Сәбәбсиз нифрәт едиләнләр

“Мәнә сәбәбсиз нифрәт етдиләр” (ЈӘҺЈА 15:25).

1, 2. а) Мәсиһчиләри писләјәндә, нәјә ҝөрә бә’зиләри чашгынлыг ичиндә галырлар, лакин бу ҹүр һүҹумлар бизи нәјә ҝөрә тәәҹҹүбләндирмәмәлидир? б) “Нифрәт” сөзү бу мәгаләдә һансы мә’нада нәзәрдән кечирилир? (Һашијәјә бахын.)

ЈЕҺОВАНЫН ШАҺИДЛӘРИ Аллаһын Кәламынын принсипләри әсасында јашамаға чалышырлар. Бунун сајәсиндә онлар бир чох өлкәләрдә ҝөзәл ад газаныблар. Лакин бә’зән онлар һаггында тәһриф олунмуш мә’луматлар јајырлар. Мәсәлән, Санкт-Петербург шәһәринин бир мә’муру демишдир: “Јеһованын Шаһидләрини бизә ҝизли, үзвләри амансыз сурәтдә ушаглары гәтлә јетирән вә өзләрини өлдүрән, гаранлыгда отуран бир тәригәт кими тәгдим етмишдиләр”. Лакин иши илә әлагәдар бејнәлхалг конгрес заманы Јеһованын Шаһидләри илә тәмасда оландан сонра һәмән мә’мур гејд етмишдир: “Гаршымда нормал, үзләриндә тәбәссүм олан инсанлары ҝөрүрәм... Онлар сүлһпәрвәр вә динҹ инсанлардырлар, бир-бирләрини чох севирләр”. О әлавә етмишдир: “Доғрусу, инсанларын онлар һаггында бу ҹүр јалан данышмаларынын сәбәбини баша дүшмүрәм” (1 Петер 3:16).

² Аллаһын хидмәтчиләри, пис инсанлар кими гәләмә верилмәкдән зөвг алмырлар, анҹаг бу ҹүр бөһтанлар онлары тәәҹҹүбләндирмир. Иса өз давамчыларыны хәбәрдар етмишдир: “Әҝәр дүнја сизә нифрәт едәрсә, билин ки, сиздән әввәл Мәнә нифрәт етмишдир. [...] ...Онларын ганунларында јазылмыш олан: “Мәнә сәбәбсиз нифрәт етдиләр” сөзү јеринә јетсин дејә бу олду”a (Јәһја 15:18-20, 25; Мәзмур 35:19; 69:4). О, бир гәдәр әввәл өз шаҝирдләринә демишдир: “Әҝәр ев саһибинә Баал-Зевул дедиләрсә, онун аилә үзвләринә даһа артыг дејәҹәкләр!” (Матта 10:25). Мәсиһчиләр баша дүшүрләр ки, бу ҹүр тәһгирләр онларын өз үзәринә ҝөтүрдүкләри “чармыхын”, јә’ни ишҝәнҹә дирәјинин әсас һиссәсидир (Матта 16:24).

3. Аллаһын һәгиги хидмәтчиләри нә дәрәҹәдә тә’гиб олунур?

³ Аллаһын һәгиги хидмәтчиләринин тә’гиб олунмасы гәдим тарихә маликдир ки, бу да өз башланғыҹыны “салеһ олан Һабилин” вахтындан ҝөтүрүр (Матта 23:34, 35). Бу јалныз бир нечә мүхтәлиф һадисәләрлә мәһдудлашмыр. Иса сөјләди ки, давамчыларына онун адына ҝөрә “һамы... нифрәт едәҹәк” (Матта 10:22). Бундан әлавә, һәвари Павелин гејд етдији кими, Аллаһын бүтүн хидмәтчиләри тә’гиб олунаҹагларыны ҝөзләмәлидирләр (2 Тимотејә 3:12). Буна сәбәб нәдир?

Сәбәбсиз нифрәтин архасында дуран кимдир?

4. Бүтүн сәбәбсиз нифрәтләрин архасында дуранын ким олдуғуну Мүгәддәс Китаб неҹә ҝөстәрир?

⁴ Аллаһын Кәламы хәбәр верир ки, артыг лап башланғыҹдан тә’гибләрин архасында ҝөзәҝөрүнмәз тәһрикчи дурур. Илк иман әри олан Һабилин, гардашы Габилин әли илә амансызҹасына өлдүрүлдүјүнү јада салаг. Мүгәддәс Китабда дејилир ки, ону өлдүрән Габил “шәрирдән”, Шејтан Иблисдән иди (1 Јәһја 3:12). Габил Шејтанын руһуну әкс етдирирди, Иблис дә бу адамы өз натәмиз мәгсәдләриндә истифадә едирди. Мүгәддәс Китаб һәмчинин Шејтанын Ејуба вә Иса Мәсиһә гаршы төрәдилән амансыз һүҹумлардакы ролуну да ишыгландырыр (Ејуб 1:12; 2:6, 7; Јәһја 8:37, 44; 13:27). “Вәһј” китабы Исанын шаҝирдләринин тә’гибләринин архасында дуран шәхсин кимлијинә даир бүтүн шүбһәләри арадан галдырыр: “Иблис сизләрдән бә’зиләрини зиндана атаҹаг ки, имтаһан олунасыныз” (Вәһј 2:10). Бәли, Аллаһын халгынын туш ҝәлдији сәбәбсиз нифрәтләрин архасында дуран Шејтандыр.

5. Шејтан Аллаһын һәгиги хидмәтчиләринә нәјә ҝөрә нифрәт едир?

⁵ Шејтан Аллаһын һәгиги хидмәтчиләринә нәјә ҝөрә нифрәт едир? О, өзүнүн гејри-ади мәғрурлуғуну ифадә едән план тәртиб едәрәк әсрләрин Падшаһынын, Јеһова Аллаһын әлејһинә чыхды (1 Тимотејә 1:17; 3:6). О бәјан едир ки, Аллаһ јаратдығы варлыгларын азадлығыны мәһдудлашдырыр вә инсанларын һамысы Јеһоваја тәмиз үрәкдән дејил, лакин шәхси мәнафеләри үчүн хидмәт едирләр. Шејтан иддиа едир ки, онун инсанлары сынаға чәкмәк имканы олсајды, һәр бир кәси Аллаһа хидмәтдән узаглашдыра биләрди (Тәквин 3:1-6; Ејуб 1:6-12; 2:1-7). Шејтан Јеһоваја зүлмкарлыг, јаланчылыг вә мүвәффәгијјәтсизлик кими кејфијјәтләр аид едәрәк, сүбут етмәјә чалышыр ки, о өзү Каинатын јахшы һөкмдары ола биләрди. Беләликлә, Шејтанын Аллаһын хидмәтчиләринә гаршы гәзәби онун еһтираслы арзусу илә бағлыдыр ки, она ибадәт етсинләр (Матта 4:8, 9).

6. а) Јеһованын һөкмранлығы һаггындакы суалын бизләрдән һәр биримизә неҹә аидијјаты вар? б) Бу суалы баша дүшмәк бизә Аллаһа садиглијимизи горујуб сахламагда неҹә көмәк едир? (12-ҹи сәһифәдәки чәрчивәјә бахын.)

⁶ Бу суалын сәнин һәјатына неҹә аидијјаты олдуғуну ҝөрүрсәнми? Јеһованын хидмәтчиси кими, сән јәгин әмин олмусан ки, Аллаһын ирадәсини јеринә јетирмәк бөјүк сә’јләр тәләб етсә дә, бол хејир-дуалар ҝәтирир. Бәс әҝәр јаранмыш шәраитләр уҹбатындан Јеһованын ганун вә принсипләринә риајәт етмәк сәнә чәтин вә ја һәтта ағыр олса неҹә? Вә әҝәр бүтүн сә’јләринин әбәс олдуғуну зәнн етсән неҹә? Јеһоваја бундан сонра хидмәт етмәјин һеч бир әһәмијјәти олмадығы нәтиҹәсинә ҝәләҹәксәнми? Јохса Јеһоваја олан мәһәббәт вә Онун ҝөзәл хүсусијјәтләринә ҝөрә олан дәрин миннәтдарлыг сәни Онун бүтүн јоллары илә јеримәјә бундан сонра да тәшвиг едәҹәк? (Тәснијә 10:12, 13). Јеһова Шејтанын гаршымызда чәтинликләр јаратмасына јол вермәклә, бизләрдән һәр биримизә Шејтанын галдырдығы суала шәхсән ҹаваб вермәк имканы јарадыр (Сүлејманын мәсәлләри 27:11).

‘Инсанлар сизи тәһгир едәҹәкләри заман’

7. Бизи Јеһовадан узаглашдырмаг үчүн, Иблис һансы фәнддән истифадә едир?

⁷ Мүбаһисәли суалда өз дүзҝүнлүјүнү сүбут етмәк үчүн Шејтанын истифадә етдији һијләҝәрликләрдән бирини әтрафлы нәзәрдән кечирәк. Сөһбәт јалана әсасланан тәһгирдән ҝедир. Иса Шејтаны “јаланын атасы” адландырды (Јәһја 8:44). “Бөһтанчы” мә’насыны дашыјан вә тәсвири формада ишләнән “Иблис” ады, Иблиси Аллаһын, Онун фајдалы кәламынын вә мүгәддәс адынын баш бөһтанчысы кими гәләмә верир. Јеһованын һөкмранлығыны шүбһә алтына салараг, Иблис кинајәләрә, әсассыз иттиһамлара вә ачыг јалана әл атыр; ејни фәнди о, Аллаһын садиг хидмәтчиләрини ләкәләмәк үчүн дә истифадә едир. Шаһидләри тәһгирләрә гәрг едәрәк, о, сәрт сынаглары онлар үчүн даһа да чәтинләшдирә биләр.

8. Шејтан Ејубу тәһгирләрә неҹә дүчар едирди вә бу Ејуба неҹә тә’сир ҝөстәрирди?

⁸ Ады “дүшмәнҹәсинә тә’гиб олунан” мә’насыны дашыјан Ејубун башына ҝәләнләри хатырлајаг. Шејтан Ејубу әмлакындан, ушагларындан вә сағламлығындан мәһрум етмәкдән әлавә, һәм дә ҝуја Ејубу Аллаһ ҹәзаландырырмыш кими ону ҝүнаһкар тимсалында гәләмә верир. Һәмин вахта гәдәр Ејуб бөјүк һөрмәтә саһиби олса да, она һәтта гоһумлары вә јахын достлары белә нифрәт етмәјә башлајырлар (Ејуб 19:13-19; 29:1, 2, 7-11). Сонра јаланчы тәсәлли верәнләрин васитәсилә Шејтан Ејубун ‘ҹаныны үзмәјә’ башлады: әввәлҹә Ејубун ҝуја ки, ағыр ҝүнаһ ишләтдијинә даир сөз дүшдү, сонра исә ону ганунсуз адам кими бирбаша иттиһам етдиләр (Ејуб 4:6-9; 19:2; 22:5-10). Бунлар Ејуба неҹә дә ҹансыхыҹы тә’сир ҝөстәрирди!

9. Шејтан неҹә чалышырды ки, Исаны ҝүнаһкар кими гәләмә версин?

⁹ Шејтан ән бөјүк дүшмәнчилији Аллаһын Оғлуна — Јеһованын һөкмранлығынын баш мүдафиәчисинә мүнасибәтдә ҝөстәрмишдир. Иса јер үзүнә ҝәләндә, Шејтан Ејуба етдији кими, ону да ҝүнаһкар кими гәләмә верәрәк ләкәләмәјә чалышырды (Ишаја 53:2-4; Јәһја 9:24). Инсанлар Исаны шәраб дүшкүнү вә гарынгулу адландырыр вә дејирдиләр ки, “Онда ҹин вар” (Матта 11:18, 19; Јәһја 7:20; 8:48; 10:20). Ону јаландан күфр данышмагда иттиһам едирдиләр (Матта 9:2, 3; 26:63-66; Јәһја 10:33-36). Бу Исаја гәлб ағрысы ҝәтирирди, белә ки, о, бу ҹүр давранышларын онун Атасынын үнванына әдаләтсиз иттиһамлар ҝәтирдијини билирди (Лука 22:41-44). Нәтиҹәдә Исаны лә’нәтләнмиш ҹинајәткар кими ишҝәнҹә дирәјинә мисмарладылар (Матта 27:38-44). Камил нөгсансызлығыны горујуб сахлајараг Иса “ҝүнаһкарлар тәрәфиндән... олан... мүхалифәтә” таб ҝәтирди (Ибраниләрә 12:2, 3).

10. Бизим ҝүнләрдә мәсһ едилмиш мәсиһчиләрин галығы Шејтанын һансы һүҹумларына туш ҝәлир?

¹⁰ Бизим ҝүнләрдә Мәсиһин јер үзүндә галан мәсһ едилмиш давамчылары да Иблисин дүшмәнчилик мүнасибәтинә туш ҝәлирләр. Шејтан — Мәсиһин гардашларынын “иттиһамчысы, онлары Аллаһымызын өнүндә ҝеҹә вә ҝүндүз иттиһам едән” кими тәсвир едилир (Вәһј 12:9, 10). Ҝөјдән атылан вә јерин һүдудлары илә мәһдудлашан Шејтан Мәсиһин гардашларыны лә’нәтләнмиш “төр-төкүнтү”ләр кими танытмаг үчүн даһа чох сә’ј ҝөстәрмәјә башлады (1 Коринфлиләрә 4:13). Бә’зи өлкәләрдә биринҹи әсрин мәсиһчиләри илә олдуғу кими, онларын үзәринә дә тәһлүкәли “тәригәт” дамғасы вурурлар (Һәвариләрин ишләри 24:5, 14; 28:22). Башланғыҹда гејд олундуғу кими, онлар һаггында јалан мә’луматлар јајырлар. Лакин јенә дә, һәмкарлары олан “башга гојунлар” тәрәфиндән дәстәкләнән Мәсиһин мәсһ едилмиш гардашлары “шәрәф вә шәрәфсизликлә, мәзәммәт вә тә’рифлә” “Аллаһын әмрләринә риајәт едиб, Исаја олан шәһадәтләрини” тәвазөкарлыгла давам етдирмәјә чалышырлар (Јәһја 10:16; 2 Коринфлиләрә 6:8; Вәһј 12:17).

11, 12. а) Бә’зән мәсиһчиләрин тәһгир олунмаларынын сәбәби нә ола биләр? б) Мәсиһчи өз иманындан өтрү һансы һалларда әдаләтсиз олараг әзијјәт чәкә биләр?

¹¹ Еһтимал ки, Аллаһын ајры-ајры хидмәтчиләринин јашадыглары тәһгирләрин һамысы “салеһлик уғрунда” дејил (Матта 5:10). Чәтинликләрин бә’зиләри бизим гејри-камиллијимизин нәтиҹәси ола биләр. ‘Әҝәр ҝүнаһ ишләдиб, дөјүләриксә’, бу бизә һеч бир хүсуси шәрәф ҝәтирмәз. Лакин әҝәр мәсиһчи “Аллаһ гаршысындакы виҹдан наминә, һагсыз олараг изтираб чәкиб, әзијјәтә гатлашарса”, бу Јеһованын ҝөзүндә мәгбулдур (1 Петер 2:19, 20). Белә һаллар һансы шәраитләрдә баш верә биләр?

¹² Ким исә Мүгәддәс Китаба аид олмајан дәфн ән’әнәләринә риајәт етмәкдән имтина етдији үчүн сәрт мүнасибәтләрлә гаршылашыр (Тәснијә 14:1). Ҝәнҹ Шаһидләри Јеһованын әхлаг нормаларына риајәт етдикләри үчүн һәмишә тәһгир едирләр (1 Петер 4:4). Бә’зи мәсиһчиләр өз ушагларыны ган истифадә едилмәдән мүалиҹә етмәји хаһиш етдикләринә ҝөрә, онлары әдаләтсиз олараг ушаглары илә “башысојуг” вә ја “сәрт” давранышда ҝүнаһландырырлар (Һәвариләрин ишләри 15:29). Диҝәр баҹы-гардашларымызла, онлар садәҹә Јеһованын хидмәтчиләри олдуглары үчүн гоһумлары вә гоншулары үнсијјәт етмәкдән имтина едирләр (Матта 10:34-37). Онларын һамысы һагсыз олараг әзијјәт чәкән пејғәмбәрләрин вә Исанын өзүнүн нүмунәсини тәглид едирләр (Матта 5:11, 12; Јагуб 5:10; 1 Петер 2:21).

Тәһгирләрә неҹә таб ҝәтирмәли?

13. Иманымыза ҝөрә бизи бәрк тәһгир етмәјә башлајанда руһани таразлығымызы горујуб сахламагда бизә нә көмәк едәр?

¹³ Иманымыза ҝөрә бизи бәрк тәһгир етмәјә башлајанда, Јеремја пејғәмбәрин башына ҝәлдији кими, биз дә руһдан дүшә вә артыг Аллаһа хидмәт едә билмәдијимизи дүшүнә биләрик (Јеремја 20:7-9). Бизә руһани таразлығымызы горујуб сахламагда нә көмәк едә биләр? Вәзијјәтә Јеһованын нөгтеји-нәзәри илә бахмаға чалыш. Сынаглар заманы садиглијини горујуб сахлајанлар Онун нөгтеји-нәзәринҹә гурбанлар дејил, галибләрдир (Ромалылара 8:37). Иблис тәрәфиндән һансы тәһгирләрә мә’руз галсалар да, Јеһованын һөкмранлығыны мүдафиә едәнләри, мәсәлән, Һабили, Ејубу, Исанын анасы Мәрјәми вә гәдим дөврүн, һәмчинин бизим ҝүнләрин башга садиг хидмәтчиләрини хәјалән тәсвир етмәјә чалыш (Ибраниләрә 11:35-37; 12:1). Онларын өз садигликләрини неҹә горујуб сахладыгларынын үзәриндә дүшүн. Аллаһын садиг хидмәтчиләринин бу шаһидләр булуду бизи, онларла јанашы, өз иманлары илә дүнјаја галиб ҝәләнләр үчүн ајрылмыш јердә дурмаға дә’вәт едирләр (1 Јәһја 5:4).

14. Садиг галмагда ҹошғун дуа бизә неҹә көмәк едә биләр?

¹⁴ Әҝәр үрәјимиздә ‘гајғылар чохалырса’, биз ҹошғун дуада Јеһоваја мүраҹиәт едә биләрик, О да бизә тәсәлли верәр вә бизи мөһкәмләндирәр (Мәзмур 50:15; 94:19). Сынаглара таб ҝәтирмәјимиз үчүн О бизә лазым олан мүдриклији верәҹәк, һәм дә фикримизи Онун хидмәтчиләринин сәбәбсиз нифрәт олунмаларына сәбәб кими хидмәт едән һөкмранлығынын ваҹиб мәсәләсинә ҹәмләшдирмәјә көмәк едәҹәк (Јагуб 1:5). Јеһова һәм дә бизә “Аллаһын һәр ҹүр ағылдан үстүн олан сүлһү”нү бәхш едә биләр (Филипилиләрә 4:6, 7). Аллаһын бәхш етдији раһатлыг һисси сајәсиндә биз һәтта ҝүҹлү тәзјиг алтында да сарсылмаз галырыг, һәм дә шүбһәләрә вә горхуја тәслим олмуруг. Јол вердији һәр бир сынаға мәтанәтлә таб ҝәтирмәјимиз үчүн Өз мүгәддәс руһу илә Јеһова бизә көмәк едә биләр (1 Коринфлиләрә 10:13).

15. Изтираблар заманы гәзәбләнмәмәкдә бизә нә көмәк едәр?

¹⁵ Бизә сәбәбсиз нифрәт едәнләрә гаршы гәзәбләнмәмәкдә нә көмәк едәр? Јадда сахла ки, бизим башлыҹа дүшмәнләримиз Шејтан вә ҹинләрдир (Ефеслиләрә 6:12). Ајры-ајры инсанлар бизи шүурлу шәкилдә вә биләрәкдән тә’гиб етсәләр дә, Аллаһын халгына гаршы дуранларын чоху буну билмәдән вә ја башгаларынын тә’сири алтында едирләр (Даниел 6:4-16; 1 Тимотејә 1:12, 13). Јеһова “бүтүн инсанлар”а “хилас олуб, һәгигәти дәрк етмәк” имканы вермәји арзулајыр (1 Тимотејә 2:4). Бизим нөгсансыз давранышымыздан тә’сирләнән бә’зи дүшмәнләр дә инди бизим мәсиһчи гардашларымыздыр (1 Петер 2:12). Бундан әлавә, Јагубун оғлу Јусифин нүмунәси ибрәтамиз ола биләр. Јусиф гардашларына ҝөрә чох әзијјәт чәксә дә, онлара гаршы кин сахламады. Нәјә ҝөрә? Чүнки о, баш верән һадисәләрдә Јеһованын әлинин олдуғуну ҝөрдү вә баша дүшдү ки, Аллаһ Өз нијјәтини јеринә јетирәрәк, һадисәләри идарә едир (Тәквин 45:4-8). Јеһова елә едә биләр ки, бизим дә әдаләтсиз изтирабларымыз Онун адынын иззәтләнмәси илә нәтиҹәләнсин (1 Петер 4:16).

16, 17. Дүшмәнләр тәблиғ ишинә мане олмаға чалышанда нәјә ҝөрә нараһат олмаг лазым дејил?

¹⁶ Әҝәр бә’зән бизә елә ҝәлсә ки, дүшмәнләр хош хәбәрин јајылмасына мане олмаға мүвәффәг олурлар, һәддиндән артыг нараһат олмаг лазым дејил. Јеһова һал-һазырда халглары үмумдүнја шаһидлијинин васитәсилә силкәләјир вә “дәјәрли шејләр” Онун јанына ҝәлир (Һаггај 2:7). Јахшы Чобан Иса Мәсиһ демишдир: “Гојунларым сәсимә гулаг асырлар, Мән дә онлары таныјырам, вә ардымҹа ҝәлирләр; Мән онлара әбәди һәјат верирәм... вә кимсә онлары әлимдән оғурлаја билмәз” (Јәһја 10:27-29). Бөјүк руһани бичиндә мүгәддәс мәләкләр дә иштирак едирләр (Матта 13:39, 41; Вәһј 14:6, 7). Бүтүн бунлары нәзәрә алараг, дүшмәнләрин һеч бир сөзләри вә һеч бир әмәлләри Аллаһын нијјәтинин јеринә јетмәсинә мане ола билмәјәҹәк (Ишаја 54:17; Һәвариләрин ишләри 5:38, 39).

¹⁷ Чох вахт дүшмәнләрин сә’јләри әкс нәтиҹә верир. Африкада бир әразидә Јеһованын Шаһидләри һаггында чохлу дәһшәтли, о ҹүмләдән онларын Иблисин хидмәтчиләри олдуғуна даир шајиәләр јајырдылар. Буна ҝөрә дә, Грејс адлы бир гадынын јанына Шаһидләр ҝәләндә, о һәмишә евин архасында ҝизләнирди. Бир дәфә Грејсин мәхсус олдуғу килсәнин кешиши әлиндә бизим нәшрләрдән бирини тутараг орада иштирак едәнләрин һамысына ону охумағы гадаған етди, чүнки бу әдәбијјат онлары имандан узаглашдыра биләрди. Бу, Грејсдә мараг ојатды. Нөвбәти дәфә Шаһидләр ҝәләндә о ҝизләнмәди, әксинә онларла сөһбәт етди вә һәмин нәшрин бир нүсхәсини алды. Мүгәддәс Китаб өјрәнмәси башланды вә о, 1996-ҹы илдә вәфтиз олунду. Инди исә Грејс, еһтимал ки, Јеһованын Шаһидләринин фәалијјәтинә даир јалана ујмуш инсанлары ахтарыр.

Иманыны индидән мөһкәмләндир

18. Ҹидди сынаглар башланмаздан әввәл иманы мөһкәмләндирмәк нәјә ҝөрә ваҹибдир вә биз буну неҹә едә биләрик?

¹⁸ Шејтан истәнилән ан үзәримизә сәбәбсиз нифрәт јағдыра билдији үчүн, иманы индидән мөһкәмләндирмәк чох ваҹибдир. Буну неҹә едә биләрик? Јеһованын халгынын тә’гибләрә мә’руз галдығы бир өлкәдән ҝөндәрилән мә’луматда дејилирди: “Бир шеј тамамилә ајдын олду: кимин јахшы руһани вәрдишләри вә Мүгәддәс Китаб һәгигәтинә ҝөрә миннәтдарлыг һисси варса, һәмин кәсләр сынаглара асанлыгла таб ҝәтирир. Әлверишли вахтда ҝөрүшләри бураханлар, мүнтәзәм тәблиғ етмәјәнләр вә кичик шејләрдә ҝүзәштә ҝедәнләр исә чох вахт “одла” сынаға таб ҝәтирмирләр” (2 Тимотејә 4:2). Әҝәр сән нәдә исә јахшылашмағын зәрурилијини ҝөрүрсәнсә, буну етмәји ләнҝитмә вә дүзәлмәјә тәләс (Мәзмур 119:60).

19. Әсассыз нифрәт шәраитиндә Аллаһын хидмәтчиләринин сарсылмазлығы вә садиглији сајәсиндә нәјә наил олунур?

¹⁹ Шејтанын сәрт нифрәтинә бахмајараг, сарсылмазлыгларыны горујуб сахлајан Јеһованын садиг хидмәтчиләри Онун һөкмранлығынын доғрулуғуна, әдаләтлијинә вә гануни олдуғуна ҹанлы сүбутдур. Онларын садиглији Аллаһын үрәјини севиндирир. Инсанлар онлары тәһгирләрә мә’руз гојсалар да, јердән вә ҝөјдән уҹа олан Кәс “Өзүнү онларын Аллаһы адландырмагдан утанмыр”. Бу ҹүр бүтүн садиг хидмәтчиләр барәсиндә һаглы олараг демәк олар: “Дүнја онлара лајиг дејилди” (Ибраниләрә 11:16, 38).

[Һашијә]

Изаһ едә биләрсинизми?

• Аллаһын һәгиги хидмәтчиләринин сәбәбсиз олараг тә’гиб олунмаларынын архасында нә дурур?

• Ејубун вә Исанын нөгсансызлығыны гырмаға чалышараг, Шејтан онлары неҹә тәһгир едирди?

• Шејтанын төрәтдији нифрәт долу шәраитә таб ҝәтирмәк үчүн Јеһова бизә гүввәни неҹә верир?

[12-ҹи сәһифәдәки чәрчивә/шәкил]

Онлар ваҹиб мәсәләни дәрк едирдиләр

Падшаһлыг һаггындакы тәблиғ иши 50 илдән артыг гадаға алтында олан Украјна шәһәриндән Јеһованын бир Шаһиди изаһ етди: “ССРИ-дә Јеһованын Шаһидләринин дүшдүјү шәраитә јалныз инсан нөгтеји-нәзәриндән бахмаг лазым дејил. [...] Мә’мурларын чоху садәҹә олараг өз вәзифәләрини јеринә јетирирдиләр. Һакимијјәт әвәз олунду, мә’мурлар да дәјишди, биз Јеһованын Шаһидләри исә неҹә вар идиксә, еләҹә дә галдыг. Мүгәддәс Китаб бу тә’гибләрин әслиндә һарадан ҝәлдијини ҝөрмәк үчүн бизим ҝөзләримизи ачды.

Биз өзүмүзә нәдәнсә мәһрум едилмиш гурбанлар кими бахмырдыг. Бүтүн бу чәтинликләрә таб ҝәтирмәкдә бизә Еден бағында галдырылан суалы — Аллаһын һөкмранлыг һүгугу һаггындакы суалы ајдын баша дүшмәјимиз көмәк етди. [...] Бизим мүбаһисәли суалда даир мөвгејимиз јалныз инсанларын марагларына дејил, Каинатын Һөкмдарынын да марагларына тә’сир едирди. Бу исә олдугҹа ваҹибдир. Бу бизә һәтта ән чәтин шәраитләрдә белә сарсылмазлығымызы горујуб сахламаг үчүн гүввә вә имканлар верирди”.

[Шәкил]

1970-ҹи илдә һәбс едилмиш Виктор Попович

[9-ҹу сәһифәдәки шәкил]

Исанын дүчар олдуғу тәһгирин архасында ким дурурду?

[11-ҹи сәһифәдәки шәкилләр]

Аллаһын Ејуб, Мәрјәм вә бизим ҝүнләрдәки Стенли Ҹонс кими хидмәтчиләри Јеһованын һөкмранлығыны дәстәкләјирдиләр.