Еј ҝәнҹләр, Јеһоваја һәмд един!

«Рәббә һәмд един, еј јер үзүндәкиләр... еј ҝәнҹ оғланлар вә гызлар!» (МӘЗМУР 148:7, 12).

1, 2. а) Бир чох јенијетмәләр һансы мәһдудијјәтләрдән хәбәрдардырлар? б) Нәјә ҝөрә валидејнләр нәјәсә иҹазә вермәјәндә ушаглар инҹимәмәлидирләр?

БИР ГАЈДА олараг, јенијетмәләр онлара нәјин иҹазә верилиб-верилмәдијини чох ҝөзәл билирләр. Онлардан бир чохлары, һәтта дејә биләр ки, валидејнләри нечә јашында онлары күчәни сәрбәст кечмәјә, јатаға бир гәдәр ҝеҹ ҝетмәјә вә машын сүрмәјә гојаҹаглар. Амма јенијетмәләрә чох заман елә ҝәлир ки, валидејнләри онларын истәдикләри һәр шејә јаман тез-тез: «Инди олмаз, бир аз бөјү сонра» дејә ҹаваб верирләр.

² Ҝәнҹ оғлан вә гызлар, валидејнләринизин бу мәһдудијјәтләри сизин хејринизә, сизи горумаг үчүн гојдуғуну билирсиниз. Һәмчинин јахшы билирсиниз ки, валидејнләринизә гулаг асмагла Јеһова Аллаһын үрәјини севиндирирсиниз (Колослулара 3:20). Амма сизә һәрдән елә ҝәлмирми ки, бу ҹүр мәһдудијјәтләр сәрбәст һәјата гәдәм гојмағыныза мане олур? Мәҝәр доғруданмы, ваҹиб ишләрлә мәшғул олмаг үчүн һәлә лазыми гәдәр бөјүмәмисиниз? Әсла јох! Бу ҝүн бүтүн дүнјада ваҹиб бир иш јеринә јетирилир вә бу иш, гаршынызда ачылаҹаг бүтүн имканлардан гат-гат әһәмијјәтлидир. Бәс бу ишдә ушаглар вә јенијетмәләр дә иштирак едә биләрми? Нәинки иштирак едә биләр, һәтта Һагг-Таала Аллаһ Өзү сизи буну етмәјә дә’вәт едир!

3. Јеһова јенијетмәләри һансы ҝөзәл имкандан истифадә етмәјә дә’вәт едир вә биз һансы суаллары нәзәрдән кечирәҹәјик?

³ Сөһбәт һансы ишдән ҝедир? Мәгаләмизин әсасландығы ајәјә јенидән фикир верин: «Рәббә һәмд един, еј јер үзүндәкиләр... еј ҝәнҹ оғланлар вә гызлар, еј гоҹалар, ҹаванлар!» (Мәзмур 148:7, 12). Бәли, бу ҝөзәл имканы әлдән бурахмајын! Сиз Јеһова Аллаһа һәмд едә биләрсиниз! Бир ҝәнҹ кими сән дә бу бөјүк ишдә севинҹләми иштирак едирсән? Бир чохлары бу иши чох севирләр. Бунун сәбәбини билмәк үчүн ҝәл әввәлҹә ашағыдакы үч суалы мүзакирә едәк. Биринҹиси, сән Јеһоваја нә үчүн һәмд етмәлисән? Икинҹиси, буну неҹә едә биләрсән? Нәһајәт үчүнҹүсү, Јеһоваја һәмд етмәјә нә вахт башламаг олар?

Јеһоваја һәмд етмәк нә үчүн лазымдыр?

4, 5. а) 148-ҹи Мәзмура әсасән, биз инди һансы ҝөзәл вәзијјәтдәјик? б) Ҹансыз тәбиәт даныша вә дүшүнә билмәсә дә, Јеһоваја неҹә һәмд едир?

⁴ Јеһоваја һәмд етмәјин ән башлыҹа сәбәбләриндән бири дә Онун Јарадан олмасыдыр. ­148-ҹи Мәзмуру нәзәрдән кечирдикдә буну даһа дәриндән һисс едәҹәксән. Бир тәсәввүрүнә ҝәтир: Ҝөзәл, тә’сиредиҹи бир маһныны сәс-сәсә вериб охујан бир груп адама раст ҝәлирсән. Онлары динләјәркән сән һансы һиссләри кечирәрдин? Маһныда сәнин доғру вә ваҹиб һесаб етдијин шејләрдән охунур, мусигиси дә үрәкачан вә руһландырыҹыдыр. Мәҝәр сән маһнынын сөзләрини өјрәниб бу група гошулмаг истәмәздинми? Чохумуз мәһз белә дә едәрдик. 148-ҹи Мәзмура нәзәр салсан, буна охшар, амма бундан гат-гат ҝөзәл бир вәзијјәтдә олдуғуну ҝөрәҹәксән. Бу мәзмурда Јеһоваја бир ағыздан һәмд едән бөјүк бир издиһам тәсвир едилир. Амма мәзмуру охујаркән ҝөзүнә гејри-ади бир шеј дәјәҹәк. Нә?

⁵ 148-ҹи Мәзмурда Аллаһа һәмд едәнләрин чоху нә даныша, нә дә дүшүнә билир. Мәсәлән, орада биз ҝүнәшин, ајын, гарын, күләјин, дағларын вә тәпәләрин Јеһоваја һәмд етдији барәдә охујуруг. Јеһованын јаратдығы бу ҹансыз тәбиәт Она неҹә һәмд едир? (3, 8 вә 9-ҹу ајәләр). Онлар буну ағаҹларын, суда јашајан ҹанлыларын вә һејванларын етдији кими едирләр (7, 9, 10-ҹу ајәләр). Һеч ҝүнәшин батдығы заман ачылан ҝөзәл мәнзәрәјә, ајын улдузлу сәмада санки үзмәсинә тамаша етмисәнми? Бәлкә нә вахтса һејван балаларынын ојнамасыны мүшаһидә едәркән дојунҹа ҝүлмүсән? Бәс ҝөз охшајан бир мәнзәрәнин ҝөзәллијинә һеч валеһ олмусанмы? Әҝәр һәјатында нә вахтса белә дәгигәләр јашамысанса, онда сән дә Јеһованын јаратдыгларынын Она неҹә һәмд нәғмәси охудугларыны «ешитмисән». Јеһованын јаратдығы һәр бир шеј бизә Онун Гадир Јарадан олдуғуну хатырладыр. Бүтүн каинатда Јеһова гәдәр ҝүҹлү, мүдрик вә севән шәхсијјәт јохдур (Ромалылара 1:20; Вәһј 4:11).

6, 7. а) 148-ҹи Мәзмурда Јеһоваја һәмд едән һансы шүурлу мәхлуглар тәсвир едилир? б) Бизи Јеһоваја һәмд етмәјә нә тәшвиг едәҹәк? Мисал ҝәтирин.

⁶ 148-ҹи Мәзмурда шүурлу мәхлугларын да Јеһоваја һәмд етдикләри тәсвир олунур. 2-ҹи ајәјә бахсаг, Јеһованын сәмави «ордусунун», јә’ни мәләкләринин Она һәмд етдијини ҝөрәҹәјик. 11-ҹи ајәдә исә падшаһлар вә һакимләр кими нүфузлу вә ҝүҹлү адамлар да бу һәмд нәғмәсинә гошулмаға дә’вәт олунурлар. Әҝәр бөјүк ҝүҹә малик олан мәләкләр белә Јеһоваја севинҹлә һәмд едирләрсә, онда ади бир инсан нәдир ки, Јеһоваја һәмд етмәји мәнлијинә сығышдырмасын?! Даһа сонра, 12-ҹи вә 13-ҹү ајәләрдә артыг сизләр — ҝәнҹ оғлан вә гызлар Јеһоваја һәмд етмәјә дә’вәт олунурсунуз. Сән дә Аллаһа һәмд етмәк истәјирсәнми?

⁷ Ҝәл бир мисал үзәриндә дүшүнәк. Әҝәр сәнин идманда, инҹәсәнәтдә вә јахуд да мусигидә исте’дада малик олан бир достун олсајды, мәҝәр онун һаггында аиләнә вә ја башга достларына данышмаздынмы? Шүбһәсиз ки, белә дә едәрдин. Јеһованын јаратдығы шејләр һаггында өјрәнәркән биз дә ејни шеји етмәк истәјәҹәјик. Мәсәлән, Мәзмур 19:1, 2 ајәләриндә јазылыб ки, улдузлу сәма дурмадан Аллаһын әзәмәтини «нәгл едир». Ејни шәкилдә биз дә Јеһованын јаратдығы шејләр барәсиндә дүшүнәндә, Аллаһымыз һаггында башгаларына данышмаја билмирик.

8, 9. Јеһова һансы сәбәбләрә ҝөрә бизим Она һәмд етмәјимизи истәјир?

⁸ Јеһоваја һәмд етмәјин башга ваҹиб бир сәбәби дә вар: Она һәмд етмәјимизи Аллаһ Өзү биздән ҝөзләјир. Нә үчүн? Мәҝәр Аллаһын ади инсанларын һәмдинә еһтијаҹымы вар? Хејр, јохдур. Биз инсанлары вахташыры тә’рифләмәк лазымдыр. Јеһова исә биздән гат-гат уҹадыр (Јешаја 55:8). Аллаһын Өз шәхсијјәтинә вә ја кејфијјәтләринә даир һеч бир шүбһәси јохдур (Јешаја 45:5). Буна бахмајараг, Аллаһ бизим Она һәмд етмәјимизи истәјир вә биз буну едәндә үрәји чох севинир. Нијә? Ҝәл ики сәбәби нәзәрдән кечирәк. Биринҹиси, Јеһова бизим Она һәмд етмәк тәләбатымыз олдуғуну билир. О бизи руһани тәләбатларла, ибадәт етмәк тәләбаты илә јарадыб (Матта 5:3). Ушаглар фајдалы јемәк јејәндә валидејнләри севиндији кими, Јеһова да сәнин бу тәләбаты тә’мин етдијини ҝөрәндә севинир (Јәһја 4:34).

⁹ Икинҹиси, Јеһова билир ки, бизим Она һәмд етмәјимизи башга инсанлар да ешитмәлидирләр. Һәвари Павел бу сөзләри ҝәнҹ Тимотејә үнванландырмышды: «Өзүнә вә вердијин тә’лимата диггәт јетир вә бу ишләри давам етдир. Чүнки буну етмәклә сән һәм өзүнү, һәм дә сәнә гулаг асанлары хилас едәрсән» (1 Тимотејә 4:16). Бәли, сән Јеһова Аллаһ һаггында башгаларына өјрәдәндә, Она һәмд едәндә онлар да Јеһова илә таныш олмаг имканы әлдә едирләр. Бу ҹүр билијин сајәсиндә онлар әбәди хиласа малик ола биләрләр! (Јәһја 17:3).

10. Биз нә үчүн Аллаһымыза һәмд етмәк истәјирик?

¹⁰ Нөвбәти сәбәбә кечмәздән әввәл исте’дадлы достун һаггындакы мисалы јадына сал. Әҝәр гулағына чатсајды ки, ким исә онун һаггында јаланлар, бөһтанлар јајыр, мәҝәр сән бу јаланлары тәкзиб етмәк үчүн достуну даһа чох тә’рифләјиб онун һаггында һәгигәти сөјләмәздинми? Бәли, бу дүнјада Јеһова Аллаһа чохлу бөһтанлар атырлар (Јәһја 8:44; Вәһј 12:9). Бүтүн бу јаланлар Аллаһы севәнләрә пис тә’сир етдији үчүн онлар Аллаһлары һаггындакы һәгигәти һамыја чатдырмаг истәјирләр. Бәс сән неҹә? Јеһоваја олан мәһәббәтини вә тәшәккүрүнү билдирмәклә Онун баш дүшмәни олан Шејтана јох, Јеһова Аллаһа итаәт етмәк истәдијини ҝөстәрәҹәксәнми? Сән буна Јеһоваја һәмд етмәклә наил ола биләрсән. Ҝәл ҝөрәк буну неҹә етмәк олар.

Бә’зи јенијетмәләр Јеһоваја неҹә һәмд едирдиләр?

11. Мүгәддәс Китабда јазылан һансы нүмунәләр ҝөстәрир ки, ушаглар да Јеһоваја уғурла һәмд едә биләрләр?

¹¹ Мүгәддәс Китабдакы бир чох нүмунәләр ҝөстәрир ки, ушаглар да Јеһоваја мүвәффәгијјәтлә һәмд едә биләрләр. Мисал үчүн, суријалыларын әсир ҝөтүрдүкләри исраилли гызы хатырлајырсанмы? О, гуллуг етдији ханыма Јеһованын пејғәмбәри Елиша һаггында ҹәсарәтлә данышды. Бу гызын сөзләринин сајәсиндә мө’ҹүзә баш верди вә үстәлик һәмин адамлара ҝөзәл шаһидлик едилди (2 Падшаһлар 5:1-17). Иса да ушаг оланда Аллаһ һаггында ҹәсарәтлә шәһадәт едирди. Јеһова Исанын ушаглығы һаггында бизә әтрафлы мә’лумат верә биләрди. Амма Мүгәддәс Китабда јазылмасы үчүн јалныз бир һадисәни сечиб. О вахт Исанын 12 јашы варды. Јерусәлим мә’бәдиндә дин мүәллимләринә горхмадан суаллар вермиш вә Јеһованын јолларыны нә дәрәҹәдә дәрин анламасы илә онлары тәәҹҹүбләндирмишди (Лука 2:46-49).

12, 13. а) Иса өлүмүндән бир нечә ҝүн әввәл мә’бәддә нә едирди вә бу орадакы инсанлара һансы тә’сири бағышлады? б) Ушагларын она һәмд етмәсинә Иса неҹә мүнасибәт ҝөстәрди?

¹² Иса бөјүдүкдән сонра да ушаглары Јеһоваја һәмд етмәјә тәшвиг едирди. Мәсәлән, өлүмүндән бир нечә ҝүн әввәл о, Јерусәлим мә’бәдинә ҝәлди вә орада «тәәҹҹүб доғуран ишләр» етди. Иса бу мүгәддәс јери гулдур јувасына дөндәрәнләри мә’бәддән говду. О, һәмчинин кор вә топал адамлара да шәфа верди. Онун һәрәкәтләрини мүшаһидә едәнләр, хүсусилә дә дин рәһбәрләри Јеһоваја вә Онун Оғлу Мәсиһә һәмд етмәли идиләр. Һејф ки, о ҝүнләрдә Аллаһа вә Онун Мәсиһинә һәмд едәнләр демәк олар ки, јох иди. Бир чохлары Исанын Аллаһ тәрәфиндән ҝөндәрилдијини билсәләр дә, дин рәһбәрләриндән горхурдулар. Амма бир груп инсан дин рәһбәрләриндән һеч горхмурду. Билирсән онлар кимләр иди? Мүгәддәс Китабда дејилир: «Баш каһинләр вә дин алимләри Онун [Исанын] етдији тәәҹҹүб доғуран ишләри вә мә’бәддә “Давуд Оғлуна һосанна!” — дејә бағыран ушаглары ҝөрдүкдә гәзәбләнәрәк Она [Исаја] дедиләр: “Бунларын нә сөјләдијини ешидирсәнми?”» (Матта 21:15, 16; Јәһја 12:42).

¹³ Каһинләр үмид едирдиләр ки, Иса она һәмд едән ушаглара сусмағы әмр едәҹәк. Иса буну етдими? Әлбәттә ки, јох! О, каһинләрә белә ҹаваб верди: «“Кичик ушагларын вә әмзикли оланларын ағзындан камил һәмд алдын” сөзүнү һеч охумамысынызмы?» Бу сөзләрдән ајдын олур ки, Иса вә онун Атасы ушаглардан чох разы идиләр. Бу балаҹа ушаглар әслиндә бөјүкләрин ҝөрмәли олдуглары иши едирдиләр. О ушаглар үчүн Аллаһа һәмд етмәкдә тәәҹҹүблү һеч бир шеј јох иди. Онлар Исанын һејрәтли ишләрини, ҹәсарәтлә вә иманла данышдығыны, һәмчинин Аллаһа вә Онун халгына олан ҹошғун мәһәббәтини ҝөрүрдүләр. О, һәгигәтән дә өзүнүн дедији кими, вә’д едилмиш «Давудун оғлу» Мәсиһ иди. Ушаглар пејғәмбәрлијин јеринә јетирилмәсиндә иштирак етмәк шәрәфинә лајиг ҝөрүләрәк, иманларына ҝөрә хејир-дуа алдылар (Мәзмур 8:2).

14. Ҝәнҹләрин малик олдуглары ән’амлар Јеһоваја һәмд етмәкдә онлара неҹә көмәк едир?

¹⁴ Биз бу ҹүр нүмунәләрдән нә өјрәнә биләрик? Ушаглар да Јеһоваја чох уғурла һәмд едә биләрләр. Онлар һәгигәти ајдын вә олдуғу кими ҝөрүрләр, иманларыны исә үрәкдән вә һәвәслә ифадә едирләр. Сүлејманын мәсәлләри 20:29 ајәсиндә дејилдији кими, онлар башга бир ән’ама да маликдирләр: «Ҝәнҹләри гүввәти шәрәфләндирәр». Бәли, ушаглар, сиздә Јеһоваја һәмд етмәјә лазым олан кејфијјәтләр — һәм ҝүҹ, һәм дә енержи вар. Бәс бу ҹүр ән’амлардан сиз неҹә истифадә едә биләрсиниз?

Сән Јеһоваја неҹә һәмд едә биләрсән?

15. Јеһоваја уғурла һәмд етмәјә бизи һансы һисс тәшвиг етмәлидир?

¹⁵ Һәр шеј үрәкдән башлајыр. Әҝәр Јеһоваја һәмд етмәјә сәни өз истәјин дејил, башгалары тәшвиг едирсә, онда сән бу ишин өһдәсиндән асанлыгла ҝәлә билмәјәҹәксән. Унутма, әмрләрин ән ваҹиби будур: «Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев» (Матта 22:37). Мүгәддәс Китабы шәхсән өјрәнәрәк Јеһова илә јахындан таныш олмусанмы? Бу ҹүр шәхси өјрәнмәнин сајәсиндә сән Јеһова Аллаһы даһа да чох севәҹәксән. Аллаһа олан мәһәббәтини Она һәмд етмәклә ифадә едә биләрсән. Әҝәр бу һисс үрәјиндән ҝәлирсә вә чох ҝүҹлүдүрсә, онда сән Јеһоваја бөјүк севинҹлә һәмд етмәјә һазыр олаҹагсан.

16, 17. Јеһоваја һәмд етмәкдә давраныш һансы ролу ојнајыр? Мисал ҝәтирин.

¹⁶ Буна ҝөрә дә нә дејәҹәјини дүшүнмәздән әввәл, неҹә давранаҹағынын үзәриндә дүшүн. Мәсәлән, әҝәр Елишанын ҝүнләриндә јашајан балаҹа исраилли гыз өзүнү кобуд апарсајды, һөрмәтсиз вә виҹдансыз олсајды, сәнҹә, ону әсир ҝөтүрән суријалылар Јеһованын пејғәмбәри һагда дедикләринә гулаг асардылармы? Јәгин ки, гулаг асмаздылар. Ејни шәкилдә сән дә һөрмәтҹил вә дүзҝүн олсан, өзүнү јахшы апарсан, онда башгалары сәнә даһа мәмнунијјәтлә гулаг асаҹаглар (Ромалылара 2:21). Ашағыдакы нүмунәјә фикир вер.

¹⁷ Португалијада јашајан 11 јашлы бир гыз мәктәбдә бөјүк бир сынагла гаршылашды. Онун Мүгәддәс Китаб үзрә өјрәдилмиш виҹданы Аллаһа мәгбул олмајан бајрамларда иштирак етмәсинә јол вермирди. Бу гыз бу бајрамларда иштирак етмәмәсинин сәбәбини һөрмәтҹил сурәтдә мүәллимәсинә изаһ етди, амма мүәллимә ону лаға гојмаға башлады. Вахташыры мүәллимә бу гызы әлә салыр вә онун дини бахышларына ҝүлүрдү. Бу ҹүр сынаглара бахмајараг, о, мүәллимәси илә чох һөрмәтлә давранырды. Бир нечә ил кечир вә баҹымыз артыг даими пионер, јә’ни таммүддәтли хидмәтчи олур. Конгресләрин бириндә вәфтиз олунанлар арасында бир нәфәр баҹыја таныш ҝәлир. Бу, баҹымызын мәктәб мүәллимәси иди! Дојунҹа гуҹаглашыб ағлајандан сонра мүәллимә баҹымыза онун һөрмәтҹил давранышыны һеч ҹүр унуда билмәдијини сөјләди. Вә бир дәфә Шаһидләр онун јанына ҝәләндә мүәллимә шаҝирдинин давранышы һаггында онлара данышды. Бундан сонра о, Мүгәддәс Китаб өјрәнмәсинә башлады вә һәгигәти гәбул етди. Ҝөрдүјүн кими, сән өзүнү нүмунәви апармагла да Јеһоваја һәмд етмиш олурсан.

18. Мүгәддәс Китаб вә Јеһова Аллаһ һаггында данышмаға чәкинән јенијетмә нә едә биләр?

¹⁸ Һеч елә олубму ки, мәктәбдә өз иманын һаггында данышмаға чәтинлик чәкәсән? Бу ҹүр һиссләри тәк сән кечирмирсән. Амма сән елә едә биләрсән ки, башгалары сәнин иманына мараг ҝөстәрсинләр. Мәсәлән, әҝәр гануна зидд дејилсә, нә үчүн мәктәбә Мүгәддәс Китаба әсасланан нәшрләр ҝәтириб, онлары тәнәффүсдә вә ја башга бош вахтында охумајасан? Синиф јолдашларын да сәни ҝөрәндә нә охудуғунла мараглана биләрләр. Әлиндәки китабда вә ја мәгаләдә мараглы олан шејләр һаггында онлара данышанда өзүн дә билмәдән јахшы сөһбәт башлана биләр. Синиф јолдашларынын нәјә инандыгларына даир суаллар вермәји дә унутма. Онлары һөрмәтлә динләјиб Мүгәддәс Китабдан өјрәндикләрин һаггында онларла бөлүш. Бу ҹүр нүмунәләр ҝөстәрир ки, бир чох ҝәнҹ оғлан вә гызлар мәктәбдә Јеһоваја һәмд едирләр. Онлар бундан бөјүк севинҹ һисси дујурлар вә башгаларына да Јеһова илә таныш олмаға көмәк едирләр.

19. Ҝәнҹләр евдән-евә тәблиғдә даһа сәмәрәли олмаға неҹә наил ола биләрләр?

¹⁹ Јеһоваја һәмд етмәјин ән ҝөзәл үсулу евдән-евә тәблиғдир. Әҝәр һәлә бу хидмәт нөвүндә иштирак етмәмисәнсә, нә үчүн буну етмәји гаршына мәгсәд гојмајасан? Әҝәр артыг евдән-евә тәблиғ едирсәнсә, онда гаршына башга мәгсәдләр гоја биләрсәнми? Мәсәлән, һәр гапынын ағзында ејни сөзләри тәкрарламагданса, јахшы оларды ки, бу ишдә пүхтәләшмәк үчүн валидејнләринә вә ја тәблиғ ишиндә даһа тәҹрүбәли оланлара мүраҹиәт едәсән. Мүгәддәс Китабдан даһа чох истифадә етмәји вә сәмәрәли тәкрар башчәкмәләр етмәји өјрән, һәмчинин Мүгәддәс Китаб өјрәнмәси башламаға чалыш (1 Тимотејә 4:15). Јеһоваја нә гәдәр чох һәмд етсән, бир о гәдәр дә хидмәтдә уғурлу олаҹаг вә бундан бөјүк севинҹ дујаҹагсан.

Јеһоваја һәмд етмәјә нә вахт башламаг олар?

20. Нәјә ҝөрә ушаглар Јеһоваја һәмд етмәк үчүн һәлә чох ҝәнҹ олдугларыны дүшүнмәмәлидирләр?

²⁰ Бу мәгаләдә мүзакирә етдијимиз үч суалдан ән асаны сонунҹу суалын ҹавабыдыр. Мүгәддәс Китабын вердији ајдын ҹаваба фикир вер: «Ҹаванлыг ҝүнләриндә Сәни Јараданы хатырла» (Ваиз 12:1). Бәли, Јеһоваја һәмд етмәјә башламағын әсл вахты елә индидир! Әлбәттә, сән дејә биләрсән: «Јеһоваја һәмд етмәк үчүн һәлә чох ҝәнҹәм. Тәҹрүбәм дә аздыр. Гој бир аз бөјүјүм». Бу ҹүр дүшүнән тәк сән дејилсән. Мисал үчүн, ҝәнҹ Јеремја да Јеһоваја дејирди: «Аһ, ја Худавәнд Рәбб! Ахы мәним данышыг габилијјәтим јохдур, чүнки һәлә ҹаванам». Јеһова Аллаһ ону сакитләшдирди, горхмаға һеч бир әсас јох иди (Јеремја 1:6, 7). Ејнилә, биз дә Јеһоваја һәмд едәндә горхмамалыјыг. Елә бир зәрәр јохдур ки, Јеһова бизи ондан азад етмәјә гадир олмасын (Мәзмур 118:6).

21, 22. Ҝәнҹләр нә үчүн шеһ дамҹылары илә мүгајисә едилир вә бу ҹүр мүгајисә онлары нәјә ҝөрә руһландырыр?

²¹ Беләликлә, еј ҝәнҹләр, Јеһоваја һәмд етмәјә утанмајын! Нә гәдәр ки, ҝәнҹсиниз бүтүн дүнјада кечирилән ән ваҹиб ишдә иштирак етмәјин әсл вахтыдыр. Бу ишдә иштирак етдикдә бөјүк бир аиләнин —Јеһоваја һәмд едәнләр аиләсинин үзвү олаҹагсыныз. Сизин дә бу аиләнин бир үзвү олмағыныза Јеһованын үрәји чох севинир. Мәзмурчунун Јеһова Аллаһа дедији сөзләрә фикир верин: «Дөјүш ҝүнү әсҝәрләрин көнүллү олараг дөјүшә ҝедәҹәк, ҝәнҹләрин сәһәр шеһи кими мүгәддәс либасыны ҝејиб јанына ҝәләҹәк» (Мәзмур 110:3).

²² Сәһәр ачыланда јарпагларын үзәриндә парлајан шеһ дамҹылары гаршымызда ҝөзәл бир мәнзәрә ачыр, елә дејилми? Онлар тәравәтли, парылтылы вә сајсыз-һесабсыздыр. Јеһова да, сизи, бу чәтин ҝүнләрдә Она сәдагәтлә хидмәт едән ҝәнҹләри, мәһз бу ҹүр ҝөрүр. Әмин ола биләрсиниз, сизин Јеһоваја һәмд етмәк сечиминиз Онун үрәјини чох севиндирир (Сүлејманын мәсәлләри 27:11). Буна ҝөрә, еј ҝәнҹләр вар гүввәнизлә Јеһоваја һәмд един!

Неҹә ҹаваб верәрдиниз?

• Јеһоваја һәмд етмәјә һансы мүһүм сәбәбләр вар?

• Мүгәддәс Китабда јазылмыш һансы мисаллар ҝөстәрир ки, ушаглар да Јеһоваја һәмд етмәкдә мүвәффәгијјәтли ола биләрләр?

• Бу ҝүн јенијетмәләр Јеһоваја неҹә һәмд едә биләрләр?

• Ҝәнҹләр Јеһоваја һәмд етмәјә нә вахт башлаја биләрләр вә нә үчүн?

[15-ҹи сәһифәдәки шәкилләр]

Әҝәр достун гејри-ади исте’дада маликдирсә, мәҝәр сән онун һаггында башгаларына данышмаздынмы?

[17-ҹи сәһифәдәки шәкил]

Синиф јолдашларын сәнин иманынла мараглана биләрләр.

[18-ҹи сәһифәдәки шәкил]

Әҝәр өз хидмәтиндә пүхтәләшмәк истәјирсәнсә, көмәк үчүн тәҹрүбәли Шаһидләрә мүраҹиәт ет.