Падшаһлыг һаггындакы хәбәри гәбул етмәкдә инсанлара көмәк ет
“Агриппа Павелә деди: “Бир аз сонра мәни, Мәсиһчи олмаға инандыраҹагсан” (ҺӘВАРИЛӘРИН ИШЛӘРИ 26:28, И–93).
1, 2. Һәвари Павелин вали Фестусун вә һөкмдар Һирод II Агриппанын һүзурунда дурмасына сәбәб нә олмушду?
ЕРАМЫЗЫН 58-ҹи илиндә һөкмдар Һирод ЫЫ Агриппа баҹысы Берники илә бирликдә Гејсәријәдә Рома валиси Поркиус Фестуса баш чәкди. Онлар вали Фестусун дә’вәтини гәбул едәрәк, “бөјүк тәмтәрагла ҝәлиб, минбашылар вә шәһәрин адлы-санлы адамлары илә бәрабәр диванханаја ҝирдиләр”. Сонра Фестусун әмри илә Мәсиһин давамчысы олан һәвари Павел онларын һүзуруна ҝәтирилди. Иса Мәсиһин давамчысы олан бу шәхсин вали Фестусун һөкм күрсүсү өнүндә дурмасына сәбәб нә олмушду? (Һәвариләрин ишләри 25:13-23).
2 Бу суалын ҹавабыны, гонагларына мүраҹиәт едән Фестусун сөзләриндән өјрәнирик. О деди: “Һөкмдар Агриппа вә бизимлә бурада олан бүтүн кишиләр! Сиз бу адамы ҝөрүрсүнүз. Јерусәлимдә вә бурада ҹәми јәһудиләр мәнә мүраҹиәт едиб гышгырдылар ки, бу адам артыг јашамалы дејил; лакин мән, онун өлүмә лајиг бир ҹинајәт ишләтдијини мүәјјән етмәдим; өзү августусун мәһкәмәсини тәләб етдијинә ҝөрә, ону ҝөндәрмәк гәрарына ҝәлдим. Ағама онун һаггында јазаҹаг гәти бир сөзүм јохдур; буна ҝөрә ону сизин гаршыныза вә хүсусән һөкмдар Агриппа, сәнин гаршына чыхартдым ки, бу иш арашдырылдыгдан сонра, јазмаға бир сөзүм олсун. Чүнки бир мәһбус ҝөндәрмәк вә она гаршы олан иттиһамлары билдирмәмәк мәнә мәнтигсиз ҝөрүндү” (Һәвариләрин ишләри 25:24-27).
3. Дин рәһбәрләри Павели нәјә ҝөрә иттиһам едирдиләр?
3 Фестусун сөзләриндән ајдын олур ки, Павели гијама чағырышда — өлүм ҹәзасына лајиг ҝөрүлән ҹинајәтдә иттиһам едирләр (Һәвариләрин ишләри 25:11). Лакин Павелин тәгсири јох иди. Јерусәлимдәки дин рәһбәрләри ону пахыллыгдан ҝүнаһландырырдылар. Онлар һәвари Павелин Падшаһлыг һаггындакы тәблиғ фәалијјәтинә мүгавимәт ҝөстәрир, һәм дә онун башгаларына Иса Мәсиһин давамчылары олмагда көмәк етдији үчүн һәддиндән артыг һиддәтләнирдиләр. Ҝүҹлү мүһафизә дәстәсинин нәзарәти алтында Павели Јерусәлимдән лиман шәһәри олан Гејсәријәјә ҝәтирдиләр. Павел орада гејсәрин мәһкәмәсини тәләб етди. Орадан исә Ромаја ҝетмәли иди.
4. Һөкмдар Агриппа ҝөзләнилмәдән һансы факты е’тираф едир?
4 Павели һөкмдарын сарајында тәсәввүр едәк. Иштирак едәнләрин арасында Рома империјасынын әсас һиссәсини идарә едән һөкмдар да вар. Һөкмдар Агриппа Павелә тәрәф дөнүр вә дејир: “Сәнә изин верилир ки, өзүн үчүн данышасан”. Павел данышаркән гејри-ади бир шеј баш верир. Павелин сөјләдикләри һөкмдара тә’сир ҝөстәрмәјә башлајыр. Һөкмдар Агриппанын өзү е’тираф едир: “Бир аз сонра мәни, Мәсиһчи олмаға инандыраҹагсан” (Һәвариләрин ишләри 26:1-28, И–93).
5. Павелин Агриппаја дедији сөзләр нәјә ҝөрә бу гәдәр тә’сирли иди?
5 Ишә бир бах! Павелин өзүнү мәһарәтлә мүдафиә етмәси сајәсиндә һөкмдар Аллаһын Кәламынын ҝүҹлү тә’сири алтына дүшүр (Ибраниләрә 4:12). Павелин мүдафиә сөзләри нәјә ҝөрә бу ҹүр тә’сирли иди? Бундан әлавә, Павелин нитгиндән шаҝирдләр һазырламаг ишимиз үчүн фајдалы олан нәләр өјрәнә биләрик? Әҝәр Павелин мүдафиә сөзләрини арашдырсаг, ики әсас мәсәләни ајыра биләрик: 1) Павел инандырыҹы тәрздә данышырды. 2) О, аләтләриндән усталыгла истифадә едән уста кими, Аллаһын Кәламында олан билији баҹарыгла истифадә едирди.
Инандырмаг габилијјәтини тәкмилләшдир
6, 7. а) Мүгәддәс Китабда “инандырмаг” сөзү алтында нә баша дүшүлүр? б) Инсанлара Мүгәддәс Китабын һансыса тә’лимини гәбул етмәјә көмәк едәркән нәјә ҝөрә инандырыҹы тәрздә данышмаг лазымдыр?
6 “Һәвариләрин ишләри” китабында Павелин тәблиғ етмәк тәрзи һаггында данышыларкән, инандырмаг кими тәрҹүмә олунан јунан сөзү тәкрар-тәкрар истифадә олунур. Бу мә’наны дашыјан сөз бизим шаҝирд һазырламаг ишимизлә неҹә әлагәлидир?
7 Вајнын “Әһди Ҹәдидин сөзләринә даир изаһлы лүғәт”инә әсасән, “инандырмаг” сөзү Јунанҹа Мүгәддәс Јазыларын орижиналында, мәнтиги вә ја әхлаги дәлилләр ҝәтирмәклә, кимисә өз тәрәфинә чәкмәк вә ја онун фикрини дәјишмәк мә’насыны дашыјыр” (“Expository Dictionary of New Testament Words”). Мараглыдыр ки, бу сөз мә’наҹа е’тибар етмәклә сых бағлыдыр. Буна ҝөрә дә сән кими исә Мүгәддәс Китабын һәр һансы тә’лимини гәбул етмәјә инандыранда онун е’тибарыны газанырсан, белә ки, о, бу тә’лимин һәгигилијинә инанмаға башлајыр. Ајдындыр ки, инсанын Мүгәддәс Китабда дејиләнләрә инанмасы вә буна мүвафиг олараг давранмасы үчүн орада јазыланлар барәдә садәҹә сөјләмәк кифајәт дејил. Динләјиҹинин кимлијиндән — ушаг, гоншу, иш јолдашы, мәктәб јолдашы вә ја гоһум олмасындан асылы олмајараг, о, сәнин сөјләдикләринин доғру олдуғуна инанмалыдыр (2 Тимотејә 3:14, 15).
8. Инсанын Мүгәддәс Китабдакы һансыса һәгигәтә инанмасы үчүн нә етмәк олар?
8 Инсаны Аллаһын Кәламындан ҝөстәрдијин фикирләрин һәгигәт олдуғуна неҹә инандырмаг олар? Павел сөһбәт етдији инсанларын фикирләрини вә нөгтеји-нәзәрләрини мәнтиги дәлилләр, тутарлы әсаслар ҝәтирмәклә вә ҹидди чағырышларла дәјишмәјә чалышырды. Беләликлә, һансыса тә’лимин садәҹә олараг һәгигәт олдуғуну сөјләмәк әвәзинә, сөјләдијин фикирләри тәсдиг едән әсаслы дәлилләр ҝәтирмәк лазымдыр. Буну неҹә етмәк олар? Сөјләдијин сөзләрин сәнин шәхси фикирләринә дејил, бүтүнлүклә Аллаһын Кәламына әсасландығына әмин ол. Һәмчинин, Мүгәддәс Јазылара әсасланан сәмими сөзләринин доғрулуғуну тәсдиг едән әлавә дәлилләрдән истифадә ет (Сүлејманын мәсәлләри 16:23). Әҝәр бүтүн итаәткар инсанларын јер үзүндә олаҹаг Ҹәннәтдә јашајаҹагларыны сөјләјирсәнсә, илк нөвбәдә Мүгәддәс Китабын Лука 23:43 вә ја Ишаја 65:21-25 ајәләринә әсаслан. Бәс Мүгәддәс Китабдан олан бу фикирләри тәсдиг етмәк үчүн һансы әлавә дәлилләри ҝәтирмәк олар? Сән динләјиҹинә мә’лум олан нүмунәләрдән истифадә едә биләрсән. Она хатырлада биләрсән ки, биз гүруб чағынын ҝөзәллијини сејр етмәклә, чичәкләрин хош әтрини ијләмәклә, мејвәләрин дадындан һәзз алмагла вә ја балаларыны јемләјән гушлары мүшаһидә етмәклә пулсуз-парасыз ләззәт ала билирик. Бүтүн бунларын, Јараданымызын јер үзүндәки һәјатдан севинҹ әлдә етмәјимизи истәмәсинин сүбуту олдуғуну анламагда динләјиҹинә көмәк ет (Ваиз 3:11, 12).
9. Тәблиғ ишиндә неҹә дәрракәли ола биләрик?
9 Инсаны Мүгәддәс Китабын һансыса тә’лиминин доғрулуғуна инандырмаға чалышанда, диггәт јетир ки, сәнин шөвгүн еһкамчылыға бәнзәмәсин, бу, сәнин динләјиҹини јалныз узаглашдыра биләр. “Хидмәт Мәктәби” китабында (рус.) белә бир хәбәрдарлыг верилир: “Кимин үчүнсә чох дәјәрли олан е’тигадын јалан олдуғуну сәрт шәкилдә билдирмәклә јахшы нәтиҹәләр әлдә етмәк чох чәтин олаҹаг, һәтта бу заман сөзләринин доғрулуғуну сүбут етмәк үчүн Мүгәддәс Јазылардан бир сыра ајәләр ҝәтирсән дә. Мәсәлән, әҝәр бу вә ја диҝәр бајрамын садәҹә олараг бүтпәрәст мәншәјә малик олдуғу үчүн мүһакимә олундуғуну сөјләсәк, бу, чәтин ки, кими исә нөгтеји-нәзәрләрини дәјишмәјә тәшвиг етсин. Бу мәсәләјә дәрракә илә јанашмагла даһа чох мүвәффәгијјәтә наил олмаг олар”. Буну етмәк нәјә ҝөрә сә’ј тәләб едир? Ады јухарыда чәкилән дәрсликдә дејилир: “Сөһбәтә дәрракәли сурәтдә башламагла биз инсаны диалога ҹәлб едир, она сонрадан дүшүнмәк үчүн зәмин јарадыр вә нөвбәти сөһбәтләр үчүн јол ачырыг. Бу исә инандырыҹы тәрздә данышмаға имкан јарадыр” (Колослулара 4:6).
Үрәјә јол тапмагла инандырмаг
10. Павел Агриппа гаршысында өз мүдафиәсинә неҹә башлады?
10 Ҝәлин “Һәвариләрин ишләри” китабынын 26-ҹы фәслиндә јазылмыш Павелин мүдафиә сөзләрини әтрафлы нәзәрдән кечирәк. Онун нитгә неҹә башладығына диггәт јетирәк. Мөвзуја башлајаркән, һөкмдар Агриппанын өз баҹысы Берники илә рүсвајчы әлагәдә олмасына бахмајараг, ону тә’рифләмәк үчүн гануни әсас тапды. Павел деди: “Һөкмдар Агриппа! Јәһудиләр тәрәфиндән иттиһам едилдијим бүтүн шејләр үзрә бу ҝүн сәнин гаршында мүдафиә олунмағым үчүн өзүмү хошбәхт сајырам. Әләлхүсус, сән јәһуди адәтләринин вә онларын мүбаһисәли фикирләринин һамысыны билирсән. Буна ҝөрә, мәни сәбирлә динләмәјини риҹа едирәм” (Һәвариләрин ишләри 26:2, 3).
11. Павелин сөзләри Агриппаја һөрмәт етдијини неҹә ҝөстәрир вә бу сөзләр һансы ҝөзәл нәтиҹәни верди?
11 Павелин Агриппаја “һөкмдар” титулу илә мүраҹиәт едәрәк, онун јүксәк мөвгејини е’тираф етдијинә диггәт јетирдинми? Бу һөрмәт әламәти иди. Бундан әлавә, сөзләри мүдрикликлә сечмәклә, Павел Агриппаја еһтирамыны билдирди (1 Петер 2:17). Һәвари, Агриппаны Јәһуди вәтәндашларынын гарышыг адәт вә ганунларынын билиҹиси кими таныдығыны билдирди вә бу ҹүр мә’луматлы һөкмдарын гаршысында мүдафиә олундуғу үчүн өзүнү хошбәхт сајдығыны сөјләди. Мәсиһин давамчысы олмасына бахмајараг, Павел, санки мәсиһчи олмајан Агриппадан үстүнмүш кими давранмады (Филипилиләрә 2:3). Әксинә, һөкмдардан ону сәбирлә динләмәсини хаһиш етди. Беләликлә Павел елә мүһит јаратды ки, Агриппа, үстәлик диҝәр динләјиҹиләр дә онун дедијини динләмәјә даһа мејлли олдулар. О, әввәлҹә үмуми тәмәл тапды, сонра исә өз дәлилләрини бу тәмәлин үзәриндә гурду.
12. Тәблиғ ишиндә динләјиҹиләримизин үрәјинә неҹә јол тапа биләрик?
12 Ҝәлин, Павелин Агриппанын гаршысында етдији кими, биз дә чалышаг ки, Падшаһлыг һаггындакы хәбәри тәгдим етмәјимиз әввәлдән ахыра кими динләјиҹиләрин үрәјинә јол тапсын. Биз буну, тәблиғ етдијимиз адама дәрин һөрмәт ҝөстәрмәклә вә онун өзү, һәмчинин дүшүнҹә тәрзи илә сәмими гәлбдән марагланмагла едә биләрик (1 Коринфлиләрә 9:20-23).
Аллаһын Кәламыны мәһарәтлә истифадә ет
13. Павелә бәнзәр тәрздә сиз динләјиҹиләринизи һәрәкәтә неҹә тәшвиг едә биләрсиниз?
13 Павел динләјиҹиләрини хош хәбәрә әсасән давранмаға тәшвиг етмәк истәјирди (1 Салониклиләрә 1:5-7). Бунун үчүн о, динләјиҹиләринин мәҹази үрәкләринә, һәрәкәтвериҹи гүввәнин мәркәзинә јол тапмаг истәјирди. Павелин Агриппа гаршысындакы мүдафиәсинә гајыдараг, Павелин Мусанын вә пејғәмбәрләрин сөзләринә әсасланараг Аллаһын сөзүнү неҹә ‘доғрулугла өјрәтдијинә’ диггәт јетирәк (2 Тимотејә 2:15).
14. Павелин, Агриппанын гаршысында оларкән, инандырмаг мәһарәтиндән неҹә истифадә етдији барәдә данышын.
14 Павел билирди ки, Агриппанын рәсми дини иудаизмдир. Агриппанын иудаизмә даир биликләрини нәзәрә алараг, Павел билдирди ки, о, Мәсиһин өлүмүнә вә дирилдилмәсинә даир ‘пејғәмбәрләрин вә Мусанын баш верәҹәјини әввәлҹәдән сөјләдикләриндән башга бир шеј демир’ (Һәвариләрин ишләри 26:22, 23). Бирбаша Агриппаја мүраҹиәт едәрәк Павел сорушду: “Һөкмдар Агриппа! Пејғәмбәрләрә иман едирсәнми?” Агриппа чәтин вәзијјәт гаршысында галды. Әҝәр о, пејғәмбәрләри гәбул етмәдијини сөјләрсә, иудаизмә иман ҝәтирән инсан кими шөһрәтини итирәҹәк. Амма әҝәр Павелин ҝәтирдији дәлилләрлә разылашса, һәвари илә разылашдығыны ачыг шәкилдә бүрузә верәр вә ону мәсиһчи адландыра биләрдиләр. Павел өз суалына мүдрикликлә ҹаваб верәрәк дејир: “Билирәм ки, иман едирсән”. Агриппанын үрәји ону нә сөјләмәјә тәшвиг етди? “Бир аз сонра мәни, Мәсиһчи олмаға инандыраҹагсан” (Һәвариләрин ишләри 26:27, 28, И–93). Агриппа мәсиһчи олмаса да, еһтимал ки, Павел өз сөзләри илә онун үрәјинә мүәјјән дәрәҹәдә јол тапды (Ибраниләрә 4:12).
15. Салоникдә јығынҹаг јаратмагда Павелә нә көмәк етди?
15 Диггәт јетирдинми ки, Павел хош хәбәри чатдыраркән јалныз сүбут етмирди, һәм дә инандырмаға чалышырды? Аллаһын Кәламыны бу ҹүр доғрулугла өјрәтмәјинин сајәсиндә, ону динләјәнләрдән бә’зиләри иман ҝәтирмәјә башладылар. Павелин синагогда јәһудиләрә вә Аллаһдан горхан гејри-јәһудиләрә тәблиғ етдији Салоник шәһәриндә дә бу ҹүр олмушду. Һәвариләрин ишләри 17:2-4 ајәләриндә дејилир: ‘Павел адәти үзрә јәһудиләрин јанына ҝетди вә үч шәнбә онларла Мүгәддәс Јазылар һаггында данышырды. Мәсиһин әзаб чәкиб, өлүләрдән дирилмәсинин лазым олдуғуну изаһ вә сүбут етди. Онлардан бә’зиләри иман ҝәтирдиләр’. Павел инандырыҹы сурәтдә тәблиғ едирди. О, Исанын әзәлдән вә’д едилмиш Мәсиһ олдуғуна даир Мүгәддәс Јазыларын әсасында мүлаһизә јүрүдүр, изаһ вә сүбут едирди. Бу нә илә нәтиҹәләнди? Орада јығынҹаг тәшкил олунду.
16. Падшаһлығы бәјан етмәкдән даһа чох севинҹи неҹә дујмаг олар?
16 Бәс сән Аллаһын Кәламыны даһа инандырыҹы сурәтдә изаһ етмәји өјрәнә биләрсәнми? Белә оларса, сән тәблиғ ишиндән вә инсанлара Аллаһын Падшаһлығы һаггындакы һәгигәтләри өјрәтмәкдән бөјүк мәмнунлуг вә севинҹ һисси дујаҹагсан. Бу, тәблиғ хидмәтиндә Мүгәддәс Китабдан даһа чох истифадә етмәк мәсләһәтини гәбул едән хош хәбәрин тәблиғчиләринин нүмунәләриндән ҝөрүнүр.
17. Хидмәтдә Мүгәддәс Китабдан истифадә етмәјин нә гәдәр фајдалы олдуғуну ҝөстәрмәк үчүн ја башыныза ҝәлән һадисәни данышын, ја да ки, бу абзасда ҝәтирилән һадисәни гыса олараг өз сөзләринизлә сөјләјин.
17 Мәсәлән, Јеһованын Шаһидләринин сәјјаһ нәзарәтчиси јазмышды: “Артыг кифајәт гәдәр чох баҹы-гардашлар гапыдан-гапыја шаһидлик едәрәк, Мүгәддәс Китабы әлләриндә тутурлар. Бу, гаршылашдыглары адамлардан чохларына Мүгәддәс Китаб ајәләри охумагда тәблиғчиләрә көмәк едир. Бунун сајәсиндә, бизим хидмәтимиз һәм ев саһибләринин, һәм дә тәблиғчиләрин фикриндә журнал вә китабларла дејил, Мүгәддәс Китабла әлагәләнир”. Сөзсүз ки, тәблиғ заманы Мүгәддәс Китабы әлдә тутуб-тутмамаг гәрарыны гәбул едәркән, мүхтәлиф амилләри, о ҹүмләдән јерли адәтләри нәзәрә алмаг лазымдыр. Бунунла белә, биз, башгаларыны Падшаһлыг һаггындакы хәбәри гәбул етмәјә инандырмаг үчүн Аллаһын Кәламыны мәһарәтлә истифадә едән инсанлар кими танынмаға чалышмалыјыг.
Хидмәтә Аллаһын нөгтеји-нәзәри илә бах
18, 19. а) Аллаһ бизим хидмәтимизә неҹә бахыр вә нәјә ҝөрә биз Онун нөгтеји-нәзәринә шәрик олмаға чалышмалыјыг? б) Тәкрар башчәкмәләри мүвәффәгијјәтли етмәкдә бизә нә көмәк едәр? (Ашағыда ҝәтирилән “Тәкрар башчәкмәләр заманы наилијјәт газанмағын үсуллары” адлы чәрчивәјә бахын.)
18 Динләјиҹиләримизин үрәјинә јол тапмағын башга бир үсулу исә, хидмәтә Аллаһын нөгтеји-нәзәри илә бахмаг вә сәбир етмәкдир. Аллаһ истәјир ки, һәр милләтдән олан “инсанлар хилас олуб, һәгигәти дәрк етсинләр” (1 Тимотејә 2:3, 4). Мәҝәр биз дә буну арзу етмирикми? Јеһова һәм дә сәбир едир, бунун сајәсиндә исә чох инсанларын гаршысында төвбә етмәк имканы јараныр (2 Петер 3:9). Демәли, Падшаһлыг һаггындакы хәбәри динләмәјә һазыр олан кәси тапанда, еһтимал ки, онун марағыны артырмаг үчүн тәкрар-тәкрар гајытмаг тәләб олунаҹаг. Һәгигәт тохумларынын бој атмасыны ҝөрмәк үчүн вахт вә сәбир лазымдыр (1 Коринфлиләрә 3:6). “Тәкрар башчәкмәләр заманы наилијјәт газанмағын үсуллары” адлы чәрчивәдә, марағы артырмаға даир тәклифләр верилир. Јадда сахламаг лазымдыр ки, инсанларын һәјаты — онларын проблемләри вә вәзијјәтләри даима дәјишир. Бә’зән онлары евдә тапмаг үчүн чох сә’ј тәләб олуна биләр, лакин сә’ј ҝөстәрмәјә дәјәр. Биз онлара, Аллаһын хилас һаггындакы хәбәрини ешитмәк имканыны тәгдим етмәк истәјирик. Буна ҝөрә дә, Јеһова Аллаһа мүдриклик барәдә дуа ет ки, инандырмаг мәһарәтини инкишаф етдирә вә Падшаһлыг һаггындакы хәбәри гәбул етмәкдә инсанлара көмәк едә биләсән.
19 Падшаһлыг һаггында даһа чох билмәк истәјән инсанла гаршылашанда, мәсиһчи ишчиләри кими биз даһа нә едә биләрик? Ҹавабы нөвбәти мәгаләдән ала биләрик.
Хатырлајырсынызмы?
• Павелин Агриппа гаршысындакы мүдафиәси нәјин сајәсиндә тә’сирли иди?
• Ҝәтирдијимиз хәбәр инсанын үрәјинә јол тапсын дејә нә етмәлијик?
• Аллаһын Кәламыны кејфијјәтли тәрздә тәтбиг етмәкдә вә инсанларын үрәјинә јол тапмагда бизә нә көмәк едәр?
• Хидмәтә Аллаһын нөгтеји-нәзәри илә неҹә баха биләрик?
[16-ҹы сәһифәдәки чәрчивә/шәкилләр]
Тәкрар башчәкмәләр заманы наилијјәт газанмағын үсуллары
• Инсанлара сәмими мараг ҝөстәр.
• Мүзакирә етмәк үчүн Мүгәддәс Китабдан мараглы мөвзу сеч.
• Һәр нөвбәти ҝәлиш үчүн тәмәл гој.
• Баш чәкдикдән сонра һәмин кәс һаггында дүшүнмәјә давам ет.
• Марағы артырмаг үчүн баҹардыгҹа тез, мәсәлән, бир вә ја ики ҝүндән сонра һәмин инсанын јанына гајыт.
• Јадда сахла ки, сәнин мәгсәдин Мүгәддәс Китаб өјрәнмәси башламагдыр.
• Дуа ет ки, Јеһова инсанын марағыны артырсын.
[15-ҹи сәһифәдәки шәкил]
Вали Фестусун вә һөкмдар Агриппанын гаршысында чыхыш едәркән, Павел инандырыҹы тәрздә данышырды.