“Сизә әмр етдијим һәр шејә риајәт етмәји онлара өјрәдин”
“Беләликлә, ҝедин, бүтүн халглары шаҝирдим един... Сизә әмр етдијим һәр шејә риајәт етмәји онлара өјрәдин” (МАТТА 28:19, 20).
1. Шаҝирд Филиплә һәбәшистанлы киши арасында һансы сөһбәт баш верди?
ҺӘБӘШИСТАНЛЫ бир киши Јерусәлимә чатмаг үчүн бөјүк мәсафә гәт етмишдир. О, севдији Аллаһа — Јеһоваја ибадәт етмәјә ҝәлмишдир. Еһтимал ки, о, Аллаһ тәрәфиндән илһамланмыш Кәламы да севирди. Евә гајыдаркән өз арабасында отуруб Ишајанын пејғәмбәрлијини охујанда она Мәсиһин шаҝирди Филип раст ҝәлди. Филип һәбәшистанлыдан сорушду: “Охудуғуну һеч анлајырсанмы?” О ҹаваб верди: “Мәнә јол ҝөстәрән олмаса неҹә анлаја биләрәм?” Филип дә Јазыларын сәмими тәдгигатчысы олан бу адама Мәсиһин шаҝирди олмаға көмәк етди (Һәвариләрин ишләри 8:26-39).
2. а) Һәбәшистанлынын суалы нәјә ҝөрә диггәтә лајигдир? б) Мәсиһин шаҝирдләр һазырламаг тапшырығы илә бағлы һансы суаллары нәзәрдән кечирәҹәјик?
2 Һәбәшистанлынын дедији сөзләрә диггәт јетирәк: “Мәнә јол ҝөстәрән олмаса неҹә анлаја биләрәм?” Бәли, она охудугларыны баша дүшмәкдә көмәк етмәк үчүн јол ҝөстәрән лазым иди. Онун сөзләри, Исанын шаҝирдләр һазырламаг һаггындакы тапшырығынын хүсуси бир ҹәһәти илә бағлыдыр. Һансы ҹәһәти илә? Бу суала ҹаваб вермәк үчүн, ҝәлин Исанын “Матта” китабынын 28-ҹи фәслиндә јазылан сөзләринин мүзакирәсини давам етдирәк. Әввәлки мәгаләдә нәјә ҝөрә вә һарада суаллары мүзакирә едилирди. Инди исә биз Мәсиһин шаҝирдләр һазырламаг тапшырығы илә бағлы олан башга ики суалы мүзакирә едәҹәјик: нәји өјрәтмәли вә буну нә вахта гәдәр етмәли?
“Һәр шејә риајәт етмәји онлара өјрәдин”
3. а) Инсан Иса Мәсиһин шаҝирди неҹә олур? б) Јени шаҝирдләрә нәји өјрәтмәк лазымдыр?
3 Биз инсанлара Мәсиһин шаҝирдләри олмалары үчүн нәји өјрәтмәлијик? Иса өз шаҝирдләринә тапшырды: “Беләликлә, ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един; сизә әмр етдијим һәр шејә риајәт етмәји онлара өјрәдин” (Матта 28:19, 20). Беләликлә, биз инсанлара Мәсиһин әмр етдији һәр шеји өјрәтмәлијикa. Бәс нә етмәк олар ки, Исанын әмрләрини өјрәнән инсан јалныз шаҝирд олмагла кифајәтләнмәсин, һәм дә шаҝирд олараг галсын? Исанын өзү дүзҝүн сөзләр сечәрәк ваҹиб бир амилә ишарә етди. О, садәҹә олараг ‘сизә әмр етдијим һәр шеји онлара өјрәдин’ демәди. О деди: “Сизә әмр етдијим һәр шејә риајәт етмәји онлара өјрәдин” (Матта 19:17). Бурада нә нәзәрдә тутулур?
4. а) Әмрә риајәт етмәк нә демәкдир? б) Мәсиһин әмринә риајәт етмәјин нә демәк олдуғуну нүмунә әсасында тәсвир един.
4 Әмрә риајәт етмәк — ону дәгигликлә јеринә јетирмәк демәкдир. Белә исә Мәсиһин әмр етдији һәр шејә риајәт етмәји инсанлара неҹә өјрәтмәк олар? Ҝәлин, машын сүрмәк үзрә тә’лиматчынын јени тәләбәјә јол һәрәкәти гајдаларыны неҹә өјрәтдијини нәзәрдән кечирәк. Мүәллим һәмин гајдалары синифдә дә баша сала биләр. Лакин бу гајдалара риајәт етмәји өјрәтмәк үчүн, о, шаҝирд машыны идарә едәркән өјрәндикләрини тәтбиг етмәјә чалышдығы заман машында, шаҝирдинин јанында олмалыдыр. Буна бәнзәр тәрздә, инсанларла Мүгәддәс Китабы өјрәнәркән биз онлара Мәсиһин әмрләрини өјрәдирик. Лакин биз һәмчинин Мәсиһин тә’лимләрини ҝүндәлик һәјатларында вә хидмәтләриндә неҹә тәтбиг етдикләринә дә диггәт јетирмәлијик (Јәһја 14:15; 1 Јәһја 2:3). Беләликлә, Мәсиһин шаҝирдләр һазырламаг тапшырығыны там дәрәҹәдә јеринә јетирмәк үчүн, биз инсанлары һәм өјрәтмәли, һәм дә мәҹази диллә десәк, әлләриндән тутуб апармалыјыг. Бу үсулла биз Исаны вә Јеһованы тәглид етмиш олаҹағыг (Мәзмур 48:14; Вәһј 7:17).
5. Мүгәддәс Китабы өјрәтдијимиз инсана Мәсиһин шаҝирдләр һазырламаг тапшырығына риајәт етмәк нәјә ҝөрә чәтин ола биләр?
5 Инсанлара Исанын әмрләрини јеринә јетирмәји өјрәтмәк, һәмчинин онлара шаҝирдләр һазырламаг тапшырығына риајәт етмәјә көмәк етмәк демәкдир. Мүгәддәс Китабы өјрәнмәјә көмәк етдијимиз бә’зиләрини тәблиғ етмәк фикри горхуда биләр. Һәтта онлар вахты илә һансыса христиан килсәсинин үзвләри олсалар да, чох еһтимал ки, әввәлки јол ҝөстәрәнләри онлара ‘ҝедиб шаҝирдләр һазырламағы’ өјрәтмәјибләр. Бә’зи килсә башчылары ачыг-ашкар е’тираф едирләр ки, христиан килсәләри өз диндарларына тәблиғ етмәји гәтијјән өјрәтмирләр. Исанын дүнјаја ҝедиб һәр ҹүр инсанларын шаҝирд олмаларына көмәк етмәк тапшырығына даир Мүгәддәс Китаб алими Ҹон Р. У. Стотт гејд етмишдир: “Биз, бу тапшырығын өзүнә дахил етдијини јеринә јетирмирик, бу исә Инҹили тәблиғ етмәјә даир буҝүнкү јеванҝелист килсәләринин бөјүк чатышмамазлығыдыр”. О әлавә етди: “Биз өз хәбәримизи узагдан тәблиғ етмәји үстүн тутуруг. Бә’зән исә саһилдә тәһлүкәсиз јердә дуруб, гышгырараг боғулан адамлара нәсиһәт верән адамлары хатырладырыг. Биз онлары хилас етмәк үчүн суја атылмырыг. Исланмагдан горхуруг”.
6. а) Мүгәддәс Китабы өјрәнән адама көмәк едәркән биз Филипи неҹә тәглид едә биләрик? б) Мүгәддәс Китабы өјрәнән адам тәблиғ ишиндә иштирак етмәјә башлајан заман она неҹә көмәк едә биләрик?
6 Әҝәр Мүгәддәс Китабы өјрәтдијимиз шәхс вахтилә үзвләри “исланмагдан горхан” динә мәхсус олубса, она Мәсиһин шаҝирдләр һазырламаг тапшырығына риајәт етмәк үчүн, мәҹази диллә десәк, судан горхуну дәф етмәк чәтин ола биләр. Онун көмәјә еһтијаҹы олаҹаг. Биз ону сәбирлә өјрәдәҹәк вә она јол ҝөстәрәҹәјик ки, Филип тәрәфиндән өјрәдилән һәбәшистанлы өзү үчүн ваҹиб суаллары ајдынлашдырыб, һәрәкәт етмәјә тәшвиг олундуғу кими, һәмин шәхс дә өз анлајышыны дәринләшдирсин вә һәрәкәт етмәјә тәшвиг олунсун (Јәһја 16:13; Һәвариләрин ишләри 8:35-38). Бундан әлавә, Мүгәддәс Китабы өјрәнән кәсләрин шаҝирдләр һазырламаг әмринә риајәт едә билмәләрини арзулајараг, Падшаһлыг һаггындакы тәблиғ ишиндә илк аддымларыны атан заман биз онлары мүшајиәт едәҹәјик (Ваиз 4:9, 10; Лука 6:40).
“Һәр шејә”
7. Мәсиһин риајәт етмәји әмр етдији “һәр шејә” һансы әмрләр дахилдир?
7 Биз јени шаҝирдләри јалныз тәблиғ етмәјә өјрәтмәклә кифајәтләнмирик. Иса бизә ҝөстәриш вермишдир ки, башгаларына онун әмр етдији “һәр шејә риајәт етмәји” өјрәдәк. Бураја, шүбһәсиз ки, ики ән ваҹиб әмрә — Аллаһы вә јахыны севмәк әмринә риајәт етмәк дә дахилдир (Матта 22:37-39). Јени шаҝирдә бу ики әмрә риајәт етмәји неҹә өјрәтмәли?
8. Јени шаҝирдә мәһәббәт тәзаһүр етдирмәји өјрәтмәјин үсулуну һансы нүмунә ҝөстәрир?
8 Машын сүрмәји өјрәнән тәләбәнин нүмунәсинә гајыдаг. Тә’лиматчысы јанында отуран тәләбә шәһәрдә машыны идарә едәркән, јалныз тә’лиматчынын сөзләрини динләмәклә дејил, диҝәр сүрүҹүләри мүшаһидә етмәклә дә өјрәнир. Тә’лиматчы диггәти башга бирисинә өзүндән габагда дурмаға меһрибанлыгла иҹазә верән, гаршыдан ҝәләнләрин ҝөзүнә ишыг дүшмәсин дејә машынын фәнәрини нәзакәтлә зәифләдән вә ја машыны хараб олан танышына һәвәслә көмәк едән сүрүҹүјә јөнәлдә биләр. Бу ҹүр нүмунәләр тәләбә үчүн, онун јолда тәтбиг едә биләҹәји гијмәтли дәрс ола биләр. Буна бәнзәр тәрздә, әбәди һәјата апаран јолда дуран јени шаҝирд дә јалныз өз мүәллиминдән дејил, јығынҹагда ҝөрдүјү ҝөзәл нүмунәләр әсасында да өјрәнир (Матта 7:13, 14).
9. Јени шаҝирд мәһәббәт тәзаһүр етдирмәји неҹә өјрәнир?
9 Мәсәлән, Мүгәддәс Китабы өјрәнән кәс, ҹидди сә’ј ҝөстәрәрәк көрпә ушагларыны Падшаһлыг Залындакы ҝөрүшләрә ҝәтирән тәнһа ананы мүшаһидә едә биләр. О, депрессија илә мүбаризә апармасына бахмајараг кәдәрли баҹынын һәмишә ҝөрүшләрә ҝәлдијини, јығынҹагда башгаларыны руһландыран јашлы дул баҹыны вә ја Падшаһлыг Залында тәмизлик ишиндә иштирак едән јенијетмәни мүшаһидә едә биләр. Мүгәддәс Китабы өјрәнән кәс јығынҹағын ағсаггалынын, јығынҹагдакы чохсајлы мәс’улијјәтләринә бахмајараг, тәблиғ хидмәтиндә рәһбәрлији сәдагәтлә өз үзәринә ҝөтүрмәсинә диггәт јетирә биләр. О, ағыр хәстәлији уҹбатындан евдән чыха билмәјән, лакин јанына ҝәләнләрин һамысыны руһландыран Шаһидлә таныш ола биләр. Мүгәддәс Китабы өјрәнән кәс, хәстә валидејнләринә гајғы ҝөстәрмәк үчүн әр-арвадын һәјатларында неҹә әсаслы дәјишикликләр етдијинә диггәт јетирә биләр. Бу ҹүр хејирхаһ, јарарлы вә е’тибарлы мәсиһчиләри мүшаһидә едәрәк, јени шаҝирд Мәсиһин Аллаһы вә јахынларыны, хүсусилә дә һәмиманлыларыны севмәк тапшырығынын нә демәк олдуғуну онларын нүмунәси әсасында өјрәнә биләр (Сүлејманын мәсәлләри 24:32; Јәһја 13:35; Галатијалылара 6:10; 1 Тимотејә 5:4, 8; 1 Петер 5:2, 3). Бу мә’нада мәсиһчи јығынҹағынын һәр бир үзвү мүәллим вә нүмунә ола биләр вә олмалыдыр да (Матта 5:16).
“Дөврүн сонуна гәдәр”
10. а) Шаҝирдләри һазырламаг иши илә нә вахта гәдәр мәшғул олаҹағыг? б) Тапшырыгларын јеринә јетирилмәсинә даир Иса һансы нүмунәни верди?
10 Шаҝирдләри һазырламаг иши илә нә вахта гәдәр мәшғул олмалыјыг? Дөврүн, јә’ни јашадығымыз системин сонуна гәдәр (Матта 28:20). Мәсиһин тапшырығынын бу һиссәсини јеринә јетирә биләҹәјикми? Үмумдүнја јығынҹағынын үзвләри кими, биз буну етмәјә гәти гәрарлыјыг. Өтән илләр әрзиндә биз “әбәди һәјата тә’јин олунанларын”, даһа доғрусу, мејлли оланларын һамысынын ахтарышына вахтымызы, гүввәмизи вә имканларымызы һәвәслә һәср етмишик (Һәвариләрин ишләри 13:48). Һал-һазырда Јеһованын Шаһидләри бүтүн дүнјада ил әрзиндә һәр ҝүн Падшаһлыг һаггындакы тәблиғ ишинә вә шаҝирдләрин һазырланмасына орта һесабла үч милјон саатдан артыг вахт сәрф едирләр. Биз Исанын нүмунәсини тәглид етдијимиз үчүн бу ҹүр давранырыг. Иса демишдир: “Мәним јемәјим Мәни Ҝөндәрәнин ирадәсини јеритмәк вә Онун ишини тамамламагдыр” (Јәһја 4:34). Буну етмәји биз дә үрәкдән арзулајырыг (Јәһја 20:21). Бизә тапшырылан иши анҹаг башламаг јох, һәмчинин тамамламаг да истәјирик (Матта 24:13; Јәһја 17:4).
11. Бә’зи мәсиһчи баҹы-гардашларымызла нә баш верир вә бизә һансы суалы нәзәрдән кечирмәк лазымдыр?
11 Лакин бизи кәдәрләндирән одур ки, һәмиманлыларымыздан бә’зиләри руһән зәифләјир вә нәтиҹәдә Мәсиһин шаҝирдләр һазырламаг тапшырығыны даһа аз фәаллыгла јеринә јетирир вә ја бу иши үмумијјәтлә јеринә јетирмирләр. Онларын јығынҹагла јенидән үнсијјәт јаратмасына вә шаҝирдләрин һазырланмасында фәалијјәтләрини бәрпа етмәсинә неҹәсә көмәк едә биләрикми? (Ромалылара 15:1; Ибраниләрә 12:12). Мүвәггәти олараг руһән зәифләјән һәвариләрә Исанын неҹә көмәк етдијини нәзәрдән кечирәркән ҹаваб тапаҹағыг.
Гајғы ҝөстәр
12. а) Исанын өлүмүндән әввәл һәвариләр нә етдиләр? б) Ҹидди сәһвә јол вермәләринә бахмајараг, Иса һәвариләрлә неҹә давранды?
12 Исанын јер үзүндәки хидмәтинин сонуна јахын, онун өләҹәји вахт јахынлашанда, һәвариләри “Исаны тәрк едиб гачды”лар. Рәббин габагҹадан дедији кими, онларын ‘һәр бири өз тәрәфинә’ — өз евинә дағылды (Марк 14:50; Јәһја 16:32). Иса руһән зәифләјән достлары илә неҹә давранды? Дирилдикдән тезликлә сонра о, шаҝирдләриндән бә’зиләринә деди: “Горхмајын! Ҝедин, гардашларыма хәбәр верин ки, Галилејаја ҝетсинләр. Мәни орада ҝөрәҹәкләр” (Матта 28:10). Шаҝирдләрин ҹидди сәһвә јол вермәләринә бахмајараг, Иса онлара мүраҹиәт едәркән, әввәлки кими онлары “Мәним гардашларым” адландырды (Матта 12:49). Онлара олан е’тибарыны итирмәди. Бу мә’нада Иса да, Јеһова кими мәрһәмәтли вә лүтфкар иди (2 Краллар 13:23). Биз Исаны неҹә тәглид едә биләрик?
13. Руһән зәифләјәнләрә неҹә мүнасибәт бәсләмәлијик?
13 Биз хидмәтдә аз иштирак едәнләрә вә ја үмумијјәтлә тәблиғ етмәјәнләрә е’тинасыз јанашмамалыјыг. Бу һәмиманлыларын мәһәббәтдән ирәли ҝәләрәк габаглар — кимләринсә онилликләр әрзиндә — етдикләри ишләри унутмуруг (Ибраниләрә 6:10). Биз доғрудан да онлар үчүн чох дарыхырыг (Лука 15:4-7; 1 Салониклиләрә 2:17). Лакин биз буну неҹә ҝөстәрә биләрик?
14. Исанын нүмунәсини тәглид едәрәк биз руһән зәифләјәнләрә неҹә көмәк едә биләрик?
14 Иса руһдан дүшән һәвариләринә сөјләди ки, Галилејаја ҝетсинләр вә ону орада ҝөрәҹәкләр. Әслиндә Иса онлары хүсуси ҝөрүшә дә’вәт етмишди (Матта 28:10). Бу ҝүн биз дә руһән зәифләјәнләри мәсиһчи јығынҹағынын ҝөрүшләринә ҝәлмәјә дә’вәт едирик вә ола биләр ки, онлары бир нечә дәфә дә’вәт етмәли олаҹағыг. Һәвариләрин һадисәсиндә дә’вәт олунмалары онлара фајда ҝәтирди, чүнки “Он бир шаҝирд Галилејаја, Исанын онлара тә’јин етдији даға ҝетди” (Матта 28:16). Руһән зәифләјән баҹы вә гардашларымыз буна бәнзәр тәрздә бизим сәмими дә’вәтимизә һај верәндә вә мәсиһчи ҝөрүшләринә јенидән ҝәләндә биз неҹә дә севинирик! (Лука 15:6).
15. Исанын нүмунәсини тәглид едәрәк, бизим ҝөрүшләримизә ҝәлән руһән зәиф мәсиһчиләри неҹә саламлаја биләрик?
15 Руһән зәифләјән мәсиһчи Падшаһлыг Залына ҝәләндә биз нә едәҹәјик? Бәс Иса иманлары мүвәггәти олараг зәифләјән һәвариләрини тә’јин олунан јердә ҝөрәндә нә етди? ‘Иса јахынлашыб онларла’ данышды (Матта 28:18). О, һәвариләрдән аралыда дајанмады, лакин онлара јахынлашды. Иса тәшәббүсү өз әлинә аланда, һәвариләрин, еһтимал ки, нә гәдәр јүнҝүллүк һисс етдикләрини тәсәввүр ет! Биз дә тәшәббүс ҝөстәрә биләр вә јығынҹаға гајытмаға чалышан руһән зәиф мәсиһчиләри сәмимијјәтлә саламлаја биләрик.
16. а) Исанын өз давамчылары илә рәфтарындан нә өјрәнә биләрик? б) Зәифләрә Исанын етдији кими мүнасибәт бәсләдијимизи һансы һәрәкәтләримизлә ҝөстәрәҹәјик? (Һашијәјә бахын.)
16 Иса даһа нә етди? Биринҹиси, о бәјан етди: “Бүтүн һакимијјәт Мәнә верилмишдир”. Икинҹиси, Иса тапшырды: “Беләликлә [“Буна ҝөрә”, ЈД], ҝедин, бүтүн халглары шаҝирдим един”. Үчүнҹүсү, онлара вә’д етди: “Һәр ҝүн сизинләјәм”. Бәс Исанын нәји етмәдијинә диггәт јетирдинми? О, шаҝирдләрини сәһвә јол вердикләринә вә шүбһә етдикләринә ҝөрә мәзәммәт етмәди (Матта 28:17). Бу ҹүр давранышын тә’сири олдуму? Бәли. Чох кечмәмиш һәвариләр јенидән “тә’лим вермәкдән вә... мүждәләмәкдән ваз кечмирдиләр” (Һәвариләрин ишләри 5:42). Әҝәр биз зәифләрлә Исанын етдији кими даврансаг, о заман өз јығынҹағымызда буна бәнзәр ҝөзәл нәтиҹәләр ҝөрәрикb (Һәвариләрин ишләри 20:35).
“Һәр ҝүн сизинләјәм”
17, 18. Исанын “һәр ҝүн сизинләјәм” сөзләри бизи неҹә гүввәтләндирир?
17 Исанын тапшырығынын сонунҹу — “һәр ҝүн сизинләјәм” сөзләри, онун шаҝирдләр һазырламаг тапшырығыны јеринә јетирмәјә ҹәһд ҝөстәрән һәр бир кәси гүввәтләндирир. Падшаһлыг һаггындакы тәблиғ ишимизә дүшмәнләр һансы мүгавимәти ҝөстәрсәләр дә вә бизим барәмиздә һансы шајиәләри јајсалар да, биз горхмамалыјыг. Нәјә ҝөрә? ‘Ҝөјдә вә јер үзүндә бүтүн һакимијјәтә’ малик олан Башчымыз Иса бизимләдир!
18 Исанын “һәр ҝүн сизинләјәм” вә’диндән һәм дә бөјүк тәсәлли тапырыг. Мәсиһин шаҝирдләр һазырламаг тапшырығыны сә’јлә јеринә јетирәндә јалныз севинҹли дејил, кәдәрли ҝүнләримиз дә олур (2 Тарихләр 6:29). Бизләрдән ким исә үрәкдән севдији адамын өлүмүндән кәдәрләнир (Тәквин 23:2; Јәһја 11:33-36). Кимин үчүнсә гоҹалығын ағыр вахтлары башланыр, сағламлығы писләшир вә гүввәси азалыр (Ваиз 12:1-6). Ким исә арабир руһдан дүшүр (1 Салониклиләрә 5:14). Вә Аллаһын даһа чох хидмәтчиләри игтисади ҹәһәтдән ағыр вәзијјәтдә јашајырлар. Лакин бу ҹүр чәтинликләрә бахмајараг, биз хидмәтимизи мүвәффәгијјәтлә давам етдиририк, чүнки Исанын өзү “һәр ҝүн”, о ҹүмләдән һәјатымызын ән чәтин ҝүнләриндә белә бизимләдир (Матта 11:28-30).
19. а) Исанын шаҝирдләр һазырламаг тапшырығы өзүнә нәләри дахил едир? б) Мәсиһин тапшырығыны нәјин сајәсиндә јеринә јетирә биләрик?
19 Бу вә әввәлки мәгаләдән ҝөрдүјүмүз кими, Исанын шаҝирдләр һазырламаг тапшырығы өзүнә мүхтәлиф амилләри дахил едир. Иса бизә онун әмрини нәјә ҝөрә вә һарада јеринә јетирәҹәјимизи сөјләди. Һәмчинин нәји өјрәтмәји вә буну нә вахта гәдәр етмәји дә сөјләди. Әлбәт ки, бу тапшырыг асан тапшырыг дејил. Лакин һәр ҹүр һакимијјәтә малик олан Мәсиһин көмәји илә биз бу тапшырығы јеринә јетирә биләрик! Мәҝәр сән бунунла разы дејилсәнми?
[Һашијәләр]
a Бир арајыш китабчасында Исанын дедији сөзләрә диггәт јөнәлдилир. Иса, ‘онлары вәфтиз един вә өјрәдин’ јох, “онлары... вәфтиз един... онлара өјрәдин” демишдир. Беләликлә, вәфтиз етмәк вә өјрәтмәк “әслиндә... бир-биринин ардынҹа ҝәлән ики һәрәкәтдән” ибарәт дејил. Әксинә, “өјрәтмәк гисмән вәфтиздән әввәл башланан... вә гисмән вәфтиздән сонра давам едән просесдир”.
b Руһән зәиф оланларла неҹә давранмаға вә онлара неҹә көмәк етмәјә даир даһа чох мә’луматы “Ҝөзәтчи Гүлләси”нин 2003-ҹү ил 1 мај сајынын 25-27-ҹи сәһифәләриндән охумаг олар.
Неҹә ҹаваб верәрдиниз?
• Исанын әмринә риајәт етмәји инсанлара неҹә өјрәтмәли?
• Јени шаҝирд јығынҹагда башга мәсиһчиләрин нүмунәсиндән һансы дәрсләри өјрәнә биләр?
• Руһән зәифләјәнләрә көмәк етмәк үчүн нә едә биләрик?
• Исанын “һәр ҝүн сизинләјәм” вә’ди бизә неҹә гүввәт вә тәскинлик верир?
[25-ҹи сәһифәдәки шәкилләр]
Биз инсанлары һәм өјрәтмәли, һәм дә онлара биликләрини тәтбиг етмәкдә көмәк етмәлијик.
[27-ҹи сәһифәдәки шәкилләр]
Јени шаҝирд гијмәтли дәрсләри башгаларынын нүмунәсиндән өјрәнир.