Јалан диндән кәнар дурун!
«Рәбб дејир: “Имансызларын арасындан чыхын вә онлардан ајрылын; мурдар бир шејә тохунмајын”» (2 КОРИНФЛИЛӘРӘ 6:17).
1. Бир чох сәмими инсанларын руһани вәзијјәти нә јердәдир?
БИР чох сәмими инсанлар Аллаһ һаггында һәгигәти вә бәшәријјәти ҝәләҹәкдә нә ҝөзләдијини билмирләр. Бу инсанлар онлары нараһат едән дәрин руһани суаллара ҹаваб тапмајараг, чашгынлыг вә гејри-мүәјјәнлик ичиндә јашајырлар. Милјонларла инсан Јараданымызы тәһгир едән мөвһуматларын, мәрасим вә бајрамларын әсарәти алтындадыр. Чох еһтимал ки, гоншуларын вә гоһумларын арасында одлу ҹәһәннәм, үч үгнум, ҹанын өлмәзлији вә бу кими диҝәр јалан тә’лимләрә инанан инсанлар вар.
2. Дини рәһбәрләр нә етмишләр вә бу нәјә ҝәтириб чыхарды?
2 Белә ҝениш јајылмыш руһани зүлмәтә ҝөрә ким мәс’улијјәт дашыјыр? Тәәҹҹүблү олса да, бу диндир, јә’ни Аллаһын һәгигәтинә зидд тә’лимләри јајан дини тәшкилатлар вә онларын руһаниләридир (Марк 7:7, 8). Нәтиҹәдә, бир чох инсанлар һәгиги Аллаһа ибадәт етдикләрини фикирләшдији һалда, әслиндә Ону тәһгир едирләр. Бәли, јаранан аҹынаҹаглы вәзијјәтә ҝөрә мәһз јалан дин мәс’улијјәт дашыјыр.
3. Јалан динин әсас һимајәдары кимдир вә Мүгәддәс Китабда о неҹә тәсвир едилир?
3 Јалан динин архасында ҝөзәҝөрүнмәз бир мәхлуг дурур. Онун һаггында һәвари Павел дејирди: «Бу әсрин танрысы имансызларын зеһинләрини кор етмишдир ки, ҝөрүнмәз Аллаһын сурәти олан Мәсиһин иззәти һаггындакы Мүждәнин нуру онлары ајдынлатмасын» (2 Коринфлиләрә 4:4). Бәли, «бу әсрин танрысы» мәһз Шејтан Иблисдир. О, јалан динин әсас һимајәдарыдыр. Павел јазырды: «Иблис дә нур мәләји ҹилдинә ҝирәр. Буна ҝөрә дә иблисин хидмәткарлары салеһлик хидмәткарлары ҹилдинә ҝирәрләрсә, бу гејри-ади бир шеј дејил» (2 Коринфлиләрә 11:14, 15). Шејтан шәри хејир кими гәләмә верир вә инсанлары јалана инандырмаг үчүн, һәр ҹүр кәләјә әл атыр.
4. Аллаһын гәдим исраиллиләрә вердији Ганунунда јаланчы пејғәмбәрләр һаггында нә дејилирди?
4 Тәәҹҹүблү дејил ки, јалан дин Мүгәддәс Китабда ҹидди сурәтдә мүһакимә едилир. Мәсәлән, Аллаһ Мусаја вердији ганунун васитәсилә сечилмиш халгына јаланчы пејғәмбәрләрә гаршы ачыг хәбәрдарлыг едирди. Јалан тә’лимләри вә јаланчы аллаһлара ибадәти јајан һәр бир кәс ‘өлдүрүлмәли иди, чүнки [исраиллиләри] Аллаһа гаршы ҝетмәјә сөвг едирди’. Исраиллиләрә ‘пислији араларындан јох етмәк’ тапшырылмышды (Ганунун тәкрары 13:1-5). Бәли, Јеһова Аллаһын нөгтеји-нәзәринҹә јалан дин шәрдир (Језекел 13:3).
5. Биз бу ҝүн һансы хәбәрдарлыглара гулаг асмалыјыг?
5 Иса Мәсиһ вә онун һәвариләри дә јалан динә ејни мүнасибәти бәсләјирдиләр. Иса шаҝирдләринә хәбәрдарлыг етмишди: «Јаланчы пејғәмбәрләрдән горунун; онлар јаныныза гојун ҹилдиндә ҝәләрләр, амма дахилдә вәһши гурддурлар» (Матта 7:15; Марк 13:22, 23). Павел јазырды: «Һәгигәти һагсызлыға әсир едән инсанларын һәр ҹүр аллаһсызлыг вә һагсызлығына гаршы Аллаһын гәзәби ҝөјдән кәшф олунур» (Ромалылара 1:18). Һәгиги мәсиһчиләрин бу хәбәрдарлыглара риајәт етмәләри вә јалан тә’лимләри јајмагла Аллаһын Кәламындакы һәгигәтләри «әсир едән», јә’ни онлары боған һәр бир инсандан кәнар дурмалары неҹә дә ваҹибдир! (1 Јәһја 4:1).
«Бөјүк Бабилдән» чыхын
6. «Бөјүк Бабил» Мүгәддәс Китабда неҹә тәсвир едилир?
6 Ҝәлин Мүгәддәс Јазыларын «Вәһј» китабында јалан динин неҹә тәсвир едилдијини нәзәрдән кечирәк. О, падшаһлыглар вә онларын халглары үзәриндә һакимијјәти олан сәрхош фаһишә кими тәсвир едилир. Бу символик гадын бир чох падшаһларла зина едир. О, Аллаһын һәгиги хидмәтчиләринин ганындан сәрхош олуб (Вәһј 17:1, 2, 6, 18). Гадынын алнында онун чиркин мә’нәвијјатыны вә позғунлуғуну әкс етдирән ады јазылыб — «Бөјүк Бабил, дүнјанын фаһишәләринин вә ијрәнҹликләринин анасы» (Вәһј 17:5).
7, 8. Јалан дин һансы мә’нада фаһишәлик едиб вә бу нәјә ҝәтириб чыхарыб?
7 Мөвҹуд олан бүтүн јалан динләр мүнасиб олараг Мүгәддәс Китабда Бөјүк Бабил кими тәсвир едилир. Минләрлә јалан динләр рәсми сурәтдә бир үмумдүнја тәшкилатда бирләшмәсәләр дә, онларын мәгсәд вә фәалијјәти ејнидир. «Вәһј» китабында фаһишә кими тәсвир едилән јалан дин дөвләтләр үзәриндә чох бөјүк тә’сирә маликдир. О, евлилик андына садиг галмајан гадын кими, бу вә ја диҝәр дөвләтләрлә сазишләр бағлајараг фаһишәлик едир. Шаҝирд Јагуб јазырды: «Еј вәфасызлар, мәҝәр билмирсиниз ки, дүнја илә достлуг Аллаһа гаршы дүшмәнчиликдир? Демәли, ким дүнјаја дост олмаг истәјирсә, өзүнү Аллаһын дүшмәни едир» (Јагуб 4:4).
8 Јалан динин сијасәтә гарышмасы инсанлара чох әзаб-әзијјәт ҝәтириб. Африкалы сијаси аналитик Онена Мангу гејд едир ки, «дүнја тарихи, динин сијасәтә гарышмасы нәтиҹәсиндә баш вермиш күтләви гырғын нүмунәләри илә долудур». Бу јахынларда бир гәзетдә гејд едилмишдир: «Ән ганлы вә ҝәрҝин тоггушмалар динлә бағлыдыр». Милјонларла инсанлар динин дәстәкләдији мүһарибәләрдә һәјатларыны итирмишләр. Бөјүк Бабил һәтта Аллаһын һәгиги хидмәтчиләрини белә тә’гиб едир вә онлары өлдүрүрдү, бунунла да, санки онларын ганындан сәрхош олуб (Вәһј 18:24).
9. Јеһованын јалан динә нифрәт етмәси «Вәһј» китабындан неҹә ҝөрүнүр?
9 Јеһованын јалан динә нифрәт бәсләмәси, Бөјүк Бабили ҝөзләјән агибәтдән бәллидир. Вәһј 17:16 ајәсиндә дејилир: «Ҹанаварда ҝөрдүјүн о он бујнуз исә фаһишәјә нифрәт едиб, ону пәришан едиб, чылпаг гојаҹаглар, әтини јејәҹәкләр вә ону одла јандыраҹаглар». Илк нөвбәдә нәһәнҝ ҹанавар ону парча-парча едиб өлдүрәҹәк, әтини исә јејәҹәк. Сонра онун галан һиссәләри тамамилә јандырылаҹаг. Дүнја дөвләтләри тезликлә јалан динлә мәһз бу ҹүр давранаҹаг. Белә етмәјә онлары Аллаһ сөвг едәҹәк (Вәһј 17:17). Јалан динин дүнја империјасы олан Бөјүк Бабил мәһвә мәһкум олунуб. О, «артыг тапылмајаҹагдыр» (Вәһј 18:21).
10. Бөјүк Бабилә гаршы биз һансы мөвгени тутмалыјыг?
10 Аллаһын һәгиги хидмәтчиләри Бөјүк Бабилә гаршы һансы мөвгени тутмалыдырлар? Мүгәддәс Китабда ачыг-ајдын дејилир: «Еј халгым, орадан чыхын ки, онун ҝүнаһларына шәрик олмајасыныз вә онун бәлаларынын биринә дүчар олмајасыныз» (Вәһј 18:4). Хилас олунмаг истәјәнләр, һәлә ки ҝеҹ дејил јалан дини тәрк етмәлидирләр. Иса Мәсиһ јердә оланда пејғәмбәрлик етмишдир ки, бир чохлары онун давамчысы олдуғуну јалныз сөздә иддиа едәҹәкләр (Матта 24:3-5). Беләләринә Иса дејир: «Мән сизи һеч вахт танымамышам, јанымдан чәкилин, һагсызлыг едәнләр!» (Матта 7:23). Һал-һазырда тахтда отуран Падшаһ Иса Мәсиһин јалан динлә һеч бир әлагәси јохдур.
Јалан диндән неҹә кәнар дурмалы?
11. Јалан ибадәтдән неҹә кәнар дура биләрик?
11 Јалан дини тә’лимләри рәдд етмәклә һәгиги мәсиһчиләр јалан ибадәтдән кәнар дурурлар. Бу о демәкдир ки, биз Аллаһ вә Онун Кәламы һаггында јаланы јајан дини програмлара нә радиода гулаг асыр, нә дә телевизорда бахырыг, һәтта белә мә’лумат олан дини әдәбијјатлары да охумуруг (Мәзмур 119:37). Бу, һәмчинин ону да нәзәрдә тутур ки, биз, јалан динлә бағлы һәр һансы бир тәшкилатын спонсорлуг етдији иҹтимаи мәрасим вә әјләнҹәләрдә иштирак етмирик. Биз һеч бир јолла јалан дини дәстәкләмирик (1 Коринфлиләрә 10:21). Белә етмәклә ‘Мәсиһә дејил, инсан ән’әнәсинә, дүнјанын ибтидаи гүввәтләринә әсасланараг, фәлсәфә вә бош һијлә илә киминсә бизи әсир алмасына’ јол вермирик (Колослулара 2:8).
12. Инсан јалан динлә әлагәни неҹә кәсә биләр?
12 Бәс әҝәр Јеһованын Шаһиди олмаг истәјән бир кәс јалан дини тәшкилатын рәсми үзвүдүрсә, онда неҹә? Чох вахт, инсанын мәхсус олдуғу дини тәшкилатдан чыхмасы барәдә әризәси ҝөстәрир ки, о, јалан динин үзвү олмаг истәмир. Лакин јалан динин чиркабындан там азад олмаг үчүн она гәти аддымлар атмаг хүсусилә ваҹибдир. Шаһид олмаг истәјән адамын һәрәкәтләриндән онун кечмиш һәмиманлыларына вә диҝәр инсанлара ајдын олмалыдыр ки, о, тәшкилатын үзвлүјүндән чыхыб.
13. Мүгәддәс Китаб бизи јалан ибадәтдән кәнар дурмаға неҹә тәшвиг едир?
13 Һәвари Павел јазырды: «Имансызларла ејни бојундуруға ҝирмәјин. Ахы салеһлик илә ганунсузлуг арасында нә ортаглыг ола биләр? Ишыгла гаранлыг арасында нә шәриклик ола биләр? Мәсиһ илә Белиал арасында нә ујғунлуг ола биләр? Јахуд иманлы илә имансыз арасында нә мүштәрәк шеј ола биләр? Аллаһын мә’бәдинин бүтләрлә нә разылығы ола биләр?.. Буна ҝөрә, Рәбб дејир ки, “Имансызларын арасындан чыхын вә онлардан ајрылын; мурдар бир шејә тохунмајын”» (2 Коринфлиләрә 6:14-17). Биз бу сөзләрә риајәт етмәклә јалан ибадәтдән кәнар дуруруг. Бәс Павелин бу сөзләри јалан динин нүмајәндәләриндән дә кәнар дурмағы тәләб едирми?
«Һикмәтли давранын»
14. Јалан ибадәтә мәнсуб олан инсанлардан өзүмүзү тамамилә тәҹрид етмәлијикми? Изаһ един.
14 Аллаһын һәгиги хидмәтчиләри јалан динә мәнсуб олан инсанларла һәр бир әлагәдән гачынмалыдылармы? Иманымыза шәрик олмајан инсанлардан өзүмүзү тамамилә тәҹрид етмәлијикми? Јох. Ән бөјүк әмрләрдән бириндә «гоншуну өзүн кими сев» дејилир (Матта 22:39). Гоншуларымызла Падшаһлыг һаггында хош хәбәрлә бөлүшәндә, Мүгәддәс Китабы өјрәнәндә вә онлара јалан ибадәтдән кәнар дурмағын ваҹиблијини изаһ едәндә, мәһәббәт тәзаһүр етдирмиш олуруг.
15. ‘Дүнјадан олмамаг’ нә демәкдир?
15 Гоншуларымыза хош хәбәри тәблиғ етмәјимизә бахмајараг, Исанын давамчылары олан бизләр ‘бу дүнјадан дејилик’ (Јәһја 15:19). Бурада ишләнилән «дүнја» сөзү Аллаһдан узаглашмыш инсан ҹәмијјәтини нәзәрдә тутур (Ефеслиләрә 4:17-19; 1 Јәһја 5:19). Биз Јеһованы тәһгир едән әһвал-руһијјә, нитг вә давраныш тәрзиндән узаг дурмагла дүнјадан ајрылмышыг (1 Јәһја 2:15-17). Бундан әлавә, «пис достлуг јахшы әхлагы позар» принсипинә мүвафиг олараг, биз мәсиһчи нормаларына ујғун јашамајан инсанларла достлуг етмирик (1 Коринфлиләрә 15:33). Дүнјадан олмамаг өзүмүзү ондан ‘ләкәсиз сахламаг’ демәкдир (Јагуб 1:27). Демәли, дүнјадан ајры дурмаг өзүмүзү, сөзүн һәрфи мә’насында инсанлардан тәҹрид етмәк демәк дејил (Јәһја 17:15, 16; 1 Коринфлиләрә 5:9, 10).
16, 17. Мәсиһчиләр Мүгәддәс Китаб һәгигәтләрини билмәјән инсанлара неҹә мүнасибәт бәсләмәлидирләр?
16 Белә һалда, Мүгәддәс Китаб һәгигәтләрини билмәјән инсанлара гаршы мүнасибәтимиз неҹә олмалыдыр? Павел Колос шәһәриндәки јығынҹаға јазмышды: «Һәр фүрсәтдән истифадә едәрәк, хариҹдәкиләрлә һикмәтли давранын. Гој сөзүнүз һәмишә нәвазишли олсун вә она дуз гатылмыш кими олсун ки, сиз һәр адама неҹә ҹаваб вермәк лазым олдуғуну биләсиниз» (Колослулара 4:5, 6). Һәвари Петер исә демишди: «Рәбб Аллаһы үрәкләриниздә тәгдис един. Малик олдуғунуз үмид барәсиндә сиздән һесабат истәјән һәр кәсә һәмишә мүлајимликлә вә еһтирамла ҹаваб вермәк үчүн һазыр олун» (1 Петер 3:15). Павел мәсиһчиләрә ‘һеч кимә ифтира атмамағы, гејри-давакар, мүлајим олуб, бүтүн инсанлара там һәлимлик ҝөстәрмәји’ мәсләһәт ҝөрүрдү (Титуса 3:2).
17 Јеһованын Шаһидләри олдуғумуз үчүн, биз инсанларла кобуд давранмыр вә өзүмүзү тәкәббүрлү апармырыг. Биз, һәмчинин диҝәр динләрә мәнсуб олан инсанлар һаггында тәһгирамиз данышмырыг. Әксинә, тәблиғ етдијимиз инсан, гоншу вә ја иш јолдашымыз бизә хош мүнасибәт бәсләмәсә вә ја тәһгир етсә белә, өзүмүзү нәзакәтли апарырыг (Колослулара 4:6; 2 Тимотејә 2:24).
‘Сәһиһ сөзләри һифз един’
18. Јалан динә гајыданларын руһани вәзијјәти нә јердәдир?
18 Һәгигәти билә-билә киминсә јалан динә гајытмасы неҹә дә кәдәрлидир! Мүгәддәс Китабда бу һәрәкәтин нә дәрәҹәдә аҹынаҹаглы олдуғу белә тәсвир едилир: «Чүнки әҝәр онлар, Рәбб вә Хиласкарымыз Иса Мәсиһи танымаг васитәсилә дүнјанын мурдарлыгларындан гачыб гуртардыгдан сонра, һәмин мурдарлыглара јенидән гапылыб мәғлуб олурларса, онларын сон һалы илкиндән даһа пис олар... Онларын башына бу доғру мәсәлдә дејиләнләр ҝәлди: “Ит өз гусунтусунун үстүнә гајыдар” вә: “Чимдирилмиш донуз, палчыгда ағнамаға гајыдар”» (2 Петер 2:20-22).
19. Руһани сағламлығымыз үчүн тәһлүкә төрәдән һәр бир шејә гаршы нәјә ҝөрә ајыг олмалыјыг?
19 Руһани сағламлығымыз үчүн тәһлүкә төрәдән һәр бир шејә гаршы ајыг олмалыјыг. Белә тәһлүкә исә һәмишә мөвҹуддур. Һәвари Павел хәбәрдарлыг етмишди: «Руһ исә ајдын шәкилдә дејир ки, ахыр заманларда бә’зиләри имандан дөнәҹәк, јолдан чыхаран руһлара вә ҹинләрин тә’лимләринә гулаг асаҹаглар» (1 Тимотејә 4:1). Биз ‘ахыр заманларын’ сонунда јашајырыг. Јалан ибадәтдән кәнар дурмајанлар ‘јолдан чыхармаг үчүн һазырланан һијләләрлә, һәр ҹүр тә’лимин күләји илә чалхалана вә ора-бура сүрүкләнә’ биләрләр (Ефеслиләрә 4:13, 14).
20. Јалан динин зәрәрли тә’сириндән өзүмүзү неҹә горуја биләрик?
20 Јалан динин зәрәрли тә’сириндән өзүмүзү неҹә горуја биләрик? Јеһова бизим гајғымыза галмаг үчүн Өз Кәламы олан Мүгәддәс Китабы вериб (2 Тимотејә 3:16, 17). О, һәмчинин «садиг вә ағыллы гул» васитәсилә бизи зәнҝин руһани гида илә тә’мин едир (Матта 24:45). Һәгигәт бизә ајдын олдугҹа, ‘јеткин инсанлар үчүн’ нәзәрдә тутулан ‘бәрк јемәјә’ иштаһамызы артырмалы вә һәгигәт һаггында билијимизи дәринләшдирән јығынҹаг ҝөрүшләринә ҝәлмәлијик (Ибраниләрә 5:13, 14, ЈД; Мәзмур 26:8). Ҝәлин, өјрәндијимиз ‘сәһиһ сөзләри һифз етмәк’ үчүн Јеһованын тәгдим етдији һәр бир шејдән там истифадә едәк (2 Тимотејә 1:13). Мәһз белә етмәклә јалан ибадәтдән кәнар дура биләрик.
Сиз нә өјрәндиниз?
• «Бөјүк Бабил» нәдир?
• Јалан диндән неҹә кәнар дура биләрик?
• Руһани сағламлығымыза зәрәр ҝәтирә биләҹәк һансы шејләрдән гачынмалыјыг?
[18-ҹи сәһифәдәки шәкил]
«Бөјүк Бабилин» нә үчүн әхлагсыз гадын кими тәсвир едилдијини билирсәнми?
[19-ҹу сәһифәдәки шәкил]
«Бөјүк Бабил» мәһвә мәһкум едилиб.
[21-ҹи сәһифәдәки шәкил]
Иманымыза шәрик олмајанларла биз ‘мүлајимлик вә еһтирамла’ давранырыг.