Салеһлији ахтармаг бизи горујаҹаг

«Әввәлҹә... [Аллаһын] салеһлијини ахтарын» (МАТТА 6:33).

1, 2. Ҝәнҹ мәсиһчи гадын һансы гәрары гәбул етди вә нә үчүн?

АСИЈА өлкәләринин бириндә јашајан ҝәнҹ бир мәсиһчи гадын һөкумәт мүәссисәсиндә катибә кими чалышырды. О, чох виҹданлы ишчи иди, ишә вахтында ҝәлир вә иш вахтыны бош јерә сәрф етмирди. Бунунла белә, онун вәзифәси даими дејилди вә бир ҝүн намизәдлијинә јенидән бахылмағын вахты ҝәлди. Шө’бә мүдири ҝәнҹ гадына деди ки, ону нәинки даими ишә ҝөтүрәҹәк, һәтта даһа јүксәк вәзифә дә верәҹәк, бир шәртлә ки, о, мүдири илә ҹинси әлагәјә ҝирмәлидир. Бахмајараг ки, бу онун үчүн ишин итирилмәси демәк иди, мәсиһчи гадын бу тәклифдән дәрһал имтина етди.

² Сизҹә, ҝәнҹ гадын дүзмү һәрәкәт етди? Бәли, чүнки о, Исанын сөзләринә риајәт едирди: «Әввәлҹә... [Аллаһын] салеһлијини ахтарын» (Матта 6:33). Бу гадын үчүн Аллаһын салеһ әмрләринә риајәт етмәк, ҹинси әхлагсызлыг јолу илә нәјәсә наил олмагдан даһа ваҹиб иди (1 Коринфлиләрә 6:18).

Салеһлијин ваҹиблији

3. Салеһлик нә демәкдир?

³ «Салеһлик» сөзү алтында әхлаги тәмизлик вә доғрулуг нәзәрдә тутулур. Мүгәддәс Китабда «салеһлик» кими тәрҹүмә едилән ибрани вә јунан сөзләри дүзлүк вә әхлаг гајдаларына ујғун јашамаг мә’насыны дашыјыр. Лакин бурада инсанын өзү һаггында шәхси нормаларына ујғун мүһакимә јүрүтмәси нәзәрдә тутулмур (Лука 16:15). Бу, Јеһованын нормаларына әсасланан салеһликдир. Бу, ‘Аллаһын салеһлијидир’ (Ромалылара 1:17, ЈД; 3:21, ЈД).

4. Салеһлик нәјә ҝөрә мәсиһчи үчүн ваҹибдир?

⁴ Салеһлик нәјә ҝөрә мәсиһчи үчүн ваҹибдир? Чүнки Јеһова «салеһ Аллаһ»дыр вә халгы салеһлик тәзаһүр етдирәндә она лүтф ҝөстәрир (Мәзмур 4:1, ЈД; Сүлејманын мәсәлләри 2:20-22; Һабаггуг 1:13). Аллаһын ҝөзүндә дүз олмајан һәрәкәтләри едән инсан Онунла сых мүнасибәт гура билмәз (Сүлејманын мәсәлләри 15:8). Буна ҝөрә һәвари Павел Тимотеји ‘ҝәнҹлик еһтирасларындан гачмаға’ вә салеһликлә јанашы башга мүһүм кејфијјәтләри дә инкишаф етдирмәјә тәшвиг едирди (2 Тимотејә 2:22). Бу сәбәбдән Павел руһани зиреһләримизин мүхтәлиф һиссәләрини садалајанда ораја «салеһлик зиреһини» дә дахил етмишди (Ефеслиләрә 6:14).

5. Гејри-камил инсанлар ‘салеһлији неҹә ахтара’ биләрләр?

⁵ Сөзсүз, һеч бир инсан сөзүн әсл мә’насында салеһ дејил. Адәмдән ҝүнаһы мирас алдығымыз үчүн һамымыз дүнјаја ҝүнаһлы вә гејри-салеһ ҝәлирик. Буна бахмајараг, Иса ‘әввәлҹә салеһлији ахтармағы’ бизә мәсләһәт ҝөрүр. Бу неҹә мүмкүндүр? Иса өз камил һәјатыны бизим уғрумузда гурбан верди. Әҝәр онун ҝәтирдији гурбана иман едириксә, Јеһова бизим ҝүнаһларымызы бағышлајаҹаг (Матта 20:28; Јәһја 3:16; Ромалылара 5:8, 9, 12, 18). Јеһованын салеһ нормаларыны өјрәниб онлара риајәт етмәк үчүн сә’ј ҝөстәририксә, һәмчинин зәифликләримиз үзәриндә гәләбә чалмаға чалышырыгса, онда Јеһова бизә бол-бол хејир-дуа верәҹәк (Мәзмур 1:6; Ромалылара 7:19-25; Вәһј 7:9, 14). Неҹә дә тәсәлливериҹи бир фикирдир!

Шәрлә долу дүнјада салеһ олун

6. Еркән мәсиһчиләр үчүн дүнја нәјә ҝөрә тәһлүкәли иди?

⁶ Исанын шаҝирдләри «дүнјанын ән узаг јерләринә гәдәр» шаһидлик етмәк тапшырығы аланда чәтин бир вәзијјәтлә гаршылашдылар (Һәвариләрин ишләри 1:8). Онлара тә’јин едилән әрази бүтөвлүклә «шәририн һакимијјәти алтында» иди (1 Јәһја 5:19). Шејтан өз шәр руһуну бүтүн дүнјаја һопдурмушду вә мәсиһчиләр истәр-истәмәз дүнјанын зәһәрләјиҹи руһунун тә’сиринә мә’руз галаҹагдылар (Ефеслиләрә 2:2). Дүнја мәсиһчиләр үчүн чох тәһлүкәли иди. Онлар нөгсансызлыгларыны горумаг үчүн илк нөвбәдә Аллаһын салеһлијини ахтармалы вә тәһәммүл етмәли идиләр. Чохлары һәгигәтән дә, тәһәммүл едә билдиләр, амма ‘салеһлијин јолларындан’ дөнәнләр дә аз дејилди (Сүлејманын мәсәлләри 12:28; 2 Тимотејә 4:10).

7. Мәсиһчи һансы сәбәбләрә ҝөрә дүнјанын позуҹу тә’сиринә гаршы мүгавимәт ҝөстәрмәлидир?

⁷ Бәс бизим зәманә һаггында нә демәк олар? О, мәсиһчиләр үчүн тәһлүкәсиздими? Әсла јох! Дүнја биринҹи әсрдә олдуғундан даһа бетәрдир. Үстәлик, Шејтан да јер үзүнә атылыб вә «[гадынын] нәслиндән олан, Аллаһын әмрләринә риајәт едиб, Исаја олан шәһадәтләринә бағлы галан» мәсһ едилмиш мәсиһчиләрә гаршы амансыз мүһарибә апарыр (Вәһј 12:12, 17). Һәмчинин Шејтан ‘гадынын нәслиндән оланларын’ тәрәфдарларына да һүҹум едир. Бүтүн бунлара бахмајараг, мәсиһчиләр дүнјадан гача билмәзләр. Дүнјанын бир һиссәси олмасалар да, онлар бу дүнјада јашамалыдырлар (Јәһја 17:15, 16). Мәсиһчиләр, һәмчинин үрәкләри һәгигәтә мејлли оланлары тапмаг үчүн тәблиғ етмәли вә онлара Мәсиһин шаҝирдләри олмаға көмәк етмәлидирләр (Матта 24:14; 28:19, 20). Демәли, мәсиһчиләр бу дүнјанын позуҹу тә’сириндән тамамилә гача билмәсәләр дә, она гаршы мүгавимәт ҝөстәрмәлидирләр. Ҝәлин бу тә’сирләрдән дөрдүнү арашдыраг.

Әхлагсызлыг тәләси

8. Исраиллиләр нә үчүн моавлыларын аллаһларына сәҹдә етмәјә башладылар?

⁸ Сәһрадакы 40 иллик сәјаһәтин сонуна јахын исраиллиләрин бөјүк бир гисми салеһлик јолундан дөндү. Исраиллиләр Јеһованын онлары дөнә-дөнә хилас етмәсинин шаһиди олмушдулар вә артыг Вә’д едилмиш дијара дахил олмаға һазырлашырдылар. Бунунла белә, бу һәлледиҹи вахтда онлар моавлыларын аллаһларына сәҹдә етмәјә башладылар. Нә үчүн? Чүнки онлар ‘ҹисмани еһтираса’ ујдулар (1 Јәһја 2:16). Мүгәддәс Китабда јазылыб: «Исраил... кишиләри Моав гызлары илә зина етмәјә башладылар» (Сајлар 25:1).

9, 10. Өзүмүзү ҹисмани еһтирасын позуҹу тә’сириндән горумаг нәјә ҝөрә бу ҝүн хүсусилә ваҹибдир?

⁹ Бу гыса епизод ајдын шәкилдә ҝөстәрир ки, ҹисмани еһтирас еһтијатсызлары дүзҝүн јолдан чыхара биләр. Әхлагсызлығын бүтүн дүнјада нормал бир шеј сајылдығыны нәзәрә алараг, јахшы оларды ки, биз бу ҹүр һадисәләрдән өзүмүзә ибрәт дәрси ҝөтүрәк (1 Коринфлиләрә 10:6, 8). Бирләшмиш Штатлардан олан бир һесабатда гејд едилир: «1970-ҹи илләрәдәк, никаһдан әввәл бирҝә јашамаг Американын бүтүн штатларында ганунсуз сајылырды. Инди исә бу, артыг адәт һалыны алыб. Илк дәфә аилә гуранларын јарысындан чоху никаһдан әввәл бирҝә јашамышлар». Бу вә буна бәнзәр диҝәр јүнҝүл әхлаглы давраныш јалныз бир өлкәдә баш вермир. Онлар бүтүн дүнјада артыг нормал бир шеј кими гәбул едилир. Әфсуслар олсун ки, бә’зи мәсиһчиләр дә бу «ән’әнәјә» ујараг мәсиһчи мөвгеләрини итирибләр (1 Коринфлиләрә 5:11).

¹⁰ Демәк олар ки, бу ҝүн әхлагсызлығын тәблиғ едилмәдији јер галмајыб. Филмләр вә телевизија програмлары елә бир фикир ирәли сүрүр ки, ҝуја никаһдан әввәл ҹинси һәјат сүрмәкдә пис бир шеј јохдур, һомосексуал әлагә тамамилә нормал бир шејдир. Һәтта бир чох шоулар телевизија екранларындан ачыг-ашкар ҹинси акты ҝөстәрир. Порнографик сәһнәләрә Интернет васитәсилә асанлыгла јол тапмаг олар. Мәсәлән, бир гәзет мүхбири данышыр ки, једди јашлы оғлу мәктәбдән евә гајыданда һәјәҹанла атасына билдирир ки, синиф јолдашларындан бири Интернетдә чылпаг гадынларын секслә мәшғул олдугларыны ҝөстәрән бир сајта раст ҝәлиб. Оғланын атасы буну ешидәндә дәһшәтә ҝәлди. Амма ушагларын һамысымы бу ҹүр сајтлара раст ҝәлдикдә валидејнләринә хәбәр верир? Бәс ушағынын компүтер ојунларынын мәзмунундан нечә валидејнин хәбәри вар? Инди мүасир компүтер ојунларынын чоху ијрәнҹ әхлагсызлыг, демонизм вә зоракылыгла долудур.

11. Аилә өзүнү дүнјанын әхлагсыз тә’сириндән неҹә горуја биләр?

¹¹ Аилә бу ҹүр позғун әјләнҹә нөвләринә неҹә мүгавимәт ҝөстәрә биләр? Илк нөвбәдә Аллаһын салеһлијини ахтармагла вә әхлагсызлығын һәр һансы бир нөвү илә мәшғул олмагдан тамамилә имтина етмәклә сиз аиләнизи дүнјанын пис тә’сириндән горуја биләрсиниз (2 Коринфлиләрә 6:14; Ефеслиләрә 5:3). Валидејнләр ушагларына Јеһова Аллаһа вә Онун салеһ ганунларына мәһәббәт ашыламагла, о ҹүмләдән ушагларынын нә илә мәшғул олдугларына лазыми гајдада нәзарәт етмәклә, онлара порнографија, порнографик видео ојунлар, әхлагы позан видео филмләр вә Аллаһын ҝөзүндә салеһ олмајан диҝәр һәвәс ојадан әјләнҹә нөвләринә «јох» демәји өјрәдәҹәкләр (Ганунун тәкрары 6:4-9)a.

Јерли адәт-ән’әнәләрин мәнфи тә’сири

12. Биринҹи әср јығынҹагларынын бириндә һансы проблем мөвҹуд иди?

¹² Павел, Кичик Асијада јерләшән Листра шәһәриндә оларкән мө’ҹүзәви шәкилдә бир кишини сағалтды. Мүгәддәс Китабда дејилир: «Павелин нә етдијини ҝөрән халг, сәсини јүксәлдиб, Ликајонија дилиндә: “Танрылар инсан сурәтиндә јанымыза енибләр!” — дедиләр. Барнабаны Зевс, Павели исә баш натиг олдуғу үчүн Һермес адландырдылар» (Һәвариләрин ишләри 14:11, 12). Бир мүддәтдән сонра елә һәмин адамлар Павеллә Барнабаны өлдүрмәк истәдиләр (Һәвариләрин ишләри 14:19). Бәли, о адамлар әразиләриндә јашајан инсанларын тә’сири алтына тез дүшүрдүләр. Һәтта о әразиләрдә бир чохлары мәсиһчилији гәбул едәндә белә, бә’зи мөвһуми иманларындан һәлә әл чәкмәмишдиләр. Колос шәһәриндәки јығынҹаға јаздығы мәктубунда Павел мәсиһчиләри хәбәрдар едирди ки, «мәләкләрә пәрәстишдән» узаг дурсунлар (Колослулара 2:18).

13. Мәсиһчи һансы адәтләрлә әлагәсини кәсмәлидир вә бунун үчүн о гүввәни һарадан ала биләр?

¹³ Бу ҝүн дә мәсиһчиләр Мүгәддәс Китаб принсипләринә зидд ҝедән вә јанлыш дини фикирләрә әсасланан адәт вә ән’әнәләрдән өзләрини ҝөзләмәлидирләр. Мәсәлән, бә’зи өлкәләрдә доғум вә өлүмлә әлагәдар гејд олунан мәрасимләрин чоху инсан өләндән сонра ҝуја онун руһунун бәдәниндән чыхмасы илә бағлы јалан инанҹлара әсасланыр (Ваиз 9:5, 10). Башга өлкәләрдә гыз ушагларынын ҹинсијјәт органларыны шикәст едирләрb. Бу, әзаблы, тамамилә лазымсыз бир адәт мәсиһчи валидејнин өз ушағына ҝөстәрмәли олдуғу мәһәббәт вә гајғыны һеч ҹүр әкс етдирмир (Ганунун тәкрары 6:6, 7; Ефеслиләрә 6:4). Мәсиһчијә бу ҹүр јерли адәтләрлә әлагәни кәсмәјә нә көмәк едә биләр? Ҹаваб ајдындыр: мәсиһчи Јеһоваја бүтүн гәлби илә е’тибар етмәлидир (Мәзмур 31:6). Салеһ Аллаһ Јеһова Она бүтүн үрәји илә «О мәним сиғынаҹағымдыр, галамдыр, Аллаһымдыр, Она ҝүвәнирәм» дејә мүраҹиәт едәнләри мөһкәмләндирәҹәк вә онлара гајғы ҝөстәрәҹәк (Мәзмур 91:2; Сүлејманын мәсәлләри 29:25).

Јеһованы унутма

14. Вә’д едилмиш дијара ҝирмәздән әввәл Јеһова исраиллиләрә нә һагда хәбәрдарлыг етмишди?

¹⁴ Вә’д едилмиш дијара ҝирмәздән әввәл Јеһова исраиллиләри хәбәрдар етмишди ки, Ону унутмасынлар: «Еһтијатлы олун ки, Аллаһыныз Рәбби унутмајасыныз. Бу ҝүн сизә бујурдуғум Рәббин әмр, һөкм вә гајдаларына риајәт един. Јејиб дојанда, ҝөзәл евләр тикиб ичәрисиндә отуранда, нахырыныз, сүрүнүз чохаланда, гызыл-ҝүмүшүнүз вә һәр шејиниз артанда үрәјиниз гүрурла долмасын. Диггәт един ки... Аллаһыныз Рәбби унутмајасыныз» (Ганунун тәкрары 8:11-14).

15. Јеһованы унутмадығымыза неҹә әмин ола биләрик?

¹⁵ Бәс бу ҝүн белә бир һал баш верә биләрми? Бәли, әҝәр һәјатда үстүнлүјү ваҹиб шејләрә вермириксә, онда баш верә биләр. Лакин әҝәр һәјатымызда илк јерә Аллаһын салеһлијини гојуругса, онда Јеһова Аллаһа ибадәт һәјатымызда башлыҹа јери тутаҹаг. Павел бизи хидмәтимизин ваҹиблијини унутмамаға вә ‘һәр фүрсәтдән истифадә етмәјә’ тәшвиг едир (Колослулара 4:5; 2 Тимотејә 4:2). Амма биз истираһәти вә јахшы вахт кечирмәји јығынҹаг ҝөрүшләриндән вә тәблиғ хидмәтиндән даһа үстүн тутуругса, онда Јеһованы һәјатымызда икинҹи јерә гојмуш олуруг вә Ону тезликлә унуда биләрик. Павел дејирди ки, ахыр ҝүнләрдә инсанлар ‘зөвгү Аллаһдан чох севәҹәкләр’ (2 Тимотејә 3:4). Сәмими мәсиһчиләр белә фикирләрин онлара тә’сир едиб-етмәдијини ашкар етмәк үчүн өз һәрәкәтләрини тәһлил етмәлидирләр (2 Коринфлиләрә 13:5).

Өзүнүзү мүстәгиллик руһундан горујун

16. Һәвва, сонралар исә Павелин ҝүнләриндә јашајанлар һансы дүзҝүн олмајан руһу нүмајиш етдирирдиләр?

¹⁶ Һәлә Еден бағында икән Шејтан, Аллаһдан асылы олмамағы ҹазибәдар бир шәкилдә гәләмә верәрәк, Һәввада егоист һиссләр ојатды. Һәвва мүстәгил олмаг, нәјин јахшы, нәјин пис олдуғуну өзү мүәјјән етмәк истәди (Јарадылыш 3:1-6). Биринҹи әсрин Коринф јығынҹағында да бу ҹүр проблем мөвҹуд иди. Коринф мәсиһчиләринә елә ҝәлирди ки, онлар Павелдән даһа чох билирләр вә буна ҝөрә Павел онлары истеһза илә «фөвгәлһәвари» адландырырды (2 Коринфлиләрә 11:3-5; 1 Тимотејә 6:3-5).

17. Өзүмүзү мүстәгиллик руһундан горумагда бизә нә көмәк едәҹәк?

¹⁷ Бу ҝүн дүнјада инсанларын чоху ‘инадҹыл, мәғрурдурлар’. Әфсуслар олсун ки, бә’зи мәсиһчиләр дә бу ҹүр кејфијјәтләри тәзаһүр етдирирләр. Бә’зиләри һәтта һәгигәтә белә мүгавимәт ҝөстәрмәјә башлајыблар (2 Тимотејә 3:4, КМ; Филипилиләрә 3:18). Әҝәр ибадәтимизин тәмиз олмасыны истәјириксә, онда Јеһовадан рәһбәрлик алмалы, «садиг вә ағыллы гул» вә јығынҹаг ағсаггаллары илә әмәкдашлыг етмәлијик. Белә давранмагла биз Аллаһа салеһлији ахтардығымызы ҝөстәририк. Бу, бизи мүстәгиллик руһуну инкишаф етдирмәкдән горујаҹаг (Матта 24:45-47; Мәзмур 25:9, 10; Јешаја 30:21). Мәсһ едилмишләрин јығынҹағы «һәгигәтин дирәји вә әсасы»дыр. Јеһова бизи горумаг вә бизә рәһбәрлик ҝөстәрмәк үчүн ондан истифадә едир (1 Тимотејә 3:15). Әҝәр биз Јеһованын салеһ ирадәсини јеринә јетирмәкдә бу јығынҹағын ојнадығы ваҹиб ролу дәрк едиб, һәлимликлә онун ҝөстәришләринә риајәт едириксә, бу бизи «шөһрәтпәрәстликлә» давранмагдан горујаҹаг (Филипилиләрә 2:2-4; Сүлејманын мәсәлләри 3:4-6).

Исаны тәглид един

18. Биз Исаны һәјатын һансы саһәләриндә тәглид едә биләрик?

¹⁸ Иса һаггында Мүгәддәс Китаб пејғәмбәрлик едирди: «Салеһлији севиб пислијә нифрәт едирсән» (Мәзмур 45:7; Ибраниләрә 1:9). Һәгигәтән дә, Иса тәглид едилмәли бир инсандыр! (1 Коринфлиләрә 11:1). О, Јеһованын салеһ нормаларыны билмәклә јанашы, бу нормалары бүтүн үрәји илә севирди. Буна ҝөрә дә, Шејтан ону сәһрада имтаһана чәкәркән, Иса ‘салеһлик јолундан’ әсла дөнмәди (Сүлејманын мәсәлләри 8:20; Матта 4:3-11).

19, 20. ‘Салеһлији ахтармаг’ һансы јахшы нәтиҹәләри ҝәтирир?

¹⁹ Дүздүр, ҹисмани еһтирас чох ҝүҹлү ола биләр (Ромалылара 7:19, 20). Бунунла белә, әҝәр биз салеһлији гијмәтләндиририксә, пислијә нифрәт едәҹәјик (Мәзмур 119:165). Бизә гаршы пислик үз верәндә салеһлијә олан дәрин мәһәббәт бизи сипәр тәк мүдафиә едәҹәк (Сүлејманын мәсәлләри 4:4-6). Унутма, ҹисмани еһтираслара һәр дәфә тәслим оларкән биз Шејтана гәләбә чалдырырыг. Бунун әвәзинә она мүгавимәт ҝөстәрәрәк гәләбәни Јеһоваја газандырмаг нә гәдәр јахшы оларды! (Сүлејманын мәсәлләри 27:11; Јагуб 4:7, 8).

²⁰ Мәсиһчиләр ‘салеһлији ахтардыгларына’ ҝөрә ‘Аллаһын иззәти вә мәдһи үчүн Иса Мәсиһдән ҝәлән салеһлик бәһрәләринә’ маликдирләр (Филипилиләрә 1:10, 11). Онлар ‘Аллаһын бәнзәјишинә ҝөрә һәгиги салеһлик вә мүгәддәсликлә јарадылмыш јени мәнлији ҝејирләр’ (Ефеслиләрә 4:24). Мәсиһчиләр Јеһоваја мәхсусдурлар вә өзләрини дејил, Јеһованы мәмнун етмәк үчүн јашајырлар (Ромалылара 14:8; 1 Петер 4:2). Бу мәгсәд онларын дүшүнҹә вә һәрәкәтләринә истигамәт верир. Бизим сәмави Атамыз буна неҹә дә севинир! (Сүлејманын мәсәлләри 23:24).

[Һашијәләр]

Изаһ едә биләрсинизми?

• ‘Салеһлији ахтармаг’ нә үчүн ваҹибдир?

• Мәсиһчи гејри-камил олса да, салеһлији неҹә ахтара биләр?

• Мәсиһчи дүнјаја хас олан һансы әмәлләрдән өзүнү горумалыдыр?

• ‘Салеһлији ахтармаг’ бизи неҹә горујур?

[29-ҹу сәһифәдәки шәкил]

Ушағына Јеһованы севмәји өјрәдән валидејн ону әхлагсызлыгдан горујаҹаг.

[30-ҹу сәһифәдәки шәкил]

Исраиллиләрдән бә’зиләри Вә’д едилмиш дијарда фираванлыг ичиндә јашајандан сонра Јеһованы унутду.

[31-ҹи сәһифәдәки шәкил]

Иса кими, мәсиһчиләр дә пислијә нифрәт едирләр.

[32-ҹи сәһифәдәки шәкил]

Исанын шаҝирдләри үчүн дүнја чох тәһлүкәли иди.