Бүтүн халглардан олан инсанлар үчүн хош хәбәр
«Дүнјанын ән узаг јерләринә гәдәр Мәнә шаһид олаҹагсыныз» (ҺӘВАРИЛӘРИН ИШЛӘРИ 1:8).
1. Мүгәддәс Китаб һәгигәтинин мүәллимләри кими биз нәјә диггәт јетиририк вә нәјә ҝөрә?
ЈАХШЫ мүәллим јалныз нә өјрәтдијинә дејил, һәм дә неҹә өјрәтдијинә диггәт јетирир. Инсанлара Мүгәддәс Китаб һәгигәтләрини өјрәдәркән биз дә ејнилә давранырыг. Биз һәм тәблиғ етдијимиз хәбәрә, һәм дә тәблиғ үсулларымыза диггәт јетиририк. Аллаһын Падшаһлығы һаггындакы хош хәбәр дәјишмәз олараг галыр, анҹаг биз хидмәтдә истифадә етдијимиз үсуллары дәјиширик. Нә үчүн? Һәгигәти мүмкүн гәдәр даһа чох инсанлара чатдырмаг үчүн.
2. Хидмәт үсулларымызы дәјишәрәк кими тәглид едирик?
2 Хидмәтдә истифадә етдијимиз үсуллары мүхтәлиф шәраитләрә ујғунлашдырараг, биз Аллаһын гәдимдә јашамыш хидмәтчиләрини, мәсәлән, һәвари Павели тәглид едирик. О демишдир: «Јәһудиләрлә јәһуди кими даврандым... Гануну олмајанлары әлдә етмәк үчүн онларла Гануну олмајан кими даврандым... зәифләрлә зәиф кими даврандым. Һәр кәс үчүн һәр шеј олдум ки, һәр неҹә олурса-олсун бә’зиләрини хилас едим» (1 Коринфлиләрә 9:19-23). Павелин мүхтәлиф шәраитләрә ујғунлашдырылмыш тәблиғ үсуллары јахшы бәһрәләр ҝәтирирди. Әҝәр инсанлара гаршы диггәтли олсаг вә онлары марагландыран мөвзулар һагда данышсаг, бизим дә хидмәтимиз мүвәффәгијјәтли олаҹаг.
‘Дүнјанын бүтүн уҹгар јерләринәдәк’
3. а) Тәблиғ ишимиздә ән бөјүк чәтинликләрдән бири һансыдыр? б) Јешаја 45:22 ајәсиндәки сөзләр бу ҝүн неҹә һәјата кечир?
3 Хош хәбәри тәблиғ етмәк ишиндә ән бөјүк чәтинликләрдән бири — тәблиғ саһәсинин мигјасыдыр, чүнки хош хәбәр ‘бүтүн дүнјада тәблиғ олунмалыдыр’ (Матта 24:14). Сон јүз ил әрзиндә Јеһованын бир чох хидмәтчиләри хош хәбәри башга өлкәләрдә сә’јлә тәблиғ етмишләр. Валеһедиҹи нәтиҹәләр әлдә едилмишдир: хош хәбәр бүтүн дүнјаја јајылмышдыр. ХХ әсрин әввәлләриндә Падшаһлыг һаггындакы хәбәр јалныз бир нечә өлкәдә тәблиғ олунурду, инди исә Јеһованын Шаһидләри 235 өлкәдә вә әразидә фәал сурәтдә чалышырлар. Һәгигәтән дә, Падшаһлыг һаггындакы хош хәбәр ‘дүнјанын бүтүн уҹгар јерләринәдәк’ бәјан олунмагдадыр! (Јешаја 45:22).
4, 5. а) Хош хәбәрин јајылмасында кимләр ваҹиб рол ојнајыр? б) Бә’зи филиаллар онларын нәздиндә олан өлкәләрдә хидмәт етмәк үчүн ҝәлән баҹы-гардашлар һаггында нә јазыр?
4 Бу ҹүр мүвәффәгијјәтә нәјин сајәсиндә наил олунмушдур? Бу ишдә, Ҝөзәтчи Гүлләсинин Мүгәддәс Китаб мәктәби Ҝилеадда тә’лим алан миссионерләрин вә Хидмәти Тәкмилләшдирмә Мәктәбинин 20 000-дән артыг мә’зунунун бөјүк көмәји олуб. Һәгигәт, өз һесабына Падшаһлығын тәблиғчиләринин чатышмадығы өлкәләрә көчән бир чох Шаһидләрин көмәји сајәсиндә дә јајылыр. Бу ҹүр фәдакарлыг руһу тәзаһүр етдирән мәсиһчиләр — кишиләр вә гадынлар, ҹаванлар вә јашлылар, аиләлиләр вә субајлар — хош хәбәрин бүтүн дүнјада тәблиғ олунмасында мүһүм рол ојнајырлар (Мәзмур 110:3; Ромалылара 10:18). Бу баҹы-гардашларын көмәји чох гијмәтлидир. Ҝөрүн онларын хидмәт етдикләри өлкәләрә ҹавабдеһ олан филиалларын бә’зиләри онлар һаггында нә јазыр.
5 «Бу әзиз баҹы вә гардашларымыз узаг әразиләрдә тәблиғ едәрәк јахшы нүмунә верирләр. Онлар јени јығынҹагларын јаранмасында вә јерли Шаһидләрин руһән инкишаф етмәсиндә өз көмәкләрини әсирҝәмирләр» (Еквадор). «Јерли јығынҹаглары мөһкәмләндирән вә дајаг олан јүзләрлә әҹнәби баҹы-гардашларсыз биз нә едәрдик. Онлар бизим үчүн хејир-дуадырлар!» (Доминикан Республикасы). «Јығынҹагларымызын әксәријјәтиндә чохлу баҹылар вар, һәтта бә’зән јығынҹагларын 70 фаизини онлар тәшкил едир (Мәзмур 68:11). Онларын чоху һәгигәтдә јенидирләр, лакин башга өлкәләрдән ҝәлмиш субај пионер баҹылар јениләрин тә’лиминдә бөјүк көмәклик ҝөстәрирләр. Бу баҹылар бизим үчүн әсл һәдијјәдирләр!» (Шәрги Авропа өлкәләриндән бири). Бәс сән нә вахтса башга өлкәдә хидмәт етмәк барәдә дүшүнмүсәнми?a (Һәвариләрин ишләри 16:9, 10).
«Мүхтәлиф дилләрдә данышан милләтләрдән олан он адам»
6. Зәкәријјә 8:23 ајәсиндә хидмәтдә гаршылашдығымыз дил илә бағлы чәтинликләр неҹә вурғуланыр?
6 Башга бир чәтинлији исә, инсанларын данышдыглары чохсајлы дилләр тәшкил едир. Аллаһын Кәламында габагҹадан дејилмишдир: «О ҝүнләрдә мүхтәлиф дилләрдә данышан милләтләрдән олан он адам бир Јәһудинин әтәјиндән јапышыб “гој сизинлә ҝедәк, чүнки Аллаһын сизинлә олдуғуну ешитмишик” дејәҹәк» (Зәкәријјә 8:23). Бу пејғәмбәрлијин мүасир иҹрасында «он адам» Вәһј 7:9 ајәсиндә хатырланан бөјүк издиһамы тәмсил едир. Лакин диггәт јетирин ки, бу пејғәмбәрлијә әсасән һәмин «он адам» садәҹә бүтүн милләтләрдән дејил, «мүхтәлиф дилләрдә данышан милләтләрдән» чыхаҹаг. Пејғәмбәрлијин бу ваҹиб һиссәсинин иҹрасыны инди ҝөрмәк мүмкүндүрмү? Сөзсүз.
7. Статистика неҹә ҝөстәрир ки, хош хәбәр «мүхтәлиф дилләрдә данышан милләтләрдән» олан адамлара чатыр?
7 Рәгәмләр бу һагда нә дејир? Әдәбијјатымыз әлли ил бундан габаг 90 дилдә чап олунурду, һал-һазырда исә бу сај 400-ү кечмишдир. «Садиг вә ағыллы гул» вар ҝүҹүнү сәрф едир ки, әдәбијјатымыз һәтта нисбәтән азсајлы дилләрдә белә нәшр едилсин (Матта 24:45). Нүмунә үчүн, Мүгәддәс Китаб әдәбијјаты Гренландија (47 000-ә јахын инсан данышыр), палау (15 000 инсан данышыр) вә Јап дилләриндә (7 000-дән аз адам данышыр) чыхыр.
Јени имканлара ачылан «ҝениш гапы»
8, 9. Нәјин сајәсиндә гаршымызда «ҝениш гапы» ачылмышдыр вә минләрлә Шаһидләр буна неҹә һај вермишләр?
8 Бу ҝүн хош хәбәри башга дилләрдә данышан инсанлара чатдырмаг үчүн хариҹә ҝетмәк лазым ҝәлмир. Сон илләр әрзиндә мүһаҹирләрин вә гачгынларын ахышмасы сајәсиндә, игтисади ҹәһәтдән инкишаф етмиш өлкәләрдә чохсајлы диаспорлар јаранмышдыр. Мәсәлән, Парисдә јалныз франсыз дилиндә дејил, һәмчинин тәхминән даһа 100 дилдә, Канаданын Торонто шәһәриндә 125 дилдә, Лондонда исә 300-дән артыг дилдә данышырлар! Бир чох јығынҹагларын әразисинә башга өлкәләрдән олан даһа чох инсанлар көчүр, бу да бүтүн милләтләрдән олан инсанларла хош хәбәри бөлүшмәк үчүн «ҝениш гапы» ачыр (1 Коринфлиләрә 16:9).
9 Минләрлә Шаһидләр бу имканы әлдән вермәмәјә чалышараг јени дил өјрәнирләр. Бир чохлары үчүн буну етмәк асан дејил. Лакин онларын сә’ји сајәсиндә мүһаҹир вә гачгынларын Аллаһын Кәламындан олан һәгигәти өјрәнә билдикләри үчүн, бу баҹы-гардашларын әлдә етдикләри севинҹ һисси чәтинликләрин өһдәсиндән ҝәлмәкдә онлара көмәк едир. Бу јахынларда Гәрби Авропа өлкәләриндән бириндә кечирилән вилајәт конгресиндә вәфтиз олунанларын 40 фаизини әҹнәбиләр тәшкил етмишдир.
10. «Бүтүн халглардан олан инсанлар үчүн хош хәбәр» брошүрасындан хидмәтдә неҹә истифадә едирсиниз? (26-ҹы сәһифәдәки «“Бүтүн халглардан олан инсанлар үчүн хош хәбәр” брошүрасынын сәҹијјәви ҹәһәтләри» адлы чәрчивәјә бахын.)
10 Доғрудур, чохларымызын хариҹи дил өјрәнмәк имканы јохдур. Бунунла белә, биз «Бүтүн халглардан олан инсанлар үчүн хош хәбәр»b брошүрасындан дүзҝүн истифадә етмәклә мүһаҹирләрә көмәк едә биләрик. Бу брошүрада мүхтәлиф дилләрдә јазылмыш Мүгәддәс Китабдан севиндириҹи хәбәр јерләшир (Јәһја 4:37). Сиз хидмәтдә бу брошүрадан истифадә едирсинизми?
Инсанлар е’тинасызлыг ҝөстәрдикдә
11. Јеһованын Шаһидләри бә’зи јерләрдә даһа һансы чәтинликлә гаршылашырлар?
11 Шејтанын тә’сири ҝүҹләндикҹә, ҝет-ҝедә даһа бир чәтинликлә — бә’зи јерләрдә инсанларын е’тинасызлығы илә гаршылашырыг. Әлбәттә, бу бизи тәәҹҹүбләндирмир, чүнки Иса бу һагда габагҹадан хәбәр вермишдир. О бизим зәманә һаггында белә демишдир: «Бир чохларынын севҝиси сојујаҹагдыр» (Матта 24:12). Доғрудан да, инсанларын чохунда Аллаһа иман вә Онун Кәламына һөрмәт сојумушдур (2 Петер 3:3, 4). Нәтиҹә е’тибарилә, дүнјанын бә’зи јерләриндә нисбәтән аз сајда инсанлар Мәсиһин шаҝирди олурлар. Лакин бу о демәк дејил ки, белә әразиләрдә сәдагәтлә хидмәт едән баҹы вә гардашларымызын әмәји әбәсдир (Ибраниләрә 6:10). Нәјә ҝөрә? Нөвбәти нүмунәни нәзәрдән кечирәк.
12. Тәблиғ ишимизин ики мәгсәди нәдән ибарәтдир?
12 «Маттанын Мүждәси»ндә тәблиғ хидмәтимизин ики ваҹиб мәгсәди гејд олунур. Онлардан бири, ‘бүтүн халглары шаҝирд етмәкдир’ (Матта 28:19). Диҝәри исә, Падшаһлыг һаггындакы хәбәрин «шәһадәт олараг» тәблиғ олунмасыдыр (Матта 24:14). Бу мәгсәдин һәр икиси ваҹибдир, лакин ахырынҹысы хүсусилә ваҹибдир. Нәјә ҝөрә?
13, 14. а) Мәсиһин иштиракыны ҝөстәрән әламәтин сәҹијјәви хүсусијјәти нәдир? б) Инсанларын даһа чох е’тинасызлыг ҝөстәрдикләри әразиләрдә тәблиғ едәркән нәји јадда сахламалыјыг?
13 Матта, шаҝирдләрин Исадан: «Сәнин ҝәлишинә вә дөврүн сонуна әламәт нә олаҹаг?» дејә сорушдугларыны јазыр (Матта 24:3). Иса ҹавабында билдирди ки, бу әламәтин нәзәрә чарпан хүсусијјәтләриндән бири үмумдүнја тәблиғ иши олаҹагдыр. О, бурада јени шаҝирдләр һазырламагданмы сөз едирди? Хејр, Иса демишдир: «Сәмави Сәлтәнәт [Падшаһлыг] һаггында олан бу Мүждә халгларын һамысына шәһадәт олараг бүтүн дүнјада тәблиғ олунаҹагдыр» (Матта 24:14). Бунунла Иса ҝөстәрди ки, әламәтин сәҹијјәви хүсусијјәти Падшаһлыг һаггындакы хәбәрин тәблиғи олаҹагдыр.
14 Беләликлә, биз Падшаһлыг һаггындакы хош хәбәри тәблиғ едәркән јадда сахлајырыг ки, шаҝирдләр һазырламаг ишиндә һәр заман уғурлу олмасаг да, «халгларын һамысына шәһадәт олараг» тәблиғ етмәкдә мүвәффәгијјәт газанырыг. Инсанларын тәблиғ етдијимиз хәбәрә неҹә мүнасибәт ҝөстәрмәләриндән асылы олмајараг, онлар бизим нә илә мәшғул олдуғумузу билирләр, демәли, биз Мәсиһин пејғәмбәрлијини јеринә јетиририк (Јешаја 52:7; Вәһј 14:6, 7). Гәрби Авропадан олан Жорди адлы ҝәнҹ гардашымыз демишдир: «Чох хошбәхтәм ки, Јеһова мәнә Матта 24:14 ајәсиндәки пејғәмбәрлијин јеринә јетирилмәсиндә иштирак етмәјә изн вермишдир» (2 Коринфлиләрә 2:15-17). Шүбһәсиз, сиз дә ејни һиссләри кечирирсиниз.
Дүшмәнләр манечилик төрәдәндә
15. а) Иса өз давамчыларыны нә барәдә хәбәрдар етмишдир? б) Гаршыдурмалара бахмајараг, тәблиғ етмәк үчүн бизә гүввә верән нәдир?
15 Мүждәнин тәблиғиндә башга бир чәтинлијә сәбәб олан амил исә, хоша ҝәлмәјән шәраитләрдир. Иса өз давамчыларыны хәбәрдар едирди: «Мәним адыма ҝөрә бүтүн халглар сизә нифрәт едәҹәкләр» (Матта 24:9). Еркән мәсиһчиләр кими, Исанын мүасир давамчылары да нифрәтлә, гаршыдурмаларла вә тә’гибләрлә үзләшир (Һәвариләрин ишләри 5:17, 18, 40; 2 Тимотејә 3:12; Вәһј 12:12, 17). Бә’зи өлкәләрдә һакимијјәт органлары фәалијјәтимизи гадаған едирләр. Буна бахмајараг, Мәсиһин һәгиги давамчылары Аллаһа табе олараг һәмин јерләрдә Падшаһлыг һаггындакы хош хәбәри тәблиғ етмәји дајандырмырлар (Амос 3:8; Һәвариләрин ишләри 5:29; 1 Петер 2:21). Һәмин баҹы-гардашлар вә диҝәр Шаһидләр һарадан гүввә әлдә едирләр? Јеһова онлары Өз мүгәддәс руһу илә мөһкәмләндирир (Зәкәријјә 4:6; Ефеслиләрә 3:16; 2 Тимотејә 4:17).
16. Иса неҹә гејд етмишдир ки, Падшаһлыг һаггындакы тәблиғ иши Аллаһын руһунун тә’сири олмадан мүмкүн дејил?
16 Иса гејд етди ки, Падшаһлыг һаггындакы тәблиғ иши мүгәддәс руһун тә’сири олмадан мүмкүн дејил: «Мүгәддәс Руһ үзәринизә ендикдән сонра анҹаг гүдрәт алаҹагсыныз. Вә... дүнјанын ән узаг јерләринә гәдәр Мәнә шаһид олаҹагсыныз» (Һәвариләрин ишләри 1:8; Вәһј 22:17). Һадисәләрин ардыҹыллығына диггәт јетирин. Шаҝирдләр әввәлҹә мүгәддәс руһ алыр, сонра исә бүтүн јер үзүндә тәблиғ ишинә башлајырлар. Онлар «халгларын һамысына шәһадәт» етмәк ҝүҹүнү јалныз Аллаһын руһунун көмәклији илә газана биләрләр (Матта 24:13, 14; Јешаја 61:1, 2). Буна ҝөрә дә Иса мүгәддәс руһу «Јардымчы» адландырмышдыр (Јәһја 15:26, И–93). О демишдир ки, Аллаһын мүгәддәс руһу онун шаҝирдләрини өјрәдәҹәк вә онлара јол ҝөстәрәҹәк (Јәһја 14:16, 26; 16:13).
17. Шиддәтли тә’гибләрлә гаршылашдығымыз заман мүгәддәс руһ бизә неҹә көмәк едир?
17 Бу ҝүн тәблиғ едәркән шиддәтли тә’гибләрлә гаршылашанда Аллаһын руһу бизә неҹә көмәк едир? О бизи мөһкәмләндирир вә дүшмәнләримизә гаршы чыхыр. Ҝәлин нүмунә хүсусунда Исраилин биринҹи падшаһы Шаулун һәјатындан бир һадисәни нәзәрдән кечирәк.
Аллаһын руһу онлара гаршы чыхыр
18. а) Шаулда пислијә доғру һансы дәјишиклик баш верди? б) Шаул Давуда олан нифрәтини неҹә бүрузә верирди?
18 Башланғыҹда Шаул јахшы падшаһ иди, лакин сонрадан Јеһоваја итаәтсиз чыхды (1 Шамуел 10:1, 24; 11:14, 15; 15:17-23). Нәтиҹәдә Аллаһын руһу падшаһы артыг дәстәкләмирди. Шаул өзүндән сонра падшаһ олмаг үчүн мәсһ едилән вә Аллаһын руһу тәрәфиндән дәстәкләнән Давуда бәрк нифрәт етмәјә башлады (1 Шамуел 16:1, 13, 14). Давуд она асан әлдә едилән гәнимәт кими ҝөрүнүрдү. Давудун әлиндә садәҹә лира олдуғу һалда, Шаул әлиндә низә тутурду. Буна ҝөрә дә ҝүнләрин бириндә о, лира чалан заман, «Шаул “гој Давуду бу низә илә дивара јапышдырым” дејәрәк низәни атды. Лакин Давуд онун габағындан ики дәфә кәнара чәкилди» (1 Шамуел 18:10, 11). Сонрадан Шаул Давудун досту олан өз оғлу Јонатанын сөзүнү динләјиб «вар олан Рәбб һаггы, ону [Давуду] өлдүрмәјәҹәјәм” дејә анд ичди». Анҹаг сонра јенидән «Шаул Давуду низә илә дивара јапышдырмаға чалышды, лакин Давуд Шаулун габағындан гачды, низә дивара јапышды». Давуд гачды, амма Шаул ондан әл чәкмәди. Белә бир чәтин анда Аллаһын руһу Шаула гаршы чыхды. Неҹә? (1 Шамуел 19:6, 10).
19. Аллаһын руһу Давуду неҹә мүдафиә етди?
19 Давуд Шамуел пејғәмбәрин јанына гачды, Шаул исә өз адамларыны онун далынҹа ҝөндәрди. Онлар Давудун ҝизләндији јерә ҝәләндә «бу адамларын да үстүнә Аллаһын Руһу енди вә онлар да пејғәмбәрлик етмәјә башладылар». Аллаһын руһу онлара елә тә’сир ҝөстәрмишди ки, онлар нә үчүн ҝөндәрилдикләрини тамамилә унутмушдулар. Шаул ики дәфә дә Давудун далынҹа адамлар ҝөндәрди, анҹаг һәр дәфә ејни шеј баш верди. Нәтиҹәдә Шаул падшаһын өзү Давуду ахтармаға јолланды, анҹаг о да Аллаһын руһуна гаршы дура билмәди. Мүгәддәс руһун тә’сири алтында Шаул «бүтүн о ҝүнү вә ҝеҹәни» тәрпәнә билмәди, белә ки, Давудун ҝизләнмәк имканы олду (1 Шамуел 19:20-24).
20. Шаулун Давуду тә’гиб етмәсиндән нә өјрәнирик?
20 Шаул вә Давуд һаггындакы бу һадисәдә бизи мөһкәмләндирән ибрәт дәрси вар: Аллаһын халгынын тә’гибчиләри мүгәддәс руһа гаршы дура билмәзләр (Мәзмур 46:11; 125:2). Јеһова Давуду Исраилин падшаһы етмәк нијјәтиндә иди вә һеч ким Она әнҝәл ола билмәди. Бизим ҝүнләримиздә Јеһова мүәјјән етмишдир ки, «Сәлтәнәт [Падшаһлыг] һаггында олан бу Мүждә... тәблиғ олунаҹагдыр». Вә һеч ким буна мане ола билмәз (Һәвариләрин ишләри 5:40, 42).
21. а) Һәгигәтин мүасир дүшмәнләри неҹә фәалијјәт ҝөстәрирләр? б) Биз нәдә әминик?
21 Бә’зи дини вә сијаси рәһбәрләр бизә манечилик төрәтмәк үчүн јалана вә һәтта зоракылыға белә әл атырлар. Лакин Јеһова Давуда руһани мүдафиә вердији кими, бу ҝүн Өз халгыны да мүдафиә едир (Малаки 3:6). Бу сәбәбдән, Давуд кими, биз дә әминликлә дејирик: «Аллаһа ҝүвәнирәм вә горхмурам; фани инсан мәнә нә едә биләр?» (Мәзмур 56:11; 121:1-8; Ромалылара 8:31). Ҝәлин, Аллаһын көмәклији илә бүтүн чәтинликләрин өһдәсиндән ҝәләрәк, Јеһованын Падшаһлыг һаггындакы хош хәбәри бүтүн халглардан олан инсанлара тәблиғ етмәк тапшырығыны бундан сонра да јеринә јетирәк.
[Һашијәләр]
a 24-ҹү сәһифәдәки «Дәрин мәмнунлуг һисси» адлы чәрчивәјә бахын.
b Јеһованын Шаһидләри тәрәфиндән нәшр олунмушдур.
Хатырлаја биләрсинизми?
• Нәјә ҝөрә тәблиғ методларымызы инсанларын шәраитләринә ујғунлашдырырыг?
• Һансы јени имканлара «ҝениш гапы ачылмышдыр»?
• Тәблиғимизә зәиф мараг ҝөстәрилсә белә, һансы нәтиҹәләри әлдә едирик?
• Нәјә ҝөрә дүшмәнләр Падшаһлыг һаггындакы хош хәбәрин тәблиғини дајандыра билмәзләр?
[24-ҹү сәһифәдәки чәрчивә]
Дәрин мәмнунлуг һисси
Испанијадан Боливијаја көчән бир аилә һаггында белә јазылмышдыр: «Онлар Јеһоваја бирликдә хидмәт етдикләри үчүн хошбәхтлик вә севинҹ һисси дујурлар». Аиләнин оғулларындан бири ораја узаг әразидә јерләшән групла бирликдә тәблиғ етмәк үчүн ҝәлмишди. Онун севинҹи валидејнләринә елә тә’сир бағышлады ки, 14 јашындан 25 јашына гәдәр олан дөрд оғул да дахил олмагла, бүтүн аилә һәмин әразидә хидмәт етмәк истәдиләр. Оғулларынын үчү һазырда пионер кими хидмәт едир, Боливијаја биринҹи көчән оғул исә бу јахынларда Хидмәти Тәкмилләшдирмә Мәктәбинә дә’вәт алмышдыр.
Канададан олан Анжелика Шәрги Авропаја көчмүшдүр, онун 30 јашы вар. О дејир: «Чәтинликләр чохдур, амма мән хидмәтдә инсанлара көмәк етмәкдән севинҹ дујурам. Көмәк етмәјә ҝәлдијим үчүн тез-тез тәшәккүрләрини билдирән јерли баҹы-гардашларын миннәтдарлыг сөзләри мәним үчүн бөјүк әһәмијјәт дашыјыр.
Хидмәт етмәк үчүн Бирләшмиш Штатлардан Доминикан Республикасына көчән, тәхминән 30 јашлы ики доғма баҹы исә белә дејир: «Чохлу адәт-ән’әнәләрә алышмалы олдуг. Анҹаг тәслим олмадыг вә һал-һазырда Мүгәддәс Китабы өјрәндијимиз адамларын једдиси ҝөрүшләрә ҝәлир». Бу баҹылар јығынҹаг олмајан шәһәрләрдән бириндә Падшаһлығын тәблиғчиләриндән ибарәт груп тәшкил етмәјә көмәк етмишләр.
Лаура баҹымызын да 30-а јахын јашы вар вә о, артыг дөрд илдир ки, хариҹдә хидмәт едир. Баҹымыз дејир: «Мән биләрәкдән садә һәјат тәрзи сүрмәјә чалышырам. Бу, баҹы вә гардашлара садә һәјат тәрзинин јохсуллуг дејил, шәхси сечим вә дәрракәлик әламәти олдуғуну баша дүшмәјә көмәк едир. Башгаларына, хүсусилә дә ҝәнҹләрә көмәк етмәк һеч нә илә мүгајисәолунмаз севинҹ бәхш едир вә бу заман башга өлкәдә хидмәт етмәјин ҝәтирдији ән бөјүк чәтинликләр белә арха плана чәкилир. Мән бурадакы хидмәтими башга һеч нәјә дәјишмәрәм, Јеһова изн верәнә гәдәр бу хидмәтдә галаҹағам».
[26-ҹы сәһифәдәки чәрчивә/шәкил]
«Бүтүн халглардан олан инсанлар үчүн хош хәбәр» брошүрасынын сәҹијјәви ҹәһәтләри
«Бүтүн халглардан олан инсанлар үчүн хош хәбәр» брошүрасында Мүгәддәс Китаб хәбәри 92 дилдә гысаҹа олараг тәгдим едилир. Һәр дилә бир сәһифә ајрылыб. Мәтн биринҹи шәхсин адындан јазылыб. Буна ҝөрә, шаһидлик етдијимиз адам мәтни охујанда онда елә тәәссүрат јараныр ки, сиз шәхсән она мүраҹиәт едирсиниз.
Брошүранын ҹилдинин ич үзүндә дүнјанын хәритәси вар. Бу хәритәнин көмәјилә һәмсөһбәтинизлә достлуг мүнасибәти гура биләрсиниз. Неҹә? Сиз она өз јашадығыныз өлкәни ҝөстәрә вә онун һарадан ҝәлдијини ҝөстәрмәсини хаһиш едә биләрсиниз. Беләликлә сиз ону үнсијјәтә тәшвиг едәрәк достҹасына вә сәрбәст бир мүһит јарадаҹагсыныз.
Баша дүшмәдијимиз бир дилдә данышан адама көмәк едә билмәк үчүн, брошүранын мүгәддимәсиндә атмалы олдуғумуз бир нечә аддым садаланыр. Зәһмәт олмаса, мүгәддимәни диггәтлә охујун вә верилән мәсләһәтләрә дәгиг риајәт един.
Брошүранын мүндәриҹатында јалныз дилләр дејил, һәмчинин онларын шәрти ишарәләри дә ҝөстәрилир. Бу сәҹијјәви ҹәһәт, мүхтәлиф дилләрдә олан нәшрләримиздәки шәрти ишарәләрин һансы дилә мүвафиг олдуғуну мүәјјәнләшдирмәјә көмәк едәҹәк.
[Шәкил]
Хидмәтдә бу брошүрадан истифадә едирсинизми?
[25-ҹи сәһифәдәки шәкилләр]
Мүгәддәс Китаба әсасланан нәшрләримиз 400-дән артыг дилдә нәшр едилир.
ГАНА
ЛАПЛАНДИЈА (ИСВЕЧ)
ФИЛИППИН
[28 вә 29-ҹу сәһифәләрдәки шәкилләр]
Падшаһлығын тәблиғчиләринә бөјүк тәләбат олан јерләрдә хидмәт едә биләрсинизми?
ЕКВАДОР
ДОМИНИКАН РЕСПУБЛИКАСЫ