Јеһованын ҝүнүнүн јахынлашдығыны нәзәрә алараг инсанлара неҹә мүнасибәт бәсләмәлијик?
“Рәбб... Өз вә’дини јеринә јетирмәкдә ҝеҹикмир. Әксинә, О бизә сәбир едир вә истәјир ки, һамы төвбәјә ҝәлсин вә кимсә һәлак олмасын” (2 ПЕТЕР 3:9).
1, 2. а) Јеһова бу ҝүн инсанлара неҹә мүнасибәт бәсләјир? б) Өзүмүзә һансы суаллары верә биләрик?
ЈЕҺОВАНЫН хидмәтчиләринә “бүтүн халглар арасында шаҝирдләр” һазырламаг тапшырылыб (Матта 28:19, ЈД). Бу тапшырығы јеринә јетирәркән вә ‘Рәббин бөјүк ҝүнүнү’ ҝөзләјәркән, биз инсанлара, Аллаһын онлара бәсләдији мүнасибәти бәсләмәлијик (Тсефанја 1:14). Бәс Аллаһ онлара неҹә мүнасибәт бәсләјир? Һәвари Петер ҹаваб верир: “Рәбб бә’зиләринин зәнн етдији кими Өз вә’дини јеринә јетирмәкдә ҝеҹикмир. Әксинә, О бизә сәбир едир вә истәјир ки, һамы төвбәјә ҝәлсин вә кимсә һәлак олмасын” (2 Петер 3:9). Аллаһ инсанлара төвбә етмәк потенсиалы олан шәхсләр кими бахыр. “О истәјир ки, бүтүн инсанлар хилас олуб, һәгигәти дәрк етсинләр” (1 Тимотејә 2:4). Јеһова “пис адамын јолундан дөнүб јашамасындан зөвг” алыр (Һезекиел 33:11).
2 Һәр биримиз өзүндән соруша биләр: мән дә инсанлара Јеһованын онлара бәсләдији мүнасибәти бәсләјирәмми? Бүтүн иргләрдән вә милләтләрдән олан инсанлара Онун “отлағынын гојунлары” кими бахыраммы? (Мәзмур 100:3; Һәвариләрин ишләри 10:34, 35). Ҝәлин, инсанлара Аллаһын ҝөзү илә бахмағын ваҹиблијини ҝөстәрән ики нүмунәни арашдыраг. Һәр ики һалда инсанларын һәјаты өлүм тәһлүкәси алтында олмушдур вә Јеһованын хидмәтчиләри буну әввәлҹәдән билирдиләр. Јеһованын бөјүк ҝүнүнү ҝөзләдијимиздән бу нүмунәләр бизим үчүн хүсуси әһәмијјәт кәсб едир.
Ибраһим Јеһованын нөгтеји-нәзәринә шәрик иди
3. Јеһова Содом вә Һоморранын сакинләринә һансы нөгтеји-нәзәрлә јанашырды?
3 Биринҹи нүмунә гәбилә башчысы олан Ибраһимин әхлагсыз Содом вә Һоморра шәһәрләринә мүнасибәтинә аиддир. Јеһова “Содом вә Һоморраја гаршы галхан фәрјады” ешидәндә, һәмин шәһәрләри вә онларын сакинләрини дәрһал мәһв етмәди. О, әввәлҹә һәр шеји јахшы-јахшы јохлады (Јарадылыш 18:20, 21, МКШ). Содом шәһәринә ики мәләк ҝөндәрилди вә онлар салеһ Лутун евиндә ајаг сахладылар. Һәмин ҝеҹә мәләкләрлә һомосексуал әлагәдә олмаг арзусу илә “ҹавандан тутмуш гоҹаја гәдәр Содом шәһәринин һәр мәһәлләсиндән олан кишиләр еви әһатәјә алдылар”. Шәһәр сакинләринин мә’нәвијјатынын ашағы сәвијјәдә олмасы ачыг шәкилдә сүбут етди ки, шәһәр мәһв едилмәјә лајигдир. Буна бахмајараг, мәләкләр Лута дедиләр: “Бурада даһа кимин вар? Бу шәһәрдә күрәкәнин, оғлун, гызын — нәслиндән олан һәр кәс варса, һамысыны бу јердән чыхарт”. Јеһова шәһәрин бә’зи сакинләринә хилас олмаг имканы верди, лакин ахырда јалныз Лут вә онун ики гызы өлүмдән гуртулду (Јарадылыш 19:4, 5, 12, 16, 23-26, МКШ).
4, 5. Ибраһим нәјә ҝөрә Содомун сакинләри үчүн јалварырды вә онун инсанлара олан мүнасибәти Јеһованын нөгтеји-нәзәринә мүвафиг ҝәлирдими?
4 Инди исә Јеһованын Содом вә Һоморра шәһәрләриндәки вәзијјәти јохламаг барәдәки нијјәтини Ибраһимә сөјләдији вахта гајыдаг. Ибраһим мәһз о заман Аллаһа јалвармаға башлады: “Әҝәр бу шәһәрдә әлли нәфәр салеһ адам олса, Сән јенә дә ораны мәһв едәҹәксән? Әлли нәфәр салеһ адамын хатиринә бу јерә рәһм етмәјәҹәксән? Ахы Сән буну еләмәзсән, салеһ адамы ҝүнаһкарла бирҝә өлдүрмәзсән. Салеһ адамын агибәтини ҝүнаһкарынкы кими етмәзсән; Сән буну еләмәзсән. Бүтүн дүнјанын Һакими белә әдаләтсизлик етмәз”. Ибраһим ики дәфә “Сән буну еләмәзсән” дејә тәкрар едир. О, өз тәҹрүбәсиндән билирди ки, Јеһова салеһ адамы ҝүнаһкарла бирҝә өлдүрмәз. Јеһова Содом шәһәриндә әлли нәфәр салеһ адам тапыларса, һәмин шәһәри мәһв етмәјәҹәјини сөјләјәндә Ибраһим бу сајы она кими азалтды (Јарадылыш 18:22-33, МКШ).
5 Јеһова вәзијјәтә башга ҹүр бахсајды, Ибраһимин јалварышларына гулаг асардымы? Ајдындыр ки, јох. “Аллаһын досту” олан Ибраһим, ҝөрүндүјү кими Аллаһын инсанлара олан мүнасибәтини билир вә Онун нөгтеји-нәзәринә шәрик иди (Јагуб 2:23). Јеһова диггәтини Содом вә Һоморра шәһәрләринә јөнәлдәндә, Ибраһимин јалварышларына диггәт јетирмәјә разылашды. Нәјә ҝөрә? Чүнки сәмави Атамыз “истәјир ки, һамы төвбәјә ҝәлсин вә кимсә һәлак олмасын”.
Јунусун инсанлара олан нөгтеји-нәзәри фәргләнирди
6. Ниневијалылар Јунусун тәблиғинә неҹә һај вердиләр?
6 Инди исә икинҹи нүмунәјә — Јунусун нүмунәсинә бахаг. Бу дәфә Ниневија шәһәринә һөкм кәсилмишдир. Јунус пејғәмбәрә шәһәрдә јашајанларын пислијинин Јеһоваја гәдәр чатдығыны бәјан етмәк тапшырылмышды (Јунус 1:2, МКШ). Ниневија шәһәрәтрафы әразиләрлә бирликдә бөјүк шәһәр иди, “ораны үч ҝүнә ҝәзиб-долашмаг оларды”. Јунус нәһајәтдә Јеһоваја табе олуб, Ниневијаја ҝәләндә ҹар чәкәрәк деди: “Гырх ҝүндән сонра Нинәва [Ниневија] дағылаҹаг!” Буна ҹаваб олараг “нинәвалылар... Аллаһа инандылар; оруҹ е’лан едәрәк... һамы чул ҝејинди”. Һәтта Ниневијанын падшаһы да төвбә етди (Јунус 3:1-6, МКШ).
7. Ниневијалыларын төвбә етмәләринә Јеһова неҹә мүнасибәт ҝөстәрди?
7 Содомун әһалисиндән фәргли олараг бурада хәбәрдарлыға тамамилә башга мүнасибәт ҝөстәрдиләр. Ниневијалыларын чәкдикләри пешманчылыға Јеһова һансы нөгтеји-нәзәрлә јанашды? Јунус 3:10 ајәсиндә дејилир: “Аллаһ... рәһм едиб әввәлҹә онларын үстүнә ҝөндәрмәк истәдији бәланы ҝөндәрмәди”. Јеһова о мә’нада “рәһм етди” ки, ниневијалылар төвбә едәндә онлара башга нөгтеји-нәзәрлә јанашды. Аллаһын нормалары дәјишмәсә дә, ниневијалыларын пешманчылыгларыны ҝөрүб, Өз гәрарыны дәјишди (Малаки 3:6).
8. Јунус нәјә ҝөрә кәдәрләнди?
8 Ниневијанын мәһв едилмәјәҹәјини баша дүшәндә, Јунус вәзијјәтә Јеһованын нөгтеји-нәзәри илә бахдымы? Јох. Биз охујуруг: “Бу иш Јунусун һеч хошуна ҝәлмәди вә о һирсләнди”. Јунус даһа нә етди? Мүгәддәс Китаб хәбәр верир: “О, Рәббә дуа едәрәк деди: “Ја Рәбб! Мән һәлә өлкәмдә икән буну демирдимми? Буна ҝөрә дә мән Тәршишә гачдым, чүнки билирдим, Сән лүтфкар, рәһмли, һәдсиз сәбирли, мәһәббәтлә долу Аллаһсан вә рәһм едиб бәла ҝөндәрмәзсән” (Јунус 4:1, 2, МКШ). Јунус Јеһованын хүсусијјәтләриндән хәбәрдар иди. Лакин һәмин вәзијјәтдә пејғәмбәр кәдәрләнди вә Ниневија шәһәринин төвбә етмиш сакинләринә мүнасибәтдә Аллаһын нөгтеји-нәзәринә шәрик олмады.
9, 10. а) Јеһова Јунуса һансы дәрси верди? б) Нәјә ҝөрә еһтимал едә биләрик ки, Јунус Јеһованын ниневијалылара олан нөгтеји-нәзәрини гәбул етди?
9 Јунус Ниневијадан кәнара чыхды, талвар дүзәлдиб алтында отурду ки, “шәһәрдә нә баш верәҹәјини ҝөрсүн”. Јеһова Јунусун башы үзәринә көлҝә салмаг үчүн бир битки јетишдирди. Лакин ертәси ҝүн битки гуруду. Јунус биткијә ҝөрә кәдәрләнәндә, Јеһова деди: “Сән... мәһв олан биткијә аҹыјырсан. Бәс сағ әлини сол әлиндән ајыра билмәјән јүз ијирми миндән чох инсанын вә чохлу һејванын јашадығы бөјүк шәһәр Нинәваја Мән неҹә аҹымајым?” (Јунус 4:5-11, МКШ). Инсанлара олан нөгтеји-нәзәринә даир Јеһова Јунуса неҹә дә ҝөзәл дәрс верди!
10 Јеһованын, Ниневија шәһәринин сакинләринә јазығы ҝәлдији барәдә дедији сөзләрә Јунусун неҹә реаксија ҝөстәрдији һагда Мүгәддәс Китабда һеч нә јазылмајыб. Лакин ајдындыр ки, пејғәмбәр төвбә едән ниневијалылара нөгтеји-нәзәрини дәјишди. Јеһова Јунусу илһамланмыш китабы јазмагда истифадә етдији үчүн бу ҹүр нәтиҹәјә ҝәлә биләрик.
Инсанлара сән неҹә мүнасибәт бәсләјирсән?
11. Ибраһим бу ҝүн јашајан инсанлара неҹә мүнасибәт бәсләјәрди?
11 Бу ҝүн биз, индики системин Јеһованын бөјүк ҝүнүндә мәһв едиләҹәји фәлакәтли бир вахтын астанасында дуруруг (Лука 17:26-30; Галатијалылара 1:4; 2 Петер 3:10). Тезликлә мәһв едиләҹәк индики дүнјада јашајан инсанлара Ибраһим һансы нөгтеји-нәзәрлә јанашарды? О, һәр шејдән әввәл ‘Падшаһлыг һаггында олан Мүждәни’ индијәдәк ешитмәјән инсанлар үчүн нараһат оларды (Матта 24:14, И–93). Ибраһим Содомда тапылаҹаг салеһләрин хилас ола билмәси үчүн Аллаһа дөнә-дөнә јалварды. Өзүмүздән сорушмаға дәјәр: мән, төвбә етмәк вә Аллаһа хидмәт етмәк имканы верилдији тәгдирдә Шејтанын ихтијарында олан дүнјанын јолларыны, еһтимал ки, тәрк едәҹәк инсанлар үчүн нараһат олураммы? (1 Јәһја 5:19; Вәһј 18:2-4).
12. Нәјә ҝөрә башланғыҹда Јунусун инсанлара бәсләдији мүнасибәти асанлыгла гәбул едә биләрик вә буна гаршы нә етмәк олар?
12 Биз бүтүн писликләрин сонуну сәбирсизликлә ҝөзләјирик, бу исә тә’рифәлајигдир (Һабаккук 1:2, 3). Лакин башланғыҹда Јунусун етдији кими, јә’ни төвбә етмәјә һазыр олан инсанлара е’тинасыз јанашмаг неҹә дә асан ола биләр. Әҝәр инсанларын јанына Падшаһлыг һаггындакы хош хәбәрлә ҝәләркән һәмишә е’тинасызлыг, дүшмәнчилик вә һәтта дөјүшкәнлик әһвал-руһијјәси илә гаршылашырыгса, бу ҹүр тәһлүкә хүсусилә реалдыр. Биз Јеһованын бу әхлагсыз системдән топлајаҹағы кәсләри нәзәрдән гачыра биләрик (Ромалылара 2:4). Ҹидди анализдән сонра өзүмүздә Јунусун башланғыҹда ниневијалылара олан мүнасибәтинә бәнзәр мејл ашкар етсәк, Јеһованын нөгтеји-нәзәрини гәбул етмәкдә бизә көмәк етмәси үчүн Она дуа едә биләрик.
13. Нәјә ҝөрә дејә биләрик ки, Јеһова бу ҝүн јашајан инсанлара е’тинасыз јанашмыр?
13 Јеһова һәлә ки, Она хидмәт етмәјән инсанлара е’тинасызлыг етмир вә һәср олунмуш хидмәтчиләринин јалварышларына гулаг асыр (Матта 10:11). Мәсәлән, Јеһова онларын дуаларына ҹаваб олараг, әдаләти бәрпа едәҹәкдир (Лука 18:7, 8). Бундан әлавә, вахты ҝәләндә Јеһова бүтүн вә’д вә нијјәтләрини јеринә јетирәҹәкдир (Һабаггуг 2:3). Бу о демәкдир ки, О, Ниневијанын сакинләри јенидән әхлагсызлыға гајытдығы заман онлары мәһв етдији кими, јер үзүнү дә бүтүн писликләрдән тәмизләјәҹәкдир (Наһум 3:5-7).
14. Јеһованын бөјүк ҝүнүнү ҝөзләјәрәк биз нә етмәлијик?
14 Јашадығымыз пис системин Јеһованын бөјүк ҝүнүндә јох олаҹағы вахта гәдәр бүтүн гүввәмизи Аллаһын ирадәсини јеринә јетирмәјә һәср едәрәк сәбирлә ҝөзләјәҹәјикми? Јеһованын ҝүнүнүн ҝәләҹәји вахта гәдәр тәблиғ ишинин нә дәрәҹәдә иҹра олунаҹағы бизә там тәфәррүаты илә мә’лум олмаса да, биз дәгиг билирик ки, Падшаһлыг һаггындакы хош хәбәр сон ҝәләнә кими бүтүн дүнјада Аллаһа мәгбул олдуғу кими тәблиғ едиләҹәкдир. Шүбһәсиз ки, биз Јеһованын Өз евини иззәтлә долдурараг топлајаҹағы “дәјәрли шејләр” үчүн нараһат олмалыјыг (Һаггај 2:7).
Нөгтеји-нәзәримиз әмәлләримиздә әкс олунур
15. Хош хәбәрин тәблиғ едилмәсинин ваҹиблијини даһа ајдын дәрк етмәкдә бизә нә көмәк едәр?
15 Еһтимал ки, јашадығымыз әразидә тәблиғ ишинә јахшы мараг ҝөстәрмирләр, Падшаһлыг тәблиғчиләринин чатышмадығы әразијә көчмәјә исә имканымыз јол вермир. Тутаг ки, јашадығымыз әразидә сон ҝәләнә кими ҹәми он адам тапылаҹаг. Һәмин он адамы ахтарылмаға лајиг ҝөрүрүкмү? Исанын адамлара јазығы ҝәлирди, “чүнки чобансыз гојунлар кими тагәтсиз вә дағыныг идиләр” (Матта 9:36). Мүгәддәс Китабы өјрәнмәклә, “Ҝөзәтчи Гүлләси” вә “Ојанын!” журналларындакы мәгаләләри диггәтлә охумагла, дүнјанын дүшдүјү фәлакәтли вәзијјәти даһа дәриндән баша дүшәҹәјик. Бу, бизә хош хәбәрин тәблиғинин ваҹиблијини даһа ајдын дәрк етмәјә көмәк едәҹәк. Бундан әлавә, “садиг вә ағыллы гулун” Мүгәддәс Китаб әсасында тәгдим етдији материаллардан миннәтдарлыгла истифадә етсәк, тез-тез ишләнән әразидә даһа әминликлә тәблиғ едә биләрик (Матта 24:45-47; 2 Тимотејә 3:14-17).
16. Хидмәтимизин кејфијјәтини неҹә артыра биләрдик?
16 Мүгәддәс Китабын хиласедиҹи хәбәринә һај верәҹәк кәсләр үчүн нараһатчылығымыз бизи, ҝүнүн мүхтәлиф вахтларында тәблиғ етмәјә вә хидмәтимиздә мүхтәлиф үсуллардан истифадә етмәјә тәшвиг едир. Инсанларын чохуну евдә тапмадыгда нә етмәли? Мүхтәлиф вахтларда вә мүхтәлиф јерләрдә шаһидлик етсәк, еһтимал ки, хидмәтимизин кејфијјәтини јүксәлтмәјә наил олаҹағыг. Балыгчылар, балыг тутмаг мүмкүн олан вахтларда балыгчылыгла мәшғул олурлар. Сөһбәт руһани балыг овундан ҝедәндә, биз дә бу ҹүр даврана биләрикми? (Марк 1:16-18). Нәјә ҝөрә ахшам вахтлары вә ја (әҝәр бу ганунидирсә) телефон васитәсилә шаһидлик етмәјәк? Бә’зиләри диггәт јетирмишләр ки, автомобил дајанаҹаглары, јүк машынларынын истираһәт јерләри, јанаҹагдолдурма мәнтәгәләри вә мағазалар “балыгла зәнҝин” олан јерләрдир. Һәм дә әҝәр биз инсанлара Ибраһимин бәсләдији мүнасибәти бәсләјириксә, онда һәр имкандан истифадә едәрәк гејри-рәсми сурәтдә шаһидлик едәҹәјик.
17. Хариҹдә хидмәт едән миссионерләри вә башга хидмәтчиләри неҹә руһландыра биләрик?
17 Милјонларла инсанлар Падшаһлыг һаггындакы хәбәри һәлә ешитмәјибләр. Бу ҹүр инсанлара јалныз тәблиғ васитәсилә дејил, башга васитәјлә дә, өзү дә евдән чыхмадан гајғы ҝөстәрә биләрик. Хариҹдә хидмәт едән, шәхсән таныдығымыз миссионерләр вә ја таммүддәтли хидмәтчиләр вармы? Әҝәр варса, биз онлара мәктуб јазыб, әмәкләринә ҝөрә миннәтдарлығымызы билдирә биләрик. Бу ҹүр давранышымызда инсанлара гајғы ҝөстәрдијимиз неҹә әкс олунур? Бизим тә’риф вә руһландырмадан ибарәт олан мәктубумуз миссионерләри тә’јин олундуглары өлкәдә галмаға тәшвиг едә биләр, белә олан һалда исә онлар һәгигәти билмәкдә даһа чох инсанлара көмәк едә биләрләр (Һакимләр 11:40). Һәм дә миссионерләр вә башга өлкәләрдә һәгигәтә сусајан инсанлар үчүн дә дуа едә биләрик (Ефеслиләрә 6:18-20). Гајғы ҝөстәрмәјин даһа бир үсулу — Јеһованын Шаһидләринин үмумдүнја ишинә ианәләр етмәкдир (2 Коринфлиләрә 8:13, 14; 9:6, 7).
Башга јерә көчә биләрдинми?
18. Өлкәләриндәки тәблиғ ишини ҝенишләндирмәк үчүн бә’зи мәсиһчиләр һансы аддымлары атырлар?
18 Падшаһлыг тәблиғчиләринин азлыг тәшкил етдији әразијә көчәнләр фәдакарлыгларына ҝөрә хејир-дуа алмышлар. Јеһованын диҝәр Шаһидләри өз өлкәләриндә галараг иммигрантлара руһани көмәклик ҝөстәрмәк үчүн хариҹи дил өјрәнмишләр. Бу ҹүр сә’јләр мүтләг мүкафатланыр. Мәсәлән, Техас штатынын (АБШ) бир шәһәриндә чинлиләрә көмәк едән једди Шаһидин сә’ји сајәсиндә 2001-ҹи илдә Рәббин Хатирә Ҝеҹәсини гејд едәркән онлара 114 адам гошулмушдур. Әҹнәби дилли груплара көмәк едәнләрин саһәләри артыг бичин үчүн һазырдыр (Матта 9:37, 38).
19. Падшаһлыг һаггындакы тәблиғ ишиндә иштирак етмәк мәгсәди илә башга өлкәјә көчмәк истәјириксә бизә нә етмәк мәсләһәт ҝөрүлүр?
19 Ола билсин, сән вә аилә үзвләрин һесаб едирсиниз ки, имканларыныз сизә Падшаһлыг хидмәтчиләринин азлыг тәшкил етдији әразијә көчмәјә јол верир. Шүбһәсиз ки, “отуруб әввәлҹә мәсрәфләри” һесаб етмәк мүдриклик оларды (Лука 14:28). Инсан башга өлкәјә көчмәк гәрарына ҝәләндә бу хүсусилә ваҹибдир. Бу барәдә дүшүнән һәр бир кәсин өзүнә бу ҹүр суаллар вермәси јахшы оларды: орада аиләмин гајғысына гала биләҹәјәмми? Лазыми визаны алмаг имканым олаҹагмы? Һәмин өлкәнин дилини билир вә ја о дили өјрәнмәјә һазыраммы? Оранын иглими вә мәдәнијјәти барәдә дүшүнмүшәмми? Јерли гардашлар үчүн јүк дејил, әсл “тәсәлли” олаҹағаммы? (Колослулара 4:10, 11). Көчмәк фикриндә олдуғун өлкәдә тәблиғчиләрә олан еһтијаҹын нә дәрәҹәдә бөјүк олдуғуну билмәк үчүн, һәмин әразидәки тәблиғ ишинә рәһбәрлик едән Јеһованын Шаһидләринин филиалына мәктуб јазмаг һеч вахт артыг олмазa.
20. Ҝәнҹ бир мәсиһчи јад өлкәдәки һәмиманлыларынын вә башга инсанларын рифаһы үчүн неҹә фәдакарлыг етмишдир?
20 Јапонијада Падшаһлыг Залынын тикинтиси илә мәшғул олан бир мәсиһчи өјрәнди ки, Парагвајда ҝөрүшләрин кечирилмәси үчүн залын тикилмәси ишиндә ихтисаслы ишчиләрә еһтијаҹ вар. О, ҹаван, субај, гүввәтли олдуғу үчүн Парагваја көчдү вә сәккиз ај әрзиндә һәмин тикинти ишиндә јеҝанә таммүддәтли хидмәтчи кими чалышды. Парагвајда јашаја-јашаја испан дилини өјрәнди вә Мүгәддәс Китаб өјрәнмәси кечирмәјә башлады. Фикир верди ки, һәмин әразидә Падшаһлығын тәблиғчиләринә еһтијаҹ вар. Мүәјјән мүддәт үчүн Јапонијаја гајытдыгдан сонра јенидән Парагваја ҝәлди вә инсанлары һәмин Падшаһлыг Залында кечирилән ҝөрүшләрә дә’вәт етмәјә башлады.
21. Јеһованын бөјүк ҝүнүнү ҝөзләдијимиз мүддәтдә диггәтимизи нәјә јөнәлтмәли вә инсанлара неҹә јанашмалыјыг?
21 Аллаһ гајғы ҝөстәрәҹәкдир ки, тәблиғ иши Онун ирадәсинә мүвафиг олараг там дәрәҹәдә баша чатсын. О, бу ҝүн сонунҹу руһани бичин ишини сүр’әтләндирир (Ишаја 60:22). Јеһованын ҝүнүнү ҝөзләдијимиз мүддәтдә исә ҝәлин, бичин ишиндә сә’јлә иштирак едәк вә инсанлара Онун нөгтеји-нәзәри илә јанашаг.
[Һашијә]
a Тәблиғ иши гадаған олунан вә ја мүәјјән мәһдудијјәтләр алтында олан өлкәјә көчмәк һәмишә әлверишли олмур. Бу, һәтта һәмин шәраитдә еһтијатла тәблиғ едән Падшаһлыг тәблиғчиләринә зәрәр ҝәтирә биләр.
Хатырлајырсынызмы?
• Јеһованын ҝүнүнү ҝөзләјәрәк инсанлара неҹә јанашмалыјыг?
• Содом шәһәриндә салеһ инсанларын ола биләҹәјини дүшүнәрәк Ибраһим неҹә давранды?
• Ниневијанын төвбә едән сакинләринә Јунус неҹә јанашды?
• Јеһованын һәлә дә хош хәбәри ешитмәјән инсанлара олан нөгтеји-нәзәринә шәрик олдуғумузу неҹә ҝөстәрә биләрик?
[14-ҹү сәһифәдәки шәкил]
Ибраһим инсанлара Јеһованын нөгтеји-нәзәри илә јанашырды.
[15-ҹи сәһифәдәки шәкил]
Јунус төвбә едән ниневијалылара Јеһованын бәсләдији нөгтеји-нәзәри гәбул етди.
[16-ҹы сәһифәдәки шәкилләр]
Инсанлар барәдәки нараһатчылығымыз бизи ҝүнүн мүхтәлиф вахтларында тәблиғ етмәјә вә мүхтәлиф үсуллардан истифадә етмәјә тәшвиг едир.