Никаһынызы мөһкәмләндирмәјин үсулу

УЧМАГ үзрә олан еви тәсәввүр един. Суваг гопуб төкүлүр, дам дешилиб, һәтта һәјәти дә артыг чохдандыр ки, јығышдырылмајыб. Ајдындыр ки, бу ев дәфәләрлә пис һава шәраитинә таб ҝәтирмәли олмуш вә артыг узун илләрдир ки, она гајғыкеш әлләр дәјмәјиб. Онда елә чыхыр ки, ону сөкмәк лазымдыр? Һеч дә јох. Әҝәр евин тәмәли вә дајағы мөһкәмдирсә, ону тә’мир етмәк тамамилә мүмкүндүр.

Сизин никаһла јухарыда тәсвир олунан ев арасында һәр һансы охшарлыг вармы? Еһтимал ки, аиләдәки мүнасибәтләриниз һәјатын чәтинликләри уҹбатындан илләр әрзиндә зәрәр чәкиб. Јахуд сизләрдән бириниз вә ја һәр икиниз мүнасибәтләринизи јахшылашдырмаг үчүн артыг чохдандыр ки, һеч бир тәшәббүс ҝөстәрмәмисиниз. Јәгин Сендинин һиссләри сизә танышдыр. 15 ил аилә һәјатындан сонра о гејд едир: “Бизи бир-биримизә бағлајан јалныз рәсми гејдијјат иди. Лакин бу кифајәт дејилди”.

Әҝәр вәзијјәт сизин аиләниздә дә бу сәвијјәјә чатыбса, чыхыш јолунун јалныз ајрылмагда олдуғуну дүшүнмәјә тәләсмәјин. Еһтимал ки, сизин мүнасибәтләринизи гајдасына салмаг мүмкүндүр. Чох шеј сизин бир-биринизә нә дәрәҹәдә садиг олмағыныздан асылыдыр. Садиглик аилә ҹүтләринин чәтин анларда таб ҝәтирмәләринә көмәк едә биләр. Бәс садиглик нә демәкдир? Аилә мүнасибәтләринин бу саһәсини Мүгәддәс Китабын көмәјилә неҹә мөһкәмләндирмәк олар?

Садиглик вә борҹ һисси

Бир лүғәтә әсасән “садиглик” — “өз мәс’улијјәтләрини вә борҹуну јеринә јетирәркән һиссләрдә вә мүнасибәтләрдә сарсылмазлыг вә дәјишмәзлик” кими изаһ олунур. Садиглик тәкҹә инсанлара гаршы тәзаһүр етдирилмир. Мисал үчүн, иншаатчы евин тикинтиси илә бағлы имзаладығы мүгавиләни јеринә јетирмәји өзүнә борҹ һесаб едир. Еһтимал ки, о, сифаришчини шәхсән танымыр, лакин өзүнү борҹлу һисс етдији үчүн мүгавиләјә әсасән давраныр.

Никаһ сојуг ишҝүзар мүгавилә олмаса да, садиглик өһдәмизә ҝөтүрдүјүмүз ишин јеринә јетирилмәсини тәләб едир. Сиз вә һәјат јолдашыныз, һәр бир шәраитдә бирликдә олаҹағыныза даир Аллаһ вә инсанлар гаршысында тәнтәнәли сурәтдә сөз вермисиниз. Иса гејд етмишдир ки, Јарадан “башланғыҹдан... [инсанлары] киши вә гадын јаратды вә деди: “Буна ҝөрә инсан ата-анасыны бурахаҹаг вә арвадына бағланаҹагдыр”. Сонра Иса әлавә етди: “Аллаһын бирләшдирдијини инсан ајырмамалыдыр” (Матта 19:4-6). Чәтинликләр јаранан заман сиз вә һәјат јолдашыныз үзәринизә ҝөтүрдүјүнүз өһдәлијә мүвафиг јашамаға там гәрарлы олмалысынызa. Бир гадын дејир: “Мүнасибәтләримиз, бошанма һагда фикирләрдән тамамилә имтина етдикдән сонра дүзәлмәјә башлады”.

Лакин никаһдакы садиглик јалныз борҹ һиссиндән ибарәт дејил. Бәс бунун үчүн даһа нә тәләб олунур?

Садиглик вә әрлә арвадын бир-биринә дајаг олмасы

Әрлә арвад бир-бирләринә садиг олсалар белә, бу о демәк дејил ки, онларын фикирләри һәр заман вә һәр шејдә бир-биринә ујғун ҝәләҹәк. Фикир ајрылығы јаранан заман әр-арвады барышмаға јалныз борҹ һисси дејил, еләҹә дә онларын емосионал бағлылығы тәшвиг етмәлидир. Иса әр-арвадлар һаггында белә деди: “Онлар артыг ики дејил, бир бәдәндирләр”.

Һәјат јолдашы илә “бир бәдән” олмаг нә демәкдир? Һәвари Павел јазмышдыр ки, “әрләр... өз арвадларыны, өз бәдәнләри гәдәр севмәлидирләр” (Ефеслиләрә 5:28, 29). Демәли, “бир бәдән” олмаг, һәр шејдән әлавә, һәјат јолдашынын рифаһына өз шәхси рифаһы кими гајғы ҝөстәрмәк демәкдир. Никаһ телләрилә бир-биринә бағлы олан инсанлара дүшүнҹә тәрзләрини дәјишмәк лазымдыр: “мәним” јеринә “бизим”, “мән” јеринә исә “биз” олмалыдыр. Бир мәсләһәтчи гадын јазмышдыр: “Сизин никаһыныз үрәјиниздә бағланмалыдыр. Мәһз үрәк баша дүшмәлидир ки, “мән” артыг “биз” олуб”.

Бәс сизинлә һәјат јолдашыныз һаггында нә демәк олар? Һәгигәтән дә никаһыныз үрәјиниздәми бағланыб? Узун илләр бирликдә јашамаг, амма јенә дә сөзүн әсл мә’насында “бир бәдән” олмамаг олар. Бу мүмкүндүр, лакин “Вахта шанс верин” адлы китабда гејд едилир: “Никаһ ики нәфәрә бир һәјат демәкдир вә әрлә арвадын тәмас нөгтәси нә гәдәр чох оларса, никаһ да бир о гәдәр хошбәхт олар” (“Giving Time a Chance”).

Бә’зи хошбәхт олмајан әр-арвад ҹүтләри ја ушаглары, ја да мадди тә’минат хатиринә бирликдә јашамаға давам едирләр. Диҝәрләри әтрафдакыларын онлары мүһакимә едәҹәкләриндән горхдуглары вә ја үмумијјәтлә, бошанманын әлејһинә олдуглары үчүн бирликдә јашамаға үстүнлүк верирләр. Бу әр-арвадларын бирликдә јашамаға давам етмәләри өзлүјүндә тә’рифәлајигдир, анҹаг јадда сахламаға дәјәр ки, сизин мәгсәдиниз тәкҹә давамедиҹи мүнасибәтләр дејил, мәһәббәт үзәриндә гурулан мүнасибәтләр олмалыдыр.

Тәмәннасызлыг әрлә арвадын садиглијини инкишаф етдирир

Мүгәддәс Китабда габагҹадан дејилир ки, “сон ҝүнләрдә” инсанлар “худбин” олаҹаглар (2 Тимотејә 3:1, 2). Бу пејғәмбәрлијин ҝөстәрдији кими мүасир ҹәмијјәтдә инсанлар өзләрини илаһиләшдирирләр. Әфсуслар олсун ки, бир чох аиләләрдә гаршылыг ҝөзләмәдән өзүнү башгасы наминә сәрф етмәјин зәифлик әламәти олдуғуна даир фикри мөвҹуддур. Лакин сағлам аилә мүнасибәтләри әрлә арвадын өзләрини бир-бирләри наминә фәда етмәләринин әсасында гурулур. Фәдакарлыг руһуну сиз неҹә әкс етдирә биләрсиниз?

Һәмишә “бу мүнасибәтләр мәнә нә верир?” суалынын үзәриндә дүшүнмәк әвәзинә өзүнүздән сорушун: “Никаһымы мөһкәмләндирмәк үчүн мән нә едирәм?” Мүгәддәс Китабда дејилир ки, мәсиһчиләр “јалныз өз мәнфәәтини дејил, башгаларынын да мәнфәәтини” ҝүдмәлидирләр (Филипилиләрә 2:4). Инди исә Мүгәддәс Китабын бу принсипи үзәриндә бир дәгигәлик дајанын вә сон һәфтә әрзиндә етдикләриниз һаггында дүшүнүн. Јалныз һәјат јолдашынызын мәнафеји наминә нә гәдәр иш ҝөрмүсүнүз? Һәр һансы бир шеји мүзакирә етмәк истәјиниз олмадығы һалларда һәјат јолдашынызы динләмәк сизә мүјәссәр олубму? Сизә бир о гәдәр дә мараглы олмајан, амма һәјат јолдашынызын хошуна ҝәлән иши етмәјә нечә дәфә мүвәффәг олмусунуз?

Бу суалларын үзәриндә дүшүнәркән, сизин хејирхаһ ишләринизи һисс етмәјәҹәкләри вә гијмәтләндирмәјәҹәкләри һагда нараһат олмајын. Бир китабда гејд олунур: “Никаһларын чохунда јахшылыг јахшылыгла мүкафатландырылыр, буна ҝөрә дә өзүнүз мүмкүн гәдәр чохлу јахшылыг едәрәк, һәјат јолдашынызы хејирхаһ ишләрә тәшвиг един”. Сиз тәмәннасызлыг әкс етдирәрәк, никаһ бағыны гијмәтләндирдијинизи вә ону горумаға ҹан атдығынызы ҝөстәрирсиниз, бу исә никаһы мөһкәмләндирир.

Өмүрлүк өһдәлик

Јеһова Аллаһ садиглији гијмәтләндирир. Мүгәддәс Китабда дејилир: “[Јеһова,] сәдагәтли илә сәдагәтлә давранырсан” (2 Самуел 22:26, ЈД). Аллаһа сәдагәтли олмаг, һәмчинин өзүнә Онун никаһ гурулушуна сәдагәтли олмағы дахил едир (Тәквин 2:24).

Әҝәр бир-биринизә гаршы садигсинизсә, онда мүнасибәтләринизин сабитлијиндән зөвг алаҹагсыныз. Јахын вә ја узаг ҝәләҹәји тәсәввүр едәркән сиз ону икиниз үчүн тәсәввүр едирсиниз. Бирликдә олмамаг фикри сизә тамамилә јаддыр. Бир гадын дејир: “Әрим мәни өзүмдән чыхардығы анларда белә, мән јалныз һәмин ан арамызда һәр шејин јахшы олмадығы үчүн кәдәрләнирәм, амма никаһымыз үчүн горхмурам. Мән јалныз мүнасибәтләримизи неҹә бәрпа едәҹәјимиз һагда нараһат олурам. Вә мән һәр шејин гајдасына дүшәҹәјинә гәтијјән шүбһә етмирәм, садәҹә бунун неҹә баш верәҹәјини һәмин ан там анламырам”.

Тәәссүфләр олсун ки, бир чох әр-арвадлар өмүрлүк өһдәлијин һәјат јолдашына садиглијин ваҹиб һиссәси олдуғуну дәрк етмирләр. Дилҹавабы атышманын гызғын чағында әр вә ја арвад фикирләшмәдән белә сөз ата биләр: “Мән чыхыб ҝедирәм!” вә ја “Јахшысы будур мәни лајигинҹә гијмәтләндирән бирини ахтарым!” Әлбәттә ки, бунлар чох вахт садәҹә олараг сөзләрдир. Лакин Мүгәддәс Китаб гејд едир ки, дил “өлдүрүҹү зәһәрлә” долу ола биләр (Јагуб 3:8). Һәдә-горху ҝәлмәк вә ултиматумлар белә мә’на дашыјыр: “Мән мүнасибәтләримизи даима горујуб-сахламаг лазым ҝәлдијини дүшүнмүрәм. Мән истәдијим вахт чыхыб ҝедә биләрәм”. Белә дүшүнҹә тәрзи никаһы дағытмаға гадирдир.

Әҝәр никаһ сизин үчүн өмүрлүк өһдәликдирсә, онда сиз һәр бир шәраитдә һәјат јолдашынызын јанында галмаға үмид едирсиниз. Бу исә фајда ҝәтирир. Сизә вә һәјат јолдашыныза бир-биринизин зәифликләри вә сәһвләри илә барышмаг, бир-биринизә тәһәммүл етмәк вә бир-биринизи бағышламаг даһа асан олаҹаг (Колослулара 3:13). Бир китабда дејилир: “Јахшы никаһ одур ки, һәјат јолдашларындан һәр биринин сәһв етдији һалларда да дағылмыр”.

Евләнән заман сиз никаһ гурулушуна дејил, ҹанлы инсана — һәјат јолдашыныза садиг галмағы сөз вермишдиниз. Бу сизин никаһдакы дүшүнҹә тәрзинизә вә давранышыныза ҝүҹлү тә’сир ҝөстәрмәлидир. Мәҝәр разы дејилсинизми ки, һәјат јолдашынызла галмаг јалныз никаһ бирлијини мүгәддәс сајдығыныза ҝөрә дејил, һәм дә никаһа дахил олдуғунуз инсаны севдијинизә ҝөрә дә ваҹибдир?

[Һашијә]

[5-ҹи сәһифәдәки чәрчивә/шәкил]

Инди сиз һансы аддымы ата биләрсиниз?

Сизин никаһынызда садигликлә бағлы вәзијјәт неҹәдир? Еһтимал ки, нәјин үзәриндә ишләмәли олдуғунузу билирсиз. Әҝәр бу беләдирсә, онда нөвбәти мәсләһәтләри тәтбиг един:

● Өзүнүзү јохлајын. Өзүнүздән сорушун: “Мән никаһда олдуғуму үрәјимлә һисс едирәмми, јохса һәлә дә субај кими дүшүнмәјә вә давранмаға давам едирәм?” Бу барәдә һәјат јолдашынызын сизин һаггынызда нә дүшүндүјүнү өјрәнин.

● Бу мәгаләни бирликдә охујун. Сонра никаһда садиглији даһа јахшы неҹә әкс етдирә биләҹәјинизи сакитҹә мүзакирә един.

● Бир-биринизә гаршы садиглији горумаг гәтијјәтинизи мөһкәмләндирән мәшғулијјәтләрә бирҝә вахт сәрф един. Мәсәлән, бирликдә тој шәкилләринә вә һәјатынызда башга ваҹиб һадисәләри хатырладан шәкилләрә бахын; танышлыг заманы вә ја бирҝә һәјатынызын илк илләриндә сизә мәмнунлуг ҝәтирән ишләри ҝөрүн; “Ҝөзәтчи Гүлләси” вә “Ојанын!” журналларындан никаһ һаггында Мүгәддәс Китаба әсасланан мәгаләләри бирликдә өјрәнин.

[6-ҹы сәһифәдәки чәрчивә/шәкил]

Никаһда садиглик...

● борҹ һисси. “Вә’д етдијини өдә. Вә’д вериб өдәмәмәкдәнсә, вә’д вермәмәјин даһа јахшыдыр” (Ваиз 5:4, 5).

● әрлә арвадын бир-биринә дајаг олмасы. “Ики нәфәр бир нәфәрдән јахшыдыр... Чүнки дүшәрләрсә, бири достуну галдырар” (Ваиз 4:9, 10).

● фәдакарлыг руһу. “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35).

● өмүрлүк өһдәликдир. “Мәһәббәт... һәр шејә таб ҝәтирәр” (1 Коринфлиләрә 13:4, 7).

[7-ҹи сәһифәдәки шәкилләр]

Һәјат јолдашыныз сизинлә сөһбәт етмәк истәјәндә ону динләјирсинизми?