәк олар? Һансы мә’нада Јеһова бизә “јахынлашар” вә бу өзү илә һансы хејир-дуалары ҝәтирәҹәк? Бу һагда сөһбәт нөвбәти мәгаләдә ҝедәҹәкдир.
Јадыныздадырмы?
• Јеһоваја јахынлашмаг имканына нәјә ҝөрә ҹидди јанашмалыјыг?
• Јеһова һаггында билик әлдә етмәклә бағлы гаршымыза һансы мәгсәдләри гоја биләрик?
• Јеһованы һәгигәтән дә севдијимизи неҹә ҝөстәрә биләрик?
• Дуада Јеһоваја даһа чох јахынлашмагда бизә нә көмәк едә биләр?
[12-ҹи сәһифәдәки јазы]
2003-ҹү илин иллик ајәси белә сәсләнәҹәкдир: “Аллаһа јахынлашын, О да сизә јахынлашар” (Јагуб 4:8).
[8 вә 9-ҹу сәһифәләрдәки шәкил]
Бөјүдүкҹә Самуел Јеһованы даһа јахшы таныды.
[12-ҹи сәһифәдәки шәкил]
Илјасын Кармел дағында етдији дуа бизим үчүн јахшы нүмунәдир.