Бүтүн үрәјинлә Јеһоваја ҝүвән
“Сәнын ысмыны быләнләр сәнә ҝүвәнәҹәкләр” (МӘЗМУР 9:10).
1, 2. Инсанлар сабитлији әбәс јерә һарада ахтарырлар?
БИЗ чох дәјишкән бир зәманәдә јашајырыг вә һәјатда дајаг ахтармаг истәји тамамилә тәбиидир. Ким исә елә дүшүнә биләр ки, пулу чох оларса, өзүнү даһа архајын һисс едә биләр, лакин әслиндә пулун да ҝәтирдији мүдафиә мүвәггәтидир. Мүгәддәс Китабда дејилир: “Зәнҝинлијинә ҝүвәнән јыхылар” (Сүлејманын мәсәлләри 11:28). Башгалары инсан рәһбәрләринә ҝүвәнирләр, анҹаг онларын да ән јахшысы сәһвләрә јол верир, нәтиҹәдә исә һәр бири өлүр. Мүгәддәс Китаб белә бир мүдрик мәсләһәт верир: “Әмирләрә вә гуртарышы олмајан инсан оғлуна ҝүвәнмәјин” (Мәзмур 146:3). Аллаһдан илһам алмыш бу сөзләр, һәмчинин бизи өз ҝүҹүмүзә ҝүвәнмәкдән дә чәкиндирир. Ахы биз дә ‘инсан оғулларыјыг’.
2 Пејғәмбәр Ишаја мүасирләри олан Исраил рәһбәрләрини “јаланларла гурулан сығынаҹаг јеринә” ҝүвәндикләри үчүн мәзәммәт едирди (Ишаја 28:15-17). Тәһлүкәсизлијә ҹан атараг, онлар гоншу халгларла сијаси иттифаглар бағлајырдылар. Бу ҹүр иттифаглар е’тибарсыз, әслиндә исә јалан иди. Бунун кими, бу ҝүн дә бир чох дини рәһбәрләр сијаси хадимләрлә мүнасибәтләр јарадырлар. Бу ҹүр иттифагларын да “јалан” олдуғу үзә чыхаҹагдыр (Вәһј 17:16, 17). Онлар сабитлик ҝәтирмәјәҹәк.
Јешу вә Калебин ҝөзәл нүмунәси
3, 4. Вә’д едилән дијара ҝизлин бахмаға ҝедән Јешу илә Калебин ҝәтирдикләри хәбәр диҝәр он нәфәрин хәбәриндән нә илә фәргләнирди?
3 Бәс һәјатда дајағы һарада тапмаг олар? Буну, Мусанын ҝүнләриндә јашајан Јешу вә Калебин нүмунәсиндән өјрәнә биләрик. Мисирдән азад олундугдан тез сонра Исраил халгы Кән’ана — Вә’д едилән дијара дахил олмаға һазыр иди. Он ики нәфәр киши һәмин дијара ҝизлин бахмаға ҝөндәрилмиш вә 40 ҝүндән сонра гајыдыб ҝөрдүкләрини данышмышлар. Онлардан јалныз ики нәфәр — Јешу вә Калеб — Кән’ан дијарына дахил олмаг имканы һаггында мүсбәт фикир сөјләдиыләр. Галанлары һәмин дијарын јахшы олдуғуну тәсдиг едиб дедиләр: “Мәмләкәтдә отуран халг гүввәтлидир вә шәһәрләр истеһкамлы вә чох бөјүкдүр... [...] ...О халга гаршы чыхмаға гүдрәтимиз јохдур; чүнки онлар биздән гүввәтлидирләр” (Сајлар 13:27, 28, 31).
4 Исраиллиләр һәмин он нәфәрә гулаг асыб, горхуја дүшдүләр, һәтта Мусаја гаршы дејинмәјә башладылар. Һиссләрлә ҹошан Јешу вә Калеб онлара дедиләр: “Јохламаг үчүн ичиндән кечдијимиз мәмләкәт чох, чох јахшы бир мәмләкәтдир. Әҝәр Рәбб биздән разы оларса, о заман бизи о дијара ҝәтирәҹәк вә ону бизә верәҹәкдир; бир дијар ки, сүд вә бал ахыр. Анҹаг Рәббә гаршы үсјан етмәјин вә сиз мәмләкәтин халгындан горхмајын” (Сајлар 14:6-9). Јенә дә исраиллиләр онлары динләмәдиләр вә буна ҝөрә дә Јеһова һәмин вахт халгын Вә’д едилән дијара дахил олмасына јол вермәди.
5. Нәјә ҝөрә Јешу вә Калеб ҝетдикләри дијар һаггында мүсбәт фикир сөјләдиләр?
5 Нәјә ҝөрә Јешу илә Калеб һәмин дијар һаггында мүсбәт, галан он нәфәр исә мәнфи фикир сөјләдиләр? Он ики нәфәрин һамысы ејни мөһкәм шәһәрләри вә онларда көк салмыш ејни халглары ҝөрмүшдүләр. Вә он нәфәр Исраилин һәмин дијары әлә кечирмәк үчүн кифајәт гәдәр гүввәси олмадығыны демәкдә јанылмырдылар. Буну Јешу вә Калеб дә билирди. Иш орасындадыр ки, һәмин он нәфәр вәзијјәтә инсан нөгтеји-нәзәриндән бахырдылар. Јешу илә Калеб исә Јеһоваја ҝүвәнирдиләр. Онлар Аллаһын гүдрәтли ишләрини Мисирдә, Гырмызы дәнизин јахынлығында вә Сина дағынын әтәјиндә ҝөрмүшдүләр. Бир нечә онилликдән сонра Аллаһын бу ишләри һаггында садәҹә олараг ешитдикләри, Јериһодан олан Раһабы Јеһованын халгы наминә һәјатыны тәһлүкә алтына атмаға тәшвиг едә билди! (Јешу 2:1-24; 6:22-25). Јеһованын ишләринин шаһиди олан Јешу вә Калеб тамамилә әмин идиләр ки, Аллаһ өз халгына ҝөрә мүбаризә апармаға давам едәҹәкдир. Гырх илдән сонра ајдын олду ки, онлар Јеһоваја әбәс јерә ҝүвәнмәмишләр. Исраиллиләрин јени нәсли Јешунун рәһбәрлији алтында Кән’ан дијарына дахил олуб, ону әлә кечирди.
Нә үчүн бүтүнлүклә Јеһоваја ҝүвәнмәлијик?
6. Нәјә ҝөрә бу ҝүн мәсиһчиләр тәзјиг алтындадырлар вә онлар кимә ҝүвәнмәлидирләр?
6 Јашадығымыз индики “чәтин анлар”да, һәмин исраиллиләр кими, биз дә өзүмүздән ҝүҹлү дүшмәнләрлә гаршылашырыг (2 Тимотејә 3:1). Бизә әхлаги, руһани, бә’зән исә, һәтта физики ҹәһәтдән тәзјиг ҝөстәрилир. Бу ҹүр тәзјигләрә јалныз өз гүввәмизин сајәсиндә таб ҝәтирә билмәрик, чүнки бунлар гејри-тәбии мәнбәдән — Шејтан Иблисдән ҝәлир (1 Јәһја 5:19; Ефеслиләрә 6:12). Бәс көмәји һарада ахтара биләрик? Кечмишдә Јеһованын садиг бир хидмәтчиси дуасында демишди: “Сәнин исмини биләнләр сәнә ҝүвәнәҹәкләр” (Мәзмур 9:10). Әҝәр Јеһованы һәгигәтән дә таныјыр вә адынын мә’насыны дәрк едириксә, шүбһәсиз ки, Јешу вә Калеб кими, биз дә Она ҝүвәнәҹәјик (Јәһја 17:3).
7, 8. а) Јеһованын јаратдыглары Она ҝүвәнмәк үчүн һансы әсаслары верир? б) Јеһоваја ҝүвәнмәк үчүн Мүгәддәс Китаб бизә һансы әсаслары верир?
7 Биз нә үчүн Јеһоваја ҝүвәнмәлијик? Јешу вә Калеб, Аллаһын ҝүҹүнүн тәзаһүрүнү ҝөрдүкләри үчүн Она ҝүвәнирдиләр. Онлар кими, биз дә Аллаһын ҝүҹүнүн шаһиди олуруг. Мәсәлән, Јеһованын јаратдыгларыны, о ҹүмләдән, милјардларла галактиканы өзүнә дахил едән Каинаты дүшүнәк. Јеһованын нәзарәти алтында олан тәбиәтин нәһәнҝ ҝүҹү, Онун һәгигәтән дә Гадир олдуғуну сүбут едир. Тәбиәтин мө’ҹүзәләри үзәриндә дүшүнәркән, Ејубун Јеһова һаггында дедикләри илә разылашмаја билмәрик: “Ким ону дөндәрә биләр? Ким она: Нә едирсән, дејәр?” (Ејуб 9:12). Бәли, әҝәр Јеһова бизимләдирсә, бизә Каинатда һеч кимдән горхмаг лазым дејил (Ромалылара 8:31).
8 Ҝәлин, Јеһованын Кәламы олан Мүгәддәс Китабы да нәзәрдән кечирәк. Илаһи мүдриклијин түкәнмәз мәнбәји олан бу китаб, пис әмәлләрә сон гојмаға вә һәјатымызы Јеһованын ирадәсинә ујғун гурмаға көмәк етмәјә гадирдир (Ибраниләрә 4:12). Мәһз Мүгәддәс Китабын сајәсиндә биз Јеһова илә таныш олмуш, Онун адыны вә адынын мә’насыны өјрәнмишик (Чыхыш 3:14). Биз дәрк етдик ки, Јеһова өз нијјәтләрини һәјата кечирмәк үчүн истәдији мөвгеји тута биләр. О, севән Ата, әдаләтли Һаким, јенилмәз Ҹәнҝавәр ола биләр. Вә биз Онун сөзләринин һәмишә неҹә доғру чыхдығыны ҝөрүрүк. Аллаһын Кәламыны өјрәнәрәк, мәзмурчу кими, биз дә бу сөзләри демәјә тәшвиг дујуруг: “Сәнин кәламына ҝүвәндим” (Мәзмур 119:42; Ишаја 40:8).
9. Фидијә вә Исанын дирилмәси Јеһоваја даһа чох ҝүвәнмәк үчүн неҹә әсас верир?
9 Фидијә гурбанлығы, Јеһоваја ҝүвәнмәк үчүн даһа бир әсасдыр (Матта 20:28). Аллаһын өз Оғлуну бизим үчүн фидијә олараг ҝөндәрмәси, һәгигәтән дә, валеһедиҹидир! Фидијә, доғрудан да, бөјүк ҝүҹә маликдир. Бу фидијә, төвбә едән вә Јеһоваја тәмиз үрәкдән дөнән һәр бир инсанын ҝүнаһыны јујур (Јәһја 3:16; 1 Јәһја 4:16, 19; Ибраниләрә 6:10). Фидијә өдәнилмәси үчүн, Исанын дирилмәси тәләб олунурду. Јүзләрлә шаһид тәрәфиндән тәсдиг олунан бу мө’ҹүзә, Јеһоваја ҝүвәнмәк үчүн даһа бир сәбәбдир. Бу, үмидимизин боша чыхмајаҹағына зәманәтдир (Һәвариләрин ишләри 17:31; Ромалылара 5:5; 1 Коринфлиләрә 15:3-8).
10. Јеһоваја ҝүвәнмәк үчүн һансы шәхси сәбәбләримиз вар?
10 Бунлар, Јеһоваја бүтүнлүклә ҝүвәнмәјимизә сәбәб олан амилләрдән бә’зиләридир. Шәхси характер дашыјан башга бир чох сәбәбләр дә вар. Мәсәлән, һәр биримиз вахташыры һәјатымызда чәтин вәзијјәтләрлә гаршылашырыг. Онларын һәлли үчүн Јеһованын рәһбәрлијини ахтардыгда, бу рәһбәрлијин нә гәдәр әлверишли олдуғуну баша дүшүрүк (Јагуб 1:5-8). Ҝүндәлик һәјатымызда Јеһоваја даһа чох е’тибар едәрәк вә бунун ҝөзәл сәмәрәләр ҝәтирдијини ҝөрәрәк, Она даһа чох ҝүвәнәҹәјик.
Давуд Јеһоваја ҝүвәнирди
11. Давуд һансы вәзијјәтләрдә Јеһоваја ҝүвәнирди?
11 Гәдим Исраилдә јашамыш Давуд, Јеһоваја ҝүвәнән инсанлардан бири иди. Ону өлдүрмәк истәјән Шаул падшаһ вә Исраили зәбт етмәјә чалышан ҝүҹлү Филистим ордусу Давудун һәјаты үчүн тәһлүкә јарадырды. Буна бахмајараг, о сағ галмыш, һәтта гәләбә чалмышды. Нәјин сајәсиндә? Давуд изаһ едир: “Нурум вә гуртулушум Рәбдир, кимдән горхаҹағам? Һәјатымын гүдрәти Рәбдир, кимдән һүркәҹәјәм?” (Мәзмур 27:1). Әҝәр биз дә Јеһоваја белә ҝүвәнсәк, мүвәффәгијјәт газанаҹағыг.
12, 13. Давудун нүмунәсиндән неҹә ҝөрүрүк ки, дүшмәнләримиз дилләрини силаһ кими истифадә етсәләр дә, биз Јеһоваја ҝүвәнмәлијик?
12 Бир дәфә Давуд белә дуа етмишди: “Шәквам ичиндә сәсими ешит, еј Аллаһ; дүшмән горхусундан һәјатымы гору. Шәрирләрин ҝизли өјүдләшмәсиндән, фәсад ишләјәнләрин вәлвәләсиндән мәни сахла. Онлар ки, дилләрини гылынҹ кими итиләмиш вә охларыны, аҹы сөзләр олараг гурмушлар; та ки, ҝизли јерләрдә камил адама атсынлар” (Мәзмур 64:1-4). Әлбәттә, бу сөзләри јазмаға Давуду нә тәшвиг етдијини, билмирик. Амма ону билирик ки, ејнилә бу ҝүн дә дүшмәнләр нитгләриндән силаһ кими истифадә едәрәк “дилләрини итиләјирләр”. Онлар, шифаһи вә јазылы сурәтдә јајылан тәһриф едилмиш мә’луматлардан “гылынҹ” кими истифадә едәрәк нөгсансыз мәсиһчиләри јыхмаға чалышырлар. Әҝәр биз бүтүнлүклә Јеһоваја ҝүвәнириксә, бәс онда неҹә?
13 Давуд даһа сонра дејир: “Аллаһ онлара ох атаҹагдыр; гәфләтән јараланмыш олаҹаглар. Дилләри өзләринә гаршы дөнәрәк беләҹә мәғлуб едиләҹәкләр... [...] Салеһ, Рәбб илә севинәҹәк вә она сығынаҹагдыр” (Мәзмур 64:7-10). Бәли, дүшмәнләр дилләрини бизә гаршы итиләсәләр дә, сонунда “дилләри өзләринә гаршы дөнәрәк... мәғлуб едиләҹәкләр”. Јеһова һәр шеји мүвәффәгијјәтлә баша вураҹаг вә Она ҝүвәнәнләрин һамысы Онда севинә биләҹәкләр.
Һизкија әбәс јерә ҝүвәнмирди
14. а) Һизкија һансы тәһлүкәли вәзијјәтдә Јеһоваја ҝүвәнди? б) Һизкија ассуријалыларын јаланына инанмадығыны неҹә ҝөстәрди?
14 Падшаһ Һизкија да Јеһоваја әбәс јерә ҝүвәнмирди. Һизкијанын һөкмдарлығы заманы ҝүҹлү Ассурија ордусу Јерусәлим үчүн тәһлүкә јарадырды. Бу орду башга бир чох халглары мәғлуб етмишди. О, һәтта Јәһуданын шәһәрләрини зәбт етмиш вә јалныз Јерусәлим мәғлуб едилмәмишди. Синахериб өјүнүрдү ки, бу шәһәри дә зәбт едәҹәк. О, Рабшакын васитәсилә билдирди ки, Мисирин көмәјинә ҝүвәнмәк тамамилә фајдасыздыр — бу исә һәгигәтәндә дә белә иди. Лакин о, даһа сонра деди: “Јерусәлим Ассурија падшаһынын әлинә верилмәјәҹәк дејә, ҝүвәндијин Аллаһын сәни алдатмасын” (Ишаја 37:10). Анҹаг Һизкија Јеһованын ону алдатмајаҹағыны билирди. Буна ҝөрә дә дуасында белә демишдир: “Ја Рәбб Аллаһымыз, онун [Ассуријанын] әлиндән бизи гуртар вә бүтүн дүнја падшаһлыглары билсинләр ки, Јеһова сәнсән, анҹаг сәнсән” (Ишаја 37:20). Јеһова Һизкијанын дуасыны ешитди. Бир ҝеҹәнин ичиндә мәләк 185 мин ассуријалы әсҝәри мәһв етди. Јерусәлим гуртулду, Синахериб исә Јәһудејаны тәрк етди. Бу һадисә һаггында ешидәнләрин һамысы Јеһованын гүдрәтли олдуғуну билдиләр.
15. Бу дәјишкән дүнјада јашајаркән, дүшә биләҹәјимиз чәтин вәзијјәтләрә јалныз неҹә һазырлаша биләрик?
15 Бу ҝүн Һизкија кими, биз дә мүһарибә шәраитиндә јашајырыг. Лакин бу, руһани мүһарибәдир. Руһани ҹәһәтдән сағ гала билмәк үчүн, дүшмәнин һүҹумуну ҝөрмәји вә онлары дәф етмәји баҹармалыјыг (Ефеслиләрә 6:11, 12, 17). Бу дәјишкән дүнјада һәр шеј гәфләтән дәјишә биләр. Ҝөзләнилмәдән гарышыглыг јарана биләр. Дини дөзүмлүлүјү илә фәргләнән өлкәләрдә, инсанлар бирдән-бирә мүгавимәт ҝөстәрмәјә башлаја биләрләр. Анҹаг әҝәр индидән Јеһоваја бүтүнлүклә ҝүвәнсәк, Һизкија кими, баш верәҹәк һәр бир һадисәјә һазыр олаҹағыг.
Јеһоваја ҝүвәнмәк нә демәкдир?
16, 17. Јеһоваја ҝүвәндијимизи неҹә ҝөстәририк?
16 Јеһоваја садәҹә дилдә ҝүвәнмәк кифајәт дејил. Бу, ҝәрәк үрәкдән ҝәлсин вә әмәлдә ҝөстәрилсин. Әҝәр Јеһоваја ҝүвәнириксә, Онун Кәламы олан Мүгәддәс Китаба там е’тибар едәҹәк, јә’ни ону ҝүндәлик охујаҹаг, үзәриндә дүшүнәҹәк вә она һәјатымыза рәһбәрлик етмәјә јол верәҹәјик (Мәзмур 119:105). Јеһоваја ҝүвәнмәк, һәмчинин мүгәддәс руһун гүввәсинә дә е’тибар етмәк мә’насыны дашыјыр. Мүгәддәс руһун көмәклији илә биз Јеһоваја мәгбул олан сәмәрәләр ҝәтирә вә көк салмыш зәрәрли вәрдишләрә галиб ҝәлә биләрик (1 Коринфлиләрә 6:11; Галатијалылара 5:22-24). Мәсәлән, мүгәддәс руһун көмәји илә чохлары сигаретдән, јахуд наркотикдән имтина етмәји, башгалары исә әхлагсыз һәјат тәрзинә сон гојмағы баҹармышлар. Бәли, әҝәр Јеһоваја ҝүвәнириксә, биз өз ҝүҹүмүзлә дејил, Онун ҝүҹү илә мөһкәмләнәҹәјик (Ефеслиләрә 3:14-18).
17 Бундан савајы, Јеһоваја ҝүвәнмәк Онун е’тибар етдији кәсләрә е’тибар етмәк демәкдир. Мәсәлән, Јеһова јер үзүндә Падшаһлығын марагларынын гејдинә галмағы “садиг вә ағыллы гула” е’тибар едиб (Матта 24:45-47). Јеһованын гурулушуна е’тибар етдијимизә ҝөрә, Онун истифадә етдији канала әһәмијјәт вермәмәјә вә ја мүстәгил давранмаға чалышмырыг. Һәвари Павелин гејд етдији кими, јерли мәсиһчи јығынҹагларында мүгәддәс руһла тә’јин едилән ағсаггаллар да хидмәт едир (Һәвариләрин ишләри 20:28). Јығынҹагда тә’јин олунмуш ағсаггалларла әмәкдашлыг етмәклә Јеһоваја ҝүвәндијимизи ҝөстәририк (Ибраниләрә 13:17).
Павелин нүмунәсини тәглид един
18. Буҝүнкү мәсиһчиләр Павелин нүмунәсини неҹә тәглид едирләр, лакин онлар нәјә үмид бағламырлар?
18 Бизим кими, һәвари Павел дә хидмәти әрзиндә чохлу мүгавимәтләрлә гаршылашмышдыр. Онун ҝүнләриндә мәсиһчилик һаким даирәләринә јанлыш тәрздә тәгдим едилмишди вә Павел һәрдән бу јанлыш тәссәввүрләри дүзәлтмәјә, јахуд да тәблиғ ишини ганунун көмәји илә тәсдиг етмәјә чалышырды (Һәвариләрин ишләри 28:19-22; Филипилиләрә 1:7). Буҝүнкү мәсиһчиләр дә онун нүмунәсини тәглид едирләр. Имкан дахилиндә әлдә олан васитәләрдән истифадә едәрәк, инсанлары фәалијјәтимиз барәдә маарифләндиририк. Һәмчинин хош хәбәри мүдафиә етмәјә вә ганунун көмәји илә тәсдиг етмәјә ҹалышырыг. Лакин бу ҹүр өлчүләрә үмид бағламырыг, чүнки мүвәффәгијјәтимизин мәһкәмәләрдә галиб ҝәлиб-ҝәлмәмәјимиздән вә ја инсанларын һаггымызда јахшы данышыб-данышмамаларындан асылы олдуғуну дүшүнмүрүк. Әксинә, биз Јеһоваја ҝүвәнирик. Онун гәдим Исраилә дедикләри јадымыздадыр: “Гүввәтиниз сусма вә ҝүвәнмә илә олур” (Ишаја 30:15).
19. Нәјә ҝөрә демәк олар ки, тә’гибләрә мә’руз галараг гардашларымыз Јеһоваја әбәс јерә ҝүвәнмәмишләр?
19 Мүасир тарихдә елә дөврләр олуб ки, Шәрги вә Гәрби Авропада, Асија вә Африканын мүхтәлиф һиссәләриндә, һәмчинин Ҹәнуби вә Шимали Америка өлкәләриндә фәалијјәтимизи гадаған етмиш вә ја мәһдудијјәт гојмушлар. Мәҝәр бу, о демәкдирми ки, биз Јеһоваја әбәс јерә ҝүвәнмишик? Хејр. Јеһова бә’зән һансыса дәјәрли мәгсәди наминә шиддәтли тә’гибләрә јол версә дә, һәмин тә’гибләрин әсас јүкүнү дашыјан кәсләри мәһәббәтлә мөһкәмләндирирди. Бунун сајәсиндә бир чох мәсиһчиләр, Аллаһа иман вә үмид ҝөстәрән кәсләр кими ҝөзәл ад газанмышлар.
20. Ганунун вердији азадлыға ҝөрә миннәтдар олсаг да, һансы һалларда һеч заман ҝүзәштә ҝетмәјәҹәјик?
20 Бунунла белә, әксәр өлкәләрдә рәсми гејдијјатымыз вар вә вахташыры күтләви информасија васитәсилә һаггымызда мүсбәт данышырлар. Биз бунун үчүн миннәтдарыг вә бунун да Јеһованын мәгсәдләринә хидмәт етдијини е’тираф едирик. Јеһованын хејир-дуасы илә бу бөјүк азадлыгдан шәхси мәгсәдләримиз наминә дејил, Она халглар гаршысында там хидмәт етмәк үчүн истифадә едирик. Лакин биз һаким даирәләри гаршысында јахшы ада малик олмаг хатиринә һеч заман өз е’тигадларымызда ҝүзәштә ҝетмәјәҹәјик. Биз битәрәф мөвгејимиздән әл чәкмәјәҹәк, аз тәблиғ етмәјәҹәк вә һеч бир башга јолла Јеһоваја хидмәтимизи зәифләтмәјәҹәјик. Биз Хиласкар Падшаһлығын вәтәндашларыјыг вә бүтүнлүклә Јеһованын али һакимијјәтинин тәрәфини сахлајырыг. Үмидимиз индики дүнја системинә дејил, бүтүн јер үзәриндә идарә едәҹәк јеҝанә һөкумәтә — сәмави Хиласкар Падшаһлығадыр. Бу Падшаһлығы нә бомбалар, нә ракетләр, нә дә нүвә силаһлары сарсыда вә ја мәһв едә биләр. Бу Падшаһлыг мәғлубедилмәздир вә Јеһованын нијјәтләрини һәјата кечирәҹәкдир (Даниел 2:44; Ибраниләрә 12:28; Вәһј 6:2).
21. Һансы јолла ҝетмәк нијјәтиндәјик?
21 Павел јазырды: “Биз исә ҝери чәкилиб, һәлак оланлардан дејилик; иман едиб, ҹанларынын хиласына наил оланларданыг” (Ибраниләрә 10:39). Ҝәлин һамымыз сона гәдәр Јеһоваја сәдагәтлә хидмәт едәк. Јеһоваја инди вә әбәдијјәт боју бүтүнлүклә ҝүвәнмәјимиз үчүн бүтүн әсасларымыз вар (Мәзмур 37:3; 125:1).
Нә өјрәндиниз?
• Нәјә ҝөрә Јешу вә Калеб ҝетдикләри дијар һаггында мүсбәт фикир сөјләдиләр?
• Һансы сәбәбләрә ҝөрә биз бүтүнлүклә Јеһоваја ҝүвәнмәлијик?
• Јеһоваја ҝүвәнмәк нә демәкдир?
• Јеһоваја ҝүвәнәрәк һансы мөвгеји тутмаг нијјәтиндәјик?
[25-ҹи сәһифәдәки шәкил]
Нәјә ҝөрә Јешу вә Калеб ҝетдикләри дијар һаггында мүсбәт фикир сөјләдиләр?
[26-ҹы сәһифәдәки шәкилләр]
Јеһованын јаратдыглары Она ҝүвәнмәк үчүн әсаслы сәбәб верир.
[Иҹазә илә]
All three images: Courtesy of Anglo-Australian Observatory, photograph by David Malin
[28-ҹи сәһифәдәки шәкил]
Јеһоваја ҝүвәнмәк, Онун е’тибар етдији кәсләрә е’тибар етмәк демәкдир.