Јеһованын үрәјини севиндирән гадынлар

“Бу ишинин әвәзини гој Рәбб версин! Гој... Рәбб сәнә бол мүкафат версин!” (РУТ 2:12, МКШ).

1, 2. Һагларында Мүгәддәс Китабда јазылан, Јеһованын үрәјини севиндирән гадынларын нүмунәләри үзәриндә дәриндән дүшүнмәјин һансы фајдасы вар?

АЛЛАҺ горхусуна малик олмалары, ики гадыны фир’онун сөзүндән чыхмаға вадар етди. Иманла һәрәкәтә ҝәтириләрәк фаһишә гадын исраилли ики кәшфијјатчыны һәјаты баһасына хилас етди. Чәтин вәзијјәтдә дәрракәли вә һәлим олмасы, бир чох инсанын һәјатыны хилас етмәкдә вә Јеһованын мәсһ едилмишини ган төкмәкдән сахламагда гадына көмәк етди. Јеһова Аллаһа олан иманы вә гонагпәрвәрлик руһу, ушағы олан дул гадыны сонунҹу тикәсини Аллаһын пејғәмбәри илә бөлүшмәјә тәшвиг етди. Бу, һагларында Мүгәддәс Китабда јазылан, Јеһованын үрәјини севиндирән бир чох гадынларын нүмунәләриндән јалныз бә’зиләридир.

² Јеһованын һәмин гадынлара олан мүнасибәтиндән вә онлара вердији хејир-дуалардан ҝөрүрүк ки, инсанларын ҹинсиндән асылы олмајараг, Јеһова онларда даһа чох руһани кејфијјәтләри гијмәтләндирир. Буҝүнкү дүнјада ҝөзәл хариҹи ҝөрүнүшә вә мадди ҝәлирә даһа бөјүк әһәмијјәт верилдији үчүн руһани дәјәрләрә үстүнлүк вермәк асан дејил. Бунунла белә, бу ҝүн Аллаһын халгынын бөјүк һиссәсини тәшкил едән, Аллаһ горхусуна малик олан милјонларла гадынларын нүмунәсиндән ҝөрүндүјү кими, буну етмәк мүмкүндүр. Бу мәсиһчи гадынлар, Мүгәддәс Китабда хатырланан Аллаһ горхусуна малик олан гадынларын иманыны, дәрракәсини, гонагпәрвәрлијини вә диҝәр ҝөзәл кејфијјәтләрини тәглид едирләр. Шүбһәсиз ки, мәсиһчи кишиләр дә, гәдим дөврдә јашамыш нүмунәви гадынларын кејфијјәтләрини тәглид етмәк истәрдиләр. Буну даһа бөјүк мигјасда неҹә етмәјин үсулуну ҝөрмәк үчүн, ҝәлин мәгаләнин әввәлиндә хатырланан гадынлар һаггындакы Мүгәддәс Китаб һекајәләрини тәфсилаты илә нәзәрдән кечирәк (Јагуб 4:8; Ромалылара 15:4).

Фир’онун сөзүндән чыхан гадынлар

3, 4. а) Фир’он исраиллиләр арасында јени доғулан һәр бир оғлан ушагларыны өлдүрмәк әмри верәндә, Шифра вә Пуа онун сөзүндән нәјә ҝөрә чыхдылар? б) Ҹәсарәтләринә вә Аллаһ горхусуна малик олдугларына ҝөрә Јеһова бу гадынлары неҹә мүкафатландырды?

³ Икинҹи Дүнја мүһарибәсиндән сонра Алманијада кечирилән Нүрнберг мүһакимәсиндә, күтләви гырғынларда мүгәссир билинәнләрин әксәријјәти садәҹә олараг әмри јеринә јетирдикләрини билдирәрәк, өзләринә бәраәт газандырмаға чалышырдылар. Буну, ады чәкилмәјән гәддар фир’онун һакимијјәти дөврүндә гәдим Мисирдә јашајан Шифра вә Пуа адлы исраилли ики мамача гадынын давранышы илә мүгајисә едәк. Јәһудиләрин сајҹа сүр’әтлә артмаларындан еһтијат едән фир’он бу ики исраилли гадына, исраиллиләр арасында јени доғулан һәр бир оғлан ушағыны өлдүрмәк әмрини верди. Гадынлар бу дәһшәтли әмрә неҹә реаксија ҝөстәрдиләр? Онлар, “Мисир падшаһынын онлара әмр етдији кими етмәдиләр вә оғлан ушагларыны сағ бурахдылар”. Нәјә ҝөрә бу гадынлар инсан горхусунун гурбаны олмадылар? Чүнки онлар “Аллаһдан горхурдулар” (Чыхыш 1:15, 17; Тәквин 9:6).

⁴ Мамача гадынлар Јеһоваја ҝүвәнирдиләр, О да онлар үчүн “галхан” олараг, онлары фир’онун гәзәбиндән горуду (2 Самуел 22:31; Чыхыш 1:18-20). Лакин Јеһованын хејир-дуасы бунунла битмәди. Јеһова Шифра вә Пуаны, “ев-ешик саһиби” етмәклә, онлары мүкафатландырды. Фир’онун ады тарихдән силиндији һалда, Јеһова бу гадынларын адларыны вә онларын әмәлләри һаггында мә’луматы ҝәләҹәк нәсилләр үчүн Өз Кәламында сахламагла, онлары бөјүк шәрәф саһиби етди (Чыхыш 1:21; 1 Самуел 2:30б; Сүлејманын мәсәлләри 10:7).

5. Бу ҝүн бир чох мәсиһчи гадынлар һансы ҹәһәтдә Шифра вә Пуаја бәнзәрдиләр вә Јеһова онлары неҹә мүкафатландыраҹаг?

⁵ Шифра вә Пуаја бәнзәр гадынлар бу ҝүн дә мөвҹуддурму? Шүбһәсиз! Һәр ил, бу ҹүр минләрлә гадынлар Мүгәддәс Китабын һәјатвериҹи хәбәрини “һөкмдарын фәрманы” илә гадаған едилмиш өлкәләрдә азадлыглары вә һәтта һәјатлары баһасына горху билмәдән тәблиғ едирләр (Ибраниләрә 11:23; Һәвариләрин ишләри 5:28, 29). Аллаһа вә гоншуларына олан мәһәббәтдән ирәли ҝәләрәк, бу ҹәсарәтли гадынлар Аллаһын Падшаһлығы һаггындакы хош хәбәри башгалары илә бөлүшмәкдә онлара һеч кимин мане олмасына јол вермирләр. Буна ҝөрә дә бир чох мәсиһчи гадынлар мүгавимәт вә тә’гибләрлә гаршылашырлар (Марк 12:30, 31; 13:9-13). Шифра вә Пуа илә олдуғу кими, Јеһова бу ҝөзәл, ҹәсарәтли гадынларын бүтүн ишләрини ҝөрүр вә әҝәр онлар ахыра кими садигликлә дөзсәләр, Јеһова онларын адларыны ‘һәјат китабында’ сахламагла онлара Өз мәһәббәтини ҝөстәрәҹәкдир (Филипилиләрә 4:3; Матта 24:13).

Әввәлләр фаһишә олан гадын Јеһованын үрәјини севиндирди

6, 7. а) Раһаб Јеһова вә Онун халгы һаггында нә билирди вә бу биликләр она неҹә тә’сир етмишдир? б) Аллаһын Кәламында Раһаб һансы шәрәфә лајиг ҝөрүлмүшдүр?

⁶ Ерамыздан әввәл 1473-ҹү илдә Кән’ан шәһәри Ериһада Раһаб адында фаһишә гадын јашајырды. Еһтимал ки, Раһаб јахшы мә’луматлы гадын иди. Исраилли ики кәшфијјатчы онун евиндә ҝизләнәндә, о, Исраил халгынын Мисирдән чыхдығы вахтдан 40 ил кечсә дә, һәмин һадисәләрлә бағлы мө’ҹүзәләр барәсиндә әтрафлы сөһбәт едә билмишди! О, һәм дә исраиллиләрин Амори падшаһлары Сиһон вә Ог үзәриндәки јени гәләбәләри барәдә дә билирди. Бу мә’луматларын она неҹә тә’сир бағышладығына диггәт јетирәк. Раһаб кәшфијјатчылара деди: “Билирәм ки, Рәбб дијары сизә вермишдир... чүнки Аллаһыныз Рәбб, јухарыда ҝөјләрдә вә ашағыда јер үзәриндә Аллаһ одур” (Јешу 2:1, 9-11). Бәли, Раһабын Јеһова вә Онун Исраил халгы наминә ҝөрдүјү ишләр барәсиндә билдикләри үрәјинә ишләмиш вә ону һәгиги Аллаһа иман ҝәтирмәјә тәшвиг етмишдир (Ромалылара 10:10).

⁷ Раһабын иманы, ону һәрәкәтә тәшвиг етди. О, Исраил кәшфијјатчыларыны “сүлһлә” гәбул етди вә Ериһа шәһәри зәбт олунан заман онларын ҝөстәришләринә риајәт етди (Ибраниләрә 11:31; Јешу 2:18-21). Шүбһәсиз ки, Раһабын имана әсасланан әмәлләри Јеһованын үрәјини севиндирмишди, бунун үчүн дә О, мәсиһчи шаҝирди Јагубу тәшвиг етмишдир ки, Раһабы мәсиһчиләрә нүмунә ҝәтирәрәк Аллаһын досту олан Ибраһимлә јанашы хатырлатсын. Јагуб јазырды: “Мәҝәр фаһишә Раһаб да ејни ҹүр өз әмәлләринә ҝөрә салеһ сајылмадымы? О, кәшфијјатчылары гәбул етди вә башга јол илә ҝери ҝөндәрди” (Јагуб 2:25).

8. Иманына вә итаәткарлығына ҝөрә Јеһова Раһабы неҹә хејир-дуаландырды?

⁸ Јеһова Раһабы бир сыра үсулларла мүкафатландырды. Илк өнҹә Јеһова ону, һәм дә евиндә ҝизләнән һәр бир кәси, даһа доғрусу “атасынын ев халгыны вә она аид оланларын һамысыны” мө’ҹүзәли шәкилдә хилас етди. Сонра онлара “Исраилин арасында” јашамаға изн верди ки, бурада да онларла јерли сакинләр кими давранмалы идиләр (Јешу 2:13; 6:22-25; Левилиләр 19:33, 34). Лакин бунунла һәр шеј битмирди. Јеһова һәм дә Раһабы, Иса Мәсиһин улу нәнәси олмаг шәрәфинә лајиг ҝөрдү. Бир заманлар бүтпәрәст олан кән’анлыја неҹә дә бөјүк мәрһәмәт ҝөстәрилди!a (Мәзмур 130:3, 4).

9. Јеһованын Раһаба вә I әсрдә јашајан бә’зи мәсиһчи гадынлара мүнасибәти буҝүнкү гадынлардан кимисә неҹә руһландыра биләр?

⁹ Һәм I әсрдә, һәм дә бизим дөврдә мәсиһчи гадынлары арасында Раһаб кими Аллаһы разы салмаг үчүн әхлагсыз һәјат тәрзини бурахан кәсләр олмушдур (1 Коринфлиләрә 6:9-11). Шүбһәсиз ки, онлардан бә’зиләри, әхлагсызлығын һәр јердә мөвҹуд олдуғу вә һәтта ади һал сајылдығы кечмиш Кән’анла мүгајисә олунан мүһитдә бөјүмүшләр. Лакин Мүгәддәс Јазылардакы дәгиг билијә әсасланан иман, онлары дәјишилмәјә тәшвиг етмишди (Ромалылара 10:17). Она ҝөрә бу ҹүр гадынлар һаггында да демәк олар ки, “Аллаһ, Өзүнү онларын Аллаһы адландырмагдан утанмыр” (Ибраниләрә 11:16). Неҹә дә бөјүк шәрәфдир!

Дәрракәли олдуғуна ҝөрә хејир-дуа алмышдыр

10, 11. Һансы вәзијјәт Абигаили һәрәкәт етмәјә тәшвиг едир?

¹⁰ Кечмишдә јашајан бир чох садиг гадынлар, ҝөркәмли сурәтдә дәрракә тәзаһүр етдирмиш, бу исә онлары Јеһованын халгынын дәјәрли бир һиссәси етмишдир. Бу ҹүр гадынлардан бири, варлы Исраил мүлкәдары Набалын арвады Абигаил иди. Әҝәр о дәрракә илә давранмасајды, чох инсан һәјаты мәһв оларды, Исраилин ҝәләҹәк падшаһы Давуд исә гатилликдә ҝүнаһландырыларды. Абигаил һаггында биз “1 Самуел” китабынын 25-ҹи фәслиндә охуја биләрик.

¹¹ Һекајәнин әввәлиндә Давуду вә онун адамларыны, исраилли гардашлары Набала гаршы хејирхаһлыгларындан онун сүрүләринин јахынлығында дүшәрҝә салараг ҝеҹә-ҝүндүз тәмәннасыз олараг кешик чәкдикләри вәзијјәтдә тапырыг. Давудун әрзаг еһтијаты түкәнәндә, әрзаг истәмәк үчүн Набалын јанына он нәфәр ҝәнҹ адам ҝөндәрир. Набалын Давуда өз миннәтдарлығыны билдирмәк вә она Јеһованын мәсһ едилмиши кими еһтирам ҝөстәрмәк үчүн ҝөзәл имканы јараныр. Набал исә әксинә давраныр. Олдугҹа гәзәбли сурәтдә Давуду тәһгир едир вә ҝәнҹләри әлибош јола салыр. Бу барәдә ешидәндә, Давуд 400 нәфәр силаһлы адам ҝөтүрүр вә гисас алмаға јолланыр. Абигаил әринин кобудлуғу барәдә ешидиб, јубанмадан вә дәрракә илә һәрәкәт едир: Давуду сакитләшдирмәк үчүн, она бөјүк мигдарда азугә јоллајыр. Сонра өзү дә Давудун јанына ҝедир (2-20-ҹи ајәләр).

12, 13. а) Абигаил дәрракәли олдуғуну, һәмчинин Јеһоваја вә Онун мәсһ едилмишинә олан садиглијини неҹә тәзаһүр етдирди? б) Абигаил евә дөндүкдә нә етди вә сонра һадисәләр неҹә ҹәрәјан етди?

¹² Абигаил Давуду гаршылајыб мәрһәмәт ҝөстәрмәси барәдә она һәлимликлә јалварыр, бу да онун Јеһованын мәсһ едилмишинә еһтирамыны ҝөстәрир. Абигаил, “Рәбб мүтләг әфәндимә е’тибарлы бир ев гураҹагдыр, чүнки әфәндим Рәббин ҹәнҝләрини едир”, дејир вә әлавә едир ки, Јеһова Давуду Исраил үзәриндә һөкмдар тә’јин едәҹәкдир (28-30-ҹу ајәләр). Ејни заманда Абигаил Давуда, өзүндә олан гисас јанғысыны идарә етмәсә, әбәс ганын төкүлмәсинә сәбәб ола биләҹәјини сөјләмәклә, бөјүк мәрдлик ҝөстәрир (26-ҹы, 31-ҹи ајәләр). Абигаилин һәлимлији, ҝөстәрдији еһтирам һисси вә ајдын дүшүнҹә тәрзи Давуду ајылдыр. О ҹаваб верир: “Исраилин Аллаһы Рәбб мүбарәк олсун ки, бу ҝүн мәни гаршыламаға сәни ҝөндәрди; вә анлајышын мүбарәк олсун вә сән мүбарәк оласан; гана ҝирмәкдән вә интигамымы өз әлимлә алмагдан мәни бу ҝүн сән сахладын” (32-ҹи, 33-ҹү ајәләр).

¹³ Евә гајытдыгдан сонра Абигаил Давуда апардығы һәдијјә барәдә әринә ҹәсарәтлә данышмаг истәјир. Лакин әрини “чох сәрхош” вәзијјәтдә тапыр. Буна ҝөрә дә әри өзүнә ҝәләнә кими ҝөзләјир вә сонра һәр шеји она сөјләјир. Набал неҹә реаксија ҝөстәрир? О елә сарсынты кечирир ки, ифлиҹә тутулур. Он ҝүндән сонра Рәббин әлиндән өлүр. Давуд Набалын өлүмү барәдә ешидәндә, кејфијјәтләринә вурулдуғу вә дәрин һөрмәт һисси бәсләдији Абигаилә онунла евләнмәји тәклиф едир. Абигаил она әрә ҝетмәјә разылыг верир (34-42-ҹи ајәләр).

Абигаил кими ола биләрсәнми?

14. Биз Абигаилин һансы кејфијјәтләрини артыг дәрәҹәдә тәзаһүр етдирмәји өјрәнә биләрдик?

¹⁴ Сән бир киши вә ја гадын кими, Абигаилдә ҝөрдүјүн кејфијјәтләри даһа артыг дәрәҹәдә тәзаһүр етдирә биләрсәнми? Еһтимал ки, сән чәтинликләр јаранан заман даһа дәрракәли тәрздә давранмаг истәјирсән. Ја да ки, әтрафында башгалары өзләрини идарә едә билмәјәндә, сән сакитҹә вә мүлајимликлә данышмағы өјрәнмәк истәјирсән. Белә һалда бу барәдә Јеһоваја нәјә ҝөрә дуа етмәјәсән? О, ‘иманла диләјән’ һәр бир кәсә һикмәт, билик вә дәрракә вермәји вә’д едир (Јагуб 1:5, 6; Сүлејманын мәсәлләри 2:1-6, 10, 11).

15. Мәсиһчи гадынлар үчүн Абигаилин кејфијјәтләринә бәнзәр кејфијјәтләри хүсусилә һансы һалларда тәзаһүр етдирмәк ваҹибдир?

¹⁵ Бу ҝөзәл кејфијјәтләр иманына шәрик олмајан, Мүгәддәс Китаб принсипләринә ја олдугҹа аз, ја да үмумијјәтлә риајәт етмәјән әрләри олан гадынлара хүсусилә лазымдыр. Ола биләр ки, әр спиртли ичкидән суи-истифадә едир. Үмид етмәк истәјирик ки, бу ҹүр кишиләр јолларыны дүзәлдәҹәкләр. Артыг чохлары һәгигәтән дә јолларыны дүзәлтмишләр. Әксәр һалларда онлар буну арвадларынын һәлим хасијјәтләри, дәрин һөрмәт һиссләри вә тәмиз давранышлары сајәсиндә етмишләр (1 Петер 3:1, 2, 4).

16. Евдә һөкм сүрән шәраитдән асылы олмајараг, мәсиһчи гадын һәр бир шејдән чох Јеһова Аллаһла олан мүнасибәтләрини гијмәтләндирдијини неҹә ҝөстәрә биләр?

¹⁶ Евдә һансы чәтинликләрлә гаршылашсан да, јадда сахла ки, Јеһова һәр заман сәни мүдафиә етмәјә һазырдыр (1 Петер 3:12). Буна ҝөрә дә руһани вәзијјәтини мөһкәмләтмәјә чалыш. Мүдриклик вә сакит үрәк барәсиндә дуа ет. Мүгәддәс Китабы мүнтәзәм өјрәнмәк, дуа етмәк, дәриндән дүшүнмәк вә һәмиманлыларла үнсијјәтдә олмаг васитәсилә Јеһоваја јахынлаш. Абигаилин әринин руһани шәхсијјәт олмамасы, онун Аллаһа олан мәһәббәтинә вә Онун мәсһ едилмишинә мүнасибәтинә тә’сир ҝөстәрмәди. О, доғру принсипләри рәһбәр тутурду. Һәтта әр Аллаһын нүмунәви хидмәтчиси олан аиләләрдә белә, мәсиһчи гадын баша дүшүр ки, өз руһани вәзијјәтини мөһкәмләтмәк вә лазыми сәвијјәдә сахламаг үчүн о өзү вар гүввәси илә чалышмалыдыр. Доғрудур, Мүгәддәс Китаба әсасән ону руһани вә мадди ҹәһәтдән тә’мин етмәк мәс’улијјәтини әри дашыјыр, лакин нәтиҹәдә гадын өзү ‘өз хиласыны баша чатдырмаг үчүн горху вә ләрзә илә һәрәкәт етмәлидир’ (Филипилиләрә 2:12; 1 Тимотејә 5:8).

О, “пејғәмбәр мүкафатыны” алды

17, 18. а) Тсарефатдан олан дул гадынын иманы һансы тәрздә гејри-ади дәрәҹәдә сынанды? б) Дул гадын Илјасын хаһишинә неҹә һај верди вә Јеһова буна ҝөрә ону неҹә мүкафатландырды?

¹⁷ Илјас пејғәмбәрин ҝүнләриндә Јеһованын дул гадынын гејдинә галмасындан ҝөрүрүк ки, О, һәгиги ибадәти өз гүввәләри вә вәсаитләри һесабына дәстәкләјәнләрә дәрин миннәтдарлыг һисси дујур. Илјасын ҝүнләриндә узун мүддәт давам едән гураглыг уҹбатындан бир чохлары, о ҹүмләдән Тсарефат шәһәриндә јашајан дул гадын вә балаҹа оғлу аҹлыгдан өлүм тәһлүкәси илә үзләшдиләр. Јалныз бирҹә дәфәлик јемәкләри галанда онлара бир гонаг ҝәлир. Бу Илјас пејғәмбәр иди. О, олдугҹа гејри-ади бир хаһишлә мүраҹиәт едир. Илјас гадынын аҹынаҹаглы вәзијјәтиндән хәбәрдар олса да, ондан ахырынҹы ундан вә јағдан онун үчүн “балаҹа бир көкә” биширмәји хаһиш едир. Лакин пејғәмбәр әлавә едир: “Чүнки Исраилин Аллаһы Јеһова белә дејир: Рәбб торпаг үзәринә јағмур верәҹәји ҝүнә гәдәр күпдә ун түкәнмәјәҹәк вә тулугда јағ әскилмәјәҹәк” (1 Краллар 17:8-14).

¹⁸ Бу ҹүр гејри-ади тәклифә сиз неҹә һај верәрдиниз? Тсарефатдан олан дул гадын, еһтимал ки, Илјасы Јеһованын пејғәмбәри кими гәбул едиб, ‘Илјанын [Илјасын] сөзүнә ҝө­рә ет­ди’. Гонагпәрвәрлијинә ҝөрә Јеһова ону неҹә мүкафатландырды? Гураглығын давам етдији мүддәтдә Јеһова онун өзүнү, оғлуну вә Илјасы мө’ҹүзәли сурәтдә гида илә тә’мин едирди (1 Краллар 17:15, 16). Исраилли олмаса да, Јеһова Тсарефатдан олан дул гадына “пејғәмбәр мүкафатыны” верди (Матта 10:41). Аллаһын Оғлу да бу гадыны өз доғма шәһәри Назаретин вәфасыз сакинләринә нүмунә ҝәтирәрәк, она еһтирам ҝөстәрди (Лука 4:24-26).

19. Бу ҝүн бир чох мәсиһчи гадынлар Тсарефатдан олан дул гадынын әкс етдирдији руһу неҹә әкс етдирир вә Јеһова онлара неҹә мүнасибәт бәсләјир?

¹⁹ Бу ҝүн бир чох мәсиһчи гадынлар да Тсарефатдан олан дул гадынын әкс етдирдији руһу әкс етдирирләр. Мәсәлән, әксәријјәти касыб вә аиләләринин гајғысына галмалы олан мәсиһчи баҹылар һәр һәфтә тәмәннасыз олараг сәјјар нәзарәтчиләрә вә онларын арвадларына гонагпәрвәрлик ҝөстәрирләр. Диҝәрләри, јерли таммүддәтли хидмәтчиләри наһар јемәјинә дә’вәт едир, еһтијаҹы оланлара көмәк едир вә ја гүввәләрини вә вәсаитләрини сәрф едәрәк, Падшаһлыг ишини һансыса башга үсулла дәстәкләјирләр (Лука 21:4). Јеһова бу ҹүр гурбанлары нәзәрә алырмы? Мүтләг! “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун” (Ибраниләрә 6:10).

20. Нөвбәти мәгаләдә нәји нәзәрдән кечирәҹәјик?

²⁰ Аллаһ горхусуна малик олан бә’зи мәсиһчи гадынлар I әсрдә Исаја вә онун һәвариләринә хидмәт етмәк шәрәфинә малик олмушлар. Нөвбәти мәгаләдә, бу гадынларын Јеһованын үрәјини неҹә севиндирдикләрини мүзакирә едәҹәк вә һәтта чәтин анларда Јеһоваја бүтүн үрәкләри илә хидмәт едән мүасир гадынларын нүмунәләрини нәзәрдән кечирәҹәјик.

[Һашијә]

Тәкрар

• Шифра вә Пуа Јеһованын үрәјини неҹә севиндирмишләр?

• Раһаб Јеһованын үрәјини неҹә севиндирмишдир?

• Абигаил Јеһованын үрәјини неҹә севиндирмишдир?

• Тсарефатдан олан дул гадын Јеһованын үрәјини неҹә севиндирмишдир?

• Бу гадынларын нүмунәләри үзәриндә дәриндән дүшүнмәк һәр биримизә неҹә көмәк едир? Изаһ един.

[19-ҹу сәһифәдәки шәкилләр]

Бир чох садиг гадынлар “һөкмдарын фәрманына” бахмајараг, Аллаһа хидмәт едирләр.

[20-ҹи сәһифәдәки шәкил]

Нәјә ҝөрә Раһаб, имана малик олан адамын ҝөзәл нүмунәсидир?

[20-ҹи сәһифәдәки шәкил]

Сән Абигаилин һансы кејфијјәтләрини тәглид етмәк истәјирсән?

[22-ҹи сәһифәдәки шәкил]

Бу ҝүн бир чох мәсиһчи гадынлар Тсарефатдан олан дул гадынын әкс етдирдији руһу әкс етдирирләр.