Аллаһа олан е’тибарын нә гәдәр мөһкәмдир?
«Әввәлҹә Онун Падшаһлығыны... ахтарын» (МАТТА 6:33, И-93).
1, 2. Бир ҝәнҹ мәсиһчи өз иши илә әлагәдар һансы аддымы атды вә нә үчүн?
БИР ҜӘНҸ мәсиһчи өз јығынҹағына даһа чох көмәк етмәк истәјирди. Амма дүнјәви ишинә ҝөрә јығынҹаг ҝөрүшләринә мүнтәзәм олараг ҝәлә билмирди. Ҝәнҹ бу проблеми неҹә һәлл етди? О, һәјатыны садәләшдирди вә ишиндән чыхды. Мүәјјән вахтдан сонра јығынҹағын ишләриндә иштирак етмәјә имкан верән башга бир иш тапды. Инди, әввәлкиндән даһа аз газанса да, бу ҝәнҹ мәсиһчи өз аиләсини тә’мин етмәклә јанашы, јығынҹағын да ишләриндә там сурәтдә иштирак едә билир.
2 Бу ҝәнҹин нә үчүн белә бир аддым атдығыны билирсәнми? Өзүндән соруш: онун јериндә мән олсајдым, бу ҹүр аддым атардыммы? Бир чох мәсиһчиләр һәјатларында белә дәјишикликләр едибләр вә бу, әлбәттә ки, тә’рифә лајигдир. Онлар бу һәрәкәтләри илә Исанын «Әввәлҹә Онун Падшаһлығыны вә Онун салеһлијини ахтарын; вә бүтүн бу шејләр сизә артырылаҹагдыр» вә’динә там әмин олдугларыны ҝөстәрибләр (Матта 6:33, И–93). Онлар баша дүшүрләр ки, ҝәләҹәјә әминлији бу дүнја дејил, јалныз Аллаһ верә биләр (Сүлејманын мәсәлләри 3:23, 26).
3. Бә’зи адамларда Падшаһлығын марагларыны һәјатда өн плана гојмағын нә гәдәр әлверишли олдуғуна даир һансы суал јарана биләр?
3 Јашадығымыз чәтин зәманәни нәзәрә алараг, бә’зиләри бу ҝәнҹин һәрәкәтинин нә дәрәҹәдә дүшүнүлмүш олмасына шүбһә едә биләрләр. Бу ҝүн бәшәријјәтин бир һиссәси тарихдә ҝөрүнмәмиш јүксәк һәјат тәрзиндән һәзз алдығы заман, о бири һиссәси јохсуллуг ичәрисиндә һәјат сүрүр. Касыб өлкәләрдә јашајанларын чоху аиләләрини доландырмаг үчүн һәр бир ишдән јапышмаға һазырдыр. Нисбәтән варлы өлкәләрдә исә игтисади вәзијјәт гејри-сабитләшир, саһибкарлар ҝет-ҝедә тәләбкарлашыр, әмәк биржаларында ишчиләрә олан тәләбләр даим дәјишир. Бу сәбәбләрә ҝөрә белә өлкәләрдә јашајанлар өз һәјат тәрзләрини сабит сахламагдан өтрү ҝеҹә-ҝүндүз чалышырлар. Ҝүзаранын бу гәдәр чәтин олдуғу зәманәдә бә’зиләри соруша биләр: «Бу ҝүн ‘әввәлҹә Падшаһлығы ахтармаг’ доғруданмы әлверишлидир?» Бу суалын ҹавабыны тапмаг үчүн ҝәлин ҝөрәк Иса бу сөзләри кимә дејирди.
Даһа гајғы чәкмәјин
4, 5. Иса һансы әјани мисалла ҝөстәрди ки, Аллаһын хидмәтчиләринә һәјатын ҝүндәлик гајғыларындан өтрү нараһат олмаға дәјмәз?
4 Иса Галилејада оларкән, јанына мүхтәлиф јерләрдән инсанлар ҝәлир (Матта 4:25). Онларын арасында, демәк олар ки, варлы адам јохдур, әксәријјәти касыбдыр. Буна бахмајараг, Иса онлары тәшвиг едир ки, варланмаға ҹан атмасынлар, әксинә, мадди шејләрдән даһа дәјәрли олан руһани хәзинә јығсынлар (Матта 6:19-21, 24). Иса онлара мүраҹиәт едир: «Бунун үчүн сизә дејирәм: Нә јејәҹәксиниз, јахуд нә ичәҹәксиниз дејә ҹанынызын, нә ҝејәҹәксиниз дејә бәдәнинизин гајғысына галмајын. Ҹан јемәкдән вә бәдән ҝејимдән даһа ваҹиб дејилми?» (Матта 6:25).
5 Исаны динләјәнләрин әксәријјәтинә бу мәсләһәтә риајәт етмәк гејри-мүмкүн ҝөрүнә биләрди. Онлар билирдиләр ки, ишләмәсәләр аиләләри аҹындан өләр. Лакин Иса онлара гушлары мисал ҝәтирир. Гушлар өзләрини вә балаларыны дојдурмаг үчүн һәр ҝүн јем ахтарырлар. Амма онларын гејдинә галан Јеһовадыр. Иса, Јеһованын чичәкләрә дә гајғы бәсләмәсинә ишарә едир. Исанын дедијинә ҝөрә, һәтта Сүлејман падшаһ белә, бүтүн иззәтиндә бу чичәкләр гәдәр ҝөзәл ҝејинмирди. Әҝәр Јеһова гушларын вә чичәкләрин гејдинә галырса, мәҝәр хидмәтчиләринин гејдинә даһа чох галмајаҹагмы?! (Матта 6:26-30). Исанын бу сөзләриндән ҝөрүнүр ки, һәјатымыз (ҹанымыз) вә бәдәнимиз, онлары горумаг үчүн лазым олан гидадан вә ҝејимдән гат-гат үстүндүр. Әҝәр бүтүн гүввәмизи гида вә ҝејим әлдә етмәјә сәрф едириксә вә бундан сонра Јеһоваја хидмәт етмәк үчүн ҝүҹүмүз галмырса, демәли, нә үчүн јашадығымызы дәрк етмәмишик (Ваиз 12:13).
Таразлы нөгтеји-нәзәр
6. а) Мәсиһчиләр һансы мәс’улијјәти дашыјырлар? б) Мәсиһчиләр кимә там е’тибар едирләр?
6 Иса демәк истәмирди ки, ону динләјәнләр ишләрини атыб Аллаһын онларын аиләләрини доландыраҹағыны ҝөзләмәлидирләр. Хејр, гушлар белә, өзләрини вә балаларыны дојдурмаг үчүн јем ахтарырлар. Онда белә чыхыр ки, о мәсиһчиләр дә јемәк истәјирдиләрсә, ишләмәли вә өз аиләләринин гајғысыны өзләри чәкмәли идиләр. Мәсиһин тә’лимләрини гәбул етмиш нөкәрләр вә гуллар ағаларына ҹанла-башла хидмәт етмәли идиләр (2 Салоникилиләрә 3:10-12; 1 Тимотејә 5:8; 1 Петер 2:18). Һәвари Павел дә өзүнү доландырмаг үчүн арабир чадыр дүзәлтмәклә мәшғул олурду (Һәвариләрин ишләри 18:1-4; 1 Салоникилиләрә 2:9). Ҝөрдүјүмүз кими, о вахт јашајан мәсиһчиләр дүнјәви ишиләринә ҝүвәнмирдиләр. Онлар Јеһоваја е’тибар едирдиләр. Башгаларындан фәргли олараг, онларын гәлбиндә һәмишә әмин-аманлыг һөкм сүрүрдү. Мәзмурчу белә јазмышды: «Рәббә ҝүвәнәнләр Сион дағы кими сарсылмаз, әбәди галар» (Мәзмур 125:1).
7. Јеһоваја там үрәкдән е’тибар етмәјәнләр неҹә фикирләшә биләрләр?
7 Јеһоваја там үрәкдән е’тибар етмәјәнләр ајры фикирдә ола биләрләр. Инсанларын әксәријјәти үчүн мадди сәрвәт ҝәләҹәјә зәманәтдир. Белә фикирләшән валидејнләр ушагларыны тәшвиг едирләр ки, ҝәнҹлик илләрини али тәһсил алмаға сәрф етсинләр. Онлар али тәһсилин ушагларына јүксәк маашлы иш тапмаға көмәк едәҹәјинә үмид едирләр. Әфсуслар олсун ки, бә’зи мәсиһчи валидејнләр дә бу ҹүр дүшүнҹә тәрзинин гурбаны олублар. Онларын ушаглары һәјатда өн плана руһани мәгсәдләри гојмаг әвәзинә, мадди мәгсәдләр ҝүдмәјә башлајыблар.
8. Мәсиһчиләр һансы таразлы нөгтеји-нәзәри горумалыдырлар?
8 Мүдрик мәсиһчиләр исә анлајырлар ки, Исанын вердији мәсләһәт биринҹи әсрдә олдуғу кими, бизим ҝүнләрдә дә өз актуаллығыны итирмәјиб. Бу сәбәбдән дә онлар ишә мүнасибәтдә таразлығы горумаға чалышырлар. Әҝәр валидејнләр аиләнин гејдинә галмаг үчүн дүнјәви ишләринә чохлу вахт сәрф етмәли олсалар да, онлар јол вермирләр ки, пул газанмаг даһа ваҹиб олан руһани шејләри онларын һәјатындан сыхышдырыб чыхарсын (Ваиз 7:12).
Һеч вахт гајғы чәкмәјин
9. Иса, Јеһоваја бүтүн гәлби илә е’тибар едән инсанлары нәјә әмин едир?
9 Дағүстү тәблиғиндә Иса динләјиҹиләрини тәшвиг едирди: «“Нә јејәҹәјик?”, “Нә ичәҹәјик?”, “Нә ҝејәҹәјик?” — дејә гајғы чәкмәјин. Чүнки бүтүн бу шејләри бүтпәрәстләр ахтарырлар [«бүтүн бу шејләрә бүтпәрәстләр ҹан атырлар», ЈД]; сәмави Атаныз да бүтүн бу шејләрә еһтијаҹ дујдуғунузу билир» (Матта 6:31, 32). Һәгигәтән дә, руһландырыҹы сөзләрдир! Әҝәр Јеһоваја бүтүн гәлбимизлә е’тибар едириксә, О һеч вахт биздән көмәјини әсирҝәмәјәҹәк. Исанын сөзләриндәки мараглы бир мәгама да фикир верин: мадди шејләрә ‘ҹан атырыгса’ онда биз «бүтпәрәстләр», јә’ни мәсиһчи олмајан инсанлар кими ејни дүшүнҹә тәрзинә малик олмуш олуруг.
10. Бир ҝәнҹ Исанын јанына мәсләһәт далынҹа ҝәләндә, Иса онун һәјатда ән чох нәјә үстүнлүк вердијини неҹә үзә чыхартды?
10 Бир дәфә, варлы бир ҝәнҹ әбәди һәјата наил олмаг үчүн нә етмәли олдуғуну Исадан сорушур. Иса она о вахт гүввәдә олан Ганунун тәләбләрини хатырладыр. Һәмин оғлан Исаја дејир: «Бүтүн бунлара ҝәнҹлијимдән риајәт едирәм; даһа нәјим чатышмыр?» Исанын ҹавабы бу сәһнәни мүшаһидә едәнләрә сәрфәли ҝөрүнмәјә биләрди. О дејир: «Әҝәр камил олмаг истәјирсәнсә, ҝет нәјин варса сат, јохсуллара пајла. Ҝөјләрдә хәзинән олаҹагдыр. Сонра ҝәл, Мәним ардымҹа ҝет» (Матта 19:16-21). Ҝәнҹ бу ҹавабдан кәдәрләниб евинә гајытды. О, вар-дөвләтсиз јашамағы тәсәввүрүнә ҝәтирә билмирди. Јеһованы нә гәдәр чох севсә дә, вар-дөвләтини Ондан да чох севирди.
11, 12. а) Иса вар-дөвләтә даир һансы ваҹиб хәбәрдарлығы етди? б) Вар-дөвләт Јеһоваја хидмәтдә неҹә манеәјә чеврилә биләр?
11 Бу һадисәдән сонра Иса һамы үчүн ҝөзләнилмәз олан бир фикри сөјләди: «Зәнҝин адам Ҝөјләрин Падшаһлығына чәтинликлә ҝирәҹәкдир... Дәвәнин ијнә дешијиндән кечмәси, зәнҝин адамын Аллаһын Падшаһлығына ҝирмәсиндән даһа асандыр» (Матта 19:23, 24, И–93). Иса бунунла нә демәк истәјирди? Мәҝәр варлылар Падшаһлығы мирас ала билмәјәҹәкләрми? Ҝөрүн Иса сонра нә дејир: «Аллаһ үчүн... һәр шеј мүмкүндүр» (Матта 19:25, 26). Доғрудан да, Јеһованын көмәји илә биринҹи әсрдә бә’зи варлы адамлар мәсһ едилмиш мәсиһчи олдулар (1 Тимотејә 6:17). Бунунла белә, бу сөзләри демәкдә Исанын башга бир мәгсәди варды. О, шаҝирдләрини хәбәрдар едирди.
12 Әҝәр о ҝәнҹ кими, мәсиһчи дә үрәјинин вар-дөвләтә бағланмасына јол верирсә, вар-дөвләт онун Јеһоваја үрәкдән хидмәт етмәсинә манечилик төрәдәҹәк. Бу һәм варлылара, һәм дә варланмаг фикринә дүшәнләрә аиддир (1 Тимотејә 6:9, 10). Мадди шејләрә ҝүвәнән инсан ҝет-ҝедә ‘руһани тәләбатларыны дәрк етмир’ (Матта 5:3, ЈД). Она елә ҝәлә биләр ки, артыг Јеһованын көмәјинә еһтијаҹы јохдур (Ганунун тәкрары 6:10-12). О һәтта јығынҹагдан өзүнә гаршы хүсуси мүнасибәт ҝөзләјә биләр (Јагуб 2:1-4). Нәтиҹәдә белә инсан вахтыны артыг Јеһоваја хидмәтә дејил, вар-дөвләтиндән һәзз алмаға сәрф едәҹәк.
Дүзҝүн мүнасибәт инкишаф етдирин
13. Лаодикијалылар нәјә дүзҝүн мүнасибәт бәсләмирдиләр?
13 Биринҹи әсрдә Лаодикијада фәалијјәт ҝөстәрән мәсиһчи јығынҹағы вар-дөвләтә дүзҝүн мүнасибәт бәсләмирди. Иса онлара мүраҹиәт етди: «Дејирсән: “Мән зәнҝинәм вә варланмышам, һеч нәјә еһтијаҹым јохдур”. Амма билмирсән ки, заваллы, јазыг, јохсул, кор вә чылпагсан». Лаодикијалылары руһани ҹәһәтдән бу ҹүр аҹынаҹаглы вәзијјәтә салан вар-дөвләт дејилди. Онлары бу вәзијјәтә салан Јеһоваја јох, вар-дөвләтә бел бағламалары иди. Нәтиҹәдә онлар руһани мә’нада ичмәјә јарарлы олмајан илыг су кими олдулар. Иса аз гала онлары ‘ағзындан гусаҹагды’ (Вәһј 3:14-17).
14. Павел ибраниләрдән олан мәсиһчиләри нәјә ҝөрә тә’рифләди?
14 Павел ибраниләрдән олан мәсиһчиләри тә’гибләр башлајанда тәзаһүр етдирдикләри әһвал-руһијјәјә ҝөрә тә’рифләди: «Сиз, бағларыма рәһм едиб, өзүнүз үчүн даһа јахшы вә даими малыныз олдуғуну биләрәк, мүлкүнүзүн талан едилмәсини севинҹлә гәбул етдиниз» (Ибраниләрә 10:34). Мәсиһчиләр вар-јохларыны итирдикләринә ҝөрә мә’јус олмадылар. Әксинә, онлар вар-дөвләтдән дә дәјәрли олан ‘даһа јахшы вә даими малы’ горујуб сахладыглары үчүн севинҹләрини итирмәдиләр. Исанын мәсәлиндәки һәр шејини бир дәјәрли мирваридән өтрү гурбан верән таҹир кими, бу мәсиһчиләр нәјин баһасына олурса-олсун, Падшаһлыг үмидиндән бәрк јапышмышдылар (Матта 13:45, 46). Неҹә дә ҝөзәл әһвал-руһијјәдир!
15. Либеријада јашајан баҹымыз онун үчүн Падшаһлығын марагларынын әсас олдуғуну неҹә ҝөстәрди?
15 Бу ҝүн дә бир чох мәсиһчиләр бу ҹүр әһвал-руһијјә тәзаһүр етдирирләр. Мәсәлән, Либеријада јашајан бир мәсиһчи гызын нүмунәсини нәзәрдән кечирәк. Онун университетдә тәһсил алмаг имканы вар иди. Либеријада бир чохлары үчүн бу, сакит ҝәләҹәји тә’мин етмәк демәкдир. Баҹымыз пионер, јә’ни таммүддәтли хидмәтчи иди вә мүвәггәти олараг, хүсуси пионер кими хидмәт етмәк үчүн дә’вәт алмышды. О, Падшаһлығын марагларыны һәјатында өн плана гојду вә таммүддәтли хидмәтдә галмағы гәрара алды. Јени тә’јинатыны гәбул едәндән сонра, о, үч ај әрзиндә 21 Мүгәддәс Китаб өјрәнмәсинә башлады. Бу баҹымыз кими, минләрлә мәсиһчиләр мадди сәрвәти дејил, Падшаһлығын марагларыны һәјатларында биринҹи јерә гојурлар. Бу дүнјада әксәр инсанларын башы вар-дөвләт газанмаға гарышдығы һалда, мәсиһчиләр белә дүшүнҹә тәрзини неҹә горујуб сахлајырлар? Бу ишдә онлара бир нечә ҝөзәл кејфијјәт көмәк едир. Ҝәлин онлардан бир нечәсини нәзәрдән кечирәк.
16, 17. а) Тәвазөкарлыг Јеһоваја е’тибар етмәкдә һансы ваҹиб ролу ојнајыр? б) Биз нә үчүн Аллаһын вә’дләринин јеринә јетәҹәјинә олан әминлији даима инкишаф етдирмәлијик?
16 Тәвазөкарлыг. Мүгәддәс Китабда јазылыб: «Бүтүн гәлбинлә Рәббә ҝүвән, өз идракына е’тибар етмә. Бүтүн јолларында Ону таны, О сәнин јолларыны дүзәлдәр. Өз ҝөзүндә өзүнү һикмәтли санма» (Сүлејманын мәсәлләри 3:5-7). Мисал үчүн, мүәјјән бир вәзијјәтә инсан нөгтеји-нәзәриндән баханда, о бизә әлверишли ҝөрүнә биләр (Јеремја 17:9). Анҹаг сәмими мәсиһчи гәрар гәбул етмәздән әввәл Јеһованын рәһбәрлијини ахтараҹаг (Мәзмур 48:14). Мәсиһчи, «бүтүн јолларында» — јығынҹаг ишләриндә, тәһсил алмагда, дүнјәви ишинә мүнасибәтдә, әјләнҹә мәсәләләриндә вә башга шејләрдә Јеһованын нәсиһәтләринә тәвазөкарлыгла риајәт едәҹәк (Мәзмур 73:24).
17 Јеһованын вә’дләринә әминлик. Павел демишди: «Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир» (Ибраниләрә 11:6). Әҝәр биз Јеһованын Өз вә’дләрини јеринә јетирәҹәјинә шүбһә едириксә, бизә елә ҝөрүнә биләр ки, ‘бу дүнјадан там истифадә етмәјын’ һеч бир зәрәри јохдур (1 Коринфлиләрә 7:31). Амма әҝәр иманымыз мөһкәмдирсә, онда ‘әввәлҹә Падшаһлығы ахтараҹағыг’. Бәс мөһкәм иманы неҹә инкишаф етдирмәк олар? Буну, Јеһова Аллаһа үрәкдән ҝәлән дуаларын васитәсилә јахынлашмағын вә мүнтәзәм шәхси өјрәнмәнин көмәји илә етмәк олар (Мәзмур 1:1-3; Филипилиләрә 4:6, 7; Јагуб 4:8). Биз дә падшаһ Давуд кими дуа едә биләрик: «Ја Рәбб, јалныз Сәнә ҝүвәнирәм, дедим: “Аллаһымсан Сән”. Хејирхаһлығын нә гәдәр бөјүкдүр!» (Мәзмур 31:14, 19).
18, 19. а) Чалышганлыг Јеһоваја олан е’тибарымызы неҹә мөһкәмләдә биләр? б) Мәсиһчи нәјә ҝөрә бә’зи шејләрдән имтина етмәјә һазыр олмалыдыр?
18 Јеһоваја хидмәтдә чалышганлыг. Павел, Јеһованын вә’дләринин јеринә јетәҹәјинә олан әминлији чалышганлыгла әлагәләндирир: «Арзу едирик ки, һәр бириниз, үмидин вердији там е’тимада наил олмаг үчүн сона гәдәр ејни сә’ји ҝөстәрсин» (Ибраниләрә 6:11). Әҝәр Јеһованын иши илә даим мәшғулугса, онда О бизә көмәк едәҹәк. Һәр дәфә бу көмәји һисс едәндә, Она олан е’тибарымыз ҝүҹләнәҹәк, биз «мөһкәм вә сарсылмаз» олаҹағыг (1 Коринфлиләрә 15:58). Иманымыз вә үмидимиз үрәјимиздә дәрин көк салаҹаг (Ефеслиләрә 3:16-19).
19 Гурбан вермәјә һазыр олмаг. Исанын давамчысы олмагдан өтрү Павел чох шеј вә’д едән карјерасыны гурбан верди. Бә’зән һәјатында мадди ҹәһәтдән чәтинликләр олса да, о, дүзҝүн јолу сечмишди (1 Коринфлиләрә 4:11-13). Јеһова хидмәтчиләринә онларын һәјатынын ҹаһ-ҹалал ичиндә кечәҹәјини сөз вермир. Онун хидмәтчиләри һәрдән чәтинликләрлә үзләшмәли олурлар. Амма һәјат тәрзимизи садәләшдириб бә’зи шејләрдән имтина етмәјә һазырыгса, Јеһоваја хидмәт етмәјә нә гәдәр гәтијјәтли олдуғумузу сүбут едәҹәјик (1 Тимотејә 6:6-8).
20. ‘Әввәлҹә Падшаһлығы ахтаранлар’ үчүн сәбирли олмаг нәјә ҝөрә чох ваҹибдир?
20 Сәбир. Шаҝирд Јагуб мәсиһчи баҹы-гардашларына дејирди: «Беләликлә, еј гардашлар, Рәббин ҝәлишинә кими сәбирли дурун» (Јагуб 5:7). Мүасир, дәјишкән дүнјада сәбирли олмаг асан дејил. Биз һәр шејин тез баш вермәсини истәјирик. Лакин Павел бизи тәшвиг едир ки, ‘вә’д олунанлары иман вә сәбирлиликлә мирас аланлардан нүмунә ҝөтүрәк’ (Ибраниләрә 6:12). Буна ҝөрә дә Јеһованы ҝөзләмәјә һазыр олмалыјыг. Мәҝәр Ҹәннәтә чеврилмиш јер үзүндә әбәди һәјаты ҝөзләмәјә дәјмәзми?!
21. а) Падшаһлығын марагларыны һәјатда өн плана гојмагла Аллаһа нәји ҝөстәририк? б) Нөвбәти мәгаләдә нәји мүзакирә едәҹәјик?
21 Бәли, ҝөрдүјүмүз кими, Исанын ‘әввәлҹә Падшаһлығы ахтарын’ мәсләһәти бу ҝүн дә чох актуалдыр. Биз бу мәсләһәтә риајәт едәндә һәгигәтән дә, Јеһоваја е’тибар етдијимизи вә мәсиһчи үчүн јеҝанә е’тибарлы һәјат јолуну сечдијимизи ҝөстәририк. Бунунла јанашы, Иса «[Аллаһын] салеһлијини» ахтармағы да бујурмушду. Нөвбәти мәгаләдә бу мәсләһәтин бу ҝүн нәјә ҝөрә хүсусилә ваҹиб олдуғуну мүзакирә едәҹәјик.
Изаһ едә биләрсинизми?
• Иса, бизи мадди сәрвәтләрә даир һансы таразлы нөгтеји-нәзәри инкишаф етдирмәјә тәшвиг едир?
• Исанын дәвә вә ијнә дешији барәсиндәки әјани мисалындан биз нә өјрәнирик?
• ‘Әввәлҹә Аллаһын Падшаһлығыны ахтармагда’ бизә һансы мәсиһчи кејфијјәтләри көмәк едир?
[25-ҹи сәһифәдәки шәкил]
Исаны динләјәнләрин әксәријјәти касыб иди.
[26-ҹы сәһифәдәки шәкил]
Исанын мәсәлиндән олан таҹир бир мирваридән өтрү һәр шејини гурбан верди.
[26-ҹы сәһифәдәки шәкил]
Зәнҝин ҝәнҹ вар-дөвләтини Аллаһдан чох севирди.
[27-ҹи сәһифәдәки шәкил]
Әҝәр Јеһованын иши илә даим мәшғулугса, онда Аллаһ бизә көмәк едәҹәк.