Бә’зиләри суалларына ҹавабы неҹә тапдылар?

МИЛЈОНЛАРЛА инсанлар дуа едирләр. Бә’зиләри әминдирләр ки, Аллаһ онларын дуаларына ҹаваб верир. Диҝәрләри, үмумијјәтлә Аллаһын онлары ешидиб-ешитмәдијини билмирләр. Еләләри дә вар ки, ҹаваб тапмаг истәјәрдиләр, лакин хаһишләрини дуада Аллаһа билдирмәк барәсиндә дүшүнмәјибләр.

Мүгәддәс Китаб һәгиги Аллаһы — “дуаны ешидән” адландырыр (Мәзмур 65:2). Дуа едирсинизсә, дуаларынызы һәгиги Аллаһа үнванладығыныза әминсинизми? Аллаһын ҹаваб верәҹәји тәрздәми дуа едирсиниз?

Јер күрәсиндә јашајан чох инсанлар дуаларынын һәгиги Аллаһа үнванландығына вә Онун онларын дуаларыны ешитдијинә әминдирләр. Онлар ҹаваблары неҹә тапдылар? Онлар нә өјрәндиләр?

Аллаһ кимдир?

Вахты илә раһибәләрдән вә кешишләрдән тә’лим алмыш португаллы бир мүәллимә, өз дининә сәмими гәлбдән е’тигад едирди. Она ваҹиб сајмағы өјрәтдикләри адәтләр килсә тәрәфиндән дәјишдирилмәјә вә садәләшдирилмәјә башлајанда, мүәллимә чашгынлыг ичиндә галды. О, сәјаһәтә чыхараг Шәрг динләри илә таныш олду вә јеҝанә һәгиги Аллаһын мөвҹудлуғуна шүбһә етмәјә башлады. Она неҹә ибадәт едилмәлидир? Гадын кешишә Мүгәддәс Китаба даир суаллар верәндә, кешиш бу суаллара ҹаваб вермәкдән имтина едирди. Бу исә гадыны кәдәрләндирирди.

Һәмин мүәллимәнин јашадығы шәһәрдә католик килсәси бу динә мәнсуб олан адамлары Јеһованын Шаһидләри илә данышмагдан чәкиндирән китабчалар јајырды. Лакин суаллар мүәллимәни јенә дә раһат бурахмырды. Бир ҝүн Јеһованын Шаһидләри онун гапысыны дөјәндә, мүәллимә онлары динләди вә ешитдикләри она мараглы ҝәлди. Бу, гадынын Јеһованын Шаһидләри илә илк сөһбәти иди.

Чохсајлы суалларына ҹаваб тапмаг үчүн, мүәллимә Јеһованын Шаһидләри илә Мүгәддәс Китабы өјрәнмәјә башлады. О, һәр һәфтә даһа чох шеј өјрәнмәк истәјирди. Аллаһын адыны, јеҝанә һәгиги Аллаһын мөвҹуд олуб-олмадығыны, Онун ибадәтдә бүтләрдән истифадә едилмәсини бәјәниб-бәјәнмәдијини вә башга чох шејләр һаггында билмәк истәјирди. Гадын, суалларына верилән бүтүн ҹавабларын кимләринсә шәхси нөгтеји-нәзәрләринә дејил, Мүгәддәс Китаба әсасландығына диггәт јетирирди. Буна ҝөрә дә өјрәндикләри ону ҝөзләнилмәз дәрәҹәдә һејран едирди. О, тәдриҹән бүтүн суалларына ҹаваб тапды. Бу ҝүн һәмин гадын, Иса Мәсиһин дедији кими, ‘һәгиги ибадәт едәнләрә’ хас олан тәрздә Јеһоваја руһән вә һәгигәтән ибадәт едир (Јәһја 4:23).

Шри-Ланкада бир аилә Мүгәддәс Китабы өјрәнмәк үчүн мүнтәзәм олараг бир јерә јығышыр, лакин онлары марагландыран бир чох суаллара ҹаваб тапмырдылар. Көмәјә еһтијаҹ дујмаларына бахмајараг, кешиш онлара һеч ҹүр көмәк едә билмирди. Лакин бир дәфә онлара Јеһованын Шаһидләри ҝәлдиләр вә Мүгәддәс Китаба әсасланан маарифләндириҹи нәшр вердиләр. Мүгәддәс Китаба даир суалларына Јеһованын Шаһидләриндән ганеедиҹи ҹаваблар алдыгдан сонра, аилә Мүгәддәс Китабы өјрәнмәјә разы олду. Өјрәнмә заманы әлдә етдикләри биликләр онларда ҹанлы мараг ојадырды.

Бунунла белә, ушаглыгдан килсәдә өјрәндикләри тә’лимләр анаја о дәрәҹәдә тә’сир етмишди ки, Исанын дедији кими, Атасынын “ваһид һәгиги Аллаһ” олдуғуну баша дүшмәк она чәтин ҝәлирди (Јәһја 17:1, 3). Ону өјрәтмишдиләр ки, Иса Атасына бәрабәрдир вә бу, шәкк едилмәјән бир “сиррдир”. Гадын үмидсиз һалда Јеһоваја үрәкдән дуа етди, дуада Онун адыны чәкди вә Исанын ким олдуғуну ҝөстәрмәсини хаһиш етди. Сонра бу суал илә бағлы ајәләри јенидән диггәтлә нәзәрдән кечирди (Јәһја 14:28; 17:21; 1 Коринфлиләрә 8:5, 6). Бу заман санки ҝөзләриндән пәрдә ҝөтүрүлдү, гадын ајдын шәкилдә ҝөрдү ки, Јеһова — ҝөјүн вә јерин Јараданы, Иса Мәсиһин Атасы вә һәгиги Аллаһдыр (Ишаја 42:8; Јеремја 10:10-12).

Изтирабларын сәбәби нәдәдир?

Ејуб адында бир адам олмазын изтираблар чәкмишдир. Онун бүтүн ушаглары фыртынадан һәлак олмуш, өзү исә мүфлисләшмишди. Бундан әлавә, о, үзүҹү хәстәликдән әзијјәт чәкир вә јаланчы достлар тәрәфиндән тәзјигә мә’руз галырды. Бунунла јанашы Ејуб дүшүнүлмәмиш сөзләр данышырды (Ејуб 6:3). Лакин Аллаһ онун вәзијјәтини нәзәрә алырды (Ејуб 35:15). Аллаһ Ејубун үрәјиндә оланлары билирди вә она лазыми мәсләһәтләр верди. Ејни тәрздә Аллаһ инсанлара бу ҝүн дә көмәк едир.

Мозамбикдә јашајан Кастро он јашында икән анасыны итирмишди. Кәдәр ону үзмүшдү. О сорушурду: “Анам нә үчүн өлдү вә бизи тәрк етди?” Кастрону Аллаһдан горхан валидејнләри бөјүтсәләр дә, инди о, нә едәҹәјини билмирди. Онун ағлыны вә үрәјини нә сакитләшдирә биләрди? О, чичева дилиндә олан балаҹа Мүгәддәс Китабы охумагла вә охудугларыны бөјүк гардашлары илә мүзакирә етмәклә тәсәлли тапырды.

Бир гәдәр вахтдан сонра Кастро анасынын Аллаһын әдаләтсиз олдуғу үчүн дејил, мирас алынмыш гејри-камиллик уҹбатындан өлдүјүнү анлады (Ромалылара 5:12; 6:23). Она даһа чох Мүгәддәс Китабын өлүләрин дириләҹәји барәдә олан вә’ди тәсәлли верирди, бу вә’д ону јенидән анасы илә ҝөрүшәҹәјинә әмин едирди (Јәһја 5:28, 29; Һәвариләрин ишләри 24:15). Әфсуслар олсун ки, дөрд ил кечдикдән сонра о, атасыны да итирди. Лакин бу дәфә, Кастро бу иткини асан јашады. Һал-һазырда о, Јеһованы севир вә Она сәдагәтлә хидмәт едир. Кастронун әлдә етдији севинҹ һисси, ону таныјанларын һамысына бәллидир.

Әзизләрини итирәнләрин чохлары, Мүгәддәс Китабын Кастроја тәсәлли ҝәтирән һәгигәтләриндән тәсәлли тапырлар. Пис адамларын ҝүнаһы уҹбатындан изтираб чәкән кәсләр бә’зән, “писләр нә үчүн јашајырлар” суалыны верән Ејубун сөзләрини тәкрар едирләр (Ејуб 21:7). Инсанлар Аллаһын өз Кәламы васитәсилә вердији ҹаваба гулаг асанда баша дүшүрләр ки, Аллаһын давранышы әслиндә онларын рифаһына хидмәт едир (2 Петер 3:9).

Бирләшмиш Штатларда бөјүјән Барбараја мүһарибә дәһшәтләрини јашамаг мүјәссәр олмамышдыр. Лакин о, мүһарибәләрлә әһатә олунан дүнјада бөјүјүрдү. Мүһарибәдә төрәдилән вәһшиликләр барәдә ҝүндәлик олараг мә’лумат верилирди. Барбара мәктәбдә охујанда, сону ҝөрүнмәјән тарихи һадисәләр ону сарсытмышды. Бунун архасында нә дурурду? Баш верәнләр Аллаһы нараһат едирдими? Барбара Аллаһын мөвҹудлуғуна инанырды, лакин Она мүнасибәтдә гарышыг һиссләр дујурду.

Буна бахмајараг, Јеһованын Шаһидләри илә үнсијјәти сајәсиндә Барбара тәдриҹән һәјата башга ҝөзлә бахмаға башлады. О, Шаһидләри динләјир, онларла Мүгәддәс Китабы өјрәнир, Падшаһлыг Залында кечирилән ҝөрүшләрә ҝедирди. Һәтта бир дәфә бөјүк конгресдә дә олмушду. Бундан әлавә о диггәт јетирмишди ки, суалларына ҹаваб олараг, мүхтәлиф Шаһидләрдән мүхтәлиф фикирләр ешитмир. Шаһидләр ејни ҹавабы верирдиләр, чүнки онлар Мүгәддәс Китаба әсасланырдылар.

Онлар диггәти, дүнјанын Шејтан Иблис тәрәфиндән идарә едилдијинә вә дүнјанын онун руһуну әкс етдирдијинә даир Мүгәддәс Китабын сүбутларына јөнәлдирдиләр (Јәһја 14:30; 1 Јәһја 5:19; 2 Коринфлиләрә 4:4; Ефеслиләрә 2:1-3). Онлар изаһ етдиләр ки, Барбаранын чашгынлығына сәбәб олан һадисәләр Мүгәддәс Китабда габагҹадан дејилиб (Даниел, 2, 7 вә 8-ҹи фәсилләр). Аллаһ бунлары, истәдији заман ҝәләҹәји ҝөрмәјә гадир олдуғу үчүн габагҹадан сөјләмишдир. Һадисәләрин бә’зиләри Аллаһын ирадәсилә олмушдур, диҝәрләринә исә садәҹә олараг јол вермишдир. Шаһидләр Барбараја ҝөстәрдиләр ки, Мүгәддәс Китабда бизим ҝүнләрин дә һәм севинҹли, һәм дә кәдәрли һадисәләри габагҹадан дејилмишдир вә бу китаб һәмин һадисәләрин мә’насыны ачыглајыр (Матта 24:3-14). Онлар Барбаранын диггәтини Мүгәддәс Китабын, салеһлијин һөкм сүрәҹәји, изтирабларын исә кечмишдә галаҹағы јени дүнја һаггындакы вә’динә јөнәлтдиләр (2 Петер 3:13; Вәһј 21:3, 4).

Вахт өтдүкҹә Барбара баша дүшдү ки, Јеһова Аллаһ нә инсан изтирабларына ҝөрә ҹавабдеһдир, нә дә ки, бу изтирабларын гаршысыны ҝүҹ тәтбиг едәрәк алмыр, јә’ни инсанлары, истәмәдикләри һалда Онун ганунларына табе олмаға мәҹбур етмир (Тәснијә 30:19, 20). Аллаһ, әбәди вә хошбәхт јашамағымыз үчүн зәрури олан һәр шеји етмишдир, лакин Онун салеһ јоллары илә јеримәк истәјиб-истәмәдијимизи ҝөстәрмәк үчүн һал-һазырда бизә имкан верир (Вәһј 14:6, 7). Барбара, Аллаһын тәләбләрини өјрәнмәк вә онлара әсасән јашамаг һаггында гәти гәрар гәбул етди. Бундан әлавә, Јеһованын Шаһидләри арасында, Исанын сөзләринә ҝөрә онун әсл давамчыларыны фәргләндирәҹәк мәһәббәт хүсусијјәтини ҝөрдү (Јәһја 13:34, 35).

Барбараја көмәк едән амилләр сизә дә көмәк едә биләр.

Мә’налы һәјат

Һәтта фираван јашајырмыш кими ҝөрүнән инсанлары белә, нараһат едән суаллар вар. Мәсәлән, Бөјүк Британијадан олан Метју адлы бир ҝәнҹ, һәмишә һәгиги Аллаһы вә һәјатын мә’насыны тапмағы чох арзу едирди. Метју 17 јашында икән атасыны итирмишди. Бир гәдәр вахтдан сонра јүксәк мусиги тәһсили алмышды. Вахт өтдүкҹә, мадди мәнафе ҝүдмәкдән ибарәт олан һәјат тәрзинин әһәмијјәтсиз олдуғуна әминлији артды. О, евләрини тәрк едиб Лондона көчдү, бурада исә наркотик маддәләр гәбул етмәјә, ҝеҹә клубларына ҝетмәјә, астролоҝија вә спиритизмлә, һәтта зен буддизмлә вә диҝәр фәлсәфәләрлә мәшғул олмаға башлады; белә давранмагла һәјатда мәмнунлуг ахтарырды. Үмидсиз һалда уҹадан Аллаһа нида едиб, һәгигәти тапмагда она көмәк етмәсини хаһиш етди.

Ики ҝүндән сонра Метју көһнә танышы илә растлашды вә она дүшдүјү чәтин вәзијјәти барәдә данышды. Метјунун танышы әввәлләр Јеһованын Шаһидләри илә Мүгәддәс Китабы өјрәнирди. Танышы она 2 Тимотејә 3:1-5 ајәләрини ачыб ҝөстәрәндә, Метју Мүгәддәс Китабын бизи әһатә едән дүнјаны неҹә дәгиг тәсвир етдијинә тәәҹҹүбләнди. Дағүстү тәблиғи охујанда, јазыланлар Метјунун үрәјини риггәтә ҝәтирди (Матта, 5-7-ҹи фәсилләр). Әввәлҹә, јахынлыгдакы Падшаһлыг Залында кечирилән ҝөрүшә ҝетмәјә ҹүр’әт етмирди, чүнки Јеһованын Шаһидләри һаггында тәнгиди рә’јләр охумушду. Амма сонрадан ҝетмәк гәрарына ҝәлди.

Орада дејиләнләр Метјунун хошуна ҝәлди вә о, јығынҹағын ағсаггалларындан бири илә Мүгәддәс Китабы өјрәнмәјә башлады. Тезликлә о, баша дүшдү ки, Аллаһ онун дуасына ҹаваб вериб, чүнки ахтардығыны тапмышды. Јеһоваја мәгбул олмајан мәшғулијјәтләрдән имтина етмәси она фајда ҝәтирди. Аллаһ гаршысында фајдалы горху инкишаф етдирәрәк, һәјатыны Онун әмрләринә мүвафигләшдирмәјә тәшвиг олунду. Метју, бу ҹүр һәјатын мә’налы олдуғуну анлады (Ваиз 12:13).

Метјунун вә бу мәгаләдә һагларында бәһс едилән адамларын һәјатда мәмнунлуг тапмалары Аллаһ тәрәфиндән јазылан јазы дејилдир. Әслиндә Јеһованын әмрләринә севинҹлә табе олан һәр бир кәсә, Онун мәһәббәтлә долу нијјәти һаггында өјрәнмәк үчүн бу ҹүр јазы лазым да дејилди (Һәвариләрин ишләри 10:34, 35). Бу нијјәт өзүнә, мүһарибәләр, хәстәликләр, аҹлыг вә өлүм олмајан дүнјада әбәди һәјаты дахил едир (Ишаја 2:4; 25:6-8; 33:24; Јәһја 3:16). Бу ҹүр дүнјада јашамаг истәјирсинизми? Әҝәр истәјирсинизсә, онда мәмнунлуг ҝәтирән һәјатын ачарыны тапмаг барәдә ҝениш мә’луматы Јеһованын Шаһидләринин Падшаһлыг Залларында кечирилән вә Мүгәддәс Китабын өјрәнилмәсинә һәср едилән ҝөрүшләрдә өјрәнә биләрсиниз. Сизи сәмими гәлбдән бу ҝөрүшләрә дә’вәт едирик.

[7-ҹи сәһифәдәки шәкил]

Аллаһын адыны чағырараг Она үрәкдән дуа един.

[7-ҹи сәһифәдәки шәкил]

Мүгәддәс Китабы, онун тә’лимләринә бағлы олан кәсләрлә өјрәнин.

[7-ҹи сәһифәдәки шәкилләр]

Падшаһлыг Залында кечирилән ҝөрүшләрә ҝәлин.

[Иҹазә илә]

Hiker: Chad Ehlers/Index Stock Photography