Ојаг дурмаг зәрурәти даһа да артыр

“Ојаг дурун; чүнки Рәббинизин һансы ҝүн ҝәләҹәјини билмәзсиниз” (МАТТА 24:42).

1, 2. Һазыркы системин сона чатдығы дөврдә јашадығымыз нәдән ҝөрүнүр?

“ИЈИРМИНҸИ әсрин хариҹи ҝөрүнүшүнә мүһарибәләр гәдәр тә’сир едән һеч бир шеј олмамышдыр”. Бу сөзләрин мүәллифи Билл Еммотт ејни заманда тарихин бүтүн дөврләриндә мүһарибә вә зоракылыгларын олдуғуну е’тираф едәрәк гејд едир: “Мүһарибәләр башга әсрләрдә дә баш вермишдир, лакин ХХ әсрдә олдуғу гәдәр вә бу ҹүр гәддар мүһарибәләр һеч заман олмамышдыр. Бу, бүтүн дүнјаны әһатә едән тоггушманы ҝөрән илк әсрдир... Өзү дә бирини дејил, икисини”.

² Иса Мәсиһ габагҹадан хәбәр вермишдир ки, ‘халгын халга, дөвләтин дөвләтә гаршы галхаҹағы’ мүһарибәләр олаҹагдыр. Лакин бу мүһарибәләр ‘[Мәсиһин] ҝәлишинә [“иштиракына”, ЈД] вә дөврүн сонуна әламәтин’ јалныз бир һиссәсидир. Бу бөјүк пејғәмбәрликдә Иса һәм дә гытлыглар, хәстәликләр вә зәлзәләләр барәсиндә хатырлатды (Матта 24:3, 7, 8; Лука 21:6, 7, 10, 11). Бу фәлакәтләр һәм мигјасына, һәм дә сәртлијинә ҝөрә ҝүҹләнир. Аллаһа вә јахынларына мүнасибәтләриндән ҝөрүндүјү кими, инсанлар писликләрлә долудур. Әхлаг нормаларынын ашағы дүшмәси, ҹинајәтин вә зоракылығын артмасы ҝөз гаршысындадыр. Инсанлар Аллаһдан чох пулу севир, һәм дә зөвг алмаг јанғысына тутулублар. Бүтүн бунлар ону ҝөстәрир ки, биз “чәтин анлар”да јашајырыг (2 Тимотејә 3:1-5).

3. “Дөврүн әламәтләри” бизә неҹә тә’сир етмәлидир?

³ Инсан ҹәмијјәтиндә вәзијјәтин даима писләшмәсинә сәнин мүнасибәтин неҹәдир? Бир чохлары мүасир ҝүнләрин дәһшәтли һадисәләринә е’тинасыз јанашырлар, бундан әлавә һәтта үрәкләри белә сәртләшиб. Бу дүнјанын нүфузлу вә зијалы адамлары “дөврүн әламәтләрини”н мә’насыны анламыр; бу мәсәләдә дин рәһбәрләри дә инсанлара дүзҝүн рәһбәрлик верә билмирләр (Матта 16:1-3). Амма Иса өз давамчыларына өјүд верирди: “Ојаг дурун; чүнки Рәббинизин һансы ҝүн ҝәләҹәјини билмәзсиниз” (Матта 24:42). Иса истәјир ки, биз гыса мүддәт үчүн дејил, даима ојаг дураг. Ојаг дурмаг үчүн биз ајыг вә еһтијатлы олмалыјыг. Сон ҝүнләрдә јашадығымызы вә ҝүнләрин чәтин олдуғуну садәҹә е’тираф етмәк кифајәт дејил. Биз мөһкәм әмин олмалыјыг ки, “һәр шејин ахыры јахындыр” (1 Петер 4:7). Ојаг дурмағын зәрурилијини јалныз о заман дәрк едә биләрик. Бу сәбәбдән белә бир суал үзәриндә дүшүнмәлијик: Сонун јахын олдуғуна даһа чох әмин олмагда бизә нә көмәк едәр?

4, 5. а) Һазыркы пис системин сонунун јахын олдуғуна бизи әмин едән нәдир вә нәјә ҝөрә? б) Нуһун ҝүнләри илә Инсан Оғлунун иштиракы арасындакы охшарлыглардан бири һансыдыр?

⁴ Инсан тарихиндә баш верән надир һадисәдән, Нуһун ҝүнләриндәки бөјүк Туфандан габаг јер үзүндә һөкм сүрән шәраитләрә диггәт јетирәк. Инсанлар о дәрәҹәдә корланмышдылар ки, Јеһова “үрәјиндә кәдәрләнди”. О билдирди: “Инсанлары јер үзүндән силәҹәјәм” (Јарадылыш 6:6, 7, МКШ). Јеһова елә дә етди. Нуһун ҝүнләри илә бизим ҝүнләр арасында олан охшарлығы ҝөстәрәрәк, Иса деди: “Нуһун ҝүнләри неҹә идисә, Инсан Оғлунун ҝәлиши дә [“иштиракы да”, ЈД] елә олаҹагдыр” (Матта 24:37).

⁵ Тамамилә мәнтигәујғундур ки, һазырда мөвҹуд олан дүнја Туфандан әввәл мөвҹуд олан дүнјанын Јеһовада јаратдығы һиссләри ојадыр. Аллаһ Нуһун ҝүнләриндә мөвҹуд олан аллаһсыз дүнјаны мәһв етдији үчүн, сөзсүз ки, буҝүнкү пис дүнјаны да мәһв едәҹәк. О ҝүнләрлә бизим ҝүнләр арасындакы охшарлыглары ајдын ҝөрмәјимиз, һазыркы дүнјанын сонунун јахын олдуғуна бизи даһа чох әмин едәҹәк. Белә исә, онда бу охшарлыглар нәдәдир? Онларын сајы ән азы бешдир. Биринҹиси, о заман олдуғу кими, бу ҝүн дә инсанлары гаршыдан ҝәлән фәлакәт барәсиндә сон дәрәҹә ајдын хәбәрдар едирләр.

“Һәлә заһир олмајан шејләр һаггында” хәбәрдар едилди

6. Ҝөрүндүјү кими, Јеһова Нуһун ҝүнләриндә габагҹадан нә барәдә хәбәрдарлыг етмишдир?

⁶ Нуһун ҝүнләриндә Јеһова бәјан етди: “Руһум адам илә әбәдијјән чәкишмәјәҹәкдир, чүнки о да әтдир; бунун үчүн онун ҝүнләри јүз ијирми ил олаҹагдыр” (Тәквин 6:3). Б. е. ә. 2490-ҹы илдә Аллаһ тәрәфиндән верилән бу һөкм һәмин аллаһсыз дүнјанын сон ҝүнләринин башланғыҹыны ҝөстәрди. Һәмин дөврдә јашајан инсанлар үчүн бунун нә мә’на кәсб етдијини дүшүн! Ҹәми 120 илдән сонра, Јеһова јәгин бир гәдәр сонрадан Нуһа дедији кими, ‘јер үзүнү суја гәрг етмәк вә ҝөјләр алтында һәјат нәфәси олан бүтүн ҹанлылары мәһв етмәк’ истәјирди (Јарадылыш 6:17, МКШ).

7. а) Туфан барәсиндәки хәбәрдарлыға әсасән Нуһ неҹә давранды? б) Бу системин сону һаггындакы хәбәрдарлыглара әсасән биз неҹә давранмалыјыг?

⁷ Нуһ гаршыдан ҝәлән фәлакәт барәсиндә бир нечә онилликләр габаг хәбәрдарлыг алды, һәмин фәлакәтдән сағ чыхмаг үчүн исә ихтијарында олан вахтдан мүдрикликлә истифадә етди. Һәвари Павел дејир: “Һәлә заһир олмајан шејләр һаггында [Нуһ] Аллаһ тәрәфиндән хәбәрдар едилиб, өз аиләсини хилас етмәк үчүн ихласкарлыгла ҝәми һазырлады” (Ибраниләрә 11:7). Бәс биз? Јашадығымыз системин ахыр ҝүнләринин башландығы вахтдан, 1914-ҹү илдән, тәхминән 90 ил кечир. ‘Сонун вахтында’ јашадығымыза, әлбәттә ки, шүбһә етмирик (Даниел 12:4). Алдығымыз хәбәрдарлыглара әсасән неҹә давранмалыјыг? Мүгәддәс Китабда дејилир: “Аллаһын ирадәсини јеринә јетирән әбәди јашајыр” (1 Јәһја 2:17). Буна ҝөрә дә, вахтын ҝөзләмәдијини нәзәрдән гачырмадан Јеһованын ирадәсини артыг индидән јеринә јетирмәк лазымдыр.

8, 9. Бизим ҝүнләрдә һансы хәбәрдарлыглар ешидилир вә бу хәбәрдарлыглар неҹә бәјан едилир?

⁸ Бизим ҝүнләрдә Мүгәддәс Китабын сәмими гәлбли тәдгигатчылары илһамланмыш Јазылары өјрәнәрәк дәрк етмишләр ки, бу систем һәлака мәһкум едилиб. Буна биз дә инанырыгмы? Иса Мәсиһин ајдын сөзләринә диггәт јетирәк: “О заман елә бөјүк мәшәггәт олаҹагдыр ки, беләси дүнјанын башланғыҹындан индијәдәк олмамышдыр вә һеч олмајаҹагдыр” (Матта 24:21). Иса һәм дә сөјләди ки, о, Аллаһ тәрәфиндән тә’јин едилмиш Һаким тимсалында ҝәләҹәк вә чобан гојунлары кечиләрдән ајырдығы кими, инсанлары бир-бириндән ајыраҹаг. Лајиг олмајанлар “әбәди әзаба, салеһләр исә әбәди һәјата дүчар олаҹаглар” (Матта 25:31-33, 46).

⁹ Јеһова Өз халгынын диггәтини бу хәбәрдарлыглара һәмишә “садиг вә ағыллы гул”ун вердији руһани гиданын тәркибиндәки вахтында олан хатырлатмаларын васитәсилә јөнәлдиб (Матта 24:45-47). Бундан әлавә, бүтүн милләтләр, гәбиләләр, дилләр вә халглар тәшвиг олунурлар: “Аллаһдан горхун! Она иззәт верин! Чүнки Онун һөкмүнүн вахты ҝәлди” (Вәһј 14:6, 7). Јеһованын Шаһидләринин бүтүн дүнјада тәблиғ етдикләри Падшаһлыг һаггындакы хәбәрин тәркиб һиссәси, Аллаһын Падшаһлығынын тезликлә инсан һөкумәтләринә сон гојаҹағына даир хәбәрдарлыгдыр (Даниел 2:44). Бу хәбәрдарлыға е’тинасыз јанашмаг олмаз. Күлл-Ихтијар Аллаһ Өз вә’дләрини һәмишә јеринә јетирир (Ишаја 55:10, 11). О, Нуһун ҝүнләриндә Өз вә’дини јеринә јетирди, буну бу ҝүн дә едәҹәкдир (2 Петер 3:3-7).

Әхлагсызлығын сон дәрәҹәдә артмасы

10. Нуһун ҝүнләриндә әхлагсызлығын јајылмасы барәдә нә демәк олар?

¹⁰ Бизим ҝүнләримиз Нуһун ҝүнләринә даһа бир ҹәһәтдән охшардыр. Лап әввәлдән Јеһова илк кишијә вә гадына, өзләринә бәнзәр адамларла ‘јер үзүнү долдурмаг’ тапшырығы вермишдир ки, бу да Аллаһын онлара вердији ҹинси әлагә сајәсиндә мүмкүн иди. Онлар әр-арвад кими бу имкандан лајигли тәрздә истифадә етмәли идиләр (Јарадылыш 1:28, МКШ). Нуһун ҝүнләриндә итаәтсиз мәләкләр инсанлара натәмиз, гејри-тәбии ҹинси әлагә үсулу өјрәтдиләр. Онлар јерә ендиләр, инсан ҹилдинә ҝирәрәк ҝөзәл гадынларла јашамаға башладылар вә дүнјаја јары адам, јары ҹин формасында нәһәнҝ нәсил ҝәтирдиләр (Тәквин 6:2, 4). Бу еһтираслы мәләкләрин ҝүнаһы Содом вә Һоморра сакинләринин позғунлуғу илә мүгајисә олунур (Јәһуда 6, 7). Бу сәбәбдән һәмин ҝүнләрдә ҹинси позғунлуг ҝениш јајылмышдыр.

11. Буҝүнкү әхлаг нормалары нәдә Нуһун ҝүнләрини хатырладыр?

¹¹ Бәс буҝүнкү әхлаг нормалары барәсиндә нә демәк олар? Бу сон ҝүнләрдә чох инсанларын һәјаты секс әтрафында дөвр едир. Павел онлары мә’налы сурәтдә тәсвир едәрәк дејир ки, онлар ‘һәр ҹүр һәссаслығы итирибләр’; чохлары “һәр нөв мурдарлығы аҹҝөзлүклә ишләмәк үчүн, өзләрини сәфаләтә” тәслим едибләр (Ефеслиләрә 4:19). Порнографија, никаһагәдәрки секс, ушаглары зорлама вә һомосексуализм бу ҝүн ади һала чеврилиб. Бә’зиләри артыг ҹинсијјәт органлары васитәсилә өтүрүлән хәстәликләр, аиләнин дағылмасы вә диҝәр сосиал проблемләр тимсалында “лајиг олан әвәзи” алырлар (Ромалылара 1:26, 27).

12. Бүтүн пис шејләрә нәјә ҝөрә нифрәт һисси инкишаф етдирмәлијик?

¹² Нуһун ҝүнләриндә Јеһова бөјүк Туфан ҝөндәрди вә позғунлуға гәрг олмуш дүнјаны мәһв етди. Биз, Нуһун ҝүнләри илә бизим ҝүнләр арасындакы јахын охшарлығы һеч заман нәзәрдән гачырмамалыјыг. Јахынлашан “бөјүк мәшәггәт” јер үзүнү әхлагсызлардан, зинакарлардан, кишибазлардан вә ушагбазлардан тәмизләјәҹәк (Матта 24:21; 1 Коринфлиләрә 6:9, 10; Вәһј 21:8). Пис шејләрә индидән нифрәт һиссини инкишаф етдирмәк вә әхлагсызлыға сөвг едә биләҹәк шәраитләрдән гачынмаг нә гәдәр дә ваҹибдир! (Мәзмур 97:10; 1 Коринфлиләрә 6:18).

Јер үзү “зоракылыгла долмушду”

13. Нуһун ҝүнләриндә јер үзү нәјә ҝөрә зоракылыгла долмушду?

¹³ Мүгәддәс Китаб Нуһун ҝүнләринин даһа бир сәҹијјәви хүсусијјәтинә диггәт јөнәлдир: “Аллаһын нәзәриндә јер үзүндәки инсанлар позғунлашмышдылар вә дүнја зоракылыгла долмушду” (Јарадылыш 6:11, МКШ). Зоракылыг әслиндә јени бир шеј дејилди. Адәмин оғлу Габил өз салеһ гардашыны гәтлә јетирди (Тәквин 4:8). Ламек јашадығы дөвр үчүн сәҹијјәви олан гәддарлыг руһуну әкс етдирән ше’р гошмушдур: о, ҝәнҹ бир адамы ҝуја ки, өзүнү мүдафиә етмәк мәгсәди илә өлдүрдүјү үчүн өјүнүр (Тәквин 4:23, 24). Нуһун ҝүнләриндә јени олан, зоракылығын јајылма дәрәҹәси иди. Аллаһын итаәт етмәјән мәләк оғуллары јер үзүндәки гадынларла евләнир вә дүнјаја нәһәнҝ инсанлардан ибарәт нәсил ҝәтирирдиләр, бунун нәтиҹәсиндә исә зоракылыг ҝөрүнмәмиш һәддә чатмышды. “Гејдләрлә Јени Дүнја Тәрҹүмәси”нә әсасән бу гәддар нәһәнҝләр “бадалаг вуранлар” — “башгаларынын јыхылмасына сәбәб оланлар” иди (Тәквин 6:4). Нәтиҹәдә јер үзү ‘зоракылыгла долмушду’ (Јарадылыш 6:13, МКШ). Бу ҹүр шәраитдә ушагларына тәрбијә вермәјин Нуһ үчүн неҹә дә чәтин олдуғуну тәсәввүр един! Буна бахмајараг, Нуһ “бәшәр нәсли ичиндә” Јеһованын өнүндә салеһ тапылды (Јарадылыш 7:1, МКШ).

14. Буҝүнкү дүнја нә дәрәҹәдә зоракылыгла долудур?

¹⁴ Бүтүн тарих боју зоракылыг төрәдилмишдир. Лакин Нуһун ҝүнләриндә олдуғу кими, бизим ҝүнләрдә дә зоракылыг мисли ҝөрүнмәмиш дәрәҹәдә јајылыб. Мүнтәзәм олараг аиләдәки зоракылыг, террор актлары, ҝеносид вә һеч бир сәбәб олмадан уҹдантутма һамыја атәш ачан гатилләр барәсиндә ешидирик. Әлавә олараг, мүһарибәләр заманы ган төкүлүр. Јер үзү јенидән зоракылыгла долмушдур. Нәјә ҝөрә? Онун артмасына сәбәб олан нәдир? Бу суалын ҹавабы Нуһун ҝүнләри илә бизим ҝүнләр арасындакы даһа бир охшарлығы ашкар едир.

15. а) Ахыр ҝүнләрдә зоракылығын артмасына сәбәб олан нәдир? б) Һадисәләрин неҹә олаҹағына шүбһә етмәјә биләрик?

¹⁵ Ҝөјдә 1914-ҹү илдә Хиласкар Падшаһлыг јарананда, тахта отурмуш Падшаһ Иса Мәсиһ тарихи әһәмијјәт кәсб едән иш ҝөрдү. Шејтан Иблис вә онун ҹинләри ҝөјдән јерин һүдудларына говулдулар (Вәһј 12:9-12). Туфана гәдәр итаәт етмәјән мәләкләр ҝөјдәки мөвгеләрини көнүллү олараг тәрк етдиләр, бизим ҝүнләрдә исә онлар ҝөјдән мәҹбурән говулдулар. Бундан әлавә, инди онлар гејри-гануни ҹисмани еһтирасларына тәслим олмаг үчүн јер үзүндә инсан ҹилдинә ҝирә билмирләр. Үмидсиз галараг, гәзәбләнәрәк вә гаршыдан ҝәлән һөкм ҝүнүндән горхараг, онлар инсанлары вә тәшкилатлары Нуһун ҝүнләриндә олдуғундан даһа дәһшәтли ҹинајәтләрә вә зоракылыглара итәләјирләр. Јеһова туфанагәдәрки дүнјаны, итаәтсиз мәләкләр вә онларын нәсилләри јер үзүнү зоракылыгла долдурдугдан сонра мәһв етди. Јеһованын бизим ҝүнләрдә дә бу ҹүр давранаҹағына шүбһә етмәк лазым ҝәлмир! (Мәзмур 37:10). Лакин ојаг дуранлар билирләр ки, гуртулушлары јахындыр.

Мүждә тәблиғ едилир

16, 17. Нуһун ҝүнләри илә бизим ҝүнләр арасындакы дөрдүнҹү охшарлыг һансыдыр?

¹⁶ Бизим ҝүнләрлә туфанагәдәрки дүнја арасындакы дөрдүнҹү охшарлыг Нуһа һәвалә олунан ишдә ҝөрүнүр. Нуһ нәһәнҝ ҝәми тикди. О, һәм дә “тәблиғчи” иди (2 Петер 2:5). Нуһ нәји тәблиғ едирди? Һәр шејлә јанашы, ҝөрүнүр, Нуһ һәм төвбә етмәјә чағырыр, һәм дә гаршыдан ҝәләҹәк фәлакәт һаггында хәбәрдарлыг едирди. Иса деди ки, Нуһун ҝүнләриндә јашајан инсанлар “туфан ҝәлиб һамысыны апарынҹаја гәдәр... бихәбәр идиләр [“фикирләшмирдиләр”, ЈД]” (Матта 24:38, 39).

¹⁷ Ејни тәрздә дә бу ҝүн Јеһованын Шаһидләри тәблиғ етмәк тапшырығыны виҹданла јеринә јетирирләр, Аллаһын Падшаһлығы һаггындакы хәбәр исә бүтүн дүнјада бәјан едилир. Демәк олар ки, Јер күрәсинин һәр бир јериндә, инсанларын Падшаһлыг һаггындакы хәбәри ана дилиндә ешитмәк вә охумаг имканлары вар. Јеһованын Падшаһлығыны бәјан едән “Ҝөзәтчи Гүлләси” журналы 25 милјондан артыг тиражла дәрҹ олунур вә 140-дан артыг дилдә чап едилир. Аллаһын Падшаһлығы һаггындакы хош хәбәр һәгигәтән дә “халгларын һамысына шәһадәт олараг бүтүн дүнјада” тәблиғ олунур. Бу иш Аллаһын истәдији дәрәҹәдә јеринә јетәндә, сон һөкмән ҝәләҹәкдир (Матта 24:14).

18. Бир чох инсанларын бизим тәблиғ фәалијјәтимизә олан мүнасибәтләри Нуһун мүасирләринин мүнасибәтләринә нәдә охшардыр?

¹⁸ Туфандан әввәлки дүнјанын руһани вә мә’нәви ҹәһәтдән ифласа уғрадығыны нәзәрә алсаг, Нуһун аиләсинин һәр шејә шүбһә илә јанашан гоншуларынын нәзәриндә ҝүлүнҹ вәзијјәтдә галдығыны тәсәввүр етмәк чәтин дејил. Бу аилә тәһгир вә истеһза објектинә чеврилмишдир. Буна бахмајараг, сон ҝәлди. Сон ҝүнләрдә дә истеһза едән ришхәндчиләрин сајы аз дејил. Лакин Мүгәддәс Китабда дејилдији кими, “Рәббин Ҝүнү... оғру кими ҝәләҹәкдир” (2 Петер 3:3, 4, 10). Шүбһәсиз ки, һәмин ҝүн мүәјјән олундуғу вахтда ҝәләҹәкдир. Һәмин ҝүн ҝеҹикмәјәҹәкдир (Һабаккук 2:3). Инди ојаг дурмаг неҹә дә ваҹибдир!

Сағ галанларын сајы чох дејил

19, 20. Туфан илә буҝүнкү системин мәһв едилмәси арасында һансы охшарлығы ҝөрмәк олар?

¹⁹ Нуһун ҝүнләри илә бизим ҝүнләр арасындакы охшарлыг јалныз инсанларын пислијиндә вә мәһв едилмәләриндә дејил. Туфандан бир нечә адам сағ чыхды, һазыркы системин сонундан да сағ чыханлар олаҹаг. Туфандан, һәјат тәрзләри диҝәрләриндән фәргләнән һәлим инсанлар сағ чыхдылар. Онлар Аллаһын хәбәрдарлығына диггәт јетирди вә өз дөврүнүн натәмиз дүнјасындан кәнар ҝәздиләр. Мүгәддәс Китабда дејилир: “Нуһ Рәббин ҝөзүндә лүтф тапды... Нуһ салеһ вә өз нәсли арасында гүсурсуз бир адам иди” (Јарадылыш 6:8, 9, МКШ). Бүтүн бәшәр аиләсиндән јалныз бир аилә — “аз адам, башга сөзлә, сәккиз нәфәр судан сағ-саламат чыхды” (1 Петер 3:20). Вә Јеһова Аллаһ онлара тапшырды: “Төрәјиб чохалын вә јер үзүнү долдурун” (Јарадылыш 9:1, МКШ).

²⁰ Аллаһын Кәламы бизи әмин едир ки, “бөјүк мәшәггәтдән” “бөјүк бир издиһам” сағ чыхаҹаг (Вәһј 7:9, 14). Онларын сајы нә гәдәр олаҹаг? Иса өзү деди: “Һәјата апаран гапы дар вә јол енсиздир вә ону тапанлар аздыр” (Матта 7:13, 14). Јер күрәсиндәки әһалинин сајынын милјардларла олдуғуну нәзәрә алсаг, бөјүк мәшәггәтдән сағ чыханларын сајы чох олмајаҹагдыр. Амма онлара да Туфандан сағ чыханлара тапшырылан иш һәвалә олуна биләр. Бөјүк мәшәггәтдән сағ чыханлар, ола биләр ки, мүәјјән вахт әрзиндә дүнјаја, јени јер ҹәмијјәтинин бир һиссәси олаҹаг ушаглар ҝәтирә биләҹәкләр (Ишаја 65:23).

“Ојаг дурун”

21, 22. а) Туфан һаггындакы мә’луматы нәзәрдән кечирмәкдән һансы фајданы әлдә етдиниз? б) 2004-ҹү ил үчүн иллик ајә неҹә сәсләнир вә һәмин ајәдәки мәсләһәтә диггәт јетирмәк бизим үчүн нәјә ҝөрә зәруридир?

²¹ Туфанын баш ведији вахтдан әсрләр кечсә дә, јенә дә бизим үчүн хәбәрдарлыг кими хидмәт едир вә биз буна е’тинасыз јанашмамалыјыг (Ромалылара 15:4). Нуһун ҝүнләри илә бизим ҝүнләр арасындакы охшарлыг бизи баш верәнләрин ваҹиблијини даһа ајдын сурәтдә дәрк етмәјә вә пис инсанлар үзәриндәки һөкмү һәјата кечирмәк үчүн Исанын оғру кими ҝәләҹәји вахты ҝөзләмәјә тәшвиг етмәлидир.

²² Бу ҝүн Иса Мәсиһ руһани мә’нада нәһәнҝ тикинти ишинә рәһбәрлик едир. Мәсиһин һәгиги давамчыларынын тәһлүкәсизлији вә һәјатларынын горунмасы үчүн ҝәмијә бәнзәр руһани ҹәннәт мөвҹуддур (2 Коринфлиләрә 12:3, 4). Бөјүк мәшәггәт заманы хилас олмаг үчүн биз һәмин ҹәннәтдә галмалыјыг. Руһани ҹәннәт руһән јухуја даланлары удмаға һазыр олан Шејтанын дүнјасы илә әһатә олунуб. Бизим үчүн ојаг дурмаг вә Јеһованын ҝүнүнә һазыр олмаг олдугҹа зәруридир (Матта 24:42, 44).

Хатырлајырсынызмы?

• Иштиракы илә әлагәдар Иса нәјә тәшвиг едирди?

• Иса өз иштиракы вахтыны нә илә мүгајисә етди?

• Бизим ҝүнләримиз Нуһун ҝүнләри илә һансы ҹәһәтләрдә охшардыр?

• Нуһун ҝүнләри илә бизим ҝүнләр арасындакы охшарлыглар үзәриндә дүшүнмәк һансы дөврдә јашадығымызы унутмамагда бизә неҹә көмәк едир?

[10-ҹу сәһифәдәки шәрһ]

2004-ҹү ил үчүн иллик ајә бу олаҹагдыр: “Ојаг дурун... һазыр олун” (Матта 24:42, 44).

[9-ҹу сәһифәдәки шәкил]

Нуһ Аллаһын хәбәрдарлығына диггәт јетирди. Биз дә бу ҹүр давранырыгмы?