Әр-арвадлар үчүн мүдрик нәсиһәтләр

«Гадынлар! Рәббә табе олур кими, әрләринизә табе олун. Әрләр, арвадларынызы севин» (ЕФЕСЛИЛӘРӘ 5:22, 25).

1. Никаһа даир дүзҝүн нөгтеји-нәзәр нәдән ибарәтдир?

ИСА демишдир ки, никаһ Аллаһын киши илә гадыны «бир бәдән» кими бирләшдирдији гурулушдур (Матта 19:5, 6). Аилә гуранлар мүхтәлиф характерли ики шәхсдир. Онлар үмуми мараглара јијәләниб, ејни мәгсәдләрә наил олмаг үчүн бирҝә чалышырлар. Никаһ, позулмасы асан олан мүвәггәти сазиш дејил, өмүрлүк иттифагдыр. Бир сыра өлкәләрдә бошанмаг чәтин олмаса да, мәсиһчиләрин ҝөзүндә никаһ телләри мүгәддәсдир. Бу телләрин гырылмасы үчүн ҹидди сәбәб олмалыдыр (Матта 19:9).

2. а) Әрлә арвад һансы көмәкдән јарарлана биләрләр? б) Никаһын мүвәффәгијјәтли олмасына ҹан атмаг нәјә ҝөрә ваҹибдир?

² Никаһ мәсәләләринә даир бир мәсләһәтчи дејир: «Мүвәффәгијјәтли никаһда әрлә арвад јени мәсәләләри һәлл едәркән, јаранан чәтинликләрин өһдәсиндән ҝәләркән вә һәјатын мүхтәлиф мәгамларында әлләри чатдыглары имканлардан истифадә едәркән онларын мүнасибәтләри дә даима инкишаф едир». Мәсиһчи әр-арвадын истифадә едә биләҹәји имканлара Мүгәддәс Китабын мүдрик нәсиһәтләри, һәм­иманлыларын дәстәк олмалары вә дуанын сајәсиндә Јеһова илә јахын мүнасибәтләр дахилдир. Әҝәр никаһ телләри мөһкәмдирсә, онда аилә дағылмыр вә илләрлә һәм әрә, һәм дә арвада севинҹ вә хошбәхтлик ҝәтирмәјә давам едир. Ән ваҹиби исә одур ки, белә никаһ аиләнин Баниси олан Јеһова Аллаһа иззәт ҝәтирир (Јарадылыш 2:18, 21-24; 1 Коринфлиләрә 10:31; Ефеслиләрә 3:14; 1 Салониклиләрә 5:17).

Мәсиһи вә онун јығынҹағыны тәглид един

3. а) Павелин никаһда олан мәсиһчиләрә вердији нәсиһәтин мәғзи нәдән ибарәтдир? б) Мәсиһ һансы ҝөзәл нүмунәни верди?

³ Ики мин ил бундан әввәл һәвари Павел никаһда олан мәсиһчиләрә мүдрик нәсиһәт вермишдир: «Ҹәмијјәт Мәсиһә табе олдуғу кими, арвадлар да һәр шејдә өз әрләринә табе олсунлар. Әрләр, арвадларынызы севин, неҹә ки, Мәсиһ дә иманлылар ҹәмијјәтини севди вә онун уғрунда Өзүнү фәда етди» (Ефеслиләрә 5:24, 25). Бу неҹә дә јахшы мүгајисәдир! Өз әрләринә тәвазөкарлыгла табе олан мәсиһчи гадынлар башчылыг принсипини гәбул едиб, она риајәт етмәклә јығынҹағы тәглид едирләр. Һәм хош, һәм дә чәтин анларда арвадларыны севмәјә давам едән иманлы әрләр исә, јығынҹағы севән вә онун гајғысына галан Мәсиһи тәглид етдикләрини ҝөстәрирләр.

4. Әрләр Исанын нүмунәсини неҹә тәглид едә биләрләр?

⁴ Әр аиләнин башчысыдыр, амма онун да башчысы вар: бу Исадыр (1 Коринфлиләрә 11:3). Мәсиһ јығынҹағын гајғысына галдығы кими, әрләр дә бөјүк гурбанлар вермәли олсалар белә, аиләләринин руһани вә физики тәләбатларынын гајғысына галырлар. Онлар үчүн аиләнин әмин-аманлығы шәхси истәк вә үстүн тутдуглары шејләрдән дә ваҹибдир. Иса деди: «Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Матта 7:12). Бу принсип аилә һәјатында хүсуси мә’на кәсб едир. Павел вурғулајырды: «Әрләр дә өз арвадларыны, өз бәдәнләри гәдәр севмәлидирләр. ...Һеч ким һеч заман өз бәдәнинә нифрәт етмәмишдир, лакин... ону једирир вә бәсләјир» (Ефеслиләрә 5:28, 29). Киши өзүнү једириб бәсләдији кими, арвадыны да ејни мәһәббәтлә једириб бәсләмәлидир.

5. Әрли гадынлар мәсиһчи јығынҹағыны неҹә тәглид едә биләрләр?

⁵ Аллаһ горхусуна малик гадынлар үчүн мәсиһчи јығынҹағы нүмунәдир. Иса јер үзүндә оларкән онун шаҝирдләри әввәлки мәшғулијјәтләриндән көнүллү сурәтдә имтина едиб, онун далынҹа ҝедирдиләр. Онлар Исанын өлүмүндән сонра да она табе олмагда идиләр вә будур, артыг 2 000 илдир ки, мәсиһчи јығынҹағы Мәсиһин табечилијиндә галыр вә һәр шејдә онун рәһбәрлијинә риајәт едир. Бунун кими мәсиһчи гадынлар да өз әрләринә һөрмәт едир вә никаһда Мүгәддәс Китаба әсасланан башчылыг принсипинин әһәмијјәтини азалтмырлар. Әксинә, онлар әрләринә көмәк едир, онлара дәстәк олур вә бунунла да итаәткарлыг ҝөстәрирләр. Әҝәр әр дә, арвад да бир-бирләринә олан мәһәббәти бу јолла тәзаһүр етдирирләрсә, онларын никаһы мүвәффәгијјәтли олуб һәр икисинә севинҹ ҝәтирәҹәкдир.

«Онлара һөрмәт ҝөстәрин»

6. Петер әрләрә һансы нәсиһәти верди вә бу нәјә ҝөрә ваҹибдир?

⁶ Һәвари Петерин дә мәктубунда әр-арвадлар үчүн нәсиһәтләр вар. О, бирбаша әрләрә мүраҹиәт едәрәк дејирди: «Еј әрләр, һәмчинин сиз дә [«билијә әсасланараг», ЈД] арвадларынызла илтифатлы давранын. Онлар зәиф ҹинс вә һәјат ән’амынын һәмварисләри олдугларындан онлара һөрмәт ҝөстәрин ки, дуаларыныза манечилик төрәдилмәсин» (1 Петер 3:7). Ајәнин сон сөзләрини нәзәрә алсаг, бу нәсиһәт ҹидди диггәтә лајигдир. Әҝәр әр арвадына һөрмәт ҝөстәрмәсә, бу, Јеһова илә олан мүнасибәтинә тә’сир едәҹәк вә онун дуалары ешидилмәјәҹәк.

7. Әрләр арвадларына неҹә һөрмәт ҝөстәрә биләрләр?

⁷ Белә исә, әрләр арвадларына неҹә һөрмәт ҝөстәрә биләрләр? Арвада һөрмәт ҝөстәрмәк онунла мүлајим давранмаг вә онун ләјагәтинә һөрмәт етмәк демәкдир. Чохлары үчүн арвады илә меһрибан давраныш, ола билсин ки, бир јенилик иди. Бир Мүгәддәс Китаб алими јазырды: «Рома ганунвериҹилијинә ҝөрә гадын һеч бир һүгуга малик дејилди. Ганун чәрчивәсиндә гадынын һүгугу ушағын һүгугундан һеч дә артыг дејилди. ...О, әринин там табечилији алтында иди вә әри онунла үрәји истәдији кими даврана биләрди». Бу, мәсиһчи јығынҹағында верилән тә’лимләрдән неҹә дә фәргләнирди! Мәсиһчи әр өз арвадына һөрмәт ҝөстәрирди. О, арвады илә истәдији кими јох, мәсиһчи принсипләринә әсасән давранырды. О, арвадынын «зәиф ҹинс» олдуғуну нәзәрә алараг, она «билијә әсасән» диггәт ҝөстәрирди.

«Зәиф ҹинс» нә демәкдир?

8, 9. Гадынлар һансы саһәләрдә кишиләрлә ејни сәвијјәдәдирләр?

⁸ Гадынын «зәиф ҹинс» олдуғуну дејәркән, Петер һеч дә гадынын кишидән әгли вә ја руһани ҹәһәтдән зәиф олдуғуну нәзәрдә тутмурду. Дүздүр, јығынҹагда бә’зи вәзифәләри анҹаг кишиләр иҹра едирләр вә аиләдә гадынлар әрләринә табе олурлар (1 Коринфлиләрә 14:35; 1 Тимотејә 2:12). Бунунла белә, кишиләр дә, гадынлар да ејни дәрәҹәдә иман вә тәһәммүл ҝөстәрмәли, һәмчинин јүксәк әхлаг нормаларына мүвафиг һәјат сүрмәлидирләр. Петерин дедији кими, һәм әр, һәм дә арвад «һәјат ән’амынын һәмварисләри»дирләр. О ки галды хиласа, Јеһова Аллаһ гадынла киши арасында һеч бир фәрг гојмур (Галатијалылара 3:28). Петер бу мәктубу биринҹи әсрдә јашамыш мәсһ едилмиш мәсиһчиләрә јазмышдыр. Демәли, онун сөзләри һәм мәсиһчи әрләрә, һәм дә онларын арвадларына Мәсиһин һәмварисләри кими ејни сәмави үмидә малик олдугларыны хатырладырды (Ромалылара 8:17). Елә бир ҝүн ҝәләҹәк ки, онлар Аллаһын сәмави Падшаһлығында падшаһ вә каһинләр кими хидмәт едәҹәкләр (Вәһј 5:10).

⁹ Јеһованын ҝөзүндә мәсһ едилмиш мәсиһчи гадынлар өзләринин мәсһ едилмиш әрләриндән гәтијјән ашағы сәвијјәдә дејилләр. Принсип е’тибарилә, ејни шеји јер үмидинә малик олан инсанлар һаггында да демәк олар. ‘Бөјүк издиһамдан’ олан киши вә гадынлар «либасларыны јујуб, онлары Гузунун ганы илә ағартдылар». Һәм кишиләр, һәм дә гадынлар бүтүн јер үзүндә «ҝеҹә–ҝүндүз» Јеһоваја һәмд едирләр (Вәһј 7:9, 10, 14, 15). Кишиләр дә, гадынлар да «Аллаһын өвладларынын иззәтли азадлығына» говушаҹаглары вә «һәгиги һәјат»дан ләззәт алаҹаглары дөврү севинҹлә ҝөзләјирләр (Ромалылара 8:21; 1 Тимотејә 6:19, И–93). Исанын бүтүн давамчылары истәр мәсһ едилмишләр, истәрсә дә «башга гојунлар» «тәк Чобан»ын рәһбәрлији алтында «тәк сүрү» кими Јеһоваја бирликдә хидмәт едирләр (Јәһја 10:16). Һәгигәтән дә, мәсиһчи аиләләриндә әрлә арвадын бир-бирләринә һөрмәт ҝөстәрмәләри үчүн әсаслы сәбәбләр вар.

10. Гадынлар һансы мә’нада ‘зәиф ҹинсдирләр’?

¹⁰ Бәс онда гадынлар һансы мә’нада ‘зәиф ҹинсдирләр’? Ола биләр ки, Петер гадынларын кишиләрдән даһа зәриф вә физики ҹәһәтдән зәиф олдугларыны нәзәрдә тутурду. Бундан әлавә, гејри-камиллијин уҹбатындан ушаг доғмаг кими ҝөзәл габилијјәт гадынын сәһһәтинә әһәмијјәтли дәрәҹәдә өз тә’сирини ҝөстәрир. Ушаг доғмаг јашында олан гадынлар вахташыры өзләрини нараһат һисс едә биләрләр. Бу әрәфәдә, һәмчинин һамиләлик вә доғуш дөврүндә гадынлар хүсуси гајғы вә анлајыша еһтијаҹ дујурлар. Әр арвадынын мә’нәви көмәјә еһтијаҹ дујдуғуну анлајараг она һөрмәт ҝөстәрирсә, белә аилә мүвәффәгијјәтли олаҹагдыр.

Дини ҹәһәтдән ајрылмыш аилә

11. Әҝәр әрлә арвад мүхтәлиф динә мәнсубдурларса, никаһ мүвәффәгијјәтли ола биләрми?

¹¹ Артыг никаһа дахил олдугдан сонра биринин Мүгәддәс Китаб һәгигәтини гәбул едиб, о биринин етмәдији үчүн әрлә арвад мүхтәлиф дини нөгтеји-нәзәрә малик оларларса, онда неҹә? Бу ҹүр аилә мүвәффәгијјәтли ола биләрми? Бир чох әр вә арвадын тәҹрүбәси ҝөстәрир ки, бу мүмкүндүр. Һәтта әрлә арвад мүхтәлиф динә мәнсуб олсалар да, никаһлары давамлы вә хошбәхт ола биләр. Бундан башга, онлар Јеһованын ҝөзүндә әр-арвад олараг, «бир бәдән» кими галырлар. Әҝәр иманларына шәрик олмајан һәјат јолдашлары бирликдә јашамаға разыдырларса, онда белә мәсиһчиләрә ајрылмамаг төвсијә олунур. Ушаглар үчүн дә ата вә аналарынын мәсиһчи иманы хејир-дуа олаҹагдыр (1 Коринфлиләрә 7:12-14).

12, 13. Петерин нәсиһәтинә риајәт едәрәк, мәсиһчи гадынлар иманларына шәрик олмајан әрләринә неҹә көмәк едә биләрләр?

¹² Дини ҹәһәтдән ајрылмыш аиләләрдә јашајан мәсиһчи гадынлара Петер мәһәббәт долу нәсиһәт вермишдир. Јери ҝәлмишкән, онун нәсиһәти ејни вәзијјәтдә олан мәсиһчи әрләрә дә аиддир. Петер јазырды: «Еј гадынлар, сиз дә ејни шәкилдә өз әрләринизә табе олун ки, бә’зиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр» (1 Петер 3:1, 2).

¹³ Арвад әринә өз е’тигадыны нәзакәтли сурәтдә изаһ етсә јахшы олар. Бәс әҝәр әр ону динләмәк истәмирсә, онда неҹә? Унутмаг олмаз ки, бу, әрин өз сечимидир. Лакин үмидсизлијә гапылмаг лазым дејил, чүнки мәсиһчи гадынын давранышы әринә сөзләрдән дә ҝүҹлү тә’сир бағышлаја биләр. Әввәлләр арвадларынын иманы илә марагланмајан вә һәтта мүгавимәт ҝөстәрән әрләрин бир чоху арвадларынын јахшы давранышыны мүшаһидә едәрәк, «әбәди һәјата мејлли оланлар» сырасына дахил олмушлар (Һәвариләрин ишләри 13:48, ЈД). Әр Мүгәддәс Китаб һәгигәтини гәбул етмәсә дә, арвадынын давранышы она ҝөзәл тәәсүрат бағышлаја биләр, бу исә никаһ телләрини мөһкәмләндирир. Арвады Јеһованын Шаһиди олан бир әр е’тираф етмишдир ки, һеч вахт Шаһидләрин јүксәк әхлаг нормаларына мүвафиг ола билмәз. Бунунла белә о, бир гәзетин редаксијасына јаздығы мәктубунда өзүнү «ҝөзәл гадынын хошбәхт әри» адландырмыш, арвадыны вә онун һәмиманлыларыны сәмими гәлбдән тә’рифләмишдир.

14. Әрләр иманларына шәрик олмајан арвадларына неҹә көмәк едә биләрләр?

¹⁴ Мәсиһчи әрләр дә, Петерин нәсиһәтини тәтбиг едәрәк, арвадларыны өз давранышлары илә ‘фәтһ едибләр’. Әрләринин иманына шәрик оламајан гадынлар онларын даһа мәс’улијјәтли олдугларыны, һәмчинин сигаретә, алкогола вә гумар ојунларына пул сәрф етмәдикләрини вә налајиг сөзләр истифадә етмәдикләрини ҝөрүбләр. Бу гадынлардан бә’зиләри мәсиһчи јығынҹағынын диҝәр үзвләри илә таныш олмушлар. Онлара мәсиһчи гардашлығынын мәһәббәти хош тәәсүрат бағышламыш вә јығынҹагда мүшаһидә етдикләри онлары Јеһова илә јахынлашдырмышдыр (Јәһја 13:34, 35).

«Ҝизли олан дахили варлыг»

15, 16. Әрини фәтһ етмәк үчүн мәсиһчи гадын неҹә давранмалыдыр?

¹⁵ Әрини фәтһ етмәк үчүн мәсиһчи гадын неҹә давранмалыдыр? Әсл мәсиһчи гадына хас олан тәрздә. Петер дејирди: «Гој сизин бәзәјиниз, сач һөрмә, гызыл тахма вә тәмтарагла ҝејинмә кими заһири шејләрдән ибарәт олмасын. Ҝизли олан дахили варлығыныз, һәлим вә сакит руһун фаниләшмәз ҝөзәллији илә сизин бәзәјиниз олсун. Бу, Аллаһын гаршысында чох гијмәтлидир. Чүнки гәдим заманларда Аллаһа үмид бәсләјән мүгәддәс гадынлар да өз әрләринә табе олараг, өзләрини бу ҹүр бәзәјирдиләр. Мәсәлән, Сара Ибраһими аға адландырараг, она итаәт етди. Сиз дә јахшылыг едиб, һеч бир дәһшәтә гапылмајараг, Саранын өвладлары олдунуз» (1 Петер 3:3-6).

¹⁶ Петер мәсиһчи гадынлара диггәтләрини заһири ҝөрүнүшләринә јөнәлтмәмәји төвсијә едирди. Гој әр Мүгәддәс Китаб тә’лимләринин арвадынын дахили варлығына неҹә тә’сир етдијини вә онун «јени мәнлији»ни ҝөрсүн. Белә олдугда, әр арвадынын «көһнә мәнлији» илә «јени мәнлији» арасындакы фәрги ҝөрә биләр (Ефеслиләрә 4:22-24). Әр үчүн арвадынын «һәлим вә сакит руһу» хош вә ҹазибәдар ҝөрүнәҹәкдир. Бу руһ јалныз әрин дејил, «Аллаһын гаршысында [да] чох гијмәтлидир» (Колослулара 3:12).

17. Әрли мәсиһчи гадынлар үчүн Сара һансы саһәдә јахшы нүмунәдир?

¹⁷ Бу саһәдә Сара гадынлар үчүн нүмунә ола биләр. Әрләри онларын иманларына шәрик олуб-олмаса да, мәсиһчи гадынлар Саранын нүмунәсини тәглид едә биләрләр. Сара Ибраһимин башчылығыны сөзсүз-сөһбәтсиз гәбул едирди. Һәтта үрәјиндә ону «аға» адландырырды (Јарадылыш 18:12). Бу онун ләјагәтини һеч ҹүр алчалтмырды. Сара руһән мөһкәм гадын иди вә Јеһоваја ҝүҹлү иманы варды. О, «бөјүк шаһидләр булудуна» аиддир вә онун иманынын нүмунәси бизи «гаршымыза гојулан јарышда мәтанәтлә» гачмаға тәшвиг етмәлидир (Ибраниләрә 11:11; 12:1). Беләликлә, мәсиһчи гадынын Сарадан нүмунә ҝөтүрмәсиндә алчалдыҹы бир шеј јохдур.

18. Әрлә арвадын фәргли динләрә мәнсуб олдуғу аиләдә һансы принсипләри јадда сахламаг лазымдыр?

¹⁸ Аиләдә әрлә арвад фәргли динләрә мәнсуб олсалар да, аиләнин башчысы јенә дә әрдир. Әҝәр о мәсиһчидирсә, һәгигәтдә олмајан арвадынын е’тигадына һөрмәт бәсләјәҹәк, амма ҝүзәштә ҝетмәјәҹәкдир. Әҝәр арвад мәсиһчидирсә, о да ејнилә иманына аид мәсәләләрдә ҝүзәштә ҝетмәјәҹәкдир (Һәвариләрин ишләри 5:29). Бунунла бәрабәр, әринин башчылығына итаәт едәҹәк вә она һөрмәт едәрәк «издиваҹ гануну» алтында галаҹагдыр (Ромалылара 7:2).

Мүгәддәс Китабын мүдрик нәсиһәтләри

19. Нәјә ҝөрә никаһын мөһкәмлијини горумаг асан дејил, амма бу саһәдә нә көмәк ола биләр?

¹⁹ Буҝүнкү дүнјада никаһ телләрини горујуб сахламаг асан дејил. Бә’зи кишиләр аиләдә олан мәс’улијјәтләрини јеринә јетирмирләр. Бә’зи гадынлар исә әрләринин башчылығыны гәбул етмәкдән бојун гачырырлар. Бир чох инсанлар аиләләрдә кобуд давраныша мә’руз галырлар. Игтисади чәтинликләр, инсани гејри-камиллик, һәмчинин әхлагсыз вә јанлыш дәјәрләри олан дүнјанын руһу мәсиһчинин садиглијини сынаға чәкә биләр. Буна бахмајараг, һәр бир шәраитдә Мүгәддәс Китаб принсипләринә риајәт едән мәсиһчи киши вә гадынлар Јеһованын хејир-дуасыны алырлар. Һеч кимин Мүгәддәс Китаб принсипләринә риајәт етмәмәсиндәнсә, әр вә ја арваддан биринин буна риајәт етмәси даһа јахшыдыр. Ән башлыҹасы исә одур ки, Јеһова, һәтта ән чәтин анларда белә һәјат јолдашына вердији вә’дә садиг галан хидмәтчиләрини севир вә онлара дәстәк олур. Јеһова онларын сәдагәтини унутмур (Мәзмур 18:25; Ибраниләрә 6:10; 1 Петер 3:12).

20. Петер бүтүн мәсиһчиләрә һансы нәсиһәти вермишдир?

²⁰ Һәвари Петер никаһда олан мәсиһчиләрә нәсиһәт вердикдән сонра, сөзүнә јекун вурараг дејир: «Нәһајәт, һамыныз һәмфикир, башгаларынын дәрдләринә шәрик, гардаш севән, шәфгәтли, меһрибан, тәвазөкар олун. Пислијә писликлә, сөјүшә дә сөјүшлә ҹаваб вермәјин, әксинә хејир-дуа един, чүнки билирсиниз ки, хејир-бәрәкәтә варис оламаг үчүн дә’вәт олундунуз» (1 Петер 3:8, 9). Доғрудан да, бу һамымыз, хүсусән дә әр-арвадлар үчүн неҹә дә мүдрик нәсиһәтдир!

Хатырлајырсынызмы?

• Мәсиһчи әрләр Исаны нәдә тәглид едирләр?

• Әрли гадынлар мәсиһчи јығынҹағыны нәдә тәглид едирләр?

• Әрләр арвадларына неҹә һөрмәт ҝөстәрә биләрләр?

• Әрләри мәсиһчи олмајан гадынлар неҹә давранмалыдырлар?

[24-ҹү сәһифәдәки шәкил]

Мәсиһчи әр арвадыны севир вә онун гајғысына галыр.

Мәсиһчи гадын әринә дәрин һөрмәт бәсләјир.

[25-ҹи сәһифәдәки шәкил]

Рома ганунларындан фәргли олараг, мәсиһчи тә’лимләри әрин арвадына һөрмәт ҝөстәрмәсини тәләб едирди.

[26-ҹы сәһифәдәки шәкил]

Бөјүк издиһамдан олан киши вә гадынлар Ҹәннәтдәки әбәди һәјаты сәбирсизликлә ҝөзләјирләр.

[28-ҹи сәһифәдәки шәкил]

Сара Ибраһими ағасы һесаб едирди.