Мәсиһчиләр Јеһованын иззәтини әкс етдирирләр
«Ҝөзләриниз нә бәхтијардыр, чүнки ҝөрүрләр; гулагларыныз да, чүнки ешидирләр» (МАТТА 13:16).
1. Исраиллиләр Сина дағындан енән Мусаја неҹә мүнасибәт ҝөстәрдиләр вә буна ҝөрә һансы суал ортаја чыхыр?
СИНА дағынын әтәјиндә јығылмыш исраиллиләрин Јеһоваја јахынлашмаға бир чох әсаслары варды. Јеһова Өз гүввәтли әли илә халгыны Мисир әсарәтиндән хилас етмишди. Сәһрада онларын гидаја, суја олан тәләбатларыны тә’мин едирди. Бундан әлавә, Јеһова исраиллиләрә амалеглиләрин үзәриндә гәләбә чалмаға да көмәк етмишди (Чыхыш 14:26-31; 16:2–17:13). Амма сәһрада, Сина дағынын әтәјиндә дүшәрҝә салан халг, илдырымын вә шимшәјин сәсиндән о гәдәр горхмушду ки, тир-тир әсирди. Бир гәдәр вахтдан сонра Муса Сина дағындан енди. Үзүндә Јеһованын иззәти әкс олунурду. Лакин һејрәтә ҝәлмәк вә еһтирам бәсләмәк әвәзинә, исраиллиләр дәһшәт ичиндә ҝери чәкилдиләр. Онлар Мусаја «јахынлашмагдан горхдулар» (Чыхыш 19:10-19; 34:30). Нәјә ҝөрә исраиллиләр онлара бу гәдәр јахшылыг етмиш Јеһованын иззәтинин әксинә бахмагдан дәһшәтә ҝәлдиләр?
2. Аллаһын иззәтини әкс етдирән Мусаны ҝөрәндә, исраиллиләрин горхмаларына сәбәб нә ола биләрди?
2 Ола билсин, исраиллиләрин горхусуна сәбәб бир гәдәр әввәл баш вермиш һадисә иди. Онлар гызыл дана дүзәлдиб Јеһоваја гәсдән итаәтсизлик едәндә, Јеһова онлары ҹәзаландырды (Чыхыш 32:4, 35). Исраиллиләр бу ҹәзадан бир нәтиҹә чыхара билдиләрми? Бу ҹәзада Јеһованын гајғысыны ҝөрә билдиләрми? Хејр, онларын әксәријјәти бундан ибрәт дәрси алмады. Муса өлүмүндән бир гәдәр әввәл, исраиллиләрә Јеһова Аллаһа итаәткар олмадыглары вахтлары вә гызыл дана илә бағлы һадисәни дә хатырлатды. О, халга деди: «Сиз Аллаһыныз Рәббин әмринә аси чыхдыныз, Рәббә ҝүвәнмәдиниз, сөзүнә гулаг асмадыныз. Сизи таныјан ҝүндән бу вахта гәдәр дајанмадан Рәббә аси олдунуз» (Ганунун тәкрары 9:15-24).
3. Муса үзүнү нигабла нә вахт өртүр вә нә вахт ачырды?
3 Ҝөрүн, Муса исраиллиләрин горхдугларыны ҝөрәндә нә етди. Мүгәддәс Китабда дејилир: «Муса сөһбәти битирәндә үзүнә бир нигаб чәкди. Муса Рәббин һүзуруна Онунла [Јеһова илә] данышмаг үчүн ҝедәндә нигабы чыхарар вә чыханадәк нигабсыз оларды. Чыханда она нә әмр олундуғуну Исраил өвладларына нәгл едирди. Исраил өвладлары исә Мусанын үзүнүн нур сачдығыны ҝөрәрдиләр. Сонра Муса ичәри ҝириб Рәблә данышана гәдәр јенә дә нигабы үзүнә чәкәрди» (Чыхыш 34:33-35). Муса нәјә ҝөрә бә’зән үзүнү өртүрдү? Биз бундан нә өјрәнә биләрик? Ҹаваблар Јеһова илә мүнасибәтләримизин нә јердә олдуғуну мүәјјән етмәкдә бизә көмәк едәҹәк.
Әлдән верилән имканлар
4. Һәвари Павел Мусанын үзүнү нигабла өртмәсинин сәбәбини неҹә изаһ етди?
4 Һәвари Павел изаһ едир ки, Мусанын үзүнә нигаб чәкмәсинин сәбәби исраиллиләрин дүшүнҹә тәрзи вә үрәкләринин вәзијјәти иди. О јазырды: «Мусанын үзүндәки еһтишам фани олдуғу һалда, Исраил оғуллары онун үзүнә баха билмирдиләр... Онларын зеһинләри кор олмушдур» (2 Коринфлиләрә 3:7, 14). Мәҝәр кәдәрли дејилми? Исраиллиләр Аллаһын сечилмиш халгы иди вә Јеһова халгынын Онунла јахын мүнасибәт гурмасыны истәјирди (Чыхыш 19:4-6). Онлар исә Аллаһын иззәтинин әксинә бахмаг белә истәмирдиләр. Бу халг мәһәббәт вә сәдагәтдән ирәли ҝәләрәк үрәк вә ағылларыны Јеһоваја јөнәлтмәк әвәзинә, һәрәкәтләри илә әслиндә Ондан үз дөндәрирдиләр.
5, 6. а) Мусанын ҝүнләриндә јашајан исраиллиләрлә биринҹи әсрдә јашајан јәһудиләр арасында һансы охшар ҹәһәт варды? б) Исаја гулаг асанларла асмајанлар арасында һансы фәрг варды?
5 Ерамызын биринҹи әсриндә буна бәнзәр бир һадисә баш вермишди. Һәвари Павел мәсиһчи олмаздан әввәл, ганун әһди артыг јени әһдлә, Бөјүк Муса олан Иса Мәсиһин васитәсилә гүввәјә минмишди. Иса һәм сөзләри, һәм дә әмәлләри илә Јеһованын иззәтини мүкәммәл сурәтдә әкс етдирирди. Павел дирилмиш Иса һаггында јазырды ки, о, «Аллаһын иззәтинин нуру вә маһијјәтинин там сурәти»дир (Ибраниләрә 1:3). Јәһудиләрин неҹә дә ҝөзәл имканлары варды! Онлар әбәди һәјат сөзләрини Аллаһын Оғлунун ағзындан динләјә биләрдиләр! Һејф ки, Исанын тәблиғ етдији адамлардан чоху она гулаг асмады. Иса онлар һаггында данышаркән Јешаја пејғәмбәрин сөзләрини хатырлады: «Бу халгын үрәји кобудлашыб, гулаглары илә ағыр ешидирләр вә ҝөзләрини јуммушлар ки, ҝөзләри илә ҝөрмәсинләр, гулаглары илә ешитмәсинләр, үрәкләри илә анламасынлар вә мүраҹиәт етмәсинләр ки, Мән [Јеһова] онлара шәфа верим» (Матта 13:15; Јешаја 6:9, 10).
6 Исанын шаҝирдләри илә бу јәһудиләрин арасындакы фәрги ајдын ҝөрмәк оларды. Иса шаҝирдләринә деди: «Сизин исә ҝөзләриниз нә бәхтијардыр, чүнки ҝөрүрләр; гулагларыныз да, чүнки ешидирләр» (Матта 13:16). Мәсиһчиләр Јеһованы даһа јахындан танымағы вә Она хидмәт етмәји үрәкдән истәјирләр. Онлар Аллаһын ирадәсини Мүгәддәс Китабда јазылдығы кими јеринә јетирмәкдән севинҹ дујурлар. Бу сәбәбдән, јени әһдин хидмәтчиләри олан мәсһ едилмиш мәсиһчиләр Јеһованын иззәтини әкс етдирир, башга гојунлар исә онлардан нүмунә ҝөтүрүрләр (2 Коринфлиләрә 3:6, 18).
Хош хәбәр нә үчүн өртүлүдүр?
7. Инсанларын чохунун хош хәбәрдән имтина етмәси нә үчүн тәәҹҹүблү дејил?
7 Ҝөрдүјүмүз кими, һәм Мусанын, һәм дә Исанын ҝүнләриндә исраиллиләрин әксәријјәти гаршыларында ачылан мисилсиз имкандан истифадә етмәдиләр. Бизим ҝүнләрдә дә беләдир. Инсанларын чоху онлара ҝәтирдијимиз хош хәбәрдән имтина едир. Бу һал бизә тәәҹҹүблү ҝәлмир. Павел јазырды: «Әҝәр Мүждәмиз өртүлүдүрсәдә, һәлак оланлар үчүн өртүлүдүр. Онлара ҝәлинҹә, бу әсрин танрысы имансызларын зеһинләрини кор етмишдир» (2 Коринфлиләрә 4:3, 4). Шејтан хош хәбәри өртүк алтында сахламаг үчүн әлиндән ҝәләни едир. Бундан башга, бир чох инсанлар һәгигәти ҝөрмәк истәмәдикләриндән өзләри үзләрини өртүрләр.
8. Ҹаһиллик бир чох инсанларын ҝөзләрини һансы мә’нада кор етмишдир вә биз бу ҹүр вәзијјәтә дүшмәкдән өзүмүзү неҹә горуја биләрик?
8 Руһани ҹаһиллик бир чохларынын ҝөзләрини мәҹази мә’нада кор етмишдир. Мүгәддәс Китабда дејилир ки, халгларын «зеһинләри гаранлыглашмыш, ичләриндә олан ҹаһиллијә вә үрәкләринин дујғусузлуғуна ҝөрә Аллаһын һәјатына јад олмушлар» (Ефеслиләрә 4:18). Мәсиһчи олмаздан әввәл, Гануну ҝөзәл билән Павелин дә ҝөзүнү ҹаһиллик о гәдәр тутмушду ки, о, Аллаһын јығынҹағыны тә’гиб едирди (1 Коринфлиләрә 15:9). Буна бахмајараг, Јеһова она һәгигәти ачды. Ҝөрүн Павел бу һагда нә дејир: «Мән мәһз она ҝөрә мәрһәмәтә наил олдум ки, Мәсиһ Иса Өз камил тәһәммүлүнү илк олараг мәним үзәримдә зүһур етдирсин вә әбәди һәјат үчүн Она иман етмәли оланларын нүмунәси олум» (1 Тимотејә 1:16). Павел кими вахтилә Аллаһын һәгигәтинә тәзјиг ҝөстәрәнләр, бу ҝүн артыг Она хидмәт едирләр. Бу ону ҝөстәрир ки, биз һәтта мүгавимәт ҝөстәрән инсанларла да һәгигәт һаггында данышмаға давам етмәлијик. Аллаһын Кәламыны мүнтәзәм олараг охујуб, мә’насыны дәрк едириксә, онда ҹаһиллијин гурбаны олмајаҹаг вә Јеһова Аллаһы һәрәкәтләримизлә кәдәрләндирмәјәҹәјик.
9, 10. а) Биринҹи әсрдә јашајан јәһудиләр билик алмаг вә дини бахышларыны дәјишмәк истәмәдикләрини неҹә ҝөстәрдиләр? б) Бу ҝүн Христиан дүнјасында да буна охшар вәзијјәт вармы? Изаһ един.
9 Бир чохларынын руһани ҝөзләри илләр узуну әлдә етдикләри нөгтеји-нәзәрләриндән әл чәкмәк вә јени шејләр өјрәнмәк истәмәдикләри үчүн санки пәрдә илә өртүлмүшдүр. Јәһудиләрин чохлары да Мусанын ганунундан инадла јапышдыгларына ҝөрә Исаны вә онун тә’лимләрини рәдд етдиләр. Әлбәттә, мүстәсна һаллар да аз олмурду. Мәсәлән, Иса дириләндән сонра ‘каһинләрдән бир чоху да имана сарылды’ (Һәвариләрин ишләри 6:7). Буна бахмајараг, Павел јәһудиләрин әксәријјәти барәдә јазырды: «Бу ҝүн белә Мусанын јазылары охунанда, онларын үрәкләри үстүнә бир өртүк чәкилир» (2 Коринфлиләрә 3:15). Павел, ҝөрүнүр, Исанын јәһуди дин рәһбәрләринә дедији сөзләри дә билирди: «Мүгәддәс Јазылары арашдырырсыныз, чүнки әбәди һәјата онларла малик олаҹағынызы фикирләширсиниз; Мәним һаггымда шәһадәт едәнләр дә онлардыр» (Јәһја 5:39). Јәһудиләр чох диггәтлә арашдырдыглары Мүгәддәс Јазылардан Исанын Мәсиһ олдуғуну дәрк едә биләрдиләр. Амма онларын бу һагда өз фикирләри варды, һәтта Аллаһын мө’ҹүзә ҝөстәрән Оғлу белә онлары бу фикирдән дашындыра билмәди.
10 Бу ҝүн Христиан дүнјасында да ејни вәзијјәти мүшаһидә етмәк олар. Биринҹи әсрдә јашајан јәһудиләр кими, онларын да «Аллаһ үчүн сә’јләри вардыр, лакин елмә әсасланмамышдыр» (Ромалылара 10:2). Бә’зиләри Мүгәддәс Китабы өјрәнсәләр дә, орада јазыланлара инанмаг истәмирләр. Онлар Јеһованын Өз халгыны мәсһ едилмиш мәсиһчиләрдән ибарәт «садиг вә ағыллы гул» синфи васитәсилә өјрәтдијини гәбул етмирләр (Матта 24:45). Амма биз Јеһованын Өз халгына билик вердијини вә бу билијин сајәсиндә һәгигәтин даһа ајдын олдуғуну дәрк едирик (Сүлејманын мәсәлләри 4:18). Јеһованын бизи өјрәтмәсинә јол верәндә, Онун ирадәсини вә нијјәтләрини дәрк едирик.
11. Нәјә ҝөрә һәгигәт јалныз өз истәдикләринә инананлар үчүн өртүлүдүр?
11 Башгалары исә јалныз истәдикләри шејләрә инандыглары үчүн һәгигәти дәрк етмирләр. Мүгәддәс Китабда пејғәмбәрлик едилмишдир ки, бә’зиләри Аллаһын халгыны вә онларын Исанын иштиракы һаггында бәјан етдикләри хәбәри лаға гојаҹаглар. Һәвари Петер јазырды ки, белә дүшүнәнләр Нуһун дөврүндәки дүнјанын Дашгын сулары илә мәһв едилдијини «гәсдән билмәк истәмирләр» (2 Петер 3:3-6, И–93). Бу ҝүн дә өзләрини Мәсиһин давамчысы адландыранлар Аллаһын лүтфкар, хејирхаһ вә бағышлајан олдуғуну е’тираф едирләр, амма етдикләри ҝүнаһларына ҝөрә Јеһованын инсанлары ‘ҹәзасыз гојмадығы’ фактыны нәинки ҹидди гәбул етмир, һәтта буна әһәмијјәт белә вермирләр (Чыхыш 34:6, 7). Һәгиги мәсиһчиләр исә онлардан фәргли олараг, Мүгәддәс Китабын әслиндә нә өјрәтдијини баша дүшмәк үчүн сә’јлә чалышырлар.
12. Ән’әнәләр инсанларын ҝөзүнү неҹә кор едир?
12 Ибадәт јерләринә ҝедәнләрдән чохунун ҝөзүнү адәт-ән’әнәләр тутуб. Иса өз дөврүнүн дин рәһбәрләринә дејирди: «Сиз, өз ән’әнәниз наминә Аллаһын әмрини тә’сирсиз едирсиниз» (Матта 15:6). Бабил әсарәтиндән гајыдандан сонра јәһудиләр тәмиз ибадәти бөјүк сә’јлә бәрпа етдиләр. Лакин каһинләр өз ҝөзләриндә салеһ вә гүрурлу олмаға башладылар. Дини бајрамлар формал характер дашымаға башлады вә онлар артыг Аллаһа иззәт ҝәтирмирди (Малаки 1:6-8). Иса доғулмаздан әввәл, дин алимләри вә фәрисејләр Мусанын ганунуна сајсыз-һесабсыз ән’әнәләр әлавә етмишдиләр. Иса фәрисејләри вә дин алимләринин ријакар олдугларыны үзләринә дејирди, чүнки онлар Ганунун әсасландығы салеһ принсипләри нәзәрдән гачырмышдылар (Матта 23:23, 24). Мәсиһчиләр јол вермәмәлидирләр ки, инсанларын ујдурдуглары адәт вә ән’әнәләр онлары һәгиги ибадәтдән јајындырсын.
Ҝөрүнмәјәни ҝөрүрүк
13. Муса һансы ики јолла Аллаһын иззәтини ҝөрә билди?
13 Муса Сина дағында оларкән Јеһовадан она иззәтини ҝөстәрмәсини хаһиш етди вә Аллаһ она Өз иззәтинин шө’ләсини ҝөстәрди. Муса Һүзур чадырына ҝирәндә үзүнү нигабла өртмүрдү. Онун бөјүк иманы вә Аллаһын ирадәсини үрәкдән јеринә јетирмәк истәји варды. Мусаја Јеһованын иззәтини ҝөрүнтүдә ҝөрмәк шәрәфи нәсиб олса да, мүәјјән мә’нада о, Аллаһы иман ҝөзләри илә артыг ҝөрмүшдү. Мүгәддәс Китаб дејир ки, Муса «ҝөрүнмәјәни ҝөрүрмүш кими, мөһкәм» дајанырды (Ибраниләрә 11:27; Чыхыш 34:5-7). О, Аллаһын иззәтини вахташыры олараг тәкҹә үзүнүн нуру илә әкс етдирмирди. Муса, исраиллиләрин Јеһованы таныјыб Она хидмәт етмәләри үчүн әлиндән ҝәләни едирди вә мәһз бу јолла Аллаһынын иззәтини әкс етдирирди.
14. Иса Аллаһын иззәтини неҹә ҝөрүрдү вә нәдән севинҹ дујурду?
14 Иса һәлә каинат јарадылмаздан әввәл ҝөјдә јашајыб вә сајы билинмәз әсрләр әрзиндә Аллаһын иззәтини өз ҝөзләри илә ҝөрүрдү (Сүлејманын мәсәлләри 8:22, 30). Бу узун вахт бојунҹа онларын арасында мөһкәм мәһәббәт вә бағлылыг телләри јаранмышды. Јеһова Аллаһ јаратдығы мәхлуглар арасында илкин олан Оғлуна ән зәриф мәһәббәт һисси дујурду, Аллаһ Өз Оғлуна чох бағланмышды. Иса да она Һәјат Верән Атасыны гаршылыглы олараг бөјүк вә зәриф мәһәббәтлә севирди (Јәһја 14:31; 17:24). Ата илә Оғул арасында олан бу һиссләр камил мәһәббәтин ән ҝөзәл нүмунәсидир. Муса кими, Иса да, тәблиғ етдији тә’лимләри илә Јеһованын иззәтини әкс етдирмәкдән севинҹ дујурду.
15. Мәсиһчиләр Аллаһын иззәтини һансы мә’нада сејр едирләр?
15 Мусадан вә Исадан нүмунә ҝөтүрәрәк, Аллаһын мүасир хидмәтчиләринә дә Јеһованын иззәтини сејр етмәк севинҹ ҝәтирир. Онлар шәрәфли хош хәбәрдән үз дөндәрмирләр. Һәвари Павел јазырды: «Үрәк [ирадәсини јеринә јетирмәк үчүн] Рәббә дөнәндә, бу өртүк арадан галдырылыр» (2 Коринфлиләрә 3:16). Биз Аллаһын ирадәсини јеринә јетирмәк истәдијимиз үчүн Мүгәддәс Јазылары тәдгиг едирик. Һәмчинин Јеһованын Оғлу, мәсһ едилмиш Падшаһ Иса Мәсиһин дә Аллаһын иззәтини әкс етдирдијини ҝөрмәкдән севинҹ дујур вә ондан нүмунә ҝөтүрүрүк. Бизә Мусанын вә Исанын јеринә јетирдији хидмәт һәвалә едилиб. Биз дә Аллаһымыз Јеһова һаггында башгаларына өјрәтмәк кими шәрәфли имкана маликик.
16. Һәгигәти билмәк һансы хејир-дуаны ҝәтирир?
16 Иса дуа едирди: «Ата, шүкүр едирәм Сәнә ки, бу шејләри мүдрикләрдән вә ағыллылардан ҝизләдиб, көрпәләрә ачдын» (Матта 11:25). Јеһова нијјәтләрини вә шәхсијјәтини үрәји тәмиз вә һәлим оланлара ачыр (1 Коринфлиләрә 1:26-28). Биз Аллаһын һимајәси алтындајыг. О бизим гајғымыза галыр вә бизә һәјатымыздан там фајда әлдә етмәји өјрәдир. Бунун үчүн ҝәлин һәр бир имкандан истифадә едәрәк Јеһоваја јахынлашаг вә Онунла мөһкәм мүнасибәт гурмаг үчүн бизә вердији һәр шеји јүксәк гијмәтләндирәк.
17. Јеһованын кејфијјәтләри илә даһа јахындан неҹә таныш ола биләрик?
17 Павел мәсһ едилмиш мәсиһчиләрә јазырды: «Биз һамымыз исә, ачыг үзлә Рәббин ҹалалыны ајнада имиш кими сејр едәрәк, ҹалалдан ҹалала кечиб, Онунла ејни сурәтдә дәјишдирилирик» (2 Коринфлиләрә 3:18). Ҝөјдә вә ја јердә јашамаг үмидинә малик олмағымыздан асылы олмајараг, һамымыз Мүгәддәс Китаб васитәсилә Јеһова вә Онун кејфијјәтләри илә даһа јахындан таныш олмаг истәјирик. Аллаһла нә гәдәр јахындан таныш олуругса, бир о гәдәр дә Она бәнзәмәјә башлајырыг. Һәмчинин, әҝәр Иса Мәсиһин һәјаты, хидмәти вә тә’лимләри барәдә дәриндән дүшүнүрүксә, онда Јеһованын кејфијјәтләрини өз һәјатымызда даһа чох әкс етдирәҹәјик. Буну етмәклә Јеһоваја шәрәф ҝәтирдијимизи билмәк бизи нә гәдәр севиндирир!
Хатырлајырсынызмы?
• Исраиллиләр нә үчүн Јеһованын иззәтини әкс етдирән Мусаја бахмагдан горхурдулар?
• Хош хәбәр биринҹи әсрдә һансы мә’нада өртүлү иди, бәс бизим ҝүнләр һагда нә демәк олар?
• Биз Аллаһын иззәтини неҹә әкс етдиририк?
[13-ҹү сәһифәдәки шәкил]
Исраиллиләр Мусанын үзүнә баха билмирдиләр.
[17-ҹи сәһифәдәки шәкилләр]
Јеһованын хидмәтчиләри Онун иззәтини әкс етдирмәкдән севинҹ дујурлар.