Аллаһын нијјәтини јеринә јетирмәк үчүн ‘ишләрин идарәси’
‘[Аллаһ] Өз ирадәсинин гәрарына ҝөрә һәр шеји иҹра едир’ (ЕФЕСЛИЛӘРӘ 1:11).
1. 2006-ҹы ил апрелин 12-дә Јеһованын Шаһидләринин бүтүн јығынҹагларында һансы ҝөрүш кечириләҹәк?
ЧӘРШӘНБӘ ҝүнүнүн ахшамы 2006-ҹы ил апрелин 12-си тәхминән 16 милјон инсан Иса Мәсиһин Хатирә Ҝеҹәсини гејд етмәк үчүн топлашаҹаг. Бу мәрасимин кечириләҹәји һәр јердә, Исанын бәдәнинин рәмзи олан мајасыз чөрәк вә онун төкүлән ганыны тәмсил едән гырмызы шәраб олаҹаг. Хатирә Ҝеҹәсинин мә’насыны изаһ едән мә’рузә сөјләнилдикдән сонра, әввәлҹә чөрәк, сонра исә шәраб бүтүн иштирак едәнләрә өтүрүләҹәк. Јеһованын Шаһидләринин јалныз бә’зи јығынҹагларында бир вә ја бир нечә нәфәр бу символлардан гәбул едәҹәкдир. Лакин јығынҹагларын чохунда буну һеч ким етмәјәҹәк. Нәјә ҝөрә бу символлардан јер үзүндә јашамаг үмиди оланлар дејил, јалныз ҝөјдә јашамаг үмидинә малик олан азсајлы мәсиһчиләр гәбул едир?
2, 3. а) Јеһова һәр шеји Өз нијјәтинә мүвафиг олараг неҹә јарадырды? б) Јеһова Јер күрәсини вә бәшәријјәти һансы мәгсәдлә јаратмышдыр?
2 Јеһова Аллаһын нијјәти вардыр. О, Өз нијјәтини јеринә јетирәрәк ‘һәр шеји Өз ирадәсинин гәрарына ҝөрә иҹра едир’ (Ефеслиләрә 1:11). Јеһова башланғыҹда ваһид Оғлуну јаратды (Јәһја 1:1, 14; Вәһј 3:14). Сонра онунла бирликдә диҝәр руһани оғулларыны, јә’ни мәләкләри, Јер күрәсини вә инсанлар да дахил олмагла физики Каинаты јаратды (Әјјуб 38:4, 7; Мәзмур 103:19-21; Јәһја 1:2, 3; Колослулара 1:15, 16).
3 Христиан дүнјасынын бир чох килсәләриндә өјрәдилдији кими, Јеһова Јер күрәсини инсанлары сынамаг, сонра да лајиг оланлары ҝөјләр һәјатына ҝөтүрмәк үчүн јаратмамышды. О, Јери мүәјјән мәгсәдлә, «јашамаг үчүн» јаратмышды (Јешаја 45:18). Аллаһ Јери инсан, инсаны исә Јер үчүн јаратмышдыр (Мәзмур 115:16). Бүтүн Јер күрәси Ҹәннәтә чеврилмәли, орада салеһ инсанлар јашамалы вә ону беҹәриб, сахламалы идиләр. Илк инсан ҹүтүнүн нә вахтса ҝөјдә јашамасы Аллаһын нијјәтиндә јох иди (Јарадылыш 1:26-28; 2:7, 8, 15).
Јеһованын нијјәтинин јеринә јетмәси суал алтындадыр
4. Бәшәр тарихинин башланғыҹында Јеһованын һөкмранлыг һүгугу неҹә шүбһә алтына алынды?
4 Аллаһын руһани оғулларындан бири Она гаршы үсјан галдырды вә ирадә азадлығы ән’амындан суи-истифадә едәрәк Аллаһын нијјәтинә әнҝәл төрәтмәк гәрарына ҝәлди. О, Аллаһа мәһәббәтлә табе оланлар арасында һөкм сүрән сүлһү позду. Шејтан илк инсан чүтүнү Јеһоваја итаәтсиз олмаға тәһрик етди (Јарадылыш 3:1-6). О, Јеһованын гүввәјә малик олуб-олмадығыны дејил, Онун һөкмранлыг һүгугуну вә һакимијјәтинин әдаләтлилијини шүбһә алтына гојду. Беләликлә, Јеһованын һөкмранлығына даир мүбаһисәли суал илк дәфә бурада, јер үзүндә, бәшәр тарихинин башланғыҹында галдырылмышдыр.
5. Һансы икинҹи мүбаһисәли суал галдырылмышды вә бу кимләрә аид иди?
5 Әјјубун ҝүнләриндә Шејтан Јеһованын Каинатда һөкмранлыг етмәк һүгугу илә бағлы икинҹи мүбаһисәли суалы да галдырды. О, инсанларын вә мәләкләрин сәмимилијини шүбһә алтына алды. Шејтан иддиа едирди ки, онлар Јеһоваја худбин мәгсәдләрлә итаәт вә хидмәт едирләр, сынаға чәкилдикләри тәгдирдә исә Аллаһдан үз дөндәрәҹәкләр (Әјјуб 1:7-11; 2:4, 5). Иблисин галдырдығы суал Аллаһын јердәки хидмәтчиләринә аид олса да, бу суал Јеһованын руһани оғулларына, һәтта Онун ваһид Оғлуна да тохунурду.
6. Јеһова Өз нијјәтинә вә адынын мә’насына неҹә садиг галды?
6 Нијјәтинә вә адынын мә’насына садиг галараг Јеһова Өзүнүн Пејғәмбәр вә Хиласкар олмасына јол вердиa. О, Шејтана демишди: «Мән сәнинлә гадын арасына, сәнин баланла [«зүрријјәтинлә», КМ] онун өвлады [«зүрријјәти», КМ] арасына дүшмәнчилик салырам. Бу өвлад [«зүрријјәт», КМ] сәнин башындан вураҹаг, сән дә ону дабанындан санҹаҹагсан» (Јарадылыш 3:15). Јеһова ‘гадынын’ Зүрријјәти, јә’ни Өз тәшкилатынын сәмави һиссәсинин васитәсилә Шејтанын мејдан охумасына ҹаваб вермәк вә Адәмин өвладларына азад олунмаг вә јашамаг үмидини вермәк фикриндә иди (Ромалылара 5:21; Галатијалылара 4:26, 31).
Онун ирадәсинин мүгәддәс сирри
7. Јеһова һәвари Павелин васитәсилә һансы нијјәтини ачыглады?
7 Һәвари Павел Ефес шәһәриндәки мәсиһчиләрә јаздығы мәктубунда Јеһованын Өз нијјәтини јеринә јетирмәк үчүн ишләри неҹә идарә етдијини чох ҝөзәл изаһ етди. О јазмышды: «Аллаһ, Мәсиһдә нијјәт етдији Өз илтифатына ҝөрә, Өз ирадәсинин [«мүгәддәс», ЈД] сиррини бизә билдирди. Вахт тамам олдугда [«ишләрин идарәси васитәсилә», ЈД] иҹра едиләҹәк бу нијјәт, һәм ҝөјләрдә, һәм дә јердә олан һәр шеји Мәсиһин башчылығы алтында бирләшдирмәкдир» (Ефеслиләрә 1:9, 10). Јеһованын иззәтли нијјәти ондан ибарәтдир ки, Каинатда Ону севән вә јекдилликлә Онун һөкмранлығына итаәт едәнләр јашасын (Вәһј 4:11). Онда Шејтанын јаланы ифша олунаҹаг, Јеһованын ады иззәтләнәҹәк вә Онун мүгәддәс ирадәси «ҝөјдә олдуғу кими, јердә дә» јеринә јетәҹәкдир (Матта 6:10).
8. «Ишләрин идарә едилмәси» кими тәрҹүмә олунан сөзүн мә’насы нәдир?
8 Павелин јаздығы кими, Јеһованын «илтифаты», јә’ни нијјәти «ишләрин идарәси» васитәсилә јеринә јетәҹәк. Павелин бурада ишләтдији сөзүн һәрфи мә’насы «ев ишләрини ҝөрмәк» демәкдир; бу сөз һеч бир һөкумәт органына, мәсәлән, Хиласкар Падшаһлыға аид дејилb. Јеһованын Өз нијјәтини јеринә јетирәрәк ишләри ҝөрмәк үсулу, әсрләр бојунҹа ачыгладығы ‘мүгәддәс сирлә’ бағлыдыр (Ефеслиләрә 1:10; 3:9).
9. Јеһова Өз нијјәтинин мүгәддәс сиррини тәдриҹән неҹә ачыглајырды?
9 Јеһова Еден бағында вә’д етдији Зүрријјәтлә бағлы нијјәтинин неҹә јеринә јетәҹәјини, бағладығы бир сыра әһдләр васитәсилә тәдриҹән ачыглајырды. Ибраһимлә бағладығы әһддән мә’лум олду ки, Зүрријјәт Ибраһимин нәслиндән ҝәләҹәк вә онун васитәсилә ‘бүтүн милләтләр’ хејир-дуа алаҹаг. Бу әһд, һәмчинин нәзәрдә тутурду ки, Зүрријјәтин әсас һиссәси илә јанашы, икинҹи дәрәҹәли һиссә дә олаҹаг (Јарадылыш 22:17, 18). Јеһованын Исраил халгы илә бағладығы Ганун әһди, Онун «каһинләр сәлтәнәти» јаратмаг нијјәтиндә олдуғуну ҝөстәрди (Чыхыш 19:5, 6). Давудла бағланан әһд Зүрријјәтин ‘әбәдијјән’ падшаһлыг едәҹәјини ачыглады (2 Шамуел 7:12, 13; Мәзмур 89:3, 4). Ганун әһди јәһудиләри Мәсиһин ҝәлишинә һазырладыгдан сонра, Јеһова Өз нијјәтинин һәјата кечмәсинә даир нөвбәти ачыгламалары етди (Галатијалылара 3:19, 24). Зүрријјәтин әсас һиссәси илә бағлы оланлар пејғәмбәрлик едилмиш ‘каһинләр сәлтәнәтини’ тәшкил едәҹәк, онларла — јени, руһани ‘Исраиллә’ ‘јени әһд’ бағланаҹагды (Јеремја 31:31-34; Ибраниләрә 8:7-9)c.
10, 11. а) Вә’д едилмиш Зүрријјәтин ким олдуғуну Јеһова неҹә ҝөстәрди? б) Аллаһын ваһид Оғлу нәјә ҝөрә јер үзүнә ҝәлмишди?
10 Аллаһ ‘ишләри’ елә ‘идарә едирди’ ки, Зүрријјәт, нијјәтинә мүвафиг олараг, тә’јин олунмуш вахтда јер үзүнә ҝәлди. Јеһова Ҹәбрајыл мәләји Мәрјәмин јанына ҝөндәриб, бир ушаг доғаҹағы вә адыны Иса гојаҹағы һагда хәбәр вермәји тапшырды. Мәләк она деди: «О, бөјүк олаҹаг, Һагг-Таала Аллаһын Оғлу адланаҹагдыр; вә Рәбб Аллаһ Она атасы Давудун тахтыны верәҹәкдир. Әбәди олараг Јагубун соју үзәриндә һөкмранлыг едәҹәк вә Онун Сәлтәнәтинин [Падшаһлығынын] сону олмајаҹагдыр» (Лука 1:32, 33). Вә’д едилмиш Зүрријјәтин ким олдуғу белә ајдын олду (Галатијалылара 3:16; 4:4).
11 Јеһованын ваһид Оғлу јер үзүнә ҝәлмәли вә ахыра гәдәр имтаһан олунмалы иди. Шејтана гәти ҹавабын верилмәси тамамилә Исадан асылы иди. О, Атасына садиг галаҹагдымы? Бу, мүгәддәс сиррин бир һиссәси иди. Бир гәдәр сонра һәвари Павел, Исанын јер үзүнә ҝәлмәсинин мәғзини изаһ едәрәк, демишдир: «Кимсә инкар етмәз ки, Аллаһ јолунун [«мүгәддәс», ЈД] сирри бөјүкдүр: ...[Иса] бәдәндә зүһур етди, Руһ тәрәфиндән тәсдиг олунду, мәләкләрә ҝөрүндү, халглар арасында тәблиғ олунду, дүнјада иманла гаршыланды, иззәтлә јухары галдырылды» (1 Тимотејә 3:16). Бәли, Иса өлүмәдәк садиг галараг Шејтанын мејдан охумасына гәти ҹаваб верди. Лакин мүгәддәс сиррин бә’зи тәфсилатлары һәлә дә ачылмамыш галырды.
Аллаһын Падшаһлығынын мүгәддәс сирри
12, 13. а) Аллаһын Падшаһлығынын мүгәддәс сирринин бир һиссәси нәдән ибарәтдир? б) Бә’зи инсанлары ҝөјләр һәјатына һазырламаг үчүн Јеһоваја нә етмәк лазым ҝәлди?
12 Галилејадакы тәблиғ сәјаһәтләриндән бириндә Иса ҝөстәрди ки, мүгәддәс сирр онун Хиласкар Падшаһлығы илә сых бағлыдыр. О, шаҝирдләринә деди: «Ҝөјләрин Падшаһлығынын [«Аллаһын Падшаһлығынын», Марк 4:11] сиррләрини билмәк сизә верилмишдир» (Матта 13:11, И–93). Бу сиррин бир һиссәси Јеһова тәрәфиндән «кичик сүрү»нүн, 144 000 нәфәр адамын сечилмәси иди; онлар Зүрријјәтин бир һиссәсини тәшкил едәрәк, Онун Оғлу илә бирликдә ҝөјдә падшаһлыг етмәли идиләр (Лука 12:32; Вәһј 14:1, 4).
13 Инсанлар јер үзүндә јашамаг үчүн јарадылыблар, буна ҝөрә мәсһ едилмишләрин ҝөјә ҝедә билмәси үчүн, Јеһоваја ‘јени мәхлуглар’ јаратмаг лазым ҝәлди (2 Коринфлиләрә 5:17). Белә үмидә малик оланлардан бири, һәвари Петер јазырды: «Рәббимиз Иса Мәсиһин Аллаһы вә Атасына һәмд олсун ки, Өз бөјүк мәрһәмәтинә ҝөрә, Иса Мәсиһин өлүләрдән дирилмәси илә јенидән доғулмамызы тә’мин едиб, бизи јашајан бир үмидә, ҝөјләрдә сизин үчүн сахланмыш, чүрүмәз, ләкәсиз, солмаз бир мираса чатдырды» (1 Петер 1:3, 4).
14. а) Аллаһын Падшаһлығынын мүгәддәс сирри гејри-јәһудиләрлә неҹә бағлыдыр? б) Биз «Аллаһын дәрин дүшүнҹәләрини» нәјин сајәсиндә баша дүшүрүк?
14 Мүгәддәс сиррин диҝәр һиссәси ондан ибарәт иди ки, Јеһова Исанын сәмави һакимијјәт шәрикләринин сырасына гејри-јәһудиләри дә дахил етмәк гәрарына ҝәлди. Павел Јеһованын ‘ишләри идарә етмәсинин’ бу ҹәһәтини белә изаһ етди: «Бу сирр башга нәсилләрдә инсан оғулларына, инди Мәсиһин мүгәддәс һәвариләринә вә пејғәмбәрләринә Руһ васитәсилә ачылдығы кими ачылмамышды. Сирр будур ки, јәһуди олмајанлар да Мүждә васитәсилә ејни мирасын ортаглары, ејни бәдәнин үзвләри вә Мәсиһ Исада ҝерчәкләшән вә’дин шәрикләридир» (Ефеслиләрә 3:5, 6). Мүгәддәс сиррин баша дүшүлмәси ‘мүгәддәс һәвариләрә’ ачыгланды. Буна бәнзәр тәрздә, әҝәр мүгәддәс руһун көмәји олмасајды, биз «Аллаһын дәрин дүшүнҹәләрини» баша дүшмәздик (1 Коринфлиләрә 2:10; 4:1; Колослулара 1:26, 27).
15, 16. Јеһова нәјә ҝөрә Мәсиһин һакимијјәт шәрикләрини инсанлардан сечди?
15 «Гузу» илә сәмави Сион дағында дуран «јүз гырх дөрд мин адам» һаггында дејилир ки, онлар «јер үзүндә», ‘Аллаһа вә Гузуја [Иса Мәсиһә] аид оланларын илки олмаг үчүн инсанлар арасындан сатын алынмышлар’ (Вәһј 14:1-4). Јеһованын Еден бағында һаггында данышдығы Зүрријјәтин әсас һиссәси Онун илкин Оғлу олду. Бәс онда нә үчүн Аллаһ Мәсиһин Падшаһлыг шәрикләрини инсанлардан сечди? Һәвари Павел изаһ едир ки, бу инсанлар «Онун [Јеһованын] мурадына ҝөрә», «ирадәсинин илтифатына» ҝөрә дә’вәт олундулар (Ромалылара 8:17, 28-30; Ефеслиләрә 1:5, 11; 2 Тимотејә 1:9).
16 Јеһованын нијјәти Өз бөјүк вә мүгәддәс адыны иззәтләндирмәк вә һакимијјәтинә бәраәт газандырмагдыр. О, ‘ишләри идарә етмәкдә’ мүгајисәјә ҝәлмәз мүдриклик тәзаһүр етдирәрәк, Оғлу өлүмәдәк имтаһан олунсун дејә ону јер үзүнә ҝөндәрди. Бундан әлавә Јеһова гәрара ҝәлди ки, Оғлунун Хиласкар Падшаһлығына өлүмәдәк садиг галан инсанлар дахил олаҹаг (Ефеслиләрә 1:8-12; Вәһј 2:10, 11).
17. Мәсиһ вә онун һакимијјәт шәрикләринин нә вахтса инсан кими јашадыглары бизи нәјә ҝөрә севиндирир?
17 Оғлуну јерә ҝөндәрмәклә вә Мәсиһин һакимијјәт шәрикләрини инсанларын арасындан сечмәклә, Јеһова Адәмин нәсилләринә гаршы бөјүк мәһәббәт тәзаһүр етдирди. Аллаһын илк хидмәтчиси олан Һабилдән башлајараг Онун мүасир хидмәтчиләринәдәк һамы бундан һансы фајданы әлдә едир? Өлүм вә ҝүнаһын гуллары олан гејри-камил инсанлара руһани вә физики шәфа вериләҹәк вә онлар, Јеһованын бәшәријјәт үчүн илк нијјәтинә мүвафиг олараг, камиллијә ҝәтириләҹәкләр (Ромалылара 5:12). Јер үзүндә әбәди һәјаты сәбирсизликлә ҝөзләјән бизләр үчүн, сәмави Падшаһын јер үзүндә оларкән шаҝирдләринә ҝөстәрдији мәһәббәт вә хејирхаһлығы бизә дә тәзаһүр етдирәҹәјини билмәк чох тәсәлливериҹидир (Матта 11:28, 29; Ибраниләрә 2:17, 18; 4:15; 7:25, 26). Мәсиһлә бирҝә ҝөјдә падшаһ вә каһин кими хидмәт едәҹәк иманлы киши вә гадынларын бизим кими нә вахтса зәифликләрлә мүбаризә апардыгларыны вә һәјатын чәтинликләринин өһдәсиндән ҝәлдикләрини билмәк неҹә дә тәсәлливериҹидир! (Ромалылара 7:21-25).
Јеһованын нијјәти јеринә јетәҹәк
18, 19. Павелин Ефеслиләрә 1:8-11 ајәләриндә јазылан сөзләр бизим үчүн инди нәјә ҝөрә даһа ајдындыр вә нөвбәти мәгаләдә нә мүзакирә едиләҹәк?
18 Инди биз һәвари Павелин мәсһ едилмиш мәсиһчиләрә Ефеслиләрә 1:8-11 ајәләриндә јаздығы сөзләрини даһа ајдын баша дүшүрүк. Онун сөзләринә ҝөрә Јеһова «Өз ирадәсинин мүгәддәс сиррини» онлара ачыглады, онлар ‘Мәсиһдә мираса наил олдулар’ вә «Өз ирадәсинин гәрарына ҝөрә һәр шеји иҹра Едәнин мәгсәдинә әсасән әввәлдән тә’јин едилдиләр». Биз ҝөрүрүк ки, Јеһованын ‘ишләри идарә етмәси’ Онун нијјәтинин јеринә јетмәсинә чох ҝөзәл хидмәт едир. Бу, һәмчинин бизә көмәк едир ки, Рәббин ахшам јемәјинә ҝәләнләрдән нәјә ҝөрә јалныз бә’зиләринин символлардан гәбул етмәсини баша дүшәк.
19 Нөвбәти мәгаләдән биз Мәсиһин Хатирә Ҝеҹәсинин ҝөјләр үмидинә малик олан мәсиһчиләр үчүн һансы мә’на кәсб етдијини вә јер үзүндә әбәди јашамаг үмидинә малик оланларын бу мәрасимин символик мә’насы илә нәјә ҝөрә дәриндән марагланмалы олдуғуну ҝөрәҹәјик.
[Һашијәләр]
a Аллаһын адынын һәрфи мә’насы «олмасына сәбәб Олан» демәкдир. Нијјәтини һәјата кечирмәк үчүн Јеһова истәдији Кәс ола биләр (Чыхыш 3:14, ЈД).
b Павелин сөзләриндән ҝөрүнүр ки, «ишләрин идарә едилмәси» артыг онун ҝүнләриндә гүввәдә иди, һалбуки Мүгәддәс Јазылар Хиласкар Падшаһлығын 1914-ҹү илдә тә’сис едилдијини ҝөстәрир.
c Аллаһын нијјәтинин јеринә јетмәсинә аид олан әһдләрин даһа әтрафлы изаһаты үчүн «Ҝөзәтчи Гүлләси»нин 1989-ҹу ил 1 ијул сајынын 10-15-ҹи сәһифәләринә (рус.) бахын.
Тәкрар үчүн суаллар
• Јеһова Јер күрәсини вә инсанлары һансы мәгсәдлә јаратмышдыр?
• Јеһованын ваһид Оғлунун өлүмәдәк имтаһан олунмасы нәјә ҝөрә лазым иди?
• Јеһова нәјә ҝөрә Мәсиһин һакимијјәт шәрикләрини инсанлардан сечмишдир?