Јеһова Өз иззәтини тәвазөкар инсанлара ачыр
“Тәвазөкар олмағын вә Рәбб горхусунун сону сәрвәт, иззәт вә һәјатдыр” (СҮЛЕЈМАНЫН МӘСӘЛЛӘРИ 22:4).
1, 2. а) “Һәвариләрин ишләри” китабы Стефанын “иман вә гүдрәтлә долу” бир адам олдуғуну неҹә ҝөстәрир? б) Стефанын тәвазөкар олдуғу нәдән ҝөрүнүр?
СТЕФАН “мүгәддәс Руһ илә долу олан” бир адам иди. О һәм дә “иман вә гүдрәтлә долу” иди. Исанын илк шаҝирдләриндән бири кими, о, халг арасында бөјүк харигәләр вә әламәтләр ҝөстәрирди. Бир дәфә бә’зи адамлар онунла мүбаһисәјә ҝиришдиләр, “амма онун сөзүндәки һикмәтә вә Руһа гаршы дура билмәдиләр” (Һәвариләрин ишләри 6:5, 8-10). Ајдындыр ки, Стефан Аллаһын Кәламынын чалышган тәдгигатчысы иди вә ону јәһуди дин рәһбәрләринин гаршысында баҹарыгла мүдафиә едирди. Бундан әлавә, “Һәвариләрин ишләри” китабынын 7-ҹи фәслиндә јазылдығы кими, онун әтрафлы шаһидлији ҝөстәрир ки, о, Аллаһын Өз нијјәтини неҹә ачдығы илә дәриндән марагланырды.
2 Өз мөвгеләринә вә биликләринә ҝөрә садә халга јухарыдан бахан дин рәһбәрләриндән фәргли олараг Стефан тәвазөкар иди (Матта 23:2-7; Јәһја 7:49). Мүгәддәс Јазылардан јахшы мә’луматлы олса да, ‘сүфрәләрә хидмәт етмәјә’ бөјүк мәмнунлугла разы олду ки, һәвариләр өзләрини “дуа етмәк вә сөзү јајмаг ишинә” һәср едә билсинләр. Стефан гардашлар арасында јахшы ад газанмышдыр вә буна ҝөрә дә ҝүндәлик јемәк пајламаг тапшырығыны алан, һагларында јахшы шәһадәт олунан једди нәфәрин сырасында сечилмишдир. О, бу тапшырығы тәвазөкарлыгла гәбул етди (Һәвариләрин ишләри 6:1-6, И–93).
3. Стефан Јеһованын лүтфүнү өз үзәриндә гејри-ади тәрздә неҹә һисс етди?
3 Јеһова Стефанын тәвазөкарлығыны, һәмчинин руһанилијини вә дүзлүјүнү ҝөрмәјә билмәзди. Стефан Синедрионда дүшмән әһвал-руһијјәли јәһуди рәһбәрләринә шаһидлик едәндә, онлар Стефанын “үзүнү бир мәләк үзү кими ҝөрдүләр” (Һәвариләрин ишләри 6:15). Онун үзү, Аллаһын елчиси сајылан мәләк үзү кими, иззәт Аллаһы олан Јеһовадан ҝәлән сүлһү сачырды. Стефан Синедрионун үзвләринә ҹәсарәтлә шаһидлик етдикдән сонра, гејри-ади тәрздә өз үзәриндә Аллаһын лүтфүнү һисс етди. “О, Мүгәддәс Руһла долуб ҝөзләрини ҝөјә дикәрәк, Аллаһын иззәтини вә Аллаһын сағында дуран Исаны ҝөрдү” (Һәвариләрин ишләри 7:55, И–93). Бу тә’сир бағышлајан рө’ја, Исанын Аллаһын Оғлу вә Мәсиһ олдуғуна даир Стефанын әминлијини артырды. Бу рө’ја, тәвазөкар Стефаны гүввәтләндирди вә она Јеһованын лүтфүнү газандығына даир зәманәт верди.
4. Јеһова Өз иззәтини кимләрә ачыр?
4 Стефана верилән рө’јадан ајдын олдуғу кими, Јеһова Өз иззәтини вә нијјәтләрини, Онунла мүнасибәтләрини гијмәтләндирән Аллаһ горхусуна малик олан вә тәвазөкар инсанлара ачыр. Мүгәддәс Китабда дејилир: “Тәвазөкар олмағын вә Рәбб горхусунун сону сәрвәт, иззәт вә һәјатдыр” (Сүлејманын мәсәлләри 22:4). Буна ҝөрә дә, әсл тәвазөкарлығын нә олдуғуну вә бу ваҹиб кејфијјәти неҹә инкишаф етдирмәји, һәмчинин һәјатын бүтүн саһәләриндә онун нәјә ҝөрә фајдалы олдуғуну баша дүшмәк зәруридир.
Тәвазөкарлыг Аллаһа хас кејфијјәтдир
5, 6. а) Тәвазөкарлыг нәдир? б) Јеһова тәвазөкарлығы неҹә тәзаһүр етдирир? ҹ) Јеһованын тәвазөкарлығы бизә неҹә тә’сир бағышламалыдыр?
5 Каинатда ән јүксәк вә бөјүк иззәтә малик олан Јеһова Аллаһын тәвазөкарлыға даир бөјүк нүмунә вермәси кимисә тәәҹҹүбләндирә биләр. Давуд падшаһ Јеһоваја демишдир: “Мәнә гуртарышынын галханыны вердин, сағ әлин мәни тутду вә лүтфүн [“тәвазөкарлығын”, ЈД] мәни бөјүк етди” (Мәзмур 18:35). Јеһованын тәвазөкарлығы һаггында данышаркән, Давуд көкү “ашағы әјилмәк, тә’зим етмәк” мә’насыны дашыјан ибрани сөзүнү истифадә етмишдир. Ејни көкдән ибарәт олан диҝәр сөзләрин арасында “һәлимлик” вә “мәрһәмәт” сөзләри дурур. Јеһова гејри-камил инсан олан Давудла јахын мүнасибәтдә олмаг вә ону Өз нүмајәндәси олан падшаһ кими тә’јин етмәк үчүн ашағы әјилмәклә тәвазөкарлыг ҝөстәрмишдир. 18-ҹи Мәзмурун илк сөзләриндән ҝөрүндүјү кими, Јеһова Давуду “бүтүн дүшмәнләринин пәнҹәсиндән вә Саулун әлиндән азад” едәрәк мүдафиә едир вә она дајаг олурду. Давуд исә өз нөвбәсиндә баша дүшүрдү ки, Јеһова тәвазөкарлыгла онун рифаһы үчүн һәрәкәт етмәсәјди, о, падшаһлыг ҹаһ-ҹалалына вә иззәтә һеч заман малик ола билмәзди. Бу, Давуда тәвазөкар олараг галмагда көмәк едирди.
6 Бәс бизим һаггымызда нә демәк олар? Јеһова бизә һәгигәти өјрәтмәји мәгбул сајмыш, еһтимал ки, Өз тәшкилатында хүсуси тапшырыглар е’тибар етмиш вә ја Өз ирадәсини һәјата кечирмәк үчүн биздән мүхтәлиф үсулларла истифадә етмишдир. Биз буна неҹә мүнасибәт бәсләмәлијик? Тәвазөкар олмалы дејиликми? Јеһоваја тәвазөкарлығына ҝөрә миннәтдар олмалы вә бизи фәлакәтә ҝәтириб чыхара биләҹәк мәғрурлугдан чәкинмәли дејиликми? (Сүлејманын мәсәлләри 16:18; 29:23).
7, 8. а) Манассе илә давранышында Јеһова тәвазөкарлығы неҹә тәзаһүр етдирди? б) Јеһова, һәмчинин дә Манассе бизә тәвазөкарлыға даир һансы нүмунәни верирләр?
7 Гејри-камил инсанларла давранышында Јеһова бөјүк тәвазөкарлыг тәзаһүр етдирмәклә кифајәтләнмир, һәмчинин тәвазөкар инсанлара һәвәслә мәрһәмәт ҝөстәрир, Онун гаршысында тәвазөкар оланлары галдырыр вә јүксәлдир (Мәзмур 113:4-7). Мисал үчүн, Јәһуда падшаһы Манассени ҝөтүрәк. О, өз јүксәк мөвгејиндән суи-истифадә едәрәк, јалан ибадәт нөвү јајды вә “Рәбби гәзәбләндирмәк үчүн онун ҝөзүндә чох пислик ишләди” (2 Тарихләр 33:6). Нәтиҹәдә Јеһова Манассени, Ашшур падшаһына ону тахтдан салмаға изн верәрәк, ҹәзаландырды. Зиндана дүшән Манассе “Аллаһы Рәббә јалварды вә... өзүнү чох алчалтды”; о заман Јеһова ону Јерусәлимә, тахтына гајтарды вә о “билди ки, Јеһова, Аллаһ одур” (2 Тарихләр 33:11-13). Ҝөрдүјүмүз кими, Манассенин тәвазөкарлығы Јеһоваја мәгбул иди вә О, өз нөвбәсиндә Манассени бағышлајараг вә ону јенидән падшаһ едәрәк тәвазөкарлыг ҝөстәрди.
8 Јеһованын бағышламаға һазыр олмасы вә Манассенин сәмими гәлбдән төвбә етмәси бизә тәвазөкарлыға даир ваҹиб ибрәт дәрсләри өјрәдир. Һәмишә јадда сахламаг лазымдыр ки, бизи инҹидән адама гаршы мүнасибәтимиз вә ҝүнаһ ишләтдијимиз заман өзүмүзү неҹә апармағымыз, Јеһованын бизимлә неҹә давранаҹағына тә’сир ҝөстәрир. Әҝәр биз башгаларынын сәһвләрини һазырлыгла бағышлајыр вә өз сәһвләримизи тәвазөкарлыгла е’тираф едириксә, онда Јеһованын лүтфүнә үмид едә биләрик (Матта 5:23, 24; 6:12).
Аллаһын иззәти тәвазөкар инсанлара ачылыр
9. Тәвазөкарлыг зәифлик әламәтидирми? Изаһ един.
9 Тәвазөкарлыг вә онунла бағлы олан кејфијјәтләри зәифлик әламәти вә ја пислијә бармагарасы бахмаг мејли һесаб етмәк лазым дејил. Мүгәддәс Јазылардан ҝөрүндүјү кими, Јеһова тәвазөкар олса да, вәзијјәт тәләб едәндә әдаләтли гәзәбини вә горху ојадан гүввәсини тәзаһүр етдирир. Чүнки тәвазөкарлығы Јеһованы, тәвазөкар инсанлара гаршы хејирхаһлыгла, хүсуси диггәтлә јанашмаға тәшвиг едир, лакин О, мәғрур инсанлардан узаглашыр (Мәзмур 138:6). Јеһова Өзүнүн тәвазөкар хидмәтчиләринә неҹә хүсуси диггәт ҝөстәрир?
10. Јеһова, 1 Коринфлиләрә 2:6-10 ајәләринә әсасән, тәвазөкар инсанлара нәји ачыр?
10 Јеһова Өзүнүн тә’јин етдији вахтда вә сечдији канал васитәсилә тәвазөкар инсанлара Өз нијјәти илә бағлы тәфсилатлары ачыр. Бу иззәтли һәгигәтләр, мәғрурлугла инсан мүдриклијинә ҝүвәнән вә инадкарлыгла өз бахышларына әсасланан кәсләрдән ҝизләдилмишдир (1 Коринфлиләрә 2:6-10). Тәвазөкар инсанлар исә, Аллаһын нијјәтләринә даир дүзҝүн анлајыш алдыгда, Онун дәрин тә’сир бағышлајан иззәтини бөјүк еһтирамла дәрк едир вә Ону мәдһ етмәјә тәшвиг дујурлар.
11. Биринҹи әсрдә бә’зи адамларын һансы мә’нада тәвазөкарлығы чатышмырды вә бу онлара һансы зијаны ҝәтирди?
11 Биринҹи әсрдә чох инсанларын, һәтта өзүнү мәсиһчи һесаб едәнләрин белә тәвазөкарлығы чатышмырды вә буна ҝөрә дә онлара, Аллаһын һәвари Павелин васитәсилә Өз нијјәтләри барәсиндә ачдыгларыны гәбул етмәк чәтин иди. Павел миллијәтинә, тәһсилинә, јашына вә ја чохлу хејирхаһ ишләринә ҝөрә “гејри-јәһудиләрә һәвари” сечилмәмишди (Ромалылара 11:13). Чох вахт исә, “ҹисмани” инсанларын нөгтеји-нәзәринҹә Јеһованын Өз ирадәсини јеринә јетирмәк үчүн истифадә едәҹәји адамлар мәһз јухарыда садаланан кејфијјәтләрлә танынмалыдыр (1 Коринфлиләрә 1:26-29; 3:1; Колослулара 2:18). Лакин Јеһова Павели Өзүнүн севҝи долу лүтфүнә вә әдаләтли нијјәтинә әсасән сечмишдир (1 Коринфлиләрә 15:8-10). Павелин “фөвгәлһәвариләр” адландырдығы кәсләр вә башга дүшмәнләр, онун Мүгәддәс Китаб әсасындакы мүлаһизәләри илә разы дејилдиләр. Тәвазөкарлығын чатышмамазлығы онлара Јеһованын Өз иззәтли нијјәтини неҹә јеринә јетирдијини өјрәниб, баша дүшмәјә мане олурду. Ҝәлин, Өз ирадәсини јеринә јетирмәк үчүн Јеһованын сечдији адамлары гијмәтләндирәк вә онлары һеч заман писләмәјәк (2 Коринфлиләрә 11:4-6).
12. Јеһованын тәвазөкар адамлары хүсуси шәрәфә лајиг ҝөрмәси Мусанын нүмунәсиндән неҹә ҝөрүнүр?
12 Мүгәддәс Китабын бир чох нүмунәләри ҝөстәрир ки, тәвазөкар инсанлар Аллаһын иззәтини өтәри ҝөрмәк шәрәфинә лајиг ҝөрүлүрләр. “Јер үзүндәки бүтүн адамлардан зијадә һәлим” олан Муса, Аллаһын иззәтини ҝөрмүш вә онунла јахын мүнасибәтдә олмушдур (Сајлар 12:3). Бу тәвазөкар адам, еһтимал ки, әсас е’тибары илә Әрәбистан јарымадасында 40 ил садә бир чобан олмуш, Јарадан исә ону чох шејдә бөјүк шәрәфә лајиг ҝөрмүшдүр (Чыхыш 6:12, 30). Јеһованын көмәји илә Муса фир’онун гаршысында исраиллиләрин мәнафејини горујур вә онлара башчылыг едирди. О, Аллаһла гаршылыглы үнсијјәтә малик иди. Муса рө’јада “Рәббин сурәтини” ҝөрмүшдү (Сајлар 12:7, 8; Чыхыш 24:10, 11). Аллаһын бу тәвазөкар хидмәтчисини вә нүмајәндәсини гәбул едәнләр хејир-дуаланырдылар. Әҝәр Мусадан даһа бөјүк пејғәмбәри — Исаны вә онун тә’јин етдији “садиг вә ағыллы гулу” итаәткарлыгла гәбул етсәк, биз дә хејир-дуаланаҹағыг (Матта 24:45, 46; Һәвариләрин ишләри 3:22).
13. Јеһованын иззәти биринҹи әсрдә садә чобанлара неҹә ачылды?
13 Јеһованын еһтишамы кими шәфәгләндирмиш вә мәләк ‘Хиласкар олан Рәбб Мәсиһин’ доғулмасы һаггындакы хәбәри кимләрә вермишди? Һеч кәси бәјәнмәјән дин рәһбәрләринә вә јүксәквәзифәли шәхсләрә дејил, ‘ҝеҹә чөлдә өз сүрүләринин кешијини чәкән’ садә чобанлара (Лука 2:8-11). Бу инсанлар јахшы тәһсил алмамышдылар вә онларын ҝөрдүјү иш һөрмәтлә гаршыланмырды. Лакин Јеһова мәһз онлара диггәт јөнәлтмиш вә илк дәфә Мәсиһин доғулмасыны мәһз онлара билдирмишди. Бәли, Јеһова Өз иззәтини тәвазөкар вә Аллаһдан горхан инсанлара ачыр.
14. Аллаһ тәвазөкар адамлара неҹә хејир-дуа верир?
14 Бу нүмунәләр бизә нә өјрәдир? Онлар ҝөстәрир ки, Јеһова тәвазөкар инсанлара лүтф ҝөстәрир, онлара Өз нијјәтини ачыр вә онлара анлајыш верир. О, еһтимал ки, башгаларынын үмид етмәдији кәсләри сечир вә онлары Өз нүмајәндәләри кими истифадә едәрәк, иззәтли нијјәтини онларын васитәси илә ачыр. Буну дәрк етмәјимиз бизи, рәһбәрлик үчүн бундан сонра да Јеһоваја, Онун пејғәмбәрлик Кәламына вә тәшкилатына мүраҹиәт етмәјә тәшвиг етмәлидир. Шүбһә етмәмәк олар ки, Јеһова Өз иззәтли нијјәти илә бағлы олан јени тәфсилатлары тәвазөкар хидмәтчиләринә бәјан едәҹәк. Амос пејғәмбәр бәјан етмишдир: “Рәбб Јеһова пејғәмбәр гулларына сиррини ачмајынҹа бир шеј етмәз” (Амос 3:7).
Тәвазөкарлығы инкишаф етдир вә Аллаһын лүтфүнә саһиб ол
15. Нәјә ҝөрә тәвазөкар олараг галмаг үчүн сә’ј тәләб олунур вә буну Исраил падшаһы Саулун нүмунәсиндән неҹә ҝөрмәк олар?
15 Аллаһын лүтфүндән мәһрум олмамаг үчүн, тәвазөкар галмаг зәруридир. Әҝәр инсан тәвазөкардырса, бу о демәк дејил ки, һәмишә тәвазөкар олараг галаҹаг. Еһтимал вар ки, инсан тәвазөкарлығыны итириб, мәғрурлуға вә шөһрәтпәрәстлијә гапыла биләр, бу исә өзүнә ҝүвәнмәјә вә һәлака ҝәтириб чыхарар. Исраилин илк мәсһ едилмиш падшаһы Саул мәһз бу ҹүр давранды. Ону падшаһ сечәндә, о, “өз ҝөзүндә кичик” иди (1 Самуел 15:17). Лакин ҹәми ики ил һөкмранлыг етдикдән сонра, о өзүнә архајын сурәтдә давранды. О, Јеһованын Самуел тәрәфиндән гурбан ҝәтирмәк гурулушуна е’тинасыз јанашды вә өзбашына һәрәкәтинә бәраәт газандырды (1 Самуел 13:1, 8-14). Нөвбәти һадисәләрдән ајдын шәкилдә мүәјјән етмәк оларды ки, Саулун тәвазөкарлығы чатышмырды. Нәтиҹәдә о, Аллаһын руһуну вә лүтфүнү итирди, бу исә ону биабырчы өлүмә ҝәтириб чыхартды (1 Самуел 15:3-19, 26; 28:6; 31:4). Дәрс ајдындыр: биз тәвазөкар вә итаәткар олараг галмаг үчүн сә’ј ҝөстәрмәли, һәм дә Јеһованын наразылығына сәбәб ола биләҹәк өзүнә архајын давраныша мејл етмәкдән гачынмалыјыг.
16. Јеһова вә јахынларымызла мүнасибәтләримиз барәсиндә дүшүнмәјимиз бизә тәвазөкарлыг тәзаһүр етдирмәкдә неҹә көмәк едир?
16 Тәвазөкарлыг Аллаһын руһунун сәмәрәсинә дахил олмаса да, бу кејфијјәт Аллаһа хасдыр вә ону инкишаф етдирмәк лазымдыр (Галатијалылара 5:22, 23; Колослулара 3:10, 12). Бу кејфијјәт бизим ағлымызын вәзијјәти илә — өзүмүз вә башгалары һаггында һансы фикирдә олмағымызла бағлы олдуғу үчүн, ону инкишаф етдирмәк дүшүнҹәли сә’јләр тәләб едир. Тәвазөкар олараг галмагда бизә, Јеһова вә јахынларымызла олан мүнасибәтләримиз барәсиндә дүшүнмәк көмәк едәр. Гејри-камил олан бүтүн варлыглар Аллаһын ҝөзүндә бир мүддәт бөјүјән, сонра исә солуб гурујан от кимидирләр. Инсанлар тарладакы чәјирткәләр кимидирләр (Ишаја 40:6, 7, 22). Башга отлардан бир гәдәр һүндүр олан отун гүррәләнмәјә әсасы вармы? Вә јахуд башга һәшәратлардан бир аз ҹәлд уча билдији үчүн чәјирткә өз мәһарәти илә өјүнә биләрми? Бу барәдә дүшүнмәк һәтта ҝүлүнҹдүр. Белә јердә һәвари Павел өз һәмиманлыларына хатырладырды: “Сәни ким үстүн тутур? Алмадығын нәјин вар? Әҝәр алдынса, нә үчүн алмамыш кими өјүнүрсән?” (1 Коринфлиләрә 4:7). Мүгәддәс Китабын бу ҹүр ајәләри үзәриндә дүшүнмәјимиз бизә тәвазөкарлығы инкишаф вә тәзаһүр етдирмәјә көмәк едәҹәк.
17. Тәвазөкарлығы инкишаф етдирмәкдә Даниелә нә көмәк едирди вә бунда бизә нә көмәк едәр?
17 Ибрани пејғәмбәри Даниелин нүмунәсини нәзәрдән кечирәк. О, ‘өзүнү алчалтдығы’, јә’ни тәвазөкар олдуғу үчүн Аллаһ тәрәфиндән “севилмиш олан адам” иди (Даниел 10:11, 12). Тәвазөкарлығы инкишаф етдирмәкдә Даниелә нә көмәк едирди? Ән биринҹиси, о, даима дуада Јеһоваја мүраҹиәт едәрәк, сарсылмадан Она ҝүвәнирди (Даниел 6:10, 11). Бундан әлавә, Даниел дүзҝүн мејлләрдән ирәли ҝәләрәк Аллаһын Кәламыны сә’јлә өјрәнирди ки, бу да она нәзәрини Аллаһын иззәтли нијјәтинә ҹәмләшдирмәјә көмәк едирди. Һәм дә, о јалныз өз халгынын дејил, шәхси гүсурларыны да һазырлыгла е’тираф едирди. Бир дә ки, о бүтүн гүввәси илә өзүнүн дејил, Аллаһын салеһлијини ирәли сүрмәјә чалышырды (Даниел 9:2, 5, 7). Тәвазөкарлығы инкишаф етдирәрәк вә ону һәјатымызын бүтүн саһәләриндә тәзаһүр етдирәрәк биз Даниелин ҝөзәл нүмунәсини тәглид едә биләрикми?
18. Бу ҝүн тәвазөкарлыг ҝөстәрәнләри һансы иззәт ҝөзләјир?
18 Сүлејманын мәсәлләри 22:4 ајәсиндә дејилир: “Тәвазөкар олмағын вә Рәбб горхусунун сону сәрвәт, иззәт вә һәјатдыр”. Јеһова тәвазөкар инсанлара лүтф ҝөстәрир, онлара иззәт вә һәјат бәхш едир. Мәзмурчу Асаф аз гала ки, Јеһоваја хидмәтини дајандыраҹагды, лакин Јеһова онун дүшүнҹә тәрзинә дүзәлиш вердикдән сонра о, тәвазөкарлыгла е’тираф етди: “Өјүдүнлә мәнә јол ҝөстәрәрсән вә сонра мәни иззәтлә аларсан” (Мәзмур 73:24). Бәс бу ҝүн? Тәвазөкарлыг ҝөстәрәнләри һансы иззәт ҝөзләјир? Бу ҹүр инсанлар хејир-дуа олараг Јеһова илә јахын мүнасибәтләр әлдә етмәкдән вә Онун лүтфүнә малик олмагдан әлавә, Давуд падшаһын илһамланмыш сөзләринин иҹрасыны да ҝөрә биләрләр: “Һәлимләр дүнјаны мирас алаҹаглар вә сүлһ боллуғунда ләззәт тапаҹаглар” Һәгигәтән дә иззәтли ҝәләҹәкдир! (Мәзмур 37:11).
Хатырлајырсынызмы?
• Нәјә ҝөрә демәк олар ки, Стефан Јеһованын Өз иззәтини ачдығы тәвазөкар адамын нүмунәси иди?
• Јеһова Аллаһ һансы саһәләрдә тәвазөкарлыг ҝөстәрир?
• Јеһованын Өз иззәтини тәвазөкар адамлара ачдығы һансы нүмунәләрдән ҝөрүнүр?
• Даниелин нүмунәси тәвазөкарлығы инкишаф етдирмәкдә бизә неҹә көмәк едир?
[22-ҹи сәһифәдәки чәрчивә]
Гәтијјәтли, лакин тәвазөкар
Мүгәддәс Китабын Тәдгигатчыларынын (бу ҝүн Јеһованын Шаһидләри кими танынырлар), 1919-ҹу илдә Сидар Поинтдә (АБШ, Оһајо штаты) кечирилән конгресиндә, о заманлар үмумдүнја тәблиғ ишинә башчылыг едән 50 јашлы Ж. Ф. Рутерфорд конгресә ҝәлән нүмајәндәләрин јүкләрини дашымаға көмәк едәрәк вә онлары отагларына өтүрәрәк, онлара һәвәслә гуллуг ҝөстәрирди. Конгресин ахырынҹы ҝүнү о, 7 000 иштиракчыны бу сөзләрлә руһландырды: “Сиз Рәббимизин иззәтли Падшаһлығыны... инсанлара е’лан едән... шаһларын Шаһы вә рәбләрин Рәббинин сәфирләрисиниз”. Рутерфорд гардаш гәти фикирли адам олуб, чох бөјүк әминликлә данышса вә һәгигәт сајдығы шејә мүнасибәтдә ҝүзәштә ҝетмәсә дә, Аллаһын гаршысында әсл тәвазөкарлыг ҝөстәрирди. Буну онун Бејт-Елдә сәһәр ибадәти заманы сөјләдији дуаларда тез-тез мүшаһидә етмәк оларды.
[19-ҹу сәһифәдәки шәкил]
Јазылардан јахшы мә’луматлы олан Стефан тәвазөкарлыгла гида пајлајырды.
[20-ҹи сәһифәдәки шәкил]
Манассенин тәвазөкарлығы Јеһоваја мәгбул иди.
[22-ҹи сәһифәдәки шәкил]
Нәјә ҝөрә Даниел Аллаһ тәрәфиндән “севилмиш олан адам” иди?