Һијләдән горун

“Диггәтли олун ки... бош һијлә илә кимсә сизи әсир алмасын” (КОЛОСЛУЛАРА 2:8).

1-3. а) Һансы нүмунәләр ҝөстәрир ки, һијлә мүасир һәјатын, демәк олар ки, бүтүн саһәләринә тә’сир ҝөстәрир? б) Биз дүнјада јајылмыш һијләјә нәјә ҝөрә тәәҹҹүб етмәли дејилик?

“СИЗЛӘРДӘН кимә мүштәриләр һеч заман јалан сөјләмәјиб?” Бир нечә ил әввәл бир һүгуг профессору бу ҹүр суал верәрәк сорғу кечирмишди. Һансы нәтиҹәләри әлдә етди? О изаһ едир: “Бир нечә мин вәкилдән јалныз биринә мүштәриләри һеч заман јалан сөјләмәјиб”. Нәјә ҝөрә? “Бу вәкил бөјүк фирмада практикаја јени башламыш вә һәлә бир дәфә дә олсун мүштәриләри илә сөһбәт етмәмишдир”. Бу һадисә аҹы һәгигәти тәсдиг едир: јалан вә һијлә буҝүнкү дүнјада ади һала чеврилиб.

² Һијлә мүхтәлиф формалар гәбул едир вә онун тә’сири, демәк олар ки, мүасир һәјатын һәр бир саһәсиндә дујулур. Күтләви информасија васитәләри илә јајылан хәбәрләр бу ҹүр нүмунәләрлә долудур: сијасәтчиләр өз әмәлләри барәдә јалан данышыр, мүһасибләр вә вәкилләр үмуми ҝәлири шиширдир, рекламчылар истеһлакчылары алдадыр, һүгуг просесләриндә тәрәфләр сығорта ширкәтләрини алдадыр; бу, һәлә сијаһынын һамысы дејил. Һәмчинин дини јалан да мөвҹуддур. Руһаниләр халгы ҹанын өлмәзлији, ҹәһәннәм оду вә Үч үгнум кими јалан тә’лимләрлә алдадырлар (2 Тимотејә 4:3, 4).

³ Һијләнин бу гәдәр јајылмасына тәәҹҹүб етмәјә дәјәрми? Әсла јох. “Ахыр ҝүнләр”ә даир Мүгәддәс Китаб хәбәрдарлыг едир: “Пис адамлар вә сахтакарлар исә, алдадыб алданараг, ҝетдикҹә даһа бетәр олаҹаглар” (2 Тимотејә 3:1, 13). Биз мәсиһчиләр, бизи һәгигәтдән дөндәрмәјә гадир олан алдадыҹы идејалардан горунмалыјыг. Тәбии олараг ики суал баш галдырыр: нәјә ҝөрә һијлә бу ҝүн белә ҝениш јајылыб? Өзүмүзү һијләдән неҹә горуја биләрик?

Бу ҝүн нәјә ҝөрә белә чох һијлә мөвҹуддур?

4. Дүнјада һијләнин бу ҹүр јајылмасынын сәбәбини Мүгәддәс Китаб неҹә изаһ едир?

⁴ Дүнјада һијләнин ҝениш јајылмасынын сәбәбини Мүгәддәс Китаб ајдын шәкилдә изаһ едир. Һәвари Јәһја јазырды ки, “бүтүн дүнја... шәририн һакимијјәти алтындадыр” (1 Јәһја 5:19). Бу “шәрир” Шејтан Иблисдир. Иса онун һаггында демишдир: “О... һәгигәтә бағлы галмады; чүнки онда һәгигәт јохдур. Јалан сөјләдији заман, өзүндән сөјләр; чүнки о, јаланчыдыр вә јаланын атасыдыр”. Бу дүнјанын өз јаланчы рәһбәринин руһуну, дәјәрләрини вә ҹизҝиләрини әкс етдирмәсинә тәәҹҹүб етмәк лазымдырмы? (Јәһја 8:44; 14:30; Ефеслиләрә 2:1-3).

5. Бу ахыр ҝүнләрдә Шејтан јаландан даһа фәал сурәтдә неҹә истифадә едир вә онун әсас һәдәфи кимләрдир?

⁵ Бу ахыр ҝүнләрдә Шејтан олдугҹа фәалдыр. О, јерин һүдудларына атылмышдыр. О, вахтынын аз олдуғуну билир вә чох гәзәблидир. Баҹардыгҹа даһа чох инсаны мәһв етмәк арзусујла ‘бүтүн дүнјаны алдадыр’ (Вәһј 12:9, 12). Шејтан тәсадүфдән-тәсадүфә јалана әл атмырды. Әксинә, бу, инсанлары алдатмаг үчүн онун даима истифадә етдији үсулдурa. О, өзүнә һијлә вә хаинлик дахил едән бүтүн имканлардан истифадә едәрәк, имансызларын ағылларыны кор едир вә онлары Аллаһдан узаглашдырыр (2 Коринфлиләрә 4:4). Бу һијлә устасы хүсусилә дә Аллаһа “руһән вә һәгигәтән” ибадәт едәнләри ашырмаг истәјир (Јәһја 4:24; 1 Петер 5:8). Һеч заман унутмаг лазым дејил ки, Шејтан әслиндә белә бир иддиа ирәли сүрмүшдүр: “Мән һәр бир кәси Аллаһдан узаглашдыра биләрәм” (Ејуб 1:9-12). Ҝәлин Шејтанын үсулларындан бә’зиләрини нәзәрдән кечирәк вә өзүмүзү онун һијләләриндән неҹә горуја биләҹәјимизи мүзакирә едәк (Ефеслиләрә 6:11).

Дөнүкләрин һијләсиндән горун

6, 7. а) Дөнүкләр нәји иддиа едә биләрләр? б) Мүгәддәс Јазылар дөнүкләрин мәгсәдини ајдын шәкилдә неҹә ҝөстәрир?

⁶ Шејтан, Аллаһын хидмәтчиләрини һәгигәт јолундан аздырмаг үчүн, артыг чохдандыр ки, дөнүкләрдән истифадә едир (Матта 13:36-39). Дөнүкләр Јеһоваја ибадәт етдикләрини вә Мүгәддәс Китаба инандыгларыны иддиа едә биләрләр, лакин онлар Аллаһын тәшкилатынын ҝөрүнән һиссәсини рәдд едирләр. Бә’зиләри һәтта јалан динин дүнја империјасы олан “Бөјүк Бабил”ин Аллаһы рүсвај едән тә’лимләринә гајыдырлар (Вәһј 17:5; 2 Петер 2:19-22). Аллаһын илһамынын тә’сири алтында Мүгәддәс Китаба, дөнүкләрин мәгсәдләрини вә үсулларыны ифша едән ҝүҹлү сөзләр дахил едилиб.

⁷ Дөнүкләрин мәгсәди нәдир? Онларын әксәријјәти, еһтимал ки, бир вахтлар һәгигәт сандыглары дини тәрк етмәклә кифајәтләнмирләр. Чох вахт башгаларыны да өзләри илә апармаг истәјирләр. Өзләри шаҝирд ахтармаг вә онлары өјрәтмәк әвәзинә, дөнүкләрин чоху ‘шаҝирдләри [јә’ни Мәсиһин шаҝирдләрини] ардларынҹа чәкмәјә’ ҹәһд едирләр (Һәвариләрин ишләри 20:29, 30). Јаланчы мүәллимләр һаггында һәвари Павел тә’кидлә хәбәрдарлыг етмишдир: “Диггәтли олун ки... кимсә сизи әсир алмасын” (Колослулара 2:8). Мәҝәр дөнүкләрин чоху буну етмәјә чалышмырлармы? Һеч бир шејдән шүбһәләнмәјән шәхси оғурлајараг, аиләсиндән узаглара апаран оғру кими, дөнүкләр дә јығынҹағын е’тибар едән үзвләрини сүрүдән узаглашдырараг тәләјә салмаға чалышырлар.

8. Дөнүкләр өз мәгсәдләринә һансы үсулларла наил олмаға чалышырлар?

⁸ Дөнүкләр өз мәгсәдләринә һансы үсулларла наил олмаға чалышырлар? Онлар чох вахт фактлары тәһриф едир, јарыһәгигәтә вә бирбаша јалана әл атырлар. Иса билирди ки, давамчылары ‘јалан сөјләјиб... [онлара] һәр ҹүр бөһтан атан’ инсанларын гурбаны олаҹаглар (Матта 5:11). Бу кинли дүшмәнләр башгаларыны алдатмаг мәгсәди илә јалан данышырлар. Һәвари Петер, “ујдурма сөзләр” данышаҹаг, өз ‘һијләләрини’, јә’ни һијләҝәр тә’лимләрини јајаҹаг вә өз мәгсәдләринә чатмаг үчүн ‘Мүгәддәс Јазылары позаҹаг’ дөнүкләр барәсиндә хәбәрдарлыг едирди (2 Петер 2:3, 13; 3:16). Кәдәрли олса да, дөнүкләр ‘бә’зиләринин иманыны алт-үст етмәјә’ наил олмушлар (2 Тимотејә 2:18).

9, 10. а) Дөнүкләрин бизи алдатмамасы үчүн нә етмәлијик? б) Аллаһын нијјәтләри һаггындакы анлајышымыза дүзәлишләр едиләндә биз нәјә ҝөрә нараһат олмуруг?

⁹ Дөнүкләр бизи алдада билмәсинләр дејә нә етмәлијик? Аллаһын Кәламынын мәсләһәтинә диггәт јетирмәлијик: “Өјрәндијиниз тә’лимә зидд олараг ајрылыглары вә јолдан чыхмағы тәшвиг едәнләрдән өзүнүзү горујун вә онлардан еһтијат един” (Ромалылара 16:17). Онларын өз дәлилләрини шифаһи, јазылы формада вә ја Интернет васитәсилә чатдырмаларындан асылы олмајараг, биз онлардан узаг дурараг, “еһтијат едирик”. Биз нәјә ҝөрә бу ҹүр мөвге тутуруг? Биринҹиси, она ҝөрә ки, Аллаһын Кәламы бизи бу ҹүр давранмаға чағырыр вә биз, Јеһованын бизә јалныз ән јахшы шејләри арзуладығына инанырыг (Ишаја 48:17, 18).

¹⁰ Икинҹиси, бизи Бөјүк Бабилдән ајдын шәкилдә фәргләндирән гијмәтли һәгигәтләри бизә өјрәдән тәшкилаты севирик. Ејни заманда Аллаһын нијјәтләри һаггындакы биликләримизин там олмадығыны е’тираф едирик; анлајышымыза узун илләр әрзиндә дүзәлишләр едилир. Садиг мәсиһчиләр Јеһованын һәр шеји ајдынлашдыраҹағы вахта гәдәр ҝөзләмәјә һазырдырлар (Сүлејманын мәсәлләри 4:18). Бу арада исә, истифадә едилмәси Аллаһа мәгбул олан тәшкилаты тәрк етмәјәҹәјик, чүнки Аллаһын бу тәшкилата хејир-дуа вердијинә даир ајдын дәлилләри ҝөрүрүк (Һәвариләрин ишләри 6:7; 1 Коринфлиләрә 3:6).

Өзүнү алдатмагдан горун

11. Нәјә ҝөрә гејри-камил инсанлар өзләрини алдатмаға мејллидирләр?

¹¹ Гејри-камил инсанлар, Шејтанын һәвәслә истифадә етдији мејлә — өзләрини алдатмаг мејлинә маликдирләр. Јеремја 17:9 ајәсиндә дејилир: “Үрәк һәр шејдән зијадә алдадыҹыдыр вә чох чүрүкдүр”. Јагуб исә јазырды: “Һәр кәс өз еһтирасы илә апарылараг вә алданараг имтаһан олунур” (Јагуб 1:14). Әҝәр үрәјимиз алданыбса, ҝүнаһы ҹазибәдар вә зәрәрсиз кими тәгдим едәрәк бизи ҝүнаһа тәһрик едә биләр. Лакин бу һијләдир, чүнки ҝүнаһа ујан, өлүм јолуна дүшүр (Ромалылара 8:6).

12. Биз өзүмүзү алдатмағын тәләсинә неҹә дүшә биләрик?

¹² Өзүнү алдатмағын тәләсинә дүшмәк асандыр. Алдадыҹы үрәк ҹидди чатышмазлыглара дәрракәли изаһат верәр вә ја ағыр ҝүнаһа һагг газандыра биләр (1 Самуел 15:13-15, 20, 21). Чүрүк үрәјимиз һәмчинин шүбһәли давранышлара белә һагг газандыра биләр. Мәсәлән, әјләнҹә мәсәләсини нәзәрдән кечирәк. Бә’зи әјләнҹә нөвләри ҹана хејирли вә хошдур. Лакин бу дүнјанын филмләр, телевизија програмлары вә Интернет васитәсилә тәклиф етдији әјләнҹәләрдән чоху налајиг вә әхлагсыздыр. Рүсвајчы әјләнҹә програмларына бахмағын һеч бир зәрәри олмадығына өзүмүзү инандырмаг асандыр. Бә’зиләри һәтта белә дүшүнүрләр: “Әҝәр бу мәним виҹданыма зидд ҝетмирсә, бурада пис нә вар ки?” Амма бу ҹүр инсанлар ‘өзләрини алдадырлар’ (Јагуб 1:22).

13, 14. а) Мүгәддәс Китабын һансы нүмунәси ҝөстәрир ки, виҹданымыз һәмишә е’тибарлы мәсләһәтчи олмаја биләр? б) Өзүмүзү алдатмагдан неҹә горуна биләрик?

¹³ Биз өзүмүзү алдатмагдан неҹә горуна биләрик? Һәр шејдән әввәл јадда сахламалыјыг ки, инсанын виҹданы һәмишә е’тибарлы мәсләһәтчи олмур. Нүмунә үчүн һәвари Павели ҝөтүрәк. О, мәсиһчи олмаздан әввәл Мәсиһин давамчыларыны тә’гиб едирди (Һәвариләрин ишләри 9:1, 2). Еһтимал ки, о заман виҹданы ону нараһат етмирди. Лакин ајдындыр ки, о, дүзҝүн јолла ҝетмирди. Павел е’тираф едирди: “Мән... ҹаһиллик вә имансызлыгла һәрәкәт едирдим” (1 Тимотејә 1:13). Демәли, һәр һансы нөв әјләнҹәнин бизим виҹданымызы нараһат етмәмәси, өзлүјүндә бизим доғру даврандығымыза зәманәт вермир. Јалныз Аллаһын Кәламы әсасында лајигинҹә тә’лим едилмиш виҹдан сағлам рәһбәрлик верә биләр.

¹⁴ Әҝәр өзүмүзү алдатмагдан гачынмаг истәјириксә, бә’зи фајдалы мәсләһәтләри јадда сахламаг лазымдыр. Аллаһа дуада мүраҹиәт едәрәк өзүнү јохла (Мәзмур 26:2; 2 Коринфлиләрә 13:5). Дүзҝүн тәрздә өзүнү тәһлил етмәјин, бахышларында вә ја давранышында нәји исә дәјишмәјин зәрури олдуғуну ашкар едә биләр. Башгаларына гулаг ас (Јагуб 1:19). Биз өзүмүзү јохлајан заман јанлыш гәнаәтә ҝәлмәјә мејлли олдуғумуз үчүн, јеткин мәсиһчиләрин гәрәзсиз фикирләрини динләмәк мүдриклик олар. Әҝәр сән мүвазинәтли, тәҹрүбәли һәмиманлыларынын ҝөзүндә шүбһәли ҝөрүнән гәрарлар гәбул едир вә ја һәрәкәтләр едирсәнсә, өзүндән сорушмаға дәјәр: “Бәлкә мәним виҹданым лајигинҹә тә’лим едилмәјиб вә ја үрәјим мәни алдадыр?” Мүнтәзәм олараг Мүгәддәс Китабы вә онун әсасында һазырланмыш нәшрләри тәдгиг ет (Мәзмур 1:2). Бу, фикирләрини, бахышларыны вә һиссләрини Аллаһын принсипләри илә ујғунлашдырмагда сәнә көмәк едәҹәк.

Шејтанын јалан идејаларындан горун

15, 16. а) Шејтан бизи һансы јалан идејаларла алдатмаға чалышыр? б) Бу ҹүр јаланлардан өзүмүзү неҹә горуја биләрик?

¹⁵ Бизи алдатмаға чалышараг, Шејтан чохлу јалан идејалардан истифадә едир. О бизи инандырмаға чалышыр ки, мадди шејләрә малик олмаг хошбәхтлик вә мәмнунлуг ҝәтирир, һалбуки чох вахт тамамилә әксинә олур (Ваиз 5:10-12). О, бизи инандырмаг истәјәрди ки, бу пис дүнја әбәдијјән мөвҹуд олаҹаг, һалбуки ајдын дәлилләрә әсасән биз “ахыр ҝүнләрдә” јашајырыг (2 Тимотејә 3:1-5). Әхлагсызлыгдан зөвг алан инсанларын чох вахт аҹы нәтиҹәләр әлдә етмәләринә бахмајараг, Шејтан белә бир фикир ирәли сүрүр ки, әхлагсыз һәјат тәрзи сүрмәкдә һеч бир зәрәр јохдур (Галатијалылара 6:7). Онун бу ҹүр јаланларындан өзүмүзү неҹә горуја биләрик?

¹⁶ Мүгәддәс Китаб нүмунәләриндән фајда әлдә ет. Мүгәддәс Китабда Шејтанын јаланына ујан кәсләрин сагындырыҹы нүмунәләри тәсвир едилир. Онлар мадди шејләрә мејл ҝөстәрмиш, һансы вахтда јашадыгларыны нәзәрдән гачырмыш вә әхлагсызлығын тә’сири алтына дүшмүшләр. Нәтиҹә исә фәлакәтли олмушдур (Матта 19:16-22; 24:36-42; Лука 16:14; 1 Коринфлиләрә 10:8-11). Мүасир нүмунәләрдән ибрәт дәрси ҝөтүр. Әфсуслар олсун ки, мәсиһчиләрдән бә’зиләри һансы дөврдә јашадыгларыны јаддан чыхарыр вә Аллаһа хидмәт етмәклә нә исә јахшы шеј итирдијини дүшүнүр. Бу ҹүр инсанлар бә’зән һәгигәтдән узаглашыр вә өз хошларына јашамаға башлајырлар. Лакин онлар ‘сүрүшкән јерләрдә’ дурурлар вә әввәл-ахыр әхлагсыз давранышларынын нәтиҹәләри илә үз-үзә ҝәлмәли олаҹаглар (Мәзмур 73:18, 19). Биз башгаларынын нүмунәләриндән өјрәнмәклә мүдрик давранырыг (Сүлејманын мәсәлләри 22:3).

17. Шејтан нәјә ҝөрә белә бир јалан ирәли сүрүр ки, ҝуја Јеһова бизи севмир вә гијмәтләндирмир?

¹⁷ Шејтанын мүвәффәгијјәтлә истифадә етдији јалан идејадан бири дә одур ки, ҝуја Јеһова бизи севмир вә гијмәтләндирмир. Шејтан гејри-камил инсанлары минилликләр әрзиндә мүшаһидә едир. О, чох ҝөзәл билир ки, биз руһдан дүшмәклә зәифләјә биләрик (Сүлејманын мәсәлләри 24:10). Буна ҝөрә дә о, белә бир јалан ирәли сүрүр ки, ҝуја биз Аллаһын ҝөзүндә һеч бир шејә јарамырыг. Әҝәр биз ‘јыхылмышыгса’ вә Јеһованын бизи веҹинә алмадығына әминиксә, биздә тәслим олмаг истәјимиз јарана биләр (2 Коринфлиләрә 4:9). Бөјүк Јаланчы да мәһз елә буна наил олмаг истәјир! Шејтанын бу тәләсинә дүшмәмәк үчүн бизә нә етмәк лазымдыр?

18. Мүгәддәс Китаб бизи Јеһованын мәһәббәтинә неҹә әмин едир?

¹⁸ Мүгәддәс Китабда Аллаһын бизә олан мәһәббәти һаггында дејиләнләри шәхсән өзүнә аид ет. Аллаһын Кәламында Јеһованын бизи нәзәрә алдығына вә севдијинә әмин едән тә’сирли сурәтләр вар. О, сәнин ҝөз јашларыны “шүшәјә” гојур — бу о демәкдир ки, О, садиглијини горујуб сахламаг үчүн бүтүн гүввәтинлә чалышараг төкдүјүн ҝөз јашларыны ҝөрүр вә јадда сахлајыр (Мәзмур 56:8). Јеһова сәнин ‘руһән әзилмиш’ олдуғун вахты билир вә бу ҹүр анларда сәнә јахындыр (Мәзмур 34:18). О, сәнин һаггында һәр бир тәфсилаты, һәтта ‘башындакы сачларын’ сајыны белә билир (Матта 10:29-31). Ән башлыҹасы исә, Аллаһ сәнин үчүн “ваһид Оғлуну” вериб (Јәһја 3:16; Галатијалылара 2:20). Мүгәддәс Јазыларын бу ҹүр ајәләринин шәхсән сәнә аид олдуғуна инанмаг бә’зән чәтин ола биләр. Лакин биз Јеһованын сөзләринә е’тибар етмәлијик. О истәјир ки, биз Онун һамымызы јалныз үмумиликдә дејил, лакин һәр биримизи ајрылыгда севдијинә инанаг.

19, 20. а) Јеһованын бизи ҝуја севмәдијинә даир Шејтанын јаланыны мүәјјәнләшдирмәк вә рәдд етмәк нәјә ҝөрә ваҹибдир? б) Бир сәјјаһ нәзарәтчи руһдан дүшәнләрә неҹә көмәк едир?

¹⁹ Јаланы мүәјјәнләшдир вә рәдд ет. Әҝәр киминсә јалан данышдығыны билирсәнсә, өзүнү мүдафиә едә биләрсән. Шејтанын Јеһованын сәни севмәдијинә инандырмаг нијјәти һаггындакы биликләрин, ҝүҹлү мүдафиә кими хидмәт едә биләр. Бир мәсиһчи баҹы, “Ҝөзәтчи Гүлләси” журналында Шејтанын фәндләри барәсиндәки хәбәрдаредиҹи мәгалә һаггында дејирди: “Мән һеч вахт тәсәввүр етмәздим ки, Шејтан мәни руһдан салмаг үчүн өз һиссләримдән истифадә етмәјә чалышыр. Бу һагдакы биликләрим, мәнә өз мәнфи һиссләримлә мүбаризә апармагда стимул верир”.

²⁰ Ҹәнуби Америкадан олан бир сәјјаһ нәзарәтчинин неҹә даврандығыны нәзәрдән кечирәк. Чобанлыг зијарәтини јеринә јетирәркән о, руһдан дүшән һәмиманлылардан чох вахт сорушур: “Үч үгнума инанырсанмы?” Руһдан дүшән инсан адәтән ҹаваб верир: “Әлбәт ки, јох”, чүнки бунун Шејтанын јаланы олдуғуну билир. Ағсаггал сонра сорушур: “Ҹәһәннәм одуна инанырсанмы?” Јенидән ҹаваб алыр: “Әлбәт ки, јох!” Онда ағсаггал дејир ки, Шејтанын о дәрәҹәдә мә’лум олмајан даһа бир јаланы мөвҹуддур. О, онларын диггәтини “Јеһоваја јахынлаш” китабынын (түрк.) 249-ҹу сәһифәсиндәки 21-ҹи абзаса јөнәлдирb. Орада Јеһованын һәр биримизи ајрылыгда севмәдијинин јалан олдуғу ҝөстәрилир. Һәмин сәјјаһ нәзарәтчи дејир ки, бу јолла о, руһдан дүшәнләрә Шејтанын јаланыны мүәјјәнләшдириб, ону рәдд етмәкдә мүвәффәгијјәтлә көмәк едир.

Өзүнү һијләдән гору

21, 22. Биз Шејтанын һијләҝәр тәләләриндән нәјә ҝөрә хәбәрсиз дејилик вә биз нәјә гәтијјәтли олмалыјыг?

²¹ Ахыр ҝүнләрин бу сон дөврүндә ҝөзләмәк лазымдыр ки, Шејтан бундан сонра да чох бөјүк һәҹмдә јалан вә һијлә бурахаҹагдыр. Хошбәхтликдән, Јеһова бизләри Шејтанын һијләҝәр тәләләринә даир мәсәләләрдән аҝаһ едиб. Мүгәддәс Китаб вә “садиг вә ағыллы гул”ун Мүгәддәс Китаба әсасланан нәшрләри Иблисин мәкрли үсулларыны ачыг шәкилдә ифша едир (Матта 24:45). Унутмајаг ки, тәһлүкәдән хәбәрдар олан һазырлыглы олур (2 Коринфлиләрә 2:11).

²² Буна ҝөрә дә, ҝәлин дөнүкләрин мүлаһизәләриндән горунаг. Ҝәлин, өзүмүзү алдатмағын мәкрли тәләсиндән гачынмаг гәтијјәтиндә мәтин олаг, һәм дә Шејтанын бүтүн јаланыны мүәјјәнләшдирәк вә рәдд едәк. Белә олан һалда биз, јалана нифрәт едән һәгигәт Аллаһы илә мүнасибәтләримизи горујуб сахлајаҹағыг (Мәзмур 31:5; Сүлејманын мәсәлләри 3:32).

[Һашијәләр]

Хатырлајырсынызмы?

• Бу ҝүн дүнјада нәјә ҝөрә бу гәдәр һијлә мөвҹуддур?

• Нә едә биләрик ки, дөнүкләр бизи алдатмасынлар?

• Өзүмүзү алдатмаг мејлиндән неҹә горуна биләрик?

• Шејтанын јалан идејаларындан неҹә горуна биләрик?

[15-ҹи сәһифәдәки шәкил]

Әјләнҹә мәсәләсиндә өзүнү алдатма.