‘Сүрүјә нүмунә олан’ чобанлар
‘Сизә һәвалә олунан сүрүнү көнүллү вә шөвглә отарын. Сүрүјә нүмунә олун’ (1 ПЕТЕР 5:2, 3).
1, 2. а) Иса һәвари Петерә һансы үстүнлүјү е’тибар етди вә нәјә ҝөрә демәк олар ки, о, Исанын е’тимадыны доғрултду? б) Јеһова тә’јин етдији чобанлара һансы һиссләри бәсләјир?
ЕРАМЫЗЫН 33-ҹү илинин Пентикост ҝүнүндән бир аз әввәл Петер вә диҝәр алты шаҝирд Галилеја дәнизинин саһилиндә Исанын һазырладығы сәһәр јемәјини јејирдиләр. Петер дирилмиш Исаны бундан габаг да ҝөрмүшдү вә шүбһәсиз ки, онун сағ олмасына чох шад иди. Бунунла белә о, нараһатчылыг кечирә биләрди: бир нечә ҝүн бундан әввәл һамынын гаршысында Исаны таныдығыны инкар етмишди (Лука 22:55-60; 24:34; Јәһја 18:25-27; 21:1-14). Иса, пешман олан Петери иманынын чатышмадығы үчүн мәзәммәт етдими? Хејр. Әксинә, о, Петерә ‘гојунларыны’ једирмәк вә отармаг үстүнлүјүнү е’тибар етди (Јәһја 21:15-17). Мүгәддәс Китабда јазылан еркән мәсиһчи јығынҹағынын тарихиндән ҝөрүнүр ки, Петер Исанын е’тимадыны доғрултду. О, сәрт имтаһанлара бахмајараг, Јерусәлимдәки ағсаггалларла вә диҝәр һәвариләрлә бирҝә, сүр’әтлә артан мәсиһчи јығынҹағыны отарырды (Һәвариләрин ишләри 1:15-26; 2:14; 15:6-9).
2 Бизим ҝүнләрдә дә Јеһова Иса Мәсиһин васитәсилә мүнасиб кишиләри руһани чобан тә’јин едиб ки, Онун сүрүсүнү бәшәр тарихинин ән ағыр дөврүндән кечирсинләр (Ефеслиләрә 4:11, 12; 2 Тимотејә 3:1). Бәс бу чобанлар Исанын е’тимадыны доғрулдурлармы? Бәли. Араларында сүлһүн һөкм сүрдүјү үмумдүнја гардашлығы буна сүбутдур. Доғрудур, Петер кими, бу чобанлар да бә’зән сәһвләрә јол верирләр (Галатијалылара 2:11-14; Јагуб 3:2). Буна бахмајараг, Јеһова Оғлунун ‘ганы баһасына әлдә етдији’ гојунларын гајғысына галмағы онлара е’тибар едиб (Һәвариләрин ишләри 20:28, һашијәјә бахын). Јеһова бу кишиләрә дәрин мәһәббәт бәсләјир вә онлары «икигат һөрмәтә лајиг» сајыр (1 Тимотејә 5:17).
3. Руһани чобанлар көнүллүлүјү вә шөвгү горумагда нәјин көмәјинә ҝүвәнирләр?
3 Тә’јинатларында көнүллүлүк вә шөвг нүмајиш етдирмәкдә руһани чобанлар сүрүјә нүмунәдирләр. Бәс бу руһу горумагда онлара нә көмәк едир? Петер вә биринҹи әсрдәки диҝәр чобанлар кими, онлар да мәс’улијјәт јүкләрини дашымаға гүввә верән мүгәддәс руһа ҝүвәнирләр (2 Коринфлиләрә 4:7). Мүгәддәс руһ онларда руһун сәмәрәсинә дахил олан мәһәббәт, севинҹ, сүлһ, сәбир, лүтфкарлыг, јахшылыг, сәдагәт [«иман», ЈД], һәлимлик вә өзүнә һаким олмаг кими кејфијјәтләри јетишдирир (Галатијалылара 5:22, 23). Ағсаггаллар, Аллаһын онлара һәвалә етдији сүрүнүн гајғысына галараг, руһун сәмәрәсини тәзаһүр етдирмәкдә бизә һансы нүмунәни верирләр? Ҝәлин бу суалы арашдыраг.
Сүрүјә вә һәр гојуна мәһәббәт
4, 5. а) Јеһова вә Иса сүрүјә мәһәббәтләрини неҹә тәзаһүр етдирирләр? б) Чобанларын сүрүјә олан мәһәббәтләри һансы ишләриндән ҝөрүнүр?
4 Аллаһын руһунун јетишдирдији ән ваҹиб кејфијјәт мәһәббәтдир. Јеһова, бүтүн сүрүнү севдијини, ону руһани гида илә бол-бол тә’мин етмәклә ҝөстәрир (Јешаја 65:13, 14; Матта 24:45-47). Лакин Јеһова сүрүнү јалныз гидаландырмагла кифајәтләнмир, О, ајры-ајрылыгда һәр бир гојунун гајғысына мәһәббәтлә галыр (1 Петер 5:6, 7). Иса да сүрүнү севир. Онун уғрунда һәтта ҹаныны гурбан вериб. Иса һәр гојуну ‘ады илә’ таныјыр (Јәһја 10:3, 14-16).
5 Руһани чобанлар Јеһовадан вә Исадан нүмунә ҝөтүрүрләр. Аллаһын сүрүсүнә бүтөвлүкдә севҝи бәсләмәләри јығынҹаға ‘тә’лим вермәләриндән’ бәллидир. Чобанларын Мүгәддәс Китаба әсасланан мә’рузәләри сүрүнү гидаландырыр вә горујур. Онларын бу ағыр зәһмәти һамынын ҝөзү гаршысындадыр (1 Тимотејә 4:13, 16). Бундан савајы, ағсаггаллар јығынҹағын һесабатларына бахыр, мәктублашма апарыр, ҹәдвәлләр тәртиб едир, јығынҹаг ҝөрүшләринин вә онунла бағлы башга ишләрин «әдәблә вә низамла» кечмәси үчүн диҝәр ишләрлә дә мәшғул олурлар (1 Коринфлиләрә 14:40). Лакин бу ишләрин чоху вә онлара сәрф едилән вахт јығынҹаг үзвләринин нәзәринә чарпмыр вә аз гијмәтләндирилир. Бу һәгигәтән дә мәһәббәтдән ирәли ҝәлән әмәкдир! (Галатијалылара 5:13).
6, 7. а) Ағсаггалларын тәблиғчиләрлә јахындан таныш олмасынын үсулларындан бири һансыдыр? б) Һиссләримизи арабир ағсаггалла бөлүшмәк нәјә ҝөрә фајдалыдыр?
6 Мәһәббәтли ағсаггаллар јығынҹағын һәр үзвүнә шәхси мараг ҝөстәрмәјә чалышырлар (Филипилиләрә 2:4). Ағсаггалын тәблиғчи илә јахындан таныш олмасынын үсулларындан бири онунла тәблиғә ҝетмәкдир. Иса шаҝирдләри илә тез-тез тәблиғә чыхырды вә бу имкандан истифадә едәрәк онлары руһландырырды (Лука 8:1). Бир тәҹрүбәли мәсиһчи ағсаггалы дејир: «Мәним фикримҹә, баҹы-гардашларла таныш олмағын вә онлары руһландырмағын ән јахшы үсулларындан бири онларла тәблиғ етмәкдир». Әҝәр сән јығынҹаг ағсаггаллары илә сон вахтлар тәблиғдә олмамысанса, нәјә ҝөрә тезликлә буну етмәјәсән?
7 Мәһәббәт Исаны шаҝирдләринин севинҹ вә дәрдләринә шәрик олмаға тәшвиг едирди. Мәсәлән, онун 70 шаҝирди тәблиғдән севинҹли гајыданда, о да ‘севинди’ (Лука 10:17-21). Лакин Лазарын өлүмүнүн Мәрјәмә, онун аилә үзвләри вә достларына неҹә тә’сир етдијини ҝөрәндә, «Иса ағлады» (Јәһја 11:33-35). Гајғыкеш чобанлар да гојунларын кечирдији һиссләрә е’тинасыз јанашмырлар. Мәһәббәт онлары ‘севинәнләрлә севинмәјә, ағлајанларла ағламаға’ тәшвиг едир (Ромалылара 12:15). Һәјатында севиндириҹи вә ја кәдәрли һадисәләр баш верәндә, өз һиссләрини ағсаггалларла бөлүшмәјә чәкинмә. Сәнин севинҹин онлары руһландыраҹаг (Ромалылара 1:11, 12). Сынагларын һагда хәбәрдар олдугда, сәни мөһкәмләндирәҹәк вә тәсәлли верәҹәкләр (1 Салоникилиләрә 1:6; 3:1-3).
8, 9. а) Бир ағсаггал һәјат јолдашына олан мәһәббәтини неҹә тәзаһүр етдирирди? б) Аиләсинә олан мәһәббәтини тәзаһүр етдирмәк ағсаггал үчүн нә дәрәҹәдә ваҹибдир?
8 Чобанын сүрүјә олан мәһәббәти, хүсусилә дә аиләсилә неҹә давранмасындан ҝөрүнүр (1 Тимотејә 3:1, 4). Ағсаггалын һәјат јолдашына ҝөстәрдији мәһәббәт вә һөрмәт евли гардашлар үчүн нүмунәдир (Ефеслиләрә 5:25; 1 Петер 3:7). Линда адлы баҹымызын јолдашы өлмәздән әввәл 20 илдән артыг иди ки јығынҹагда ағсаггал хидмәт едирди. Баҹы дејир: «Јолдашым һәмишә јығынҹаг ишләрилә мәшғул иди, лакин гојмурду ки, өзүмү лазымсыз һисс едим. Она дәстәк олдуғум үчүн тез-тез мәнә миннәтдарлығыны билдирирди. Бош вахтыны мәнимлә кечирирди. Буна ҝөрә севилдијими һисс едирдим вә јығынҹаг ишләринә ону гысганмырдым».
9 Әҝәр ағсаггалын ушаглары варса, онлары мәһәббәтлә тәрбијәләндирмәси вә тез-тез тә’рифләмәси диҝәр валидејнләр үчүн нүмунәдир (Ефеслиләрә 6:4). Гардашын мүгәддәс руһ тәрәфиндән чобан тә’јин едилмәси онун е’тибара лајиг олдуғуну ҝөстәрир. Аиләсинә тәзаһүр етдирдији мәһәббәт исә сүбут едир ки, о бу е’тибары доғрулдур (1 Тимотејә 3:4, 5).
Ачыг үнсијјәт севинҹ вә сүлһ ҝәтирир
10. а) Јығынҹагда севинҹ вә сүлһә нә пис тә’сир ҝөстәрә биләр? б) Биринҹи әсрдә һансы мәсәлә јығынҹагда сүлһү тәһлүкә алтына атмышды вә һәмин мәсәлә неҹә һәлл олунду?
10 Мүгәддәс руһ мәсиһчинин үрәјиндә, ағсаггаллар шурасында вә бүтүн јығынҹагда севинҹ вә сүлһ јетишдирә биләр. Лакин кифајәт гәдәр ачыг үнсијјәт олмаса, бу, јығынҹағын сүлһүнү позар, ону севинҹдән мәһрум едәр. Гәдимдә јашамыш Сүлејман јазырды: «Мәсләһәтсиз нијјәт боша чыхар» (Сүлејманын мәсәлләри 15:22). Диҝәр тәрәфдән, һөрмәтҹил вә ачыг үнсијјәт севинҹ вә сүлһә сәбәб олур. Мәсәлән, биринҹи әсрдә сүннәт һаггында галхмыш суал јығынҹагда сүлһү тәһлүкә алтына атанда, Јерусәлимдә јерләшән рәһбәрлик шурасы мәсәләни һәлл етмәк үчүн мүгәддәс руһун рәһбәрлијинә мүраҹиәт етди. Һәмчинин һәр ағсаггал өз нөгтеји-нәзәрини ачыг сөјләди. Ҹанлы мүзакирәдән сонра онлар мүәјјән бир гәрара ҝәлдиләр. Јекдилликлә гәбул етдикләри гәрар јығынҹаглара е’лан едиләндә, гардашлар «бу үрәкләндириҹи нәсиһәтә севиндиләр» (Һәвариләрин ишләри 15:6-23, 25, 31; 16:4, 5). Јығынҹагда севинҹ вә сүлһ горунду.
11. Ағсаггаллар јығынҹагда севинҹ вә сүлһү неҹә горујурлар?
11 Еләҹә дә бу ҝүн, ағсаггалларын бир-бирилә ачыг үнсијјәт етмәси бүтүн јығынҹагда севинҹ вә сүлһү горујур. Һансыса бир проблем јығынҹагда сүлһү тәһлүкә алтына атанда онлар бир јерә топлашараг фикирләрини ачыг сөјләјирләр. Онлар шуранын диҝәр ағсаггалларынын да фикирләрини һөрмәтлә динләјирләр (Сүлејманын мәсәлләри 13:10; 18:13). Дуада Аллаһын мүгәддәс руһуну истәдикдән сонра Мүгәддәс Китаб принсипләринин вә «садиг вә ағыллы гул»ун тәгдим етдији рәһбәрлијин әсасында гәрар верирләр (Матта 24:45-47; 1 Коринфлиләрә 4:6). Ағсаггаллар шурасы Мүгәддәс Јазылара әсасланан гәрар гәбул етдикдә, һәр ағсаггал, һәтта фикри әксәријјәтинкиндән фәргләнсә дә, мүгәддәс руһун рәһбәрлијинә табе олараг бу гәрары дәстәкләјир. Мәһз бу ҹүр тәзаһүр етдирилән тәвазөкарлыг јығынҹагда севинҹ вә сүлһү горујур вә гојунлара Аллаһла јеримәкдә ҝөзәл нүмунә верир (Микеја 6:8). Бәс сән, ағсаггаллар шурасынын Мүгәддәс Китаба әсасланан гәрарларына тәвазөкарлыгла табе олурсанмы?
Сәбирли вә лүтфкар
12. Нәјә ҝөрә Исаја һәвариләри илә үнсијјәт едәркән сәбирли вә лүтфкар олмаг лазым ҝәлирди?
12 Һәвариләринин дәфәләрлә сәһвләрә јол вермәсинә бахмајараг, Иса онларла сәбир вә лүтфкарлыгла давранырды. Мәсәлән, о, тәвазөкар олмағын ваҹиблијини дөнә-дөнә вурғулајырды (Матта 18:1-4; 20:25-27). Јер үзүндәки һәјатынын сон ҝеҹәсиндә, шаҝирдләринин ајагларыны јумагла онлара тәвазөкарлыға даир дәрс верди. Лакин дәрһал сонра шаҝирдләрин «арасында бир мүбаһисә... олду: онлардан ким ән бөјүк сајылмалыдыр» (Лука 22:24; Јәһја 13:1-5). Иса һәвариләрини мәзәммәт етдими? Јох, о, һәвариләри илә лүтфкарлыгла мүлаһизә јүрүтмәјә башлады: «Ким даһа бөјүкдүр: сүфрәдә отуран, јохса хидмәт едән? Сүфрәдә отуран дејилми? Мән исә сизин аранызда хидмәткар кимијәм» (Лука 22:27). Ҝөзәл нүмунәсилә јанашы Исанын сәбри вә лүтфкарлығы, сөзсүз ки, шаҝирдләрин үрәјиндә дәрин из бурахды.
13, 14. Чобанын лүтфкар олмасы хүсусилә нә вахт ваҹибдир?
13 Буна бәнзәр тәрздә, ағсаггал сәһв иш ҝөрән адама бир нечә дәфә мәсләһәт вермәли ола биләр. Ағсаггал бу инсанын әлиндән әсәбиләшә биләр. ‘Интизамсызлара нәсиһәт верәркән’ ағсаггал һәрдән өзүнүн дә сәһвләрә јол вердијини унутмамалыдыр. Белә олдугда, чобанлары да дахил етмәклә, бүтүн мәсиһчиләрә сәбир вә лүтфкарлыгла јанашан Јеһова вә Исадан нүмунә ҝөтүрмәк она асан олаҹаг (1 Салоникилиләрә 5:14; Јагуб 2:13).
14 Һәрдән ағсаггаллара ҹидди ҝүнаһ ишләдәни төһмәт етмәк лазым ҝәлир. Һәмин инсан төвбә етмирсә, ағсаггаллар ону јығынҹагдан кәнар етмәлидирләр (1 Коринфлиләрә 5:11-13). Һәтта белә һалларда онларын ҝүнаһкарла рәфтар етмә тәрзи ҝөстәрир ки, онлар ҝүнаһкара дејил, ҝүнаһа нифрәт едирләр (Јәһуда 23). Чобанларын она гаршы лүтфкар мүнасибәтини ҝөрдүкдә, ола билсин, јолуну азмыш гојуна вахт кечдикдән сонра сүрүјә гајытмаг асан олаҹаг.
Иманын тәшвиги илә едилән јахшы әмәлләр
15. Чобанлар Јеһованын хејирхаһлығыны неҹә тәглид едирләр вә буну етмәјә онлары нә тәшвиг едир?
15 Јеһова һамыја, һәтта нашүкүрләрә гаршы ‘хејирхаһдыр’ (Мәзмур 145:9; Матта 5:45). Онун хејирхаһлығы халгыны Падшаһлыг һаггында мүждәни тәблиғ етмәјә ҝөндәрмәсиндән хүсусилә ҝөрүнүр (Матта 24:14). Чобанлар тәблиғ ишиндә рәһбәрлији өз үзәрләринә ҝөтүрәрәк Аллаһын хејирхаһлығыны әкс етдирирләр. Онлары јорулмадан чалышмаға нә тәшвиг едир? Јеһоваја вә Онун вә’дләринә олан мөһкәм иман (Ромалылара 10:10, 13, 14).
16. Чобанлар гојунлара неҹә ‘јахшылыг едә’ биләрләр?
16 Ағсаггаллар тәблиғ едәрәк ‘һамыја јахшылыг едирләр’. Лакин онларын ‘хүсусән иманлылар аиләсинә јахшылыг етмәк’ мәс’улијјәтләри дә вар (Галатијалылара 6:10). Мәсәлән, онлар чобан башчәкмәләри едәрәк баҹы-гардашларыны руһландырырлар. Бир ағсаггал дејир: «Мән чобан башчәкмәси етмәји хошлајырам. Бу мәнә баҹы-гардашлары ҝөстәрдикләри сә’јә ҝөрә тә’рифләмәк вә онлары ағыр әмәкләринин гијмәтләндирилдијинә әмин етмәк имканыны верир». Ағсаггаллар вахташыры олараг Јеһоваја хидмәтин мүәјјән саһәсини тәкмилләшдирмәјә даир тәблиғчиләрә мәсләһәтләр верә биләрләр. Белә етмәклә мүдрик чобанлар һәвари Павелин нүмунәсини тәглид едирләр. Ҝөрүн Павел Салоникдәки мәсиһчиләрә һансы сөзләрлә мүраҹиәт етмишди: «Биз дә Рәббә ҝүвәнәрәк, сиздән әминик ки, сизә вердијимиз ҝөстәришләрә әмәл едирсиниз вә едәҹәксиниз» (2 Салоникилиләрә 3:4). Әминлији ифадә едән сөзләр гојунлары јахшы ишләрә тәшвиг едир вә ‘рәисләрә итаәт етмәк’ онлара даһа асан олур (Ибраниләрә 13:17). Әҝәр ағсаггал сәнә руһландырыҹы башчәкмә едибсә, нәјә ҝөрә она миннәтдарлығыны билдирмәјәсән?
Һәлимлик өзүнә һаким олмағы тәләб едир
17. Петер Исадан нә өјрәнди?
17 Исаны өзүндән чыхармаға чалышанда белә о, һәлимлик ҝөстәрирди (Матта 11:29). О әлә верилиб һәбс едиләндә дә һәлимлик вә өзүнә һаким олмағы тәзаһүр етдирмишди. Гәзәбини сахлаја билмәјән Петер гылынҹыны чыхарыб Исаны һәбс едәнин әвәзини верди. Лакин Иса она хатырлатды: «Елә дүшүнүрсән, Мән инди Атамдан риҹа едә билмәрәм ки, он ики леҝиондан чох мәләји Мәним сәрәнҹамыма ҝөндәрсин?» (Матта 26:51-53; Јәһја 18:10). Петер Исанын она вердији дәрси јахшы мәнимсәди. Бир гәдәр вахтдан сонра о, мәсиһчиләрә хатырладырды: «Мәсиһ... бизә бир нүмунә гојараг, бизим үчүн изтираб чәкди ки, биз Онун изләри илә ҝедәк... Сөјүләркән, ҹавабында сөјмәди; әзаб чәкәркән, тәһдид етмәди» (1 Петер 2:21-23).
18, 19. а) Чобан өзүнә һаким олмағы вә һәлимлији хүсусилә нә вахт тәзаһүр етдирмәлидир? б) Нөвбәти мәгаләдә һансы суаллар арашдырылаҹаг?
18 Буна бәнзәр тәрздә, јахшы чобанлар, һәтта кимсә онларла әдаләтсиз даврананда белә, һәлимлик ҝөстәрирләр. Мәсәлән, көмәјә еһтијаҹы оланлардан бә’зиләри ағсаггалын онлара көмәк етмәк ҹәһдләринә мәнфи реаксија ҝөстәрә биләрләр. Әҝәр көмәјә еһтијаҹы олан адам руһани ҹәһәтдән зәиф вә ја хәстәдирсә, о, мәсләһәт верән ағсаггалы ‘дили илә гылынҹ кими јаралаја’ биләр (Сүлејманын мәсәлләри 12:18). Лакин чобанлар Исанын нүмунәсини тәглид едәрәк нә үнванларына кәскин сөзләр дејиләндә ҹаваб гајтарыр, нә дә ки, әдаләтсиз давранышын әвәзини чыхырлар. Бу гардашлар өзләринә һаким олмаға вә һәмин инсанларын һиссләрини баша дүшмәјә чалышырлар. Бу, көмәјә еһтијаҹы оланлара хејир-дуа ола биләр (1 Петер 3:8, 9). Сән ағсаггалларын нүмунәсини тәглид едир вә мәсләһәт аланда өзүнә һаким олуб, һәлимлик тәзаһүр етдирирсәнми?
19 Шүбһәсиз, Јеһова илә Иса үмумдүнја јығынҹағын гајғысына галан минләрлә ағсаггалын ағыр әмәјини јүксәк гијмәтләндирирләр. Јеһова вә Онун Оғлу ‘мүгәддәсләрә хидмәт етмәкдә’ ағсаггаллара көмәк едән минләрлә хидмәти көмәкчиләрә дә дәрин мәһәббәт бәсләјирләр (Ибраниләрә 6:10). Бәс онда нијә бә’зи вәфтиз олунмуш гардашлар бу ‘хејирли ишә’ ҹан атмырлар? (1 Тимотејә 3:1). Јеһова чобан тә’јин етдији кишиләрә неҹә тә’лим верир? Бу суаллары нөвбәти мәгаләдә арашдыраҹағыг.
Јадыныздадырмы?
• Чобанларын сүрүнү севдикләри һансы ишләриндән ҝөрүнүр?
• Јығынҹағын һәр үзвү јығынҹагда севинҹ вә сүлһү горумаг үчүн нә едә биләр?
• Чобанлар мәсләһәт верәндә нәјә ҝөрә сәбир вә лүтфкарлыгла давранырлар?
• Ағсаггаллар хејирхаһлығы вә иманы неҹә тәзаһүр етдирирләр?
[18-ҹи сәһифәдәки шәкил]
Ағсаггаллар мәһәббәтдән ирәли ҝәләрәк јығынҹаға хидмәт едирләр.
[18-ҹи сәһифәдәки шәкилләр]
Онлар аиләләри илә истираһәт едир...
...вә онларла хидмәтә чыхырлар.
[20-ҹи сәһифәдәки шәкил]
Ағсаггаллар арасында ачыг үнсијјәт јығынҹагда севинҹ вә сүлһ олмасына сәбәб олур.