“Ојаг дурун!”

“Сизә нә сөјләјирәмсә, һамыја сөјләјирәм: Ојаг дурун!” (МАРК 13:37).

1, 2. а) Өз мүлкүнү горумаға даир бир нәфәр һансы ибрәт дәрсини ҝөтүрдү? б) Исанын оғру илә әлагәдар ҝәтирдији мәсәлдән ојаг дурмағын ваҹиблији һаггында нә өјрәнирик?

ХУАН гијмәтли әшјаларыны евдә сахлајырды. О, һәмин шејләри чарпајысынын алтында — онун фикринҹә ән тәһлүкәсиз јердә ҝизләдирди. Лакин ҝеҹәнин бириндә, Хуан вә арвады јатаркән, оғру јатаг отағына ҝирир. Ҝөрүнүр, оғру һараны ахтармаг лазым олдуғуну билирмиш. Оғру сәссизҹә чарпајынын алтында олан бүтүн гијмәтли шејләри, һәмчинин Хуанын сијиртмәјә гојдуғу пуллары ҝөтүрдү. Сәһәри ҝүн Хуан сојулдуғуну баша дүшдү. Өз аҹы тәҹрүбәсиндә өјрәндији ибрәт дәрси узун мүддәт Хуанын хатирәсиндән силинмәјәҹәкдир: јатмыш адам өз мүлкүнү горуја билмәз.

² Бу, руһани ҹәһәтдән дә беләдир. Әҝәр јатсаг, үмидимизи вә иманымызы горуја билмәрик. Буна ҝөрә дә Павел нәсиһәт верирди: “Диҝәрләри кими јатмајаг; лакин ојаг дуруб ајыг олаг” (1 Салониклиләрә 5:6). Ојаг дурмағын нә гәдәр ваҹиб олдуғуну ҝөстәрмәк үчүн, Иса оғру илә бағлы бир мәсәл чәкди. Иса өзүнүн Һаким тимсалында ҝәлишиндән габаг баш верәҹәк һадисәләри тәсвир едиб, сонра хәбәрдарлыг етди: “Беләликлә, ојаг дурун; чүнки Рәббинизин һансы ҝүн ҝәләҹәјини билмәзсиниз. Амма буну билин ки, әҝәр ев саһиби оғрунун һансы саатда ҝәләҹәјини билсәјди, ојаг галыб өз евини оғурламаға гојмазды. Бунун үчүн сиз дә һазыр олун; чүнки Инсан Оғлу сизин зәнн етмәдијиниз саатда ҝәләҹәкдир” (Матта 24:42-44). Оғру өз ҝәлиши барәдә әввәлҹәдән хәбәр вермир. Онун мәгсәди һеч кимин ону ҝөзләмәдији вахтда ҝәлмәкдир. Буна бәнзәр шәкилдә, Исанын дедији кими, бу системин дә сону бизим ‘зәнн етмәдијимиз саатда ҝәләҹәкдир’.

“Ајыг олун, иманда сабит дурун”

3. Иса тојдан гајыдан ағаларынын ҝәлишини ҝөзләјән гулларын нүмунәсиндә ојаг дурмағын ваҹиблијини неҹә ҝөстәрди?

³ Луканын Мүждәсинә әсасән Иса мәсиһчиләри, тојдан гајыдан ағанын ҝәлишини ҝөзләјән гулларла мүгајисә етмишдир. Онлар ојаг дурмалы идиләр ки, ағалары ҝәлдикдә јатмасынлар вә ону гаршылаја билсинләр. Ејнилә дә Исанын сөзләринә ҝөрә ‘Инсан Оғлу бизим зәнн етмәдијимиз саатда ҝәләҹәкдир’ (Лука 12:40). Јеһоваја артыг узун илләр хидмәт едән инсанларын бә’зиләри ојаглыгларыны итириб, һансы вахтда јашадығымызы нәзәрдән гачыра биләрләр. Онлар, һәтта белә бир гәрара ҝәлә биләрләр ки, сонун ҝәлмәсинә, ола билсин, һәлә чох вар. Лакин бу ҹүр дүшүнҹә тәрзи бизим диггәтимизи руһани шејләрдән јајындырараг вә мадди мәгсәдләр ҝүдмәјә јөнәлдәрәк руһән мүрҝүләмәјимизә сәбәб ола биләр (Лука 8:14; 21:34, 35).

4. Нәјә әмин олмағымыз бизи сајыг олмаға тәшвиг едәҹәкдир вә Иса буну неҹә ҝөстәрди?

⁴ Биз Исанын чәкдији мәсәлдән даһа бир дәрс ҝөтүрә биләрик. Ҝөрүнүр, гуллар ағанын һансы саатда ҝәләҹәјини билмәсәләр дә, онун һансы ҝеҹә ҝәләҹәјиндән хәбәрдар идиләр. Әҝәр онлар ағаларынын башга бир ҝеҹә ҝәлә биләҹәјини дүшүнсәјдиләр, онда сүбһәҹән ојаг галмаг чәтин оларды. Лакин ҝөрүндүјү кими, онлар ағаларынын һансы ҝеҹә ҝәләҹәјини билирдиләр вә бу, онларын ојаг дурмалары үчүн ҝүҹлү стимул иди. Индики вәзијјәт дә буна чох бәнзәјир. Мүгәддәс Китаб пејғәмбәрликләри ајдын ҝөстәрир ки, биз сонун вахтында јашајырыг, лакин һәмин пејғәмбәрликләр сонун мәһз һансы ҝүн вә һансы саатда ҝәләҹәјини демир (Матта 24:36). Сонун ҝәләҹәјинә иман етмәјимиз бизә ојаг дурмаға көмәк едир, амма әҝәр Јеһованын ҝүнүнүн һәгигәтән дә јахын олдуғуна әминиксә, ајыг олмаға даһа ҝүҹлү тәшвиг дујаҹағыг (Тсефанја 1:14).

5. Павелин “ојаг дурун” тәшвигинә неҹә һај верә биләрик?

⁵ Павел Коринфлиләрә олан мәктубунда тәшвиг едирди: “Ајыг олун, иманда сабит дурун” (1 Коринфлиләрә 16:13). Бәли, ојаг дурмағымыз, мәсиһчи иманында нә дәрәҹәдә мөһкәм олмағымыздан асылыдыр. Ојаг дурмагда бизә нә көмәк едә биләр? Аллаһын Кәламындан даһа дәрин биликләр әлдә етмәк (2 Тимотејә 3:14, 15). Мүгәддәс Китабы сә’јлә өјрәнмәк вә јығынҹаг ҝөрүшләриндә мүнтәзәм иштирак етмәк иманымызы мөһкәмләтмәјә көмәк едир. Јеһованын ҝүнүнү јаддашымызда мөһкәм сахламаг да иманымызын ваҹиб саһәсидир. Буна ҝөрә дә, јахынлашмагда олан сона даир ваҹиб һәгигәтләри нәзәрдән гачырмајаг дејә, вахташыры бу системин сонунун артыг јахын олдуғуна даир Мүгәддәс Јазыларын сүбутларыны өзүмүзә хатырлатмаг јахшы олардыa. Һәмчинин Мүгәддәс Китаб пејғәмбәрликләринин јеринә јетдијини ҝөстәрән дүнја һадисәләринин ҝедишатыны да мүшаһидә етмәк фајдалыдыр. Алманијада јашајан бир гардаш јазыр: “Мән хәбәрләрә бахыб, мүһарибәләр, зәлзәләләр, зоракылыглар вә планетин чиркләнмәси һаггында ешитдикдә сонун јахын олдуғуна әминлијим артыр”.

6. Иса, вахт кечдикҹә руһани ојаглығы итирмәјә мејлли олмағы әјани сурәтдә неҹә ҝөстәрди?

⁶ Маркын Мүждәсинин 13-ҹү фәслиндә биз јенә дә Исанын өз давамчыларыны ојаг дурмаға тәшвиг етдији һагда охујуруг. Бурада Иса онларын вәзијјәтини башга өлкәјә сәјаһәтә ҝетмиш ев саһибинин гајытдығыны ҝөзләјән гапычынын вәзијјәти илә мүгајисә едир. Гапычы саһибин нә заман гајыдаҹағындан хәбәрсиздир. Онун ојаг дурмагдан башга чыхыш јолу јохдур. Иса ев саһибинин ҝәлә биләҹәји дөрд нөвбәдән бәһс едир. Дөрдүнҹү нөвбә тәхминән ҝеҹә саат үчдән сәһәрәдәк давам едир. Сонунҹу нөвбәдә гапычыны асанлыгла јуху баса биләрди. Мә’лумдур ки, әсҝәрләр дүшмәни јахаламаг үчүн сүбһ чағыны ән әлверишли вахт һесаб едирдиләр. Бунун кими бу ҝүн бизә дә, ахыр ҝүнләрин сонунда бүтүн дүнјанын руһән мөһкәм јатдығы бир вахтда, ојаг дурмаг үчүн, еһтимал ки, бүтүн гүввәмизи сәрф етмәк лазым ҝәлир (Ромалылара 13:11, 12). Бу сәбәбдән, Иса чәкдији мәсәлдә дөнә-дөнә тәкрар едир: “Диггәтли вә ојаг олун... Беләликлә, ојаг дурун... Сизә нә сөјләјирәмсә, һамыја сөјләјирәм: Ојаг дурун!” (Марк 13:32-37).

7. Бизә гаршы һансы ҹидди тәһлүкә мөвҹуддур вә буну нәзәрә алараг, Мүгәддәс Китабда биз тез-тез нәјә тәшвиг олунуруг?

⁷ Иса хидмәти әрзиндә вә артыг дирилдикдән сонра да дәфәләрлә ајыг олмаға тәшвиг етмишдир. Үстәлик, демәк олар ки, Мүгәддәс Јазыларда һәр дәфә бу системин сону һаггында данышыланда ојаг дурмаг үчүн бизә хәбәрдарлыг олунурb (Лука 12:38, 40; Вәһј 3:2; 16:14-16). Сөзсүз ки, руһән мүрҝүләмәк чох ҹидди тәһлүкәдир. Һамымызын бу ҹүр хәбәрдарлыглара еһтијаҹы вар! (1 Коринфлиләрә 10:12; 1 Салониклиләрә 5:2, 6).

Ојаг галмағы баҹармајан үч һәвари

8. Исанын үч һәвариси Ҝетсамани бағында онун ојаг дурмаг хаһишинә неҹә мүнасибәт ҝөстәрдиләр?

⁸ Петер, Јагуб вә Јәһјанын нүмунәсиндән ҝөрүндүјү кими, ојаг галмаг үчүн садәҹә јахшы нијјәтләр кифајәт етмир. Онларын үчү дә Исанын ардынҹа сәдагәтлә ҝедән вә она гаршы дәрин бағлылыг һисси дујан руһани кишиләр иди. Бунунла белә, онлар ерамызын 33-ҹү илинин 14 нисан ахшамында ојаглығы горуја билмәдиләр. Бу үч һәвари Пасханы гејд етдикләри отағы тәрк едиб, Иса илә бәрабәр Ҝетсамани бағына тәрәф јола дүшдүләр. Иса онлара бир хаһишлә мүраҹиәт етди: “Ҹаным өлүм дәрәҹәсиндә кәдәрлидир; бурада галыб, Мәнимлә ојаг дурун” (Матта 26:38). Иса сәмави Атасына үч дәфә гызғын дуа етмиш вә һәр үч дәфә дә достларынын јанына гајыданда онлары јатмыш ҝөрмүшдүр (Матта 26:40, 43, 45).

9. Һәвариләрин мүрҝүләмәләринә, еһтимал ки, нә тә’сир етмишди?

⁹ Бу садиг кишиләр һәмин ҝеҹә Исанын үмидини нәјә ҝөрә доғрултмадылар? Бурада јорғунлуг да өзүнү ҝөстәрди. Артыг ҝеҹ иди, бәлкә дә, ҝеҹә јарысындан кечмишди вә онларын “ҝөзләри ағырлашмышды” (Матта 26:43). Иса јенә дә деди: “Ојаг дуруб дуа един ки, имтаһана уғрамајасыныз. Доғрудан да руһ гејрәтли, бәдән исә зәифдир” (Матта 26:41).

10, 11. а) Ҝетсамани бағында јорғунлуғуна бахмајараг, ојаг дурмагда Исаја нә көмәк етди? б) Исанын ојаг дурмағы хаһиш етдији үч һәвари илә баш верән һадисәдән нә өјрәнирик?

¹⁰ Һәмин тарихи ҝеҹәдә, сөзсүз ки, Иса да өзүнү јорғун һисс едирди. Лакин јатмаг әвәзинә, Иса азадлығын һәмин сон дәјәрли анларыны гызғын дуалара һәср етмишди. Бир нечә ҝүн әввәл о, давамчыларыны дуа етмәјә тәшвиг етмишди: “Буна ҝөрә дә бүтүн баш верәҹәк бу фәлакәтләрдән гачынмаға лајиг олмаг вә Инсан Оғлунун һүзуруна чыха билмәк үчүн, һәр ан дуа един вә ајыг олун” (Лука 21:36; Ефеслиләрә 6:18). Әҝәр биз Исанын мәсләһәтинә диггәт јетирир вә онун дуаја олан мүнасибәтини тәглид едириксә, Јеһоваја үрәкдән етдијимиз јалварышлар руһән ојаг дурмагда бизә көмәк едәҹәкдир.

¹¹ Әлбәттә, шаҝирдләринин һәмин ан анламадыглары бир шеји Иса анлајырды — о билирди ки, бир аздан ону тутаҹаг вә өлүмә мәһкум едәҹәкләр. Иса гаршыда ону сынаглар вә ишҝәнҹә дирәјиндә дәһшәтли өлүм ҝөзләдијиндән хәбәрдар иди. Бу һагда Иса һәвариләрини хәбәрдар етмишди, лакин онлар онун сөзләрини анламамышдылар. Елә бу сәбәбдән дә онлар јатмыш, Иса исә ојаг галыб дуа едә билмишди (Марк 14:27-31; Лука 22:15-18). Һәвариләр кими, бизим дә бәдәнимиз зәифдир вә биз дә һәлә чох шеји билмирик. Әҝәр биз һансы ваҹиб дөврдә јашадығымызы нәзәрдән гачырсаг, руһани мә’нада јухуја ҝедә биләрик. Анҹаг ајыг галсаг, ојаг дурмаға наил ола биләҹәјик.

Үч мүһүм кејфијјәт

12. Һәвари Павелин сөзләринә ҝөрә, ојаглыг һансы үч кејфијјәтлә бағлыдыр?

¹² Ојаглығы горумагда бизә нә көмәк едә биләр? Биз дуанын вә Јеһованын ҝүнүнү јаддашымызда сахламағын ваҹиблијини артыг мүзакирә етдик. Бундан әлавә Павел, инкишаф етдирмәмиз лазым олан үч мүһүм кејфијјәти хатырладыр. О јазыр: “Биз исә ҝүндүзә аид олдуғумуза ҝөрә ајыг олаг, көксүмүзә иман вә мәһәббәт зиреһини, башымыза дәбилгә олараг хилас үмидини ҝејәк” (1 Салониклиләрә 5:8). Ҝәлин иман, мәһәббәт вә үмидин руһән ојаг галмагда бизә неҹә көмәк етдијини гысаҹа олараг нәзәрдән кечирәк.

13. Ојаглығы горумагда иман бизә неҹә көмәк едир?

¹³ Јеһованын мөвҹудлуғуна вә ‘Ону ахтаранлара мүкафат вердијинә’ сарсылмаз иманымыз олмалыдыр (Ибраниләрә 11:6). Исанын сона даир пејғәмбәрлијинин биринҹи әсрдә илк дәфә јеринә јетмәси, бу пејғәмбәрлијин бизим ҝүнләрдә дә ҝениш мигјасда јеринә јетәҹәјинә иманымызы мөһкәмләдир. Иман бизи Јеһованын ҝүнүнү, пејғәмбәрлик рө’јаларынын ҝеҹикмәјәҹәјинә, мүтләг јеринә јетәҹәјинә әмин олараг ҝөзләмәјә тәшвиг едир (Һабаггуг 2:3).

14. Ојаг галмаг үчүн нәјә ҝөрә үмидә саһиб олмаг ваҹибдир?

¹⁴ Бизим мөһкәм үмидимиз “ҹан лөвбәри кими”дир; һәтта Аллаһын дәјишмәз вә’дләрини ҝөзләмәк лазым ҝәлирсә дә, белә үмид бизә чәтинликләрә таб ҝәтирмәјә көмәк едир (Ибраниләрә 6:18, 19). 90-дан артыг јашы олан вә 70 ил бундан габаг вәфтиз олуб мүгәддәс руһла мәсһ олунмуш баҹымыз Маргарет дејир: “1963-ҹү илдә әрим хәрчәнҝ хәстәлијиндән өлән заман дүшүнүрдүм ки, сон тез ҝәлсәјди, нә јахшы оларды! Лакин инди баша дүшүрәм ки, мән башлыҹа олараг өзүм үчүн неҹә јахшы олаҹағыны дүшүнүрдүм. О заман һеч ағлымыза да ҝәлмәзди ки, ишимиз бүтүн дүнјада бу гәдәр ҝенишләнәҹәкдир. Һәтта инди дә чохлу јерләр вар ки, фәалијјәтимиз үчүн гапылар һәлә тәзә-тәзә ачылыр. Буна ҝөрә дә шадам ки, Јеһова сәбир ҝөстәрди”. Һәвари Павел бизи әмин едир ки, ‘дөзүмлүлүкдән тәҹрүбә вә тәҹрүбәдән үмид һасил олур... вә үмид утандырмаз’ (Ромалылара 5:3-5).

15. Һәтта кифајәт гәдәр вахт ҝөзләдијимизи дүшүнсәк дә, мәһәббәт бизим үчүн неҹә тәшвигедиҹи гүввә олаҹагдыр?

¹⁵ Мәсиһчи мәһәббәти ән бөјүк кејфијјәтдир, чүнки етдијимиз һәр ишин архасында дуран мәһәббәтдир. Јеһованын вә’дләрини нә гәдәр ҝөзләмәли олсаг да, биз Ону севдијимиз үчүн Она хидмәт едирик. Аллаһын сәбри нә гәдәр давам етсә дә вә ејни гапыны нечә дәфә дөјмәк лазым ҝәлсә дә, бизи Падшаһлыг һаггында тәблиғ етмәјә јахынларымыза олан мәһәббәт тәшвиг едир. Павелин јаздығы кими, “үч шеј багидир: иман, үмид, мәһәббәт; амма мәһәббәт бунларын һамысындан үстүндүр” (1 Коринфлиләрә 13:13). Мәһәббәт бизә мөһкәм вә ојаг галмагда көмәк едир. “[Мәһәббәт] һәр шејә үмид бәсләјәр, һәр шејә таб ҝәтирәр... мәһәббәт әсла түкәнмәз” (1 Коринфлиләрә 13:7, 8).

“Малик олдуғуна мөһкәм сарыл”

16. Јубанмаг әвәзинә, биз һансы әһвал-руһијјәни инкишаф етдирмәлијик?

¹⁶ Елә бир мүһүм дөврдә јашајырыг ки, дүнја һадисәләри ахыр ҝүнләрин сонунда јашадығымызы бизә һәр вахт хатырладыр (2 Тимотејә 3:1-5). Инди јубанмағын вахты дејил, бунун әвәзинә ‘малик олдуғумуза мөһкәм сарылмағын’ вахтыдыр (Вәһј 3:11). Әҝәр биз ‘дуа етмәк үчүн ајыг дурур’ вә иман, үмид, мәһәббәт инкишаф етдиририксә, сынаглар заманы һазыр олаҹағыг (1 Петер 4:7). Рәббин јолунда ҝөрүләси ишләримиз чохдур. Аллаһа мәгбул ишләрлә мәшғул олмаг бизә ојаг дурмаға вә сајыг галмаға көмәк едәҹәкдир (2 Петер 3:11).

17. а) Нәјә ҝөрә бә’зән јеринә јетмәјән үмидләр бизи мә’јус етмәли дејил? (31-ҹи сәһифәдәки чәрчивәјә бахын.) б) Биз Јеһованы неҹә тәглид едә биләрик вә буну едән кәсләри һансы хејир-дуалар ҝөзләјир?

¹⁷ Јеремја јазырды: “Мәним пајым Рәбдир; бундан өтрү она үмид бағларам. Ону ҝөзләјәнләрә, ону арајан ҹана, Рәбб јахшыдыр. Үмид етмәк вә Рәббин гуртарышыны сусараг ҝөзләмәк јахшыдыр” (Јеремјанын мәрсијәләри 3:24-26). Бизләрдән бә’зиләримиз Јеһованын хиласыны јениҹә ҝөзләмәјә башламышыг. Башгалары буну артыг узун илләрдир ки, ҝөзләјирләр. Лакин гаршыда бизи ҝөзләјән әбәдијјәтлә мүгајисәдә бу вахт нә гәдәр гыса ҝөрүнәҹәкдир! (2 Коринфлиләрә 4:16-18). Һәләлик, Јеһованын тә’јин етдији вахты ҝөзләдијимиз мүддәтдә биз олдугҹа ваҹиб мәсиһчи кејфијјәтләрини инкишаф етдирә биләрик. Һәмчинин башгаларына Јеһованын сәбриндән фајдаланмаға вә һәгигәти гәбул етмәјә көмәк едә биләрик. Бу сәбәбдән, ҝәлин бундан сонра да ојаг дураг. Ҝәлин, Јеһованы тәглид едәрәк сәбирли олаг вә Онун бизә вердији үмидә ҝөрә миннәтдар олаг. Ојаглығымызы горумаға сәдагәтлә давам едәрәк, әбәди һәјата олан үмидә мөһкәм сарылаг. О заман бу пејғәмбәрлик вә’дләри мүтләг бизим үзәримиздә јеринә јетәҹәкдир: “Јери мирас алмаг үчүн [Јеһова] сәни јүксәлдәҹәкдир; писләрин кәсилиб атылаҹағы заман буну ҝөрәҹәксән” (Мәзмур 37:34).

[Һашијәләр]

Сиз неҹә ҹаваб верәрдиниз?

• Бу дүнја системинин сонунун јахын олдуғуна әминлијимизи неҹә мөһкәмләдә биләрик?

• Петер, Јагуб вә Јәһјанын нүмунәсиндән нә өјрәнирик?

• Һансы үч кејфијјәт руһән ојаг дурмагда бизә көмәк едәҹәкдир?

• Нә үчүн инди ‘малик олдуғумуза мөһкәм сарылмағын’ вахтыдыр?

[31-ҹи сәһифәдәки чәрчивә/шәкил]

“Ҝөзләјиб... јетишән нә бәхтијардыр” (Даниел 12:12)

Тәсәввүр един ки, горудуғу евә оғрунун ҝирәҹәјини ҝүман етмәјә ҝөзәтчинин әсасы вар. Ҝеҹә дүшмәси илә ҝөзәтчи оғрунун ҝәлдијинә ишарә едә биләҹәк һәр бир сәсә диггәтлә гулаг асыр. Саатлар өтдүкҹә о бүтүн диггәтини ҹәмләшдирәрәк һәр шеји ҝөрмәјә вә ешитмәјә чалышыр. Ајдындыр ки, ҝөзәтчи јарпагларын хышылтысындан, јахуд пишијин сәсиндән чашыб, һәтта јаландан һарај сала биләр (Лука 12:39, 40).

“Рәббимиз Иса Мәсиһин зүһуруну” сәбирсизликлә ҝөзләјәнләрлә дә буна бәнзәр вәзијјәт баш верә биләр (1 Коринфлиләрә 1:7). Һәвариләр елә дүшүнүрдүләр ки, Иса Исраилин падшаһлығыны дирилдикдән сонра бәрпа едәҹәкдир (Һәвариләрин ишләри 1:6). Илләр кечдикдән сонра, Салоник шәһәриндә јашајан мәсиһчиләрә Исанын иштиракынын јалныз ҝәләҹәкдә баш верәҹәјини хатырлатмаг лазым иди (2 Салониклиләрә 2:3, 8). Лакин Исанын илк давамчылары, Јеһованын ҝүнү илә бағлы олан үмидләринин јеринә јетмәдијинә ҝөрә һәјата апаран јолдан сапмадылар (Матта 7:13).

Бизим ҝүнләрдә бу системин сонунун ҝуја јубандығындан јаранан мә’јуслуг ојаглығымызы боғмалы дејил. Ајыг ҝөзәтчи јалан сәсләрә алданса да, јахшы оларды ки, о ојаг галмаға давам етсин! Бу, онун вәзифәсидир. Буну ејни илә мәсиһчиләр һаггында да демәк олар.

[28-ҹи сәһифәдәки шәкил]

Јеһованын ҝүнүнүн јахын олдуғуна әминсәнми?

[29-ҹу сәһифәдәки шәкилләр]

Јығынҹаг ҝөрүшләри, дуа вә Мүгәддәс Китабы диггәтлә өјрәнмәјимиз ојаг дурмагда бизә көмәк едир.

[32-ҹи сәһифәдәки шәкил]

Ҝәлин, Маргарет кими сәбир едәк вә фәал сурәтдә ојаг дураг.